Webrwanda Backend

Author: webrwanda

  • N’ubwo bamaranye amezi 5 gusa bakundana yari agiye kubivamo, urukundo rwa Myasiro na Josée bagiye kurushinga #rwanda #RwOT

    Umukinnyi wo gusiganwa ku maguru Myasiro Jean Marie Vianney, avuga ko n’ubwo yafashe umwanzuro wo gukora ubukwe na Niyomufasha Josée ariko hari igihe cyageze yumva iby’urkundo abivuyemo bitewe n’amagambo y’abantu.

    Ku munsi w’ejo nibwo Myasiro JMV yateye ivi asaba Niyomufasha Josée ko yazamubera umugore, ni nyuma y’amezi 5 bakundana.

    Myasiro yabwiye ISIMBI ko ikintu yamukundiye ari uko ari umukobwa utuje abona afite intego nziza zo kubakwa utaratwawe n’iraha, akaba ajyanye n’ibyufuzo bya Myasiro.

    Ni umukobwa utuje, ni umukobwa ufite umutima mwiza, areba kure azi kubana neza n’abandi, ntabwo agira ibintu by’amaraha, arakuze azi icyo gukora, ni umukobwa ubereye urugo ubona yakubaka nagerageje mu buryo bumwe cyangwa ubundi, muri make ni we mukobwa mbona ari cyo cyerekezo cyanjye maze igihe kinini nifuza.'

    Bwa mbere ahura na we bahuriye mu kazi kwa Nyirangarama aho umukobwa akora, na Myasiro akaba akinira ikipe yaho bagenda bamenyana gahoro gahoro kugeza bivuyemo urukundo.

    Ati'Twahuriye mu kazi nkimara gusinya amasezerano(yo kuba umukinnyi wa Nyirangarama Athletic Club), nari ngiye mu biro hari ibyo nari ngiye kurebayo musangayo aba ari we unyakira, anyakirana umutima mwiza, urugwiro, nyuma y’ubwo twahise duhana nimero, nyuma twaje guhurira muri siporo ambwira ngo mwigishe uko umuntu yakora siporo cyane cyane mu buryo bwo kugabanya ibiro, tumenyana gutyo amata abyara amavuta, uko iminsi yashize namusabye urukundo ararunyemerera.'

    Avuga ko mu gihe cy’amezi 5 amaranye n’umukunzi we, ikintu kimwe cyamutunguye ni uburyo babateranyije ariko undi akanga kumuvaho ahubwo akarwanirira urukundo rwabo.

    Ati'Bamuciye intege bamubuza ku nkunda bamubwira ko abasitari nta gahunda baba bafite yo gushaka, bamuca intege cyane ko agomba kundeka ko tudakwiranye, bamwe na bamwe mu bo bakoranaga ariko ntiyacika intege, bashyiraho imitego imwe n’imwe nkayigwamo ariko ntiyandekuye ahubwo twarabiganiriye birakemuka, nicyo kintu yankoreye kikantungura ukuntu yanze kundeka hejuru y’ibintu byose bambeshyeye ariko yarwaniye urukundo rwacu.'

    Akomeza avuga ko n’ubwo urukundo rwabo rumaze igihe gito ariko bagiye bagirana ibibazo bagashwana ariko nyuma bakaza kwiyunga, ngo hari n’igihe cyageze yumva we iby’urkundo yabivuyemo neza.

    Ati'byabayeho hari igihe cyageze nshaka kubivamo, nahaye umwanya abaduteranyaga ariko nyuma nza kugira inshuti nziza yitwa Ange Albert angira inama, aranyegera angira inama inshuti nziza niyo itumye uyu munsi tugiye kubana.'

    Nyuma yo gutera ivi, biteganyijwe ko ku munsi w’ejo ku wa Gatandatu tariki ya 17 Mata 2021 ari bwo bazasezerana imbere y’amategeko mu murenge wa Cyungo mu karere ka Rulindo, ubukwe nyirizina bukazaba tariki ya 28 Kamena 2021.

    Ku munsi w’ejo nibwo yamwambitse impeta

    Bagiye kubana nyuma y’amezi 5 bakundana

    Source : http://isimbi.rw/imyidagaduro/article/n-ubwo-bamaranye-amezi-5-gusa-bakundana-yari-agiye-kubivamo-urukundo-rwa-myasiro-na-josee-bagiye-kurushinga

  • Remera : Barakemanga amanyanga mu ipiganwa ry’isoko ry’abatwara ibishingwe #rwanda #RwOT

    Ibi bitabo bya kompanyi zagerageje gupiganirwa iri soko ryo gutwara ibishingwe mu Murenge wa Remera mu Karere ka Gasabo, byakiriwe ku wa Gatanu w’icyumweru gishize tariki 09 Mata 2021.

    Gusa bamwe mu bakozi b’izi kompanyi bagiye gutanga ibitabo byo gupiganirwa ririya soko, bavuga ko ibyabo byanze kwakirwa mu buryo bita ubw’amaherere.

    Bavuga ko itangazo ryo gupiganirwa ririya soko, ryavugaga ko bazazana ibitabo byo gupiganira isoko saa tatu za mu gitondo (09:00).

    Bamwe muri bo bemera ko bakerereweho iminota micye ariko ko byatewe n’impamvu bakekamo umugambi wo kugira ngo bangirwe kwakirirwa ibitabo byabo.

    Ririya tangazo kandi ryavugaga ko ibitabo byabo bizakirirwa mu Bunyamabanga Bukuru bw’Umurenge wa Remera ariko bamwe bagerayo bakababwira ko byakirirwa kwa Noteri w’Umurenge.

    George wo muri Kompanyi yitwa Umurimo-Mwiza, avuga ko yakerereweho umunota umwe ariko ko wamufashe kubera ko aho bagombaga gutanga igitabo basanze hahindutse.

    Ati 'Umunota wamfashe njya kwa Noteri w’Umurenge kandi abantu baba ari benshi baza kwa Noteri, ntabwo waza ubyigana abantu ngo urashaka kwinjira.'

    Avuga ko yasubiyeyo akanagirana ibibazo n’umukoresha we kuko 'narabimubwiye ntiyabyumva, yarandakariye arantuka ko nakerewe.'

    Icyakoza ngo uyu mukoresha we yamubereye imfura ntibyamugiraho izindi ngaruka kuko ubu akiri mu kazi.

    Rusanganwa George avuga ko ntacyo yari guhindura kuri kiriya cyemezo cyafashwe cyo kutakira igitabo cyo gupiganira ririya soko, kuko itangazo ryo kuripiganira ryavugaga ko ibitabo bizakirwa saa tatu zuzuye akahagera zirenzeho umunota umwe

    Ati 'Bambwiye ko nagombaga kuhagera saa tatu, mpagera n’umunota umwe, ndababwira nti 'ariko mbahagaze imbere none ubwo mwanziza umunota umwe ?’ bambwira ko ntakindi nahinduraho.'

    Avuga ko ntakindi yari guhinduraho kuko 'Ntabwo wajya gutera amahane' ahubwo ko icyo yakoze yahise ataha.

    Undi na we avuga ko yekereweho iminota micye kubera guhuzagurika kuko aho bagombaga gutanga biriya bitabo basanze hahindutse.

    Ati 'Niba ugiye kubaza aho bari bubyakirire bishoboza kuza gufata ikindi gihe gishobora gutuma isaha igufata atari uko wakererewe koko ahubwo ari umugambi ubona wateguwe wo kuhahindura.'

    Avuga ko guhindura ahagombaga gutangirwa ibitabo bishobora kuba ari umugambi ufite ikiwihishe inyuma wo kugira ngo ibitabo bya bamwe bitakirwa ahubwo hakirwe iby’abifuzwa kuzahabwa isoko ku mpamvu bakeka ko zaba zibyihishe inyuma.

    Ibindi babonamo ibidasobanutse

    Abakozi ba zimwe muri ziriya kompanyi kandi bavuga ko ririya tangazo ryavugaga ko gufungura inyandiko z’ipiganwa byari biteganyijwe kuba saa tatu n’igice za mu gitondo (09:30) ariko ko byakozwe hafi saa in (10:00).

    Umwe muri bo agira ati 'Niba uko kubahiriza isaha bari babikoze nk’uko twarengejeho umunota umwe cyangwa ibiri, n’igihe cyo gufungura inyandiko z’ipiganwa nticyagombaga kurengaho n’isegonda na rimwe.'

    Bavuga kandi ko bahawe aho biyandika nk’abitabiriye ipiganwa, bose bakishyira ku rutonde rwa Kompanyi esheshatu (6) mu gihe nyamara ibitabo byakiriwe ari ibya Kompanyi eshatu (3) naho iby’izindi eshatu byo bikaba byarangiwe kwakirwa kuko ababizanye bakererewe.

    Umwe ati 'Ubwo ugiye kureba ku rutonde wasanga turi kompanyi esheshatu nyamara harakiriwe eshatu gusa.'

    Umunyamabanga Nshingwabikorwa w’Umurenge wa Remera, Karamuzi Godfrey uvuga ko nta makuru menshi afite kuri iki kibazo kuko ibijyanye n’amasoko bikurikiranwa n’akanama kigenga kaba kabishinzwe, yavuze ko niba umuntu yarengeje isaha yagenewe igikorwa runaka, aba agomba kwirengera n’ingaruka zabyo.

    Ati 'Niba amabwiriza ateganya ko ari saa yine ukaza saa tanu, hakurikiraho iki ? [yatangaga urugero].'

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Remera-Barakemanga-amanyanga-mu-ipiganwa-ry-isoko-ry-abatwara-ibishingwe

  • FERWAFA yatumije inama y’inteko rusange idasanzwe #rwanda #RwOT

    Ishyirahamwe ry’umupira w’amaguru mu Rwanda ‘FERWAFA’ ryatumije inama y’inteko rusange idasanzwe izigirwamo ubwegure bw’uwari perezida wary,o Rtd Brig Gen Sekamana Jean Damascene.

    Mu ibaruwa yohererejwe abanyamuryango ba FERWAFA yasinyweho na Visi Perezida wayo, Habyarimana Marcel bamenyeshejwe ko batumiwe nu nama y’inteko rusange idasanzwe izaba tariki ya 15 Gicurasi 2021 kuri lemigo Hotel.

    Iyi nama izatangira saa 9:00′ ku murongo w’ibyigwa hariho ingingo imwe ari yo Ubwegure bwa perezida wa FERWAFA.

    Bagize bati”Tubandikiye tugira ngo tubagezeho ubutumire mu Nteko Rusange idasanzwe ya FERWAFA izateranira i Kigali muri Lemigo Hotel (Kimihurura) ku itariki ya 16/05/2021 guhera i saa tatu za mu gitondo (9H00). Ku murongo w’ibyigwa hari; Ubwegure bwa perezida wa FEWARAFA.”

    Bamenyeshejwe ko ikipe ihagararirwa na perezida cyangwa visi perezisa mu gihe batabonetse igahagararirwa n’umunyamabanga ufite uruhashya rwanditse.

    Basabwe kuzaza bitwaje icyemezo cy’uko bipimishije icyorezo cya coronavirus amafaranga bakazayasubizwa nyuma bamaze gutanga inyemezabwishyu mu bunyamabanga bwa FERWAFA.

    Tariki ya 14 Mata 2014 nibwo uwari perezida wa FERWAFA, Rtd Brig Gen Sekamana Jean Damascene yanditse yegura kuri uyu mwanya, ni nyuma y’imyaka 3 ayiyobora.

    FERWAFA yatumije ina y’inteko rusange idasanzwe

    Source : http://isimbi.rw/siporo/article/ferwafa-yatumije-inama-y-inteko-rusange-idasanzwe

  • Fata ku muti w’igitwenge #rwanda #RwOT

    Umutima unezerewe ni umutima mwiza,ariko umutima ubabaye umutera konda (Imigani 17:22).

    Abantu bishimye ni abantu bazima! Iyi nteruro iravuga byinshi kurusha ibyo abantu bivugira, iherekejwe n’icyanditswe. Abantu bamwe, cyane cyane abagabo bakeka ko kwishima no kuba umugabo bitajyana; bumva ko kuba umugabo bivuga ko ugomba guhora wifashe buri gihe. Abandi bo bagira n’ubwoba bwo guseka. Ndetse n’iyo bafashwe baseka bahita barekeraho vuba! Ese kuki naseka nta mpavu? Bakibaza bati 'Nshobora kuba ntari muzima'. Abo ni ba bandi bahorana inkuru z’agahinda, indwara n’umubabaro.

    Ushobora gutangazwa no kumenya ko ikintu cyonyine abarwayi bamwe bakeneye kugira ngo bahindure imibereho yabo no kugira ngo bakire gukira kwabo ari uguseka! Ni byo Bibiliya ivuga mu Imigani 17:22, mu bundi busobanuro bwa Bibiliya haravuga ngo 'Iyo wishimye wumva umeze neza, iyo utishimye ubabara ingingo zose'.

    Umuntu umwe yakwibaza ati 'Ariko se pasitori Chris, uravuga ko natangira ngaseka njyenyine gusa, nta mpamvu?' Yego rwose! Ugomba kwiga guseka igihe cyose, waba ubyiyumvamo,waba utabyiyumvamo. N’ubwo Satani yakubaza ati 'Uraseka iki? Ntubona ibibazo byose bikugarije?' Ntuzamwiteho, uzamenye ko uri gukurikiza ijambo ry’Imana gusa kandi uri gufata ku muti!

    Ushobora no kumirwa umenye ko Imana iseka. Yego rwose iraseka! Ntabwo ari ikintu kiri aho kiruta byose, gishobora byose gitera abantu ubwoba, gihora gicecetse igihe cyose. Bibiliya iravuga iti: 'Ihora yicaye mu ijuru irabaseka' (Zaburi 2:4).

    Niba nyir’ibiremwa byose abasha guseka, wowe ubibuzwa n’iki? Ushobora kujya mu cyumba cyawe ugafungirana isi yose hanze maze ugatangira ugaseka. Ibi nubigira ibintu bya ngombwa cyane mu buzima bwawe, umubiri wawe uzahora ufite ubuzima buzira umuze kandi uzahorana umunezero mu mutima wawe!

    Tangira wige guseka uyu munsi. Ushobora gutangira buhoro, nuko ugakomeza nturekere aho kugeza ubwo bigera mu mutima wawe. Abantu bashobora gukeka ko wasaze, ariko ntacyo ibyo batekereza bifite icyo bivuze.Iyo useka cyane, ibigukikije bitwara neza umurimo w’Umwuka Wera mu buzima bwawe.

    Inkomoko: 'Urusobe rw’Ibiriho ' Igitabo cyanditswe na Chris &Anita Oyakhilome

    [email protected]

    Source : https://agakiza.org/Fata-ku-muti-w-igitwenge.html

  • Amerika yohereje mu Rwanda Munyenyezi Béatrice ukekwaho uruhare muri Jenoside –

    Biteganyijwe ko Munyenyezi agezwa mu Rwanda ku mugoroba wo kuri uyu wa Gatanu, tariki ya 16 Mata 2021.

    Munyenyezi yahungiye muri Leta Zunze Ubumwe za Amerika mu 2003 aho yageze asaba ubuhungiro avuga ko ari impunzi ya politiki.

    Nyuma y’imyaka 10 ahawe ubwenegihugu, ku wa 21 Gashyantare 2013 yarabwambuwe nyuma y’uko Urukiko rwo mu Mujyi wa Manchester muri Leta ya New Hampshire rumuhamije ibyaha byo kugira uruhare muri Jenoside yakorewe Abatutsi mu Rwanda mu 1994.

    Muri urwo rubanza umucamanza yasobanuye ko nubwo Munyenyezi atigeze agira umuntu yica yagize uruhare mu kugaragaza abicwa kuri bariyeri yari inyuma ya hoteli yo kwa sebukwe.

    Ubucamanza bwamugaragaje nk’umuyoboke ukomeye w’Ishyaka ryari ku Butegetsi [MRND] ryateguye rikanashyira mu bikorwa Jenoside yakorewe Abatutsi.

    Nyuma ya Jenoside yakorewe Abatutsi, Munyenyezi n’abana be bahungiye muri Kenya. Mu 1995, nibwo yanditse urwandiko rusaba ubuhunzi muri Leta Zunze Ubumwe za Amerika yigize nk’umwe mu bagizweho ingaruka na Jenoside.

    Muri urwo rwandiko, yagize ati “Kuva muri Mata 1994, igihugu cyanjye [cy’u Rwanda] kiri kunyura mu bihe bikomeye […] Bitewe n’urwego rw’ubu bwicanyi, ndumva ntagifite umutekano uhagije wo gusubirayo”.

    Munyenyezi ni umugore wa Arsène Shalom Ntahobali na we wahamijwe uruhare muri Jenoside yakorewe Abatutsi ndetse akatirwa n’Urukiko Mpuzamahanga rwashyiriweho u Rwanda, ICTR, ndetse akaba umukazana wa Pauline Nyaramasuhuko wahoze ari Minisitiri w’Umuryango kuva mu 1992 kugera mu 1994.

    Yinjiye muri Amerika mu 1998 nyuma biza kugaragara ko acyekwaho uruhare Jenoside yakorewe Abatutsi mu wahoze ari Umujyi wa Butare.

    Uyu mugore yagize uruhare muri Jenoside cyane kuri bariyeri yari hafi y’iwabo yakoragaho Interahamwe zari ziyobowe na Nyiramasuhuko Pauline, Ntahobari n’uwari Burugumesitiri wa Ngoma muri Butare, Kanyabashi Joseph n’abandi.

    Urwo ruhare rumaze kugaragara ni bwo yafashwe arafungwa kuko yabeshye Urwego rw’Abinjira n’Abasohoka muri Leta Zunze Ubumwe za Amerika.

    Mu 2013 ni bwo yakatiwe imyaka 10 y’igifungo kubera yabeshye. Iki gihano yaje kukijuririra ariko urukiko rukigumishaho.

    Munyenyezi si we wa mbere wahamijwe iki cyaha muri Amerika nubwo hatabaye urubanza nyir’izina rurebana n’uruhare rwe muri Jenoside.

    Byari biteganyijwe ko nyuma yo gusoza icyo gihano agomba koherezwa mu Rwanda kugira ngo akurikiranyweho uruhare rwe muri Jenoside.

    Uko Munyenyezi yatawe muri yombi

    Munyenyezi yahaswe ibibazo birimo niba yaragize uruhare muri Jenoside rujyanye no kwica no gukomeretsa abantu arabihakana, ndetse aza guhabwa ubuhungiro muri Amerika we n’abana be batatu.

    Yaje gutura muri Leta ya New Hampshire, mu gace ka Manchester, akabwira abaturanyi be ko ‘umugabo we afungiye ibyaha by’intambara’.

    Mu 2004, mukuru we witwa Prudence Kantengwa na we yashatse ubuhungiro mu Amerika, yongeye kubazwa ku ruhare yagize mu bwicanyi mu bihe bya Jenoside, arabihakana ariko avuga ko umugabo we yayoboraga ibitero by’Interahamwe.

    Ibi byatumye Brian Andersen wari ukuriye Ishami rishinzwe gukurikirana abakoze ibyaha mu bihugu by’amahanga ariko bagahungira muri Amerika, mu Kigo Gishinzwe Umutekano w’Imbere mu Gihugu, atangira gukurikirana Kantengwa na murumuna we Munyenyezi yari amaze kumenya ko atuye muri Amerika.

    Mu iperereza ryamaze imyaka itandatu, ndetse ryanatumye Anderson asura u Rwanda inshuro nyinshi, byemejwe ko uyu mugore azoherezwa mu Rwanda ku bw’uruhare yagize muri Jenoside yakorewe Abatutsi mu 1994.

    Munyenyezi aragezwa ku Kibuga Mpuzamahanga cy’Indege cya Kigali i Kanombe Saa Moya za nimugoroba.

    Uyu mugore yabaye uwa gatanu woherejwe na Amerika mu Rwanda. Ni nyuma ya Enos Iragaba Kagaba [2005], Mudahinyuka Jean Mary Vianney [2011], Mukeshimana Marie Claire [2011] na Dr Léopold Munyakazi [2016].

    Munyenyezi Béatrice ukekwaho uruhare muri Jenoside ni umugore wa Arsène Shalom Ntahobari nawe wahamijwe ibyaha bya Jenoside

  • U Rwanda rwagabanyije imisoro ku modoka zikoresha amashanyarazi –

    Raporo y’Ubushakashatsi bwakozwe n’Ikigo cy’Igihugu cyo Kubungabunga Ibidukikije (REMA) mu 2018 ku bitera ihumana ry’umwuka mu gihugu, yagaragaje ko imyuka isohorwa n’ibinyabiziga iza ku isonga mu bihumanya umwuka muri Kigali no mu yindi mijyi.

    Ibi byatumye rutangira gutekereza ku modoka zikoresha amashanyarazi no kugabanya umubare w’izifashisha lisansi na mazutu.

    Mu gushyigikira uyu murongo, Leta y’u Rwanda yagabanyije igiciro cy’amashanyarazi n’imisoro ku modoka zifashisha amashanyarazi z’abantu n’ibigo bitandukanye.

    Uyu mwanzuro uri mu yatangajwe mu Nama y’Abaminisitiri yateranye ku wa 14 Mata 2021; wemeje Politiki nshya yo gutwara abantu n’ibintu mu Rwanda n’ingamba zerekeye ibinyabiziga bikoresha amashanyarazi.

    Iki cyemezo kandi kinajyanye no kugabanya ibyago bishobora guterwa n’imyuka ihumanya ikirere n’izindi ndwara zo mu buhumekero bitewe n’ubwiyongere bw’imodoka zinjizwa mu gihugu, aho nibura buri mwaka ziyongeraho 12%.

    Ubushakashatsi bwa REMA bwo mu 2017 bwerekanye ko 95,2% y’imodoka ziri mu gihugu zimaze imyaka irenga 10 zikozwe, 56,6 % ni iza mbere ya 1999 mu gihe 77,2% zakozwe mbere ya 2000.

    -  Igabanuka ry’igiciro cy’amashanyarazi

    U Rwanda rwagennye ko ibiciro by’amashanyarazi kuri sitasiyo z’imodoka bizaba bingana n’ibisanzwe byifashishwa n’inganda.

    Kuva mu 2020, inganda nini zishyura 94 Frw kuri kilowatt imwe ku isaha mu gihe mu rugo rw’umuturage kilowatt imwe ku isaha ari 212 Frw.

    Kugeza ubu mu gihugu hari sitasiyo enye zikoreshwa mu gushyira umuriro mu modoka z’amashanyarazi, zirimo iyubatswe kuri Kigali Convention Centre, iyo ku cyicaro cya Volkswagen Rwanda mu Cyanya cy’Inganda i Masoro. Hari iri mu Kanogo yatangijwe na Vivo Energy Rwanda n’indi iri ku Cyicaro cya REMA.

    Mu korohereza abafite imodoka zifashisha amashanyarazi, biteganyijwe ko zizagabanyirizwa ibiciro mu masaha adakoreshwa cyane.

    Muri izi mpinduka kandi imodoka zikoresha amashanyarazi, ibyuma bisimbura ibyangiritse [spare parts], batiri n’ibikoresho bya sitasiyo zo gushyira umuriro mu modoka byakomorewe umusoro ku nyongeragaciro (VAT).

    Imodoka n’ibyo bikoresho kandi byasonewe umusoro ungana na 5% k’utangwa ku bintu byatumijwe mu mahanga iyo bigeze muri gasutamo.

    Guverinoma y’u Rwanda kandi yateganyije ko ubutaka bwa Leta buzashyirwaho sitasiyo zishyira umuriro mu modoka z’amashanyarazi butazajya butangirwa ubukode.

    Inyandiko ishyiraho aya mabwiriza ivuga ko ibi bijyana no guteganya mu gishushanyo mbonera cy’Umujyi wa Kigali aho sitasiyo zigomba kubakwa no gutanga ibyemezo byo kuzubaka ku buntu.

    U Rwanda ntirworohereje imodoka z’amashanyarazi ziva hanze gusa kuko iryo gabanuka rizanagera kuri sosiyete zashoye imari cyangwa ziziteranyiriza mu Rwanda, aho zisonerwa umusoro mu gihe runaka ndetse zikanagabanyirizwa umusoro ku nyungu ku bigo binini kugera kuri 15% [ubusanzwe byishyura 30%].

    Imodoka zikoresha amashanyarazi zatangiye kugezwa mu Rwanda mu 2019, ubu rufite izigera kuri 20 zakozwe na Volkswagen.

    Ku isoko ry’u Rwanda kandi hasanzwe moto zikoresha amashanyarazi. Mu kurushaho kuzikwirakwiza mu minsi ishize, Sosiyete ya Ampersand Rwanda izobereye mu bijyanye n’ibinyabiziga bikoresha amashanyarazi, ikaba iya mbere muri Afurika itanga serivisi za moto zikoresha ubu bwoko bw’ingufu, yashowemo miliyoni 3,5$.

    Kuva Ampersand yatangira ibikorwa byayo muri Gicurasi mu 2019, imaze kugira abamotari bakoresha moto z’amashanyarazi bagera kuri 35, bakoze ingendo za kilometero miliyoni 1.4 ndetse hari n’abandi 7000 bifuza gukorana n’abo.

    U Rwanda rufite intego y’uko kugeza mu 2030 ruzaba rwagabanyije ku gipimo cya 38% imyuka ihumanye yoherezwa mu kirere, imodoka zikoresha amashanyarazi zikaba zitezweho kugabanya 9% by’iyo myuka nk’uko bigaragara muri Gahunda y’Igihugu yo kugabanya Imyuka ihumanye yoherezwa mu Kirere (Nationally Determined Contributions, NDC).

    Guverinoma y’u Rwanda yagabanyije imisoro ku modoka zikoresha amashanyarazi

    Moto zikoresha umuriro w’amashanyarazi zagejejwe ku isoko ry’u Rwanda; zirahendutse ndetse ntizangiza ikirere

  • Igikombe cy’amahoro cya 2021 ntikizakinwa- Imyanzuro ya FERWAFA kuri Shampiyona #rwanda #RwOT

    Ni imyanzuro yafashwe n’Inama ya Komite Nyobozi ya FERWAFA yo ku wa 5 Mata 2021 n’iyo ku wa 15 Mata 2021.

    IMYANUZURO

    *Komite Nyobozi ya FERWAFA yafashe umwanzuro ko Primus National League y’umwaka wa 2021 izakinwa mu buryo budasanzwe mu rwego rwo kubahiriza igihe kigenwa na CAF kirebana no kwandikisha amakipe azahagararira Igihugu mu marushanwa yayo.

    *Primus National League izatangira ku itariki ya 1 Gicurasi 2021 ikazakinirwa mu matsinda ane ahagarariwe n’amakipe ane yabaye aya mbere muri Shampiyona y’umwaka ushize. Amakipe agize itsinda amenyekana binyuze mu buryo bwa tombola.

    *Muri buri tsinda amakipe yose azajya ahura hakinwa imikino ibiri (Home & Away). Nyuma y’imikino itandatu (6) kuri buri kipe, hazafatwa amakipe abiri azaba aya mbere muri buri tsinda ahure hagati yayo hakinwa umukino umwe, bityo ahatanire imyanya kuva ku wa mbere kugeza ku wa munani. Amakipe abiri ya nyuma muri buri tsinda nayo azahura hagati yayo hakinwa umukino umwe, bityo ahatanire imyanya kuva ku wa cyenda (9) kugeza ku wa cumi na gatandatu (16).

    *Komite Nyobozi ya FERWAFA yafashe umwanzuro wo gutesha agaciro imikino yari imaze gukinwa mbere yo gusubika shampiyona y’umwaka wa 2020/2021 yatangiye tariki ya 04/12/2020.

    *Kwandikisha abakinnyi baturutse hanze y’igihugu binyuze mu buryo bwa FIFA TMS no mu Gihugu biciye mu buryo bwa DTMS bizakorwa guhera ku itariki ya 15 Mata 2021.

    *Komite Nyobozi ya FERWAFA kandi yafashe umwanzuro wo gukuraho Igikombe cy’Amahoro cy’umwaka wa 2021 bitewe n’uko nta gihe gihari cyo kugikina.

    *Hemejwe ko Ikipe izaba iya mbere muri Primus National League izasohokera Igihugu mu irushanwa rya CAF Champions League mu gihe Ikipe izaba iya kabiri ariyo izasohokera Igihugu mu irushanwa rya CAF Confederation Cup.

    Uko amatsinda ya Primus National League azaba ateye nk’uko byatorewe mu nama yahuje Ubuyobozi bwa FERWAFA n’abayobozi b’amakipe y’ikiciro cya mbere mu bagabo.

    Itsinda A : APR FC, Bugesera FC, AS Muhanga na Gorilla FC.
    Itsinda B : Rayon Sports, Kiyovu Sports, Gasogi United na Rutsiro FC.
    Itsinda C : Police FC, AS Kigali, Musanze FC na Etincelles FC.
    Itsinda D : Mukura VS&L, Sunrise FC, Marine FC na Espoir FC.

    Amategeko yihariye ajyanye n’iri rushanwa hamwe n’ingengabihe y’imikino yo mu matsinda tuzabibagezaho mu gihe cya vuba.

    UKWEZI.RW

    Source : http://www.ukwezi.rw/Imikino/article/Igikombe-cy-amahoro-cya-2021-ntikizakinwa-Imyanzuro-ya-FERWAFA-kuri-Shampiyona

  • Menya byinshi kuri Ginseng ikimera kirinda indwara #rwanda #RwOT

    Muri iki gihe uko isi igenda itera imbere, ni nako hari indwara zitandukanye zizahaza ubuzima bw’umuntu. Aha twavugamo nka Diyabeti, kanseri, Asima, SIDA n’izindi.

    Muri zo hari izizahaza umubiri bigatuma abasirikare barinda umubiri bagabanyuka, bityo ubudahangarwa bw’umubiri bukajya hasi cyane umuntu akazahara. Imiti dukoresha mu kuvura izo ndwara, imyinshi iba ikoze mu bimera, gusa bashobora kongeramo ibindi bintu.

    Wari uzi ko hari ikimera gifasha kurwanya indwara zitandukanye?

    Reka turebe akamaro k’icyo kimera bita Ginseng mu mubiri w’umuntu akaba ari nacyo tugiye kugarukaho muri iyi nkuru.

    Ginseng ni iki?

    Ginseng ni igihingwa gikunda kuboneka mu bihugu byo muri Aziya (China, Korea),ariyo ita Asian Ginseng ndetse no muri America na Canada ariyo yitwa American Ginseng. Ni igihingwa kigira amababi ndetse n’inguri cyangwa se imizi. Iki gihingwa kifashishwa cyane mu kuvura indwara zikomeye ndetse no kurinda umubiri indwara zirimo na Kanseri.

    Ni akahe kamro Ginseng ifasha umubiri w’umuntu?

    Nkuko tubikesha urubuga rwandika ku buzima rwa medicalnewstoday rubivuga, Ginseng ifite akamaro kenshi mu kurinda ndetse no kuvura indwara zitandukanye.

    Dore ibintu 9 by’ingenzi Ginseng ifasha umubiri

    1. Abahanga bagaragaje ko iki gihingwa kizamura abasirikari b’umubiri hagati y’iminsicyangwa 3.

    2. Abantu bafite ubwandu bwa virusi itera SIDA,iki gihingwa ni cyiza kuri bo kuko gituma abasirikari b’umubiri wabo bazamuka,bigatuma indwara zitandukanye zitabibasira.

    3. Ifasha umubiri kudacika intege ( Energy provider).

    4. Ifasha ubwonko gukora neza bigatuma umuntu atekereza neza.

    5. Irinda kubyimbirwa ku buryo bworoshye (Anti-inflammatory effects)

    6. Iyo ukoresha iki gihingwa,uturemangingo twa kanseri ntabwo twiyongera,ibyo bigatuma wirinda kanseri,ubu iri kugenda ihitana benshi ku isi.Ndetse igafasha n’abarwaye kanseri kutazahara.

    7. Ihangana cyane na mikorobi zangiza umubiri.

    8. Iyi Ginseng ifasha abantu bafite ibisebe byananiranye,kuko iyo uyifashe,igisebe gitangira gukira vuba vuba.

    9. Uvura ibibyimba mu mubiri.

    Iki gihingwa kitaboneka mu Rwanda, nta bindi kibonekamo?

    Mu Rwanda ntabwo duhinga iyi Ginseng ariko hari inyunganiramirire yitwa Ginseng.

    Rh Capsule iboneka hano iwacu ikoze muri kiriya kimera twabonye haruguru.Irizewe kandi ikoreshwa ku ruhando mpuzamahanga ikaba nta ngaruka igira ku mubiri w’uwayikoresheje.

    source: rwanda magazine.com

    Source : https://agakiza.org/Menya-byinshi-kuri-Ginseng-ikimera-kirinda-indwara.html

  • Tom Byabagamba yasubiye imbere y’urukiko ajuririra igihano yahawe ku cyaha cy’ubujura –

    Mu Ugushyingo umwaka ushize, nibwo Tom Byabagamba yahamijwe n’urukiko rw’ibanze rwa Kicukiro icyaha cy’ubujura, rumuhanisha igifungo cy’imyaka itatu.

    Uyu mugabo wigeze kuba Umusirikare ukomeye afite ipeti rya Colonel mu Ngabo z’u Rwanda mbere y’uko yamburwa impeta za gisirikare zose, yahamijwe icyaha cy’ubujura ashinjwa ko yakoreye mu Rukiko rw’Ubujurire aho yibye telefoni.

    Igihano yahawe ntabwo yacyishimiye, ajuririra Urukiko Rwisumbuye rwa Nyarugenge. Urubanza rwe rwasubukuwe kuri uyu wa Gatanu nyuma yo gusubikwa muri Werurwe uyu mwaka.

    Kuri iyi nshuro, Byabagamba n’abamwunganira barimo Me Paul Ntare na Me Gakunzi Valery baburanaga bari muri gereza ya gisirikare i Kanombe mu gihe abashinjacyaha bari bari mu biro byabo.

    Iburanisha rigitangira, Byabagamba yazamuye inzitizi z’uko atabonye umwanya wo kuganira n’abanyamategeko be ngo bitegure urubanza, umucamanza amaze kumva impande zombi, yanzuye ko iburanisha risubikwa gato Byabagamba akabanza kuvugana n’abunganizi be.

    Muri Kanama 2014, Byabagamba yatawe muri yombi bwa mbere akurikiranyweho ibyaha birimo guhisha nkana ibimenyetso byagaragaza uwakoze icyaha, gukwirakwiza impuha zigamije kugomesha rubanda no kurwangisha ubutegetsi buriho, igikorwa cyo gusebya Leta ari umuyobozi ndetse no gusuzugura ibirango by’igihugu.

    Nyuma y’imyaka ibiri aburana, mu 2016 yakatiwe n’inkiko gufungwa imyaka 21 no kwamburwa impeta zose za gisirikare. Yaje kujuririra iki gihano maze ku wa 27 Ukuboza 2019, Urukiko rw’Ubujurire rumukatira imyaka 15 y’igifungo no kumwambura impeta zose za gisirikare.

    Byagamba yajuririye igihano yahawe n’urukiko rw’ibanze rwa Kicukiro cyo gufungwa imyaka itatu ashinjwa kwiba telefone

  • Abakozi ba Kinazi Cassava Plant basuye urwibutso rwa Jenoside, bihanganisha abarokotse –

    Byatangajwe kuri uyu wa Kane ubwo abakozi b’uruganda Kinazi Cassava Plant basuraga urwibutso rwa Jenoside yakorewe Abatutsi rwa Kinazi mu Karere ka Ruhango, rushyinguyemo imibiri y’Abatutsi ibihumbi 63 bishwe muri Jenoside.

    Nyuma yo gusura ibice bigize urwo rwibutso no gushyira indabo ku mva ziruhukiyemo inzirakarengane zazize Jenoside yakorewe Abatutsi, Umuyobozi Mukuru w’uruganda Kinazi Cassava Plant, Michel Kayihura Makolo, yihanganishije abarokotse, abashishikariza gukomera no gutanga ubuhamya bw’inzira igoye banyuzemo.

    Ati “Turabifuriza gukomera, kandi mukabona imbaraga zo gutanga ubuhamya. Nimubasha gutanga ubuhamya bizadufasha kwigisha abana bacu, na bo bamenye uko byagenze. Ubuhamya iyo butanzwe dukuramo amasomo yo kwiyubaka.”

    Umunyamabanga Nshingwabikorwa w’Umurenge wa Kinazi, Nsanzabandi Pascal, na we yasabye abarokotse Jenoside yakorewe Abatutsi gukomera no gusigasira amateka.

    Ati “Mukomere kandi mudadire. Gukomera ni ukugira imbaraga zo kwibuka, amateka nta gukomeretsanya kandi akaba amateka yawe. Kudadira, ni ijambo risobanura ngo ‘ntibizongera’. Ni ugufunga, ugashyiraho umurongo ntarengwa. Jenoside ntizongera ukundi. Ibi bizashoboka nidushyiraho ingamba zima urwaho ingengabitekerezo ya Jenoside.”

    Uhagarariye Umuryango Ibuka mu Murenge wa Kinazi, Ntakirutimana Marie José, yavuze ko nubwo abarokotse Jenoside yakorewe Abatutsi bajya baterwa intimba no kubura ababo bishwe muri Mata 1994, badaheranwa n’agahinda kuko babona hari icyizere.

    Ati “Abatutsi bishwe mu gihugu hose, by’umwihariko ibihumbi 63 baruhukiye hano, bazize uko bavutse. Duterwa intimba no kuba twarabuze imiryango migari twari dufite kandi tugasigara ihereheru twari twifashije. Tubona hari icyizere cy’ubuzima.”

    Yavuze ko icyizere bafite bagikomora ku buyobozi bwiza igihugu gifite n’uburyo cyitaye ku barokotse Jenoside.

    Kinazi Cassava Plant yasuye Urwibutso rwa Jenoside yakorewe Abatutsi rwa Kinazi mu Karere ka Ruhango

    Abakozi ba Kinazi Cassava Plant basobanuriwe amateka ya Jenoside, bari kumwe n’abayobozi batandukanye muri iki gikorwa

    Uyu muhango wabaye hubahirizwa amabwiriza yo kwirinda COVID-19

    Basuye ibice bitandukanye bigize uru rwibutso birebera ubukana Jenoside yakoranywe muri Kinazi

    Uhagarariye Umuryango Ibuka mu Murenge wa Kinazi,Ntakirutimana Marie José yavuze ko abarokotse Jenoside yakorewe Abatutsi batazaheranwa n’agahinda

    Umuyobozi Mukuru wa Kinazi Cassava Plant,Michel Kayihura Makolo yihanganishije abarokotse Jenoside yakorewe Abatutsi

    Michel Kayihura Makolo na bagenzi be bashyize indabo aharuhukiye imibiri y’Abazize Jenoside yakorewe Abatutsi

    Amafoto: Igirubuntu Darcy