Author: webrwanda

Iyi mpanuka yabaye ku wa Gatandatu tariki 21 Kamena 2025, mu masaha ya nyuma ya Saa Sita, mu Murenge wa Nyange, mu Kagari ka Gaseke.

Iyi mpanuka abayibonye bavuga ko ikamyo ifite Purake RAI 294 F, yavaga i Nyange yerekeza i Muhanga yagenderaga mu mukono utari uwayo inafite umuvuduko ukabije niko kugonga Coaster ifite Purake RAB 697 U ya sosiyete itwara abantu mu buryo bwa rusange ya Capital Express, yavaga i Kigali yerekeza i Karongi.

Umuyobozi w'Akarere ka Ngororero, Nkusi Christophe yemereye IGIHE ko iyi mpanuka yakomerekeyemo abantu bane bahita bajyanwa ku Kigo Nderabuzima cya Nyange B.

Ati 'Impanuka yakomerekeyemo abaturage bane, bahita bajyanwa kwa muganga kandi bavuwe barataha.'

Iyi kamyo yagonze Coaster nayo irangirika

Coaster ya Capital Express yangiritse no ku gice cyayo cy’inyuma

Mu masaha ya mu gitondo cyangwa ku mugoroba, aho haba hari umuvundo w'ibinyabiziga, moto ziba zibisikana, zifasha abantu kugera ku kazi.

Ni bwo buryo buhendutse, bwihuse, kandi bwa ngombwa cyane mu mihanda y'Umujyi wa Kigali urimo gukura vuba.

Mukamana Espérance yabwiye IGIHE ko akunze gutega moto kuko imufasha mu gukora ingendo zihuta.

Ati 'Njyewe mpitamo gutega moto kuko iyo nshaka kwihuta no kugera ku ku kazi ku gihe iramfasha cyane. Ntabwo moto ikunze guhagarara mu nzira nk'uko biba bimeze ku modoka.'

Uretse kuba igisubizo ku ngendo za buri munsi, moto zageze kure mu gufasha abantu kwivana mu bukene, ziba isoko y'imibereho kuri benshi, kuva kuri ba nyirazo, abazitwara, abazoza, abakanishi, kugeza ku bacuruzi b'ibikoresho byazo.

Moto imwe ishobora gutunga abantu barenze 10 n'imiryango yabo

Moto imwe ishobora gutunga abantu barenze 10 n'imiryango yabo kuko usanga buri wese ashobora kurya abifashijwemo na moto.

Buri moto ubwayo ishobora kuba ari iy'umushoramari wayiguze kugira ngo imwinjirize amafaranga. Akenshi, nyiri moto ayiha umumotari, undi na we agatanga amafaranga ya buri munsi (versement) avuye mu yo yinjije atwaye abagenzi.

Binyuze muri ubu buryo hari bamwe babibonyemo ishoramari rikomeye rishobora kubungukira mu gihe runaka kandi ritanga umusaruro.

Uwo mumotari, binyuze mu kazi akora, ashobora gutunga umuryango we, umugore n'abana, guhaha ibyo kurya, yishyura inzu, amashuri, mituweli, ndetse akanizigamira.

Moto kandi ishobora gutangwa ku muntu w'umurobyi ni ukuvuga umuntu uyitwara igihe gito, nk'iyo nyirayo cyangwa umumotari wayo afite akandi kazi. Uwo na we aba abonye uburyo bwo kubona amafaranga yo kwitunga mu buryo bwihuse n'umuryango we.

Ituma habaho n'akazi kuko hari abayoza n'abakanishi bazikora iyo zipfuye, n'abacuruza ibikoresho byazo (pièces de rechange) nk'amatara, ibyuma bya feri, amapine, amavuta n'ibindi.

Kuva aho moto zikoresha amashanyarazi zigeze mu gihugu, hiyongereyeho serivisi zitandukanye z'aho abantu bahindurira batiri (battery swapping stations), ibi bikaba byaratanze akandi kazi ndetse n'ubucuruzi bushya.

Abacuruzi ba lisansi na bo bibasigira inyungu, kuko moto zisanzwe zikoresha lisansi zihakura iyo zikoresha buri munsi kandi aho na ho haba hari abandi bakozi batunze n'imiryango yabo.

Moto kandi ni amahirwe akomeye ku bigo by'ubwishingizi by'ibinyabiziga kuko buri moto igomba kugira ubwishingizi mu gihe igenda mu muhanda.

Ubundi umuntu yatekereza ko moto ari igikoresho cyoroheje, cy'umuntu umwe ariko mu by'ukuri, iyo uyitegereje neza, usanga ikora nk'uruganda ruto rutunze abantu benshi.

Hirya no hino muri Kigali abantu bakunze gukoresha cyane moto

Umumotari yerakana ko iyo umunsi wagenze neza ashobora kwinjiza agatubutse

Moto ikunze kugendwaho n’abantu bari kwihuta

Hari abahitamo gutwara imizigo yoroheje kuri moto

Kuyitwara ni akazi kiyubashye

Moto zikora akazi ko gutwara abantu n'ibintu mu gihugu zirenze ibihumbi 56, bivuze ko n'umubare w'abazitwara ungana utyo. Hakaba na koperative zihuza abamotari nibura imwe muri buri Karere.

Hari benshi bakunze gusuzugura uwo murimo ariko byagaragaye ko ari akazi kiyubashye kandi kihagazeho kuko ubu gakorwa n'abantu b'ingeri zinyuranye barimo abaminuje n'abatarize.

Umumotari wahiriwe uwo munsi ashobora kwinjiza nibura ibihumbi 30 Frw yakuramo amafaranga ya Lisansi cyangwa batiri ku zikoresha amashanyarazi agasigarana agera ku bihumbi 20 Frw gusa iyo bitagenze neza ntajya munsi y'ibihumbi 10 Frw.

Ubibaze neza wasanga ari akazi gake mu Rwanda kageza kuri uwo mushahara wa buri kwezi.

Umumotari warangije icyiciro cya kabiri cya Kaminuza mu bijyanye n'Itangazamakuru, kuri ubu agiye kumara imyaka umunani atwara moto. Yavuze ko ari umwuga mwiza kuko uzanira inyungu abawukora kandi ukabeshaho benshi.

Yerekanye ko hari icyasha wari warambitswe na bamwe mu bawukora bagiraga imyitwarire itari myiza ariko ko bigenda bihinduka.

Ati 'Hari icyasha wagiye wambikwa n'abantu bamwe na bamwe bawukoze batarize, ahanini batagira imyitwarire myiza. Ugasanga harimo nk'ubujura, ikinyabupfura gike, gutukana, kugenda nabi mu muhanda, impanuka za hato na hato n'ibindi byatumye ufata isura mbi ariko mu bisanswe ni umwuga mwiza kandi utunze benshi.'

Munyaneza Hussein ubimazemo imyaka 14, yabwiye IGIHE ko ako kazi kamufashije kubaka inzu yo kubamo ndetse akabasha no kwishyurira abana amashuri.

Yavuze ko ubu hari imbogamizi zikibakoma mu nkokora zishingiye ku ngano y'amafaranga yishyurwa nko kugura ubwishingizi, imisoro, konterevasiyo n'ibindi bitandukanye.

Gatete Arcade ukiri umusore, yemeje ko ari uburyo bwiza bwo guhanga imirimo kandi bufasha n'abakiri bato kugera ku ntego.

Abakoresha moto bavuga ko zibafasha kwihuta

Abohereza ibicuruzwa nabo bahitamo gukoresha moto

Moto imwe ishobora gutunga imiryango y’abantu benshi

Hari n’abahitamo gukoresha moto zo gutemberaho mu ngendo zabo

Mu mihanda y’i Kigali moto ziriganje cyane

Abakunda moto bazikundira ko zihuta ku rugendo

Nubwo ari nto mu ishusho ariko moto igira uruhare mu bukungu

Mu Rwanda hari moto zirenga ibihumbi 56 zikoreshwa mu bwikorezi rusange

Aho abamotari bahagaze baba baganira

Urwenya aba ari rwose ku bamotari

Gatete yavuze ko ari akazi keza kandi gafasha urubyiruko

Amafoto: Kwizera Herve

Ni igikorwa cyabaye ku wa 20 Kamena 2025, abayobozi n'abakozi b'Ikigo cy'Imari cya Sager Ganza basobanurirwa amateka ya Jenoside ndetse n'uko yateguwe ikanashyirwa mu bikorwa mu Karere ka Bugesera.

Babwiwe ko mu 1992, Abatutsi bari barahungiye muri Kiliziya ya Nyamata kuri ubu yagizwe Urwibutso, Interahamwe zageze aho zibima amazi n'ibindi byose by'ibanze umuntu akenera ngo ashobore kubaho barababazwa, muri icyo gihe haza kwicwa abarenga 500.

Basobanuriwe ko icyo gihe mu 1992, hafi ya Kiliziya hari hatuye Umutaliyanikazi witwaga Antonia Locatelli wabonye Abatutsi bari kwicwa urw'agashinyaguro ahitamo kwitabaza ibitangazamakuru mpuzamahanga kugira ngo atabarize izo nzirakarengane, Leta ya Habyarimana ibimenye ihita yohereza abasirikare bo kumwica. Na we ashyinguye muri uru Rwibutso.

Mu 1994, Abatutsi benshi bo mu Bugesera bahungiye kuri Kiliziya ya Nyamata, bizeye ko bazarokoka nk'uko byari byagenze mbere, ubwo bahahungiraga bakarokoka ari benshi.

Icyizere bari bafite nticyamaze kabiri, kuko ku wa 15 Mata 1994, hiciwe urw'agashinyaguro Abatutsi barenga ibihumbi 10.

Umuyobozi w'Inama y'Ubutegetsi ya Sager Ganza Microfinance Plc, Rubagenga Emery, yavuze ko gusura Urwibutso ari umwanya ukomeye ku bakozi bose, kuko ari ikigo gikoresha Abanyarwanda, kandi ari ngombwa ko bamenya amateka yabo bakayasigasira.

Yagize ati 'Ibi bituma tumenya uruhare ubuyobozi bubi bwagize mu gihugu cyacu, ni umwanya wo kwiga amateka tugasubira inyuma ariko tureba n'imbere kugira ngo tumenye neza uko tugomba kubaka igihugu cyacu, kandi tunamenye kirazira n'ibyo tuzasigira abana bacu kugira ngo bazakomeze umujyo wo kubaka ubumwe n'ubwiyunge.'

Rubagenga yasabye abakozi guhora bibuka no kuzirikana amateka y'u Rwanda kugira ngo atazasibangana, ariko bakanaharanira kubaka ejo hazaza habo n'ah'igihugu.

Ikigo cy'Imari cya Sager Ganza kimaze imyaka igera kuri 20 kigeza serivisi z'imari ku baturarwanda barenga miliyoni, aho kinita cyane ku bapfakajwe na Jenoside yakorewe Abatutsi mu 1994.

Urwibutso rwa Jenoside rwa Nyamata rushyinguwemo Abatutsi barenga ibihumbi 45. Ku wa 20 Nzeri 2023, UNESCO yarushyize mu nzibutso enye za Jenoside yakorewe Abatutsi ziri mu Murage w'Isi.

Ubwo abakozi ba Sager Ganza Microfinance Plc bari batangiye urugendo rugana ku Rwibutso rwa Jenoside rwa Nyamata

Ubwo abakozi ba Sager Ganza Microfinance Plc bari bageze ku Rwibutso rwa Jenoside rwa Nyamata

Abakozi ba Sager Ganza Microfinance Plc baganirijwe ku mateka yagejeje u Rwanda kuri Jenoside yakorewe Abatutsi mu 1994

Abakozi ba Sager Ganza Microfinance Plc basobanuriwe amateka yaranze Jenoside yakorewe Abatutsi mu 1994

Abakozi ba Sager Ganza Microfinance Plc bahaye icyubahiro Abatutsi bishwe muri Jenoside yakorewe Abatutsi mu 1994

Abakozi ba Sager Ganza Microfinance Plc bashyize indabo ku mva zishyinguyemo Abatutsi bishwe muri Jenoside yakorewe Abatutsi mu 1994

Umuyobozi w'Inama y'Ubutegetsi ya Sager Ganza Microfinance Plc, Rubagenga Emery, yanditse mu gitabo cyandikamo abasuye Urwibutso rwa Jenoside yakorewe Abatutsi rwa Nyamata

Umuyobozi w'Inama y'Ubutegetsi ya Sager Ganza Microfinance Plc, Rubagenga Emery, yavuze ko gusura Urwibutso ari umwanya ukomeye ku bakozi bose, kuko ari ikigo gikoresha Abanyarwanda, kandi ari ngombwa ko bamenya amateka yabo

Umukozi wa Minibumwe, Muhaturukundo Eric, yasobanuriye abakozi ba Sager Ganza Microfinance Plc amateka y’Urwibutso rwa Jenoside rwa Nyamata

Ibi bikorwa byagaragajwe kuri uyu wa Gatandatu tariki ya 21 Kamena 2025 ubwo hibukwagwa ku nshuro ya 31 abikorera bishwe muri Jenoside yakorewe Abatutsi bo muri iyi ntara. Ni umuhango wabereye ku Rwibutso rwa Jenoside rwa Musha ruherereye mu Karere ka Rwamagana.

Mbere yo gutangira uyu muhango, abikorera babanje gushyikiriza inzu enye imiryango y'abarokotse Jenoside yakorewe Abatutsi batishoboye, zavuguruwe ndetse zinashyirwamo ibikoresho.

Uwiringiyimana Marie Jeanne utuye mu Mudugudu wa Rambura mu Kagari ka Nyagasambu mu Murenge wa Fumbwe, yavuze ko inzu yabagamo yubatswe mu 1997.

Ati “Najyaga nsohoka mu rugo ngiye gushaka imibereho, naza nkasanga ibintu byose byanyagiwe cyangwa najya kugenda bikansaba gusiga ibintu mu nguni. Uyu munsi rero ndashima ko inzu yanjye yashyizweho amabati mashya, inzugi nziza, ubu iyo ngiye mba nizeye ko ikinze neza.”

Umuyobozi w'Urugaga rw'Abikorera mu Ntara y'Iburasirazuba, Nkurunziza Jean de Dieu, yanenze abikoreraga mbere ya Jenoside banze kurengera abakiliya babo.

Ati “Mu myaka itatu ishize tumaze kuremera abacitse ku icumu inka 310 zifite agaciro ka miliyoni 217 Frw, twubatse inzu esheshatu, ni nayo mpamvu no muri uyu mwaka twahize gutanga inka 85, twazishyikirije abo zigenewe ku kigero cya 85%, tukaba tubizeza ko iyi minsi 100 izarangira zose tuzitanze mu rwego rwo gukomeza kuba hafi abarokotse Jenoside yakorewe Abatutsi.”

Ndidabahizi Didace wavuze mu izina rya Ibuka, yavuze ko abikoreraga mbere ya Jenoside bagize uruhare mu gutegura no gushyira mu bikorwa Jenoside yakorewe Abatutsi. Yashimiye abikorera b'ubu kuko bagira uruhare mu gufasha abarokotse Jenoside n'ibindi bikorwa bitandukanye biteza imbere igihugu.

Guverineri w'Intara y'Iburasirazuba, Pudence Rubingisa, yashimiye abikorera ku ruhare rwabo mu guteza imbere igihugu.

Ati “Turabizeza gukomeza gufatanya muri uru rugendo nk'uko twabitangiye ndetse n'uyu mwihariko turimo guha abarokotse Jenoside yakorewe Abatutsi mu kubafata mu mugongo, mu kubahindurira imibereho na ho tuzakomeza dufatanye.”

Imwe mu nzu zavuguruwe n’Urugaga rw’Abikorera mu Ntara y’Iburasirazuba

Abayobozi b’uturere mu Ntara y’Iburasirazuba bari bitabiriye iki gikorwa aho bunaniye Abatutsi bishwe muri Jenoside yakorewe Abatutsi

Hafashwe umwanya wo guha icyubahiro Abatutsi bishwe muri Jenoside yakorewe Abatutsi mu 1994

Guverineri w'Intara y'Iburasirazuba, Pudence Rubingisa, yashimiye abikorera ku ruhare rwabo mu guteza imbere igihugu

Ndidabahizi Didace wavuze mu izina rya Ibuka, yavuze ko abikoreraga mbere ya Jenoside bagize uruhare mu gutegura no gushyira mu bikorwa Jenoside yakorewe Abatutsi

Umuyobozi w'Urugaga rw'Abikorera mu Ntara y'Iburasirazuba, Nkurunziza Jean de Dieu, yanenze abikoreraga mbere ya Jenoside banze kurengera abakiliya babo

Ni igikorwa cyabaye ku itariki 20 Kamena 2025 ubwo abayobozi n'abakozi ba Mayange Rice Company bibukaga ku nshuro ya 31 Jenoside yakorewe Abatutsi, basura Urwibutso rwa Jenoside rwa Gashora i Bugesera bunamira Abatutsi bahashyinguye.

Nyuma yo gusura urwibutso bakurikijeho kuremera bamwe mu barokotse Jenoside yakorewe Abatutsi mu 1994 bo mu Murenge wa Gashora.

Rutagengwa Jean Pierre uri mu barokokeye Jenoside i Gashora, yavuze ko benshi mu bashyinguye mu Rwibutso rwa Gashora, bishwe ku wa 10 Mata 1994 ubwo Abatutsi bari bahungiye ku yahoze ari Komini Gashora bicwaga urw'agashinyaguro n'Interahamwe.

Ati 'Bucyeye bwaho ku itariki 11 Mata hari abari bagerageje guhungira mu byumba ariko mu gisenge cy'iyo nyubako hari harimo inzuki maze Interahamwe zirakimena za nzuki zivamo zirabarya basukwaho n'urusenda na lisansi ku buryo uwari yarokotse yatakaga bakamubona barabica barabarangiza.'

Umuyobozi w'Inama y'Ubutegetsi ya Mayange Rice Company, Ntiribinyange Eliézer, yavuze ko ubukana bwa Jenoside yakorewe Abatutsi bushingiye ku kuba abayobozi bakabaye barengera abaturage ari bo babarenganyije bituma babura uwo bahungiraho.

Ati 'Twifatanya n'abarokotse Jenoside kugira ngo tubakomeze kandi twizera ko bituma nk'Abanyarwanda bumva ko bafite ubari hafi. Twe tubari hafi kuko hari igihe barenganyijwe n'abagombaga kubarengera. Bumve ko bakomeye bataheranwe n'agahinda kandi twizeye ko ibyabaye bitazasubira.'

Umuyobozi Mukuru wa Mayange Rice Company, Nzeyimana Célestin, yavuze ko kuremera no koroza abarokotse Jenoside yakorewe Abatutsi uretse kuba ari kubafata mu mugongo binagaragaza ko Igihugu gifite ubuyobozi bwiza butuma abaturage bakora bagatera imbere ku buryo babasha gufasha bagenzi babo.

Yongeyeho ko urwo ruganda ruzakomeza kwita ku barokotse Jenoside no gukomeza ibikorwa byo kwibuka mu rwego rwo gufasha abarukoramo gusobanukirwa amateka ya Jenoside ngo itazasubira ukundi kuko harimo urubyiruko rwavutse nyuma yayo.

Hitayezu Pierre warokotse ari umwe mu muryango we wose, yashimiye Mayange Rice Company yamuhaye inka, avuga ko izafasha umuryango we kwiyubaka kuko yari ayikeneye cyane.

Ati 'Nyuma ya Jenoside naje gushaka ngira umuryango. Abana banjye bakunda amata cyane nahoraga nyagura. Inka igiye kumfasha kuyababonera ndetse n'ifumbire najyaga ngura ngiye kujya nyibona byoroshye. Ndashima cyane abatekereje kudufasha.'

Umunyamabanga Nshingwabikorwa w'Umurenge wa Gashora, Umulisa Claire, yavuze ko buri Munyarwanda asabwa umusanzu mu gufatanya n'ubuyobozi bwahagaritse Jenoside yakorewe Abatutsi guhangana n'abakiyipfobya.

Abakora muri Mayange Rice Company basuye ibice bitandukanye bigize Urwibutso rwa Gashora

Bunamiye Abatutsi bashyinguye mu rwibutso rwa Gashora

Rutagengwa Jean Pierre uri mu barokokeye Jenoside i Gashora, yavuze ko benshi mu bashyinguye muri uru rwibutso bishwe ku itariki 10 Mata 1994 kuri Komini Gashora

Bamwe mu barokotse Jenoside i Gashora bahawe inkunga y’ibiribwa

Uruganda rwa Mayange Rice Company rworoje inka abarokotse Jenoside babiri

Ni igikorwa cyabaye ku wa 20 Kamena 2025, abakiliya ba COPEDU Plc n'abayobozi bayo bungurana ibitekerezo ku hakwiye kongerwa imbaraga mu mikoranire yabo banagaragaza amahirwe yashyiriweho abagore muri serivisi iki kigo gitanga.

Niwemutoni Mediatrice ukorana na COPEDU Plc, yashimye imikorere yayo by'umwihariko uburyo yamufashije mu rugendo rwe akava ku bucuruzi bw'ibirayi akaba ahagarariye Bralirwa mu binyobwa bidasembuye.

Ati ' Natangiye gukorana na COPEDU Plc baduha ibihumbi 200 Frw, icyo gihe nacuruzaga ibirayi. Narayakoresheje ngera aho mfata inguzanyo ku giti cyanjye ingana na miliyoni 2,4 Frw ntangira gukora ubucuruzi bwagutse, ubu ngeze ku rwego rurenga miliyoni 100 Frw.'

'COPEDU Plc cyane yamfashije muri urwo rugendo ubu ndi ku rugero rushimishije kuko navuye ku gucuruza ibirayi none mpagarariye Bralirwa mu binyobwa bidasembuye.'

Yashishikarije bagenzi be gutinyuka kandi bagakunda umurimo bakora kuko ari ryo tangiriro ry'ejo hazaza.

Umuyobozi Mukuru wa COPEDU Plc, Muyango Raissa, yavuze ko intego y'aya mahugurwa ari ugufasha abagore kwagura ibikorwa byabo binyuze mu kubaha inguzanyo no gushishikariza abakiliya babo gukoresha ikoranabuhanga.

Ati 'Intego y'iki gikorwa ni ugufasha umugore gutera imbere kandi ni kimwe mu cyerekezo COPEDU Plc yihaye. Dufite inguzanyo ifasha abagore yitwa 'Igire Mugore' itangirira ku bihumbi 500 Frw ikagera kuri miliyoni 5 Frw, yashyiriweho gufasha abagore bakora ubucuruzi ariko bahura n'imbogamizi yo kubura ingwate ihagije kugira ngo babone inguzanyo.'

Muyango yongeyeho ko igikorwa nk'iki ari umwanya mwiza wo kugira ngo baganire, bumve ibyifuzo, ibibazo n'ibitekerezo byose bigamije kunoza serivisi batanga.

Umukozi ushinzwe ibikorwa by'ubucuruzi mu Kigo gitanga Serivisi zo guhererekanya amafaranga hifashishijwe ikoranabuhanga, RSwitch, Gombaniro Herve Christian, yavuze ko hashyizweho uburyo bwo kwishyurana hakoreshejwe ikoranabuhanga rya eKashi bugamije korohereza abanyamuryango ba COPEDU Plc n'abo mu bigo by'imari bitandukanye kwishyurana bitabasabye kuva aho bari.

Kugeza ubu Ikigo cy'Imari cya COPEDU Plc gifite amashami agera kuri 11 harimo Icyicaro gikuru kiri ku Kicukiro, Remera, Batsinda, Nyabugogo, mu isoko rya Nyarugenge, Gisozi, Kimironko, Kicukiro, CHIC, Rwamagana na Kabuga.

Umukozi ushinzwe ibikorwa by'ubucuruzi muri RSwitch, Gombaniro Herve Christian, yavuze ko hashyizweho uburyo bwo kwishyurana umuntu atavuye aho ari

Niwemutoni Mediatrice ukorana na COPEDU Plc yavuze ko yamufashije kuva ku bucuruzi bw’ibirayi agera ku guhagararira ibinyobwa bya Bralirwa bidasembuye

Umuyobozi Mukuru wa COPEDU Plc, Muyango Raissa, yavuze ko intego nyamukuru y'aya mahugurwa ari ugufasha abagore kwagura ibikorwa byabo

Ba rwiyemezamirimo bahawe serivisi na COPEDU Plc bashimye ubufasha yabahaye mu iterambere

COPEDU Plc ishyigikira iterambere ry’umugore

Iyi serivisi igenewe ibigo by'abagore byujuje ibisabwa birimo no kuba ikigo kimaze nibura umwaka gikora, bishobora guhabwa inguzanyo ya miliyoni 15 Frw yishyurwa mu myaka ibiri nta ngwate. Ni muri gahunda yo kugeza amazi meza ku Baturarwanda miliyoni imwe kugeza mu 2029.

Iyi serivisi yamuritswe ku wa 20 Kamena 2025, mu bufatanye bwa BK n'Umuryango Mpuzamahanga Water For People mu Rwanda, Ishami ry'Umuryango w'Abibumbye ryita ku bana, (UNICEF), Ikigo gishinzwe Amazi, Isuku n'Isukura (WASAC Group), Minisiteri y'Ibikorwaremezo, (MININFRA), n'abandi.

Mu bazahabwa inguzanyo harimo ibigo bishaka kugura ibikoresho ngo bitange serivisi yo kugeza amazi meza mu bice by'icyaro. Iyi nguzanyo ishyizweho mu gihe Abaturarwanda 89,7% ari bo bagerwaho n'amazi meza, muri bo 12,3% bonyine akaba ari bo bayafite mu ngo zabo.

Iyi nguzanyo kandi iri mu murongo wo gufatanya na leta, kugira ngo izagere mu 2030 yarageze ku ntego yo gutanga serivisi z'amazi meza, isuku n'isukura mu buryo buteye imbere. Kugira ngo bigerweho u Rwanda rukeneye miliyari zisaga 320 Frw buri mwaka.

Umuyobozi wa Water For People mu Rwanda, Eugene Dusingizumuremyi, yatangaje kuba Abaturarwanda 45% ari bo bishimira serivisi yo guhabwa amazi meza, ari ikimenyecyo cy'uko hakenewe ubufatanye bw'inzego zirimo n'iz'abikorera ntibiharirwe leta.

Ati ''Tugomba gukora ibirenze! Ni no guhamagarira ibigo by'imari n'urwego rw'abikorera, mu guhuza imbaraga na leta n'abandi bafatanyabikorwa.'

Umuyobozi Mukuru wa Banki ya Kigali, Dr. Diane Karusisi, yavuze ko iyi nguzanyo izasubiza ibibazo byagaragajwe n'ubushakashatsi bwakozwe na Water For People na UNICEF, birimo kuba ibigo by'imari bitinya gutanga inguzanyo ku bo muri urwo rwego ngo bidahomba, n'ubumenyi buke kuri urwo rwego ku batanga inguzanyo n'abazisaba.

Ati ''Iyi nguzanyo izakuraho izi mbogamizi binyuze mu buryo bwo gusangira ibihombo, no gutanga ubufasha mu kubaka ubushobozi.”

Umuyobozi Mukuru muri Minisiteri y'Ibikorwaremezo, ushinzwe amazi, isuku n'isukura, Eng. Gemma Maniraruta, yashimiye iyi ntambwe itewe n'ibigo nka Banki ya Kigali yemeye gutanga iyi nguzanyo, agaragaza ko iyi gahunda izanagira uruhare mu guteza imbere uburezi bufite ireme, no guteza imbere imibereho myiza y'Abaturarwanda muri rusange.

Umuyobozi ushinzwe ibikorwa by'Amazi, Isuku n'Isukura muri UNICEF Rwanda, Dr. Murtaza Malik, yavuze ko UNICEF iri gukorana n'ibihugu byo muri Afurika yo Munsi y'Ubutayu bwa Sahara n'u Rwanda rurimo, mu gukomeza gutera inkunga imishinga iteza imbere iboneka ry'amazi meza, isuku n'isukura kandi ko ubwo bufatanye ari ubw'igihe kirekire.

Umuyobozi w’ishami rishinzwe ibigo bito n’ibiciriritse mu BK, Mukunzi Darius, yasobanuye ko inguzanyo yashyizweho igamije kugeza amazi meza ku baturarwanda

Umuyobozi wa Water For People mu Rwanda, Eugene Dusingizumuremyi, yavuze ko hakenewe n’uruhare rw’abikorera mu kugeza amazi meza ku baturarwanda

Umuyobozi ushinzwe ibikorwa by'Amazi, Isuku n'Isukura muri UNICEF Rwanda, Dr. Murtaza Malik, yavuze ko UNICEF izakomeza gufasha mu guteza imbere iboneka ry’amazi meza

Abakora ibikorwa byo gukwirakwiza amazi meza, isuku n’isukura bemerewe inguzanyo zigamije guteza imbere ibikorwa byabo

Umuyobozi Mukuru muri Minisiteri y'Ibikorwaremezo, ushinzwe amazi, isuku n'isukura, Eng. Gemma Maniraruta, yashimiye intambwe yatewe na BK yemeye gutanga iyi nguzanyo

Inzego zitandukanye zashyize hamwe ngo amazi meza agere ku bantu bose

Ibigo by’urubyiruko n’abagore bifite amahirwe yo guhabwa iyi nguzanyo

Abo mu nzego za leta, abikorera n’abandi bafatanyabikorwa, bagaragaje ko hakenewe ubufatanye bwa buri rwego mu kugeza amazi meza ku Baturarwanda, n’ibindi bikorwa by’isuku n’isukura

Minisiteri y'Ububanyi n'Amahanga ya Leta Zunze Ubumwe za Amerika tariki ya 18 Kamena yasobanuye ko intumwa z'u Rwanda n'iza RDC zumvikanye ku ngingo zikubiye mu masezerano y'amahoro azashyirwaho umukono tariki ya 27 Kamena 2025, nyuma y'ibiganiro byazihuje iminsi itatu.

Perezida Trump yatangarije ku rubuga Truth Social ko yishimiye gutangaza ko we na Minisitiri w'Ububanyi n'Amahanga, Marco Rubio, bateguye amasezerano y'amahoro ya RDC n'u Rwanda yo guhagarika imyaka intambara imaze imyaka myinshi, yaguyemo benshi kurusha izindi nyinshi.

Ati 'Abahagarariye u Rwanda na Congo bazaba bari i Washington ku wa Mbere kugira ngo basinye amasezerano. Uyu ni Umunsi Mwiza kuri Afurika, kandi mu by'ukuri ni n'Umunsi Mwiza ku Isi!'

Uyu Mukuru w'Igihugu yatangaje ko nubwo agiye gufasha u Rwanda na RDC kugera kuri iyi ntambwe, akaba yarahagaritse intambara y'u Buhinde na Pakistan, agahagarika intambara ya Kosovo na Serbie ndetse n'andi makimbirane hirya no hino, atazahabwa ishimwe rya Nobel.

Yagize ati 'Ntabwo nzahabwa ishimwe ry'amahoro rya Nobel ku bw'ibi, sinzarihabwa ku bwo guhagarika intambara y'u Buhinde na Pakistan, sinzarihabwa ku bwo guhagarika intambara ya Serbie na Kosovo, sinzarihabwa ku bwo kubungabuhanga amahoro hagati ya Misiri na Ethiopia (urugomero runini rwa Ethiopia, rwatewe inkunga na Amerika mu bucucu, rwagabanyije cyane amazi yo mu Ruzi rwa Nile).'

Muri iki gihe, intambara zihangayikishije Isi cyane ni iy'u Burusiya na Ukraine imaze imyaka itatu, ndetse n'iya Israel na Iran yatangiye mu rukerera rwa tariki ya 13 Kamena 2025 kubera ubwumvikane buke ku mushinga wo gutunganya ingufu za nucléaire.

Trump yatangaje ko ashaka ko ibihugu byo mu Burasirazuba bwo Hagati bigirana amasezerano y'ubumwe ya 'Abraham Accords', ashobora kubifasha kugera ku mahoro nyuma y'imyaka myinshi aka karere kabamo intambara z'urudaca.

Yagaragaje ko n'iyo yagera ku masezerano ya 'Abraham' muri aka karere kose, agahagarika intambara y'u Burusiya na Ukraine, atazahabwa ishimwe rya Nobel, gusa ngo icyo aha agaciro ni uko abaturage bo babona imirimo ye.

Pakistan ishyigikiye ko Trump ahabwa ishimwe rya Nobel

Mu mpera Mata 2025, mu ntara ya Kashmir ihuriweho n'u Buhinde na Pakistan hadutse intambara yaturutse ku bitero umutwe w'inyeshyamba zishamikiye kuri Isilamu wagabye mu gice kigenzurwa n'u Buhinde.

Ubwo izi nyeshyamba zari zimaze kwica abaturage 26, igisirikare cy'u Buhinde cyagabye ibitero bikomeye mu gice kigenzurwa na Pakistan byahawe izina 'Operation Sindoor', gisobanura ko kigamije gusenya ibirindiro by'umutwe w'iterabwoba.

Ingabo z'ibihugu byombi zahanganye bikomeye zifashishije imbunda zirasa kure, misile ndetse n'indege z'intambara, tariki ya 10 Gicurasi zemeranya ku gahenge nyuma yo gutakaza abasirikare benshi kuri buri ruhande.

Ku wa 20 Kamena, Leta ya Pakistan yatangaje ko yatanze Trump nk'umukandida mu bazahatanira ishimwe rya Nobel, kubera uruhare yagize mu guhosha umwuka mubi wateje intambara yahanganishije Pakistan n'u Buhinde.

Yagize iti 'Leta ya Pakistan yafashe icyemezo cyo gutanga Perezida Donald J. Trump kugira ngo azahatanire ishimwe ry'amahoro rya Nobel mu 2026, mu rwego rwo gushima uruhare rwa dipolomasi yagize, n'ubuyobozi yagaragaje mu kibazo giherutse kuba hagati y'u Buhinde na Pakistan.'

Mu gihe Trump yavugaga ko ari we wahagaritse iyi ntambara ariko mu kiganiro yagiranye na Minisitiri w'Intebe w'u Buhinde, Narendra Modi, kuri telefone, Modi yamumenyesheje ko nta ruhare yagize mu gahenge kabayeho, ibishimangira ibisanzwe bivugwa na Leta y'u Buhinde ko Pakistan yamanitse amaboko.

Trump ntiyahiriwe n'ishimwe rya Nobel

Ishimwe rya Nobel rishobora guhabwa umuntu ku giti cye, itsinda ry'abantu cyangwa se umuryango mpuzamahanga, byaharaniye ubuvandimwe hagati y'ibihugu, kugabanya ikwirakwira ry'intwaro, uburenganzira bw'ikiremwamuntu n'amahoro binyuze mu rwego rwa dipolomasi.

Uwegukana iri shimwe asabwa kuba yarakoze ibikorwa bikomeye, bitanga umusaruro w'igihe kirekire mu kugabanya amakimbirane, yaraharaniye ubwiyunge cyangwa se akarengera uburenganzira bw'ikiremwamuntu n'amahoro ku Isi.

Abakandida batangwa buri mwaka bitarenze tariki ya 1 Gashyantare, kandi nta wemerewe kwitanga nk'umukandida, nk'uko amabwiriza agenga itangwa ry'iri shimwe ryitiriwe Alfred Nobel abiteganya.

Trump yatanzwe bwa mbere nk'umukandida muri iri shimwe mu 2020. Icyo gihe, umunyapolitiki Tybring-Gjedde wo muri Norvège yagaragaje ko uyu Mukuru w'Igihugu arikwiye, ashingiye ku kuba yarahuje Israel na Leta Zunze Ubumwe z'barabu, asobanura ko ari umuntu uharanira amahoro hose.

Icyo gihe, umudepite Magnus Jacobsson wo muri Suède na we yatanze Trump nk'umukandida muri iri shimwe, kubera uruhare yagize mu guhuza Serbie na Kosovo byahanganaga.

Iri shimwe ryahawe umunyamakuru Dmirty Andreyevich Muratov w'Umurusiya na Maria Ressa wo muri Philippines ku bw'uruhare rukomeye bagize mu guharanira ubwisanzure bwo kuvuga no gutanga ibitekerezo.

Mu 2024, umudepite Claudia Tenney wo muri Amerika na we yatanze Trump nk'umukandida mu ishimwe rya Nobel, ashingiye ku ruhare yagize mu guhuza Israel na Leta Zunze Ubumwe z'Abarabu, agaragaza ko amasezerano impande zombi zagiranye yazanye amahoro mu Burasirazuba bwo Hagati.

Trump yabwiye abanyamakuru ko iyo iri shimwe riba ridahabwa abaharanira ukwishyira ukizana (libéraux) gusa, we aba yararihawe inshuro enye cyangwa eshanu.

U Rwanda na RDC biteganya gusinyira amasezerano y’amahoro i Washington tariki ya 27 Kamena

Trump yagaragaje ko aya masezerano y’amahoro yari akwiye kumuhesha ishimwe rya Nobel