Webrwanda Backend

Author: webrwanda

  • Ku gicumbi aho byabereye; ubuhamya bwa Gitifu Nsengiyumva warashwe ‘n’abahungu ba Rusesabagina’ akarokoka ku bw’amahirwe –

    Mu myambaro isa nk’iya gisirikare, bitwaje imbunda ku ntugu n’utundi dukoresho, aba bahungu ba Rusesabagina, nk’uko yakunze kubita mu biganiro yagiranye na Faustin Twagiramungu mu 2018, baruhukiye mu gasanteri gato k’ubucuruzi kari ahitwa i Nyabimata ya Nyaruguru, babwira abaturage ko ikibagenza ari “Uguhindura Leta ya FPR, mwe mube abahamya b’ibyo dushaka”.

    Muri iryo joro, izo nyeshyamba zari hagati ya 50 na 80, zasanze abaturage bari kureba umupira, zikuramo umusore witwa Habarurema Joseph zimusaba kujya kuberaka aho urugo rwa Gitifu wa Nyabimata ruherereye.

    Bitewe n’uko icyo gitero cyari cyitwaje imbunda, Habarurema nta mahitamo menshi yari afite uretse kujya imbere agakora ibyo bamutegetse byose, bitaba ibyo bakamurasa.

    Mu nzira ariko impungenge zari zose, kuko Habarurema yakomeje kwibaza ikigenza izo nyeshyamba, gitumye bajya guhiga gitifu mu ijoro kandi bitwaje intwaro, bakaza bafite amahane atamenyerewe ku Ngabo z’u Rwanda, kandi ubona n’imyitwarire yabo ari imwe igayitse ya gishumba.

    Amaherezo yaje gufata icyemezo, yiyemeza kutageza icyo gitero kwa gitifu kuko yari yamaze gusobanukirwa ko ikizanye abo bagabo atari inkuru nziza, ahitamo kubahakanira ababwira ko atazi aho urugo rwa gitifu ruherereye.

    Mu gihe yari amaze kubabwira ko “Atazi aho gitifu atuye”, abo bagizi ba nabi bararakaye cyane bahita banamurasa arapfa, aba umuntu wa mbere wari uguye muri icyo gitero cyahitanye abantu babiri.

    Gitifu mu menyo ya Rubamba

    Amaherezo izi nyeshyamba zaje kugera ku rugo rwa gitifu Nsengiyumva Vincent, zibanza kurugota impande zose kandi ubwo amasasu aregeye mu mbunda.

    Nta rusaku bazanye kuko gitifu atamenye ikiri kujya mbere hanze y’urugo, kugeza ubwo bamaze kurugota neza maze umwe muri bo yegera urugi akomanga bisanzwe nk’undi mushyitsi wese.

    Gitifu wari ubanye n’abaturage neza, yagize ngo ni abashyitsi bamugendereye nk’uko byari bisanzwe, ubwo anyarukira ku rugo agira ngo abafungurire, ariko akubitwa n’inkuba agikuraho rideaux, agasanga ni abagabo bafite imbunda, barakaye kandi bambaye imyenda ijya kumera nk’iya gisirikare.

    Mu kiganiro yagiranye na Kivu Press Agency, Nsengiyumva yasobanuye uburyo ibyamubayeho byari biteye ubwoba.

    Ati “Bari buzuye hano [imbere y’umuryango w’inzu] ari benshi, bose batunze imbunda hano, mbabonye rero, rideaux uko nari nyifashe sinabashije kuyisubizaho, nabaye nk’igiti kuko nabonye ko bindangiriyeho”.

    Mu gihe yari akibaza ibyo ari abona imbere ye, abagoteye mu gikari bari bamaze kwitegura, umwe muri bo aboneza imbunda ye neza arekura urufaya rw’amasasu, rimwe rifata gitifu inyuma ku mutwe yikubita hasi.

    Mu gihe amasasu yarekurwaga, ku rundi ruhande izindi nyeshyamba zari zadukiriye imodoka ya RAV4 yari iparitse hanze kwa gitifu, ziyishumikaho umuriro irashya irakongoka, ndetse umuriro unafata igice kimwe cy’inzu na cyo kirashya, usibye ko nyuma cyaje kuvugururwa ubu inzu ikaba imeze neza.

    Umutabazi wabaye igitambo

    Nyuma yo kumva urusaku rw’amasasu no kubona umwotsi mwinshi mu kirere, umuturage witwa Habimana yagiye kwa Perezida wa Njyanama y’Umurenge wa Nyabimata, Munyaneza Fidèle, ajyanywe no kumugezaho akaga kari kugwirira umurenge wabo.

    Munyaneza yahise ahaguruka bwangu ajya gutabara, agera kwa gitifu atazi ibiri kuba ubwo aba akubitanye n’inyeshyamba. Inyeshyamba zahise zimwaka telefoni ye, undi arayibaha. Zimusaba noneho kuva aho akagenda, undi arahindukira afata inzira.

    Akireba inyuma mbere yo gutsimbura, inyeshyamba zahise zimurasa amasasu mu kuguru n’ukuboko kw’ibumoso yikubita hasi, ziramwegera zitangira kumukubita imigeri ziziko yamaze gushiramo umwuka.

    Hagati aho, uku gutabara kwa Munyaneza kwabaye nk’ugutuma inyeshyamba zidakomeza gushyira imbaraga kuri gitifu gusa, ndetse zitangira guta umutwe kuko abantu bari batangiye no kuvuza induru.

    Nsengiyumva yagize ati “Yari yaje kuntabara, ni nawe watumye nanjye mbaho kubera ko iyo ataza bari kundasa”.

    Ku bw’amahirwe, aba bagabo bombi ntibapfiriye aho, ariko Munyaneza yaje kugwa mu bitaro bitewe n’ibikomere yari yagize kubera amasasu yarashwe.

    Gitifu Nsengiyumva nawe yajyanywe kwa muganga, abagwa mu mutwe akurwamo amasasu, ariko hagira uduce tumwe tutari bubagwe bitewe n’imiterere y’ahantu twari mu mutwe, ku buryo twamusigiye ubumuga bwa pararize ku gice kimwe cy’umutwe we.

    Yaragize ati “Hari igice babashije kubaga, ariko hari icyo batabashije kubaga bitewe n’imiterere yaho kuko hari za fragment (ibice by’amasasu) zasigaye mu mutwe zitaravamo, ariko ubu ni ukubibana nta kundi”.

    Muri rusange, ibitero bya FLN byatewe i Nyabimata mu Karere ka Nyaruguru na Kitabi mu Karere ka Nyamagabe, byahitanye abantu icyenda, barimo Mutesi Jacqueline Diane witeguraga gushyingirwa, Atete Ornella w’imyaka 13, Mukabahizi Hilarie, Nteziryayo Samuel, Niyubuhungiro Jeannine, Niyonshuti Isaac, Maniraho Anathole, Habimana Joseph na Munyaneza Fidèle.

    Rusesabagina wari inyuma y’ibi bikorwa byose, kimwe n’abo bafatanyije barimo Callixte Sankara wari Umuvugizi wa FLN, Nsengimana Herman wamusimbuye n’abandi 18, bari imbere y’ubutabera bw’u Rwanda aho bari kwiregura ku ruhare bagize muri ibi bitero.

    Ikiganiro Gitifu Nsengiyumva Vincent yagiranye na Kivu Press Agency

    Sankara wigambye ko FLN ari yo yagabye ibitero mu Rwanda, ari imbere y’ubutabera

    Rusesabagina wari Perezida w’impuzamashyirahamwe ya MRCD nawe ari mu rubanza n’ubwo aherutse kuvuga ko atazagaruka mu rukiko

    Abarimo abahungu ba Rusesabagina bumviye ibinyoma bye, bari kumwe nawe mu rubanza

  • Ntabwoba bwa COVID kuko Yesu yadusezeranyije kuturinda amakuba- Umwe muri 43 bafashwe basengera mu rugo #rwanda #RwOT

    Aba bantu 43 bafashwe mu gitondo cyo kuri uyu wa Gatanu tariki ya 02 Mata 2021 ku bufatanye bwa Polisi n’ubuyobozi bw’inzego z’ibanze.

    Karengera Jean Bosco ni umwe mu bantu 43 bafatiwe mu nzu kwa Mukamuzungu Claudine, yavuze ko we yaturutse aho atuye mu Murenge wa Kanyinya.

    Yavuze ko atari ubwa mbere aje gusengera muri ruriya rugo, ndetse ko bazi ko ibyo barimo bibujijwe ariko ko ntakiruta gusenga Imana.

    Yagize ati 'Turabizi ko bibujijwe ariko nta bwoba tuba dufite bwo kwandura COVID kuko Yesu yaravuze ngo 'aho nzaba ndi nzaba ndi kumwe namwe kanzi nzabarinda ibyago n’amakuba byabasha kubagera’. Rero muri ibyo byago n’iki cyorezo kirimo.'

    Mukamuzungu Claudine nyiri ruriya rugo rwafatiwemo bariya baturage, ariyemerera ko aba bantu bari baturutse mu mirenge itandukanye yegereye Umurenge wa Kimisagara, bakaba bari bamaze iminsi myinshi atibuka baza iwe mu masengesho.

    Yagize 'Aba bantu buri muntu agira itorero rye asengeramo ariko bazaga iwanjye mu masengesho, barampamagara bakansaba ko dusengana nanjye nkabemerera. Ndemera ko twakoze icyaha cyo kutumvira ubuyobozi ku mabwiriza bwashyizeho yo kurwanya icyorezo cya COVID-19.'

    Mukamuzungu yasabye imbabazi ubuyobozi bw’Igihugu ndetse n’abaturarwanda muri rusange kuko atigeze ahagarara mu murongo wa Leta wo kurwanya COVID-19, yagiriye inama abakora nk’ibyo yakoraga kubireka kuko kurenga ku mabwiriza ya Leta atari byiza.

    Umunyamabanga Nshingwabikorwa w’Umurenge wa Kimisagara, Havuguziga Charles avuga ko imikoranire y’abaturage n’inzego z’umutekano niyo irimo gutuma abantu nka bariya bafatwa. Yagaragaje ko bamwe mu bakora ariya masengesho baba banafite imyumvire iri hasi baterwa n’ukwemera.

    Ati 'Mu minsi ibiri ishize gusa twari twafashe abandi bantu 41 bari mu masengesho mu nzu y’umuturage, uyu munsi twafashe abandi 43. Ibyo ni umusaruro uva mu guhanahana amakuru n’abaturage kugira ngo dukomeze turwanye iki cyorezo. Bamwe mu bafatwa usanga bafite ubujiji bushingiye ku myemerere aho bavuga ngo uri kumwe na Yesu ntabwo COVID-19 imufata.'

    Umuvugizi wa Polisi y’u Rwanda, Commissioner of Police(CP) John Bosco Kabera yagaragaje ko hari abantu barimo kugaragaza kutumvira amabwiriza ya Leta. Yavuze ko Polisi itazigera irambwirwa gukurikirana abarenga ku mabwiriza.

    Ati 'Turashimira abaturage bakomeje gutanga amakuru kugira ngo dukurikirane abantu nk’aba barenga ku mabwiriza kandi banateza ibibazo mu baturage bagenzi babo. Abantu ntibakwiye kudohoka ku mabwiriza yose yo kurwanya COVID-19, bayubahirize, bayakurikize kandi arasobanutse.'

    CP Kabera yakanguriye abakirisitu gukurikiza amabwiriza bahabwa n’abayobozi b’Igihugu. Yavuze ko hari insengero zujuje ibyangombwa bakwiye kuzijyamo bagasenga ariko nabwo bakubahiriza amabwiriza yatanzwe yo kuzisengeramo.

    JPEG - 62.6 ko
    Mukamuzungu Claudine asaba imbabazi

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Ntabwoba-bwa-COVID-kuko-Yesu-yadusezeranyije-kuturinda-amakuba-Umwe-muri-43-bafashwe-basengera-mu-rugo

  • Ntiyashoboraga kwemera ko hari undi unsukura… Urukundo rwa Nice na Mukunzi uhamya ko umugore we atazi ibyo akina(VIDEO) #rwanda #RwOT

    Umukinnyi wa UTB VC akaba na kapiteni w’ikipe y’igihugu ya Volleyball, Mukunzi Christophe ahamya ko urukundo rwe n’umugore we bamaze imyaka 5 babana nta bintu bigoranye cyane bigeze bahura nabyo, gusa avuga ko umugore we ashobora kuba atazi icyo akina.

    Mu kiganiro n’ikinyamakuru ISIMBI, Mukunzi Christophe na Muhizi Nice Giramata kibanze ku rugendo rwabo mu rukundo, bahishuye uko bamenyanye.

    Bavuga ko bahuye muri 2012 kuri Maison de Jeune Kimisagara, Nice yari yaje kureba imikino ya shampiyona ya Volleyball yahaberaga, icyo gihe Mukunzi wakiniraga ASV Blida yo muri Algeria yari mu Rwanda mu kiruhuko.

    Uwo munsi ntibyakunze ko bavugana kuko bahuye ari kumwe n’inshuti ze batashye, babatumira kuza kugaruka bagasangira fanta ariko ntibagaruka.

    Nice yagize ati'batubwiye kugaruka tugasangira fanta, ntitwaje kuko numvaga ari nk’ubusazi abantu nari mpuye nabo bwa mbere.'

    Bahuye bwa kabiri Mukunzi arimo gusangira n’inshuti ze ariko nabwo ntibavugana cyane kuko yihutaga iwabo bari bamukeneye. Christophe yahise asaba nimero mushuti wa Nice witwa Ange ubundi atangira kumuvugisha bigenda biza birangira bakundanye.

    Mukunzi ati'urumva nk’umuntu uba wararebye filime nyinshi, ntabwo uhita umubwira ko umukunda ahubwo hari amayeri ukoresha wowe ari cyo ufite mu bitekerezo akisanga yagukunze.'

    'Urumva yari agiye gusubira ku ishuri nanjye ngiye gusubira hanze mpita mbimubwira ku bw’amahire birakunda.'

    Kuba barakundanaga ari hanze undi ari mu Rwanda ntabwo byabagoye cyane kuko Mukunzi Christophe yakinaga mu Barabu kandi akaba ari ahantu hadakunze kuba ibishuko by’abakobwa kubera amategeko yaho, ndetse n’umukobwa akaba avuka mu muryango usenga, iwabo baramukaniraga cyane byatumye urukundo rwabo rutazamo kidobya cyane.

    Nta munsi n’umwe Christophe yigeze atekereza kuba yatandukana na Nice ahubwo yari ategereje igihe azuzuriza imyaka y’ubukure imwemerera gushaka(21) kuko bakundanye afite imyaka 17 yiga mu mashuri yisumbuye.

    arangije amashuri yisumbuye, muri 2016 bahise bategura ubukwe ni nabwo ababyeyi ba Nice bamenye ko akundana na Mukunzi Christophe, gusa ngo bari basanzwe bamuzi ariko batazi ko bakundana.

    Mukunzi Christophe avuga ko mu gihe bamaranye ikintu yakoze kikamutungura ni uko atazi ibyo akina kugeza n’uyu munsi, ibintu Nice ahakana.

    Mukunzi ati'ikintu yankoreye kikantungura na n’ubu agikora kikantungura, ntabwo azi ibintu nkina ibyo ari byo, ashobora kuza kuri stade ariko umukino ukarinda urangira atazi, uretse wenda kuba yabona ari njye wakinaga akabona ndishimye ariko ntamenye uko byarangiye.'

    Nice ati'arabeshya menya ko yatsinze nkamufana, hari ibindi birenze se. Iyo yatsinzwe mugendera kure kuko aba avuga nabi, ikintu cyose umubajije akubwira ko ufite igisubizo.'

    Ku ruhande rwa Nice avuga ko Mukunzi Christophe yakundaga kumutungura cyane, amuha impano, ibikorwa amukorera n’ibindi byinshi.

    Ati'yakundaga kuntungura cyane(…) yajyaga aza mu rugo ariko ubu sinzi niba yabyemera, turi mu kiruhuko(vacance) akaza mu rugo akaba ari we umpambura umusatsi, ni we wampamburaga gusa, ntabwo yemeraga ko hagira undi muntu umpambura ni we wampamburaga gusa.'

    Muri Nyakanga 2016 nibwo bakoze ubukwe, ubu bafitanye umwana umwe w’umuhungu. Ni urugo rwishimye ndetse bahamya ko nta kibazo gikomeye barahura nacyo ngo bananirwe kukikemurira bo ubwabo.

    Nice na Mukunzi ni umuryango wishimye

    Urugo ngo rwarabaryohanye…

    Bafitanye umwana umwe w’umuhungu

    Source : http://isimbi.rw/imyidagaduro/article/ntiyashoboraga-kwemera-ko-hari-undi-unsukura-urukundo-rwa-nice-na-mukunzi-uhamya-ko-umugore-we-atazi-ibyo-akina-video

  • USA: Umupolisi yaguye mu gitero cyagabwe ku ngoro y'inteko ishinga amategeko-Capitol #rwanda #RwOT

    Mu murwa mukuru wa Leta zunze ubumwe z'Amerika, I Washington, DC, abapolisi babiri bashinzwe umutekano ku ngoro inteko ishinga amategeko ikoreramo bakomeretse kuri uyu wa gatanu tariki 02 Mata 2021. Ibyo byabaye ubwo umuntu yatwaye imodoka ayikubita ku bidandi bya sima bigize bariyeri yo gukumira imodoka ziza kuri iyo nyubako. Umwe muri abo bapolisi yaje kwitaba Imana aguye mu bitaro.

    Amakuru atangwa na Police irinda iyo ngoro ya Capitol avuga ko ukekwa yavuye muri iyo modoka afite intwaro, ariko arafatwa. Abashinzwe umutekano babwiye ibiro ntaramakauuru Associated Press by'Abanyamerika ko uwo ukekwa yari yakomeretse cyane, ku buryo na we yaje gupfa ari mu bitaro. Ibiro bya FBI I Washington byitabajwe biza gutera inkunga ku ngoro ya Capitol.

    Iyi nyubako imaze iminsi ikikijwe n'inzitiro zifasha mu kwita ku mutekano wayo kuva ibitero by'abashyigikiye uwahoze ari Perezida Donald Trump bikozwe tariki ya 6 y'ukwezi kwa mbere 2021. Icyo gihe bageragezaga kubuza abadepite n'abasenateri kubarura no kwemeza amajwi yatanzwe na koleji y'itora yemeje Joe Biden nka perezida w'Amerika.

    Uruzintiro ry'inyuma nkuko VOA ibitangaza, rwakuweho muri iki cyumweru dusoza, n'ubwo hari urundi ruzitiro rw'imbere rukiriho rutuma umuntu atakwinjira aho iyo ngoro yubatse uko yishakiye. Ubu hari abasirikari ba za reta batageze ku bihumbi 2,200 bafasha abapolisi kwita ku mutekano w'iyo ngoro kuva yagabwaho ibitero. Muri iki gihe abenshi mu badepite n'abasenateri bari mu kiruhuko muri za reta zabo.

    Munyaneza Theogene / intyoza.com

    Source : https://www.intyoza.com/usa-umupolisi-yaguye-mu-gitero-cyagabwe-ku-ngoro-yinteko-ishinga-amategeko-capitol/

  • Lionel Messi yahaye FC Barcelona urwandiko ruriho ibyo yifuza kugira ngo ayigumemo #rwanda #RwOT

    Lionel Messi uzasoza amasezerano ye muri Kamena uyu mwaka,ntabwo arasinya amasezerano mashya ariko hari inkuru zivuga ko yifuza kuganira n'ubuyobozi bushya kugira ngo abe yakongera amasezerano.

    Ikinyamakuru Eurosport cyatangaje ko Lionel Messi yamaze guha perezida Joan Laporta urwandiko ruriho ibyo yifuza kugira ngo agume mu ikipe.

    Uyu munyabigwi w'imyaka 33 ari kuvugwa cyane ku isoko ryo mu mpeshyi kuko amakipe menshi akomeye ari kurwanira kumusinyisha.

    Mu byo Messi yasabye Laporta harimo gusinyisha abakinnyi beza ku isoko bafasha FC Barcelona kwiyubaka.

    Hari kandi kubakira ku bakiri bato ndetse no guhabwa ijambo mu myanzuro ifatwa mu ikipe.

    FC Barcelona irashaka kugura Sergio Aguero na rutahizamu Erling Haaland uri kuvugisha benshi ku isoko kubera ubuhanga afite mu gutsinda ibitego.

    Mu ijoro ryakeye nibwo byamenyekanye ko se wa Haaland witwa Alfie n'umushakira amakipe Mino Raiola bahuye na Joan Laporta baganira ku byerekeye uko uyu rutahizamu yazayerekezamo.

    Icyakora uyu mukinnyi arahenze cyane kuko ikipe ye ya Borussia Dortmund imushakamo miliyoni 154 z'amapawundi.

    Nkuko abakinnyi nka Ansu Fati, Ilaix Moriba na Pedri bitwaye neza nyuma yo guhabwa umwanya na Ronald Koeman,Messi arifuza ko n'abandi benshi bahabwa amahirwe.

    Messi ahagaze neza muri uyu mwaka w'imikino kuko amaze gutsinda ibitego 31 birimo 12 aheruka gutsinda mu mikino 10 ishize ndetse yanatanze imipira 6 yavuyemo ibitego.

    Source : http://umuryango.rw/imyidagaduro/imikino/article/lionel-messi-yahaye-fc-barcelona-urwandiko-ruriho-ibyo-yifuza-kugira-ngo

  • Aba mbere bahawe urukingo rwa kabiri rwa Pfizer mu Rwanda #rwanda #RwOT

    Ibi bikorwa byo gutanga dose ya kabiri y'urukingo rwa Covid-19 rwa Pfizer byatangiriye mu Mujyi wa Kigali.

    Abahereweho mu gihugu ni abahawe urukingo rwa Pfizer kuko ko umuntu waruhawe yemerewe guhabwa dose ya kabiri nyuma y'iminsi iri hagati ya 21 na 28 ahawe iya mbere, mu gihe abahawe AstraZeneca bemerewe gufata dose ya kabiri hagati y'ibyumweru umunani na 12 nyuma yo guhabwa dose ya mbere.

    Ibikorwa byo gukingira hatangwa dose ya kabiri byatangiriye kuri site zitandukanye mu Mujyi wa Kigali cyane ko ariho higanje abantu benshi bahawe urukingo rwa Pfizer bitewe n'uko bisaba ibintu byinshi ngo rubashe kubikwa neza rutangiritse.

    Gutanga dose ya mbere y'inkingo za Pfizer na Astrazeneca byatangiye ku wa 5 werurwe 2021 aho hatanzwe inkingo 348,926.

    Umuyobozi w'ikigo gishinzwe ubuzima mu Rwanda, Dr Sabin Nsanzimana yatangaje ko ibikorwa by'ikingira mu byiciro bitandukanye byakomeje kugenda neza nkuko byari biteganijwe.

    Yemeje ko mu gutegereza urukingo rwa kabiri hakozwe igikorwa cyo kunozwa urutonde n'amalisiti y'abahawe urwa mbere ku buryo nta muntu uzacikanwa n'urwa kabiri kandi yarahawe urwa mbere. Anasaba abaruhawe gukomeza ingamba zo kwirinda nubwo baba barakingiwe.


    Source : http://umuryango.rw/amakuru/mu-rwanda/ubuzima/article/aba-mbere-bahawe-urukingo-rwa-kabiri-rwa-pfizer-mu-rwanda

  • Dorcas na Vestine mwakunze bagarutse mu biruhuko| batunguwe nuko babaye ibyamamare bari ku ishuri| Habuze gato ngo bakorere igitaramo muri Kigali Arena – YEGOB #rwanda #RwOT

    Abahanzikazi Dorcas na Vestine bamamaye cyane kubera indirimbo yabo bise 'Nahawe ijambo' batunguwe cyane nuko babaye ibyamamare batabizi babitewe n'indirimbo yabo 'Nahawe ijambo' mu gihe bari bari ku ishuri. Nkuko aba bakobwa babitangaje mu kiganiro THE CHOICE bagiranye na M Irene akaba ari n'umujyanama (manager) wabo, bavuze ko bakimara gukora indirimbo yabo Nahawe ijambo bumvaga itazarebwa n'abantu barenga ibihumbi icumi (10k views) gusa nabo batunguwe n'ukuntu yakunzwe ndetse ikanarebwa n'abantu benshi kuri ubu ikaba imaze kurebwa n'abantu basaga miliyoni ebyiri n'igice (more than 2.5m views), ibi akaba ari ibintu bashimira Imana cyane. Dorcas yagize ati: 'Numvaga nikabya izarebwa n'abantu ibihumbi icumi'. Vestine yagize ati'Njyewe nakurikiranaga ukuntu irebwa kuri YouTube nkashimira Imana, ni ubuntu bw'Imana'.

    Dorcas na Vestine

    Muri iki kiganiro, M Irene yahishuye ko aba bakobwa bari bagiye gukorera igitaramo gikomeye muri Kigali Arena gusa ntibyakunze kubera ingamba zo kwirinda Covid-19 zidatuma abantu benshi bateranira hamwe mu bitaramo ndetse no mu bindi birori bihuruza imbaga. Nubwo iki gitaramo kitabaye ariko kuri ubu aba bakobwa bagarutse mu biruhuko by'igihembwe cya kabiri ndetse barimo gutegurira abafana babo indirimbo nshya bise 'Papa' izasohoka mu minsi ya vuba ndetse bafite n'indi mishinga myinshi ijyanye n'umuziki wabo.

    Indirimbo Nahawe Ijambo ya Dorcas na Vestine:

    Leave your vote

    Comments

    0 comments

    Source : https://yegob.rw/dorcas-na-vestine-mwakunze-bagarutse-mu-biruhuko-batunguwe-nuko-babaye-ibyamamare-bari-ku-ishuri-habuze-gato-ngo-bakorere-igitaramo-muri-kigali-arena/

  • Imbamutima za Perezida Museveni nyuma yo guhura na Akon , Amafoto #rwanda #RwOT

    Perezida Yoweri Museveni wa Uganda yatangaje ko yashimishijwe cyane no kuba yagiranye ibiganiro n'umuhanzi w'ikirangirire, Aliaune Damala Badara Thiam uzwi nka Akon kuri uyu wa Gatanu tariki 02 Mata 2021.

    Akon wagiye muri Uganda ari kumwe n'umugore we Rozina Negusei, bakiriwe na Museveni ari kumwe na Madamu Janet Museveni.

    Perezida Yoweri Kaguta Museveni, yatangaje ko we n'umufasha we bakirite uyu muhanzi ufite inkomoko muri Senegal n'umugore we babakiririye mu gace kitwa Rwakitura muri Uganda.

    Perezida Museveni yagize ati 'Twagiranye ibiganiro byiza hamwe n'aba bakundana.'      

    Aliaune Thiam uzwi nka Akon yagiye muri Uganda mu bijyanye n'ibikorwa bye bwite ndetse n'ubucuruzi mu nzego zitandukaye zirimo iby'ingufu, ubukerarugendo ndetse n'iterambere ry'ibikorwa remezo.

    Museveni yagize ati 'Nishimiye kugirana ibiganiro na we kandi byitezweho kuzamura ubuzima bw'abaturage bacu ndetse na Africa muri rusange.'

    Perezida Museveni kandi avuga ko we n'umufasha we babwiye Akon ko Uganda ari igihugu kiza cy'ubukerarugendo kikaba gifite umuyaga mwiza dore ko ngo kiri mu gace kagabanyamo Isi mo kabiri.

    Aliaune Thiam uzwi cyane nka Akon Akon, n'umushoramari akaba n'umuririmbyi w'injyana ya Pop n'izindi zitandukanye.

    Yavukiye muri Amerika ku babyeyi bakomoka muri Senegal ariko ntiyabaye cyane muri iki gihugu cyo muri Africa y'uburengerazuba.

    Thiam afite gahunda itandukanye y'iterambere muri Senegal no mu bindi bice bya Afrika.

    Akon, w'imyaka 47, yatangiye kumenyekana kuri album ye ya mbere y'indirimbo muri 2004.

    Mu ndirimbo ze zakunzwe harimo nka 'Smack That' igaragaramo umuririmbyi wa rap Eminem,Don't matter,Lonely,n'izindi.

    Mr. Aliaune Thiam (@Akon ) and his wife, come to Uganda in search of business opportunities in a number of sectors like energy, tourism, and infrastructure development. I am happy to engage in such a discussion that will uplift our people and Africa at large. pic.twitter.com/q0en72sprT

    — Yoweri K Museveni (@KagutaMuseveni) April 2, 2021

    Source : https://impanuro.rw/2021/04/02/imbamutima-za-perezida-museveni-nyuma-yo-guhura-na-akon-amafoto/

  • Abakobwa 10 bageze mu mwiherero wa Miss Rwand… – #rwanda #RwOT

    Byari mu rwego rwo gusobanurirwa amateka mabi yaranze u Rwanda dore ko abenshi muri aba bakobwa bavutse nyuma ya Jenoside yakorewe Abatutsi, no guha icyubahiro imibiri isaga ibihumbi 250 ishyinguwe ku Gisozi.

    Aba bakobwa uko ari 10 bavuze ko batekereje gusura uru rwibutso hanyuma babivuganaho ku rubuga aho bahurira bose uko ari 20 ariko hakaba habonetse bamwe muri bo.

    Aba bakobwa uko ari 10 bazengurutse ingoro y'amateka ya Jenoside yakorewe Abatutsi, basobanurirwa uko Jenoside yateguwe ikanashyirwa mu bikorwa n'ubuyobozi bubi bwariho, uko yashegeshe u Rwanda ndetse n'urugendo u Rwanda  rwanyuzemo mu rwego rwo kongera kwiyubaka no gukumira ko Jenoside yakongera kuba ukundi.

    Abakobwa babanje kwerekwa ubuhamya bw’abarokotse Jenoside yakorewe Abatutsi mu 1994

    Basoje urugendo rwabo ku Gisozi bashyira indabo ku mva rusange iruhukiyemo inzirakarengane z'Abatutsi, banasiga ubutumwa mu gitabo kigenewe abashyitsi basura uru rwibutso.

    Gaju Anita umwe mu bagize igitekerezo cyo gusura urwibutso rwa Jenoside rwa Gisozi yavuze ko bose bakiri mu mwiherero babyifuje kugira ngo bafate iya mbere mu kumenya amateka y’ u Rwanda.

    Ati “Twashakaga kumenya mbere y’umwanduko w’abazungu no mu gihe cya Jenoside yakorewe Abatutsi mu 1994 n’uburyo abarokotse biyubatse”.

    Babanje gufata umunota wo kwibuka

     Bashyira indabo ku mva 

    Umutesi Lea ashyira indabo ku mibiri ishyinguye ku rwibutso rwa Gisozi

    Basobanuriwe amateka y’u Rwanda 

    Bunamiye abazize Jenoside yakorewe Abatutsi mu 1994

    Source : https://inyarwanda.com/inkuru/104502/abakobwa-10-bageze-mu-mwiherero-wa-miss-rwanda-2021-basuye-urwibutso-rwa-jenoside-rwa-giso-104502.html

  • Abantu 2 bahitanwe na Covid-19 mu Rwanda abandi 249 barayandura #rwanda #RwOT

    Minisiteri y'Ubuzima yatangaje ko kuri uyu wa Gatanu,tariki ya 02 Mata 2021, abagabo 2 bishwe na COVID-19 bituma abamaze gupfa mu Rwanda baba 310. Abarwayi bashya babonetse ni 249 mu gihe abakize ari 90.

    Abakirwaye babaye 1,459 barimo 6 barembye. Uyu munsi abarwayi benshi batahuwe mu karere ka Huye na Ruhango.

    Amakuru yose kuri Covid-19 uyu munsi:

    Habonetse abanduye bashya:249
    Abanduye bose:22,167
    Hakize:90
    Abakize bose:20,398
    Hapfuye:2(Umugabo w'imyaka 83 i Nyanza n'uw'imyaka 40 i Huye)
    Abamaze gupfa bose: 310
    Abakirwaye:1,459
    Abarembye:6
    Abakingiwe bashya:0
    Abakingiwe kuva ku wa 05/3/2021:348,926

    U Rwanda rwatangiye gutanga dose ya kabiri y'urukingo rwa Covid-19 ku bahawe urwa Pfizer-BioNTech, mu gihe abahawe urwo mu bwoko bwa AstraZeneca bazamenyeshwa igihe bazakingirirwa.

    Kuri uyu wa Gatanu tariki ya 02 Mata 2021 nibwo ibikorwa byo gutanga dose ya kabiri y'urukingo rwa Covid-19 ku bahawe urwa Pfizer byatangiriye mu Mujyi wa Kigali. Ni mu gihe gukingira nyir'izina hatangwa dose ya mbere byo byari byatangiye ku wa 5 werurwe 2021 bivuze ko abahawe urukingo rwa Pfizer bari bageze igihe cyo guhabwa urwa kabiri.

    Abahereweho mu gihugu ni abahawe urukingo rwa Pfizer kuko ko umuntu waruhawe yemerewe guhabwa dose ya kabiri nyuma y'iminsi iri hagati ya 21 na 28 ahawe iya mbere, mu gihe abahawe AstraZeneca bemerewe gufata dose ya kabiri hagati y'ibyumweru umunani na 12 nyuma yo guhabwa dose ya mbere.

    Ibikorwa byo gukingira hatangwa dose ya kabiri byatangiriye kuri site zitandukanye mu Mujyi wa Kigali cyane ko ariho higanje abantu benshi bahawe urukingo rwa Pfizer bitewe n'uko bisaba ibintu byinshi ngo rubashe kubikwa neza rutangiritse.

    Umuvugizi wa Minisiteri y'Ubuzima, Julien Mahoro Niyingabira, yabwiye IGIHE ko bikwiye ku bantu bose bahawe urukingo rwa mbere gufata dose ya kabiri.

    Ati 'Ni byiza ko umuntu wese wahawe urukingo ahabwa dose ya kabiri y'urukingo rw'ubwoko yahawe bityo akizera ko atekanye. N'ubwo gukingirwa bitavuze ko umuntu yakwandura ariko byibuze uwakingiwe ntiyazahazwa cyangwa ngo ahitanwe nayo.'

    Hari bamwe mu bahawe urukingo rwa Pfizer bavuga ko kugeza ubu batarabona ubutumwa bubamenyesha igihe bazafatira dose ya kabiri, nyamara bagenzi babo bakingiriwe rimwe barabubonye.

    Kuri ibi Niyingabira yavuze ko nta muntu ukwiye kugira impungenge ngo ni uko atarabona ubutumwa bugufi kuko bishobora kuba byaratewe n'ikoranabuhanga ridashobora guhita ryoherereza abantu bose ubutumwa ingunga imwe.

    Ati 'Icyakoze uwageza icyo gihe cyo guhabwa urukingo atarabubona, tumugira inama ko yakwegera ivuriro rimwegereye agatanga ayo makuru maze agafashwa.'

    N'ubwo ibikorwa byo gutanga dose ya kabiri ya Pfizer byahereye mu Mujyi wa Kigali, Minisiteri y'Ubuzima yatangaje ko no mu Ntara zitandukanye bigiye gukomeza hibandwa ku bahawe Pfizer kuko aribo bagejeje iminsi yo kuyihabwa.

    Mu Rwanda hakingiwe abaturage ibihumbi 290 bahawe dose ya mbere ya AstraZeneca mu gihe ibihumbi 51 ari bo bahawe Pfizer.

    Imibare itangwa na Minisiteri y'Ubuzima igaragaza ko abamaze gukingirwa bakiri bake ugereranyije n'abagomba gukingirwa gusa ibikorwa byo gushaka inkingo birarimbanyije kuko bamaze kugura izindi ibihumbi 500 zo mu bwoko bwa AstraZeneca zatwaye agera kuri miliyoni 1,6 $ zitegerejwe mu minsi iri imbere.


    Source : http://umuryango.rw/amakuru/mu-rwanda/ubuzima/article/abantu-2-bahitanwe-na-covid-19-mu-rwanda-abandi-249-barayandura