Author: webrwanda

Perezida w’u Rwanda, Nyakubahwa Paul Kagame abona umusifuzi yararenganyije umunyezamu w’Amavubi, Kwizera Olivier ku ikarita itukura yamuhaye ku mukino wa ¼ Amavubi yatsinzwemo na Guinea Conakry.

Ni ikarita uyu munyezamu yabonye ku munota wa 52 nyuma yo kwemeza ko yakoreye ikosa rutahizamu Yakhouba Barry, ni naho haje kuva igitego Amavubi yatsinzwe muri uyu mukino, iyi karita ntiyavuzweho rumwe na b’abantu batandukanye.

Uyu munsi ubwo yari yasuye ikipe y’igihugu nyuma yo kuva muri CHAN 2020, Perezida Paul Kagame yavuze ko bitwaye neza ariko na none ku mukino wa ¼ umunyezamu Olivier Kwizera yarenganye atari akwiriye ikarita itukura, ku giti cye abona akarita y’umuhondo yari yabonye ihagije.

Ati'mwitaye neza abantu barabikurkiye, kuba mutarageze ku mukino wa nyuma ngo mutware igikombe, niyo yari intego ikwiye no kuba intego, ariko aho mwageze bitewe n’ibyo mwakoreyemo muri rusange umuntu wese arabashima ko mwakoze neza kandi mukomereze aho.'

'Ibindi ntiriwe njyamo ngo bitazana amatiku, umukino mwatsinzwe narawukurikiye ariko nabonye harimo ibintu, ntabwo ndi umusifuzi ariko iyo nza kuba umusifuzi umukino mba narawugenjeje ukundi kuntu kurusha uko wagenze. Umunyezamu ari hehe? Ibyari byabaye mbere ngira ngo umunyezamu bari bahaye umuhondo wari uhagije, uko waje guhinduka umutuku ntibisobanutse. Ngenda nkurikirana naje no kubona umutoza n’umusifuzi baraho bahana(bahuje ibipfunsi) bati akazi turakujuje.'

Uyu mukino wa ¼ wabaye ku Cyumweru tariki ya 31 Mutarama 2021 Amavubi yakinaga na Guinea mu mukino wa ¼ cya CHAN 202o irimo kubera muri Cameroun.

Ubwo umukino wari ugeze ku munota 52, umunyezamu Kwizera Olivier yaje kwisanga asigaranye na rutahizamu wa Guinea, Yakhouba Barry ashaka uburyo amubuza gutambuka kugira ngo ajye gutsinda, yisanga amukoreye ikosa ritavuzweho rumwe.

Umusifuzi w’umunya-Maroc, Samir Guezzaz yahise asifura ikosa ndetse aha uyu munyezamu ikarita y’umuhondo.

Nyuma yo gutanga ikarita y’umuhondo yaje no guhamagarwa ajya kureba kuri VAR, aho yahise aza maze ahanagura ikarita y’umuhondo yari yamahuye amuha umutuku, umukino wari ugeze ku munota wa 56.

Iyi karita ntiyavuzweho rumwe kuko benshi bavugaga ko nta hantu na hamwe uyu mukinnyi yigeze akora kuri uyu rutahizamu.

Perezida Kagame yavuze ko ubusanzwe yakundaga gukurikirana iby’umupira w’Amaguru mu Rwanda ariko ko nyuma yaje gusa nk’aho abihagaritse.

Ati 'Ntabwo ari uko ntashakaga gukomeza kubikurikirana cyangwa kubishyigikira, ku rundi ruhande ngira ngo abakinnyi cyangwa ababayobora babifitemo uruhare.'

Avuga ko mbere yaganiraga n’abakinnyi ndetse n’abandi bo mu ikipe y’igihugu bakagira n’ibyo bumvikana byatuma uru rwego ruzamuka ariko abantu ntibabikurikize.

Avuga ko abatarakurikizaga ibyabaga byumvikanyweho byaheraga hejuru haba mu buyobozi ndetse no mu bakinnyi.

Ati 'Hagati aho hari ibyo nabonaga…bituma mpitamo gusa nk’ubiruhuka ndavuga ngo ntabwo nshaka ko binsiga izina ribi ry’uruhare naba naragize, icyo gihe mpitamo kubirekera abo bireba njye njya ku ruhande.'

Perezida Kagame avuga ko muri iki gihe ubwo Amavubi yari ari muri CHAN, yongeye gukurikirana iyi kipe y’Igihugu ariko ko yabonye imikinire yayo hari impinduka nziza zabayeho.

Yagize ati 'Icyatumye mfata uyu mwanya nkagaruka ni uko mbona nibura ikipe y’Igihugu dufite ubu n’ukuntu yakinnye ndetse no muri ibyo bibazo byose bavuga mwanyuzemo mujya gukina mu marushanwa nk’ariya ariko noneho umusaruro ukaba uriya, icyagaragaye ni uko dufite ikipe itameze nabi dushobora no kugira ibindi dukora bikayizamura no ku rundi rwego.'

Mbere ya byose Discipline

Perezida Kagame kandi yagarutse ku myitwarire ikwiye abakinnyi avuga ko hari iyo ajya abonana bamwe bo hanze itari myiza.

Yavuze ko hari bamwe mu bakinnyi bakunze gutera amahane mu kibuga bagashaka guhangana n’abasifuzi bikabaviramo guhabwa amakarita atuma bamwe banava mu kibuga.

Yagiz ati 'Ntawudatsindwa, nta kipe n’imwe ibaho itaratsindwa, n’izitwara ibikombe mpuzamahanga bikomeye, ariko ikidakwiye guhinduka ni imyifatire, ugatsindwa wifashe neza, ugatsinda wifashe neza. N’iyo utsinzwe wifashe neza, abantu baranavuga ngo nubwo batsinzwe ariko ni abakinnyi beza.'

Perezida Kagame wagarutse cyane ku myitwarire myiza ikwiye kuranga abakinnyi, yavuze ko hari igihe abakinnyi b’ikipe y’Igihugu bigeze kurangwa n’imyitwarire mibi.

Yavuze ko ku buyobozi bwa Minisitiri Bihozagara, ubwo ikipe y’Igihugu yatozwaga n’Umunya-Serbia, uyu mutoza we ubwe yisabiye gusezera akazi kubera igitutu yashyirwagaho na bamwe mu bakinnyi.

Yagize ati 'Arambwira ngo ngire icyo ngusaba, ambwira amagambo macye, ambwira ko twamuhaye akazi keza tumuhemba amafaranga meza ariko ko adashaka gukomeza guhemberwa ubusa. Ati 'aba bakinnyi mureba imbere yanyu buri wese ni coach’, ati 'hari abavuga ibigomba gukorwa’, ati ‘ibyo ntabwo nzakomeza kubikoramo kandi sinzakomeza gutwara amafaranga y’ubusa’.'

Perezida Kagame yakomeje agira ati 'Ni ukuvuga ko nta discipline yari ihari, abakinnyi barishyize hejuru y’ikipe, ibyo na byo ntibizabeho kuko byica ikipe.'

Umukuru w’igihugu kandi yagarutse ku bindi bikunda kuvugwa mu mupira w’amaguru by’uburozi n’ubupfumu, agira inama abakinnyi b’u Rwanda kutazabijyamo.

Ati 'Biriya bintu byabasubiza inyuma, ntimuzabikore, mujye mukina mwigirire icyizere.'

Avuga ko abavuga ko babikoresha na bo badahora batsinda. Ati 'Ariko mujye mwibaza, ari ababikora n’ababikoraga, batsindaga buri mukino wose, none se ko bisa n’ubundi, wabikoze utabikoze byose birasa.'

Ishimwe

Umukuru w’Igihugu kandi yabwiye aba bakinnyi ko uretse agahimbazamushyi basanzwe bagenerwa bitewe n’uko bitwaye mu mikino, ndetse n’ako FIFA igenera amakipe ariko 'nkatwe nka Leta twavuganye ko hari ikiza kiyongera kuri icyo, Minisitiri arabibagezaho, no mu mikoro ya Leta macye ntabwo tubura bicye dushobora gushimira abantu.'

Perezida Kagame kandi yasabye aba basore gukomeza kwitwara neza ndetse n’ako gashimwe bahawe bakamenya kwizigamira kuko bakuze.

Umukino mwatsinzwe…Ndi umusifuzi sinari kubigenza kuriya

Ikipe y’Igihugu y’u Rwanda yaviriyemo muri 1/4 cya ririya rushanwa, ku gitego kimwe yatsinzwe na Guinea yaraye inegukanye umwanya wa gatatu.

Muri uriya mukino wabonetsemo igitego kimwe cyabonetse ubwo umusifuzi yatanga ikarita itukura ku munyezamu Kwizera Olivier ndetse agatanga na Coup-Franc, ikipe y’u Rwanda ni wo yatsinzwemo gusa kuko indi ibiri yayinganyije igatsinda umwe.

Perezida Kagame wavuze ko yarebaga imikino y’ikipe y’Igihugu, yavuze ko nubwo atakwinjira mu mikorere y’abasifuzi ariko ko iriya karita itukura yahawe umunyezamu wa mbere w’Amavubi we atayishyigikiye.

Yagize ati 'Ntabwo ndi umusifuzi, ariko iyo nza kuba umusifuzi umukino mba narawugenje ukundi ngira ngo ikarita y’umuhondo yari ihagije ariko umutuku…'

Umukuru w’Igihugu kandi yavuze ko hari ibindi byagaragaye nk’ibidasobanutse ubwo umukino warangiraga umwe mu basifuzi akajya kuramukanya n’umutoza wa Guinea ati 'Basa nk’abavuga ngo akazi turakujuje.'

Perezida Kagame yasabye ikipe y’Igihugu gukomerezaho, bagakomeza kwitwara neza kandi ko n’igihugu kizakomeza kubashyigikira.

UKWEZI.RW

Hari hashize iminsi aba baturage bashinja uru ruganda rw'icyayi rwa Rubaya kubahuguza ubutaka ngo kuko bari bararubutije mu myaka 10 ishize, nyamara ubuyobozi bw'uru ruganda bwo bwavugaga ko bwabuguze ndetse ko bubifitiye ibimenyetso simusiga.

Nyuma y'igihe buri ruhande rugerageza kugaragaza ukuri kwarwo, Ku wa 5 Gashyantare 2021 Ubuyobozi bw'Akarere ka Ngororero bwatumije inama igamije gushakira hamwe igisubizo kuri iki kibazo.

Ni inama yari yanatumiwemo Ubuyobozi bw'Ikigo Nyarwanda gikora ishoramari ririmo n'irijyanye n'ubucuruzi n'ubuhinzi bw'icyayi, Rwanda Mountain tea Ltd ari nacyo nyiri uru ruganda rwa Rubaya.

Muri iyi nama hakozwe isuzuma hagaragazwa ibimenyetso ndetse hanatangwa ubuhamya, maze abasigajwe inyuma n'amateka bemera ko bagurishije ubutaka bwabo aho kubutiza nk'uko babivugaga.

Nyuma yo kugirana ibiganiro hagati y'impande zombi, abasigajwe inyuma n'amateka bemeye ko bagurishije ubutaka.

Ati 'Ibiganiro tugiranye n'aba bayobozi ,bazanye impapuro zerekana ko twaguze koko, umubare w'amafaranga ariho nsanze ariyo nafashe.'

'Bitewe na ziriya nyandiko zigaragaza ko twasinye, tugahabwa n'amafaranga nabyo tunabyemera, twanyuzwe na ziriya mpapuro zemejwe ko twagurishije.'

Bavuze ko bagiye gufasha uru ruganda mu gikorwa cyo kwandikisha ubu butaka, ko batazongera kwinangira nk'uko byari byagenze ubushize.

Ati 'Guhera kuwa Mbere kugeza kuwa Kabiri twe tuzabasinyira ko dukoze ihererekanya ubwo ubutaka buzasigare ari ubw'uruganda.'

Umuyobozi wa Rwanda Mountain Tea Ltd, Kabeja Alain yavuze ko bishimiye imikirize y'iki kibazo.

Ati 'Ubwa mbere bagaragaza ikibazo byasaga nk'aho barenganye, bavuga ko ibyo twumvikanye atari byo twashyize mu bikorwa nyuma y'ibiganiro bimaze kuba bihagarariwe n'ubuyobozi bw'Akarere ka Ngororero ndetse n'izindi nzego zitandukanye, birangiye neza bemeye ko bagurishije kandi ko bagiye gukora ibisabwa n'amategeko kugira ngo ihererekanyamutungo rikorwe.'

Meya w'Akarere ka Ngororero, Ndayambaje Godefroid wari umuhuza muri ibi biganiro yemeye ko ikibazo cyari gihangayikishije avuga ko hari hakenewe ko gikemuka.

Ati 'Ikibazo cyari kiduhangayikishije kuko dukurikije uko ikibazo cyari cyaratangiye harimo kuvuga ko hariho abarenganye. Ubwo twacyakiraga bwa mbere n'uko hari havuzwe ko hari impapuro z'ubugure zagombaga kurebwa ko ubugure n'amasezerano byari bimeze, bize kudufasha gukemura ikibazo twacyumvishe neza.'

'Kandi igishimishije n'uko yaba uruhande rwavugaga ko rwarenganye, nyuma yo kubona amasezerano ndetse no gusobanurirwa uko byagenze, bagaragaje ukuri, bakira imyanzuro yavuyemo bose bakaba bakira uko ikibazo cyakemutse.'

Ubu butaka bwari bumaze iminsi bugibwaho impaka buherereye mu Mudugudu wa Gatomvu, Akagari ka Bugarura mu Murenge wa Muhanda. Buteyeho ishyamba ry'inturusu ndetse n'icyayi.

---

Byabaye kuri uyu wa Gatandatu mu masaha ya saa kumi mu mudugudu wa Ruhangiro, Akagari ka Kabirizi umurenge wa Rugerero. Uyu mugabo ngo yatumye umugore we ku isoko, undi agarutse asanga yimanitse mu mugozi.

Umunyamabanga Nshingwabikorwa w'umurenge wa Rugerero, Nkurunziza Faustin yemeje aya makuru.

Ati 'Biravugwa ko byatewe n'ideni ry'inyama zifite agaciro k'ibihumbi 80 yari yarafatiye mukuru we muri Boucherie nuko aramuhinduka yanga kumuha ayo mafaranga ngo yishyure. Bakomeje kumwishyuza ahitamo kwiyahura.'

Yakomeje asaba abaturage kujya bageza ku buyobozi ibibazo bafite kuko nk'ibihumbi 80 bitari kubura aho kugira ngo igihugu kibure umuntu.

Abaturage bavuga ko mukuru we yari yaramwimye amafaranga kuko na we hari andi yari amurimo. Nyakwigendera asize abana batatu n'umugore.

---

Uyu mugabo yabonetse mu masaha y’umugoroba ahagana saa 19h00 z’ijoro, ku wa Gatandatu tariki 06 Gashyantare 2021, ubwo basangaga uyu RUDAHUNGA Boniface w’imyaka 45 y’amavuko yiyahuye.

Umwana we yasanze Se yimanitse mu mugozi mu nzu ye yabagamo ahita apfa. Ntiharamenyekana impamvu yamuteye kwiyahura.

Yari agerageje kwiyahura ku nshuro ya gatatu. Kubera amakimbirane ntiyabanaga n’umugore we, kuko we yari acumbitse mu Kagari ka KIGENGE.

Rwango Jean de Dieu Umunyabanga Nshingwabikorwa wa Nzahaha yabwiye Umuseke ko uriya mugabo bamusanze amanitse mu kagozi. Ngo yashatse umugore wa mbere babyarana abana 4, ariko aza gupfa, nyuma ashaka uwa kabiri babana mu makimbirane, bari barabyaranye abana 3.

Yavuze ko Umugore yari yagiye kuba ahandi ahunze umugabo, amusigana n’abana be.

Ati 'Nta kibazo yari afitanye n’abaturanyi. Nabimenye mpamagawe na Gitifu w’Akagari ngo yari kumwe n’umwana amusaba kujya gushaka ubwatsi bw’inka, umwana avuye kwahira yasanze Se yiyahuye.'

Inzego z’ubuyobozi n’iz’umutekano zahageze (Police na RIB), umurambo we urajyanwa kwa Muganga ngo ukorerwe ibizamini by’isuzuma (Autopsy) ku Bitaro bya Mibirizi cyangwa Gihundwe.

Ku isi abantu 800,000 bapfa buri mwaka bazize kwiyahura, nibura umuntu umwe aba apfuye mu masegonda 40 kubera iyo mpamvu.

Kwiyahura bishobora guterwa n’agahinda gakabije, kwiheba no kunanirwa kwakira ibibazo umuntu afite.

Urubuga rw’Ishami ry’Umuryango w’Abibumbye ryita ku Buzima (OMS) ruvuga ko kwiyahura byiganje mu rubyiruko rufite imyaka 15-19 ni impamvu ya gatatu ihitana benshi bafite iyo myaka.

Imibare igaragaza ko 79% by’abiyahura ari abo mu bihugu biri mu nzira y’amajyambere n’ibihugu bifite ubukungu bucagase.

Ivomo : Umuseke

UKWEZI.RW

Uyu muyobozi ukewaho gukoresha inyandiko mpimbano mu kunyereza ariya mafaranga akurikiranweho, yaherukaga guhagarikwa n’ubuyobozi bw’Akarere amezi atatu azira kunyereza amafaranga yari agenewe abangavu.

Akimara guhagarikwa yahise atoroka ariko nyuma y’uko amezi yari yahawe arangiye Kuri uyu wa Gatanu tariki 05 Gashyantare 2021 ni bwo yagarutse ahita atabwa muri yombi.

Umuvugizi w’umusigire wa RIB, Dr Murangira B. Thierry, yemeje aya makuru avuga ko dosiye irimo gukorwa kugira ngo ishyikirizwe ubushinjacyaha.

Ati 'Akurikiranweho icyaha cyo gukoresha inyandiko mpimbano n’icyaha cyo kunyereza umutungo w’itsinda Dusezere ubukene ubu akaba afungiye kuri sitasiyo ya RIB ya Ngororero, dosiye irimo gukorwa kugira ngo izashyikirizwe ubushinjacyaha mu gihe cyagenwe n’itegeko”.

Itsinda ry’abo bangavu batewe inda ryari ryahawe amafaranga 2,800,000 yo gukora umushinga wo kwiteza imbere.

Aya mafaranga yageze kuri konti za Sacco abikuzwa n’umubitsi wabo Nyirandererwenande Petronille wari warashyizweho n’ubuyobozi kuko we atabyaye nuko ayashyikiriza ushinzwe imibereho myiza y’abaturage mu murenge.

Inama bakoze kuwa 13 Ukwakira 2020 yagaragaje ko amafaranga yabikujwe angana na 1,752,000Frw, ariko ko atigeze agezwa mu maboko y’abagenerwabikorwa yari agenewe.

Uwari ushinzwe imibereho myiza mu murenge wa Bwira Semana Marc na Nyirandererwenande Petronille wari umubitsi w’iri tsinda bamaze amezi atatu bafunzwe.

Ivomo : Igihe

UKWEZI.RW

Iki gikorwa cyo kwiyandikisha kuri aba basore n'inkumi bifuza kwinjira muri RDF kizatangira ku wa 8 Gashyantare, kirangire ku wa 12 Gashyantare 2021. Bizajya bikorerwa ku biro by'Umurenge babarurirwamo.

Uwiyandikisha agomba kuba ari Umunyarwanda, afite imyaka 18 ariko atarengeje 23, kuba afite ubuzima buzira umuze kandi bikemezwa na muganga wa Leta, kuba atarakatiwe n'inkiko no kuba ari indakemwa mu mico no mu myifatire.

Mu bindi asabwa harimo kuba atarigeze yirukanwa mu mirimo ya Leta cyangwa byaba byarabaye akaba yarakuweho ubwo busembwa, kuba afite ubushake bwo kwinjira mu Ngabo z'u Rwanda, kuba ari ingaragu, kuba yararangiye nibura amashuri atatu yisumbuye kandi akaba azatsinda ibizamini bizatangwa.

Uwiyandikisha asabwa kwitwaza Indangamuntu, icyemezo cyerekana ko yarangije amashuri atatu yisumbuye (O level Certificate), icyemezo cy'ubudakemwa mu mico no mu myifatire n'icyemezo cy'uko atakatiwe n'inkiko.

Abiyandikishije bazakora ibizamini by'ijonjora kuva ku wa 13 kugeza ku wa 20 Gashyantare 2021.

Niba ushaka kureba gahunda y'uko ibizamini bizakorwa wa kanda hano.

---

Umuhanzi, umwanditsi, umuramyi w’indirimbo zihimbaza Imana wamenyekanye mu ndirimbo nka: ‘Abafite ikimenyetso’, ‘Tuza waremewe’, ‘Nafashe umwanzuro’, n’izindi, Tumaini BYINSHI ni umugabo ufite umugore n’abana 2. Abarizwa muri Leta zunzubumwe za Amerika, kuri iyi inshuro yashyize hanze indirimbo nshya ‘INSTINZI’ ishimangira kwizera kudashidikanywaho aba Yesu bafite.

Mu kiganiro yagiranye na Agakiza.org, uyu muhanzi yatubwiye ko gutabarwa na Yesu mu ntambara kwa buri munsi ari bwo butsinzi abera dufite. Ati” INSTINZI naririmbye ni uburyo turwana intambara buri munsi ariko twizeye ubutsinzi muri Yesu. Niyo mpamvu tugendana ibyiringiro no kudatinya kuko tumufite(Yesu).

‘INSTINZI’ igaragara ku rubuga rwa Youtube rwitwa ‘Tumaini Byinshi’, ni ndirimbo yakiriwe neza na batari bake aho bahuriza kukuba baheshejwe umugisha nayo. Iyi ndirimbo ifite uburebure bw’iminota 4, ifite amagambo agira ati”

Yee! biruhanya wee nubwo utereye cyane mbese aho wamenye amakuru ko ndirimba INSTINZI! hari uwambwiye ngo ngende ambwira aho nzaruhukira niyo mpamvu mukwizera Ndaririmba INSTINZI

Nubwo rimwe na rimwe nanirwa ukanyishima hejuru, iyo nguye sintinda kubyuka ngo nkomeze. Hari uwamfashe utazigera andekura muri we ndakomeye!

Yee! hari uwamfashe utazigera andekura ntiyareka ngo ngende ubugingo bwanjye bupfe. Yee! hari uwamfashe utazigera andekura, uwo ni Yesu muri we ndaririmba INSTINZI.

Mu buryo bwo kwandika indirimbo Tumaini yatubwiye uburyo bizamo ati” Uburyo nandika indirimbo biza mu bihe bitandukanye: Hari ubwo mba ndi i muhira cyangwa mu nzira ngenda, cyangwa ndi mu bihe byo gusenga indirimbo ikamanuka”.

Indirimbo ‘INSTINZI’ yatunganyijwe mu buryo bw’amajwi na producer Santana mu Rwanda, amashusho(video) yo yakozwe na Happy pro muri Kentucky ho muri Leta zunzubumwe za Amerika, ari naho amashusho yafatiwe.

Tumaini BYINSHI yatangarije Agakiza.org ko kuri Album izaba igizwe n’indirimbo 8 arimo gutegura, amaze gukoramo 6 izindi zikiri muri studio.

Uyu muhanzi ashimira Imana ko ubuhamya agenda yakira buva mu bakurikira ibihangano bye ko bigenda bibahembura. Asaba abakunzi be guhuza ubutumwa buri muri iyi ndirimbo n’ubuzima babamo bwa buri munsi. Ababwira ko kugira Yesu ari ukuba dufite kwizera kudashidikanya, gukomeye kuko ari bwo butsinzi bwuzuye.

Reba hano ‘INSTINZI’ (Official Video) ya Tumaini BYINSHI

[email protected]