Author: webrwanda

Ubwo yari mu nama yakozwe ku buryo bw’ikoranabuhanga kuri uyu wa Mbere tariki 21 Kamena 2021, Ngozi yagize ati “Tumaze kubona ko kutagira ubushobozi bwo gukora inkingo hirya no hino, bitajyana no kuzibona ku rwego ziba zikeneweho cyane cyane mu gihe cy’icyorezo. Hakenewe inganda zikora inkingo mu Karere ndetse n’uburyo bukwiye bwo kuzikwirakwiza, kugira ngo bibe bitanga n’icyizere cyo kwitegura guhangana n’ibindi byorezo byabaho mu gihe kizaza”.

Perezida wa Repubulika Paul Kagame, agaruka kuri icyo cy’inganda zikora inkingo za Covid-19 muri Afurika, yavuze ko uwo mugabana ugomba kuba umufatanyabikorwa ungana n’abandi bose mu gukora inkingo, aho gutegereza iziturutse aho handi bazikorera.

Yavuze ko ubu Afurika irimo kugerageza gutangira kuzikora, gushaka abafatanyabikorwa bo gutangiza ibikorwa byo gukora inkingo, ko hari abafatanyabikorwa nk’Umuryango w’Ubumwe bw’ibihugu by’u Buranyi n’Ikigo mpuzamahanga mu by’imari bahari, ariko ngo hari n’abandi bafatanyabikorwa bashaka kuza gufatanya n’umugabane wa Afurika muri ibyo.

Mu gihe bizaba bikorwa, Perezida Paul Kagame ngo asanga Afurika izajya ibona inkingo ikeneye ku gihe, cyangwa se ikazibonera rimwe n’indi mu migabane yo ku isi. Yavuze ko ku Mugabane wa Afurika hari ahantu hatatu hazakorerwa izo nkingo za Covid-19, Harimo Afurika y’Epfo Senegal n’u Rwanda, kandi ibyo bihugu byatangiye kwitegura.

U Rwanda by’umwihariko muri urwo rwego, nk’uko Perezida Kagame yabivuze, ngo rwatangiye gukorana n’inganda zifite ikoranabuhanga rishya rikoreshwa mu bintu byinshi, nko mu buhinzi no bindi byorezo, ubu ngo u Rwanda rwamaze kuganira n’abafite iryo koranabuhanga.

U Rwanda ubu ngo rurimo kuganira n’abazatanga ubufasha bw’amafaranga ndetse ngo mu mezi makeya abantu bashobora kumva indi nkuru.

Laurent Gbagbo na Simone Gbagbo bagiye gutandukana

Umwunganizi mu mategeko wa Laurent Gbagbo wasohoye ayo makuru, yavuze ko hashize igihe kinini Simone Gbagbo yaranze gatanya mu buryo bw’ubwumvikane nk’uko umugabo we yabyifuzaga, ni ko guhitamo kubinyuza mu nzira y’imanza.

Umukambwe Gbagbo w’imwaka 76, ubwo yageraga ku kibuga cy’indege nyuma y’imyaka 10 atagera mu gihugu cye, yari kumwe n’umugore we muto bamaranye igihe kinini, Nady Bamba w’imyaka 46 wahoze ari umunyamakuru. Umugore we wa mbere, Simone Gbagbo yaje kumwakira hamwe n’abayoboke be, avugana gato n’umugabo we ahita yigendera, nk’uko bitangazwa na AFP.

Laurent Gbagbo yashakanye na Simone Gbagbo mu 1986 bakaba barabyaranye abana babiri b’abakobwa.

Laurent Gbagbo na Simone Gbagbo, bombi bafashwe mu 2011 bazira kwanga kwemera ko Alassane Ouattara yatsinze amatora ya Perezida wa Côte d’Ivoire, bikaba byaravuyemo imvururu zaguyemo abantu barenga 3,000 ari byo byatumye bombi bagezwa imbere y’ubutabera.

Laurent Gbagbo icyo gihe yajyanywe i La Haye na ho umugore we aburanishwa n’inkiko za Côte d’Ivoire, zikaba zaramukatiye gufungwa imyaka 20 muri 2015 ariko aza kurekurwa ku mbabazi za Perezida wa Repubulika muri 2018.

Minisitiri Gatabazi avuga ko ingo zahinduwe utubare ziza gufungwa

Ibyo Minisitiri Gatabazi yabigarutseho mu Kiganiro we na Minisitiri w’Ubuzima, Dr Daniel Ngamije bagiranye na Radio Rwanda kuri uyu wa Kabiri tariki 22 Kamena 2021, cyibanze ku myanzuro y’Inama y’Abaminisitiri yateranye ku wa 21 Kamena 2021, ifatirwamo ingamba nshya zo gukomeza guhangana na Covid-19.

Minisitiri Gatabazi yavuze ko hari abakora utubari mu ngo zabo bitwaza ko zo zitafungwa, ariko ngo na zo ziraza gufungwa.

Yagize ati “Hari abantu bakora utubari mu ngo zabo bitwaje ko tutazifunga, izo na zo turaza kuzifunga. Ndibutsa abayobozi mu nzego z’ibanze ko ibyo bagomba kubikurikirana, abahanwa bagahanwa kuko barenga ku mabwiriza aba yarashyizweho yo kwirinda Covid-19”.

Arongera ati “Abakora isubiracyaha, ni ukuvuga wa wundi ufungira inshuro imwe, ukamufungira kabiri ndetse na gatatu agakomeza gufungura, turateganya ko twajya tubafungira kugeza igihe Covid-19 izarangirira. Ubundi twabafungiraga ukwezi kumwe ariko nyuma y’amezi nk’atatu ukabona yongeye gukora ya makosa, ntabwo tuzakomeza gukina muri ubwo buryo, tuzajya tubafungira kugeza igihe Covid-19 izarangirira kandi ntabwo nzi ngo izahagaragara ryari”.

Akomeza asaba abayoboziu mu nzego z’ibanze ndetse na Polisi kubyumva, abasubira mu cyaha ko bagoma guhanwa mu buryo bwihanukiriye.

Minisitiri Ngamije yavuze ko imibare y’abandura irimo kuzamuka cyane ari yo mpamvu izo ngamba zifatwa, kandi ngo iyo zubahirijwe imibare ihita igabanuka.

Ati “Bigaragara ko abantu badohotse ku kwirinda bibwira ko icyorezo kigenda kirangira, kwiyongera kw’abandura byatangiye ku ya 4 Kamena 2021. Covid-19 yandura vuba, ariko iyo twubahirije amabwiriza yose ku murongo imibare ihita igabanuka bitarenze ibyumweru bitatu, buri wese rero afite uruhare mu gutuma ibintu bihinduka tugasubira mu buzima bwiza”.

Minisitiri Ngamije akomeza yibutsa abantu kureka kwirara n’ubwo baba barahawe doze zombi z’urukingo rwa Covid-19, kuko ngo gukingirwa bituma bataremba ariko bashobora kwndura kandi bakanduza abandi virusi y’icyo cyorezo.

Ubwinshi bw’abantu bagaragaye muri gare ya Nyabugogo burangana n’ubw’abasanzwe bajya mu minsi mikuru isoza umwaka cyangwa mu gihe abanyeshuri baba bagana ku mashuri.

Hari abavuga ko bashatse kugenda mbere y’uko gahunda ya “Guma mu Karere” itangira, bitewe n’uko imirimo bakora buri munsi ishingiye ku ngendo hagati y’Umujyi wa Kigali n’utundi turere.

Mugabo Fulgence avuga ko yaranguraga inkweto akajya kuzicururiza mu Ntara, akaba abona ko ubucuruzi bwe bugiye guhagarara kubera gahunda ya “Guma mu Karere”.

Mugabo yagize ati “Nsubiye iwacu i Rusizi ariko ndabona na byo bigoranye kuko imodoka zijyayo baratubwira ko ari amafaranga ibihumbi 10 uvuye i Kigali”.

Abazindutse barimo uwitwa Murekeyisoni Petronille wahageze saa kumi n’ebyiri za mu gitondo akaba ajya mu Ruhango, yavuze ko afite icyizere ko aza kurara iwabo.

Murekeyisoni yagize ati “Jyewe ndagerayo rwose kuko nazindutse kandi turimo guhabwa serivisi nziza, barimo kuduha amatike bakurikije uko twaje.”

Umukozi w’Ikigo gitwara abantu Iburasirazuba cyitwa Stella, yavuze ko bitewe n’uko abagenzi ari benshi, hari impungenge z’uko bamwe batari burare batashye.

Uyu mukozi wa Stella witwa Nadine yagize ati “Ntabwo abagenzi barangira uyu munsi, ni benshi, reba uriya murongo w’abajya i Rusizi imbere ya za Omega Express na Alfa, birarenze”.

Ikigo Horizon Express gitwara abagenzi mu Majyepfo kivuga ko cyatumije imodoka zose ziri mu Ntara kugira ngo kibashe gutwara abantu barimo kubyigana muri gare ya Nyabugogo.

Tuyishime Bosco ushinzwe kumenyekanisha ibikorwa muri icyo kigo avuga ko imodoka zajyaga zihaguruka buri minota 30, ariko ubu bashyizeho uburyo ziri buhaguruke buri minota 15.

Ibigo bitwara abagenzi bisaba inzego zibishinzwe kubongerera amasaha cyangwa undi munsi umwe kugira ngo bibashe gucyura abagenzi bose.

N’ubwo abashinzwe umutekano n’urubyiruko rwiswe ‘Youth Volunteers’ barimo gusaba abantu guhana intera mu rwego rwo kwirinda kwanduzanya Covid-19, ubwinshi bw’urujya n’uruza muri Nyabugogo ntabwo butuma ayo mabwiriza yubahirizwa.

Guhera tariki ya 03 kugera tariki 18 Nyakanga 2021 mu Mujyi wa Dar Bahir muri Ethiopia, hategerejwe irushanwa rihuza ibihugu byo mu karere ka Afurika y’i Burasirazuba n’iyo hagati (CECAFA), uyu mwaka hakazifashishwa abatarengeje imyaka 23.

Habimana Sosthène ndetse na Kirasa Alain ni bo bashobora gutoza Amavubi U-23

Mu nama ya Komite Nyobozi ya Ferwafa iheruka guterana, bamaze gushyiraho abatoza bazaba bayoboye iyi kipe, barimo Habimana Sosthène uzaba ari umutoza mukuru, akazaba yungirijwe na Kirasa Alain basanzwe banakora mu Mavbi makuru nk’abatoza bungirije Mashami Vincent.

Abandi batoza bazaba bafatanya na Habimana Sosthène ndetse na Kirasa Alain, ni Mugabo Alexis utoza abanyezamu ba APR FC, hakaza ndetse kandi na Mugisha Ndoli usanzwe amenyerewe mu makipe y’abato ya APR Fc ndetse n’Intare, mu gihe Mwambari Serge azaba ari Fitness Coach.

Kugeza ubu FERWAFA ntiratangaza ku mugaragaro gahunda y’iyi kipe y’igihugu, abazayitoza ndetse ngo hanatangazwe urutonde rw’abakinnyi n’igihe bagomba gutangirira imyitozo

Minisitiri Gatabazi Jean Marie Vianney

Yabigarutseho kuri uyu wa Kabiri tariki 22 Kamena 2021, ubwo yari mu kiganiro kuri RBA, aho we na Minisitiri w’Ubuzima, Dr Daniel Ngamije, bagarukaga ku byemezo by’Inama y’Abaminisitiri yaraye iteranye, bijyanye no gukomeza guhangana na Covid-19.

Minisitiri Gatabazi ibyo yabivuze ashingiye ku mibare y’abandura icyo cyorezo ikomeje kuzamuka, agahamya ko kuba abajya mu bikorwa runaka basabwa kwipimisha byatumye abanduye bagaragara ari benshi.

Yagize ati “Aho hafatiwe icyemezo cy’uko abantu bajya mu materaniro manini nk’ubukwe, imyidagaduro, inama n’ahandi bagomba kubanza kwipimisha Covid-19, ni bwo imibare y’abanduye yagaragaye ari myinshi. Bivuze ko babaga babana n’icyo cyorezo batabizi ariko aho basabiwe kwipimisha imibare yazamutse”.

Ati “Ni yo mpamvu dusaba abantu bafite ubushobozi kujya bipimisha kenshi badategereje gupimwa ari uko hari izindi mpamvu zibibateye, kuko ni ubuzima bwawe ububa urengera. Niba uri nk’umucuruzi ukora ingendo ari ko uhura n’abantu benshi, wagombye kwipisha kenshi ngo umenye uko uhagaze”.

Uwo muyobozi avuga ko ahandi byagaragaye ko abantu bandurira cyane ari abajya mu tubare two mu midugudu bitemewe ndetse no mu mahoteri yakira abantu benshi, bakaganira begeranye baseka akenshi bakuyeho udupfukamunwa batera ibiparu, aho ngo ni ho ya matembabuzi ava ku muntu umwe ajya ku bandi, niba arwaye agahita yanduza abandi benshi.

Minisitiri Gatabazi yavuze kandi ko hari aho abayobozi badakurikirana ko abajya mu materaniro runaka bagomba kuba bipimishije, ibyo na byo ngo bikaba biri mu byongera ubwandu.

Ati “Hari ibyagiye bigaragara by’abitabira ubukwe hirya no hino harimo abatipimishije, kandi abayobozi mu z’ibanze ntibabimeshe. Abo bayobozi ubu turimo kubafatira ibyemezo, hari ibyabaye muri Rusizi, muri Rubavu ndetse n’Iburasirazuba, ibyo byabaye hari abayobozi bagombaga kubikurikirana ari yo mpamvu turimo kubafatira ibyemezo”.

Akomeza yibutsa abayobozi muri rusange ko bafite ishingano zo kugenzura ko ibyemezo biba byafashwe bishyirwa mu bikorwa, kandi ko iyo batabikoze neza bashobora kubihanirwa.

Inama y’Abaminisitiri yabaye ku wa 21 Kamena 2021, yafashe icyemezo cy’uko ingendo hagati y’uturere zitemewe ndetse no hagati y’uturere n’Umujyi wa Kigali kandi mu gihugu hose ingendo zigahagarara saa moya.

Ibyo byaje nyuma y’aho bigaragariye ko abandura Covid-19 biyongereye cyane, aho mu minsi 10 ishize handuye abantu basaga 3,000 na ho ku itariki 21 Kamena 2021 hakaba haragaragaye umubare munini utarigeze ubaho mu Rwanda, kuko handuye abantu 622, hagapfa batandatu (6).