Author: webrwanda

Nyiragongo yarutse mu ijoro ryacyeye mbere yo gucogora mu rukerera rwo kuri iki Cyumweru, tariki ya 23 Gicurasi 2021. Iruka rikomeye ry'iki kirunga ryaherukaga ku wa 17 Mutarama 2002.

Nyuma yo kuruka kwa Nyiragongo, mu Mujyi wa Goma muri Repubulika Iharanira Demokarasi ya Congo no mu wa Rubavu mu Rwanda hari kumvikana imitingito ya buri kanya.

Umunyamakuru wa IGIHE yanyuze mu bice bitandukanye bya Rubavu ndetse yageze muri Centre ya Buhuru mu Kagari ka Byahi mu Murenge wa Rubavu asanga abaturage bamwe bari hanze birinda izo ngaruka.

Nyiramugisha Costasie yavuze ko bategereje ko umutingito ugabanya umurindi bakajya basubira mu nzu.

Ati 'Ntiturabigirira icyizere. Turi gucungana no kureba ko abana batatujya kure. Tubonye bicogoye ni yo mahirwe twaba dufite. Ntabwo waruhuka umutingito uhari.''

Iradukunda Aaron we yavuze ko abantu bagifite igihunga ko ikirunga cyakongera kuruka.

Ati 'Mu gihe imitingito itari yatuza, ubu abaturage bazongera kuryama batekanye mu gihe yahagaze, nta gihunga cy'uko ikirunga cyakongera kuruka. Ubuyobozi bwategura aho abaturage bahungira mu gihe byakomera.''

Mu butumwa bw'ubuyobozi bw'Akarere ka Rubavu, bwasabye abaturage gutuza bagakomeza no gutegereza amakuru yose ajyanye n'iruka ry'Ikirunga cya Nyiragongo.

Umuyobozi w'Akarere ka Rubavu, Habyarimana Gilbert, yahumurije abaturage, abasaba kudakuka umutima ariko bagakurikirana uko imitingito imeze.

Yagize ati 'Imitingito irahari kandi ni myinshi. Icyo turi gusaba abaturage ni ugukurikiranira hanze y'inzu kugira ngo haramutse habayeho ibyago ku buryo inzu yagwa itabagwira.''

Yavuze ko hakiri gukorwa ibarura ngo hamenyekane umubare w'inzu zasenyutse.

Yakomeje ati 'Hari amakuru yihuse twabonye ko hari inzu ebyiri zasenyutse. Ushobora gusanga hari izindi. Turasaba abaturage gukomeza gucungira hafi kuko imitingito iri hejuru.''

Nyuma y'iruka rya Nyiragongo, amahindure yahagarariye mu bilometero bitandatu ageze ahitwa Buhene i Kihisi. Umujyi wa Goma uri mu bilometero 20 uvuye ahari Ikirunga cya Nyiragongo.

Wasangaga ahenshi ikirere cy'Umujyi wa Goma cyahinduye ibara kubera umuriro w'iki kirunga ndetse n'imyotsi yakwiriye hose. Abanye-Congo bari hagati y'ibihumbi umunani n'icumi bari bahungiye mu Rwanda ku wa Gatandatu bitewe n'iruka ry'Ikirunga cya Nyiragongo batangiye gusubira mu gihugu cyabo kuri iki Cyumweru.

Nubwo Nyiragongo isa n'iyacogoye, Umushakashatsi mu by'Ibirunga, Dr Dyrckx Dushime, yabwiye IGIHE ko umuntu atabiheraho ngo yanzure ko itaribwongere kuruka ngo kuko mu gihe haba hakomeje kuba imitingito isaha n'isaha iki kirunga cyakongera kikaruka.

Yavuze ko kuva mu 2010 ibikoma bishyushye (Magma) byuzuye mu nda y'iki kirunga ku buryo icyo kiba kibura gusa ari imbarutso yatuma kiruka.

Mu bimaze kumenyekana byangijwe na Nyiragongo harimo hegitari eshatu zakorerwagaho imirimo y'ubuhinzi mu Karere ka Rubavu.

Abaturage bo mu Karere ka Rubavu basabwe kuba maso kubera imitingito yatangiye gusenya inzu

Bamwe bicaye hanze mu kwirinda ingaruka bashobora guhurira na zo mu nzu

Imitingito myinshi ikomeje kumvikana mu Karere ka Rubavu nyuma y’iruka rya Nyiragongo

Mu ijoro ryo ku wa Gatandatu, tariki ya 22 Gicurasi 2021 ni bwo Abanye-Congo bari hagati y'ibihumbi umunani n'icumi bahungiye mu Rwanda bitewe n'iruka ry'Ikirunga cya Nyiragongo.

Muri aba bahunze bakiza amagara yabo harimo ababyeyi babiri, umwe yambukiye mu Kibaya gihuza u Rwanda na Repubulika Iharanira Demokarasi ya Congo kiri mu Murenge wa Busasamana n'agace gato ka Cyanzarwe mu Karere ka Rubavu.

Muri iyi nzira ni ho uyu mubyeyi witwa Mawazo Devotha yabyariye ubwo yari ageze mu Kibaya kiri mu Busasamana.

Uyu mugore wa Mfitumukiza Rukera, yahunze avuye mu gace ka Munigi muri Goma.

Kimwe n'abandi binjiriye mu tundi duce tutari ku mipaka, yakiriwe n'umuryango utuye mu Mudugudu wa Nyarubuye, Akagari ka Gacurabwenge mu Murenge wa Busasamana.

Akihagera kuko yari amaze kwibaruka, uwo muryango wamushakiye umuganga umuha ubutabazi bw'ibanze.

Umunyamakuru wa IGIHE ukorera i Rubavu yamenye ko uyu mubyeyi ari kwitabwaho kandi ameze neza.

Nyuma yo kubona uko yakiriwe neza mu Rwanda, Mawazo Devotha, yabwiye RBA ko yahaye umwana we izina ry'Ikinyarwanda.

Yagize ati 'Umwana wanjye mwise Umutoni kuko namubyariye mu Murenge wa Busasamana no kubera uko nshima uko nafashijwe n'Abanyarwanda.'

Mu Banye-Congo bari bahungiye mu Rwanda harimo n'undi mubyeyi wageze i Gisenyi afite umwana wavutse atarageza igihe cy'ubukure.

Umuyobozi w'Akarere ka Rubavu wungirije ushinzwe Imibereho Myiza, Ishimwe Pacifique, yabwiye IGIHE ko kuri site yariho ya Nyarubande hari abantu icyenda bajyanywe kwa muganga kugira ngo bitabweho.

Yagize ati 'Dufite abantu icyenda mu bitaro, abandi basubiyeyo. Hari abo [mu bari mu bitaro] dushobora gusigarana iminsi mikeya. Harimo nk'umugore wabyaye umwana utagejeje igihe, ari kwitabwaho ahashyirwa muri [neonatology]. Ntabwo wahita umusohora, dushobora kumusigarana iminsi mike.''

Uyu mubyeyi yavuye muri Congo afite uwo mwana bikekwa ko yari amaze iminsi avuye mu bitaro kwibaruka.

Kuri Site ya Nyarubande n'iya Busasamana hose hari hacumbikiwe Abanye-Congo bahunze iruka ry'Ikirunga cya Nyiragongo bamaze gusubizwa mu gihugu cyabo. By'umwihariko i Nyarubande mu gitondo cyo kuri iki Cyumweru hari abantu 58.

Mawazo Devotha yabyaye ageze mu kibaya gihuza u Rwanda na Repubulika Iharanira Demokarasi ya Congo

Ababyeyi bafite n’abana bato bari mu bahungiye mu Karere ka Rubavu nyuma y’iruka ry’Ikirunga cya Nyiragongo

Ababyeyi bahungiye mu Rwanda n’abana babo bahawe amandazi n’icyayi nk’ifunguro rya mu gitondo

Ni umukino wabereye mu karere ka Muhanga kuri iki cyumweru tariki 23 Gicurasi 2021, As Kigali yinjira mu mukino ishaka intsinzi ya mbere mu myaka 6 ishize idatsinda Rayon Sports yayakiriye.

Abakinnyi 11 As Kigali yakiriye yabanjemo 

Mu izamu harimo Ndayishimiye Eric, mu yindi myanya harimo: Rugirayabo Hassan, Ishimwe Christian, Kwizera Pierrot, Benedata Janvier, Bayisenge Emery, Nsabimana Eric, Abubakar Lawar, Hussain Tshabalala, Karera Hassan ndetse na Hakizimana Muhdjiri.

Umukino watangiye amakipe yombi yatakana ku ruhande rwa Rayon Sports Ruvumbu ubona ko ariwe mukinnyi ukanganye ndetse wari ufite umuvuduko mwinshi cyane. 

Abakinnyi Rayon Sports yabanjemo: Bashunga, Eto, Clement, Emmanuel, Samuel, Imran, Jean Vital Nishimwe Blaise Luvumbu, Gilbert ndetse na Dagnogo.

Igitego cya mbere cyabonetse ku munota 34 gitsinzwe na Hakizimana Muhdjiri ku ishoti ryiza cyane yatereye mu kibuga hagati, Bashunga ntiyamenya uko bigenze.

Ku munota wa 38 Luvumbu na we yateye ishoti ari mu kibuga hagati umupira Bakame awushyira muri Koroneri, bituma igice cya mbere kirangira ari igitego 1 cya As Kigali ku busa bwa Rayon Sports.

Igice cya 2 cyatangiye As Kigali ifite imbaraga nyinshi cyane kuko ku munota wa 48 Hussein Tshabalala yatsinze igitego cya 2 cyahise gishyira mu bihe bibi ikipe ya Rayon Sports.

Rayon Sports nayo yagerageje gushaka igitego ariko icyuho cya Sugira na Mutatu cyiguma kwigaragaza.

Rayon Sports yakoze impinduka, Imran na Dagnogo bavamo hinjira Niyonkuru na Prince ikipe itangira gukora ariko igitego kiba ibamba. Ku munota wa 81 Rayon Sports yabonye igitego cya mbere ku burangare bwa Emery, Karera Prince acenga umuzamu atsinda igitego cyiza cyane.

Rayon Sports yakomeje kwataka ndetse iniharira umukino ariko aka bukuru karanga. ku munota wa  92, Biramahire Abeddy wari winjiyemo asimbuye Lawar, atsinda igitego cya Gatatu ku mupira yarahawe na Muhadjiri. Umukino wahise urangira ari ibitego 3 kuri kimwe cya Rayon Sports.

Mu gitondo cyo kuri uyu wa Gatandatu tariki 23 Gicurasi nibwo muri Lemigo Hotel hateraniye inama y’Inteko Rusange idasanzwe ya FERWAFA .

Ku murongo w’ibyigirwaga muri iyi nama harimo kwemera ubwegura bw’uwahoze ari perezida w’ishyirahamwe ry’umupira w’amaguru mu Rwanda (FERWAFA) bwana Rtd Brig Gen Sekamana Jean Damascène.

Ikindi cyari ku murongo w’ibyigwa Ni ukwemeza igihe nyacyo amatora ya komite shya azaberaho. 

Bidatinze komite  y’inzibacyuho iyobowe na Habyarimana Marcel  yameje ubwegure bwa Rtd Brig Gen Sekamana Jean Damascène, ndetse bameneza ko amatora ya komite shya azaba tariki 27 Kamena 2021.

Mu mwezi gutaha inzu ya FERWAFA iraba yicayemo komite nshya

Ikindi cyabereye muri iy’inama, ni abakomiseri bagera kuri 5 nabo beguye ku mirimo yabo ndetse n’ubwegure bwabo buremerwa.

Abakomiseri 5 beguye barimo Ruhamiriza Eric warushinzwe amarushanwa, Nshimiyimana Alexis Redemptus wari ushinzwe iterambere ry’umupira, Dr Hakizimana Moussa warushinzwe ubuvuzi, uwari ushinzwe umutekano Ntakirutimana Diane, ndetse na Mukangoboka wari ushinzwe iterambere ry’umupira w’abagore.

Komite icyuye igihe yari yaratowe tariki 31 Werurwe 2018 Rtd Brig Gen Sekamana icyo gihe akaba yarasimbuye Vincent De Gaulle, ariko na we yegura tariki 14 Mata 2021 avugako atabasha gufatanya inshingano n’akazi ke kaburi munsi karimo kwita ku muryango we.