Author: webrwanda

Muri gahunda y’ubukangurambaga igamije kurwanya ikwirakwira rya Covid-19 ikomeje guhungabanya ubukungu bw’Isi, Minisitiri Gatabazi yavuze ko abayobozi bica amabwiriza nkana bazajya babihanirwa nk’uko n’umuturage uyarenzeho ahanwa.

Mu butumwa bwanyujije kuri twitter yagize Ati “Ku bijyanye n’abayobozi babyitwaza, bakaba barenga ku mabwiriza yo kurwanya Covid-19, tubahana nk’uko abandi baturage bahanwa.”

Yavuze ko ariko abayobozi bagiye bagaragarwaho n’iyo myitwarire itari myiza bagiye bamburwa inshingano.

Ati “Abo benshi muri bo twagiye tubavana no mu kazi, Umukuru w’Umudugudu akavaho, uw’Akagari agahanwa akavaho, hari n’abo twasezereye banyuranye mu tugari, hari n’abo mu mirenge na bo byagezeho. Hari n’abayobozi b’imirenge cyangwa abo ku rwego rw’uturere bagiye bitwaza ko bafite iyo myanya bagashaka kurenga ku mabwiriza, bakabihanirwa.”

Yongeye kwibutsa abaturage ko kwirinda bikwiye kuba ibya buri wese aho gutegereza ko bikorwa n’abayobozi nk’uko usanga benshi babitekereza.

Ati “Ibyo dukora byose, twahana abayobozi, twahana abakoze amakosa, umuturage ni we ugomba kwibuka ko agomba kwirinda mbere na mbere ku giti cye, umuryango we, abo babana ndetse n’abo bakagira uruhare mu bukangurambaga bukorwa bibutsa abaturage bagenzi babo baba batabyubahirije. Badategereje ko byakorwa n’abayobozi gusa.”

Muri ibihe Covid-19 ikomeje gukaza umurego, inzego zose z’ubuyobozi ndetse n’Abaturarwanda bahamagarirwa guhuza imbaraga bagahangana n’iki cyorezo gikomeje kwibasira Isi binyuze mu kubahiriza amabwiriza yo kwirinda ikwirakwira ryayo.

Abayobozi b’inzego z’ibanze basabwe kugenzura ishyirwa mu bikorwa n’iyubahirizwa ryayo cyane ko ari bo begereye abaturage no gukurikirana buri munsi ubuzima bw’abanduye iki cyorezo barwariye mu ngo zabo ngo hato badakongeza imbaga.

Umubare w’abamaze kugaragaraho ubwandu kuva ku wa 14 Werurwe 2020 ugera ku 49.016, mu bipimo 1.730.439 bimaze gufatwa. Abamaze gukira ni 33.356 naho abakirwaye ni 15.078 barimo 70 barembye mu gihe abagera kuri 582 ari bo bahitanywe na cyo. Abagera ku 395.919 ni bo bakingiwe.

Abayobozi bitwaza ko ari abayobozi bakaba barenga ku mabwiriza ya COVID-19, tubahana nk’uko n’abandi baturage bahanwa ndetse bibagiraho n’ingaruka mu kazi kuko abenshi bagiye bakurwa mu nshingano zabo. #Ntakudohoka@gatjmv @AissaCyiza pic.twitter.com/dQ215pyV44

— Ministry of Local Government | Rwanda (@RwandaLocalGov) July 12, 2021

Minisitiri Gatabazi yakebuye abayobozi barenga ku mabwiriza yo kwirinda Covid-19

Ntabwo haramenyekana neza impamvu yatumye batitabira ariko ikekwa cyane ni uko hari abimutse bakajya ahandi kugera aho bari biyandikishirije ntibiborohere.

Muri aba banyeshuri batitabiriye gukora ibizamini bisoza amashuri abanza, harimo 222 bo mu Karere ka Gicumbi.

Umuyobozi w’Akarere ka Gicumbi, Ndayambaje Felix, yavuze ko muri abo bose harimo abakoreye ahandi ku mpamvu zitandukanye ndetse n’abatarabonetse bakomeje gushakishwa ngo bakore bityo ntihagire ucikanwa n’ayo mahirwe.

Yagize ati” Mu bana 222 bigaragara ko bari biyandikishije mu Karere ariko ntibagaragare kuri Site ngo bakore. Dufitemo 83 bimukiye mu Nkambi ya Mahama noneho bari gukorera aho bari, dufite n’abandi babiri gahunda ya Guma mu Karere yasanze bari iwabo i Musanze na bo baroroherejwe bakorera iwabo, abandi basigaye ni bo turi gukurikirana dufatanyije n’abayobozi b’amasibo n’imidugudu kuko dufite urutonde rwa buri muntu.”

Meya Ndayambaje yavuze ko mu gitondo cyo kuri uyu wa Kabiri hari abari bamaze kuboneka.

Umuyobozi w’Akarere ka Musanze, Nuwumuremyi Jeannine na we yavuze ko bamaze kumenya ko hari abana batagiye gukora ibizamini, bafatanyije n’inzego z’ibanze bajya kubashaka ku buryo bamwe bakoze ibizamini ku gicamunsi cyo kuri uyu wa Mbere.

Ati “Hari abatari babonetse mu gitondo, ikigoroba turabazana barakora ndetse n’ubu turacyashaka abandi ngo na bo baze bakore kandi bari kugenda baboneka”.

Ibi bizamini biri kuba mu bihe bitoroshye byo guhangana n’icyorezo cya Covid-19 yongeye kuzamura ubukana, byatumye hashyirwaho na gahunda ya Guma mu Karere n’amashuri muri rusange arafungwa hirindwa ikwirakwira rikabije.

Muri rusange abanyeshuri bagera ku 254,678 ni bo bari biyandikishije ngo bakore ibizamini bisoza amashuri abanza mu gihugu hose, umubare munini ni abakobwa bihariye 54%.

Abanyeshuri basaga 600 ntibitabiriye ibizamini mu Ntara y’Amajyaruguru mu gihe abandi babitangiye ku wa 12 Nyakanga

Muri uyu muhango wari ufite insanganyamatsiko igira iti “Dufatanyije tugera ku iterambere”, Ambasaderi w’u Rwanda mu Burusiya, Lt Gen Frank Mushyo Kamanzi yahaye ikaze kandi ashimira byimazeyo abitabiriye uyu munsi, barimo uwari uhagarariye Ministeri y’Ububanyi n’amahanga y’u Burusiya, Vsevolod Tkachenko, Abahagarariye ibihugu byabo mu Burusiya, inshuti z’u Rwanda n’Abanyarwanda batuye mu Burusiya na Belarus.

Ambasaderi Lt Gen Kamanzi yibukije abari muri uyu muhango ko ababohoye u Rwanda bari urubyiruko.

Ati “ku itariki 4 Nyakanga 1994, abagabo n’abagore ba RPA hafi ya bose bari bakiri abasore, barangajwe imbere na Nyakubahwa Paul Kagame bahagaritse Jenoside yakorewe Abatutsi mu 1994; babohora igihugu cyacu.”

Yabashimiye ubwitange bwabo n’ikiguzi batanze, kuko byabaye umusingi wo gutangira uru rugendo rumaze imyaka 27 hubakwa u Rwanda rwifuzwa n’abarutuye.

Yakomeje yibutsa ijambo Umukuru w’igihugu Prezida Paul Kagame yagejeje ku Banyarwanda ku itariki ya 4 Nyakanga 2021, ubwo hizihizwaga umunsi wo Kwibohora ku nshuro ya 27.

Ati “Imyaka 27 irashize Abanyarwanda twishyize hamwe, tubohora igihugu cyacu. Kuva icyo gihe twiyemeje gukorera hamwe buri munsi kugira ngo twubake umuryango nyarwanda, ndetse duhindure u Rwanda igihugu cyiza kuri buri wese”.

Ambasaderi Lt Gen Frank Mushyo Kamanzi, yasabye urubyiruko rugize umubare munini w’Abanyarwanda bari mu Burusiya na Belarus, guhera ku byagezweho, bagateza imbere u Rwanda kurushaho.

Asoza ijambo rye, yibukije ijambo Umukuru w’igihugu, Perezida Paul Kagame yagejeje ku benegihugu ku itariki ya 4 Nyakanga rijyanye no kwirinda icyorezo cya Covid-19, rigira riti “Ubu ni ngombwa ndetse ni ngombwa cyane ugereranyije n’ibihe byatambutse, gukurikiza ingamba zishyirwaho na Minisiteri y’Ubuzima n’ibindi bigo hagamijwe gukumira ikwirakwizwa rya COVID no kurokora ubuzima bw’Abanyarwanda.

“Turashaka ko Umunyarwanda wese agira ubuzima bwiza kandi akisanzura, bityo akabyaza umusaruro amahirwe yose aboneka mu gihugu haba mu burezi, mu gushaka akazi no kwihangira imirimo.”

Vsevolod Tkachenko, wari uhagarariye Ministeri y’Ububanyi n’amahanga y’u Burusiya, yashimiye aho u Rwanda rugeze muri iyi myaka 27 ishize, aho rwateye intambwe igaragara mu kubanisha Abanyarwanda, mu kuzana amahoro no guteza igihugu imbere kikagera ku majyambere arambye.

Yavuze kandi ko igihugu cye cy’u Burusiya kitigeze gihwema gushyigikira u Rwanda muri gahunda zitandukanye. Yishimiye umubano n’ubufatanye biri hagati y’ibihugu byombi, guhera muri Ukwakira 1963.

Umuyobozi w’Umuryango w’Inshuti z’u Rwanda, Pr. Pavel Kolesnikov nawe yashimiye abagize uruhare rwo kubohora u Rwanda, bakaba batararekeye aho, ahubwo bagakomeza gushyira hamwe bubaka u Rwanda, rukaba rumaze gutera intambwe ishimishije mu ruhando rw’amahanga.

Umuyobozi wungirije w’Umuryango w’Abanyarwanda baba mu Burusiya no muri Belarus, Rutaganira Joseph yakanguriye urubyiruko ruri mu mashuri kwigira ku rubyiruko rwabohoye igihugu bagakunda igihugu batizigama, kandi yabahamagariye gukoresha ubumenyi bakura mu mashuri mu guteza imbere igihugu no kuzamura imibereho myiza y’Abanyarwanda.

Hari kandi n’urubyiruko rugizwe n’abanyeshuri biga muri za Kaminuza zitandukanye zo mu Burusiya, batanze ubutumwa bwo gushimira ingabo za RPA zari urubyiruko mu myaka 27 ishize, bakaba baritanze bakabohora u Rwanda.

Bijeje abayobozi ko nabo bazagera ikirenge mu cy’abababanjirije, bagasigasira ibyagezweho, bakanabyubakiraho kugira ngo u Rwanda ruzahore ari igihugu kibereye buri Munyarwanda.

Ambasaderi w’u Rwanda mu Burusiya, Lt Gen Frank Mushyo Kamanzi yashimye abari urubyiruko bagize umuhate wo kubohora u Rwanda none uyu munsi rukaba rumaze kugera kuri byinshi

Vsevolod Tkachenko wari uhagarariye Ministeri y’Ububanyi n’amahanga y’u Burusiya yashimye iterambere u Rwanda rumaze kugeraho

Prof Pavel Kolesnikov yashimye cyane abari bagize RPA yabohoye u Rwanda

Bakoze ibizamini hubahirizwa amabwiriza yo kwirinda ikwirakwira rya COVID-19

Abanyeshuri basibye ibizamini zitandukanye bijyanye n’imiterere y’akarere aho mu karere ka Nyagatare harimo abo ababyeyi babo bimukiye ahandi ndetse n’abanyeshuri banza nkana kwitabira ibizamini.

Umukozi w’akarere ka Nyagatare ushinzwe uburezi yabwiye Kigalitoday ko uretse abanyeshuri imiryango yabo yimukiye ahandi hari n’abandi banze gukora ibizamini nkana.

Yagize ati “Hari abimukiye ahandi uyu munsi tukaba tutazi aho baherereye uretse barindwi twamenye ko bo barimo gukora. Hari ariko n’abandi babyanze badashaka gukora ibizamini babona n’umuntu ageze iwabo bakarikanka bagahunga.”

Abanyeshuri basibye abenshi ni bo mu karere ka Kirehe aho ku banyeshuri 9,938 habashije gukora 9,725 naho 213 basiba ikizamini bangana na 2% by’abagombaga gukora bose.

Umuyobozi w’akarere ka Kirehe Muzungu Gerald avuga ko impamvu yatumye bagira umubare munini w’abana basibye ibizimana harimo uburwayi ndetse no kwimuka.

Ati “Abenshi basibye ni abana bo mu nkambi ya Mahama ababyeyi babo barimutse basubira iwabo kandi bari bariyandikishije. Abandi ni abafite uburwayi butandukanye ariko butarimo COVID-19, ni indwara zisanzwe hari n’abahuye n’impanuka.”

Abanyeshuri basibye ibizamini mu ntara y’Iburasirazuba 891 harimo abakobwa 452 n’abahungu 439 impuzandengo y’abasibye ingana na 1.3% naho abakoze akaba ari 98.7%.

Uturere twa Kayonza na Kirehe nitwo dufite abanyeshuri benshi basibye aho abakoze bafite impuzandengo ya 98% mugihe akarere ka Nyagatare kaza imbere ku bwitabire bw’abanyeshuri bakoze ibizamini n’impuzandengo ya 99.1% hagakurikiraho uturere twa Ngoma na Rwamagana n’ubwitabire bwa 99%.

Mu ntara y’Iburasirazuba kandi abanyeshuri batanu bakoze ibizamini bisoza amashuri abanza barwaye COVID-19 harimo abakobwa babiri n’abahungu batatu.

Akarere ka Bugesera niko gafite benshi, abahungu batatu naho uturere twa Nyagatare na Rwamagana tukagira umunyeshuri umwe, umwe w’umukobwa.

Abarwaye COVID-19, bakaba barakoreye mu byumba byihariye kugira ngo batagira aho bahurira n’abandi.

Mu banyeshuri bari biyandikishije kuzakorera ibizamini bisoza amashuri abanza mu karere ka Nyagatare barindwi nibo bizwi ko bakoreye mu tundi turere bimukiyemo. Ni mugihe kandi akarere ka Nyagatare hagaragaye abandi bahakoreye bariyandikishije mu tundi turere.

Mu ntara y’Iburasirazuba mu turere turindwi hari site z’ibizamini 254, zirimo gukorerwamo n’abanyeshuri 65,027, abakobwa 35,169 n’abahungu 29,858.

Ku rwunge rw’amashuri rwa Nyagatare hanakoreye abanyeshuri 23 bagororerwa muri gereza y’abana ya Nyagatare.

Cyera ngo wasanganga abashakanye by’umwihariko uw’igitsina gore arangwa no kwihangana kuburyo iyo umufasha we yateraga hejuru undi yabaga azi ko agomba gucisha mace, bityo bikabafasha kubaka urugo rugakomera kandi bakarambana, bitandukanye no muri iyi minsi aho hagati y’abashakanye nta bworoherane no kwihanganirana bikibaho.

Abatuye mu Mujyi wa Kigali bemeza ko kutihanganirana no kutubahana hagati y’abashakanye muri ino minsi akenshi bikunda guterwa no kuba usanga yaba umugore cyangwa umugabo bose bafite akazi, ku buryo buri wese aba yumva yishoboye byakwiyongeraho gucana inyuma kwihanganirana bikaba bitagishobotse.

Iyamuremye Pierre Céléstin utuye mu Karere ka Kicukiro, avuga ko hatakibaho umuranga abantu bagahurira ahabotse hose bagahita bakundana baba bataramarana igihe bagahita babana bataramenyana neza, ari kimwe mu mpamvu iteza amakimbirane naza gatanya za hato na hato.

Ati “Mbere habagaho icyitwa umuranga ukagira umukobwa umuntu akurangiye akakubwira ati uyu mukobwa ateye gutya none ubu n’uguhura gusa mugahurira mu kabari, cyangwa muri alimentation mugakundana, mugataha urumva ko urugo baba bagiye kubaka baba batazi icyo ari cyo”.

Ayinkamiye Odette utuye ahitwa mu Izindiro, n’umubyeyi uri mu kigero cy’imyaka 60, avuga ko afite abakobwa batatu ariko n’ubwo bataratandukana n’abagabo babo gusa ngo ntabwo bameranye neza.

Ati “Cyera wubahaga umugabo wabona afite amahane wowe ugaca bugufi, wabona agiye kugutuka cyangwa kugukubita ukicecekera, ariko ibyubu n’amayobera niba aruko buri umwe aba afite amafaranga bigatuma basuzugurana, umwe agaca aha undi agaca aha ugasanga rwabuze gica, mbese habuze kubahana mu miryango”.

Umuyobozi w’Umujyi wa Kigali wungirije ushinzwe Ubukungu n’imibereho y’abaturage, Umutoni Nadine, avuga ko amakimbirane na za gatanya bigaragara muri uwo Mujyi ahanini biterwa n’uburyo bahuye no kutihanganirana.

Ati “Buriya mu Mujyi wa Kigali tugira ibyiciro byinshi by’abantu, hari igihe ushobora gusanga yaraje ino aje gukora ikiraka cyo kubaka undi wenda yabonye akazi mu rugo, ugasanga iyo akazi gahagaze babirukanye cyangwa hagize izindi mpamvu zitumye gahagarara, akenshi ntibasubira iwabo baraza bakaba mu Mujyi bakaba barahuye bahujwe n’ako gahinda nta rukundo nta kubitekerezaho nyuma bagatandukana. Ikindi ni uko mu miryango isa nk’iyifashije usangamo kutihanganirana, ikoreshwa ry’ibiyobyabwenge n’inzoga hamwe no kutita ku nshingano, ugasanga abantu ikintu cyo kwihanganirana biranze”.

Amakimbirane nk’aya ngo agira ingaruka ku bagize umuryango by’umwihariko abana kuko abagera kuri 90% bari mu mihanda muri Kigali usanga abenshi bafite ababyeyi umwe cyangwa bombi, ariko bakanga kuhasubira kubera umwiryane no kutumvikana bihora iwabo.

Iyi nzu ayigurisha amafaranga y’u Rwanda ari hagati y’ibihumbi 10 na 15

Hakizimana yavutse mu 2008 akaba yiga mu mwaka wa gatanu w’amashuri abanza ku kigo cy’amashuri cya Karugira giherereye mu Murenge wa Kigarama mu Karere ka Kicukiro.

Ubwo icyorezo cya Covid-19 kibasiraga isi n’u Rwanda muri rusange abantu bagasabwa kuguma mu rugo, nibwo yatangiye gukuza impano ye.

Kuri ubu Hakizimana azi gukora neza inzu z’ubwoko butandukanye mu bikarito, akaba anashobora gukora ibindi birimo amavaze hamwe n’indabo, imodoka, moto, amagare hamwe no gushushanya ku makadere kandi akabikora neza.

Bimwe mu bikoresho Hakizimana akoresha harimo insinga, kole, imisumari, ibikarito hakiyongeraho amacupa avamo ikinyobwa cya energy, inyange, ibirahure na sima.

Bitewe n’uko Hakizimana abona ibikoresho akoresha bimugoye, avuga ko yifuza kubona ubufasha agakora ibintu bye neza.

Ati “Ikintu nifuza ni uko nabona umuntu wanteza imbere nkabikora neza, ku bikoresho byiza, bitunganye neza nyine ngatera imbere ngateza n’igihugu imbere”.

Nijoro iba yakamo amatara

Muhawenimana Marie Grace ni umubyeyi wa Hakizimana. Avuga ko yatangiye kubona impano y’umuhungu we mu gihe cya mbere cya guma mu rugo ku buryo kuri ubu hari byinshi amaze kumenya gukora kandi bikaba hari icyo bimufasha.

Ati “Mbona bimufasha cyane. Biriya akora iyo babiguze, abasha kwigurira amakayi. Nk’ubu yiguriye ishakoshi y’ibihumbi 15, yigurira n’inkweto yigurira ibintu byose byo ku ishuri, yishyura amafaranga y’ishuri y’umwaka wose, n’amafaranga baca y’ikibuga n’ibindi byose”.

Ikindi ngo ni uko impano ya Hakizimana nta mpungenge itera nyina z’uko byamuviramo kureka ishuri kuko byose abikora mu gihe atagiye kwiga kandi akaba yitwara neza ku ishuri kuko atsinda.

Umujyanama w’Umunyamabanga wa Leta akaba n’umuvugizi wa Minisiteri y’Urubyiruko n’Umuco, Ruzindana Rugasaguhunga Jean Baptiste, avuga ko iyi Minisiteri ifite gahunda zitandukanye zo gufasha impano z’urubyiruko ariko kandi ngo n’ababyeyi babo bagomba kubigiramo uruhare rwa mbere.

Ati “Iyo abigaragaje n’abantu bakabona impano ye koko ishobora gusukirwa igakura, ntacyabuza ko uwo muntu rwose yafashwa, birumvikana kuko aba akiri mutoya ababyeyi be bagomba kubigiramo uruhare ariko iyo impano igaragaye yafashwa”.

Ubuyobozi bw’Akarere ka Kicukiro uyu mwana atuyemo na bwo buvuga ko hari uburyo binyuze mu mashuri bakurikirana impano z’abana bakanabafasha kugira ngo zitazima.

Iyi nzu Hakizimana aramutse afite ibikoresho byose ngo yayubaka mu gihe cy’iminsi itatu

Uretse inzu, Hakizimana akora n’indabo hamwe n’amavaze