Webrwanda Backend

Author: webrwanda

  • Urwibutso ku batutsi barokowe n’Inkotanyi mu Gatsata –

    Tariki 12 Mata 1994 abatuye mu Murenge wa Gatsata barayibuka cyane kuko aribwo Interahamwe ziraye mu Batutsi zikabica nubwo nyuma ingabo za FPR Inkotanyi zaje kurokora abari bagihumeka.

    Umutoni Denise, ni umwe mu barokokeye Jenoside i Karuruma. Yavuze ko kuva tariki ya 7 kugeza tariki 12 Mata 1994 aribwo abatutsi benshi bishwe mbere y’uko Inkotanyi zitangira kubarokora.

    Ubwo Inkotanyi zabarokoraga, icyo gihe yari afite imyaka 12. Yibuka ko zabasanze mu nzu bikingiranyemo.

    Ati “ Badusanze ahantu twari twikingiranye ku nzu y’Interahamwe ikomeye cyane. Barakomanze babura ubakingurira kuko twese twari twagize ubwoba. Binjiyemo basanga bitandukanye n’uko babitekerezaga kuko Interahamwe zari zamaze gusohoka, basanga abasigayemo ari abari bahahungiye, baraduhumuriza, bagenda bazanayo n’abandi benshi nyuma baza kutujyana i Byumba ariko abari bafite imbaraga bagiye n’amaguru.”

    Perezida wa IBUKA mu Murenge wa Gatsata, Ngarambe Christian , yabwiye IGIHE ko ako gace gafite umwihariko kuko Interahamwe z’Umujyi wa Kigali ariho zahemberwaga mu ruganda rwakoraga ibiringiti rwa Rwantexo, ibyo bigatuma umugambi wa Jenoside ari naho ucurirwa.

    Yavuze ko ubusanzwe mbere hitwaga Komine Rouge kuko hari Abatusi benshi bishwe.

    Yavuze ko ku kiraro cya Gatsata ari hamwe mu hiciwe abatutsi benshi kuko babatangiraga bashakaga guhungira kuri Ste Famille.

    Ati “Ku kiraro cya Gatsata habayeho Jenoside, abantu bavaga mu Murenge wa Jali , na Jabana bashakaga kujya Sainte Famille niho hari bariyeri ebyiri zabakumiraga kuko hapfuye abantu benshi cyane. Ubu ntituzi ahantu bari, niba barabashyize muri Nyabarongo.”

    Ngarambe yavuze ko nubwo imiryango yabo yishwe urw’agashinyaguro, ubu bishimira ko Inkotanyi zabarokoye mu gihe byari bigoye bakaba batekanye.

    Kugeza ubu Abatutsi bishwe muri Jenoside mu Murenge wa Gatsata bashyinguye ku rwibutso ruri muri uwo murenge barenga 550. Ni mu gihe abandi baguye muri uyu murenge bashyinguye mu rwibutso rwa Kigali, Jali na Mvuzo.

    Abarokokeye mu Gatsata bashima ingabo z’Inkotanyi zahagobotse Interahamwe zigiye kubamara

  • Nyaruguru: Hibutswe Abatutsi biciwe i Kibeho bizeye ko bashobora kurokokera ku Butaka Butagatifu –

    Ni igikorwa cyabaye kuri uyu wa Kabiri tariki ya 13 Mata 2021 mu Murenge wa Kibeho ahari urwibutso rwa Jenoside rushyinguyemo imibiri igera ku bihumbi 30 y’abahiciwe ubwo bari bahahungiye.

    Perezida wa Ibuka mu Karere ka Nyaruguru, Muhizi Bertin, yavuze ko muri Mata 1994 i Kibeho hari hahungiye Abatutsi benshi baturutse mu bice bitandukanye bihakikije, Interahamwe zibagabaho ibitero bikomeye ku matariki ya 12, 13 na 14 Mata 1994 zigamije kubarimbura.

    Ati “Igitero cyo ku itariki 13 cyaje gikomeye barara bica; ku itariki 14 bafashe lisansi basuka ku Kiliziya hejuru bafunga imiryango batwikiramo Abatutsi bari barimo, barayitobora bakajya bacishamo n’amasasu barasamo imbere.”

    Muhizi avuga ko ku Kiliziya i Kibeho hari hahungiye Abatutsi bagera ku bihumbi 41 ariko abaharokokeye batagera ku bantu 50.

    Umwe mu barokokeye i Kibeho witwa Gakwaya Kivengeri Faustin yavuze ko bahahungiye baturutse muri Komini enye za Mubuga, Rwamiko, Kivu na Runyinya.

    Ati “Twahungiye hano turi benshi, abicanyi baraje bakinga inzugi barangije bafata lisansi n’ibiti bayirundaho baratwika. Hariya hari imyobo ni ho batoboye bakajya banyuzamo gerenade bateramo imbere ndetse bakarasamo n’amasasu.”

    Gakwaya avuga ko barashe bamwe mu bo bari kumwe bamugwa hejuru, bigeze nijoro abicanyi bagiye arahaguruka arahunga, abasha kurokoka atyo.

    Mukanyarwahi Annonciata ufite abo mu muryango we biciwe i Kibeho, yavuze ko iyo hafashwe umwanya wo kwibuka akaza ku rwibutso aho abe bashyinguye, yumva bimuruhuye ku mutima.

    Ati “Ku mutima hari ibikomere byinshi ariko iyo tuje hano numva hari icyo binduhuraho kuko kubibuka ni ukubaha agaciro kandi mba mbona nsa nk’ubabona nibuka uko bagiye.”

    Umuyobozi w’Agateganyo w’Akarere ka Nyaruguru, Gashema Janvier, yavuze ko mu gihe cya Jenoside Abatutsi bari batuye mu bice bikikije Kibeho bahungiye mu Kiliziya bahizeye amakiriro nk’ahantu habonekeye Bikira Mariya, ariko baza kuhicirwa.

    Ati “Abemera Kiliziya Gatolika bemera ko umubyeyi Bikira Mariya yigaragarije hano i Kibeho, ku buryo rero mu gihe cya Jenoside abavandimwe bari batuye mu bice bikikije Kibeho bumvaga bahizeye amakiriro; ariko kubera inyigisho z’amacakubiri ndetse ari ku bukana buri hejuru, icyo bari bahizeye ntabwo ari cyo babonye kuko barahaje barahicirwa ndetse bamwe babicira no mu kiliziya.”

    Yakomeje avuga ko ibyo bigaragaza politiki mbi yari mu gihugu icyo gihe, aho umuntu ajya kwica mugenzi we bari basanzwe bahurira mu rusengero.

    Kwibuka Abatutsi biciwe i Kibeho byitabiriwe n’abantu bake bahagarariye abandi kubera ko icyorezo cya Covid-19 cyugarije u Rwanda n’Isi muri rusange kandi amabwiriza yo kucyirinda akaba atemerera abantu benshi guhurira hamwe.

    Abitabiriye kwibuka Abatutsi biciwe i Kibeho bafashe umunota wo kwibuka

    Umuhango wo kwibuka witabiriwe n’abantu bakeya bahagarariye abandi kubera ko muri iki gihe icyorezo cya Covid-19 kitemerera abantu benshi guhurira hamwe

    Mu Karere ka Nyaruguru kuri uyu wa Kabiri babaye igikorwa cyo kwibuka no kunamira Abatutsi biciwe mu Kiliziya i Kibeho aho bari bahungiye muri Jenosise

    Perezida wa Ibuka mu Karere ka Nyaruguru, Muhizi Bertin, yavuze ko ku Kiliziya i Kibeho hari hahungiye Abatutsi bagera ku bihumbi 41 ariko abaharokokeye batagera ku bantu 50

    Umuyobozi wungirije ushinzwe Imibereho myiza y’Abaturage mu Karere ka Nyaruguru, Kayitesi Collette, yunamira Abatutsi biciwe i Kibeho

    Umuyobozi w’Agateganyo w’Akarere ka Nyaruguru, Gashema Janvier, yunamira abaruhukiye muri uru rwibutso

    Urwibutso rwa Jenoside rwa Kibeho ruruhukiyemo imibiri igera ku bihumbi 30

    Ikarita ndangamateka ya Jenoside yakorewe Abatutsi mu 1994 i Kibeho

    Kiliziya y’i Kibeho yatwikiwemo Abatutsi yongeye gusanwa

    Kiliziya ya Kibeho iriho icyapa cyerekana ko yiciwemo Abatutsi muri Jenoside yakorewe Abatutsi mu 1994

    [email protected]

  • Mukangemanyi Adeline Rwigara yongeye guhamagazwa na RIB –

    Mukangemanyi yatumijwe na RIB bwa mbere ku wa Kane, tariki 8 Mata 2021, ariko yanga kwitaba uru rwego avuga ko igihugu kiri mu gihe cy’icyunamo.

    Uyu mubyeyi utuye mu Mujyi wa Kigali, Akarere ka Nyarugenge, Umurenge wa Nyarugenge, Akagari ka Kiyovu, Umudugudu w’Ishema yongeye kumvikana avuga ko yahamagajwe.

    Mu kiganiro yumvikanyemo ku rubuga rwa YouTube ya vquick Tv, Mukangemanyi Adeline Rwigara, yavuze ko yongeye guhamagarwa.

    Yagize ati “Hari indi convocation yaje. Sinjye bahamagara buri gihe, bayicisha ku bayobozi b’imidugudu na ba gifitu. Bayicisha aho, bagahamagara umwana agasinya, bakayizana. Iya kabiri yoherejwe ku Cyumweru, nagombaga kwitaba ku wa Mbere.’’

    Muri icyo kiganiro yumvikana avuga ko we n’abana be bakomeye kandi bashima Imana.

    Ubwo aheruka guhamagazwa na RIB, ntiyitabye ndetse Umuvugizi w’Umusigire w’uru rwego, Dr Murangira B. Thierry, yari yabwiye IGIHE ko ibyerekeye ibyo akurikiranyweho azabimenyeshwa yitabye Ubugenzacyaha.

    Ubusanzwe iyo umuntu ahamagawe inshuro ebyiri atitaba, Ubugenzacyaha bwiyambaza Ubushinjacyaha kugira ngo hakorwe urwandiko rumuzana ku gahato ruzwi nka ‘mandat d’amener’, hanyuma akabazwa ibyo Ubugenzacyaha bwifuza ko asobanura.

    ‘Mandat d’amener’ ntifunga ahubwo yateganyijwe kwifashishwa ku wanze kwitaba ubutabera, aho Umugenzacyaha asaba Umushinjacyaha uri mu ifasi y’aho akorera gukora urupapuro rumuzana ku gahato.

    IGIHE yamenye ko ibijyanye n’ibazwa rya Mukangemanyi bishobora kuba byegejwe inyuma, bihabwa indi tariki itaramenyekana.

    Mukangemanyi Adeline mu 2017 yarezwe ibyaha byo gukurura amacakubiri no guteza imvururu muri rubanda.

    Nyuma y’umwaka umwe, amezi abiri n’iminsi 13, we n’abandi barimo umukobwa we Diane Rwigara bagizwe abere n’Urukiko Rukuru.

    Indi nkuru wasoma: Mukangemanyi Adeline Rwigara yanze kwitaba RIB (YAVUGURUWE)

    Mukangemanyi Adeline Rwigara yongeye guhamagazwa n’Urwego rw’Igihugu rw’Ubugenzacyaha, RIB

  • Perezida Kagame yagaragaje ko Covid-19 yabangamiye ubufatanye mpuzamahanga –

    Yabigarutseho kuri uyu wa Kabiri, tariki 13 Mata 2021, ubwo hatangizwaga ibiganiro ngarukamwaka byiswe ‘Raisina Dialogue’ bibaye ku nshuro ya gatandatu yiga ku bibazo bitandukanye bibangamiye abatuye Isi.

    Ni ibiganiro bitegurwa n’Umuryango Observer Research Foundation ku bufatanye na Guverinoma y’u Buhinde, muri uyu mwaka bikaba bizamara iminsi ine bikaba byatangijwe ku mugaragaro na Minisitiri w’Intebe w’u Buhinde, Narendra Modi.

    Mu ijambo yagejeje ku bitabiriye umunsi wa mbere w’ibi biganiro byabaye hifashishijwe ikoranabuhanga, Perezida Kagame yavuze ko icyorezo cya Covid-19, atari ikibazo cyugarije urwego rw’ubuzima gusa ahubwo cyanagize ingaruka ku bufatanye mpuzamahanga.

    Yakomeje agira ati “Covid-19 ni ikibazo cyugarije Isi mu bijyanye n’ubuzima ariko kandi ni ikibazo kibangamiye ubufatanye mpuzamahanga.”

    “Mu bihe nk’ibi ibintu bibaye bike, imbaraga n’ubukungu ni byo bigena uko ibintu bigenda ariko u Buhinde usibye kuba bufite ibindi bibazo byabwo, bwakoze inkingo nyinshi zoherejwe muri Afurika binyuze muri gahunda ya Covax n’izindi gahunda.”

    By’umwihariko muri Werurwe 2021, Leta y’u Buhinde, yahaye u Rwanda inkunga y’inkingo 50.000 za Covid-19 zo mu bwoko bwa AstraZeneca.

    Umukuru w’Igihugu yavuze ko iyo hatabaho ubufatanye bw’u Buhinde mu gukora inkingo ndetse n’umutima wo gufatanya n’abandi byari gushoboka ko Afurika iba itarabona inkingo nk’izo imaze kubona.

    Ibintu avuga ko byerekanye amahirwe ahari akwiye kubyazwa umusaruro agashorwamo imari ku bufatanye n’abikorera ku ruhande rw’u Buhinde na Afurika cyane cyane mu bijyanye n’ikorwa ry’imiti.

    Perezida Kagame kandi yashimye umubano w’u Rwanda n’u Buhinde ukomeje kugenda neza.

    Yagize ati “Umubano hagati y’u Rwanda n’u Buhinde ukomeje kugenda neza kandi intego yacu ni ugushimangira ubwo bufatanye n’umubano. U Rwanda n’u Buhinde bikomeje gufatanya mu bikorwa remezo ndetse n’ibikorwa by’iterambere.”

    Yakomeje agira ati “Intego ni ukongera amahirwe yo kwiga no kubona akazi ku rubyiruko rwo mu Buhinde ndetse n’u Rwanda. Ubumenyi, guhanga udushya n’ubukungu bubungabunga ibidukikije ni byo bizadufasha mu gutera imbere nyuma y’icyorezo cya Covid-19.”

    Umukuru w’Igihugu yavuze ko ibiganiro ngarukamwaka byiswe Kigali Global Dialogue, na byo bitegurwa n’Umuryango Observer Research Foundation wo mu Buhinde nabyo ari urugero rw’ubufatanye bwiza buri hagati y’ibihugu byombi.

    Ni ibiganiro bitangirwamo ibitekerezo bishya kandi bitanga icyizere ku gukemura ibibazo bibangamiye iterambere ry’ubukungu kandi bigashimangira uburinganire ku Isi.

    Perezida Kagame yaboneyeho guha ikaze mu Rwanda abazitabira inama ya ‘Raisina Dialogue’ y’umwaka utaha iteganyijwe kubera i Kigali mu 2022.

    Ibi biganiro kandi byitabiriwe n’Intumwa idasanzwe ya Leta Zunze Ubumwe za Amerika muri gahunda yo guharanira amahoro muri Afghanistan, Zalmay Khalizad, Minisitiri w’Ububanyi n’Amahanga wa Australia, Marise Ann Payne. Biyongeraho Minisitiri w’Ububanyi n’Amahanga w’u Bufaransa, akaba anashinzwe ibihugu by’u Burayi, Jean-Yves Le Drian, Umujyanama mu by’Umutekano wa Afghanistan, Hamdullah Mohib.

    Perezida Kagame yashimye umubano n’ubufatanye bukomeje kuba hagati y’u Rwanda n’u Buhinde

  • Urwibutso ku batutsi barokowe n'Inkotanyi mu Gatsata – #rwanda #RwOT

    Tariki 12 Mata 1994 abatuye mu Murenge wa Gatsata barayibuka cyane kuko aribwo Interahamwe ziraye mu Batutsi zikabica nubwo nyuma ingabo za FPR Inkotanyi zaje kurokora abari bagihumeka.

    Umutoni Denise, ni umwe mu barokokeye Jenoside i Karuruma. Yavuze ko kuva tariki ya 7 kugeza tariki 12 Mata 1994 aribwo abatutsi benshi bishwe mbere y'uko Inkotanyi zitangira kubarokora.

    Ubwo Inkotanyi zabarokoraga, icyo gihe yari afite imyaka 12. Yibuka ko zabasanze mu nzu bikingiranyemo.

    Ati ' Badusanze ahantu twari twikingiranye ku nzu y'Interahamwe ikomeye cyane. Barakomanze babura ubakingurira kuko twese twari twagize ubwoba. Binjiyemo basanga bitandukanye n'uko babitekerezaga kuko Interahamwe zari zamaze gusohoka, basanga abasigayemo ari abari bahahungiye, baraduhumuriza, bagenda bazanayo n'abandi benshi nyuma baza kutujyana i Byumba ariko abari bafite imbaraga bagiye n'amaguru.'

    Perezida wa IBUKA mu Murenge wa Gatsata, Ngarambe Christian , yabwiye IGIHE ko ako gace gafite umwihariko kuko Interahamwe z'Umujyi wa Kigali ariho zahemberwaga mu ruganda rwakoraga ibiringiti rwa Rwantexo, ibyo bigatuma umugambi wa Jenoside ari naho ucurirwa.

    Yavuze ko ubusanzwe mbere hitwaga Komine Rouge kuko hari Abatusi benshi bishwe.

    Yavuze ko ku kiraro cya Gatsata ari hamwe mu hiciwe abatutsi benshi kuko babatangiraga bashakaga guhungira kuri Ste Famille.

    Ati 'Ku kiraro cya Gatsata habayeho Jenoside, abantu bavaga mu Murenge wa Jali , na Jabana bashakaga kujya Sainte Famille niho hari bariyeri ebyiri zabakumiraga kuko hapfuye abantu benshi cyane. Ubu ntituzi ahantu bari, niba barabashyize muri Nyabarongo.'

    Ngarambe yavuze ko nubwo imiryango yabo yishwe urw'agashinyaguro, ubu bishimira ko Inkotanyi zabarokoye mu gihe byari bigoye bakaba batekanye.

    Kugeza ubu Abatutsi bishwe muri Jenoside mu Murenge wa Gatsata bashyinguye ku rwibutso ruri muri uwo murenge barenga 550. Ni mu gihe abandi baguye muri uyu murenge bashyinguye mu rwibutso rwa Kigali, Jali na Mvuzo.

    Abarokokeye mu Gatsata bashima ingabo z’Inkotanyi zahagobotse Interahamwe zigiye kubamara

    Source : http://igihe.com/amakuru/u-rwanda/article/urwibutso-ku-batutsi-barokowe-n-inkotanyi-mu-gatsata

  • Umuhanzi Big Dom yavuze ku nzira y'umusaraba yanyuzemo igihe cya Jenoside yakorerwaga Abatutsi #rwanda #RwOT

    Big Dom ni umuhanzi Nyarwanda usigaye atuye mu Bufaransa. Mu 1990 we n'umuryango we bari batuye i Nyamirambo akaba yarigaga ku Ntwari ikigo cyari cyegeranye n'iwabo. Muri aka gace yari ahafite inshuti nyinshi kuko yakuze azi kubana n'urungano. Mu kugaruka ku bugome ndengakamere bwakorewe Abatutsi, yahereye ku byamubayeho mu 1990 agaragaza ko kwanga Abatutsi byigishijwe no mu mashuri.

    Yagize ati 'Muri 1990 nigaga mu wa kane twari dufite igitabo batwigishirizagamo kitwaga uburere mboneragihugu. Iri somo ryatangiraga saa 3:00 umwarimu yabaga ahagaze imbere afite icyo gitabo. Ndacyibuka cyabaga cyanditseho uburere mboneragihugu akatwigisha ibintu byo kuvuga ngo habayeho umuntu witwaga Kanjogera akajya gutera abahungu inkota mu nda ngo akabahagurukiraho ibintu by'abahutu n'abatutsi'.


    Big Dom ku nshuro ya mbere yatanze ubuhamya yari amaranye imyaka myinshi

    Yakomeje agaragaza uko bigishwaga ukuntu abatutsi ngo bari abantu batari beza n'ibindi byinshi bijyane no kubasebya.

    Ati' Rimwe haje kuza umwana mushya ku ishuri witwaga Grace niba ariho azambabarire kuko navuze ko mvuga ibyo nabayemo kandi nabonye n'amaso yanjye. Yari avuye ku rindi shuri ryari rimeze nk'iry'aba Boss ryo mu Rugunga, noneho aza mu ishuri ryacu mu wa kane. Yari umukobwa mwiza uhumura, iwabo bamusigaga utuntu tw'utuvuta, mwarimu ahita amwicaza iruhande rwanjye neza”.

    Yakomeje avuga ko ku gihande cyo hirya hicaraga undi mwana w'umuhungu witwaga Andereya iwabo bakaba bari baraje bavuye i Burundi nk'impunzi. Aba ngo bari bazi ibintu by'ubwoko kuko bari baravuye iwabo ari byo bahunga. Ngo kubera ukuntu uyu Grace yari mwiza, Big Dom ngo yashatse kumutereta maze amwandikira akabaruwa agira ati ''Ndagukunda nk'uko agafi gakunda amazi'. Ku munsi wa kabiri aranyandikira ngo mbese ibyo bintu umbwiye ni ibiki'.

    Andereya wari waravuye i Burundi ngo yumvaga yakubita ishuri ryose. Ibi ngo byamuhaye kumva ko ariwe uzatereka wa mwana mushya wari mwiza ariko nyamukobwa ntiyamukunda ahubwo yikundira Big Dom ku buryo ngo Andereya rimwe bari mu masaha yo gukina yamubwiye ko aramuvuna nibasubira mu ishuri kandi ngo byose yari yabibonye ko ari kumwandikira mbese yatangiye gutereta wa mukobwa.

    Nyuma yaho ku munsi ukurikira ngo bagiye gukina muri ya masaha yo n'ubundi azanzwe yo gukina, noneho batangira gukina baririmba ka karirimbo k'abana aho bakora uruziga ari benshi noneho bakaririmba bagira bati 'gatanu, gatandatu, icyenda, cumi na rimwe, tubwire uwo ukunda natwe tumukunde, n'ibindi. [icyo gihe uri hagati ahita avuga uwo akunda hanyuma uwo avuze nawe akavuga undi bigakomeza gutyo].

    Yakomeje avuga uko byagenze batangiye gukina aka gakino ati 'Twayikiniraga mu kiziga noneho umukobwa witwa Zainabo atora Andereya noneho Andereya ahita atora Grace kuko uwajyagamo yatoraga uwo akunda, Grace aririmbye arambwira ngo nkunda Dominic ni we wantwaye umutima'.

    Yavuze ko ubu buhamya buzafasha urubyiruko n'abazamukomokaho kumenya amateka

    Muri ubu buhamya bwe burebure yakomereje ku bihe byamubabaje atazibagirwa ubwo yabonaga ubwicanyi bukomeye muri Mata 1994 muri Jenoside yakorewe Abatutsi. Tariki 8 ngo abajandarume 4 babaga muri burigade ya Nyamirambo imbere yo ku Ntwari barasohotse baza mu gace kwa Big Dom bari batuyemo bagenda binjira mu ngo bavuga ko bashaka inyenzi icyakora ngo ntibica abantu.

    Ku mugoroba w'uwo munsi ngo haje abantu bameze nk'abakozi atazi aho bavuye maze bajya ku mugabo witwa Sheikh Abdulkhalim Harerimana wigeze kuba Minisitiri, inzu ye barayisenya yose ngo habagamo undi mugabo nawe wigeze kuba Perefe. Icyo gihe ngo bishe abantu ku mugabo witwaga Rusimbi nawe wari utuye muri ako gace.

    Kuva icyo gihe ngo byatangiye gukomera ku munsi wakurikiyeho wa gatatu ba bajandarume baragaruka bafata abantu bo kwa Karema n'abandi benshi bababwiraga b'abagabo bababwira ko abasigara baraba ari Inyenzi. Yakomeje avuga uko byagenze bazanye abo bakusanyije iwabo; Yagize ati

    'Bari benshi ariko nkabona harimo abo nzi. Harimo abajandarume bane noneho baravuga ngo hano hari Inyenzi bahita basohora umusaza witwaga Polikarupe bamukubita ikibuno cy'imbunda yikubita hasi, basohora Mama mudogo, basohora Karori basohora Didier babicaza hasi barabakubita'.

    Abaturage bari aho hafi ngo batangiye kubasabira imbabazi hanyuma wa musaza witwa Polikarupe asaba imbabazi ngo ntibabice ababwira ko ari bubahe amafaranga n'isaha yo mu bwoko bwa Radu yarikoze muri zahabu.

    Icyakora ngo ako kanya haje abantu bane bari abasiramu baje bafite imbunda bari barimo uwitwa Mugabo, Andre, Sudi, n'undi umwe birukana abajandarume bashaka no kurwana nabo kuko ngo ari bo bakurikiranaga umutekano wo muri ako gace. We ngo yahise yinjira muri ba bandi bazanye n'abajandarume ahagarara kuri robine ntibabimenya.”

    Ku munsi wakurikiyeho baragarutse ari abajandarume 3 binjira mu cyumba bafata ku ngufu Nyina wabo bose bamaze gukora ayo mahano barasohoka bafata mukuru we na wa musaza witwaga Polikarupe barabamanukana basa n'ababajyana ku muhanda mu kumanuka ngo Big Dom yarabakurikiye ngo arebe aho babajyana.

    Yavuze uko yatangiye kwangwa akiga mu mwaka wa kane w'amashuri abanza bakamwita izina bagendeye ku zuru rikamukurikirana

    Bigiye imbere gato ngo wa musaza yabaye nk'uwisigaza inyuma bamukubita umugeri aragwa mukuru wa Big Dom bari bashoreye hamwe n'uwitwa Didie wari wahungiye iwabo ashaka kwiruka baramufata, abonye umugabo witwa Sebucocero wari mu ishyaka rya EMERENIDE ngo yamusabye kumuvugira kuko yari asanzwe amuzi undi nawe avuga ko amuzi icyakora yongeraho ko atazi ibye!

    Bigeye imbere gato ngo umujandrume yakubise wa mukuru we imbunda aragwa amurasa amasasu menshi y'urufaya aramwica. Uyu mujandarume ngo arebye inyuma abona Big Dom kuko yari yamubonye mu rugo yari yamumenye aramubwira ngo hagarara arahagarara. Yakomeje avuga uko yarusimbutse ati 'Umugabo witwa Banana sinshobora kubyibagirwa niba akinabaho Imana izamuhe amahoro n'imugisha”.

    “Yitwaga ngo Banana Bridje yari afite ikiraro kera bamwitaga umupfumu yahise amfata anshyira inyuma ye aravuga ngo wamuretse uwo mwana'. Umujandarume ngo yaravuze ngo kampe nkice ngo yambonye nica mukuru we ngo kandi bakuru be bakaba Inyenzi. Uyu mugabo Banana ngo yakomeje mukuhisha inyuma ye no kumusabira imbabazi, wa mujandarume ngo aragenda ariko avuga ko ari hahandi azongera akamwica.

    Ubuhamya bwe bukubiyemo byinshi birimo n'uko bagiye bica abandi bavandimwe be.

    Source : http://umuryango.rw/imyidagaduro/article/umuhanzi-big-dam-yavuze-ku-nzira-y-umusaraba-yanyuzemo-igihe-cya-jenoside

  • Minisitiri Bamporiki yagarutse ku isano muzi Abanyarwanda bafitanye itagakwiriye gutuma bicana – #rwanda #RwOT

    Ibi yabigarutseho kuri uyu wa Kabiri tariki ya 13 Mata 2021 ubwo hibukwaga abari abayobozi mu bice byahujwe bigakora Intara y'Iburasirazuba birimo Perefegiture za Byumba, Kigali- Ngali na Kibungo ndetse na Su-Perefegiture za Rwamagana, Rusumo na Kanazi bishwe muri Jenoside yakorewe abatutsi mu 1994.

    Kuri ubu hamaze kubarurwa abari abakozi b'izi Perefegiture 19 barimo n'uwari Perefe wa Kibungo, Ruzindana Godfroid, wicanwe n'abana be 11 ndetse n'abandi bakozi batandukanye.

    Mu kiganiro Minisitiri Bamporiki yahaye abitabiriye uyu muhango yise 'Isano Muzi' yagarutse ku isano abanyarwanda bafitanye n'uburyo bari babanye mbere y'umwaduko w'abazungu, yavuze ko mbere abanyarwanda bagiraga amoko menshi ariko abazungu baza kuyahinduramo amoko y'Abahutu n'Abatutsi ari nayo yagejeje kuri Jenoside yakorewe abatutsi mu 1994.

    Minisitiri Bamporiki yavuze ko ufashe buri munyarwanda akagenda asubira kwa se, se na we agasubira kwa sekuru bishobora kugera ku gisekuru cya cumi abanyarwanda benshi barimo abiyitaga abahutu n'abiyitaga abatutsi bahuje isano.

    Yavuze ko iyo ibyo buri wese amaze kubimenya bihita bigaragaza ko abakoze Jenoside yakorewe Abatutsi abenshi bikoze mu nda abandi bakihekura ngo kuko bicaga abo bahuje isano.

    Minisitiri Bamporiki yasabye abayobozi batandukanye kwigisha abakiri bato kubana nk'abafitanye isano bakirinda kubacamo ibice ahubwo bakabigisha gukunda u Rwanda no gushyira hamwe bagamije kuruteza imbere.

    Ati 'Isano muzi mureke tuyitinyuke turerere abana bacu nk'abafitanye isano nibwo tuzubaka u Rwanda ruzaramba igihe kirekire.'

    Guverineri w'Intara y'Iburasirazuba, Emmanuel Gasana, yavuze ko kwibuka ari uguha agaciro abishwe muri Jenoside yakorewe Abatutsi mu 1994 , avuga ko kubibuka kwiza ari ukwiyubaka no gukora neza inshingano buri muntu wese afite.

    Gasana yakomeje yihanganisha buri umwe wese wabuze abe muri Jenoside yakorewe abatutsi avuga ko 'nubwo twabuze abacu ariko dufite u Rwanda, dufite igihugu kitavangura, gitanga amahirwe angana ku bantu bose, igihugu gifite politiki nziza y'iterambere. Igihugu gifite ubutabera bwunga.'

    Bucyeye Ignatienne wavuze mu izina ry'imiryango y'abakoreraga Perefegiture na za superefegiture zahujwe, yavuze ko abacitse ku icumu bo muri iyi miryango bateye intambwe mu kwiyubaka, barenze ibikomere bitandukanye ngo kuri ubu bari mu nzira y'iterambere.

    Yagize ati 'Turashimira ubuyobozi bw'Intara y'Iburasirazuba kuko kuba harubatswe urwibutso rwanditseho amazina y'abacu, biratunezeza cyane, iyo turebye uko imiryango y'abarokotse muri iyi miryango borojwe inka za kijyambere ni ibintu duha agaciro cyane.'

    Yashimiye kandi abandi bantu batahigwaga bemeye kwitandukanya n'abicanyi bagahisha abahigwaga, yatanze urugero ko ubwo umugabo we yamaraga kwicwa abana be hari umuntu wabahishe kugeza Jenoside irangiye.

    Bucyeye yasabye ubuyobozi bw'Intara kubafasha gukomeza gushakisha imiryango icyenda yaburiwe irengero mu miryango 19 imaze kumenyekana, anabasaba gushakisha abandi bantu bari abakozi b'izi perefegiture na superefegiture zahujwe.

    Minisitiri Bamporiki yasabye abayobozi kwigisha abakiri bato uburyo bakurira mu kubana neza

    Guverineri Gasana Emmanuel yibukije abafite ababo bishwe muri Jenoside yakorewe Abatutsi ko bafite igihugu kibakunda kandi kibitayeho

    CP Emmanuel Hatari yunamiye abari abakozi bazize Jenoside yakorewe Abatutsi

    Umunyamabanga wa Leta muri Minisiteri y'Urubyiruko n'Umuco, Bamporiki Edouard, yavuze ku isano muzi ihuza abanyarwanda bose

    Source : http://igihe.com/amakuru/u-rwanda/article/minisitiri-bamporiki-yagarutse-ku-isano-muzi-abanyarwanda-bafitanye

  • Kamonyi-Ruyenzi: Inzu y'umuturage yafashwe n'inkongi y'umuriro irakongoka(amafoto) #rwanda #RwOT

    Inzu iri ku muhanda mu isantere ya Ruyenzi, hepfo gato ya sitasiyo ya Esanse mu Mudugudu wa Rugazi, Akagari ka Ruyenzi, Umurenge wa Runda yafashwe n'inkongi y'umuriro ahagana ku i saa cyenda n'iminota morongo itatu( 15h30) irakongoka.

    Iyi nzu yahiye ni iy'umuturage witwa Nyandwi Venuste, iri ku muhanda neza wa Kaburimbo usa n'umanuka ugana ahazwi nka Bishyenyi. Ni muri metero nka mirongo ine uvuye kuri sitasiyo ya Esanse(Essence) ihari.

    Byatangiye abaturage birwanaho mu kuzimya.

    Bamwe mubari bahari igihe inkongi y'umuriro yadukiraga iyi nzu, bavuga ko umuriro wahereye mu cyumba hejuru ahari Fizibule z'umuriro. Ni mu cyumba cyari kiryamyemo umwana ariko yahungishijwe rugukubita.

    Aha ni icyumba n'igitanda umwana yari aryamyemo.

    Ibyari muri iyi nzu byahiye birakongoka, ku bw'amahirwe nta muntu wahakomerekeye cyangwa ngo agire ikibazo icyo aricyo cyose muri iyi nkongi, yaba abari mu rugo ndetse na Nyiri urugo wahageze nyuma bahamya ko yatewe n'umuriro( Electricity).

    Inkongi icyaduka, abari mu rugo bahuruje, inzego z'ibanze ndetse n'abaturage batangira kwirwanaho, ariko kubera ibikoresho bidahagije bakoreshaga mu kuzana amazi ngo bazimye ntacyo bafashije cyane kugeza ubwo imodoka kabuhariwe ya Polisi mu kuzimya inkongi yaje ikabafasha, bahashya umuriro wari wigize akaraha kajyahe.

    Insinga aho ziva zerekeza mu cyuma ahari fizibule niho umuriro bivugwa ko wahereye.

    Mu ruganiriro/Salon ntacyasigaye.

    Munyaneza Theogene / intyoza.com

    Source : https://www.intyoza.com/kamonyi-ruyenzi-inzu-yumuturage-yafashwe-ninkongi-yumuriro-irakongokaamafoto/

  • Minisitiri Bamporiki yagarutse ku isano muzi Abanyarwanda bafitanye itagakwiriye gutuma bicana –

    Ibi yabigarutseho kuri uyu wa Kabiri tariki ya 13 Mata 2021 ubwo hibukwaga abari abayobozi mu bice byahujwe bigakora Intara y’Iburasirazuba birimo Perefegiture za Byumba, Kigali- Ngali na Kibungo ndetse na Su-Perefegiture za Rwamagana, Rusumo na Kanazi bishwe muri Jenoside yakorewe abatutsi mu 1994.

    Kuri ubu hamaze kubarurwa abari abakozi b’izi Perefegiture 19 barimo n’uwari Perefe wa Kibungo, Ruzindana Godfroid, wicanwe n’abana be 11 ndetse n’abandi bakozi batandukanye.

    Mu kiganiro Minisitiri Bamporiki yahaye abitabiriye uyu muhango yise ‘Isano Muzi’ yagarutse ku isano abanyarwanda bafitanye n’uburyo bari babanye mbere y’umwaduko w’abazungu, yavuze ko mbere abanyarwanda bagiraga amoko menshi ariko abazungu baza kuyahinduramo amoko y’Abahutu n’Abatutsi ari nayo yagejeje kuri Jenoside yakorewe abatutsi mu 1994.

    Minisitiri Bamporiki yavuze ko ufashe buri munyarwanda akagenda asubira kwa se, se na we agasubira kwa sekuru bishobora kugera ku gisekuru cya cumi abanyarwanda benshi barimo abiyitaga abahutu n’abiyitaga abatutsi bahuje isano.

    Yavuze ko iyo ibyo buri wese amaze kubimenya bihita bigaragaza ko abakoze Jenoside yakorewe Abatutsi abenshi bikoze mu nda abandi bakihekura ngo kuko bicaga abo bahuje isano.

    Minisitiri Bamporiki yasabye abayobozi batandukanye kwigisha abakiri bato kubana nk’abafitanye isano bakirinda kubacamo ibice ahubwo bakabigisha gukunda u Rwanda no gushyira hamwe bagamije kuruteza imbere.

    Ati “Isano muzi mureke tuyitinyuke turerere abana bacu nk’abafitanye isano nibwo tuzubaka u Rwanda ruzaramba igihe kirekire.”

    Guverineri w’Intara y’Iburasirazuba, Emmanuel Gasana, yavuze ko kwibuka ari uguha agaciro abishwe muri Jenoside yakorewe Abatutsi mu 1994 , avuga ko kubibuka kwiza ari ukwiyubaka no gukora neza inshingano buri muntu wese afite.

    Gasana yakomeje yihanganisha buri umwe wese wabuze abe muri Jenoside yakorewe abatutsi avuga ko “nubwo twabuze abacu ariko dufite u Rwanda, dufite igihugu kitavangura, gitanga amahirwe angana ku bantu bose, igihugu gifite politiki nziza y’iterambere. Igihugu gifite ubutabera bwunga.”

    Bucyeye Ignatienne wavuze mu izina ry’imiryango y’abakoreraga Perefegiture na za superefegiture zahujwe, yavuze ko abacitse ku icumu bo muri iyi miryango bateye intambwe mu kwiyubaka, barenze ibikomere bitandukanye ngo kuri ubu bari mu nzira y’iterambere.

    Yagize ati “Turashimira ubuyobozi bw’Intara y’Iburasirazuba kuko kuba harubatswe urwibutso rwanditseho amazina y’abacu, biratunezeza cyane, iyo turebye uko imiryango y’abarokotse muri iyi miryango borojwe inka za kijyambere ni ibintu duha agaciro cyane.”

    Yashimiye kandi abandi bantu batahigwaga bemeye kwitandukanya n’abicanyi bagahisha abahigwaga, yatanze urugero ko ubwo umugabo we yamaraga kwicwa abana be hari umuntu wabahishe kugeza Jenoside irangiye.

    Bucyeye yasabye ubuyobozi bw’Intara kubafasha gukomeza gushakisha imiryango icyenda yaburiwe irengero mu miryango 19 imaze kumenyekana, anabasaba gushakisha abandi bantu bari abakozi b’izi perefegiture na superefegiture zahujwe.

    Minisitiri Bamporiki yasabye abayobozi kwigisha abakiri bato uburyo bakurira mu kubana neza

    Guverineri Gasana Emmanuel yibukije abafite ababo bishwe muri Jenoside yakorewe Abatutsi ko bafite igihugu kibakunda kandi kibitayeho

    CP Emmanuel Hatari yunamiye abari abakozi bazize Jenoside yakorewe Abatutsi

    Umunyamabanga wa Leta muri Minisiteri y’Urubyiruko n’Umuco, Bamporiki Edouard, yavuze ku isano muzi ihuza abanyarwanda bose

  • RIB yerekanye abantu 12 barimo umugore bakurikiranyweho ibyaha birimo kwinjiza intwaro mu gihugu #rwanda #RwOT

    Aba bantu berekanywe kuri uyu wa Kabiri tariki 13 Mata 2021, aho bafungiye kuri station ya RIB ya Kamembe mu Karere ka Rusizi.

    Uru tweho rugira ruti 'abantu 12 bakurikiranyweho ibyaha bitandukanye harimo gutunga intwaro no kuzinjiza mu gihugu, kwiba hakoreshejwe intwaro, gushyiraho umutwe w’abagizi ba nabi no kuwujyamo ndetse n’ubwicanyi.'

    Urwego rw’Igihugu rw’Ubugenzacyaha RIB ruvuga ko 'ibi byaha iteka babikoraga bambaye imyenda ya gisirikare ndetse bitwaje n’imbunda biyita abashinzwe umutekano mu rwego rwo kujijisha.'

    Polisi y’u Rwanda yataye muri yombi aba bantu mu gihe gito gishize, yari yatangaje ko ibikorwa bakoze, byahitanye umuturage wo mu Murenge wa Mururu ndetse bakiba n’amafaranga mu Murenge wa Kamembe.

    Uyu munsi Urwego rw’Igihugu rw’Ubugenzacyaha RIB rwtangaje rwirihanganisha 'abantu babuze ababo ndetse n’abagizweho ingaruka n’ubu bugizi bwa nabi.'

    Ubutumwa bw’uru rwego busoza bugira buti 'RIB iributsa na none ko guhangabanya umutekano w’abaturarwanda bitazigera byihanganirwa na gato, igasaba abafite imigambi yo gukora ibyaha kuyireka kuko batazacika ubutabera, inashimira abaturage batanze amakuru kugirango abakekwa bafatwe.'

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/RIB-yerekanye-abantu-12-barimo-umugore-bakurikiranyweho-ibyaha-birimo-kwinjiza-intwaro-mu-gihugu