Author: webrwanda

Hakizimana Muhadjiri we yamaze gukuramo ake karenge nyuma yo gusinyira ikipe ya Police FC amasezerano y’umwaka usanga uwo yari amaze muri As Kigali. Ndoli Jean Claude na we ubu ni umukinnyi wa Gorilla FC nyuma yo kuva mu ntara aho yakinaga muri Musanze FC.

Aba bakinnyi babiri babaye intangiriro y’iri soko ndetse banagaragaza ko ari isoko rizabamo gutungurana ku makipe azakina icyiciro cya mbere. Tugiye kurebera hamwe abakinnyi bagera ku 10 bashobora kuzashyushya iri soko ry’igura n’igurisha bitewe n’uko umwaka urangiye

10. Kwitonda Alain Bacca. 

Rutahizamu wa Bugesera ukina anyuze ku ruhande amaze imyaka 3 muri Bugesera aho aheruka gusinya amazerano y’imyaka 2 ubu yakabaye atangira umwaka wa 4 ari nawo wa nyuma muri iyi kipe. APR FC ubu iryamiye amajanja aho yanatangiye ibiganiro n’ubuyobozi bwa Bugesera FC ngo barebe ko bagura umwaka wari usigaye kuri uyu musore watsinze ibitego 7 muri shampiyona iheruka.

9. Mugisha Gilbert: 

Na we ni undi mukinnyi ukina asatira ariko mu mpande, akaba asoje amasezerano ye muri Rayon Sports. Gilbert azwiho kuba yarabenze ikipe ya APR FC nyuma yo kugirana ibiganiro ariko bikarangira APR FC yaramuhaye ibyo atifuzaga nk’uko yabiganiriye n’ikinyamakuru Isimbi. Mugisha Gilbert na we biravugwa ko ashobora kwerekeza mu ikipe ya APR FC gusimbura Byiringiro Lague ndetse no gutanga akazi ku bakinnyi bari bahasanzwe.

8.Ishimwe Fiston: 

Yakiniye Marine FC imikino 13 ayitsindira ibitego 7 akaba  agifitiye umwaka ikipe y’ingabo zirwanira mu mazi ariko amakipe yo muri Kigali arimo Rayon Sports, As Kigali na Gasogi United yifuza kumutsindara mu mwaka uri imbere.

 7. Kagere Meddie: 

Rutahizamu w’umunyarwanda Meddie Kagere asoje umwaka w’amasezerano yari afite muri Simba SC  kandi urangiye mu buryo butari bwiza binavugwa ko ashobora kwigarukira mu Rwanda. Ikipe ya APR FC izahagararira u Rwanda mu mikino ya CAF Champions League, iracyafite ikibazo cya ba rutahizamu n’ubwo umwaka ushize yasinyishije Tuyisenge Jacques. Kagere Meddie w’imyaka 34 ashobora kuza muri APR FC akifashishwa nka rutahizamu umenyereye imikino nyafurika ku buryo iyi kipe yakwitwara neza ku ruhando mpuzamahanga.

6. Karera Hassan na Bayisenge Emery: 

Impamvu aba bakinnyi 2 twabashyize ku mwanya umwe ni uko bahuje amakuru. Karera Hassan ni intizanyo ya Kiyovu Sport muri As Kigali ubu asigaje umwaka umwe ku masezerano afitiye Kiyovu Sport, ni umukinnyi wagize ibihe byiza muri As Kigali dore ko ubwugarizi bwa Eric Nshimiyimana bwari buhagaze neza tugendeye ku musaruro bagize muri uyu mwaka. Karera avuga ko atariyumvisha gusubira muri Kiyovu Sport, kandi Kiyovu Sport nayo ikavuga ko ikipe izazana amafaranga hagati ya APR FC na As Kigali uyu mukinnyi izamwegukana.

Bayisenge Emery na we muri Nzeri 2020 yasinyiye As Kigali amasezerano y’umwaka umwe bivuze ko ubu yigenga. Aba bakinnyi bombi bivugwa ko APR FC ishaka kubaterurira rimwe bakaza gusimbura Manzi Thierry werekeje hanze ndetse na Mutsinzi Ange ugiye kujya muri Maroc.

5. Babuwa Samson: 

Rutahizamu ukomoka muri Nigeria, aherutse gusezera kuri Kiyovu Sport nyuma y’amasaziro y’amasezerano y’umwaka yari yasinye mu 2020. Uyu mwaka w’imikino yakinnye imikino 5 atsinda ibitego 3 bitandukanye n’umwaka ushize yari yasoje shampiyona ariwe ufite ibitego byinshi. Rayon Sports yakuzwe kuvugwa ko ishaka uyu mukinnyi na mbere yo kwerekeza muri Kiyovu Sport na n’ubu biravugwa ko iri mu biganiro n’uyu musore ufite umugore w’umunyarwandakazi. Babuwa kandi hari amakuru yemeza ko ashobora kwerekeza muri APR FC mu gihe yaba amaze kubona ibyangombwa by’uko ari umunyarwanda.

4. Nishimwe Blaise: 

Nyuma y’umwaka umwe gusa ageze muri Rayon Sports, Blaise ashobora gutandukana n’iyi kipe aho APR FC ishobora kumukoresha mu nzira y’igirana akaza akanyurana na Niyonzima Olivier Saif.

3.Hassan Djibrine:

Uyu musore ukomoka muri Chad umwaka ushize w’imikino yagaragaje urwego rwo hejuru ubwo yatsindiraga Etincelles ibitego 7  ndetse byanatumye agaruka mu mitwe ya benshi cyane.

2. Niyonzima Olivier Saif: 

Asoje amasezerano ye muri APR FC ndetse ntabwo ibiganiro biri kugenda neza kubera ko amafaranga yifuza APR FC itari kuyagezaho. Rayon Sports n’ubundi uyu musore w’imyaka 28 yamenyekaniyemo irimo iramuha amafaranga yenda kungana n’ayo APR FC itanga ariko kandi we ngo bigendeye ku buzima yanyuzemo muri APR FC yumva yasinyira Rayon Sports aho kuguma muri APR FC ku mafaranga macye.

1.Rukundo Denis: 

Myugariro wahoze mu ikipe y’APR FC yakiniye kuva mu 2017 kugeza mu 2019 ubwo yaje gusezererwa mu bakinnyi 16 APR FC yigeze kwirukana mu 2019, akaza kwerekeza muri Uganda mu ikipe ya Police FC kuri ubu ari mu bakinnyi bahagaze neza ku mwanya bakinaho. Mu mukino we wa mbere yakiniye Amavubi, Denis Rukundo yitwaye neza kugeza aho amakipe ya hano i Kigali yatangiye kumwifuza harimo As Kigali iyoboye urugamba ndetse na Rayon Sports ifite ikibazo kuri ba nimero Kabiri.

Hari n’abandi bakinnyi tutashyize ku rutonde ariko bitezwe kuba bagira icyo bakora cyangwa hari impinduka zaba bakava mu ikipe bakajya mu yindi, muri abo twavugamo nka Niyigena Clement, Habamahoro Vincent, Rafael Osawul Oliseh ukinira Bugesera, Eric Zidane, Luvumbu ndetse n’umuzamu  Nsabimana Jean de Dieu uzwi nka Shaolin wafatiraga Sunrise FC.

Ababyeyi nabo ni abantu bashobora kurakara, bashobora kukurakaza ariko zirikana ko ari 'ababyeyi bawe' bityo wirinde kubababaza. Ubanza nari bukubwire ko udakeneye ibikubiye muri iyi nkuru kugira ngo wibuke kubaha umubyeyi ariko reka mbyihorere kuko nziko rimwe na rimwe tuba dukeneye kwibutswa. Reka nkubwire nti 'uko waba warakaye kose' uzirinde kuba wabwira umubyeyi wawe ibi bintu bikurikira:

1. Ndakwanga.

Nyamuneka iri jambo ntirizigere na rimwe risohoka mu kanwa kawe ngo uribwire umubyeyi wawe kabone n'ubwo waba warakaye bingana iki. Ese ujya wibuka ko hari abana badafite ababyeyi, ku buryo bifuza n'ababyeyi bo kubatonganya bakababura? Umuntu wafashije Imana kukurema wamunganya iki? Ko 'ntawamusimbura'.

2. Kuki wambyaye /Ntuzongere kumbyara

Aya magambo yombi nyashyize hamwe kuko aragendana. Uwubahutse kuvuga rimwe n'irindi yarivuga kuko riba riri hafi aho. Sinabasha kugusobanurira ububabare umubyeyi w'umumama agira abyara. 

Yewe n'ububabare bw'umubyeyi w'umu papa agira mu gihe ategereje, nta kintu ari bubikoreho, agomba gusa gutegereza ko bamuha inkuru nziza ko 'umubyeyi yabyaye neza', kandi twibuke ko haba hashobora no kuza inkuru itari nziza tutari buvuge kuko tutifuriza umubyeyi n'umwe kwakira iyo nkuru mbi.  Tekereza ibyo byose kubirengaho ukamubwira ngo 'wambyariye iki?' 'Ntuzongere kumbyara'.

3. Ntunkunda 

Burya ibizakubaho byose, ubuzima uzanyuramo bwose bwaba busharira cyangwa se buryoshye, ntuzigere na rimwe ubwira umubyeyi wawe iri jambo. Waba warakaye kubera impamvu runaka, ntugomba na rimwe kuvuga iri jambo ubwira umubyeyi wawe.

Hariho ibyo umuntu ahura nabyo mu buzima wenda akaba yahohoterwa agafatwa ku ngufu akaba yabyara umwana atabiteganyije. Abo babyeyi sinabasha kwiyumvisha ububabare bagize, sinabasha kwiyumvisha uko baba bamerewe. 

Ariko niba warabashije kumenya ko umubyeyi wawe byamugendekeye gutyo noneho ukongeraho kumubwira ko atagukunda ugendeye ku kuba yarakubyaye atabiteganyije cyangwa se yarahohotewe, uri kumwongerera agahinda ku ntimba ashobora kuba atazakira bibaho.  Kuba yaremeye akakubyara si uko yari akwanze. Ahubwo ni umukoro wawe wo kumukunda ukamwibagiza agahinda yatewe ubwo yahohoterwaga.  

4. Iyo uba warapfuye.

Ariko koko gutinyuka ukavuga iri jambo bibaho? N'ubwo mbitangariye ndabizi ko bibaho hari ababivuga ariko nizere ko atari wowe. Iri ni ijambo riremereye rirenze urugero rw'imyumvire ya muntu ashobora kuba yabasha kwiyumvisha uburyo umwana yatinyuka kubibwira umubyeyi we. Ariko ujya wibuka ko hariho abana batagize amahirwe nibura yo kubona uko ababyeyi babo basaga? 

5. Ceceka (aha nanze kongeraho rya jambo nyandagazi rikomeye cyane nawe uzi bamwe batajya batinya kuvuga)

Buriya iri jambo na ririya nanze kuvuga, uwo waribwira wese rirababaza cyane. Noneho ibaze kuribwira umubyeyi wakwibarutse. 

6. Uri umubyeyi mubi, uri umubyeyi gito, uri urugero rubi

Hariho ibiba birenze imyumvire ya muntu tutanabasha kubonera ubusobanuro. Gusa bibaho ugasanga abana baratinyuka gukoresha amagambo aremereye gutya babwira ababibarutse.

7. Iyo mba narabonye ibi, iyo mba narahawe ibi nkiri umwana

Burya uziko ibyo ababyeyi bawe bataguhaye ukiri umwana atari uko bari babikwimye? Burya ni uko ntabyo bari bafite. Bariryaga bakimara ngo ubashe kugira ubuzima bwiza. Ibyo bataguhaye ni uko batari babifite, nyamara barabibonaga ko ubikeneye. Kubirengaho rero ukababwira aya magambo, uba ubateye agahinda katabasha kubonerwa igisobanuro. 

8. Abana banjye sinzabarera nk'uko wandeze

Yego wabyumvise neza. Hari abageza igihe nabo cyo kubyara ariko ukaba wakibaza ko batari bamenya agaciro ko kubyarwa. Kuba umuntu wabyaye cyangwa se witegura kubyara ashobora kuba yabwira umubyeyi we aya magambo biteye agahinda gusa ntakindi gisobanuro umuntu yabasha kubibonera. Birenze imyumvire ya muntu.

Burya niba utari unabizi, Umubyeyi w'umuntu ni umuntu ukomeye cyane ndetse by'umwihariko mu maso y'Imana. Imana yamuhisemo, iramwifashisha kugira ngo ikureme. Muhe ako gaciro kandi ubimwubahire.

Ababyeyi nabo ni abantu kandi burya nta muntu udakosa. Nibyo ubisomye neza, nta muntu udakosa bivuze ko n'ababyeyi rimwe narimwe barakosa cyangwa se rimwe narimwe bakaba bafata ibyemezo bitari byo. 

Ariko bahora ari ababyeyi bawe. Hari uburyo mushobora kuganira ukaba wamwereka ikosa rye cyangwa se icyemezo kitari cyo yafashe ariko ukabikora umwubashye. Kuko icyubahiro urakimugomba.

Umunyarwanda yaravuze ngo 'Akabura ntikaboneke ni Nyina w'Umuntu'. Ngarutse cyane kuri 'Nyina w'Umuntu' kuko akenshi usanga aribo bakunze gutukwa n'abo bibyariye kuko abo 'bana gito' akenshi bikanga ko 'barusha abo babyeyi babo intege' nyamara ntibazirikane ububabare uyu mubyeyi aba yaragize amubyara. 

Gusa yaba umubyeyi w'umugabo yaba umubyeyi w'umugore buri 'mubyeyi wese akwiye kubahwa, yaba agifite agatege yaba atakigafite'. Ubaye warigeze gucikwa ukavuga aya magambo ntarirarenga n'ubu wasaba imbabazi. Niba kandi uwo mubyeyi wabibwiye atakiriho, kwicuza no gusaba Imana imbabazi byaba bihagije, yakubabarira umutima wawe ugatuza.

Source: Legitpost.com.ng & ibitekerezo bwite by'umwanditsi w'iyi nkuru

    

Ubusanzwe gusomana biri mu bwoko bwinshi, hari ubwo biba hagati y'abakunzi cyangwa inshuti zisanzwe ariko byose bigamije umunezero. Umunsi mpuzamahanga wo gusomana wizihiza ibyishimo bizanwa n'iki gikorwa ndetse n'akamaro kabyo mu mibereho y'abatuye isi.

Umunsi mpuzamahanga wo gusomana washyizweho mu mwaka wa 2006, ukaba ufite inkomoko mu Bwongereza. Washyizweho hagamijwe guha agaciro ugusomana gukorerwa hagati y'abakundana no kwishimira umwanya gusomana bifata muri sosiyete.

Ni ukuvuga ko gusomana byarenze kuba iby'abakundana bigera no mu kuba indamukanyo hagati y'abantu batandukanye bitewe n'imico yabo. Abana bato nabo bakunze guhabwa utubizu kenshi n'ababyeyi babo n'abandi bantu babishimiye n'ubwo bigenda bikendera uko umwana agenda akura.

Ubushakashatsi bugaragaza ko abantu bari ku kigero cya 5% cy'abakuze bari hejuru y'imyaka 45 bahuza iminwa basomana nibura inshuro 31 mu Cyumweru.

Kuri uyu munsi, abantu batandukanye biganjemo abakundana barasomana cyane ndetse n'abagishakisha abakunzi batarafata umwanzuro. Babikora bagamije guhana ibyishimo n'imbamutima zikomoka mu gusomana kuvuye ku mutima wa buri umwe mu bari gukorana iki gikorwa.

Uko wakwizihiza uyu munsi wo gusomana

Hari abantu bazi ko gusomana biba hagati y'abakundana gusa ariko siko bimeze. Umuntu wese uha agaciro hari uburyo wamusoma cyane cyane kuri uyu munsi wahariwe gusomana.

Niba ubyutse mu gitondo ku bafite abafasha, muhe aka bizu ku itama umwifurize igitondo kiza. Suhuza izindi nshuti zawe uziha bizu ku itama cyangwa umusome ku kiganza umwifurize umunsi mwiza wo gusomana.

Intego z'umunsi mpuzamahanga wo gusomana

Gusomana si ibyo mu bakundana gusa ahubwo ni ikimenyetso kibutsa abantu bawe ko ubitayeho. Ubushakashatsi bugaragaza ko abantu bari ku kigero cya 40% bahugira mu bindi bintu birimo kureba televiziyo bakabura umwanya n'uburyo bwo kwereka inshuti zabo ko babitayeho. Bizu rero ni imwe mu nzira zo guha agaciro inshuti yawe.

Indi ntego y'umunsi wo gusomana ni ukwibuka akamaro bifitiye umubiri haba inyuma n'imbere. Gusomana kuvuye ku bushake bwa buri wese bishobora gutwika za karoli 6.4 buri munota. Izi zisatira ingano y'izo umuntu atwika igihe ari muri siporo nka Gym n'izindi.

Ikindi ni uko bisakaza umuco w'abantu runaka. Usanga abantu benshi bakunda gusomana hatitawe ku gihugu akomokamo cyangwa imyemerere ye. Kuri uyu munsi hari n'ushobora kubona inshuti ye y'ubuzima bwose.

Ubushakashatsi bwatangajwe mu gitabo kitwa The Art of Kissing cyanditswe na William Case cyagaragaje ko gusomana bitwika karori 6.4 mu munota. Ubusanzwe nibura karoli 26 bifata urugendo rw'iminota itanu ngo zishye cyangwa nibura gusomana iminota igera kuri ine.

Ikindi bugaragaza ni uko gusomana umunwa ku wundi bigira umumaro urenze uwo gusomana ku kiganza n'ahandi hatandukanye abasomana bajya bahana bizu.

Ibyo wemerewe n'ibyo utemerewe mu gusomana

Gusomana kwawe bikwiye kuba mu gihe runaka kandi bikaba bifite intego. Ntawe uzishimira kurambana mu bucuti n'umuntu umusoma kenshi bikabije, hari imbibi uba udakwiye kurenga.

• Saba umwanya: Ntukwiye kubyuka ngo uhite usomagura umuntu nta mvugano cyangwa integuza, yego uramukunda wenda nawe aragukunda, ariko bikore mu kinyabupfura nibyo bizanatuma umenya niba yishimye cyangwa bitamunezeza.

• Menya gutandukanya abantu usoma: Wibuke ko uko usoma umugabo cyangwa umugore wawe atari ko wasoma mama wawe, undi muntu wo mu muryango cyangwa inshuti yawe isanzwe.

• Gerageza uburyo bwo gusomana butandukanye: Ku munsi mpuzamahanga wo gusomana ugomba gutera intambwe, niba wasomaga umuntu ku munwa ukamenya ko no ku gahanga bishoboka, ku kiganza bishoboka, n'ahandi hatandukanye bitewe n'uwo uri gukorera iki gikorwa.

Umunsi mpuzamahanga wo gusomana wizihizwa tariki ya 6 Nyakanga buri mwaka, utandukanye n'uwizihizwa tariki ya 13 Gashyantare. Uyu wo uba ari integuza y'umunsi wahariwe abakundana uzwi nka Saint Valentin uba kuwa 14 Gashyantare buri mwaka.

Gusomana bikaba ari kimwe mu bimenyetso bigaragaza imbamutima z'umuntu kuri mugenzi we ndetse bikaba bigira akamaro mu mubiri w'umuntu cyane cyane mu mitekerereze no mu yindi mikorere itandukanye nk'uko twabigarutseho muri iyi nkuru.

SRC: nationaldaycalendar

Uyu munsi tariki ya 6 Nyakanga, ni umunsi mpuzamahanga wo gusomana. Gusomana ni ikimenyetso cy’urukundo kuri bamwe, kikaba ikimenyetso cy’imyitwarire mibi ku bandi. Mu muco wa kinyafurika, gusomana byo bisa n’aho ari bishya, ubikoze afatwa nk’umunyamahanga cyangwa se uwataye umuco.

Wenda muri iki gihe aho bisa n’ibitangiye kumenyerwa mu mijyi ariko n’aho iyo ubikoreye mu ruhame, ntihabura abakureba ukundi.

Icyakora n’ubwo bitavugwaho rumwe ku babikora, gusomana ni ikimenyetso cyiza, gifite n’akamaro ku buzima bw’ubukora.

Impuguke akaba n’umwanditsi w’ibitabo ku rukundo Andréa Demirjian we yagize ati 'Gusomana ni urukundo ruhamye. Uba wageze mu mwanya wa roho yawe. Gusomana bigera ku ndiba y’umutima wawe kuko ni bwo buryo bwo kugaragaza urukundo nyarwo. Gusomana rimwe ku munsi bishobora kukurinda kurwara.'

Twifashishije inkuru yanditswe na CNN, tugiye kukugezaho imimaro 8 umubiri w’umuntu wungukira mu gusomana.

1.Bifasha kugabanya umuvuduko w’amaraso

Impuguke Demirjian ivuga ko 'gusomana' bituma umutima w’umuntu utera neza, bikawuha umutuzo uwuha kugabanya umuvuduko w’amaraso. Bituma amaraso atembera neza mu ngingo zose z’umubiri.

2.Bigabanya kuribwa umutwe n’imisonga

Demirjian avuga ko nk’umuntu uribwa umutwe ndetse n’abaribwa kubera kujya mu mihango, iyo basomanye n’abo bakunda akanya kanini bibafasha kugabanya uburibwe bari bafite. Uyu mugabo avuga ko nk’ababana cyangwa abakundana, badakwiye kugira urwitwazo igihe barwaye umutwe, ahubwo ko ari byiza gufatirana icyo gihe bagasoma abakunzi babo kugira ngo na bo boroherwe.

3.Byoza amenyo

Kubera imvubura z’amandwe zivubura menshi iyo muri gusomana, ayo macandwe yoza amenyo, bikayarinda umwanda ushobora kuyajyaho ukagutera uburwayi bw’amenyo.

4.Kwigirira icyizere

Ubushakashatsi bwakorewe mu Budage bwagaragaje ko abagabo bava iwabo mu ngo bamaze gusomana n’abagore babo, biriranwa icyizere n’akanyamuneza ku kazi kandi bagatanga umusaruro.

5.Bituma uhorana itoto

Demirjian avuga ko gusomana birambura imitsi yo mu ijosi n’ibice by’uruhekenyero, bigahora birambuye ari naho hakunze kugaragaza ko umuntu akuze. Iyi mpuguke ivuga ko mu gusomana uba urambura iyo mitsi maze uhagora ugaragara nk’umusore cyangwa inkumi.

6.Ni intangiriro nziza ku bashaka gutera akabariro

Demirjian avuga ko iyo mugiye gukora imibonano mpuzabitsina, hari ubwo mwese cyangwa umwe muri mwe aba atabishaka cyangwa atabirimo neza. Avuga ko gusomana ari yo ntangiriro nziza, ituma mubanza kwiyumvanamo , bikaza gutuma n’igikorwa kiri imbere kigenda neza.

7.Gusomana bibyutsa imisemburo y’ibyishimo

Niba ubabaye, wikiyicisha agahinda, shaka umukunzi wawe umuhe akabizu. Demirjian avuga ko gusomana bivumbura imisemburo y’ibyishimo mu bwonko, uwari ufite agahinda kakagenda.

8.Kugabanya umubyibuho

Demirjian avuga ko gusomana ari byiza kuko bigufasha kugabanya ibilo iyo ufite umubyibuho ukabije. Avuga ko ubusanzwe nk’iyo uri muri siporo isanzwe, nibura bigutwara iminota 30 kugirango ugabanye calories hagati ya 8 na 16 mu mubiri wawe, nyamara ngo gusomana by’akanya gato bishobora kubigufashamo byihuse.

Kuko uzibagirwa umubabaro wawe, Uzawibuka nk’amazi amaze gutemba. Yobu 11:16

Imana inyuranya ibihe ni yo ivuga iti”Uzibagirwa imibabaro yawe” Tuvuge tuti Imibabaro niyo igihe gito, kandi mukomere kuko imibabaro duhura nayo ntikwiriye kugereranwa n’ubwiza tuzahishurirwa. Mugire amahoro y’Imana!

Umwigisha: Innocent Bizimungu

Wakurikira kandi n’iyi nyigisho: Icyumweru cy’imibabaro ya Yesu by Pastor Desire

[email protected]

Nyinawamahanga yamaze igihe kirekire akorana n’umukecuru w’umupfumu, ariko igihe cyaje kugera ijwi ry’Imana riramusanga rimutegeka kujya mu rusengero hanyuma aratura yakira Yesu nk’Umwami n’Umukiza w’ubugingo bwe ndetse asengera n’umupfumu bakoranaga na we arakizwa.

Mu magambo ye Nyinawamahanga arasobanura uko yakoranye n’umupfumu n’uburyo imbaraga z’Imana zabimukuyemo akakira agakiza.

Ati: 'Mbere y’uko nkizwa inzu yanjye, yari ishinzwe kwakira abantu baje kwivuza ni ukuvuga ngo umuntu yazaga bitewe n’ibibazo afite wenda ari umusore ukeneye umugeni, umuntu watewe n’abazimu, abo baroze n’ibindi. Iyo salon yanjye abantu binjiragamo bakuzura kuko hazaga abakomeye, noneho wa mukecuru twakoranaga watangaga imiti yazanaga urwabya yakoreshaga hanyuma njyewe nari nshinzwe kwinjiza abantu nkabicaza neza nkajya numva ibibazo byabo noneho nkabamugezaho nkajya mubwira ikibazo cya buri muntu nkamufasha mu rwego rwo kwinjiza amafaranga.

Mubyukuri ubwo buzima nabubayemo imyaka 14 Imana indeba ikanyihorera nkabibamo, ariko Imana yandinze kubiheramo. Nagiranye amakimbirane na wa mupfumu kuko mu rugo haje umuturanyi ufite umwana urembye arambwira ati 'Uri inshuti yanjye ariko mfasha umwana wanjye agiye gupfa'. Ndebye nsanga umwana yazanye urufuzi ameze nabi cyane! Ndirukanka kuko akazi kanjye kari ako kugeza ibyifuzo kuri wa mukecuru ndamubwira nti 'Mukecu! Hano hari umuntu ufite umwana urembye mubabarire byakomeye' Yansabye kumuzana aramureba ariko kuko atari afite amafaranga naramuvuganiye ariko umupfumu yanga kubyumva ngo amuvure.

Umukecuru yanze kubyumva nazanye ya kamere yanjye n’ubushizi bw’isoni kuko nangaga agasuzuguro ndamutonganya nti: 'Ndaguha umuntu ngo umuvure ukabyanga ndakubwira ngo umuntu ni umuturanye arembesheje umwana kandi yemeye ko azana amfaranga kuki umwangiye?' Imana iteza ikibazo ngo ikemure ikindi kuko kuva uwo munsi urukundo twari dufitanye n’uwo mupfumu rwararangiye kuko nahise nsohora abantu bose bari mu nzu baje kwivuza ndabirukana mbabwira ko iby’imiti birangiye, nagize ifuhe rikomeye cyane ku buryo nta muntu wazaga kunkiniraho. Imishyikirano twagiranye dusinyana uwo munsi twarasinyuye'.

Igihe cyarageze Nyinawamahanga ahamagarwa n’Imana mu buryo butangaje nk’uko abisobanura agira ati: 'Umunsi umwe nari ndimo gutekereza nigarukaho ndimo gutekereza ubutunzi bwanjye bugiye harimo imodoka, icyuma gisya, akabari kanjye na depot byose byabaye nko gukubura. Narimo nibaza niba ari Imana ibikoze cyangwa ari umuntu wabigizemo uruhare, ijwi ryansanze aho rirambwira ngo mama Burende mwana wanjye! Nararangaguje mbura umuntu ubimbwiye ndongera ndatuza ntekereza ngo ariko Mana ubu nzongera ncuruze koko?

Mugihe nkirimo ntekereza gutyo ijwi ryarongeye riti 'Mwana wanjye haguruka ujye gusenga, nahise nibuka uko mu bapfumu twajyagayo tukumva amajwi avugira ahantu utabona, ubwa gatatu ijwi ryarambwiye ngo haguruka ujye gusenga, mpita mpaguruka niruka njya gusengera ku rusengero rwa ADEPR Kinamba, iryo jwi ryarankurikiranye ringeza ku rusengero nagiye ntazi ibyo ngiyemo mpagarara imbere y’urusengero nahakuwe n’umudiyakoni ati 'Ngwino nguhe umwanya wicare mukozi w’Imana'. Naramusubije ngo ntabwo ndi umukozi w’Imana' Yaranze ati 'Ndava aha nguhaye umwanya wo kwicaramo'.

Nakomeje kwanga ariko rya jwi ni ryo ryantegetse kwinjira ngeze mu rusengero rirambwira ngo tuza. Nasanze umushumba arimo kwigisha ku nkuru za Gidiyoni ko ku rugamba atatsindishirijwe n’ingabo nyinshi, ahubwo yatsindishirijwe n’Imana yo mu ijuru. Yakomeje yigisha ngo Yesaya Imana iramweza imukoza ikara ryaka ku munwa iramutuma. Nabajije umubyeyi twari twegeranye nti 'Ese yamukojeje ikara ryaka ku munwa ni iryo mu ziko?' Yarandebye uko nambaye ipantaro na dredi zigera mu mugongo aho kunsubiza aranseka.

Nakomeje numva ibyo pasiteri arimo kwigisha aravuga ngo abantu bagiye mu bapfumu, abantu bafite imitwaro ibaremereye Imana ije kubaruhura. Nanjye numvise ndemerewe kuko byose nabigiyemo, muri njye nabonye umuntu ampagaze imbere arambwira ngo haguruka ujye imbere, mu mutima nkibaza ngo ese ndahaguruka nambaye ipantaro ntibanseka? Narahagurutse basekera rimwe numva umutima umwe urambwiye ngo sohoka undi ukambwira ngo nicare nkirimo kubyibazaho rya jwi ryanzanye rirambwira ngo pfukama.

Napfukamye ku mukeka ariko ntazi icyo mfukamiye kuko bwari ubwa mbere ngeze mu bantu b’Imana. Mugihe nkiri aho baradusengeye batujyana mu cyumba. Baratwakiriye tubasha kwiga turabatizwa twinjira muri Yorodani ku itari 20 Ukuboza mu mwaka wa 200'.

Mubyukuri nkimara gukizwa nakomeje gusengera wa mupfumu twakoranaga ngo nawe Imana izamuhe agakiza noneho umunsi umwe araza arambwira ati 'Njyewe nabonye ko usenga Imana, narapfuye mara iminsi itatu hanyuma mbona Malayika arambwira ngo ninze gukizwa, none rero ndashaka gukizwa nkamaramaza njyana gusenga' Kurya yari afite impano yo guhanura akorera Satani, Imana yahise imuha impano y’ubuhanuzi.

Source: vision tv

[email protected]

“Ntimukiganyire mutekereza iby’ejo, kuko ab’ejo baziganyira iby’ejo. Umunsi wose ukwiranye n’ibibi byawo” Matayo 6:34. Mwibuke ko Yesu yavuze ngo 'Uwo munsi uzatungura bamwe, basinze amaganya y’isi!’

'Rimwe nigeze kwicara Satani arantera ( natewe n’amaganya y’isi), mbona nta kiza na kimwe Imana yankoreye. Hari nko muri 2000 sinzabyibagirwa mvuye muri nibature. Uzi ko Satani adatinya n’urusengero? Yanteye mvuye muri nibature anyereka ukuntu Imana yanterereranye, yanyicishije umubabaro nta kiza nigeze mbona. Ndavuga nti 'Ariko ubu ko nkiri umusore muto, ibi bintu by’ivugabutumwa uwabireka nkazinga nkajya gushaka ibindi nkora?’ Yewe, erega naragiye mbishyira mu bikorwa! Ngiye kumva numva ijwi rirambwiye ngo 'Uzinge ibyawe, ibyo naguhaye ubirekere aho!'

Ngiye kureba nsanga imyenda yose ni yo abantu bampaye, n’igikapu nicyo bampaye na Suvetoma (Sous vetements) nizo banguriye, nta kintu cyanjye na kimwe nari mfite! Mbura icyo nzinga Imana iranyihorera. Bigeze nimugoroba irambwira ngo 'Rero wavuze ibibazo byakugoye n’ibyo nagutereranyemo ntaragukorera. Fata urupapuro wandikeho ibyo nagukoreye' uzi ko nicaye nkabyandika umubababaro ukayoyoka numva! Uzi ko byo nabuze aho mbyandika?” Past Desire Habyarimana

Twige kubara imigisha bizaturinda amaganya y’isi

Muri iyi minsi hari ugutsikamira gukomeye, si abategereje urubyaro gusa: Yewe n’abacuruzi birabakomereye kubera ingaruka za Covid19, n’abiga birabakomereye, n’abubatse ingo birabakomereye. N’urubyiruko birarukomereye, yewe n’abashumba birabakomereye, nta muntu mwaganira ngo wumve atekanye. Hari ugutsikamirwa mu isi y’umwuka guteye ubwoba, hari ikirere kiremereye aho umuntu aterura isengesho akumva ntirirenze parafo! Hari ugutsikamirwa gukomeye aho abantu bumva hari igihu cy’umwijima gisa nkaho kibuditse ukumva nta bihe byiza bihari. Abantu benshi niko bamerewe mu mitima.

Muri iyi minsi rero yo gutsikamirwa, muri iyi minsi komeye itya, muri iki gihe ikirere twumva ko kidafungutse nagira ngo mbabwire icyo tugomba gukora. Mbere yuko mbabwira icyo dukwiye gukora, reka mbanze mbabwire icyo dukwiye kwirinda: Dukwiye kwirinda 'kwiganyira' kuko iyo bimeze bityo, bizana n’umwuka wo gucika intege, bizana no kwibagirwa nuko hari icyo Imana yakoze ku buzima bwawe. Bizana kandi no kunanirwa gusenga ukumva Bibiliya yose ni nk’ikayi y’umweru itanditsemo ikintu na kimwe. Yewe, no kuririmba bikanga ubusabane n’Imana bugapfa, yewe n’ubuabane na mugenzi wawe nabwo bukagira ikibazo.

Iyi minsi, ntabwo yoroheye abagenzi mu byukuri ntabwo ari ibihe byiza, ni ibihe bkomeye. By’umwihariko rero abagize ‘Agakiza Hope Family'(Imiryango itegereje urubyaro) bo bafite umwihariko kuko gutegereza urubyaro igihe kirekire nabyo ni ikindi kizana gutsikamirwa kwihariye. Bibiriya iratubwiye ngo “Ntimukiganyire mutekereza iby’ejo, kuko ab’ejo baziganyira iby’ejo. Umunsi wose ukwiranye n’ibibi byawo.”Matayo6:34

Hano, ntabwo kizira gukora project, ntabwo kizira gushyira kuri konte, nta n’ubwo kizira gutekereza iby’igihe kirerkire. Ariko iyo Bibiliya ivuga ngo'Ntimukiganyire iby’ejo' reka dufatemo ko: kwiganyira ni icyaha(Amaganya y’isi ni icyaha). Mwibuke ko Yesu yavuze ngo 'Uwo munsi uzatungura bamwe basinze amaganya y’isi!’ uzi ko amaganya y’isi ajya kumera nk’ubusinzi, bigera igihe umuntu akibagira uko yitwa, apetit ikbura n’ibitotsi bikagenda! Ibintu byose bikagenda kubera kwiganyira. Kwiganyira nicyo kintu kibi kibasha umukristo, mwibuke ko ari nayo nkoni ikubita kwizera k’umuntu kukayoyoka kugashira pe!

Kwiganyira ni ikintu kibi, Yesu yaratwihanangirije aratubwira ngo 'Ntitukiganyire’. Wari uzi ko amaganya y’isi yimura Imana mu murokore agatakaza Yesu, agafata imyanzuro yo kuva mu byizerwa kubera kwiganyira! Ntabwo batubujije gupanga imishinga y’igihe kirekire, ahubwo baravuze ngo 'Ntimukiganyire iby’ejo’. Muribuka ko mu butayu Imana yababwiye kwegeranya Manu y’umunsi umwe, mu isengesho rya Data wa twese haravuga ngo 'Uduhe ifunguro ryacu ry’uyu munsi ' byari bishatse kuvuga iki? Byashakaga kuvuga ko Imana itarwanya imishinga, guhunika no gukira,… Imana yifuza ubusabane bwacu nayo buri munsi. Ibyo byaba urukingo cyangwa se umuti udutera kwiganyira.

Abataganyishwa no gutinda kubona abana, baganyishwa no kubura icyo babagaburira, abataganyishwa n’ibyo, baganyishwa n’ubushomeri bw’igihe kirekire. Narebye imibare iva mu bitaro by’indera honyine, aho bavuga ko mu gihe kitari kirekire(Mu myaka nk’2-3)bakiriye abantu bagize ikibazo cyo mu mutwe barenze ibihumbi bitatu. Birumvikana ko abo ni ababashije gutera intambwe bakajya kwa muganga, hari abandi bafite ibibazo by’agahinda gakabije kubera ihungabana n’ibyo banyuzemo. Kwiganyira ni ikintu gikomeye, Imana yifuza ko dusabana nayo buri munsi.

Imana ukayigarukaho ukayibwira ngo’Wakoze kumpa amahoro y’uyu musi, wakoze kumpa ibyishimo by’uyu munsi, wakoze ko wandinze nkaba nagiye mu muhanda nkagaruka. Njya mbona abantu bumva ko ari abahanga, ariko gutwara imodoka ntugonge wagira ngo hari ubuhanga burimo cyane? Yewe, utanagonze wowe bakugonga! Hanyuma se, nta bantu uzi bakatiwe kubera kugonga, agakatirwa umwaka cyangwa ikindi gihe kubera ko yagonze? Hanyuma se wowe igihe uva mu rugo ugataha amahoro, si ubuntu?

Nta bantu bava mu rugo bapanze imishinga bumva ntacyo bitwaye, hanyuma bagataha mu bitaro? yewe hari n’abataha muri moruge(Morgue) kandi harimo n’abakiranutsi. Imana ni yo ikurinda ikakubera ingabo igukingira, ikagufasha mu buzima bwa buri munsi ntabwo ukwiriye kwiganyira. Ahubwo ukwiye kumenya ko Imana ikiri umutabazi wawe, ikiri umurengezi wawe n’umufasha utabura kuboneka mu byago no mu makuba. Ukarushaho kuyiringira, ukayigarukaho buri munsi. Bibiliya iravuga ngo’Uduhe ifunguro ryacu ry’uyu munsi’

Umuririmbyi yararirimbye ngo'Bara iyo migisha nonaha ntugire uwo usigaza, bizagutangaza ukuntu ari myinshi’. Hari abakurushije amajyambere, abandi bagutanze kubyara, yewe abana barakuze. Ni byiza ko babyaye nawe uzabyara mu gihe cyawe, ariko bara imigisha nubwo utarabona abana hari ibindi ufite abandi bantu badafite. Nyamara hari benshi cyane bifuza kumera nkawe: Nibura nawe umugabo muracyakundana, nibura nawe haracyari ibindi Imana yakoze ukwiye kubara.

Erega Imana yagize neza, ushobora gusanga ibyo itaragukorera ari nka 3 cyngwa 4-5. Ariko mu buzima kuva ubayeho, ntuyikamire mu kitoze hari ibindi byiza Imana yakoze. Ni ukuri Imana yarakoze! Imana yarakoze ikwiriye gushimwa.

Hanyuma rero wige kubara imigisha, ni ryo banga ryo gutsinda Satani, azatsindwa ku buzima bwawe . Niwiga kubara imigisha Satani azatsindwa kandi bizatuma utsinda amaganya y’isi!

Reba hano iyi nyigisho yose

[email protected]

Africa haguruka yumvikanye bwa mbere mu mwaka w’ibihumbi 2000 ku muhati n’ishyaka byashibutse mu iyerekwa rya Apostle Dr Paul Gitwaza umushumba mukuru w’itorero Zion Tample ku isi, igamije ko abatuye umugabane wa Afurika n’abanyafurika bose batera imbere mu Mwuka mu bugingo ndetse no mu mubiri.

Muri uyu mwaka, Africa Haguruka ifite insanganyamatsiko igira iti: “Africa haguruka wakire umuyaga w’impinduka nziza” (AFRICA EMBRACE THE WIND OF CHANGE)” Ezekiyari37:1-10. Iki giterane kizatangira ku itariki 11 z’ukwezi kwa karindwi, gisozwe kuri 18 zuko kwezi 2021. Nkuko kandi byagenze umwaka ushize wa 2020, kigiye kongera kuba hifashishijwe ikoranabuhanga mu rwego rwo kwirinda ikwirakwira ry’icyorezo cya Covi19.

Intumwa, Dr Paul Gitwaza Muhirwa akomoza ku mateka n’iyerekwa ry’iki giterane mpuzamahanga kigamije kuzahura africa, yavuze ko ari ibintu Imana yari yabanje kumuganirizaho, ati” Imana yatubwiye ko ari igihe cyo guhaguruka kwa Africa, icyo gihe hari mu mwaka w’ibihumbi 2000. Imana yari yarabinganirijeho ariko tuza ku bishyira mu bikorwa muri uwo mwaka mu kwezi kwa 8″

Nkuko byumvikana mu magambo y’uyu mushumba, ngo Africa haguruka wari umugambi w’Imana kugira ngo abanyafurika bose bumve(babwirwe), bamenye ko ari igihe cyabo cyo guhaguruka. Nubwo ari igihe cy’intambara, ari igihe cy’indwara, ari igihe cy’amapfa, ari igihe cy’ibibazo, ari igihe cy’ingorane. Nubwo ari igihe cy’inzara ariko Imana ni cyo gihe ishaka guhagurutsa abantu.

Africa haguruka yagiye igira ibyiciro bitandukanye, aho hari ikiciro cy’inyigisho zihariye(imisozi 7). Inzego zirindwi ziyoboye isi arizo: Umuryango, idini, uburezi, ubucuruzi, politike, imyidagaduro, n’itangazamakuru. Iyi misozi yose igarukwaho mu guhugura abantu mu gitondo mbere ya sasita aho haba hatumiwe abantu basigiwe buri kiciro(umusozi) ngo harebwe icyakorwa bityo iyo misozi ibeho Imana Africa ibashe guhaguruka.

Mu mugoroba kandi, habaho inyigisho z’ububyutse(z’ubuhanuzi) zigendanye n’ibyo abantu bahuguwe kuri iyo misozi itandukanye bitewe naho umuntu yisanga.

Umushumba w’Itorero Zion Temple ku isi, Dr. Paul Gitwaza aragira ati”Twishimiye kubatumira muri Africa Haguruka ku nshuro yayo ya 22 Ntimuzacikwe!

IMYITEGURO YA AFRICA HAGURUKA 2021 | PART 1 | Isaha y’agaciro | Dr. Paul Gitwaza

[email protected]