Webrwanda Backend

Author: webrwanda

  • Perezida Kagame yijeje ko u Rwanda rwiteguye gutanga umusanzu ngo Afurika ikore inkingo za Covid-19 –

    Umukuru w’Igihugu yabigarutseho kuri uyu wa Mbere, tariki ya 12 Mata 2021, mu nama yahuje abakuru b’ibihugu na za Guverinoma n’abayobora ibigo bitandukanye n’imiryango mpuzamahanga, yiga ku buryo Umugabane wa Afurika wakwikorera inkingo za Covid-19.

    Yari ifite insanganyamatsiko igira iti “Ikorwa ry’inkingo muri Afurika mu kurinda ubuzima”.

    Iyi nama yabaye hifashishijwe ikoranabuhanga, yateguwe n’Ubuyobozi bw’Umuryango wa Afurika Yunze Ubumwe (AU) ku bufatanye n’Ubuyobozi bw’Ikigo gishinzwe kugenzura no gukumira indwara muri Afurika (Africa CDC).

    Perezida Kagame yavuze ko muri gahunda ya Afurika yo kongera ishoramari mu rwego rw’ubuzima, ari ingenzi ko hashyirwaho uburyo bw’ubufatanye hagati ya Leta n’abikorera mu gukora inkingo ku Mugabane wa Afurika.

    Yagize ati “Gukora inkingo bijyana no kongera ishoramari mu rwego rw’ubuzima no kubaka ikigo gishinzwe kurwanya indwara z’ibyorezo gikomeye, gikora neza kandi kigenga, kandi nkeka ko ariho tugana. U Rwanda rwiteguye kubigiramo uruhare hamwe n’ibindi bihugu binyamuryango ndetse n’abafanyabikorwa.”

    Yakomeje avuga ko Afurika ikeneye kwagura ubushobozi bwo gukora inkingo n’ibindi bikoresho nkenerwa bya ngombwa mu buvuzi.

    Umukuru w’Igihugu cy’u Rwanda yavuze ko mu mezi ashize hari abantu bafite inganda zikora inkingo za Covid-19, yaganiriye na bo ndetse bamweretse ko hari ibishoboka Afurika yageraho.

    Ati “Twagiranye ibiganiro ndetse mbibwira bagenzi banjye ku mugabane wacu, ariko dushaka ko ibi biganiro bigera no ku bandi. Hari ikigo gifite ubushobozi bwa tekinike zisanzwe zikoreshwa na Moderna, Pfizer, kiriteguye kandi gifite n’ubushake. Nzabaha igisubizo mu gihe cya vuba, mumbabarire kuba ntarabikoze mbere y’uko tugirana ibi biganiro.”

    Perezida Kagame yavuze ko Afurika ifite ubu bushobozi bwo kwifashisha uburyo bukoreshwa n’izo nganda bikaba byuzuzanya n’ubundi buryo burimo Adenovirus bukoreshwa na Johnson& Johnson ndetse na AstraZeneca mu gutunganya inkingo.

    Yakomeje agira ati “Kandi rero kugira ngo Afurika ive mubyo kumva twibabariye twebwe ubwacu, ari nako bimeze muri iki gihe. Kandi ndatekereza ko nta muntu n’umwe ukwiye kubiryozwa. Tugomba kubiryozwa twese kandi tukava mu byo tuzi ko byiza kuri Afurika tukajya ku byo twe dushobora gukora.”

    Perezida Kagame yagaragaje isoko rusange rya Afurika nk’inzira izafasha mu kugira ngo iryo shomari rigerweho kandi ritange umusaruro wifuzwa, anaboneraho gusaba ibihugu bya Afurika kwemeza amasezerano ashyiraho Ikigo Nyafurika Gishinzwe Imiti cya AMA [The African Medicines Agency].

    Uretse Perezida Kagame, iyi nama yanitabiriwe n’abarimo Perezida Tshisekedi uyobora Umuryango wa Afurika Yunze Ubumwe muri iki gihe ndetse na Perezida wa Afurika y’Epfo, Cyril Ramaphosa.

    Perezida Ramaphosa yavuze ko icyerekezo gikomeye cy’urwego rw’ubuvuzi muri Afurika ndetse n’ubushobozi bwo gukora inkingo mu gusubiza ibibazo by’abaturage ba Afurika bigoye ariko bishoboka mu gihe habayeho ubufatanye.

    Perezida Kagame yavuze ko u Rwanda rwiteguye gutanga umusanzu warwo mu kugira ngo Afurika ikore inkingo za Covid-19

    Perezida Kagame yasabye ibihugu bya Afurika kwihutisha gahunda y’iyemezwa ry’amasezerano ashyiraho Ikigo Nyafurika gishinzwe Imiti

    Perezida Tshisekedi uyobora Umuryango wa Afurika Yunze Ubumwe na we yitabiriye iyi nama

    Perezida wa Afurika y’Epfo, Cyril Ramaphosa, yasabye ubufatanye mu kubaka urwego rw’ubuvuzi rukomeye muri Afurika

    Amafoto: Village Urugwiro

  • Ukugoreka indimi kwa Amerika no kubusanya mu kwibuka Jenoside yakorewe Abatutsi n’iyakorewe Abayahudi –

    Ku wa 7 Mata ubwo u Rwanda rwatangiraga iminsi ijana yo Kwibuka Jenoside yakorewe Abatutsi wahuriranye n’uko hibukwaga iyakorewe Abayahudi, Ambasaderi wa Leta Zunze Ubumwe za Amerika mu Muryango w’Abibumbye, Linda Thomas-Greenfield, yatanze ubutumwa bubiri usesenguye bugaragaza neza uko igihugu cye gifata u Rwanda.

    Ubutumwa bwihanganishaga u Rwanda muri ibi bihe, bwakurikiwe n’ubwo kwibuka inzirakarengane zazize Jenoside yakorewe Abayahudi. Bwo bwagiraga buti “Duhaye agaciro ubuzima bw’abagabo, abagore n’abana miliyoni esheshatu b’Abayahudi bishwe urw’agashinyaguro muri Jenoside yakorewe Abayahudi”.

    Ku Kwibuka27, Linda bwo yagize ati “Turibuka abantu barenga ibihumbi 800 bishwe mu minsi ijana y’iterabwoba ryabaye mu Rwanda mu 1994”. Mu butumwa bw’ibika bibiri bigizwe n’amagambo 97, nta hantu na hamwe uyu Ambasaderi wa Amerika yigeze avuga ko mu Rwanda habaye Jenoside yakorewe Abatutsi, ahubwo yabyise ko ari iterabwoba.

    Ni mu gihe ku mvugo ijyanye na Jenoside yakorewe Abayahudi, nta kugoreka imvugo kwabayeho ahubwo yakoresheje inyito yemejwe n’Umuryango w’Abibumbye ariko bigeze ku Rwanda yandika uko abyumva. Ni nka bimwe George Orwell yanditse mu gitabo cye “Animal Farm” ngo inyamaswa zose zirareshya, ariko zimwe zireshya kurusha izindi.

    Jenoside yakorewe Abayahudi ntikinishwa ariko byagera ku yakorewe Abatutsi hakaba impaka

    Kimwe mu bishyirwa imbere mu guharanira ko Jenoside itazongera kubaho, ni ukurwanya abayipfobya, abayita uko itari cyo kimwe n’abayiha igisobanuro gitandukanye n’uko yo iri. Ni byo byatumye, Umuryango w’Abibumbye wemeza ko habayeho Jenoside yakorewe Abatutsi ndetse n’iyakorewe Abayahudi.

    Nubwo bimeze bityo ariko ibihugu bimwe byahejeje inguni ku bijyanye na Jenoside yakorewe Abatutsi, byanga kuyemera, biyiha andi mazina, ariko iyo bigeze kuri Jenoside yakorewe Abayahudi, ho hari umurongo bidashobora kurenga ibintu biteye ukwibaza impamvu y’uwo murongo uheza inguni.

    Kenshi abahakanyi ba Jenoside yakorewe Abatutsi n’abashaka kuyipfobya usanga bavuga ko hari ingabo zari zishinzwe kurinda amahoro, abanyamahanga n’Abahutu bishwe bityo ko ibyo bituma Jenoside ikwiye guhindurirwa inyito ikitwa ubwicanyi bwabereye mu Rwanda.

    Aha baba birengagije ko Intambara ya Kabiri y’Isi ari nayo yiciwemo Abayahudi miliyoni esheshatu, muri rusange yaguyemo abantu miliyoni 75. Ni ukuvuga ko yiciwemo abantu miliyoni 69 batari Abayahudi.

    Nubwo Abayahudi aribo bari bagenderewe mu mugambi w’Aba-Nazi wo kubarimbura, hari abandi bishwe ku mpamvu za Politiki n’iz’uruhu. Abo barimo ababana bahuje igitsina, abafite ubumuga, Aba-Roma bafite inkomoko mu Majyaruguru y’u Buhinde, abo mu bwoko bw’aba-Slavs, Abahamya ba Yehova n’abanyapolitiki batavugaga rumwe n’Aba-Nazi n’abandi bazize imyemerere yabo.

    Gusa nubwo aba batari Abayahudi bishwe, ntabwo babarwa nk’abazize Jenoside yakorewe Abayahudi kuko yo ubwayo isobanurwa nk’ubwicanyi bwakorewe Abayahudi bukozwe n’Aba-Nazi bashakaga kubarimbura ngo babamareho.

    Linda wari mu Rwanda mu 1994 kuki yahejeje inguni?

    Linda Thomas-Greenfield ni Ambasaderi wa Leta Zunze Ubumwe za Amerika mu Muryango w’Abibumbye, umwanya yagiyeho mu ntangiriro z’uyu mwaka atangirana na manda ya Joe Biden. Mbere ku ngoma ya Barack Obama, yabaye Umunyamabanga wungirije wa Leta Zunze Ubumwe za Amerika ushinzwe Afurika ndetse icyo gihe yaje mu Rwanda asura n’Urwibutso rwa Jenoside rwa Kigali ku Gisozi yunamira inzirakarengane zirushyinguyemo.

    Mu Ugushyingo 2018 ubwo yari ari gutanga ikiganiro muri Leta ya Virginia, yagarutse ku buzima bwe, kuva mu buto, anavuga uburyo yari agiye kwicirwa mu Rwanda muri Mata 1994 ubwo Interahamwe yari imwitiranyije n’Umututsikazi.

    Ati “Muri Mata 1994 nageze i Kigali mu Rwanda. Kandi ngira ngo mwibuka ko muri Mata 1994 mu Rwanda habaye Jenoside.”

    Linda yavuze ko icyo gihe umwe mu Nterahamwe yamubonye amwitiranya n’Umututsikazi ashaka kumwica. Ati “Nasatiriwe n’umusore muto wari wahawe amabwiriza yo kwica umugore witwa Agathe, yatekereje ko ari njye. Igitangaje ntabwo nigeze ngira umutima uhagaze, ntimunyumve nabi nari mfite ubwoba, ariko sinigeze ngira umutima uhagaze. Narebye uwo musore muto mu maso mubaza izina rye, hanyuma mubwira iryanjye. Nashakaga ko amenya izina ryanjye, kuko nashakaga ko nanyica asigara azi izina ry’umuntu yishe.”

    Nyuma yo kumenya ko atari Umunyarwandakazi, iyo Nterahamwe yaramuretse ntiyamwica.

    Kuba uyu mugore wari mu Rwanda mu 1994 akibonera uburyo Abatutsi bicwaga ariwe utinyuka kugoreka imvugo akanga gukoresha inyito nyayo ya Jenoside, ni ikimenyetso nyacyo cy’ukwinangira kwa Amerika iyo bigeze ku kwemera amateka y’u Rwanda.

    Thomas Greenfield ubwo yasuraga Urwibutso rwa Jenoside rwa Kigali ku Gisozi akunamira inzirakarengane zirushyinguyemo

    Abanyarwanda bamubwije ukuri

    Abanyarwanda bakoresha Twitter banze guceceka maze bibutsa Linda ko mu Rwanda habaye Jenoside yakorewe Abatutsi yateguwe imyaka myinshi hagamijwe kubarimbura, bityo ko adakwiye kugoreka amateka n’imvugo.

    Uwitwa Christelle yagize ati “Mujye mwandika imvugo nyayo ni Jenoside yakorewe Abatutsi mu Rwanda muri Mata 1994! Agasuzuguro kanyu kararambiranye mukagabanye, murekere aho kudutobera amateka. Burya bwose byarutwa mugaceceka aho kwandika ubusa #Kwibuka27 #GenocideAgainstTutsi.”

    Uwitwa Nkotanyi Francis yagize ati “Ni Jenoside yakorewe Abatutsi mu 1994. Ubutaha niba udashobora kubyandika mu buryo bukwiriye, ntuzatinyuke kugerageza kohereza ubutumwa bwawe. Tuzi satani ukorera.”

    Umunyamategeko Gatete Ruhumuriza yagize ati “Guhakana Jenoside yakorewe Abatutsi bigaragara ko ari politiki y’ubutegetsi bushya bwa Amerika… Dore umuyobozi mushya, mubi kurusha umutware we… Biteye Isoni.”

    Uwitwa Musoni Edwin yagize ati “Ambasaderi, warahigwaga muri Jenoside yakorewe Abatutsi mu 1994. Wanaje mu Rwanda kwibuka abazize Jenoside, ariko unaniwe kwibuka ko yari Jenoside yakorewe Abatutsi. Amateka azacira urubanza ibikorwa n’amagambo yacu.”

    Minisitiri w’Ububanyi n’Amahanga, Dr Vincent Biruta, ku wa 7 Mata 2021, ubwo hatangizwaga ibikorwa byo kwibuka Jenoside yakorewe Abatutsi, yahaye gasopo abagoreka n’abakoresha nabi inyito ya Jenoside yakorewe Abatutsi.

    Dr Biruta yavuze ko koherereza u Rwanda ubutumwa burutoneka muri ibi bihe ntacyo byarumarira ndetse yongeyeho ati “Ku bakigorwa no gukoresha inyito nyayo ya Jenoside yakorewe Abatutsi, bo ibyiza ni uko batakwigora batwoherereza ubutumwa uyu munsi. Ntacyo bidutwaye.”

    Perezida Kagame ati “ni akumiro”

    Mu myaka 27 ishize, ntabwo u Rwanda rwigeze ruhirwa n’ingoma y’Aba-Démocrates muri Leta Zunze Ubumwe za Amerika. Ni bo bayoboraga igihugu mu gihe habaga Jenoside, kuva icyo gihe baciye umurongo banga kwemera ko ibyabaye ari Jenoside yakorewe Abatutsi.

    Bill Clinton wayoboraga Amerika icyo gihe, yanze gukoresha ijambo Jenoside ngo yamagane ubwicanyi bwakorerwaga Abatutsi. Abamusimbuye bose na bo bagendeye ku murage we ku buryo n’imyanzuro yose ireba u Rwanda itorwa nko mu Muryango w’Abibumbye iki gihugu kiyamagana.

    Ubwo u Rwanda rwari mu Kanama ka Loni gashinzwe Amahoro, Amerika yayoborwaga na Obama nawe w’Umu- Démocrates, igihugu cye ni cyo cyari inyuma yo kurwanya inyito yemewe ya Jenoside yakorewe Abatutsi.

    Ku wa 23 Mutarama 2018 ni bwo Inteko Rusange y’Umuryango w’Abibumbye yafashe umwanzuro ko tariki 7 Mata hazajya hibukwa Jenoside yakorewe Abatutsi mu Rwanda yahitanye ubuzima bw’abasaga miliyoni mu minsi 100.

    Perezida Kagame aherutse kuvuga ko ikibazo cy’inyito ya Jenoside atari icy’ubu, kuko cyatangiye kera mu 1994, ibihugu bimwe binanirwa kwita ibyabaga mu Rwanda uko biri.

    Ati “Hari umuntu – ndakeka ari umunyamakuru – wabazaga ati: “Ese ibirimo kuba ni Jenoside?” Bakamusubiza bati oya, ko ahubwo ari ‘ibyaha bya Jenoside’. Hanyuma uwo munyamakuru arongera arabaza ati “Bisaba ibyaha bya Jenoside bingana bite kugira ngo byitwe ko ari Jenoside?” Ibyo murabyibuka? Biratangaje kuba tukiri mu mpaka nk’izo nyuma y’imyaka 27. Ni akumiro!”

    Umukuru w’Igihugu yavuze ko bisa n’aho gukoresha inyito ya Jenoside yakorewe Abatutsi kuri bamwe ari nk’igihembo baba bahaye Abanyarwanda, avuga ko ibyo u Rwanda rudashobora kubyemera.

  • Perezida Kagame yizeje Africa umusanzu w’u Rwanda mu kwikorera inkingo za COVID #rwanda #RwOT

    Yabivuze kuri uyu wa Mbere tariki 12 Mata 2021 mu nama yigaga ku kongerera Afurika Ubushobozi bwo Gukora Inkingo, ikaba yari iyobowe na Perezida Felix Tshisekedi wa Repubulika Iharanira Demokarasi ya Congo, akaba anayoboye Umuryango wa Africa Yunze Ubumwe.

    Perezida Kagame wakunze kuvuga ko sisiteme z’ubuvuzi mu bihugu bya Africa zikwiye kongererwa ubushobozi, hakabaho ishoramari mu bikorwa remezo byazo, yongeye kubigarukaho muri iyi mu nama.

    Yavuze ko ibihugu by’uyu mugabane bikwiye guhuriza hamwe kugira ngo bigere ku byifuzo byawo byo kuba byakwikorera urukingo by’umwihariko ariko ngo mu bihugu hakabaho ubufatanye hagati y’inzego za Leta n’iz’abikorera.

    Yavuze ko hakwiye kongera ishoramari mu nzego z’ubuvuzi 'no kubaka ikigo gishinzwe kurwanya indwara z’ibyorezo gikomeye, gikora neza kandi kigenga, kandi nkeka ko ari ho tugana.'

    Yakomeje agira ati 'U Rwanda rwiteguye kubigiramo uruhare hamwe n’ibindi bihugu binyamuryango ndetse n’abafanyabikorwa.'

    Perezida Kagame yavuze ko mu gihe gishize yaganiriye hifashishijwe ikoranabuhanga n’abantu bafite inganda zitunganya inkingo za COVID-19 bakamwizeza ko umugabane wa Africa hari ibyo wakwikorera.

    Umukuru w’u Rwanda yavuze ko ibi yanabigejeje kuri bagenzi be bayobora ibihugu byo kuri uyu mugabane ariko 'dushaka ko ibi biganiro bigera no ku bandi.'

    Yavuze ko hari 'ikigo gifite ubushobozi bwa tekinike zisanzwe zikoreshwa na Moderna, Pfizer, kiriteguye kandi gifite n’ubushake. Nzabaha igisubizo mu gihe cya vuba, mumbabarire kuba ntarabikoze mbere y’uko tugirana ibi biganiro.'

    Ubwo gahunda yo gusaranganya inkingo yatangiraga, Perezida Kagame yigeze kuvuga ko ibihugu bikize byabanje kugaragaza ubushake bwo gushaka kwikubira, uyu munsi yongeye kuvuga ko Africa ikwiye kwishakamo uburyo bwo gusohoka muri ibi bibazo.

    Yagize ati 'Kugira ngo Afurika ive mu byo kumva twibabariye twebwe ubwacu, ari na ko bimeze muri iki gihe. Kandi ndatekereza ko nta muntu n’umwe ukwiye kubiryozwa. Tugomba kubiryozwa twese kandi tukava mu byo tuzi ko byiza kuri Afurika tukajya ku byo twe dushobora gukora.'

    Yanagarutse ku isoko rusange rya Africa, avuga ko rizagira uruhare muri ririya shoramari ryifuzwa mu rwego rw’ubuvuzi.

    UKWEZI.RW

    Source : http://www.ukwezi.rw/mu-rwanda/Ubuzima/article/Perezida-Kagame-yizeje-Africa-umusanzu-w-u-Rwanda-mu-kwikorera-inkingo-za-COVID

  • Musanze : Abantu batanu batwikiye abana babiri mu nzu umwe agahita apfa bakatiwe BURUNDU #rwanda #RwOT

    Aba bantu ni bamwe muri batandatu ari bo Munyakazi Evariste, Nsengiyumva Théoneste, Uwamariya Clissencia, Munyamahoro Innocent, Mugiraneza Ildephonse na Hitimana Jean de Dieu uzwi nka Bondo.

    Aba bantu bose baregwaga icyaha cy’ivangura n’ingengabitekerezo ya Jenoside, icyaha cyo gutwika, gukomeretsa no kwica umwe mu bana ba Manifasha Jérôme na Sifa Selesitini.

    Muri bariya bantu batandatu, umwe witwa Hitimana Jean de Dieu uzwi ku izina rya Bondo we yahawe igihano cy’igifungo cy’imyaka irindwi.

    Ibi byaha biregwa bariya bantu, byakozwe mu bihe bitandukanye, bikaba byarabereye mu Mudugudu wa Marantima, Akagari ka Rwebeya, Umurenge wa Cyuve mu Karere ka Musanze.

    Umuryango wa Manifasha Jérôme na Sifa Selestini bivugwa ko byatangiye batotezwa ko ari Abatutsi ndetse bikarangira ku wa 22 Gashyantare 2020 abana be batwikiwe mu nzu, umwe akahasiga ubuzima, undi akahakura ubumuga budakira.

    Ubwo urukiko rwaburanishaga uru rubanza, rwumvise abatangabuhamya bane barimo Uwahoze ari Gitifu w’umurenge wa Cyuve, Nteziryayo Emmanuel, uwari ashinzwe irangamimerere mu Murenge, Uwabera Alice ndetse n’uwari Gitifu w’akagari ka Rwebeya Mukandutiye Albertine.

    Ubushinjacyaha bwari bwasabye Urukiko guhamya bariya bantu icyaha cy’ivangura no gukurura amacakubiri kibahama bose uko baregwa, bityo bagahanishwa igifungo cy’imyaka irindwi n’ihazabu ya miliyoni imwe kuri buri wese.

    Bwari bwasabye kandi ko Urukiko rwemeza ko icyaha cyo gutwikira abana mu nzu gihama Munyakazi Evariste, Nsengiyumva Théoneste, Uwamariya Clessencia, Munyamahoro Innocent na Mugiraneza Ildephonse, bityo bagahanishwa igifungo cy’imyaka 15 n’ihazabu ya miliyoni 5 kuri buri muntu.

    Urukiko rwasomye icyemezo cyarwo mu cyumweru gishize tariki ya 08 Mata 2021, rwahanishije Munyakazi Evariste, Nsengiyumva Théoneste, Uwamariya Clessencia, Munyamahoro Innocent na Mugiraneza Ildephonse igihano cy’igifungo cya burundu, mu gihe Hitimana Jean de Dieu bita Bondo we yahanishijwe igihano cy’igifungo cy’imyaka irindwi (7).

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Musanze-Abantu-batanu-batwikiye-abana-babiri-mu-nzu-umwe-agahita-apfa-bakatiwe-BURUNDU

  • Ubuhamya bwa Janviere:Uko yarokotse Genocide n’ingaruka byamusigiye #rwanda #RwOT

    Mwizerwa Janviere Nyirankundwa ni umubyeyi wagizweho ingaruka na Genocide yakorewe Abatutsi mu 1994 ariko Imana yaramurinze ararokoka ndetse abasha gutera intambwe yo gukira ibikomere no kubabarira abamwiciye umuryango.

    Muri iki gice cya mbere, mu magambo ye aradusobanurira inzira y’umusaraba yanyuzemo muri Genocide n’ingaruka zasigaye ku buzima bwe.

    ” Twari umuryango mwiza ushimishije Papa, Mama n’abana 5. Navutse mbona ababyeyi banjye baririmba muri chorale Hoziana ndetse Papa yari perezida w’iyi chorale. Wari umuryango bava muri repetition tugasenga tukaririmba tugakora amasengesho y’iminsi runaka twishimye. Muri macye twari umuryago unezerewe aho ni igice cy’umwuka, ariko no mu mubiri twari abantu bifashije.

    Muri Genocide twarihishe twese hamwe n’umuryango ahantu mu gishanga twabaga Kabeza icyo gihe hitwaga Kajeke. Papa yapfuye le 12/4/1994, hashize iminsi 5 basohora amatangazo abwira abantu ngo basohoke aho bihishe bajye mu ngo amahoro arahari. Tukimara kuzamuka ni bwo abantu badutangiriye batangira kurasa abari inyuma yacu, twahise turyama ahantu mu rubingo ariko cyari igihe gikomeye kuburyo namaze igihe kinini numva amasasu mu matwi.

    Ibyo birangiye babajije papa indangamuntu abereka Bibiliya arababwira ati ” Iyi ni yo ndangamuntu yanjye “. Twarazamutse tugera mu rugo ariko igitangaje ni uko umuntu yicwaga n’uwo baziranye wa bugufi, hari abantu bajyaga bakora ibiraka byo kubaka mu rugo ndetse muri icyo gitondo twari tumaze gusangira mu minota micye baje baseka bati “Pasiteri naze” nuko baramujyana, twashatse kumukurikira ariko umwe muri bo yagiriye neza aducira isiri ngo dusubire inyuma, uwo munsi ni bwo bamwishe.

    Abasigaye rero twari abana 5 ndi imfura na basaza banjye 4 bankurikira, basaza banjye 2 bankurikira bari baragiye kwa nyirarume bo barokokeye Saint Famille. Njyewe na basaza banjye 2 bato ni bo twajyanye mama na we turaburana ariko twaje kubonana nyuma n’ubwo interahamwe zazaga kutwigambaho ko zamwishe. Aho twihishe rero twari tubikiwe kuzoroswa umubyeyi (kwicwa nyuma) bazaga buri munsi kureba ko duhari ndetse bamenyesha n’izindi nterahamwe ko uko turi abana 3 bazatwica nyuma y’umubyeyi. Aho ni ho Imana yaturindiye kuko bazaga bavuye kwica bakabanza kureba ko duhari hanyuma bagasubira kwica.

    Itariki bari baduhaye yo kwicwa nibwo inkotanyi zaje zibisikana n’interahamwe zigenda inkotanyi zinjira muri karitsiye, narihishe bikomeye nari ngiye kugira ingorane zo kuhasigara ariko inkotanyi zanga kuhava ziravuga ngo uwo mwana tubanze tumubone. Twagiriwe umugisha baratujayana tugenda tunyura ku mirambo y’abantu tuzi byari ikintu gikomeye. Batujyanye muri stade Amahoro tuhamara igihe gito duhita tujya i Ndera ni ho twahuriye na mama inkotanyi zaramurokoye. Twahise tubana ariko mu buzima butoroshye kuko abana 2 bato Genocide yabaye batangiye kumenya kugenda ariko bahise basubira ibwana duhuye na mama ni we watangiye kubatoza kugenda”.

    Ibyo biteye ubwoba Janviere yanyuzemo byagize ingaruka zikomeye ku buzima bwe ndetse hari icyo byangije kuri we asigarana ibikomere mu bijyanye no kwizera nk’uko abisobanura ati:

    “Mu ngaruka zimwe nahuye na zo nubwo nakuriye mu nzu y’Imana nahise numva ntakaje kuyizera kuko numvaga mu byatumye uwo muntu aturokora tukihisha ni uko yamugiriye neza, numvaga papa ari umuntu mwiza ubanira abantu neza ndetse ari umuntu w’Imana. Numvaga rero izamurindira icyo. Rero iyo ni ingaruka nagize yo kutumva Imana neza no gutakaza kuyizera.

    Indi ngaruka ikomeye nagize natakaje kwizera abantu: Nk’uko nabivuze abantu baje gufata papa harimo abaturanyi. Kuba umuntu duturanye ari we waje akamutwara, nahise ntakaza kwizera abantu.

    Inagaruka yindi yambayeho ni ukutizera abantu bo mu rusengero: Papa yakoraga muri ADEPR mu bakozi bo hejuru, Genocide irangiye numvaga ari igikuba cyacitse numvaga ari nk’aho ari we wapfuye wenyine, yego hapfuye n’abandi ariko ni we nkunda kuvugaho cyane. Natekerezaga rero ko niduhinguka mu rusengero igikuba kiri bucike amateraniro adashobora kuba papa yarapfuye nkumva bari buhagarike amateraniro bakabanza kutubaza uko byagenze ariko ntibyabayeho. Byangizeho ingaruka zikomeye kugira ngo nongere nizere abantu bo mu rusengero nakire ko ari abantu b’Imana.

    Mu buryo bw’umubiri nabwo nagize ingerauka: Kuba ari abantu twari dufite ubutunzi, dufite abakozi 3 reba rero noneho gutangira ubuzima nta wundi muntu dufite udufasha mu rugo ngatangira kwiga imirimo bushya. Ndibuka mama yahoraga arira kubera intimba byatumaga nirwanaho nkiga imirimo kugira ngo ntazaba umwana w’umugore nk’uko mama yabimbwiraga. Ibyo rero mu ngaruka byanteye gushirira mpinduka umurakare sinajyaga nseka kuko numvaga nta mpamvu yabyo. Numvaga nshaka kubaho ndi serious kugira ngo batazavuga ko ndi umwana w’umugore “.

    Mugice cya 2 tuzareba urugendo rwa Janviere rwo gukira ibikomere no kubabarira abamwiciye umuryango.

    Source : Agakiza Tv

    Source :[email protected]

    Source : https://agakiza.org/Ubuhamya-bwa-Janviere-Uko-yarokotse-Genocide-n-ingaruka-byamusigiye.html

  • Nyaruguru : Umugabo arakekwaho gusambanya abana batatu icyarimwe #rwanda #RwOT

    Ubushinjacyaha bw’u Rwanda buvuga ko dosiye y’uyu mugabo yashyikirijwe Ubushinjacyaha urwego Rwisumbuye rwa Nyamagabe ku wa Kane tariki ya 08 Mata 2021.

    Tariki ya 21 Werurwe 2021 mu Mudugudu wa Ramba, Akagari ka Ramba, Umurenge wa Mata, Akarere ka Nyaruguru, hagaragaye umugabo ukurikiranyweho icyaha cyo gusambanya abana batatu b’abakobwa bari mu kigero cy’imyaka itandatu.

    Umwana umwe mu basambanyijwe avuga ko yari kumwe na bagenzi be babiri aho bari bari gutora inkwi, uyu mugabo abashukisha amandazi arangije arabasambanya.

    Abana baratashye babibwira ababyeyi, na bo babivuga mu nama y’abaturage yabaye bukeye bwaho tariki ya 22 Werurwe 2021. Ubuyobozi bwahise busaba ko abana bahohotewe bajyanwa kwa muganga, uregwa na we arakurikiranwa.

    ICYO ITEGEKO RIVUGA :

    Uregwa aramutse ahamwe n’icyaha akurikiranyweho, yahanishwa igihano cy’igifungo cya burundu. Icyaha cyo gusambanya umwana giteganywa kandi kigahanishwa ingingo ya 4 y’Itegeko no 069/2019 ryo ku wa 8/11/2019 rihindura itegeko no 068/2018 ryo ku wa 30/08/2018 riteganya ibyaha n’ ibihano muri rusange.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Nyaruguru-Umugabo-arakekwaho-gusambanya-abana-batatu-icyarimwe

  • Muri Amerika imyigaragambyo yakajije umurego nyuma y' uko polisi yishe undi mwirabura #rwanda #RwOT

    Nyuma y'aho umupolisi arasiye umwirabura mu Mujyi wa Brooklyn Center, hafi ya Minneapolis muri Leta Zunze Ubumwe z'Amerika abantu benshi biraye mu mihanda bigaragambiriza urwo rupfu bamagana ihohoterwa rikomeje gukorerwa abirabura. Igipolisi cyakoresheje ibyuka biryana mu maso kugira ngo bihoshe iyo myigaragambyo yabaye mu ijoro ryakeye kuri iki Cyumweru tariki ya 11 Mata 2021.

    Umuryango w'uyu musore wishwe uvuga ko azwi ku izina rya Daunte Wright, akaba afite imyaka 20.

    Abantu babarirwa mu magana bigabye mu mihanga bagenda baririmba izina rya Daunte Wright maze birunda imbere y'ibiro by'igiporisi mu mujyi wa Brooklyn Center, ku birometero bike uvuye hagati mu Mujyi wa Minneapolis ujya mu burengerazuba.

    Icyuka kibi cyadutse igihe igiporisi cyambaraga imyambaro yo kurwanya imyigaragambyo n'igihe imodoka zabo ebyiri zahageraga zigaterwa amabuye.

    Umukuru w'Umujyi wa Brooklyn Center yahise ategeka guhagarika urujya n'uruza mu masaha y'ijoro kugeza saa kumi n'ebyiri za mugitondo (mu masaha yo muri ako karere) asaba abaturage gusubira mu ngo zabo ku bw'umutekano wabo.

    Hari umwuka mubi cyane muri Minneapolis mu gihe urubanza rw'uwahoze ari umupolisi ashinjwa kwica umwirabura George Floyd rugikomeje.

    Abari mu myigaragambyo bahuriye imbere y'ibiro by'igiporisi i Brooklyn Center, baririmba izina rya Daunte Wright

    Uko uwo mwirabura Daunte Wright yishwe n'icyatumye yicwa

    Mu itangazo ryasohowe na polisi ya Brooklyn Center rivuga ko yahagaritse umugabo wari warenze ku mategeko y'umuhanda ku munsi w'ejo hashize ku Cyumweru, kandi ko yari asanzwe afite urupapuro rwo kumuhagarika.

    Polisi ivuga ko yashatse kumuhagarika agahita asimbukira mu modoka maze umwe mu bapolisi ahita amurasa, ariko akomeza gutwara imodokari ye agenda aca ku zindi, mbere y'uko ayikubita ku yindi modoka. Nyuma ni bwo byatangajwe ko yapfuye gusa umugore wari mu iyo modoka yarakomeretse buke.

    Polisi ivuga ko abo bapolisi bari bambaye kamera zabo ndetse ko n'imodoka yari ifite iyayo kandi iriho ikora neza nk'uko Ibiro Ntaramakuru by'Abongereza, Reuters, bibitangaza.

    Nyina we, Katie, avuga ko yamuhamagaye ubwo bamuhagarikaga ariko telefoni igahita yikupa maze nyuma y'umunota umwe yakongera kumuhamagara akitabwa n'umugore we amubwira ko umuhungu we yarashwe.

    Yakomeje avuga ko polisi ikimara kumurasa bataye umurambo we ku muhanda ariko abasaba ko bawuhakura.

    Umukuru w'Umujyi, Elliott yavuze ko ibyabaye ari 'agahomamunwa', Walz na we ati : 'Leta yacu yuunamiye undi mwirabura wishwe n'abashinzwe umutekano.'

    Umujyi wa Minneapolis usanzwe urangwamo umwuka mubi nyuma y'urupfu rw'umwirabura George Floyd rwatumye habaho imyigaragambyo aaariko yakozwe mu mahoro nubwo hari aho yakajije umurego ku buryo inyubako zimwe na zimwe zangiritse.

    Imodoka za polisi zatewe amabuye mu myigaragambyo

    Src: BBC

    Source : https://impanuro.rw/2021/04/12/muri-amerika-imyigaragambyo-yakajije-umurego-nyuma-y-uko-polisi-yishe-undi-mwirabura/

  • Mrs World yambuye ikamba uwari kurihabwa aranamukomeretsa bikomeye. – YEGOB #rwanda #RwOT

    Ibi byabereye muri Sri Lanka, aho Mrs World 2020, Caroline Jurie yafunzwe azira gukomeretsa mugenzi we wari wambitswe ikamba nk'umusimbuye ku mwanya wa Mrs World, akamukomeretsa ari kurimwambura.

    Pushpika De Silva ni we wegukanye irushanwa rya Mrs World 2020 mu muhango wabereye mu murwa mukuru wa Sri Lanka, Colombo. Yambitswe ikamba ariko ntibyamuhira kuko byarakaje mugenzi we Caroline Jurie.

    Acyambikwa ikamba, nyuma yaho gato, uwatsinze amarushanwa ya 2019 na 2020, Caroline Jurie, yerekeje kuri stage afata mikoro avuga ko uhawe ikamba atarikwiye na gato kuko ngo n'ubwo ari umugore yatandukanye n'umugabo we kandi uwatandukanye n'umufasha we ntabwo aba yemerewe kuryambara. Ati: 'Mfite icyifuzo gito, hari itegeko rivuga ko uwambara ikamba agomba kuba yarashyingiwe kandi ntatane n'umugabo we. Noneho rero, ndatera intambwe ya mbere mvuga ko ikamba De Silva yambaye ndimwambura rikambikwa igisonga cya kabiri.'

    Jurie yahise ahindukira akuramo ikamba mu mutwe basa nk'abarirwanira niko gukomereka. De Silva yahise ajyanwa kwa muganga mu gihe Juri yahise afatwa na Polisi arafungwa kubera urugomo.

    Ubusanzwe iri rushanwa rya Mrs World riba rigamije gushaka umugore mwiza cyane ku Isi (Mrs World) ryitabirwa gusa n'abagore bafite abagabo. Ni irushanwa ritandukanye na Miss World kuko yo yitabirwa n'abakobwa batarashaka ndetse bataranabyara aho baba bashakisha umukobwa mwiza ku Isi.

    Leave your vote

    Comments

    0 comments

    Source : https://yegob.rw/mrs-world-yambuye-ikamba-uwari-kurihabwa-aranamukomeretsa-bikomeye/

  • Muhanga: Abagizi ba nabi bataramenyekana batemaguye insina z’uwarokotse Jenoside –

    Aya makuru yamenyekanye mu gitondo cyo kuri uyu wa Mbere, tariki 12 Mata 2021, nyuma y’aho Nsabimana agiye mu murima we agasanga insina zose bazitemaguye.

    Amakuru aturuka mu Murenge wa Nyamabuye avuga ko izi nsina zatemwe zari mu Murima w’aho sekuru wa Nsabimana yari atuye.

    Umunyamabanga Nshingwabikorwa w’Umurenge wa Nyamabuye, Gakwerere Eraste, yemereye IGIHE iby’aya makuru, avuga ko iperereza ryatangiye kugira ngo hamenyekane abagize uruhare mu gutema izi nsina.

    Yagize ati “Ni byo koko ni ko byagenze, amakuru twayamenye muri iki gitondo nyuma y’uko umuturage wacu warokotse Jenoside yakorewe Abatutsi yari agiye ku isambu mu itongo ry’aho sekuru yari atuye bisanzwe nyine, yagezeyo asanga insina batemyemo izigera ku munani bazishyize hasi. Yahise abitumenyesha dutangira gushakisha ababigizemo uruhare dufatanyije n’inzego zibishinzwe.’’

    Yavuze ko hakiri gukusanywa amakuru ndetse bizeye ko uwatemye izo nsina aza kumenyekana.

    Yakomeje agira ati “Icyo navuga rero nubwo byagenze gutyo nta gikuba cyacitse kuko abarokotse mu Murenge wa Nyamabuye bameze neza, umutekano wabo ucunzwe neza. Ni abaturage biteje imbere n’ugize ikibazo akaba yafashwa kugira ngo gikemuke nk’uko abandi bafashwa bigizwemo uruhare n’ubuyobozi.”

    Nyuma yo gutemerwa insina, ubuyobozi bw’inzego z’ibanze bwagiye guhumuriza uyu muturage no kumubwira ko nta gikuba cyacitse.

    Gakwerere yavuze ko ibyakozwe bigaragaza ko hari abagifite ingengabitekerezo ya Jenoside ariko bagomba hagomba kubaho imikoranire y’inzego kugira ngo batahure abagize uruhare muri iki gikorwa cy’ubunyamaswa.

    Abagizi ba nabi bataramenyekana batemaguye insina z’uwarokotse Jenoside mu Karere ka Muhanga

  • Ubuhamya bukomeye bw'umugore wabyaye imbeba ,umugabo we agahita ahunga. – YEGOB #rwanda #RwOT

    Uyu mudamu witwa Jane, yatanze ubuhamya bw'ukuntu umugabo we yamutaye amuziza ko yabyaye umwana uwo mugabo yitaga imbeba ndetse arahunga aramusiga,aho kuri ubu atazi irengero ry'uyu mugabo we.

    Jane ni umugore w'abana babiri, umwe mu bana be yavukanye ikibazo gikomeye cyatumye adakura neza nk'umuvandimwe we ndetse ubabonye ushobora kugira ngo barutanwa imyaka myinshi kandi bombi baravutse ari impanga. Mu gihagararo baratandukanye cyane ntiwapfa no kubikeka.

    Umugabo w'uyu mugore yamutanye n'aba bana babiri bakimara kuvuka nyuma y'uko uwo mugabo abonye ko umugore abyaye umwe mu bana akaza adafite imiterere nkiy'abana basanzwe, ibyo byatumye uwo mugabo atamukunda na gacye ndetse bituma yigendera arabata. Kuva yagenda hashize igihe kinini na n'ubu uyu mugore ntazi uwo mugabo we aho aba, ubu hashize imyaka ikabakaba umunani.

    Byose bijya gutangira byabaye mu myaka 9 ishize, ubwo uyu mugore yakundanaga n'uyu mugabo bakaza kwemeranywa kubana ndetse bagasezerana ko bazakundana burundu. Nubwo nta mafranga bagiraga bakoze uko bashoboye bakodesha inzu itari nziza cyane ariko kuribo bumvaga bayishimiye kuko bari bakundanye cyane. Bakimara kubana mu gihe gito uyu mugore yahise atwara inda ndetse umugabo we amwitaho bikomeye dore ko biteguraga kwakira imfura yabo.

    Bidatinze uko iminsi yagiye ishira aba bajyanaga kwa muganga umugore agiye kwipimisha ndetse burigihe umuganga akababwira ko bazabyara umukobwa ndetse ntamunsi numwe bigeze babwirwa ko umugore atwite impanga. Amezi 9 yaje kugera ndetse umugore ajya kubyara, umwana wa mbere yarasohotse ndetse bakeka ko birangiye. Bidatinze umugore yaje kumvako atararangiza kubyara ndetse bahamagara muganga igitaraganya.

    Muganga akimara kuhagera yaje kubona ko hari umwana wa kabiri uri kuza, gusa baje gutangazwa nuko umwana wa kabiri ageze hanze basanze ari gato cyane ndetse kajyaga kungana n'imbeba, ibi byanagoye abaganga kuko bamaze akanya kanini bibaza niba koko uwo ari umuntu cyangwa arikindi kintu. Abaganga bahise bategeka umugore gukuramo burikintu cyose yari yambaye ndetse agahita aterura nako kana ka kabiri ngo barebe niba koko ari umuntu.

    Aka kana byabaye ngombwa ko kaguma kwa muganga igihe kinini bakitaho ngo barebe ko kazagira umubiri nk'uwabana basanzwe ariko biza kuba iby'ubusa kugeza ubwo basabye umugore kujyana akana ke murugo.

    Umugabo yatahanye n'umugore ariko atishimye biturutse ku kuba bari babyaye umwana muzima ariko akaza guherekezwa nundi ufite ubumuga bukomeye. Byageze aho uyu mugore ashaka guhitana aka kana biturutse ku kuba abantu baramwumvishaga ukuntu katazigera kamara n'icyumweru kagihumeka, abantu ndetse batangiye kumuha urwamenyo bitewe nako kana ka kabiri yari yabyaye bituma yumva ataye umutwe cyane.

    Nibwo benshi batangiye kwita ako kana imbeba, inzoka ndetse nandi mazina apfobya, bikababaza umugore cyane ariko akabura icyo abikoraho, gusa umwana yaje kuramba ndetse amara igihe kinini kiruta uko abandi babikekaga. Umunsi umwe umugabo yaje kubyuka arigendera ntiyagaruka, umugore byaramugoye cyane kuko umugabo we niwe warusanzwe akora gusa, nibwo yatangiye kwiyishyurira inzu, ndetse no kurera abana. Igihe cyo kuvuza wa mwana kigeze yageze kwa muganga bamubwira ko niba nta bwishingizi afite badashobora kumuvura ibyo kuvurwa kwa wa mwana birangirira aho.

    Uyu mugore atangaza ko umugabo we amaze imyaka 8 yose yaraburiwe irengero, ndetse akaba asigaye abaho mu buzima bugoranye.

    Leave your vote

    Comments

    0 comments

    Source : https://yegob.rw/ubuhamya-bukomeye-bwumugore-wabyaye-imbeba-umugabo-we-agahita-ahunga/