Webrwanda Backend

Author: webrwanda

  • Agahinda k’abana baterwa inda bakanga kurega ababahohoteye –

    Aba bana batewe inda bemeza ko hari ibintu bitandukanye bituma bahishira ababahohoteye mu kurengera inyungu zabo.

    Uwase (izina ryahinduwe) wo mu Murenge wa Ndera, Akarere ka Gasabo watewe afite imyaka 16 y’amavuko, yemeza ko biba bigoye ko umuntu arega uwamuteye inda igihe aba ari we umufasha muri buri kintu cyose akeneye.

    Ati “Ubu warega umusore waguteye inda kandi ajya agufasha buri kintu mu gihe uba uzi neza ko numurega bari buhite bamufunga kandi Leta ntijye igufasha? Wenda iyaba babaga banadufasha byari kujya bituma umuntu arega uwamuteye inda ariko se wamurega ngo ari inde ugufasha?.”

    Indi mpamvu yavuze ko ishingiye ku kwirinda ko bazagirana ibibazo n’abana babo cyangwa bakagirana amakimbirane n’imiryango yabo, cyane ko iyo batangiye gukura usanga bahora bababaza ba se.

    Umwe yagize ati “Umuntu arabyihorera kuko n’ubundi usanga ari ukwikururira ibibazo no kuzana urwangano n’umuryango w’iwabo w’umuhungu uba waguteye inda, ikindi ni uko umwana iyo akuze akakubaza se akumva waramufungishije, ntabwo agukunda cyangwa ngo bimushimishe.”

    Aba bana batewe inda bakiri bato bahamya ko hari igihe bananga kugaragaza ababateye inda cyangwa kubarega bitewe n’uko hari n’igihe ababyeyi babyumvikanaho.

    Gihozo (izina ryahinduwe) watewe inda afite imyaka 16, yagize ati “Njye nanze kumuvuga kuko ababyeyi bacu barabimenye baraganira babirangiriza mu muryango ku buryo ubu asigaye amfasha rero ntiwarega umuntu kandi uzi ko aguha buri kintu mu gihe umureze Polisi cyangwa abo bayobozi ntacyo bagufasha na gito.”

    Kutaganirizwa n’ababyeyi byagaragajwe nk’intandaro yo gutwara inda hakiri kare

    Aba bana banemeza ko hari ubwo baterwa inda bashukishijwe ibintu bakeneye kubera ubukene, abandi bagashorwa mu mibonano mpuzabitsina kubera kutagira ubumenyi ku buryo bakora imibonano mpuzabitsina ariko bakirinda ibyago birimo gutwara inda no kurwara indwara zandurira mu mibonano mpuzabitsina.

    Gihozo ati “Hari ubwo ubana n’ababyeyi ntibakuganirize, ntabakugurire n’ikintu na kimwe noneho wahura n’umusore akaba ari byo agushukisha, ugashiduka muryamanye cyangwa se bakayigutera kubera amakimbirane uhora ubona hagati y’ababyeyi bawe noneho wagenda bakayigutera.”

    Minisitiri w’Uburinganire n’Iterambere ry’Umuryango, Bayisenge Jeannette, ubwo yari mu ruzindiko mu Karere ka Musanze, yagaragaje ko n’ubwo ibyaha bifitanye isano n’amakimbirane yo mu miryango bigabanyuka, icyo gusambanya abana kiza ku isonga, kandi ko ari ikintu giteye isoni n’agahinda.

    Ati “Icyaha kiri ku isonga ni icyo gusambanya abana nabyo rwose bitari ibintu by’umuco nyarwanda, biteye isoni, biteye agahinda ni agahomamunwa kuba wabona umubyeyi yasambanyije umwana we, ukabona nyirarume yamusambanyije.”

    Impuzamiryango yita ku Burenganzira bwa Muntu, CLADHO, yo igira inama ababyeyi yo kudatererana abana babo bazizwa ko batwaye inda imburagihe, ahubwo bakababa hafi kugira ngo badahura n’ibindi bibazo byinshi kurushaho.

    Abana baterwa inda bakiri bato bagaragaje ko impamvu zituma batarega ababateye inda

  • Kigali: Polisi yerekanye abantu icyenda bakekwaho ubujura no kugura ibyibano –

    Bane muri abo bari barakoze itsinda mu gihe abandi bakekwaho kugura ibyibwaga. Mu bikoresho byibwe harimo mudasobwa, telefone na televiziyo.

    Aba bagabo uko ari icyenda bafatiwe mu Mujyi wa Kigali ku wa 2 Gicurasi 2021.

    Umwe muri aba bafashwe usanzwe ukomoka mu Karere ka Rullindo, yabwiye itangazamakuru ko bari bamaze umwaka bari muri ubu bujura.

    Yavuze ko kugira ngo bagere kuri uwo mugambi, bakoranaga n’umumotari ubafasha kugeza ibyo bikoresho ku muguzi.

    Mu gusobanura uko bakoraga ubu bujura yagize ati “Hari aho twagendaga tugasanga amadirishya afunguye kandi n’aho tudasanze hakinguye tukahakingura dukoresheje icyuma.”

    Yavuze ko yicuza ibyaha yakoze ndetse ko atakongera gukora ibinyuranye n’amategeko, agasaba abantu bagikora ibyo byaha kubireka.

    Ukekwa kuba yari inyuma yabyo akagura ibyibwaga, yavuze ko yari asanzwe akora akazi ko gukora ibikoresho by’ikoranabuhanga bitandukanye mu gihe byagize ikibazo.

    Yavuze ko yahamagawe n’umumotari amubwira ko hari umuntu wahombye akabari bityo ko hari televiziyo zigurishwa. Yavuze ko nyuma yagiyeyo arazigura ariko ntiyahabwa inyemezabwishyu kuko zari zigikorwa zitaraboneka ari nayo makosa avuga ko yaguyemo.

    Ati “Ikibazo cyabayemo ari naryo kosa naguyemo ntabwo nigeze njya kwaka inyemezabwishyu, ikindi yari yambwiye ko inyemezabwishyu nta zihari amaze igihe azikoresha ngendera kuri icyo cyizere ndagura.”

    Yavuze ko atazongera kugwa mu makosa yo kugura ikintu atatse inyemeza bwishyu.

    Kamali Patrick atuye mu Karere ka Nyarugenge mu Mujyi wa Kigali, wari wibwe televiziyo na mudasobwa, yavuze ko umunsi yibwa yabyutse agasanga inzu irangaye.

    Yashimiye Polisi uburyo yakoranye ubunyamwuga mu kugaruza bimwe mu byibwe ndetse no guta muri yombi ababikoze.

    Ati “Ni ibyishimo kandi ndashimira Polisi ubushobozi n’ingufu mu gufata aba bajura ndumva rwose ntacyo batakoze.”

    Umuvugizi wa Polisi y’Igihugu, CP John Bosco Kabera yavuze ko Polisi itazahwema guta muri yombi abiba iby’abandi.

    Ati” Iyo abaturage batanze amakuru turayakurikirana, byumvikane y’uko utafashwe uyu munsi ejo azafatwa, icyo tuba dukeneye ni amakuru. N’uwateganyaga kwiba iri joro ahari bwibe haramenyekana n’ abajura bafite gahunda yo kwiba babireka kuko nta kiza kirimo.”

    Aba nibaramuka bahamijwe ibi byaha bazafungwa igihe kitari munsi y’umwaka umwe ariko kitarenze imyaka ibiri n’ihazabu y’amafaranga y’u Rwanda atari munsi ya miliyoni imwe ariko atarenze miliyoni ebyiri n’imirimo rusange mu gihe cy’amezi atandatu cyangwa kimwe gusa muri ibyo bihano.

    Aba bantu uko ari icyenda bakekwaho ubujura no kugura ibyibwe

  • Ubushinjacyaha bwasobanuye uko Munyenyezi Béatrice yishe Abatutsi i Butare –

    Uyu mugore w’imyaka 51 yagejejwe mu Rwanda ku wa 16 Mata 2021, ubwo yari yoherejwe na Leta Zunze Ubumwe za Amerika nyuma yo kurangizayo igihano yari yarakatiwe n’inkiko zo muri iki gihugu ubwo yahamwaga n’ibyaha byo kubeshya Urwego rw’Abinjira n’Abasohoka ku ruhare yagize muri Jenoside, kugira ngo abone ubwenegihugu bwa Amerika.

    Ubwo yagezwaga mu Rwanda, yasanze hari dosiye y’ibyaha ashinjwa ndetse ahita ashyikirizwa Urwego rw’Ubugenzacyaha, RIB, aza kwitaba Urukiko ku nshuro ya mbere ku wa 28 Mata ariko urubanza rurasubikwa ku bw’imbogamizi zagaragajwe n’abamwunganira mu mategeko.

    Akurikiranyweho icyaha cyo kwica nk’icyaha cya Jenoside, gucura umugambi wo gukora Jenoside, gutegura Jenoside, gushishikariza ku buryo butaziguye abantu gukora Jenoside, ubufatanyacyaha muri Jenoside, kurimbura nk’icyaha kibasiye inyokomuntu ndetse n’ubufatanyacyaha mu gusambanya ku gahato nk’icyaha kibasiye inyokomuntu.

    Mu gitondo cyo kuri uyu wa Gatatu, Munyenyezi yongeye kwitaba urukiko yunganiwe na Me Buhuru Pierre Célestin ndetse na Me Gatera Gashabana. Kuri iyi nshuro hari hatahiwe Ubushinjacyaha kugira ngo busobanure impamvu bwazanye Munyenyezi imbere y’urukiko.

    Mu gihe Inteko Iburanisha yari ihaye ijambo Ubushinjacyaha, Me Buhuru yahise asaba avuga ko we n’umukiliya we bafite inzitizi zigera kuri eshatu zirimo uko yafashwe, uko yafunzwe n’ukuntu yashyikirijwe ubugenzacyaha, avuga ko hari amategeko atarubahirijwe.

    Uko yagejejwe mu Rwanda byakuruye impaka

    Me Buhuru yabanje gushimira Ubushinjacyaha n’inzego zifunze Munyenyezi mu gihe ataraburana kubera ko yaba abanyamategeko ndetse na Munyenyezi ubwe bahawe dosiye kugira ngo babashe kuyiga, bayisesengure noneho babashe kuburana.

    Yavuze ko dosiye bayihawe bakayisuzuma ariko ngo mu kuyitegura hari imbogamizi bahuye nazo zirimo kutamenya uko Munyenyezi yavanywe muri Leta Zunze Ubumwe za Amerika akagezwa mu Rwanda.

    Me Buhuru yavuze ko uretse amashusho babonye kuri televiziyo agaragaza Munyenyezi agezwa mu Rwanda ariko ngo nta kindi babonye nk’impapuro zigaragaza impamvu yoherejwe mu Rwanda. Muri rusange yavuze ko batigeze babona impapuro zita muri yombi cyangwa izo kuzana mu Rwanda umukiliya wabo.

    Nyuma yo kugaragaza izo nzitizi, Ubushinjacyaha bwahise buhabwa umwanya buvuga ko Munyenyezi yazanywe mu Rwanda yoherejwe na Amerika mu buryo bwo kumwirukana (Deportation) noneho agejejwe mu Rwanda asanga hari dosiye ye bityo ahita afatwa na RIB.

    Uhagarariye Ubushinjacyaha yavuze ko impamvu hatabayeho kumutumiza cyangwa kumwohereza inyandiko zimufata bitari ngombwa kuko hakoreshejwe uburyo buteganywa n’amategeko.

    Ubushinjacyaha kandi busobanura ko Amerika yazanye Munyenyezi imugeza ku Kibuga cy’Indege cya Kigali ndetse hari n’inyandiko zatanzwe na Ambasade ya Amerika iri i Kigali.

    Abahagarariye Ubushinjacyaha bagaragaje ko Munyenyezi yari amaze igihe kinini ari muri Amerika kandi ashakishwa ndetse anafite na dosiye ye hano mu gihugu ku byaha akekwaho ko yakoreye hano mu gihugu.

    Akigera mu Rwanda, ubutabera bwo mu Rwanda bwari bumaze igihe kinini bumushakisha buhita bumufata agezwa mu Bugenzacyaha amenyeshwa ibyo aregwa, arabazwa, dosiye ishyikirizwa Ubushinjacyaha, ari nayo mpamvu bwamuzanye imbere y’urukiko asabirwa gufungwa by’agateganyo.

    Muri rusange ngo uko yafashwe, uko yashyikirijwe ubutabera kugeza iyi saha byose bikurikije amategeko.

    Abo ku ruhande rwa Munyenyezi bavuze ko ifatwa, izanwa n’ifungwa rya Munyenyezi ritarakurikije amategeko bityo bagasabira umukiliya wabo kurekurwa. Bakomeje kugaragaza ko batigeze babona mandat d’amener. Ku rundi ruhande ariko yaba Ubushinjacyaha ndetse n’Urukiko bagaragaje ko Mandat d’amener ihari ndetse yashyizwe muri system.

    Urukiko rwahise rwanzura ko hazafatwa umwanzuro kuri iyo nzitizi ruhita rukomeza iburanisha ku ifunga n’ifungurwa ry’agateganyo rikomeza.

    Ubushinjacyaha bwateye utwatsi iby’uko ibyaha aregwa yabiburanishirijwe muri Amerika

    Uruhande rw’ubwunganizi bwa Munyenyezi, rwagaragarije urukiko ko umukiliya warwo hari ibyaha mu byo aregwa hano mu Rwanda kandi yarabiburaniye muri Amerika bityo adakwiye gukomeza kubikurikiranwaho.

    Icyaha cya Jenoside, icyaha cyo kuba Munyenyezi yarashinze za bariyeri zitandukanye, icyo kuba yaragiye avangura abahutu n’abatutsi akoresheje indangamuntu abo asanze ari Abatutsi akabaha interahamwe ngo zibice, icyo gufata ku ngufu n’ubufatanyacyaha mu gufata ku ngufu ndetse n’icyo gushishikariza abahutu kwica Abatutsi.

    Me Buhuru yavuze ko ngo ibyo byaha byose yabiburanye muri Leta Zunze Ubumwe za Amerika ndetse arabihanirwa igifungo cy’imyaka 10 ndetse ngo iyo myaka 10 arayifungwa arayirangiza noneho ngo amaze kuyirangiza nibwo Amerika yamwohereje mu Rwanda imwirukanye.

    Me Buhuru yifashishije amasezerano mpuzamahanga avuga ko nta muntu ushobora gukurikiranwa hashingiwe ku cyaha yagizweho umwere.

    Ubushinjacyaha bwavuze kuri iyi nzitizi buvuga ko ibyaha Munyenyezi yahaniwe muri Amerika ari ukubeshya atari ibyaha bya Jenoside.

    Uhagarariye Ubushinjacyaha yavuze ko icyaha Munyenyezi yahaniwe ari ikijyanye n’amakuru y’ibinyoma yatanze kugira ngo abone ubwenegihugu. Ni ukuvuga ko atigeze ahanirwa ibyaha bya Jenoside.

    Ubushinjacyaha bwavuze ko Munyenyezi akurikiranyweho ibyaha birindwi ndetse bimwe mu byavuzwe n’uruhande rw’abamwunganira buvuga ko yabihaniwe bitari muri ibyo birindwi akurikiranyweho. Bivuze ko ibyaha akurikiranyweho ntabwo ari ibyaha yahaniwe, ni ibyaha yakoreye mu Rwanda mu 1994 ari nabyo bigize dosiye ye.

    Havuzwe uko Munyenyezi yashinze za bariyeri akanazikoraho

    Nyuma y’igihe kirekire haburanwa ku nzitizi zagaragajwe n’abunganira Munyenyezi, Inteko Iburanisha yaje gutanga umwanya ku Bushinjacyaha ngo buvuge impamvu bwazanye Munyenyezi imbere y’urukiko ndetse n’impamvu bumusabira gufungwa by’agateganyo.

    Ubushinjacyaha bwabanje gusubiramo ibyaha byose Munyenyezi akurikiranyweho uko ari birindwi ndetse n’uko yagiye abikora. Bwavuze ko ibyaha byose Munyenyezi yabikoreye mu yahoze ari Perefegitura ya Butare.

    Bwavuze ko hari Umubikira Munyenyezi ubwe yicishije imbunda nto nyuma yo kumuha Interahamwe ngo zimusambanye.

    Ubushinjacyaha bwagaragaje amazina y’abantu batandukanye Munyenyezi yagiye yica we ubwe, abo yagiye ashyikiriza Interahamwe ngo zibasambanye n’abo yagiye ategeka Interahamwe ngo zibice.

    Umushinjacyaha yavuze ko hari impamvu zikomeye zituma uregwa akekwaho kuba yarakoze ibyo byaha.

    Mu kugaragaza impamvu zikomeye zituma Ubushinjacyaha bukeka ko Munyenyezi yakoze ibyo byaha byose uko ari birindwi, Ubushinjacyaha bwavuze ko bwifuje kugaragaza amazina y’abatangabuhamya mu rwego rwo kubarindira umutekano.

    Mu batangabuhamya babajijwe hari uwavuze ko mu gihe cya Jenoside, hari bariyeri yo ku Mukoni yashyizweho na Munyenyezi noneho batangira gusuzuma ibyangombwa by’abayinyuragaho bose.

    Noneho ngo hari nk’Umubikira wayinyuzeho maze Munyenyezi aramubwira ngo wowe ndakuzi windushya. Ako kanya ngo hahise baza imodoka ya Pauline Nyiramasuhuko noneho bayitwaramo uwo mubikira ajya kwicwa nyuma yo gusambanywa n’Interahamwe.

    Iyo bariyeri ngo Munyenyezi yashinze ku Mukoni yari ari kumwe n’izindi nterahamwe bafatanyaga kugenda bagenzura ibyangombwa by’abayinyuragaho bose. Hagarutswe kandi ku ijambo Munyenyezi yavugiye mu nama yabereye ku Irango avuga ko igihugu cyatewe n’umwanzi kandi uwo mwanzi ari “Umututsi” ndetse ngo abwira abayitabiriye ko bagomba kuba bazi ko ntawe ukubura umwanda awerekeza mu nzu.

    Mu Rukiko havuzwe bariyeri nyinshi zashyizwe muri Butare, ari nazo Munyenyezi yajyaga gufataho ababaga bashyizwe ku ruhande bivugwa ko ari Abatutsi noneho akabajyana bakajya kwicwa. Ikindi kandi umutangabuhamya yavuze ngo ni uko yabonaga Munyenyezi agemuriye ibyo kurya Interahamwe zabaga ziriwe kuri izo bariyeri.

    Ubushinjacyaha bwavuze ko hari umutangabuhamya wavuze ko yiboneye n’amaso abishwe n’Interahamwe ku mabwiriza yabaga yatanzwe na Munyenyezi.

    Hari undi mutangabuhamya wavuze ko ku irembo ryo kwa Munyenyezi ahitwa mu ihuriro hashyizwe bariyeri ishyirwaho Interahamwe zifite ubuhiri n’udufuni maze zikajya zica Abatutsi banyuraga kuri izo bariyeri.

    Icyo gihe Munyenyezi ngo yabaga muri hoteli Ihuriro yari iri hafi y’urugo rwa Pauline Nyiramasuhuko (Munyenyezi ni umukazana wa Nyiramasuhuko).

    Ubushinjacyaha bwasoje busaba Urukiko gutegeka ko Munyenyezi afungwa mu gihe Ubushinjacyaha bukinonosora dosiye ngo iburanishwe mu mizi.

    Ikindi Ubushinjacyaha buheraho busaba ko afungwa iminsi 30 y’agateganyo ngo ni uko ibi byaha byose hari ibimenyetso by’uko yabikoze kandi byose akurikiranyweho bikaba bihanishwa igifungo kirenze imyaka ibiri.

    Munyenyezi ukurikiranyweho uruhare muri Jenoside yagejejwe imbere y’urukiko

    Munyenyezi yahakanye ibyo aregwa, urukiko rumubaza icyo apfa n’abatangabuhamya bamushinja

    Uyu mugore yabajijwe niba ibyaha byose uko ari birindwi abyemera cyangwa atabyemera ahita asubiza ko byose atabyemera.

    Yasobanuye ko ibyaha byose bamurega abihakana kuko ngo abantu bose ashinjwa batari bamuzi kuko yageze i Butare ari mushya cyane ko yavukiye muri Perefegitura ya Byumba ndetse akaba yarize i Byumba, Kigali na Gitarama ku buryo i Butare aho yashakiye atari ahazi neza ndetse ngo n’abantu baho atari abazi mu gihe cya Jenoside.

    Yavuze ko mu 1994 aribwo bagiye kuba muri Hotel Ihuriro i Butare ndetse ngo icyo gihe bavuga ko yashinze bariyeri yari atwite abana b’impanga ku buryo atabashaga kugenda ngo ajye kuri izo bariyeri zasobanuwe n’Ubushinjacyaha.

    Yavuze ko abantu bose bamurega nta n’umwe umuzi kuko yagiye i Butare ari mushya ndetse ngo icyo gihe ntabwo yari umuyobozi cyangwa ngo abe afite irindi jambo ryatuma ashinga izo Barrière cyangwa ngo atange amabwiriza yo kwicwa Abatutsi.

    Munyenyezi yabwiye Urukiko ko ibyo bamurega byose ari ibihimbano ariyo mpamvu asaba kugirwa umwere akarekurwa agakurikiranwa ari hanze.

    Urukiko rwamubajije impamvu abo batangabuhamya bose bamushinja ibyo bintu byose.

    Umucamanza ati “Urakeka ari iyihe mpamvu ituma aba batangabuhamya bose bagaragajwe n’Urukiko bagushinja ibyo bintu kandi wowe ukaba uvuga ko wari mushya i Butare.”

    Munyenyezi mu gusubiza yagize ati “Ntabwo nzi impamvu, sinzi niba ari ukubera mabukwe n’umugabo wanjye. Ntabwo abo banshinja banzi nanjye simbazi.”

    Munyenyezi yakomeje gutsimbarara ku ngingo y’uko mu gihe cya Jenoside yari mushya i Butare, ko abo bantu bamushinja batari bamuzi ndetse nawe atari abazi.

    Yavuze kuri bariyeri yari iri imbere ya Hotel Ihuriro ko n’ubwo yari ihari atigeze ayikoraho ndetse yibaza impamvu abantu bavuga ko bagiye bamubona ari kuri bariyeri yambaye imyenda ya gisirikare.

    Munyenyezi yavuze kandi ko afite ibibazo by’ubuzima anasaba Urukiko gutegeka ko arekurwa.

    Me Gashabana wunganira Munyenyezi yagarutse ku batangabuhamya avuga ko ibyo bavuze bidakwiye guhabwa agaciro kuko batari bazi Munyenyezi.

    Me Gashabana yavuze ko basanga nta mpamvu zikomeye zatuma umukiliya wabo akekwaho ibyaha aregwa bityo Urukiko rugomba guhita rutegeka ko arekurwa agakurikiranwa adafunze.

    Me Buhuru nawe yasabye ko umukiliya wabo arekurwa wenda Urukiko rukagira ibyo rumutegeka ariko akarekurwa by’agateganyo.

    Ubushinjacyaha bwahawe umwanya ngo bugire icyo buvuga ku kwiregura kwa Munyenyezi busobanura ko uwo bukurikiranye yakoze ibyo byaha ndetse ku bijyanye n’abatangabuhamya bushimangira ko iperereza rigikomeje hashobora kuzaboneka n’abandi.

    Umushinjacyaha yavuze ko yaba Ubugenzacya cyangwa Ubushinjacyaha bakiri mu iperereza aho ibimenyetso bishinja n’ibishinjura bizagaragazwa mu iburanisha mu mizi bikagaragaza uko Munyenyezi alias Kamanda yakoze ibi byaha.

    Ubushinjacyaha bwongeye nanone gushimangira ubusabe bwabwo bw’uko uwo bukurikiranye yaba afunze by’agateganyo bugakomeza gukora iperereza no gushaka ibindi bimenyetso ku byaha Munyenyezi akurikiranyweho.

    Inteko Iburanisha yamaze kumva impande zombi itangaza ko hagiye gusesengurwa ibyavuzwe n’Ubushinjacyaha ndetse n’uruhande rw’uregwa bityo umwanzuro w’urukiko ku ifunga n’ifungurwa ry’agateganyo ukazasomwa ku wa 10 Gicurasi 2021 i saa Cyenda.

    Munyenyezi yasabiwe gufungwa iminsi 30 y’agateganyo

    Munyenyezi ukurikiranyweho ibyaha bya Jenoside aburanira mu Rukiko rw’Ibanze rwa Kicukiro

    Aha Munyenyezi yasohokaga mu Rukiko amaze kuburana

    Nyuma yo kuburana yasubijwe kuri sitasiyo ya RIB

  • Perezida Kagame yakiriye mu biro bye Cardinal Kambanda –

    Ibiro by’Umukuru w’Igihugu, Village Urugwiro bibinyujije kuri Twitter byatangaje ko kuri uyu wa 5 Gicurasi 2021, aribwo Perezida Kagame yagiranye ibiganiro na Cardinal Kambanda, gusa ntibyatangaje ibyo bombi baganiriyeho.

    Perezida Kagame yakiriye Antoine Cardinal Kambanda nyuma y’amezi arindwi Papa Francis amuhaye izi nshingano zo kuba Cardinal ndetse anashyirwa mu bagize Dicastère, aho ari mu bashinzwe by’umwihariko iyogezabutumwa ku Isi.

    Ubwo habaga Misa yo kwakira Cardinal Kambanda nyuma yo kwimikwa, Umukuru w’Igihugu yavuze ko igihugu gufite Cardinal Kambanda nk’Umunyarwanda, nk’umwana w’u Rwanda wazamutse kuva abaye Umusaseridoti kugera ku rwego rwa Cardinal.

    Yakomeje agira ati “Iyo Umunyarwanda azamutse mu ntera kubera ubushobozi, kubera imirimo yakoze haba ku rwego mpuzamahanga twese turishima, icyizere yagiriwe n’agaciro yahawe ubwo natwe biba ibyacu, aba ari intore mu nshingano arimo, akaba n’intore mu gihugu cyacu ari na cyo cye.”

    Mu kiganiro cyihariye aherutse kugirana na IGIHE, Antoine Cardinal Kambanda yavuze ko igihugu iyo gifite Cardinal biba ari iby’agaciro gakomeye kuko uretse kuba ari intangiriro y’inzira iganisha ku kugira Papa, binasobanuye ko Kiliziya yatangiye gukura kandi ifite umuntu uyihagarariye mu buyobozi bukuru bwa Kiliziya Gatolika ku Isi.

    Perezida kagame yakiriye Cardinal Kambanda uherutse guhabwa inshingano zikomeye na Papa Francis

    Perezida Kagame yakiriye mu biro bye Cardinal Kambanda bagirana ibiganiro

    Nyuma y’ibiganiro bafashe ifoto y’urwibutso

    Amafoto: Village Urugwiro

  • Ibintu 6 biranga umuntu utsikamiwe n’umwuka wa Yezebeli #rwanda #RwOT

    Bibibiliya yerekana ko Yezebeli yari umugore wa Ahabu umwami wa Israel akaba yaramushatse bitari mu mugambi w’Imana kuko byari ikizira ko umwisirayeli arongora umunyamahanga, ari na byo byakururiye akaga gakomeye ubu bwoko kuko yazanye ibigirwamana ndetse n’umwuka w’ubusambanyi.

    Ni muri urwo rwego tugiye kurebera hamwe umuntu utsikamiwe n’umwuka wa Yezebeli:

    1.Uyu muntu yumva ahorana ubwoba: Bene uyu muntu ahorana ubwoba mu buzima akumva ko nta kintu azageraho.

    2. Ahora yigunze ari wenyine

    Mwibuke Eliya ukuntu yahunze azerera ahantu henshi haba ku kagezi haba ku mupfakazi n’ahandi. Iyo umuntu yahuye n’umwuka wa Yezebeli arigunga akumva muri we ari wenyine kandi ari mu bandi.

    3. Ahorana umunaniro atazi impamvu yawo: Ugahora wumva utsikamiwe kandi ntacyo ubuze ukumva uratsikamiwe n’ibintu utazi.

    4. Ibitekerezo n’inzozi ibyinshi biganisha ku busambanyi

    5. Habaho uburwayi bw’igihe kirekire: Ntushobora kumara igihe kinini uri muzima, ahubwo hagenda haza indwara zihinduranya amabara.

    6. Impanuka cyangwa ibyago bitunguranye

    Ibi tubonye ni ibiranga umwuka wa Yezebeli ushobora gutsikamira umuntu watangiye urugendo uri mu nzira y’agakiza.

    Impamvu Imana yatubujije gusambana cyangwa ikaba idutoza kuva munsi y’uwo mwuka wo kwa Yezebeli ni uko izi ko bifite inyungu. Ukwiye gusenga kugira ngo uve munsi y’uwo mwuka. Ikibazo cy’umwuka ntigikemuzwa amafaranga,imiyoborere myiza, ahubwo gikemurwa n’undi mwuka.Nitwuzura Umwuka Wera tuzabasha kugira ubutware bwo kwirukana undi mwuka wose.

    Imana yabujije abantu gusambana kugira ngo itegure ejo hazaza heza h’urushako, iyo umuntu yabaye mu byaha by’ubusambanyi, uwo muntu aba yishe ejo hazaza. Ikindi ni uko Imana ishaka kurinda umubiri wawe, iyo Imana ikubujije kunywa, inzoga, gusambana n’ibindi iba igira ngo urinde umubiri wawe kuko abantu babibamo babaho nabi kandi bagira indwara zitandukanye.

    Ikindi Imana yashakaga kuturinda imitekerereze mibi: Abantu bahorana ipfunwe , bahorana kumva batikunda mbese umuntu ahora yumva ko atuzuye kubera ko yatakaje ubumuntu. Yego Imana yakubabarira ariko bibaye byiza kurutaho wareka kubijyamo.

    Imana yifuza kurinda umuryango, itorero n’igihugu: Mubyukuri iyo abantu bishoye muri izo ngeso batakaza ibintu byinshi harimo n’ubumuntu.

    Muri macye niba hari umwuka wa Yezebeli wagutsikamiye, usenge kugira ngo Imana ikubohore uve munsi y’uwo mwuka ubashe kubaho wumva wigenga udatsikamiwe n’umwuka uwo ari wo wose.

    Video y’iyi nyigisho “Irinde umwuka wa Yezebeli uri gukorera mu matorero” wayisanga hano:

    [email protected]

    Source : https://agakiza.org/Ibintu-6-biranga-umuntu-utsikamiwe-n-umwuka-wa-Yezebeli.html

  • Umuraperi Fireman yagobotswe n'abagiraneza nyuma yo kugaragaza ubuzima bubi yarimo #rwanda #RwOT

    Umuhanzi Fireman wamaze umwaka wose agororerwa Iwawa kubera kwishora mu biyobyabwenge,yarekuwe mu mpera z'umwaka ushize atangira umushinga wo kwiyubaka cyane ko nta muryango agira.

    Fireman wagiye agaragaza ko yasubiye ku murongo ndetse agatera ivi ashaka kurushinga,yahise yongera gukurikiranwa n'inkiko kubera icyaha yashinjwe cyo gukubitira umuntu Iwawa.

    Aganira n'urubuga rwa YouTube ya Yago TV Show, mu byumweru bishize,yavuze ko abayeho mu buzima butari bwiza bitewe nuko Covid-19 yahagaritse ibitaramo kandi ariho yakuraga amaramuko ndetse no kuba akurikiranwe n'inkiko.

    Uyu Muhanzi wakunzwe cyane kubera imyandikire ye yo ku rwego rwo hejuru mu njyana ya Rap yavuze ko abona Imana yaramwibagiwe kubera ibibazo biri kumubaho,asaba abantu kumugoboka.

    Kimwe mu bibazo Fireman yagaragaje ko afite kandi kitamworoheye ni uko akomeje gukurikiranwa ku byaha akekwaho kuba yarakoreye mu Kigo Ngororamuco Cya Iwawa, birimo gukubita no gukomeretsa bagenzi be bari kumwe gusa we arabihakana.

    Ku munsi w'ejo,Umunyamakuru Nyarwaya Yago wa Yago TV Show yasuye umuhanzi Uwimana Francis “Fireman”,amushyikiriza inkunga ya miliyoni 1.5 FRW yahawe n'abafana be ndetse n'abagiraneza bamutekerejeho bagakusanya amafaranga.Uyu munyamakuru yavuze ko aba bagiraneza kandi bamwishyuriye inzuabamo amezi 6 yose.

    Fireman akibona iyi nkunga,yavuze ko yari amaze imyaka 5 atabona amafaranga angana gutya gusa yishimiye umutima yeretswe n'aba bantu.

    N'amarangamutima menshi,Fireman yavuze ko yongeye kubona icyizere nyuma yo guhabwa iyi nkunga igiye kumufasha guhangana n'urubanza rwe ruraza kuba kuri uyu wa Gatatu.

    Nyuma y'ameze abiri avuye IWAWA,Fireman yahise atabwa muri yombi abazwa ku byaha yakekwaho byo gukubita no gukomeretsa, afungirwa muri Gereza ya Gisirikare, aza kurekurwa by'agateganyo muri Mutarama ariko icyorezo cya COVID-19 gihita cyaduka ibitaramo yari yitezeho amakiriro birafungwa kugeza n'ubu.

    Fireman ni umwe mu baraperi bakomeye mu Rwanda rwagize.Yamenyekanye cyane mu itsinda rya Tough Gang ndetse yanakoze indirimbo zakunzwe nka Africa,Mama Rwanda,Bana bato,Nyamijosi,n'izindi.

    Source : http://umuryango.rw/imyidagaduro/umuziki/article/umuraperi-fireman-yagobotswe-n-abagiraneza-nyuma-yo-kugaragaza-ubuzima-bubi

  • Kayonza : Umugore yiyahuye asiga yandikiye umugabo we ko arambiwe kumugora #rwanda #RwOT

    Uyu mugore witwa Redempta, bamusanze yiyahuye mu nzu yabanagamo n’umugabo we ku mugoroba wo kuri uyu wa Kabiri tariki 04 Gicurasi 2021.

    Bikekwa ko uyu mugore yari afite uburwayi bwo mu mutwe kuko yari amaze igihe yivuriza i Ndera mu bitaro bivura indwara zo mu mutwe.

    Umunyamabanga Nshingwabikorwa w’Umusigire w’Umurenge wa Gahini, Ruremire Augustin avuga ko hari ibaruwa uriya mugore yasize yandikiye umugabo we.

    Ngo muri iyi baruwa, yamenyeshaga umugabo we iby’iki cyemezo cyo kwiyahura amubwira n’impamvu ko arambiwe guhora arwaye kandi ko yabonaga ari ukumugora.

    Iyi baruwa yahise ijyanwa n’Urwego rw’Igihugu rw’Ubugenzacyaha rwahise rutangira iperereza ku rupfu rwa nyakwigendera mu gihe umubiri we wahise ujyanwa mu Bitaro bya Gahini.

    Ruremire Augustin yagize ati 'Ni umugore ufite imyaka 29 ahagana saa Moya nibwo yasanzwe mu nzu iwe yimanitse mu mugozi, yabonywe n’umugabo we ubwo yari atashye.'

    Ruremire Augustin avuga ko nyakwigendera asigiye umugabo we umwana umwe w’umukobwa ukiri muto.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Kayonza-Umugore-yiyahuye-asiga-yandikiye-umugabo-we-ko-arambiwe-kumugora

  • Dore uburyo 7 abantu barushyemo, icyakora Yesu niwe buruhukiro bw’ukuri. #rwanda #RwOT

    'Mwese abarushye n’abaremerewe, nimuze munsange ndabaruhura. Mwemere kuba abagaragu banjye munyigireho, kuko ndi umugwaneza kandi noroheje mu mutima, namwe muzabona uburuhukiro mu mitima yanyu, kuko kunkorera kutaruhije, n’umutwaro wanjye utaremereye.'Matayo 11:28-30

    Ahantu honyine nakurangira ukagira uburuhukiro bw’ukuri, ni muri Kristo Yesu: https://www.agakiza.org/Ahantu-honyine-nakurangira-ukagira-uburuhukiro-bw-ukuri-ni-muri-Kristo-Yesu.html

    Uburyo 7 abantu barushyemo

    Kuruhira mu byaha: Hari abantu baruhiye mu byaha wenda mu mubiri baguwe neza, ariko mu mutima bakaba barushye, baruhijwe n’ubusambanyi… , Niba uca inyuma umugore wawe urabizi ko urushye, niba unywa inzoga ukaba uri umusinzi nda bizi ko urushye. Niba uri urubyiruko unywa ibiyobyabwenge no mu busambanyi ndabizi ko urushye. Niba ufite umuntu mu mutima wanze kubabarira( Wanga), ndabizi ko urushye! Kuko iyo ufite umuntu wananiwe kubabarira, muba muhambiranye kuko iyo ugiye muri dushe muba muri kumwe, iyo uryamye muba muri kumwe kuko umutima wawe uba uhambiranye n’uwe.

    Ibyaha biraruhisha, ushobora kuba uguwe neza mu mubiri ariko mu mutima ubizi neza ko urushye. Nubwo wabirenzaho kwisiga neza, gusokoza neza, kwambara neza ukagerageza no kugura umunezero, ugakora ibishoboka byose, umutima wawe urabizi ko urushye. Ahubwo icyo ukwiye kwemera ni ukuza kuri Yesu.

    Kuruhishwa n’ibibazo, ariko umutima uri amahoro: Ibi ni ibiba ku bakristo( Abakiriye Kristo Yesu nk’Umwami n’Umukiza) umutima ukaba uguwe neza kuko ari umukristo ariko umubiri ukaba urushye: Uri imfubyi, uri umupfakazi, ufite amadeni, uruhishijwe nuko ababntu bakwanga, uruhishijwe nuko urugo ruri kukugora. Umutima ukaba uri amahoro, ariko inyuma urushye. Uku ni ukundi kuruha.

    Kuruha imbere n’inyuma: Uku ni ukuba urushye mu mutima, ukaruha n’inyuma, aho bigera umuntu akiyahura. Akavuga ati kuba mu isi ntacyo bimariye nta mpamvu yo kubaho, ukaba uri umunyabyaha ariko ukaba unarushye n’inyuma kubw’ibibazo bitandukanye. Uku nako ni ukuruha kubabaje kuko gushobora gutera umuntu kwiyahura.

    Kuruhira mu murimo w’Imana: Mwari muzi ko no mu murimo w’Imana turushye? Ntabwo Yesu yigeze adusezeranya ko tutazahura n’ibibazo, yaravuze ngo mu isi muri n’imibabaro ahubwo muhumure nanesheje isi. Mu isi kuko irimo ibibazo, hari ubwo dusa naho turuha. Abaheburayo 11 haravuga ngo isi yasaga nk’aho yabataye: Bajyendaga mu mashyamba(mu bihanamanga) bambaye ubusa, bambuwe ibyabo, bakerejwe inkerezo batwikishwa umuriro, babaho ubuzima bumeze gutyo.

    Hari abantu bajya gukorera Imana bazi ngo ni ahantu ho kuruhukira! Yesu ashobora kuturuhura imbere ariko imibabaro ntiyigeze adusinyira ko tutazahura nayo: Umuntu ukubwira ngo muri Yesu nta bibazo uzahura nabyo, azaba akubeshye. Icyo Yesu yadusezeranyije ni ukugira amahoro kandi turi mu biruhije, ni ugukomera kandi turi mu mibabaro. Ni ikintu cy’ingenzi kumenya ko muri Yesu turuhuka mo imbere, ariko ibibazo byo akajya aducira akanzu kugira ngo tubirenge.

    Kuruhishwa n’ibyo wikururiye: Hari igihe umuntu aba afite imiterere yuzuye inarinjye(Logic), hanyuma akaruhishwa n’ibyo yagizemo uruhare (Ibyo yikururiye). Urugero: Ugiye gufata ideni utabanje kuyoboza Imana niba ibyo ugiye gukora ari byo byari bikwiriye, nibihomba ntuzagire ngo Imana niyo yabigizemo uruhare. Birashoboka ko wagiye kurambagiza ugakurikiza iby’inyuma gusa( ibiri mu irari ry’umubiri) ariko utabajije umutima w’uwo ugiye kurambagiza.

    Cyangwa se birashoboka ko wemeye umugabo, ukamwemera uhisemo gukurikiza ibigaragara inyuma ariko utabanje kubaza Imana Nyirimitima ngo umenye umutima w’uwo muntu. Birashoboka ko wishoye mu bintu bikuruhisha ariko Imana itarabigizemo uruhare.

    Kurushywa na Satani: Aturundaho ibibazo n’imiruho (ibyo yakoreye Yobu), agira ngo adukure mu buntu bw’Imana, agira ngo atugushe. Uko kuruha nako abantu baragufite aho Satani azana ibyago, Yohana 10:10 haravuga ngo azanwa no kwica, kwiba no kurimbura, Yesu ni we utanga ubugingo bwinshi.

    Kuruha kw’igihe Imana irimo kudutoza kwihanganira imibabaro: Bibiliya iravuga ngo ni iby’ibyishimo nimugubwa gitumo n’ibibagerageza. Bibiliya igaragaza ko abantu b’Imana batozwa bagaca mu mibabaro atari uko ibanga, ari ukugira ngo bakomere kuko izi ko turi mu isi y’imibabaro. Ikadutoreza kugira umutima ukomeye nk’uwa Yesu(umutima nk’uw’intare), kugira ngo tudatinya ibibonetse byose turi mu ntambara turwana : N’isi, umubiri ndetse na Satani.

    Abefeso 6: 10-18, Haravuga ngo muhagarare mushikamye, mwambaye intwaro zose z’Imana kugira ngo mudatsindwa ku munsi mubi wo kugeragezwa. Ubukristo ni bwiza! Ariko bwuzuye intambara, iyo wiyemeje kuba umukristo uba uri umusirikare ugiye ku rugamba. Rero nta musirikare baha imbunda batamutoje, yarasa bagenzi be bagomba kumutoza: Kwihanganira izuba, imvura, inzara , ijoro no kutaruhuka kugeza igihe azaba uwo bifuza ko aba we.

    Imana ijya itoza abantu bayo Atari uko ibanga, ari ukugira ngo babe uko yifuza. Ukwiye kumenya gutandukanya ibigeragezo biva ku Mana, kuri Satani no ku miterere yawe, ibyo bizagufasha kumenya uko ukwiriye kwitwara, no guhagarara mu gihe gikwiriye.

    'Mwese abarushye n’abaremerewe, nimuze munsange ndabaruhura. Mwemere kuba abagaragu banjye munyigireho, kuko ndi umugwaneza kandi noroheje mu mutima, namwe muzabona uburuhukiro mu mitima yanyu, kuko kunkorera kutaruhije, n’umutwaro wanjye utaremereye.'

    Kubera iki abantu baremerewe, bakaruhira aho bakagombye kuruhukira? Kubera iki abantu baruhiye mu nzu y’Imana, ariho dukwiye kuruhukira? Kuki abantu benshi bakorera Imana bitotomba, bimyoza, bumva batishimye kandi muri Yesu ariho twakagombye gukorera turuhutse(twishimiye kumukorera)?

    Muri Yesu ntituruha, ikirushya ni imigereka twigerekeyeho. Imyumvire yacu, aho dushaka kugera… Reka gushyiraho imigereka wereka abantu ko uri umukiranutsi kuruta abandi, kugira ngo wemeze ababa hafi yawe… Muri Yesu turaruhuka.

    Iyi nyigisho yateguwe, ikanatambutswa na Pasiteri Desire Habyarimana kuri Agakiza Tv wayireba hano

    Source: Agakiza Tv

    [email protected]

    Source : https://agakiza.org/Dore-uburyo-7-abantu-barushyemo-icyakora-Yesu-niwe-buruhukiro-bw-ukuri.html

  • Mageragere: Biyemeje kubakira amacumbi abarimu binubiraga kujya kuhigisha –

    Ku wa 2 Gicurasi 2021, nibwo aba babyeyi bafatanyije n’ubuyobozi bw’Ishuri rya GS Buye n’inshuti batangiye gukusanya amafaranga yo kuzubaka icumbi rya mwarimu mu kubagabanyiriza urugendo bakora bajya kuhigisha. Ni icumbi bivugwa ko rizuzura ritwaye miliyoni 39Frw.

    Muri uyu muhango abarimu ba GS Buye n’ababyeyi ndetse n’inshuti z’iki kigo bakusanyije arenga miliyoni 2 Frw.

    Ababyeyi bemeza ko iri shuri rya Buye riherereye mu Kagari ka Kavumu riri kure ngo ku buryo abarimu baryigishaho usanga amafaranga bahembwa ashirira mu ngendo.

    Nyuma yo kubona urugendo rurerure abarimu bigisha kuri iri shuri bakora, ababyeyi bahisemo gutangiza gahunda yo kububakira icumbi kugira ngo bibaruhure ari nako bizamura ireme ry’uburezi.

    Nzamurambaho Frederic uri mu barimu bigisha kuri iki kigo, yavuze ko urugendo rubavuna kuko bibasaba kubyuka saa kumi za mu gitondo kugira ngo bagere mu kazi ku gihe.

    Ati “Iki kigo giherereye ahantu kure ku musozi ku buryo kuva mu gasantere ka Mageragere no kuhagera harimo ibirometero 10 kandi ikindi nkatwe tuhatuye tuva mu rugo saa Kumi z’ijoro kugira ngo tuhagere kare n’abakoresha moto ku munsi bakoresha 3000Frw.”

    Yakomeje avuga ko “kuba bagiye kububakira icumbi bizabafasha mu ngendo kandi bikanongera ireme ry’uburezi kuko bazajya bahagerera igihe kandi batananiwe.”

    Umuyobozi wungirije wa komite y’ababyeyi barerera kuri iki kigo cya GS Buye, Musabimana Théogène yabwiye IGIHE, ko bahisemo kubaka icumbi rya mwarimu mu korehereza abarimu bigisha muri iki kigo bitewe n’urugendo rurerure bakora.

    Ati “Ubusanzwe abarimu b’aha babyuka saa Kumi za mu gitondo kugira ngo bahagere kare kandi usanga nabwo bahagera bananiwe cyane , mu gitondo twavuga ko baba bagifite ingufu ariko nyuma ya saa Munani bose baba bananiwe ku buryo abana batiga neza. Ikindi hari abarimu boherezwaga n’Akarere ntibongere kugaruka kubera ko ari kure kuko kubona 3000 Frw ya moto biragoye.”

    Umuyobozi wa GS Buye, Niyoyita François yavuze ko yizeye ko icumbi rya mwarimu niryuzura nta mwarimu uzongera kujya yanga gukorera kuri iki kigo.

    Ati “ Nko mu mwaka twaburaga abarimu icyenda kuko wasangaga baza mu minsi mike ntibagaruke kuko ishuri riri kure cyane ariko ubu bwo byaragabanutse ni muri urwo rwego twizeye ko icumbi rya mwarimu niryuzura ibibibazo bizagabanuka.”

    Ikigo cya GS Buye kigamo abanyeshuri 1204 bigishwa n’abarimu 29 barimo batandatu bigisha mu mashuri yisumbuye.

    Abarimu bigisha mu Rwunge rw’amashuri rwa Buye ruri mu Murenge wa Mageragere mu Karere ka Nyarugenge bagiye kubakirwa amacumbi

  • Nyamasheke: Abavumvu bagaragaje inzitizi zigituma umusaruro w’ubuki uba mucye –

    Bimwe muri ibyo bibazo harimo kutabona amahugurwa, kutabona ibikoresho bigezweho no kuba hari imwe mu miti iterwa mu bihingwa ikica inzuki kandi ari zo zibaha ubuki.

    Ntwari Yoweri, umwe mu bagize koperative y’abavumvu ikorera mu murenge wa Kagano, avuga ko kuba umusaruro ukiri muke hari ibyonnyi birya inzuki ndetse n’imiti iterwa mu bihingwa ikica inzuki.

    Ati “Umusaruro uracyari muke ariko ku buryo inzuki zipfa, zifite ibyonnyi byinshi bizirya kandi n’iriya miti batera mu myaka igenda izica ugasanga mu muzinga hasigayemo inzuki nke.”

    Umurisa Vestine yemeza ko muri iyi minsi umusaruro utari mwiza kuko amashyamba asarurwa akiri mato, ndetse bikanaterwa no kutagira ibikoresho bihagije n’ubumenyi bwo gukora umwuga w’ubuvumvu.

    Ati “Nta bikoresho bihagije dufite, amashyamba bayasarura atari yera, kandi kutagira ubumenyi buhagije bituma hari abagikora ubuvumvu mu buryo bwa gakondo. Ibyo byose bibonewe umuti ubuki bwabasha kwiyongera.”

    Ubuyobozi bw’Akarere ka Nyamashek bwatangiye gushaka igisubizo kuri ibi biazo kugira ngo umusaruro w’ubuki ubashe kwiyongera.

    Muri ibyo bisubizo harimo gutanga ibikoresho bya kijyambere, gutanga amahugurwa no gukangurira aborozi b’inzuki gutera indabyo kugira ngo umusaruro urusheho kwiyongera, nk’uko bisobanurwa n’Umuyobozi w’Akarere ka Nyamasheke Wungirije, Ushinzwe Ubukungu, Ntaganira Josue Michael.

    Ati “Intego ni ukugira ngo abantu bumve agaciro k’ubuvumbu, hari ibikoresho bya kijyambere batari bafite, ikindi Akarere kacu gafite amashyamba menshi no gusuzuma ko ubuvumvu buhabereye maze bagende bahashyira imitiba. Dufite gahunda yo gutera indabyo, macadamia, moringa n’ibindi biti byatanga ubuki.”

    Bimwe mu bikoresho byatanzwe n’umuryango wa World Vision bifite agaciro ka miliyoni 10 Frw ariko buri koperative ikazishyura 30% y’ibikoresho yahawe guhera mu mwaka wa 2022 kugeza muri 2023.

    Mu karere ka Nyamasheke hari amakoperative 14 akora umwuga w’ubuvumvu mu mashyamba atandukanye arimo n’ishyamba rya Nyungwe. Umwaka ushize, umusaruro w’aka karere mu buki wari toni 19.

    Aborozi b’inzuki barasabwa ubufasha mu kuzamura umusaruro w’inzuki zabo