Mu Karere ka Rusizi mu Murenge wa Bweyeye, mu Mudugudu wa Rwamisave, niho haraye habereye imirwano yatewe n'abarwanyi ba FLN bateye baturutse mu Burundi ingabo z'u Rwanda zikabasubizayo ndetse babiri muri bo zikabica.
Mu itangazo ryashyizwe hanze n'Igisirikare cy'u Rwanda rivuga ko izi nyeshyamba zitwikiriye ijoro hagati ya saa tatu na 15 na saa tatu na 35 zinjira mu Rwanda ariko zisanga zatezwe agatego na RDF iziha isomo zisubira mu birindiro byazo i Burundi.
Itangazo rigira riti “
Mu ijoro ryakeye ku cyumweru tariki ya 23 Gicurasi 2021 hagati ya 21h15 na 21h35, abarwanyi ba FLN baturutse i Giturashyamba muri komini ya Mabayi mu Burundi, bambutse uruzi Ruhwa ku mupaka wacu maze binjira muri metero 100 imbere ku butaka bw'u Rwanda mu gace ka Bweyeye,akagari ka Nyamuzi, umudugudu wa Rwamisave.
Abanzi bahagaritswe n'umutego w'ingabo z'u Rwanda (RDF); abantu 2 mu bagabye igitero bahise bicwa, n'ibikoresho byabo byafashwe birimo imbunda imwe yo mu bwoko bwa submachine gun, Magazine 7 (7), grenade imwe (1), antenne imwe ya radiyo ya Motorola n'imyenda 2 y'igisirikare cy'Uburundi.
Abateye basubiye mu ishyamba rya Kibira mu Burundi bambutse Uruzi Ruhwa rutandukanya akarere ka Ruhororo muri komini ya Mabayi mu Burundi n'umurenge wa Bweyeye mu Rwanda basubira mu ishyamba rya Kibira aho bafite ibirindiro.
Si ubwa mbere ingabo z'u Rwanda zihangamuye inyeshyamba zishaka gutera u Rwanda kuko mu rukerera rwo kuwa 27 Kamena, abitwaje intwaro baturutse i Burundi babarirwa mu 100 bateye ibirindiro by'Ingabo z'u Rwanda bakubitwa inshuro basubirayo ndetse n'ibikoresho byabo birafatirwa.
Icyo gihe,uwari umuvugizi w'ingabo z'u Rwanda, Lt Col Innocent Munyengango, yavuze ko abasirikare b'u Rwanda bahanganye n'abateye, bakabatsinsura “bagasubira i Burundi”.
Lt Col Innocent Munyengango yagize ati “Abitwaje imbunda bateye baturutse i Burundi kandi banahunze berekeza muri icyo cyerekezo basize bane mu babo bapfuye n'ibikoresho bya gisirikare bitandukanye birimo intwaro n'ibyombo [by'itumanaho mu gisirikare]”.
Ku Cyumweru tariki 28 Gashyantare uyu mwaka, Ingabo z'u Rwanda n'iz'u Burundi zakozanyijeho mu mirwano yabereye hafi y'umupaka w'ibihugu byombi ariko iza guhosha nyuma y'akanya gato.
Icyo gihe ngo Ingabo z'u Rwanda zari ziri gushushubikana abarwanyi ba FDLR n'aba FLN baba hafi aho mu ishyamba rya Kibira, bakunze kugaba ibitero mu Majyepfo y'u Rwanda mu minsi yashize.
Abo barwanyi ngo bari barenze umusozi wa Marura binjira mu Rwanda mu Ishyamba rya Nyungwe, ako kanya Ingabo z'u Rwanda zibasubiza inyuma.
Muri uko kubasubiza inyuma, ngo Abasirikare b'u Rwanda bageze ku musozi wa Twinyoni aho Ingabo z'u Burundi nazo zahise zitangira kubarasaho. Iki kinyamakuru cyavuze ko umwe mu basirikare b'u Burundi yavuze ko habayeho imirwano y'akanya gato hagati y'Abasikare b'u Rwanda bo muri Batayo ya 221 n'iya 411 mu Ngabo z'u Burundi.
Bivugwa ko ubuyobozi bw'u Burundi bwahise bwohereza muri ako gace Ingabo zo muri Batayo ya 60 n'iya 61 zari hafi aho mu Ntara ya Cibitoke mu myiteguro yo kujya mu Butumwa bw'Amahoro bwa Amisom muri Somalia.
Abatuye aka kagari gaherereye muri umwe mu Mirenge y’icyaro iri mu Ntara y’Amagepfo ndetse n’ubuyobozi bwako bemeza ko icyabibafashijemo ari gahunda bise 'Mbikore kare ngereyo ntavunitse’.
Murekatete Felicite, atuye mu Mudugudu wa Kubitiro, Akagari ka Muhambara, asobanura Mbikorekare ngereyo ntavunitse nk’ikimina cya mitiweri aho abaturage batanga amafaranga make make. Uko bikorwa buri rugo rufata umusanzu wa mitiweri rusabwa kwishyura mu mwaka bitewe n’umubare w’abarugize rukayagabanyamo inshuro 10 buri kwezi rukajya rwishyura make make.
Murekatete avuga ko ubu buryo bworohereza abaturage gutanga umusanzu wa mitiweri de santé ati 'Utunguye umuturage ukamubwira uti mpa ibihumbi 21 biragoye kubibona'.
Umunyamabanga Nshingwabikorwa w’Akagari ka Muhambara, Muhimpundu Immaculee avuga ko 'Mbikorekare ngereyeyo ntavunitse’ ari igitekerezo cyazanywe n’umuturage agisangije umuyobozi w’Umudugudu aragishima bagishyira mu bikorwa mu Mudugudu wabo babona bitanze umusaruro mwiza.
Bahise biyemeza no kubikora ku rwego rw’Akagari babona naho gitanze umusaruro ubu barateganya ku gishyira mu bikorwa ku rwego rw’Umurenge wa Cyahinda wose.
Buri muyobozi w’Umudugudu afite ikayi yandikamo buri kwezi umusanzu wa mitiweri buri rugo rwatanze. Amezi 10 yashira buri rugo rugahabwa amafaranga rwizigamye rukajya kwishyura. Magingo aya buri rugo rwishyura mitiweri rufite inyemezwabwishyu yerekana ko rwamaze kwishyura umusanzu wa mitiweri w’umwaka utaha wa 2021/2022.
Muhimpundu avuga ko kimwe mu bituma iyi gahunda ya mbikore kare ngereyo ntavunitse ishoboka ari uko we n’abaturage ayoboye bumvikana.
Ati 'Irindi banga ni ukuba abaturage bo muri kano kagari banyumva reka mbivuge gutyo. Icyo dusezeranye tukagikora. Niba ankeneyeho serivise ndayimuha kandi ku gihe. Niba rero umuturage umuha serivise kandi ku gihe bivuze ngo nawe icyo uzamukeneraho azagikora kandi atakugoye.'
Akomeza agira ati 'Mu kazi nkora singira umunsi wo gukora n’uwo kuruhuka. Umuturage aramutse angezeho atari umunsi w’akazi kumwirukana mubwira ngo uyu munsi si umunsi w’akazi, ni konje ngenda uzaze undi munsi kuri njye kirazira. Mutega amatwi n’iyo nsanze ari ikizakorwa mu minsi y’akazi mubwira umunsi azaziraho ariko namuteze amatwi. Umuturage kuko azi yuko iyo ankeneye ambona nanjye iyo mukeneye ndamubona.'
Mu gihe abatuye Muhambara bishimira ko bishyura mitiweri bose kandi ku gihe hari bamwe mu bayobozi bakoresha imbaraga z’umurengera mu kwishyuza abaturage uyu musanzu bagahutaza abaturage. Hari aho usanga babuza abaturage kwinjira mu masoko, hari n’abatwara amatungo y’abaturage bakayagurisha ku ngufu bagakuramo umusanzu wa mitiweri.
Umuyobozi w’Agateganyo w’Akarere ka Nyaruguru, Gashema Janvier avuga ko atari ubwa mbere aka kagari ka Muhambara kagiye kugera mu mwaka wa mitiweri abaturage bako bose bararangije kwishyura umusanzu. Ati 'Dusanzwe tugira imirenge yishyura mitiweri 100% ubushize twagize nka Cyahinda na Mata n’aka kagari ka Muhambara kari kishyuye 100% ariko ubudasa bwako ni uko twinjira mu mwaka wa mitiweri abaturage bako bose bararangije kwishyura 100%.'
Abatuye aka kagari bavuga ko bibatera ishema kwiyumva mu itangazamakuru ko bishyuye mitiweri 100%. Gusa si abaturage gusa bavuga ko bibatera ishema kuko n’umuyobozi w’akarere nawe avuga ko ari ishema ku karere.
Gashema ati 'Turabashima. Bafite agashya kitwa ngo 'Mbikore kare ngereyo ntavunitse’ icyo dusaba rero abandi mu tundi tugari no muyindi mirenge ni uko bakwegera abaturage bagafata bagashaka udushya tubafasha kugera ku muhigo wa mitiweri batavunitse nk’uko Muhambara ibivuga'
Gashema avuga ko atari mu bipimo bya mitiweri byonyine Muhambara iza imbere kuko ngo no mu zindi gahunda nka Ejo Heza nabwo Muhambara iza imbere.
Mu gihe cya Jenoside yakorewe Abatutsi mu 1994, uyu mugezi ufite amateka y’uko wajugumywemo Abatutsi bishwe abandi bajugunywamo ari bazima. Bamwe mu bafite ababo bajugunywe muri uwo mugezi baganiriye na IGIHE, basanga hakwiriye kujya urwibutso rugaragaza amateka y’ibyahabereye.
Nsabimana Joseph avuga mu gihe cya Jenoside, interahamwe zafashe Abatutsi zirababoha, zibajyana ku nkombe y’umugezi maze zirabatemagura zibajugunyamo.
Yagize ati “Ahantu babajugunye ni mu isumo ry’Umugezi wa Rusizi, abavuye iwacu bari muri abo ni Abatutsi 20, hari n’abandi bavanywe i Nyamagana. Abantu bose babamanuraga bababoshye bakabatemagura, bakabajugunya bamwe batarapfa, ari bazima.”
Yakomeje agira ati “Mu myaka iri mbere abantu ntibazajya bamenya icyahabereye, urumva hashyizwe urwibutso hakajyaho amazina ya bamwe byafasha kubera ko ni ahantu babajugunye, abantu bakajya bamenya ko hano bahajugunye abantu.”
Akimana Joseph warokokeye mu Murenge wa Nyakarenzo, avuga ko afite abavandimwe n’abandi bo mu muryango we biciwe ku nkombe z’uwo mugezi, agasaba ko hashyirwa urwibutso kugira ngo amateka yahabereye abakiri bato bayamenye.
Ati “Hari aho bari bihishe babakurayo barabakubita, bababoha amaboko, babajyana ku cyambu cya Nyungu ku Mugezi wa Rusizi babajugunyamo. Bahashyize ‘monument’ (ikimenyetso cy’urwibutso), byaba ari ukugaragaza amateka y’abahaguye bigatuma abana bamenya ayo mateka, bikunganira ubuhamya buvuzwe.”
Ubuyobozi bw’Akarere ka Rusizi buvuga ko buri guteganya gushyira ahantu hose urwibutso (monuments) ahantu hose hari amateka ya Jenoside yakorewe Abatutsi mu 1994.
Umuyobozi w’Akarere ka Rusizi, Kayumba Ephrem, yagize ati “Turabiteganya kuzashyira za ‘monuments’ ahantu hatandukanye hari amateka ya Jenoside yakorewe Abatutsi. Turacyari mu igenamigambi, ariko byashyizwe mu bikorwa by’ingenzi.”
Umugezi wa Rusizi usohoka mu Kiyaga cya Kivu, ugahuza u Rwanda na Repubulika Iharanira Demokarasi ya Congo, ukaba ukora ku mirenge itandatu y’Akarere ka Rusizi.
Abafite ababo baguye mu Mugezi wa Rusizi barasaba ko hashyirwaho urwibutso rwerekana amateka y’ibyahabereye mu gihe cya Jenoside yakorewe Abatutsi mu 1994
Aya mahugurwa y’ibyumweru bibiri yatangijwe kuri uyu wa Mbere tariki ya 24 Gicurasi 2021, ari kubera mu Ishuri rya RCS rya Nsinda. Yitabiriwe n’abofisiye 20 barimo abagabo 12 n’abagore umunani akaba agamije guhugura abazajya bahugura abitegura kujya mu butumwa bw’amahoro hirya no hino ku Isi.
Aya mahugurwa RCS iri kuyahabwa n’Ikigo cy’Umuryango w’Abibumbye gishinzwe amahugurwa n’Ubushakashatsi (UNITAR).
Umuyobozi w’Ishami rishinzwe Imikorere n’Imikoranire n’izindi nzego n’ibikorwa byo kubungabunga amahoro muri RCS, SP Mugisha Alex, yavuze ko aya mahugurwa bayitezeho kongerera ubumenyi abofisiye babo ku buryo bajya no guhugura ku rwego mpuzamahanga.
Ati “Ni igikorwa twari tumaze igihe kinini dutegereje, kijyanye n’amahugurwa y’abazahugura abandi ku bw’umwihariko mu bijyanye no kugarura amahoro ku Isi, abari hano bazigisha abandi mu bikorwa bitandukanye dusabwa kuzuza mbere y’uko twohereza abakozi bacu hirya no hino ku Isi kubungabunga amahoro.”
Yakomeje avuga ko kuba bagiranye ubufatanye na UNITAR bifite inyungu nyinshi ku gihugu aho nibura abofisiye ba RCS bazajya bifashishwa mu kujya guhugura abandi bo mu bindi bihugu.
SP Mugisha yakomeje avuga ko n’abaturuka mu Rwanda bagiye kubungabunga amahoro bazajya bajyayo bahawe amasomo ari ku rwego mpuzamahanga.
Ati “Ubundi wasangaga tubyikorera ku rwego rwacu ariko ubu kuba tubonye ubunararibonye bw’iri shami rya Loni ruje kudufasha bwa bumenyi twari dusanganywe bugiye kwiyongera tugire n’abarimu bari ku rwego mpuzamahanga bazajya bajya kwigisha n’ahandi hatandukanye ku Isi.”
Umujyanama Mukuru mu Kigo cy’Umuryango w’Abibumbye gishinzwe Amahugurwa n’Ubushakashatsi, UNITAR, Colbert Kadihira, yavuze ko mu nshingano bafite harimo guhugura ibihugu bitandukanye biba bifite abakozi bari kubungabunga amahoro ku Isi.
Yavuze ko bifuza ko abajya kubungabunga amahoro baba bakeneye guhabwa amasomo amwe akaba ari nayo mpamvu bifuza kwagura ababahugura mu rwego rwo gufasha ibihugu gutanga amasomo ari ku rwego mpuzamahanga.
Ati “Mu Rwanda bizafasha kujya batanga amasomo ari ku rwego mpuzamahanga kandi binatume rugira abakozi bashobora kwifashishwa mu guhugura abandi no mu bindi bihugu.”
Umuyobozi w’Ishuri rya RCS Nsinda, CP Wakubirwa Eduard, yasabye abofisiye bari guhugurwa kugira indangagaciro bagakurikirana amasomo bahabwa kugira ngo bazabashe kwigisha abandi mu buryo bwa kinyamwuga, yabibukije ko ari bo ba mbere bagiye guhabwa aya masomo abasaba kuyitaho cyane.
Kuva mu mwaka wa 2010 RCS imaze kohereza mu bikorwa byo kugarura amahoro hirya no hino ku Isi abacungagereza 136, bakaba bamaze kujya mu bihugu birimo Haiti, Côte d’Ivoire, Liberia, Centrafrique, Sudani y’Amajyepfo n’ahandi.
Abofisiye 20 ba RCS ni bo bari guhabwa amahugurwa y’ibyumweru bibiri
Aya mahugurwa azabafasha kugira ubumenyi bubafasha guhugura abagiye koherezwa mu butumwa mu mahanga
Umujyanama Mukuru muri UNITAR, Colbert Kadihira, yavuze ko guhugura abofisiye ba RCS bizatuma bashobora no kwifashishwa mu bindi bihugu
Shampiyona yari yakomeje hakinwa imikino 3 y’umunsi wa mbere wa playoffs yari isigaye.
Nyuma y’uko harangiye imikino y’amatsinda, amakipe 8 arahatanira igikombe mu gihe andi 8 arwana no kutamanuka.
Ku munsi w’ejo hari habaye imikino 4 harimo 2 y’amakipe ahatanira igikombe n’ibiri y’amakipe arwana no kutamanuka.
Undi mukino wagombaga guhuza Marines na Rutsiro mu cyiciro cy’amakipe ahatanira igikombe waje gusubikwa.
Uyu munsi shampiyona yari yakomeje aho mu cyiciro cy’amakipe ahatanira igikombe, Bugesera FC yari yakiriye Police FC maze umukino urangira ku ntsinzi ya Bugesera FC y’ibitego 2-1.
Mu cyiciro cy’amakipe ahatana no kutamanuka, AS Muhanga yari yakiriye Kiyovu Sports kuri Stade Muhanga.
Uyu mukino waje kurangira ku ntsinzi ya Kiyovu Sports y’ibitego 2-0.
I Huye, Mukura VS yari yakiriye Sunrise FC. Mukura VS yatangiye umukino ubona iri hejuru cyane ndetse inasatira bikomeye.
Byaje kubaha igitego ku munota wa 13 gitsinzwe na Nyarugabo Moise ku mupira yari ahawe na Marc Govin.
Kuva kuri uyu munota Sunrise yagarutse mu mukino irasatira cyane ariko igice cya mbere kirangira ari 1-0.
Mu gice cya kabiri n’ubundi Sunrise FC yagitangiye isatira cyane, umutoza Basena akora impinduka zitandukanye Mpozembizi Mohammed aha umwanya Kavatiri, Byinshi Daniel nawe asimbura Majanjaro Suleiman.
Izi mpinduka zafashije Sunrise FC maze ku munota wa 65 Yafesi Mubiru yishyura Sunrise ku mupira yari ahawe na Byinshi Daniel.
Sunrise FC yabonye n’andi mahirwe ariko Byinshi na Mubiru kuyabyaza umusaruro biranga neza. Umukino warangiye ari 1-1.
Imikino yabaye ejo
Imikino y’amakipe ahatanira igikombe uko yagenze
APR FC 1-0 Espoir FC AS KIgali 3-1 Rayon Sports
Amakipe arwana no kutamanuka
Gorilla FC 4-2 Etincelles Gasogi United 4-1 Musanze FC
Ku wa Gatandatu tariki ya 22 Gicurasi 2021, nyuma y'inkuru y'urukundo yatangiye muri 2017, Meddy n'umunya-Etiyopiyakozi Mimi biyemeje kubana akamaramata.
Nyuma y'ubu bukwe, abinyujije ku rukuta rwe rwa Instagram, Mimi yagize ati“nzahora iteka nkufashe amaboko”. Ubu bukwe bwabereye muri Leta Zunze Ubumwe z'Amerika mu Mujyi wa Dallas aho Meddy asanzwe atuye.
Ubukwe bwa Meddy bwabimburiwe no gusezerana imbere y'amategeko nyuma hakurikiraho kwiyakira no kwishimira iyi ntambwe Meddy n'umukunzi we bateye.
Ubu bukwe bwagaragayemo abanyamuziki benshi barimo King James umaze iminsi mike yerekeje muri Leta Zunze Ubumwe z'Amerika, K8 Kavuyo, Emmy, Adrien Misigaro, The Ben, Shaffy, n'abandi. Ibirori by'ubukwe bwa Meddy byaranzwe no kuririmba indirimbo zitandukanye haba ize, ndetse n'iz'abandi bahanzi bari bagiye kumushyigikira.
Byitezwe ko nyuma y'ubu bukwe abageni bazajya kwiyerekana mu miryango yabo, mu Rwanda na Ethiopia.
Urukundo rwa Meddy na Mimi Mehfira rwatangiye kuvugwa cyane mu mpera z'umwaka wa 2017. Mu ntangiro za 2018 nabwo bizihizanyije iminsi mikuru ya Noheri n'ubunani. Byaje gusakara kandi ubwo bombi bajyanaga mu biruhuko muri Mexique bihumira ku mirari ku wa 7 Kanama 2018, ubwo uyu mukobwa yifurizaga Meddy isabukuru akavuga ko yamwihebeye.
Kuwa Gatanu tariki 19 Ukuboza 2020,ku mbuga nkoranyambaga hakwiriye amashusho uyu musore aca bugufi ashyira ivi hasi agasaba uyu mukobwa ko yazamubera umugore, undi nawe nta kuzuyaza yahise yikiriza ati “Yego” atega urutoki Meddy arushyiramo impeta.
Kuwa 24 Ukuboza 2018 nibwo Meddy yaje mu Rwanda gutegura ikirori cya The East African Party azana n'uyu mukunzi we.
Akigera ku kibuga cy'indege i Kanombe, Meddy yabwiye itangazamakuru ko impamvu yazanye n'umukunzi we Mimi Mehfira mu Rwanda ari ukugira ngo amwereke ababyeyi n'inshuti ariko ko iby'ubukwe batari babipanga. Miss Grace Bahati wari witabiriye ubu bukwe afata ifoto n'umugore wa Meddy Mimi Mehfira
Mu bikorwa Minisitiri Gatabazi yasuye harimo inzu n’imihanda byangijwe n’imitingito mu Mujyi wa Rubavu. Yanasuye kandi imirima yangiritse mu Mirenge ya Rubavu na Cyanzarwe ndetse anahumuriza abaturage bahatuye n’abari bahafite ibikorwa by’ubuhinzi.
Yavuze ko abaturage bari mu bibazo bakwiye kumva ko “Ubuyobozi bw’igihugu buzirikana ibihe bikomeye barimo, kandi hari inzego zirimo gukurikirana kugira ngo ntihagire umuturage ujya mu kaga.”
Minisitiri Gatabazi yavuze ko bazakomeza gukurikirana imikorere y’Ikirunga kuko ubundi bisaba iminsi irindwi kugira ngo byemezwe ko cyarangije kuruka.
Ku bijyanye n’imitingito ikomeje kumvikana, Minisitiri Gatabazi, yavuze ko n’ubwo hari imitingito hirya no hino mu Rwanda, ukiri hasi muri rusange n’ubwo wangije ibikorwa birimo umuhanda ndetse n’inzu z’abaturage.
Uyu muyobozi yavuze ko nk’inzego z’ibanze bagiye kwimura inzu 40 bigaragara ko zangiritse ku buryo bushobora gushyira ubuzima bw’abazituyemo mu kaga.
Minisitiri Gatabazi yavuze ko hamaze gushyirwaho Akanama kari gukurikirana ibibazo ndetse kakaba ari ko kazajya gatanga amakuru y’ibyo abaturage bakwiye gukurikiza.
Yakomeje ati “Twashyizeho site abaturage bashobora kuba bajyaho haramutse habayeho irindi ruka.”
Minisitiri Gatabazi kandi yavuze ko bamaze gutegura ahantu bashobora gushyira abaturage b’Akarere ka Rubavu mu gihe byaba bibaye ngombwa ko bimurwa.
Ku bijyanye n’abaturage bangirijwe imirima, Minisitiri Gatabazi yavuze ko ubuyobozi bw’Akarere buzasuzuma uburyo bafashwe, avuga ko icyihutirwa ari ukubashakira ibyo kurya muri iyi minsi.
Uwari umuyobozi wa ORINFOR mu myaka ya 1991 na 1992 ariwe Ferdinand Nahimana, nyuma akaba n'umwe mu bacurabwenge ba Jenoside yakorewe Abatutsi binyuze mu itangazamakuru, yategetse abakozi be ko batangaza kuri Radiyo Rwanda, Radiyo y'igihugu imwe rukumbi muri icyo gihe ko uwari umugaba mukuru w'ingabo za FPR Inkotanyi icyo gihe ariwe Major Paul Kagame ko yaguye ku rugamba.Ibi byabaye inshuro eshatu.
Ferdinand Nahimana wari Umuyobozi w'Ikigo cy'Igihugu cy'Itangazamakuru (ORINFOR)
Kubera igitutu cya FPR mu masezerano y'Arusha, Ferdinand Nahimana yakuwe ku mwanya wo kuyobora Radiyo y'igihugu nyuma yuko ahimbye itangazo ryatumye Abatutsi mu Bugesera bicwa. Radiyo y'igihugu yatangaje ko Abatutsi bari gucura umugambi wo kwica abayobozi bakuru ba MRND maze uwari Burugumesitiri wa Kanzenze Fidele Rwambuka ategeka interahamwe ze kwica Abatutsi.
Perezida Kagame aba umuyobozi w'ingabo za RPA Inkotanyi
Hagati ya Ukwakira-Ugushyingo 1990, ingabo za Kinani zabyinye intsinzi ko zashubije inkotanyi I Bugande ndetse ko bazitsembatsembye. Nyamara ntibamenye ko Ingabo z'Inkotanyi zabonye undi muyobozi mukuru ufite ubuhanga budasanzwe mu bya gisirikari wari wigomwe amashuri ye muri Leta zunze ubumwe z'Amerika ariwe Paul Kagame. Nkuko bitangazwa n'abasirkari bandi ba RPA, bakibona Paul Kagame ku rugamba imitima yariruhukije.
Mu gihe Ingabo za Habyara ziri kubyina insinzi hari n'urujya n'uruza hagati y'abayobozi b'u Rwanda n'Ubufaransa, mu bwenge bwe bwinshi, Major Paul Kagame yahise akubitira ahababaza FAR ayiturutse inyuma nuko afata Gatuna hagati ya tariki ya 1-4 Ugushyingo 1990 naho tariki ya 14 Ugushyingo 1990 ingabo za RPA zifata Kaniga arinayo yaje kuba icyicaro cya Radiyo Muhabura.
Ibi byabaye ubwo Habyarimana n'ingabo ze babyinaga insinzi kakahava imbaraga zose bazishyize mu Mutara. Radiyo Rwanda yirirwaga ishyiraho indirimbo uburyo bakubise 'inyenzi' zose zigasubira muri Uganda. Major Kagame yahise amenyekana mu Rwanda ubwo, kandi ubwo abambari ba Muvoma bari bakiri ngo 'mu muhango' wo gushyingura Rwigema.
Nyuma yo gufata Gatuna, uwari Minisitiri w'Ubufaransa ushinzwe iterambere yahise yoherezwa I Kigali kuko ntibasobanukiwe nyuma yuko Habyarimana abwiriye Mitterand ko intambara yarangiye. Nibwo urwango rwa mbere rwo kwanga Major Kagame rwatangiye mu bambari ba Muvoma.
Ibitero bya Gatuna, Kaniga, Byumba, Ruhengeli n'ahandi bwari ubutumwa bwihariye Major Kagame yabwiraga intagondwa za Muvoma ngo turahari ntaho twagiye ndetse akamwereka n'amayeri ya gisirikari. Ubwo icyakurikiye ni ukurwanya Perezida Kagame binyuze mu binyamakuru bahembera urwango mu baturage.
Guhagarika Jenoside yakorerwaga Abatutsi
Nyuma yuko Inkotanyi ziswe inyamaswa zifite imirizo n'amatwi maremare, ubuyobozi bwa Major Paul Kagame bweretse MRND ya Habyarimana ko ari abantu nk'abandi bemera imishyikirano ku mbaraga ariko intagondwa ntizatuza.
Ubwo abayobozi n'ingabo za FPR Inkotanyi binjiraga muri Kigali tariki ya 28 Ukuboza 1993, bageze mu Gasyata bakirwa bidasanzwe, bageze Nyabugogo biba ibindi bindi; byari biteganyijwe ko banyura Kacyiru Minisiteri n'imbere ya Jandarumuri, ariko barahindura babanyuza ku Kinamba ngo abakozi ba Minisiteri badasohoka mu biro byabo baje kureba Inkotanyi.
Abari bashinzwe iperereza bari bafite Kamera ahantu hose bareba abishimiye kuza kw'Inkotanyi mu mugi wa Kigali. Nibwo umugambi wa Jenoside wihutishijwe.
Kuribo igisubizo gikuru kwari ukwikiza umwanzi. Umwanzi yari nde? Komisiyo y'ingabo za FAR yari yashyizweho na Habyarimana yagaragaje ko umwanzi w'u Rwanda ari umututsi wo hanze no mu gihugu imbere nkuko byatangajwe muri Kanama 1993. Bityo rero umututsi uwo ari we wese yaba uwo hanze n'imbere mu gihugu bagombaga kumwikiza.
Intagondwa zakoresheje amayeri yose kugeza zihitanye Habyarimana ngo zibone impamvu yo kwikiza umututsi. Ibi bari bamaze kubimenyera dore ko iyo bashakaga kwica Abatutsi igihe cyose bashakaga impamvu; bica abatutsi mu Bugesera, Ferdinand Nahimana yari yatanze itangazo kuri Radiyo Rwanda ko afite amakuru ko Inkotanyi (Abatutsi) bashaka kwica abayobozi bakuru bose ba MRND. Nuko Abatutsi bari baraciriwe I Bugesera baba mu bukene bukabije, batuye muri Nyakatsi baricwa yaba abana n'abagore.
Ubwo umunsi w'imperuka wagenwe wo kurimbura Abatutsi wageraga, umugaba w'Ingabo wa FPR Inkotanyi yatanze itegeko ryo guhagarika Jenoside maze mu minsi ijana ba rukarabankaba baba bameneshejwe bahungira mu bihugu bitandukanye.
Col Ndengeyinka wa Ex FAR ariko waje nkwinjizwa mu ngabo za RPA ariko kamere ikanga, ngo yagiye mu nama y'abarwanya u Rwanda agihunga ababaza aho bageze, bati turi mu rugamba rwa propaganda kugirango Perezida Kagame adasinzira. Yababwie ko Perezida Kagame azi adashobora kubura gusinzira kubera ibyo bamuvugaho.
Come back (kugaruka mu Rwanda kungufu) yaburijwemo
Ubwo yavuganaga n'itangazamakuru mu mugi wa Musanze nyuma yaho Kigali ifatiwe tariki ya 4 Nyakanga 1994, uwari Perefe w'umugi Lt Col Tharcisse Renzaho yavuzeko bavuye mu mugi kubera amayeri ya gisirikari ko bazagaruka bagafata umugi n'ahandi hose FPR Inkotanyi yari yafashe.
Naho uwari Minisitiri w'intebe Yohani Kambanda, yabwiye abaturage ba Nyakabanda muri Gitarama ko asabye inkotanyi zose gushyira imbunda hasi, utabikora ntazabona n'akanya ko gusubira I Bugande. Aha yabivuze yambaye ikote rya gisirikari aho yongeyeho ko buri wese agomba kugira imbunda maze nawe akayerekana mu mashusho azwi cyane. Hari muri Kamena 1994.
Mu Ukuboza 1994, Vice Perezida w'u Rwanda Maj Gen Paul Kagame yitabiriye inama y'Umuryango w'Abibumbye asaba ko inkambi zo muri Kongo zareka kuba indiri y'imitwe y'itwaje intwaro n'imyitozo ya gisirikari kandi zigashyirwa kure y'umupaka w'u Rwanda nkuko amasezerano Mpuzamahanga abivuga.
Inkambi zari indiri zo gusenya u Rwanda zarashenywe bacyurwa mu Rwanda abandi bahungira mu mashyamba. Ari abaje mu Rwanda, ndetse n'abari mu mashyamba bari barashinze ishyaka rya RDR ngo rishinzwe gucyura Impunzi, icyari RDR cyahindutse PALIR ifite umutwe wa gisirikari uzwi nka ALIR maze batangiza intambara izwi nkiy'abacengezi. Abagiye bayobora iyo mitwe bishwe umusubirizo nkuko tugiye kubireba.
Byatangiye uwari umuyobozi wa ALiR ariwe Col Nkundiye yishwe mu kwezi kwa Nyakanga 1998, yicirwa mu cyahoze ari Giciye hamwe n'abandi basirikari benshi. Akaba yari akuriye umutwe w'abasirikari barindaga Perezida Habyarimana bagize uruhare runini muri Jenoside yakorewe Abatutsi. Yasimbuwe na Lt Col Dr Mugemanyi wishwe nyuma y'ibyumweru bibiri bikurikira urupfu rwa Nkundiye. Mugemanyi wari umuganga mukuru muri ALiR yishwe tariki ya 8 Kanama 1998 yicirwa mu cyahoze ari Komini Nyarutovu ubu ni mu karere ka Gakenke. Abarwanyi ba ALiR bapfuye ku bwinshi bashaka gufata umurambo we ndetse n'imiti yari afite ariko ingabo za APR zibabera ibamba zibagabaho ibitero bikomeye bakoresheje n'indege.
Umurambo wa Mugemanyi waje kumenyekana kubera umwe mubahoze ari abarwanyi be bari barashyizwe mu gisirikari cy'APR.
Mugemanyi yaje gusimburwa na Rwarakabije wari usigaye ariwe mukuru aba arinawe uba umuyobozi w'ingabo za FDLR wa mbere ubwo bahinduraga izina ry'ALiR kubera ko bari bashyizwe ku rutonde rw'imitwe y'iterabwoba n'igihugu cy'Amerika. Rwarakabije yaje gutaha mu Rwanda mu Ugushyingo 2003.
Rwarakabije yasimbuwe na Mudacumura wishwe mu bitero by'ingabo za Kongo mu ijoro ryo ku wa 17 rishyira 18 Nzeli 2019.
FDLR yagiye yigabanyamo ibice byinshi harimo RUD Urunana, CNRD Ubwiyunge n'indi itandukanye. Ababaye abayobozi bose ba RUD Urunana barishwe mu bihe bitandukanye, rimwe na rimwe bikurikirana.
RUD Urunana ni umutwe washinzwe muri Nzeli 2005 biturutse ku ivangura rishingiye ku irondakarere (Kiga na Nduga) ariko abayobozi ba politiki ku ikubitiro bari cyane mu mahanga akaba ariho yatandukaniraga na FDLR.
Abayobozi ba Politiki bari Jean Marie Vianney wari Perezida naho Umunyamabanga Nshingabikorwa akaba Felicien Kanyamibwa. Mu bandi bari mu buyobozi bwa Politiki harimo na Major Emmanuel Munyaruguru uba mu gihugu cya Norvege.
Ingabo za RUD Urunana ku ikubitiro zari ziyobowe na Brig Gen Jean Damascene Ndibabaje Alias Musare. Bivugwa ko Musare yatonganye na Mudacumura, akamwaka Brigade yari ayoboye undi akivumbura agahita ahindura abasirikari yari ayoboye abashyira mu mutwe mushya wa RUD Urunana. Mu kwezi kwa Kamena 2006, Mudacumura yamugabyeho ibitero undi yihagararaho.
Brig Gen Musare wize amashuri yisumbuye I Bicumbi mbere yo kurangiriza muri APE Rugunga, yinjiye mu ishuri rya gisirikari ESM muri Ukwakira 1990. Yahunze afite ipeti rya St Liyetona akaba ari mubakubiswe ikibatsi n'ingabo za APR ubwo yari ku musozi wa Jali ndetse muri Jenoside akaba yarishe abatutsi cyane ahitwa i Remera y'Abaforongo.
Brig Gen Musare yishwe tariki ya 8 Gashyantare 2016 mu bitero byagabwe n'abarwanyi ba Mai Mai. Umwe mu barwanyi ba RUD Urunana warokotse iki gitero cyahitanye Musare yagize ati 'Imirwano ikarishye yatangiriye mu birindiro bya Generali abivamo ajya ku gasozi ajya ahamagariraho agiye gusaba ubufasha abandi basirikare maze asanga yatezwe agico n'abarwanyi Maï-Maï ya Guidon bahita bamurasa n'umusirikare umurinda bitaba Imana.' Tubibutse ko Brig Gen Musare yapfuye atarashaka umugore kuko yari yaravuze ko azamushaka nagaruka mu Rwanda, FPR yaratsinzwe.
Uwasimbuye Brig Gen Musare ni Gen Musabyimana Juvenal Alias Afrika Jean Michel nawe akaba yarishwe n'ingabo za Kongo FARDC tariki ya 9 Ugushyingo 2019. Yiciwe ahitwa Makoka, Gurupoma ya Binza muri Teritwari ya Rutshuru ibirometero bitatu hafi n'umupaka wa Uganda. Bane mu bari bamurinze nabo bahise bahasiga ubuzima.
Mu kwezi kwa munani 2020 uwari wasimbuye Gen Afrika ariwe Col Cyprien Mpiranya nawe yarishwe ubwo hari tariki ya 29 Kanama 2020 nawe yicirwa ku mupaka wa Uganda. Col Mpiranya, wari uzwi nka Kagoma yahunze u Rwanda afite ipeti rya Serija aho yahise yinjira mu mitwe yabanjirije FDLR nka ALiR nindi nyuma yinjira muri RUD Urunana yaje kuyobora kugeza yishwe.
Muri 2005, RUD Urunana yaje kwihuza nundi mutwe witwaga RPR-Inkeragutabara wari ugizwe na bamwe mu babaye mu gisirikari cya APR bagakora amakosa bagahungira muri Uganda. Umwe mubashinze RPR Inkeragutabara ariwe Major Gerard Ntashamaje yaje gutaha mu Rwanda.
Uwari uyoboye agatsiko ka RPR Inkeragutabara kihuje na RUD Urunana ni Col Emmanuel Rugema wiyitaga Umupfu w'ishyamba ndetse nundi witwaga Capt Eric ushobora kuba yarihaye ipeti nawe.
Nyuma yuko Col Mpiranya yishwe, yasimbuwe na Col Emmanuel Rugema nawe waje kwicwa tariki ya 23 Ukwakira 2020.
Hari abanyeshuri bavuga ko bafite impungenge ko mu kizamini cya Leta batazatsinda neza kuko batabonye igihe gihagije cyo kwitegura amasomo yabo, bitewe n'igihe bamaze muri guma mu rugo.
Tariki 18 Mutarama 2021, nibwo amashuri yo mu mujyi wa Kigali yafunze kubera gahunda ya Guma mu rugo yari itangiye.
 Minisiteri y'uburezi icyo gihe  yatangaje ko nta cyuho kizagaragara kandi ko ingengabihe y'amasomo izajya itegurwa hakurikijwe igihe buri cyiciro cyatangiriye.
Bamwe mu banyeshuri biga mu mashuri yisumbuye bazakora ikizami cya Leta baravuga ko mu kizamini cya Leta batazatsinda neza, bitewe nuko batabonye igihe gihagije cyo kwitegura amasomo yabo, kubera igihe bamaze muri guma mu rugo.
Umwe yagize ati 'Kwigisha abanyeshuri batabishaka, abiga basinziriye badafite ubushake bwo kwiga, n'abarimu byabagizeho ingaruka mu buryo bugaragara. Twebwe rero hari imbongamizi yo kuba tutarasubiye mu masomo neza twabinyuzemo twiruka, urabona ko n'ejo bundi twahise tujya muri guma mu rugo nanone. Abandi bana bo mu ntara bakomeza biga.'
Mugenzi we yagize ati 'Twe twaragarutse ntitwayarangiza yose n'ubwo bagerageje ngo tuyarangize, ariko ni ukuyacamo twihuta kugira ngo tugire ubumenyi kuri buri somo, bityo mbona dushobora kuzahura n'imbogamizi z'uko hari nibyo bashobora kuzatubaza wenda tutarabyize neza.'
Ku ruhande rwa mwarimu Macumu Valens wigisha indimi n'ubuvanganzo mu mwaka wa Gatandatu w'amashuri yisumbuye, avuga konta mpungenge zo kudatsinda zihari kuko amasomo ari kugana ku musozo.
'Njyewe ntabwo ariko mbibona, uko biri kose n'ubwo wenda iyi Covid-19 yahungabanyije ibintu byinshi, ariko babonye igihe kinini cyane cyo kwitegura. N'ubwo harimo iminsi bamaze ari bonyine bari mu rugo batari kumwe n'abarimu ariko hagiyeho gahunda nyinshi zibafasha.' Mwarimu Macumu Valens
Umuyoboziwa Groupe scolaire Kicukiro Rugasire Euzebius, nawe yunga mury'uyu mwarimu, ngo nta mpungenge zo kudatsinda abanyeshuri bakwiriye kugira.
Impuguke mu burezi Dr Ngenzi Alexander avuga ko abanyeshuri basabwa gukora cyane kuko ari mu bihe bidasanzwe, bityo ko abana batagomba kugira impungenge kuko batazi ibyo bazabazwa.
Yagize ati ' Abanyeshuri barasabwa gukora cyane, kubera ko n'ubundi muri bino bihe bya covid-19 bidusaba gukora cyane kuko turi mu bihe bidasanzwe, ubwo biradusaba gukoresha uburyo budasanzwe. Niyo mpamvu aba bana batangiye kuvuga ngo batsindwa cyangwa se undi wese wabivuga, bafite gihamya ki se ko batazi ibyo bazabazwa yabibwirwa n'iki?'
Umunyamabanga wa Leta muri Minisiteri y'uburezi ushinzwe amashuri abanza n'ayisumbuye Twagirayezu Gaspal aganira na kimwe mu bitangazamakuru, yavuze ko imyiteguro y'ibizamini bya Leta mu gihugu ikomeje ndetse ko intambwe imaze guterwa itanga icyizere.
Bwana Twagirayezu avuga ko abanyeshuri bakwiye gukomeza gushyira imbaraga mu myiteguro y'ibizamini ntibacike intege kandi ko badakwiriye kwigira gutsinda ibizamini gusa.
Abiga mu mashuri abanza bazatangira ibizamini tariki 12 Nyakanga kugeza tariki 14 Nyakanga 2021.
Ibizamini bya Leta ku biga mu mwaka wa Gatatu n'uwa Gatandatu w'amashuri yisumbuye bizatangira tariki 20-27 Nyakanga 2021.
Ku biga mu mashuri y'imyuga n'ubumenyingiro biteganijwe ko bo bazabitangira tariki 16-25 Kamena 2021.
Perezida wa Etincelles Hitayezu Dirigeant yamaze kwegura, k'ubusabe bwa Akarere Ka Rubavu , uyu yatorewe kuyobora iyi kipe ,tariki ya 21 Kamena 2020 mu matora y'Inama y'Inteko Rusange y'ikipe yabereye mu Karere ka Rubavu.
Hitayezu wayoboye Etincelles mu bihe bitari byoroshye , akaba yeguye kubusabe bw'Akarere ka Rubavu na Komite ye yose .
Visi Perezida wa mbere Pasteur Ndolimana Emmanuel na Ndagijimana Enock visi Perezida wa kabiri nabo bahise begurira rimwe.
Hitayezu Dirigeant akaba yari yagiye kuri uyu mwanya asimbuye Ruboneza Gédéon wari urangije igihe ndetse uyu Ruboneza Gédéon arahabwa amahirwe yo gusimbura Hitayezu.Mu ibaruwa yanditse asezera Hitayezu yavuze ko ari akazi kenshi ndetse ni mpamvu ze bwite.
Hitayezu Dirigeant asize ikipe ya Etincelles FC mu makipe umunani agomba guhatanira kutamanuka mu cyiciro cya kabiri.
