Webrwanda Backend

Author: webrwanda

  • Ubufaransa bwanze ubusabe bw'umukobwa wa Felesiyani Kabuga busaba ubwenegihugu, n'interahamwe zabuhawe zigomba kubwamburwa zigashyikirizwa ubutabera #rwanda #RwOT

    Nkuko tubikesha ibitangazamakuru bitandukanye mu gihugu cy'Ubufaransa, umukobwa wa Felesiyani Kabuga, umwicanyi ruharwa wateye inkunga umugambi wa Jenoside, ariwe Felicite Mukademali wari umaze imyaka isaga 27 muri icyo gihugu yabwiwe ko ubusabe bwe bwo kuba umwenegihugu wicyo gihugu butemewe.

    Ise umubyara Kabuga Felesiyani w'imyaka 87, niwe wateye inkunga umugambi wa Jenoside yakorewe Abatutsi, akaba yarafashwe muri Gicurasi umwaka ushize, afatirwa mu Bufaransa aho yabaga ku mazina y'amahimbano. Ubu ari I Lahe mu Buholandi aho ari gucirwa urubanza.
    Mukademali ni umugore wa ruharwa Augustin Ngirabatware, wahoze ari Minisitiri w'igenamigambi muri Leta y'Abicanyi.

    Yafatiwe I Frankfurt mu Budage tariki ya 17 Nzeli 2007 aho yafatanwe bimwe mu bimenyetso byatumye Sebukwe Kabuga afatwa; aha twavuga nka Flash Disk yariho amakuru y'uburwayi bwa Kabuga naho yivuriza. Yakatiwe igifungo cy'imyaka 35 n'urukiko Mpanabyaha rw'Arusha tariki ya 20 Ukuboza 2012 mu bujurire ahabwa 30 tariki ya 18 Ukuboza 2014.

    Umupadiri w'umwicanyi Wenceslas Munyeshyaka nawe aba muri iki gihugu yidegembya aho asoma Misa. Undi ni Laurent Bucyibaruta wari Perefe wa Gikongoro mu gihe cya Jenoside aho ashinjwa ibyaha bya Jenoside mu cyahoze ari Gikongoro cyane cyane nka Murambi, Cyanika, Kibeho, Karama n'ahandi.
    Kuva yagera mu Bufaransa, Munyeshyaka yakomeje akazi ke k'Ubupadiri kandi inzego z'Ubufaransa zizi ibyaha akurikiranweho ndetse akaba we ubwe yaragendana imbunda umunsi ku munsi.

    Munyeshyaka yicishije Abatutsi basaga 200, aregwa ibyaha bya Jenoside harimo nicyo gufata ku ngufu. Mu mwakwa wa 2006, habaye urubanza rwa Munyeshyaka adahari akatirwa gufungwa burundu.

    Abandi baregwa Jenoside babarizwa muri icyo gihugu harimo Col Laurent Serubuga, Agathe Kanziga, Innocent Musabyimana, Claude Muhayimana, Hyacinthe Rafiki Nsengiyumba, Dr Charles Twagira, Dr Sosthene Munyemana, Innocent Bagabo n'abandi. Mu minsi yashize, Col Aloys Ntiwiragaba wihishahishaga ubutabera nawe yavumbuwe n'umunyamakuru Theo Englebert akaba ariwe washinze RDR yaje kuvamo ALiR na FDLR.

    Niba koko Ubufaransa bushaka bushaka kubana neza n'u Rwanda bwagombye kubanza gushyikiriza ubutabera abahekuye u Rwanda yaba kubohereza cyangwa se bo ubwabo bakabacira imanza.

    Ubutabera butinze ntibuba bukiri ubutabera

    The post Ubufaransa bwanze ubusabe bw'umukobwa wa Felesiyani Kabuga busaba ubwenegihugu, n'interahamwe zabuhawe zigomba kubwamburwa zigashyikirizwa ubutabera appeared first on RUSHYASHYA.

    Source : https://rushyashya.net/ubufaransa-bwanze-ubusabe-bwumukobwa-wa-felesiyani-kabuga-busaba-ubwenegihugu-ninterahamwe-zabuhawe-zigomba-kubwamburwa-zigashyikirizwa-ubutabera/

  • Kigali: Polisi yataye muri yombi abantu 10 barimo n'umunyamakuru barenze ku mabwiriza yo kwirinda COVID-19 – #rwanda #RwOT

    Bafashwe kuwa 21 Mata 2021 saa Kumi n'imwe n'igice z'umugoroba bari mu birori by'isabukuru y'amavuko y'umwe muri bo.

    Aba bose bari baturutse mu bice bitandukanye byo mu Mujyi wa Kigali, bahurira mu rugo rw'uwo munyamakuru. Nyuma yo gufatwa basabwe kwipimisha COVD-19 ngo bamenye uko ubuzima bwabo buhagaze bacibwa n'amande.

    Umuvugizi wa Polisi y'Igihugu, CP John Bosco Kabera, yavuze ko aba bafashwe nyuma y'amakuru Polisi yari ihawe n'abaturage.

    CP Kabera yavuze ko abantu ko badakwiye kwirara kuko bamaze gukingirwa COVID-19, abasaba ahubwo ko bakwiye kurushaho gukaza ingamba.

    Ati 'Ubutumwa ku rubyiruko ni uko bakwiye kumva ko bakwiye kugira uruhare mu kwirinda iki cyorezo bakarinda n'abandi.'

    CP Kabera yavuze ko umwe muri aba azakurikiranwa mu rwego rw'amategeko kubera gutuka inzego zishinzwe umutekano.

    Abafashwe bari barenze ku mabwiriza yo kwirinda Covid-19

    Umuvugizi wa Polisi y’Igihugu, CP John Bosco Kabera, yasabye urubyiruko kutirara bagakomeza kwirinda COVID-19

    Source : http://igihe.com/amakuru/u-rwanda/article/kigali-polisi-yataye-muri-yombi-abantu-10-barimo-n-umunyamakuru-barenze-ku

  • Diamond arabarizwa Afurika y’Epfo aho yagiye gusura Zari Hassan #rwanda #RwOT

    Nyuma y’amezi 5 gusa avuye muri Tanzania ashyiriye abana se, ubu hari hatahiwe ko na Diamond ajya muri Afurika y’Epfo gusura Zari n’abana be.

    Muri Gashyantare 2017 nibwo aba bombi batandukanye aho Zari yahise ajya muri Afurika y’Epfo n’abana be babiri babyaranye(Latiffa na Nillan).

    Diamond yongeye kubona aba bana mu Gushyingo 2020 ubwo Zari yari yabamushyiriye baje kumusura muri Tanzania.

    Mu mashusho yasangije abamukurikira kuri Instagram Stories, umuhanzi Diamond Platnumz amugaragaza ubwo yari ageze mu rugo kwa Zari bamuha ikaze aho yasanganiwe n’abana be ubona ko bamwishimiye.

    Igihe kinini aya mashusho amugaragaza yicaranye n’abana be baganira, ni mu gihe kandi yanafashe umwanya akaganira na nyina wabo ari we Zari.

    Uru rugendo rwa Diamond rukaba rwateye urujijo benshi aho bamwe banaketse ko aba bombi bashobora gusubirana, ni nyuma y’uko urugendo rwa Zari muri Tanzania byavuzwe ko rutarangiye neza kuko yatekerezaga ko bashobora kwiyunga ariko bikaba bitarakunze ndetse anahava mbere y’iminsi yateganyije.

    Kugeza ubu Diamond afite abana 4, babiri yabyaranye na Zari Hassan, umwe yabyaranye na Hamissa Mobetto n’uwo yabyaranye na Tanasha Donna.

    Yaganiriye n’abana be

    Yaganiriye na Zari Hassan babyaranye

    Source : http://isimbi.rw/imyidagaduro/article/diamond-arabarizwa-afurika-y-epfo-aho-yagiye-gusura-zari-hassan

  • Kigali: Polisi yataye muri yombi abantu 10 barimo n’umunyamakuru barenze ku mabwiriza yo kwirinda COVID-19 –

    Bafashwe kuwa 21 Mata 2021 saa Kumi n’imwe n’igice z’umugoroba bari mu birori by’isabukuru y’amavuko y’umwe muri bo.

    Aba bose bari baturutse mu bice bitandukanye byo mu Mujyi wa Kigali, bahurira mu rugo rw’uwo munyamakuru. Nyuma yo gufatwa basabwe kwipimisha COVD-19 ngo bamenye uko ubuzima bwabo buhagaze bacibwa n’amande.

    Umuvugizi wa Polisi y’Igihugu, CP John Bosco Kabera, yavuze ko aba bafashwe nyuma y’amakuru Polisi yari ihawe n’abaturage.

    CP Kabera yavuze ko abantu ko badakwiye kwirara kuko bamaze gukingirwa COVID-19, abasaba ahubwo ko bakwiye kurushaho gukaza ingamba.

    Ati “Ubutumwa ku rubyiruko ni uko bakwiye kumva ko bakwiye kugira uruhare mu kwirinda iki cyorezo bakarinda n’abandi.”

    CP Kabera yavuze ko umwe muri aba azakurikiranwa mu rwego rw’amategeko kubera gutuka inzego zishinzwe umutekano.

    Abafashwe bari barenze ku mabwiriza yo kwirinda Covid-19

    Umuvugizi wa Polisi y’Igihugu, CP John Bosco Kabera, yasabye urubyiruko kutirara bagakomeza kwirinda COVID-19

  • Green Hills Academy yibutse Abatutsi bazize Jenoside, abarimu basabwa kutikoreza abanyeshuri ibikomere banyuzemo –

    Uyu muhango wahuje abanyeshuri n’abayobozi b’iki kigo watangijwe n’umukino wakinwe n’abanyaeshuri, ugaragaza uburyo Jenoside yashyizwe mu bikorwa n’uko u Rwanda rwiyubatse nyuma yayo.

    Nubwo aba banyeshuri bose bavutse nyuma ya Jenoside yakorewe Abatutsi, amahano yagwiririye u Rwanda akaba badahari, bumva neza agaciro ko kwibuka kandi bagahamya ko ari inshingano zabo.

    Umunyeshuri witwa Manzi David yavuze ko kuri we kwibuka ari uguha agaciro inzirakarengane zazize uko zaremwe, kandi ko abikora kuko azi ko bikomeza ubumwe bw’Abanyarwanda.

    Ati “Ngomba kwibuka kugira ngo mpe agaciro abazize Jenoside yakorewe Abatutsi mu 1994, uko twibuka bituma dukomeza kubona ibibi bya Jenoside bikadufasha kuyirwanya kugira ngo ntizongere kubaho ukundi.”

    Yakomeje avuga ko we nk’urubyiruko umusanzu abona akwiye gutanga ari uguhangana n’abapfobya bakanahakana Jenoside yakorewe Abatutsi, abinyujije ku mbuga nkoranyambaga.

    Ati “Amateka twize yatweretse neza ko Jenoside yabayeho, abantu bayihakana baba bigiza nkana. Njye nk’urubyiruko kandi nkaba nkoresha imbuga nkoranyambaga ngomba kujya nshyiraho ukuri kuri Jenoside kunyomoza bamwe bahakana.”

    Munyana Peace Rwagasana nawe yavuze ko kuvuka nyuma ya Jenoside bitamubuza kwibuka kuko abayizize bari abantu agomba guhabwa agaciro bambuwe.

    Yakomeje avuga ko asanga abapfobya bakanahakana Jenoside yakorewe Abatutsi, baba bashaka gusubiza u Rwanda ahabi bityo ko atazigera abihanganira.

    Ati “Bariya bantu bahakana Jenoside ni abashaka kongera kubiba amacakubiri n’urwango mu Banyarwanda, aho byarugejeje mbere twarahabonye. Ngomba guhangana nabo kuko sinatuma hari uwakongera guhungabanya igihugu cyacu.”

    Umuyobozi wa Green Hills Academy, Daniel Hollinger, yasabye abanyeshuri kwirinda ivangura iryo ariryo ryose rishobora kubageza ku kibi, ahubwo bagaharanira gukora ibyabateza imbere.

    Ati “Ndabasaba ko mwakwirinda ivangura ryose haba irishingiye ku bwoko, uruhu, akarere n’ikindi cyose gishobora kubageza ku makimbirane yabyara Jenoside.”

    “Ahubwo mwimike urukundo ndetse muhe agaciro kwibuka inzirakarengane zazize Jenoside yakorewe Abatutsi. Ibi nimubikora hamwe no gushyira hamwe bizatuma muba mu gihugu cyiza.”

    Ubutumwa bwa Daniel Hollinger yabuhuriye na Ihumure Imra, warokotse Jenoside yakorewe Abatutsi agahura n’ibikomere by’amateka nyuma yayo.

    Ihumure wari wageneye ikiganiro aba banyeshuri yabasabye gukoresha amahirwe bafite yo kuba mu gihugu kirimo amahoro bakarushaho kucyubaka.

    Ati “Abanyeshuri muri hano mwese mwavutse nyuma ya Jenoside yakorewe Abatutsi, mwagize amahirwe akomeye yo kuvukira mu gihugu kirimo amahoro. Mukwiye kubyaza ayo mahirwe umusaruro mugatanga umusanzu mu gukomeza kucyubuka kuko nimwe mizero yejo hazaza.”

    Abarimu basabwe kumenya kwigisha amateka ya Jenoside

    Abana bari mu mashuri ubu abenshi bavutse nyuma ya Jenoside yakorewe Abatutsi, amateka bayiziho bayabwiwe n’ababyeyi babo ndetse andi bayiga mu mashuri.

    Mu mashuri niho abana bakura amateka menshi kuko mu miryango hari abashobora kuyagoreka bikayobya umwana.

    Umushumba w’Itorero rya Angilikani mu Rwanda Paruwasi ya Remera, Rev Dr Rutayisire Antoine, nawe wari muri uyu muhango yasabye abarimu n’abayobozi ba Green Hills Academy kwitondera amateka bigisha abana ndetse no kutabikoreza ibikomere byabo.

    Ati “Abantu banyuze mu gihe cya Jenoside yakorewe Abatutsi bafite ibikomere byinshi by’amateka bahuye nayo, mukwiye kwitonda rero hatazagira umwana mubishyira ku mutwe kandi atari ahari. Niba umwana afite bene wabo bakoze Jenoside si we wayikoze wibimucyurira.”

    “Ikindi mu masomo mutanga kuri Jenoside mushyiremo ubwenge bwinshi, kandi mutange amakuru y’ukuri kuri yo, ibi bijyane n’ikigero umwana arimo mumubwire ibyo yabasha gusobanukirwa.”

    Green Hills Academy yibutse mu gihe u Rwanda ruri mu gihe cy’iminsi ijana yo kuzirikana inzirakarengane zazize Jenoside yakorewe Abatutsi mu 1994.

    Abayobozi n’abanyeshuri ba Green Hills Academy bahuriye mu gikorwa cyo kwibuka abazize Jenoside yakorewe Abatutsi

    Nubwo abenshi muri bo bavutse nyuma ya Jenoside bazi neza agaciro ko kwibuka

    Bavuze ko biteguye guhangana n’abagipfobya Jenoside yakorewe Abatutsi
    JPEG - 135.2 kb
    Abana bagize umwanya wo kwerekana umukino bateguye ku mateka ya Jenoside

    Umwe mu banyeshuri ba Green Hills Academy acurangira ‘Violin’ abari muri uyu muhango

    Abanyeshuri bo muri Green Hills Academy basabwe gukoresha mahirwe yo kuba mu gihugu cyiza

    Munyana Peace Rwagasana yavuze ko atazigera aha umwanya abapfobya bakanahakana Jenoside yakorewe Abatutsi

    Ihumure Imra, warokotse Jenoside yasabye abanyeshuri ba Green Hills Academy gushaka icyateza u Rwanda imbere

    Umuyobozi wa Green Hills Academy, Daniel Hollinger yasabye abanyeshuri kwirinda ivangura iryo ariryo ryose rishobora kubageza ku kibi

    Antoinne Rutayisire yasabye abarimu ba Green Hills kutikoreza abanyeshuri umutwaro w’ibibi banyuzemo

    Amafoto: Niyonzima Moise

  • Bwa mbere mu mateka Arthur ashyize hanze ifoto ari kumwe n’umukunzi we Fiona #rwanda #RwOT

    Ni ifoto igaragaza aba bombi bamaze igihe bakundanam bafite ibirahure bari guhana 'Ku buzima bwacu’ ibizwi nka Cheers.

    Bamwe mu bakurikira uyu munyarwenya bahise batangira kuvuga ko ibirori bitashye ku buryo iyi foto ishobora kuba iteguza ibizwi nka save the Date.

    Ni ifoto yashyize ku mbuga nkoranyambaga ze zinyuranye zirimo Instagram ndetse na Facebook, yatumye benshi bayitangaho ibitekerezo binyuranye.

    Umunyamakurukazi Cyuzuzo Jeanne d’Arc usanzwe akorana na Arthu Nkusi, yahise agira ati 'Cheers to your Love.' Mu Kinyarwanda ni nko kuvuga ngo 'Mwishimane urukundo rwanyu.'

    Umunyamakuru w’ibiganiro by’imikino Imfurayacu Jean Luc na we yahise agira ati 'Twanyoye…'

    Nkusi Arthur aherutse kugaragaza ko ahora ashyigikiye umukunzi we Fiona Muthoni Ntarindwa uherutse gutangaza ko Dr Christopher Kayumba yigeze gushaka kumukoresha imibonano mpuzabitsina ku gahato ubwo yari umwarimu we muri Kaminuza y’u Rwanda.

    Icyo gihe ubwo iyi nkuru yari ishyushye cyane, Nkusi Arthur yagize ati 'Mukundwa, nterwa ishema n’imbaraga n’ibakwe byawe. Ndakwizera kandi ndagushyigikiye.'

    Kugeza ubu ntihazwi amakuru y’aho iki kirego kigeze dore ko cyari cyamaze gushyikirizwa Urwego rw’Igihugu rw’Ubugenzacyaha RIB rwanagiye gusaka mu rugo kwa Dr Kayumba ngo rukusanye ibimenyetso kuri kiriya kirego.

    UKWEZI.RW

    Source : http://www.ukwezi.rw/Imyidagaduro/article/Bwa-mbere-mu-mateka-Arthur-ashyize-hanze-ifoto-ari-kumwe-n-umukunzi-we-Fiona

  • Umukino wa Real Madrid na Chelsea muri cya… – #rwanda #RwOT

    Aganira na Slovenian TV, Ceferin yavuze ko nubwo imikino ya ½ cya Champions League iteganyijwe mu cyumweru gitaha, ariko bishoboka ko Real Madrid na Chelsea zitazakina nkuko byari biteganyijwe.

    Yagize ati 'Ukuri n'uko umwaka w'imikino ugeze kure, ibitangazamakuru byateye inkunga iri rushanwa bishobora kudusaba amafaranga kubera ko uwo mukino wa ½ utabaye. Icyakora hari akantu gato gashobora gutuma uwo mukino utaba. Ibintu bizaba bitandukanye cyane mu gihe kiri imbere'.

    Agaruka ku byavuzwe na Perezida wa Real Madrid, Florentino Perez ko adakunda abantu bameze nka Ceferin,  yasubije ko akora akazi ke neza atagamije gushimisha abantu.

    Yagize ati 'Ashaka Perezida wubaha ibyo avuze byose, umwumva akanakora ibyo atekereza. Nkora ibyo ntekereza ko ari byiza ku mupira w'u Burayi n'uw'Isi yose'.

    Amakipe atatu muri 12 yari yemeye kujya muri European Super League, niyo atarava ku izima ngo nayo avemo, ayo ni Real Madrid, FC Barcelona na Juventus.

    Byari byatangajwe ko amakipe atazava muri Super League azakurwa muri UEFA champions League gusa ntabwo UEFA irafata umwanzuro kuko bias nkaho iri rushanwa ryaburijwemo, ariko abariteguye batarava ku izima.

    Gushaka igisubizo cyuko amakipe atazongera gushukwa akurikiye amafaranga, UEFA yatangaje ko igiye kongera ingano yayo yashoraga mu marushanwa itegura arimo Champions League na Europa League, ku buryo amakipe ayitabira azajya avanamo agatubutse.

    Ceferin uyobora UEFA yatangaje ko hari amahirwe make ko umukino wa Real Madrid na Chelsea utazakinwa

    Source : https://inyarwanda.com/inkuru/104975/umukino-wa-real-madrid-na-chelsea-muri-cya-champions-league-ushobora-kudakinwa-104975.html

  • Nyagatare: Barambiwe gutegereza ingurane y'ubutaka bwabo bwashyizwemo amapoto y'amashanyarazi #rwanda #RwOT

    Hari abaturage bo mu murenge wa Mukama, Akarere ka Nyagatare bavuga ko umwaka ugiye gushira batarishyurwa amafaranga y'ingurane ku butaka bwabo bwanyujijweho amapoto y'amashyarazi mu gihe abo bari ku rutonde rumwe  bayabonye.

    Muri Kanama umwaka ushize wa 2020, nibwo abaturage batatu aribo Kabarira Kanisius, Ndengeyingoma Emmanuel na Kabera Iblahim bo mu kagali ka Kagina mu murenge wa Mukama bari ku rutonde rw'abantu 44 bagombaga guhabwa amafaranga y'ingurane ku mapoto y'amashanyarazi, yanyujijwe mu butuka bwabo ariko bakisanga ntayo babonye.

    Ni ikibazo bagaragarije ubuyobozi bw'Umurenge ariko bukomeza kubasiragiza kugeza nubu ntayo barabona.

    Kabarira Canisius ati 'Twangirijwe n'umuyoboro w'amashyanyarazi, noneho urutonde ruza gusohoka bamwe babona amafaranga twe turasigara.'

    Ndengiyingoma Emmanuel ati 'Tugiye ku rutonde rwo kujya gufata amafaranga baratubwira ngo amafishi arahari,ngo ariko amafaranga ntabwo yajeho, turabaza duti kuki amafishi aza ntazeho amafaranga byatwe n'iki? Ngo mwe nimugende ikibazo cyanyu mugaruke ejo. Ejo twajyayo ngo mugaruke ejo, ejo twasubirayo ngo nimugende tuzabibaza abandi babishinzwe.'

    Nyuma yo kubona ko binaniranye ku rwego rw'Umurenge biyambaje urwego rw'Akarere, biza kugaragara ko amafaranga bayasinyiye, bakayahabwa.

    Kugeza ubu baracyari mu gihirahiro cy'uko amafaranga yabo bazayabona mu gihe nta kizere ubuyobozi bubagaragariza.

    Kabarira yagize ati 'Baduhaye numero za telephone y'uwa'akarere, duhamagaye aratubwira ngo lisiti igaragaza ko twafashe amafaranga, turamubwira duti twafata amafaranga tukongera tugahamagara? Nawe bimubera urujijo'

    Undi muturage witwa Zelinda Kamatsindi nawe ati 'Mana we!! Umwaka urashize batubwira ngo yarayobye. Ubuse yayoba  abandi bakayabona turi ku rutonde rumwe, twebwe akayoba? Dusaba kurenganurwa rero, barayariye ni abayobozi bayariye.'

    Umunyamakuru wa Flash yabajije abakozi bashinzwe iby'ubutaka ku rwego rw'Akarere n'Umurenge bagaragaza ko batazi iby'iki kibazo .

    Icyakora Umuyobozi w'Akarere ka Nyagatare wungirije ushinzwe ubukungu n'iterambera, Bwana Steven Rurangwa, avuga ko agiye kugikurikirana.

    'Ndashaka kuvugana n'umukozi kugira ngo ankurikiranire menye ko Raporo koko yagejejwe kuri REG. Hari umukozi ushinzwe  ibikorwa by'amashyanyarazi mu Karere, ubwo ndamubaza raporo y'abo bantu uko byari bimeze, ubundi dukurikirane abo bantu bo muri Kagina turebe uko bakwishyurwa.'

    Aba baturage bagaragaza ko ingano y'amafaranga bishyuza ari nke ugereranije n'ibyo bashobora gutakaza bayakurikirana.

    Hari uwishyuza arenga ibihumbi 150, undi akishyuza arenga ibihumbi 80 ndetse n'undi wishyuza arenga ibihumbi 25.

    Ibibazo nk'ibi byo kutishyurira igihe ingurane y'abaturage bigaragazwa nk'ibidindiza iterambere n'imibereho myiza yabo.

    Garleon Ntambara

    The post Nyagatare: Barambiwe gutegereza ingurane y'ubutaka bwabo bwashyizwemo amapoto y'amashanyarazi appeared first on Flash Radio TV.

    Source : https://flash.rw/2021/04/22/nyagatare-barambiwe-gutegereza-ingurane-yubutaka-bwabo-bwashyizwemo-amapoto-yamashanyarazi/?utm_source=rss&utm_medium=rss&utm_campaign=nyagatare-barambiwe-gutegereza-ingurane-yubutaka-bwabo-bwashyizwemo-amapoto-yamashanyarazi

  • Nyamasheke : Ikamyo yari itwaye inka yakoze impanuka iteye ubwoba igwamo abantu 2 #rwanda #RwOT

    Ababonye iyi mpanuka yabaye mu gitondo cyo kuri uyu wa Gatatu tariki 21 Mata 2021, bavuga ko ishobora kuba yatewe no kuba iriya modoka yacitse feri ikagwa munsi y’umuhanda.

    Bavuga kandi ko abashumba 2 bajyanywe ku kigo nderabuzima cya Karengera abandi bari imbere hakenewe imashini yo gukata ibyuma ngo bakurwemo bakaba bari bashizemo umwuka.

    Umuvugizi wa Polisi mu Ntara y’Iburengerazuba, CIP Bonaventure Twizere Karekezi, yavuze ko mu makuru y’ibanze bamaze gukusanya abantu babiri bahise bitaba Imana.

    Yagize ati 'Twari tukiyegeranya [amakuru] ariko ikiriho ni uko iyo mpanuka yabaye koko. Ni ukuvuga ngo turacyakurikirana iby’iyo mpanuka.

    Yakomeje agira ati 'ariko nk’amakuru y’ibanze hari hamaze gupfa abantu babiri, navuga ko babuze ubuzima bwabo muri iyo mpanuka ndetse hagapfa inka zirindwi zari mu modoka cyangwa se iyo modoka yari itwaye.'

    Iyi kamyo yari itwaye ziriya nka 20 izerekeje mu isoko rya Rugali, zirindwi muri zo zikaba zahise zipfa.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Nyamasheke-Ikamyo-yari-itwaye-inka-yakoze-impanuka-iteye-ubwoba-igwamo-abantu-2

  • Bugesera: Umusaruro w’igikoni cy’Umudugudu mu kurwanya imirire mibi n’igwingira mu bana –

    U Rwanda ni kimwe mu bihugu byiyemeje kurandura imirire mibi mu mwaka wa 2024 aho abana bafite iki kibazo bazava kuri 33% bakagera kuri 19%. Iyi ntego izagerwaho hifashishijwe kwigisha ababyeyi guteka indyo yuzuye no kwita ku bana babo.

    Abaturage bo mu Karere ka Bugesera mu Murenge wa Mwogo ni abahamya b’uburyo igikoni cy’Umudugudu cyahinduye ubuzima bw’abana babo nyuma y’uko abari bafite abana bafite ikibazo cy’imirire mibi bigishijwe guteka indyo yuzuye.

    Ubu buryo babwigishwa n’abajyanama b’ubuzima nyuma yaho bahuguriwe na Minisiteri y’Ubuzima ibinyujije mu Kigo cy’Igihugu cy’Ubuzima (RBC).

    Ahishakiye Angelique utuye mu Mudugudu wa Rukira mu Kagari ka Rugunga mu Murenge wa Mwogo, yavuze ko umwana we wari ufite imyaka ibiri yapimwe n’umujyanama w’ubuzima agasanga afite ibiro bine n’andi magarama make, yarazingamye ku buryo buteye agahinda.

    Ngo iyo abantu bamubazaga niba umwana we nta yindi ndwara arwaye yabasubizaga ko ntayo akumva ko umwana we azagera aho agakura neza.

    Ati “ Mbere ntaraza hano napfaga gutekera umwana uko mbonye, nafataga nk’ibijumba nkagerekaho ibishyimbo nkumva ko muhaye ibiryo byamugirira umumaro abajyanama b’ubuzima bamupimye basanga ari mu mutuku, sinarinzi ko habaho imboga zongerera intungamubiri umwana.”

    Ahishakiye yavuze ko ubu umwana we amaze kugira ibiro umanani ndetse ngo bitewe n’ibiryo agaburirwa abona ibiro bye bikiyongera cyane.

    Ati “Hano batwigisha guteka, mbere sinarinzi ngo ndabyuka ntekere umwana igikoma mbone kujya mu murima, narabyukaga bya bijumba naraye ntetse akaba aribyo njyana mu murima, ariko ubu ndazinduka nkamutekera igikoma nkanamutekera ibiryo nkabijyana mu murima mbipfundikiye ku buryo abirya bigishyushye.”

    Mukandayisenga Josephine utuye mu Kagari ka Gitaba mu Mugudu wa Gisaso we avuga ko umwana we yapimwe ibiro asanga afite bitanu nyamara afite umwaka n’igice, icyo gihe ngo umwana we yasanzwe mu mutuku amerewe nabi cyane.

    Ati “ Urebye nabiterwaga n’ubushobozi buke hamwe no kutamenya guteka neza indyo yuzuye, ibyo byose rero byampuriragaho ugasanga umwana abigendeyemo ntarye neza.”

    Mukandayisenga yavuze ko bimwe mu byo yigiye ku gikoni cyo ku Mudugudu ari uko amafaranga yose yaba afite yayakoresha mu gutekera umwana we neza.

    Ati “ Ubu namenye ko amafaranga 500 Frw ashobora guhaza umwana wanjye kuko naguramo ibifite intungamubiri ku buryo umwana wanjye arya neza, mu minsi mike maze hano umwana wanjye yiyongereyeho ibiro ku buryo nanjye ngiye gukomerezaho ntasubire inyuma.”

    Umujyanama w’ubuzima mu Mudugudu wa Misatsi mu Kagari ka Gataba, Mukarwego Drocella, yavuze ko umwaka ushize bagitangira gupima abana muri uyu Murenge bahasanze abana 63 bafite ikibazo cy’imirire mibi barimo batanu bari mu mutuku n’abandi 58 bari mu muhondo, aba bana barabakurikiranye ngo bakabagaburira ku gikoni cy’umudugudu kugeza ubwo hasigaye abana icumi gusa.

    Ati “ Dufite ibipimo dukoresha dupima ikizigira ubundi tukanamupima ibiro n’uburebure bwe, ibi iyo tubikoze tubona niba umwana akura neza cyangwa niba asubira inyuma mu mikurire, ibi iyo tubikoze mu bana bose dufite tubona abakwiriye kwitabwaho.”

    Mukarwego avuga ko imyumvire, ubukene no kutamenya guteka neza biri mu bidindiza imikurire y’abana hirya no hino, yavuze ko iyo babahurije ku gikoni cy’umudugudu bibafasha kubona indyo yuzuye.

    Ati “ Iyo tubazanye ku gikoni cy’umudugudu dutekera hamwe indyo yuzuye, nkabikora bareba, nkababwira nti uyu ni umuceri utera imbaraga, izi ni imboga zirinda umubiri indwara, ibi ni ibishyimbo byubaka umubiri ku buryo bamenya buri kimwe n’umumaro wacyo hari nubwo bambaza akamaro k’igi nkabasobanurira bakabimenya.”

    Uyu mujyanama w’ubuzima yavuze ko buri mubyeyi iyo avuye ku gikoni cy’Umudugudu bamukurikirana bakamutegeka gukora akarima k’igikoni iwe mu rugo kugira ngo ajye abona aho akura imboga, yavuze ko buri mubyeyi bakomeza kumukurikirana kugeza umwana akuze.

    Umunyamabanga Nshingwabikorwa w’Umusigire w’Umurenge wa Mwogo, Muhoza Jean, yavuze ko igikoni cy’Umudugudu hamwe n’amarerero biri mu byifashishwa mu kwita ku bana bafite ikibazo cy’imirire mibi muri uyu Murenge.

    Uyu muyobozi yavuze ko kuri ubu bagenda bakurikirana imiryango itandukanye bareba icyatumye abo bana bagira ikibazo cy’imirire mibi aho hari aho basanze biterwa n’amakimbirane aba agaragara mu miryango yabo hakabaho kubanza kuyakemura.

    Ababyeyi bafite abana bagaragara mu mutuku ndetse no mu muhondo bagaburirirwa ku gikoni cy’umudugudu kugeza umwana agaruye ibiro bimukwiye

    Ahishakiye yavuze ko umwana we amaze kwiyongeraho ibiro bine abikesha kugaburirirwa ku gikoni cy’umudugudu

    Indyo yuzuye ihabwa buri mwana wese ugaburirirwa ku gikoni cy’umudugudu

    Umujyanama w’ubuzima, Mukarwego Drocella yavuze ko ku gikoni cy’umudugudu bahigishiriza ababyeyi guteka indyo yuzuye kandi ko bifasha benshi