Webrwanda Backend

Author: webrwanda

  • Abangavu barenga ibihumbi 98 batewe inda mu myaka itanu ishize – #rwanda #RwOT

    Igiteye impungenge ni uko imibare y’abaterwa inda igenda izamuka buri mwaka, kuko yavuye ku bana 17 849 mu 2016, bagera ku 17 337 mu 2017, baba 19 832 mu 2018, bariyongera mu 2019 bagera kuri 23 628 mu gihe muri Nyakanga umwaka ushize, bari bamaze kugera ku 19 701.

    Mu kiganiro cyateguwe n’Ishami ry’Umuryango w’Abibumbye ryita ku mibereho myiza y’abaturage, UNFPA, cyari gifite insanganyamatsiko igira iti “Umubiri Wanjye, Agaciro Kanjye”, hagarutswe ku mpamvu iki kibazo gikomeje gufata indi ntera mu Rwanda n’uburyo cyakemurwa.

    Iki kiganiro cyitabiriwe na Depite Nyirabega Euthalie, Umuyobozi muri MIGEPROF, Batamuriza Mireille ndetse na Dr. Kagaba Aphrodis uyobora HDI mu Rwanda bagaragaje ko ikibazo cy’ingutu kikigaragara mu bangavu baterwa inda.

    Depite Nyirabega Euthalie yavuze ko uretse no kuba ari ikibazo ku muryango w’abo bana, biteye isoni ku gihugu kubona imibare nk’abangavu baterwa inda iri gutumbagira.

    Ati “Ubundi ni ikibazo gikomeye kuvuga ngo imibare iri kwiyongera, buri wese yari akwiye kubigira ibye, kugira ngo bihagarare, akumva ko ubuzima bw’abamwegereye bufite byinshi buvuze kandi hagashyirwamo imbaraga nyinshi kuko biteye isoni kubona imibare ikomeje kuzamuka.”

    Ku ruhande ry’Umuyobozi ushinzwe Iterambere ry’Umuryango no Kurengera umwana muri Minisiteri y’Iterambere ry’Umuryango n’Uburinganire mu Rwanda, Batamuriza Mireille, yavuze ko biteye impungenge kubona buri mwaka abana baterwa inda barenga ibihumbi 17.

    Umuyobozi w’Umuryango Uharanira Guteza Imbere Ubuzima, HDI, Dr. Kagaba Aphrodis, yavuze ko impamvu hakigaragara umubare munini w’abangavu baterwa inda, ari uko ababyeyi bataganirizwa ku buryo buboneye bwo gufasha abana babo mu bihe by’uburumbuke bwabo, asaba ko ibikorwa byo kuganiriza abana byakwiyongera mu mashuri ndetse no mu miryango.

    Ati “Birakwiye kwigisha abagabo n’abasore ndetse n’abana bo mu mashuri, bakigishwa hagendewe ku matsinda bahuriramo ndetse bakajya banasurwa bakaganirizwa ku buzima bw’imyororokere. Ababyeyi na bo bakwiye kuganirizwa binyuze mu nsengero babarizwamo ndetse no mu itangazamakuru mu rwego rwo kubihashya.”

    Mu biganiro bitandukanye, abana batewe inda bakunze gutangaza ko kimwe mu bibazo byatumye baterwa inda, ari uko bashukwa ndetse n’ababyeyi babo ntibabafashe mu kubona ubutabera, rimwe na rimwe batinya kwiteranya ndetse no kugibwaho igisebo n’abaturanyi.

    Muri raporo ya UNFPA ku ihohoterwa rikorerwa abagore, hagaragara ko mu Rwanda abagore 89% ari bo babasha kwifatira umwanzuro ku bijyanye no kuboneza urubyaro.

    Umuyobozi wa UNFPA mu Rwanda, Mark Bryan Schreiner, yasabye abagore guharanira agaciro kabo ntibatinye abagamije kubahohotera kuko umugore wese ubasha kwifatira icyemezo ku buzima bwe ashobora kwirinda ibi bibazo.

    Abangabu barenga ibihumbi 98 batewe inda mu myaka itanu ishize

  • RIB irimo gukora iperereza ku banyeshuri ba KIM bakekwaho kugura amanota #Rwanda #RwOT via @kigalitoday #rwanda #RwOT

    Ubuyobozi bw’iyo kaminuza yahararitse imirimo mu kwezi k’Ukwakira 2020, bwashingiye ku mabwiriza yo kwirinda Covid-19 bwanga gutanga impamyabumenyi kuri abo banyeshuri bakabakaba 600 barangije kwiga mu mwaka wa 2019.

    Kugeza ubu nta tariki abo banyeshuri barahabwa yo kuzabona impamyabumenyi zabo, kuko hiyongereyeho dosiye y’Ubugenzacyaha buvuga ko bukirimo gukora iperereza kuri zimwe muri izo mpamyabumenyi ngo zifite amanota y’amahimbano.

    Umuvugizi wa RIB, Dr Murangira B Thierry avuga ko hari abakozi muri KIM bagiye bahindurira amanota bamwe mu banyeshuri (akaba adahuye n’ayo abarimu batanze), ndetse ko iperereza rimaze gufata abanyeshuri bagera ku 108.

    Dr Murangira ati “Iperereza riracyakomeje ntabwo rirapfundikirwa, ni ukugira ngo hamenyekane uwabikoze yabikoze ate, yabikoreye iki! N’ibijyanye na ruswa bibaye birimo bizagaragazwa.”

    Ingingo ya 276 y’Itegeko riteganya Ibyaha n’Ibihano iteganyiriza umuntu wese wakoresheje inyandiko itavugisha ukuri (diplome iriho amanota adakwiye), igifungo cy’imyaka ibarirwa hagati y’itanu n’irindwi.

    Ku rundi ruhande ariko abo basore n’inkumi bize muri KIM bavuga ko bari mu rujijo n’igihirahiro, kandi ubushomeri burembeje bamwe muri bo, bitewe n’uko bajya gusaba akazi ntibakabone kubera kutagira ibyangombwa bigaragaza ko barangije kwiga.

    Umwe muri bo yabwiye RBA (dukesha iyi nkuru) ati “Iyo twifuza akazi twegeranya ibyangombwa, ariko haburamo diplome(impamyabumenyi) bagahita badukura mu mubare w’abagomba kugahabwa”.

    Bavuga ko bafite ibihamya(indangamanota) by’uko basoje amasomo mu kwezi kwa Nzeri kwa 2019, ariko kugeza ubu ngo nta cyizere cy’igihe bazambara imyambaro y’abahabwa impamyabumenyi.

    Aba banyeshuri muri KIM bakomeza bavuga ko ababyeyi babo na bo babafitiye amakenga, bagakeka ko babahaye amafaranga y’ishuri bakayakoresha ibindi.

    Umuyobozi uhagarariye Kaminuza ya KIM, Kayisengerwa Rachel yijeje ko mu minsi ya vuba (atavuze umubare), abo banyeshuri bazatangarizwa igihe bazahabwa impamyabumenyi zabo, n’ubwo ngo atari bose kubera dosiye ya RIB.

    Kayisengerwa yagize ati “Hari abanyeshuri batazabona impamyabumenyi zabo cyangwa se bazazibona nyuma iperereza rirangiye, kugeza uyu munsi ibintu byose bimaze kujya ku murongo, ibyagiye muri RIB byavuyeyo raporo barayiduhaye, mu minsi ya vuba turabatangariza itariki ya ‘graduation.”

    Kaminuza ya KIM yahagaritse kwigisha mu kwezi k’Ukwakira mu mwaka ushize wa 2020 kuko yavugaga ko bitewe n’icyorezo cya Covid-19 habayeho ibibazo by’ubukungu. Iyi kaminuza ubu ikomeje gushaka umushoramari wayigura kugira ngo yongere isubukure imirimo.

  • Luvumbu muri AS Kigali, Babuwa na Emery muri Rayon, Mugisha Gilbert muri APR FC(Ibivugwa ku isoko ry’igura) #rwanda #RwOT

    Harabura iminsi mike ngo shampiyona y’icyiciro cya mbere mu Rwanda umwaka w’imikino wa 2021 usozwe, amakuru ku bakinnyi bahinduranya amakipe yatangiye gututumba, Gasogi United yo yamaze kwibikaho uwa mbere.

    Buri gihe iyo shampiyona irangiye byanze bikunze bamwe mu bakinnyi baba bagomba guhindura amakipe bitewe n’amakipe abifuza nayo bo bifuza bitewe n’amarangamutima yabo.

    Iyo bigeze muri iki gihe amakuru y’abakinnyi bahinduranya amakipe aba ari menshi, niyo tugiye kugarukaho muri iyi nkuru.

    Ku ikubitiro ikipe ya Gasogi United niyo yabimburiye andi aho mu mpera z’ukwezi gushize kwa Gicurasi 2021 yasinyishije umunya-Cameroun, Armel Ghislain Djimmoé, wakiniraga Kiyovu Sports.

    APR FC

    Mu ikipe ya APR FC ikunze gukora ibintu byayo bucece, kugeza ubu haravugwamo amazina abiri aho umwe ashobora kwerekeza muri iyi kipe y’ingabo z’igihugu gusimbura Byiringiro Lague ugiye kwerekeza ku mugabane w’u Burayi mu cyiciro cya kabiri mu Busuwisi.

    Nshuti Dominique Savio wa Police FC ni umwe mu basore umutoza wa APR FC, Adil Erradi Mohammed yabwiye ubuyobozi bw’iyi kipe ko yifuza ko yaza kuziba icyuho cya Lague.

    Undi mukinnyi uvugwamo ni Mugisha Gilbert uri ku mpera z’amasezerano ye muri Rayon Sports, na we akaba asatira anyuze ku mpande, iyi ikaba ari inshuro ya 3 iyi kipe imwifuje.

    Savio watandukanye na APR FC muri 2019 ashobora kuyisubiramo

    Ku nshuro ya 3 APR FC yongeye kwifuza Mugisha Gilbert

    Rayon Sports

    Nubwo ari ikipe iri mu bihe bibi, ivugwamo ikibazo cy’amikoro ariko biragoye ko yakwegera umukinnyi ngo abe yayihakinira bitewe n’uburyo ari ikipe ikunzwe na benshi kandi y’ubukombe umukinnyi uyikiniye bituma agaragara cyane.

    Iyi kipe yifuza myugariro Emery Bayisenge na Hakizimana Muhadjiri uba warayikiniye muri uyu mwaka ariko ikabura amafaranga bumvikanye. Gusa aba basore na AS Kigali bakinira iracyabakeneye yaberetse ko ishaka kubongerera amasezerano, ndetse amakuru avuga ko kuba iyi kipe itazasohoka mu mikino Nyafurika byagorana ko bayerekezamo.

    Undi mukinnyi yifuza ni myugariro wa APR FC, Niyomugabo Claude utarabonye umwanya uhagije wo gukina akaba ashaka kujya aho yabona umwanya.

    Undi ni rutahizamu wa Kiyovu Sports, Babuwa Samson bivugwa ko yagiranye ibiganiro n’iyi kipe ariko abasaba ko bareka shampiyona ikabanza ikarangira.

    Hakizimana Muhadjiri ashobora kujya muri Rayon Sports

    Emery Bayisenge na we arifuzwa na Rayon Sports

    Niyomugabo Claude ashobora gutandukana na APR FC

    Babuwa Samson aravugwa muri Rayon Sports

    AS Kigali

    Ikipe y’abanyamujyi ndetse yanamaze kwizera 99% ko izasohokera u Rwanda mu mikino Nyafurika, biravugwa ko yifuza rutahizamu wa Rayon Sports, Heritier Luvumbu ukomoka muri DR Congo wanze kongerera iyi kipe amasezerano.

    Luvumbu ashobora kwerekeza muri AS Kigali

    Source : http://isimbi.rw/siporo/article/luvumbu-muri-as-kigali-babuwa-na-emery-muri-rayon-mugisha-gilbert-muri-apr-fc-ibivugwa-ku-isoko-ry-igura

  • Cristiano Ronaldo abaye umustar wa mbere ku isi uciye aka gahigo gakomeye – YEGOB #rwanda #RwOT

    Umunya Portugal Cristiano Ronaldo dos Santos Aveiro uyu akaba ari Rutahizamu w'ikipe ya Juventus n'ikipe y'igihugu ya Portugal abaye umustar wa mbere ku isi uciye agahigo ko kuzuza umubare w'abantu basaga miliyoni magana atatu bamukurikira ku rubuga rwa instagram (More than 300M followers on Instagram).

    Source : https://yegob.rw/cristiano-ronaldo-abaye-umustar-wa-mbere-ku-isi-uciye-aka-gahigo-gakomeye/

  • Ingaruka mbi zo kumara igihe nta mukunzi kubera ibikomere by’abo mwakundanye mbere #rwanda #RwOT

    Benshi bumva ko gukundana ari ibintu byizana abandi bakabifata ukundi bitewe n’ibirushya bagiye bahuriramo na byo.

    Rimwe mu rukundo hari igihe biba ngomba ko umuntu wizeraga akubabaza, bamwe iyo bahuye n’iki kibazo usanga bavuga ko bagiye gufata akaruhuko bikarangira bibaye ikiruhuko gihoraho ibyo gukundana bakabivamo.

    Imbuga zitandukanye zandika ku rukundo, zemeza ko uko umuntu agenda yikuramo ibyo gukundana kubera ibikomere yagiye ahuriramo na byo birangira abayeho mu buzima bwa wenyine.

    Elcrema yo yemeza ko hari n’abantu baba barafashe umwanzuro wo kongera gukundana ariko bakumva inkuru z’abagenzi babo baherutse gukomeretswa n’abo bakundanaga, ibintu bigasubira i Rudubi.

    Bemeza ko abantu benshi bakunze kwibeshya ko babayeho neza kubera ko nta bakunzi bafite, ariko ingaruka zo kubaho bonyine zikagenda zibona gake gake mpaka basubitse ibyo gukundana burundu.

    Bitangira umuntu yanga filime z’urukundo, indirimbo, n’izindi nkuru z’urukundo zikwibutsa icyo wakabaye ufite ariko utigeze ugira amahirwe yo kugumana. Ugatangira no gushaka amakosa kuri muntu wese mwakundanye.

    Inama imwe izatuma uhora ushikamye mu rukundo ni ukuzajya wibuka ko nta muntu n’umwe uri ntamakemwa muri iyi si y’abazima, ibi bizagutere imbaraga zo kongera gushaka umukunzi no kongera gushyira ubwenge ku gihe wumve ko ibyakubayeho n’abandi bibabaho.

    Source : http://isimbi.rw/andi-makuru/article/ingaruka-mbi-zo-kumara-igihe-nta-mukunzi-kubera-ibikomere-by-abo-mwakundanye-mbere

  • Umuryango w'Abibumbye-UN, wasabye ko Myanmar ikomanyirizwa mu bijyanye n'intwaro z'igisirikare #rwanda #RwOT

    Mu buryo budakunze kubaho, umuryango w'abibumbye (ONU/UN) wasabye ko kugurisha intwaro kuri Myanmar bihagarara(Embargo) kubera ihirikwa ry'ubutegetsi ryo muri uyu mwaka ryakozwe n'igisirikare ryiciwemo abantu.

    Inteko rusange ya ONU yemeje umwanzuro wamagana agatsiko k'abasirikare kafashe ubutegetsi mu kwezi kwa kabiri nyuma yo guhirika ubutegetsi bwatowe bwo muri icyo gihugu.

    ONU kandi yasabye ko imfungwa za politiki zifungurwa, zirimo nk'umutegetsi watowe wa Myanmar Aung San Suu Kyi, ndetse urugomo rukorerwa abigaragambya mu mahoro na rwo rugahagarara.

    Nubwo mu rwego rw'amategeko ibihugu bidategetswe gukurikiza uwo mwanzuro, mu rwego rwa politiki ufite icyo uvuze gikomeye.

    Christine Schraner Burgener, intumwa yihariye ya ONU kuri Myanmar, yabwiye inteko rusange ya ONU ati:' Ibyago byuko habaho intambara birahari. Igihe ni iki cyuko hagira igikorwa. Amahirwe yo gukuraho ubutegetsi bwa gisirikare aragenda agabanuka'.

    Uwo mwanzuro wa ONU kuri Myanmar washyigikiwe n'ibihugu 119, Belarus (Biélorussie) ni yo yonyine yatoye iwamagana. Ibindi bihugu 36 byifashe, birimo Uburusiya n'Ubushinwa, ibi bikaba ari byo bya mbere bigurisha intwaro nyinshi kuri Myanmar.

    Bimwe mu bihugu byifashe kuri uwo mwanzuro nkuko BBC dukesha iyi nkuru ibitangaza, byavuze ko ikibazo cya Myanmar ari ikibazo cyayo bwite. Ibindi bivuga ko uwo mwanzuro wa ONU utavuze ku kibazo cya ba nyamucye b'abayisilamu b'aba Rohingya bibasiwe n'igisirikare mu myaka ine ishize, bikaviramo abagera hafi kuri miliyoni imwe guhunga igihugu cyabo.

    Olof Skoog, ambasaderi w'umuryango w'Ubumwe bw'Uburayi (EU/UE) muri ONU, yavuze ko uwo mwanzuro 'utesheje agaciro mu rwego rw'amategeko agatsiko ka gisirikare, wamagana ihohotera ryako n'urugomo ku baturage bako, kandi ugaragaza ishyirwa mu kato ryako mu maso y'amahanga'.

    Ariko ambasaderi Kyaw Moe Tun uhagarariye muri ONU leta y'abasivile yatowe ya Myanmar, yavuze ko ababajwe n'igihe kirekire byafashe ngo inteko rusange ya ONU itore uwo mwanzuro yavuze ko 'ucubya uko ibintu bimeze ubu'. Madamu Suu Kyi, w'imyaka 76, yarafunzwe kuva yahirikwa ku butegetsi.

    Igisirikare cyavuze ko cyafashe ubutegetsi mu kwezi kwa kabiri kubera ko habayeho uburiganya mu matora rusange yo mu kwezi kwa cumi na kumwe mu 2020.

    Ariko indorerezi z'amatora zigenga zivuga ko ahanini yabaye mu bwisanzure no mu mucyo, kandi ibirego kuri Madamu Suu Kyi byamaganwe na benshi nk'ibishingiye ku mpamvu za politiki.

    Ihirikwa ry'ubutegetsi bwe ryatumye habaho imyigaragambyo ahantu henshi mu gihugu, igisirikare cya Myanmar cyibasira gikoresheje urugomo abigaragambya baharanira demokarasi, impirimbanyi ndetse n'abanyamakuru.

    Kugeza ubu inzego zishinzwe umutekano zishe abantu barenga 860 zifunga abandi bagera hafi ku 5.000, nkuko bivugwa n'umuryango ugenzura ibibera muri Mynamar, Assistance Association for Political Prisoners (AAPP).

    Munyaneza Theogene / intyoza.com

    Source : https://www.intyoza.com/umuryango-wabibumbye-un-wasabye-ko-myanmar-ikomanyirizwa-mu-bijyanye-nintwaro-zigisirikare/

  • Umumotari wagaragaye ahetse umugore na we ahetse umwana akurikiranyweho ubufatanyacyaha bwo kubabaza umubiri #Rwanda #RwOT via @kigalitoday #rwanda #RwOT

    Benshi mu babonye iyi foto banenze uyu mugore ariko cyane cyane umumotari wemeye gutwara abantu babiri kuri moto hamwe n
    Benshi mu babonye iyi foto banenze uyu mugore ariko cyane cyane umumotari wemeye gutwara abantu babiri kuri moto hamwe n’imizigo (Ifoto: Social Media)

    Uyu mumotari witwa Vedaste Nzayisenga ukorera mu Karere ka Huye, yivugira ko uriya mubyeyi yamukuye muri Gare ya Huye ku Cyumweru tariki 13 Kamena 2021, mu masaa kumi za nimugoroba, amujyanye mu Murenge wa Gishamvu.

    Ngo yamusabye guheka umwana neza, maze amushyira kuri moto hamwe n’ivarisi yari afite. Bageze ahitwa ku Mukoni bahagaritswe n’ababyeyi basabye nyina w’umwana guheka neza, nuko bakomeza urugendo.

    Yaje gutungurwa n’uko ku wa Gatanu tariki ya 18 Kamena 2021 yabonye ubutumwa bwa Polisi bumusaba kwishyura amande y’amafaranga ibihumbi 45 bijyanye n’ikosa ryo gutwara abantu barenze umwe kuri moto hamwe n’ibintu, hanyuma n’ikinyabiziga cye na we ubwe barafungwa.

    Umuvugizi wa Polisi y’u Rwanda mu Ntara y’Amajyepfo, SP Théobald Kanamugire, avuga ko naramuka ahamwe n’icyaha akurikiranyweho ubu cy’ubufatanyacyaha bwo kubabaza umubiri w’umuntu bidaturutse ku bushake, nk’uko biteganywa n’ingingo ya 118 yo mu gitabo cy’amategeko ahana mu Rwanda, azahanishwa igifungo kitari munsi y’amezi atatu ariko na none kitarenze amezi atandatu, cyangwa amande y’amafaranga atari munsi y’ibihumbi 500 ariko na none atarenze miliyoni.

    Umumotari yarafashwe mu gihe umugore na we agishakishwa
    Umumotari yarafashwe mu gihe umugore na we agishakishwa

    Agira ati “N’uriya mubyeyi turi kumushakisha, kandi mu minsi mikeya turaba twamubonye. Na we kimwe n’umumotari akurikiranyweho kubabaza umubiri w’umuntu bidaturutse ku bushake, kandi nahamwa n’icyaha na we azahanishwa biriya bihano byo mu ngingo ya 118.”

    SP Kanamugire asaba n’abandi bamotari kwitwararika bakareka kurenga ku mategeko yo mu muhanda nkana, batwara abantu n’ibintu, cyangwa batwara ababyeyi bahetse abana.

    Agira ati “Ubundi moto igendaho abantu babiri, ari na bo moto iba yarafatiye ubwishingizi. Iyo umumotari atwaye umubyeyi uhetse umwana baba babaye batatu.”


  • Nta mazi azongera kubura mu mpeshyi i Kigali n’i Bugesera – WASAC #Rwanda #RwOT via @kigalitoday #rwanda #RwOT

    Uruganda rw
    Uruganda rw’amazi rwa Kanzenze mu Bugesera rwitezweho gukemura ibura ry’amazi i Kigali n’i Bugesera

    Umuyobozi muri WASAC ushinzwe gukwirakwiza Amazi mu Mijyi, Methode Rutagungira, avuga ko n’ubwo uruganda rwa Kanzenze (mu Bugesera) rutaragera ku ntego yo gutanga metero kibe ibihumbi 40 ku munsi nk’uko byari biteganyijwe, hari igisubizo kimaze kuboneka.

    Rutagungira yagize ati “Muhumure muhumure! Ubu bimeze neza, amazi yariyongereye ku buryo nta bwoba abantu bagombye kugira, kereka ahari hateye ikiza, ubu hari metero kibe ibihumbi 25 bijya i Kigali hamwe n’ibihumbi bitanu bijya mu Bugesera, byose hamwe byagakwiye kuba metero kibe ibihumbi 40 ariko urabizi ko uruganda ari bwo rucyuzura”.

    Minisitiri w
    Minisitiri w’Ibikorwa remezo, Ambasaderi Claver Gatete aha yari yasuye uru ruganda rw’amazi rwa Kanzenze tariki 24 Gashyantare 2021

    Rutagungira arizeza uduce twa Kigali na Bugesera twajyaga tubura amazi mu gihe cy’impeshyi nka Kanombe, Kimironko, Remera, Kabeza, Gahanga, Nyamata n’ibice bihegereye ko hagomba kuboneka amazi igihe cyose.

    Uruganda rwa Kanzenze kandi rwitezweho kunganira izindi mu gutanga amazi mu bice birimo kwagurirwamo Umujyi wa Kigali n’inkengero zawo nka Gasanze, Nduba, mu nganda i Masoro ndetse no hakurya ya Kigali muri Kamonyi.

    Ikigo WASAC kivuga ko uruganda rwa Kanzenze ruzatuma Umujyi wa Kigali ugera ku kwihaza ku mazi wari ukeneye angana na meterokibe ibihumbi 140 ku munsi, mu gihe wabonaga atarenze metero kibe ibihumbi 90.

    Ni uruganda rufite ibikoresho bigezweho
    Ni uruganda rufite ibikoresho bigezweho

    Uru ruganda ruzatuma uyu mujyi ubasha gusagura metero kibe zigera ku bihumbi 11 zijya mu nkengero zawo cyangwa mu bice ugenda wagurirwamo.

    Uruganda rwa Kanzenze rwatangiye kubakwa mu mwaka wa 2017 ku nguzanyo ya Banki Nyafurika itsura Amajyambere BAD yanganaga n’amadolari ya Amerika miliyoni 96 (ni ukuvuga amafaranga y’u Rwanda akabakaba miliyari 96), akaba yarahawe u Rwanda mu rwego rwo kubaka inganda z’amazi no kuyakwirakwiza mu Mujyi wa Kigali no mu yindi mijyi iwunganira.

    Icyo gihe abaturage bari batangiye kubura amazi ku buryo mu bice bya Kimironko mu gihe cy’impeshyi, ijerikani imwe ngo yagurwaga amafaranga 300 nk’uko bisobanurwa n’uwitwa Habumugisha Aminadabu utuye mu Kagari ka Bibare.

  • FERWAFA yavuze impamvu Stade Regional idakoreshwa kandi CAF yarayihaye umugisha(AMAFOTO) #rwanda #RwOT

    Ishyirahamwe ry’umupira w’amaguru mu Rwanda rivuga ko kuba Stade Regional itarimo gukoreshwa ari uko irimo kuvugururwa kuko nubwo CAF yabahaye uburenganzira ko yemewe kuba yakwira imikino mpuzamahanga ariko yaberetse ibisigaye gukosorwa ari byo birimo gukorwa.

    Muri Mata 2021 nibwo CAF yamenyesheje FERWAFA ko nta kibuga ifite cyakwakira imikino mpuzamahanga, ni mu gihe u Rwanda rwiteguraga ijonjora ry’igikombe cy’Isi ryari riteganyijwe muri uku kwezi ariko rizakwimurirwa muri Nzeri 2021.

    Imirimo yo kuyivugurura yahise itangira, ku ikubitiro bateye amarangi, bavugurura urwambariro(Dressing Room) aho bashyizemo ibikoresho bishya no mu bwiherero, bashyizemo kandi icyuma gishyushya amazi, guhindura intebe z’abasimbura(bench) n’ibindi n’ibindi.

    Nyuma yo gukora ibi byose, FERWAFA yohereje amashusho muri CAF maze muri Gicurasi, Stade Regional isohoka ku bibuga byemewe na CAF kuba byakinirwaho imikino mpuzamahanga.

    Nubwo iki kibuga cyemejwe na CAF ntabwo kigeze gikoreshwa muri shampiyona aho byatumye n’amakipe yajyaga agikoresha ajya gutira ibibuga aho nka APR FC yakirira i Huye, Rayon Sports na Police FC zakirira mu Bugesera, AS Kigali yakirira i Muhanga na Gasogi United yakirira mu Bugesera.

    Ibi byateye urujijo abantu benshi bibaza impamvu iki kibuga kidakoreshwa cyangwa se niba CAF yarategetse ko kizakinirwaho bwa mbere n’imikino mpuzamahanga, umuvugizi wungirije wa FERWAFA, Jules Karangwa avuga ko n’ubu babishatse cyakoreshwa ariko CAF yababwiye ko nubwo cyemewe ariko hari n’ibindi byakosorwa rero bakaba barashatse ko cyazakoreshwa byaramaze gukosrwa 100%.

    Ati'Turi muri gahunda yo gukomeza kubungabunga Stade Regional kugira ngo izakire ijonjora ry’igikombe cy’Isi rizaba muri Nzeri uyu mwaka, nk’uko mubizi uruhushya rwagiye rutangwa mu byiciro binyuranye hari aho baruguhaga ariko bakakubwira ngo ukeneye guhindura ibi n’ibi, ntabwo twari tuzi ko iki gihe kizongerwaho rero turifuza ko n’iki gihe cyakoreshwa hanozwa n’ibyo batweretse.'

    'CAF yaduhaye uruhushya n’ubu hari umukino mpuzamahanga twawuhakinira ariko twabonye amahirwe rero tugomba kuyabyaza umusaruro hakanozwa ibyo twasabwe ko byashyirwamo kuko batubwiye ko n’ubwo tubahaye uruhushya ariko mugomba gukosora ibi n’ibi, kuko uriya muhango wo kwemeza ibibuga bizajya biba umunsi k’umunsi.'

    Ntabwo yerura ngo avuge ibisigaye ariko amakuru avuga ko n’aho abantu bicara basabwe gushyiramo udutebe kuko hasanzweho ibisima ari byo abantu bicaragaho.

    Mu rwambariro rw’amakipe haravuguruwe bigaragara, ibikoresho ni bishya

    No mu cyumba cy’abasifuzi hashyizwemo ibikoresho bishya

    Hashyizwemo n’icyuma gishyushya amazi

    Intebe z’abasimbura ni nshya

    Bateye amarangi mashya

    Source : http://isimbi.rw/siporo/article/ferwafa-yavuze-impamvu-stade-regional-idakoreshwa-kandi-caf-yarayihaye-umugisha-amafoto

  • Australia yakajije amakimbirane n'Ubushinwa ashingiye ku muvinyo #rwanda #RwOT

    Australia izatanga ikirego mu muryango w'ubucuruzi ku isi (WTO/OMC), nyuma yuko Ubushinwa bushyizeho umusoro w'inyongera ya 218% kuri divayi (umuvinyo) yayo mu mwaka ushize.

    Ubushinwa buvuga ko umusoro wongerewe kubera imikorere mibi mu bucuruzi, ibyo Australia ihakana.Australia ivuga ko igishaka kuganira n'Ubushinwa ngo bacyemure iki kibazo.

    Ubushinwa ni ryo soko rya mbere rinini kuri divayi Australia yohereza mu mahanga. Inganda zitunganya divayi zivuga ko zashegeshwe bikomeye n'iryo zamuka ry'umusoro nk' uko BBC dukesha iyi nkuru ibivuga .Mu itangazo yasohoye, leta ya Australia yavuze ko yafashe icyo cyemezo cyo kuregera umuryango WTO nyuma yo kuganira birambuye n'inganda zitunganya divayi.

    Dan Tehan, Minisitiri wa Australia w'ubucuruzi, ubukerarugendo n'ishoramari yagize ati:'Leta izakomeza guharanira n'imbaraga inyungu z'abakora divayi bo muri Australia ikoresheje uburyo buriho muri WTO bwo gukemura ibyo tutumvikanaho'.

    Ubushinwa bushinja Australia kubugira ingarani yo kujugunyamo ibicuruzwa bibi, ibyo binyuranyije n'amategeko mpuzamahanga y'ubucuruzi.

    Ubwo buryo buzwi nka 'dumping' buba iyo igihugu cyohereje igicuruzwa mu mahanga ku giciro kiri hasi y'icyo icyo gihugu gisanzwe kigurishaho icyo gicuruzwa imbere mu gihugu.

    Ikiba kigamijwe ni ukongera ingano y'ibyo gishyira ku isoko muri icyo gihugu cy'amahanga no gukuraho ihatana mu bucuruzi.

    Australia n'Ubushinwa bakorana ubucuruzi bwinshi, ariko umubano wa dipolomasi w'ibi bihugu warushijeho kuba mubi kuva Australia yasaba ko habaho iperereza mpuzamahanga ku nkomoko y'icyorezo cya Covid-19.

    Minisitiri w'intebe wa Australia Scott Morrison yakomeje gusubiramo ko leta ye itazagamburuzwa no kotswa igitutu mu rwego rw'ubukungu.

    Mu mpera y'umwaka ushize, Ubushinwa bwashyizeho imisoro kuri divayi iva muri Australia, bunavuga ko iyo misoro ishobora kugumaho mu gihe cy'imyaka itanu.

    Icyo cyemezo cyakurikiye amezi yari ashize hari ibindi bihano Ubushinwa bwafatiye ibicuruzwa biva muri Australia, birimo nk'inyama z'inka n'ibicanwa bya nyiramugengeri (coal/charbon).

    Inganda zitunganya divayi zo muri Australia zohereje mu Bushinwa divayi ifite agaciro ka miliyoni 12 z'amadolari ya Australia (agera kuri miliyari 8 mu mafaranga y'u Rwanda) mu mezi ane yo kuva mu kwa cumi na kabiri mu 2020 kugeza mu kwa gatatu mu 2021, nkuko imibare y'urwo rwego ibigaragaza.

    Mu gihe nk'icyo cyo mu mwaka wabanje, zari zohereje mu Bushinwa divayi ifite agaciro ka miliyoni 325 z'amadolari ya Australia (agera kuri miliyari 240 mu mafaranga y'u Rwanda).

    Source : https://impanuro.rw/2021/06/19/australia-yakajije-amakimbirane-nubushinwa-ashingiye-ku-muvinyo/