Webrwanda Backend

Author: webrwanda

  • Amashusho ya KNC ahogoza kuri Radio Rwanda yaciye ibintu #rwanda #RwOT

    Uyu munyemari uzwi cyane mu mupira w’amaguru mu Rwanda aho anafite ikipe ya Gasogi United, yari mu kiganiro kuri Radio Rwanda aho yagarutse ku bihangano bye bya cyera dore ko yigeze no gukora ubuhanzi bwo kuririmba.

    Ubwo yaririmbaga zimwe mu ndirimbo ze yashyize hanze mu myaka yatambutse, yagerageje guhogoza, ibizwi nko kuryoshya indirimbo ze gusa bamwe babyakiriye ukundi.

    Ku mbuga nkoranyambaga za bamwe, bagiye bafata agace k’amashusho agaragaza KNC ari kuririmba izo ndirimbo, bagashyiraho ubutumwa bugaragaza ko batwamye imiririmbire y’uyu mugabo udapfa kurara atavuzwe mu itangazamakuru.

    Umunyamakuru Murungi Sabin kuri Instagram yagize ati 'Niyongere muri management y’umuziki wa KNC cyangwa mbe ndetse gato ?? KNC ubyumve ndakwikundiraaaa…'

    Uwitwa Twagirimana Patrick yahise atanga igiterekerezo kuri iki cya Sabin, agira ati 'Nta mukire uririmba nabi koko [uturangabyiyumviro (emoji) two guseka] ahwi.'

    Uwitwa Karangwa Claude kuri Twitter we yagize ati 'Uyu muhanzi abirimo neza cyangwa aratubeshya ?'

    UKWEZI.RW

    Source : http://www.ukwezi.rw/Imyidagaduro/article/Amashusho-ya-KNC-ahogoza-kuri-Radio-Rwanda-yaciye-ibintu

  • Bijoux wo muri Film avuga iki ku bakemanga ikibuno cye kidasanzwe ? #rwanda #RwOT

    Uyu munyarwandakazi ukunze gukoresha imbuga nkoranyambaga aho ashyiraho amafoto agaragaza ikimero cye gikomeje kureshya benshi kubera ikibuno cye gifite imiterere inogeye ijisho.

    Gusa bamwe ntibavuga rumwe ku miterere ya kiriya kibuno cye, barimo n’abamutuka bavuga ko ayo mafoto aba yayakoreye amakabyo cyangwa se akaba yariteye imiti kugira ngo kiriya kibuno gitere kuriya.

    Aba bamutuka bavuga ko uyu mukobwa yari afite ubwiza buhagije atari akwiye kwiyongeresha ikibuno mu gihe we avuga ko byatewe na Siporo yakoze ntakindi.

    Ati 'Nabanje kujya nshyiraho amafoto bakantuka ngo ayo mannyo yawe ngo mba nakoze edit y’ifoto, nshyiraho amashusho kuko yo bazi ko iteditingwa bati banyweye imiti.'

    Bijoux akomeza avuga ko nta muti yigeze yitera ngo yongere ingano y’ikibuno, ahubwo ari umubiri we wahindutse bitewe na siporo akora.

    Ati 'Nta muti niteye baribeshye, narahindutse. Njye njya mbwira abantu ngo iyo ukoze siporo inda ikagenda ikibuno kiriyongera, n’aho iby’imiti byo sibyo.'

    Yakomeje avuga ko abantu bagomba kumenya ko umuntu ahinduka kuko uko umuntu aba ameze uyu munsi si ko azaba ameze mu myaka iri imbere.

    Uyu mukobwa yabwiye abakomeza kubamutuka kubera imyambarire ye ko yambara bitewe n’ibimunezeza kandi bimubereye, ngo abakunda ko yambara imyenda miremire bajye bayiyambarira ubundi we bamureke yambare ibyo yifuza.

    Source : http://www.ukwezi.rw/Imyidagaduro/article/Bijoux-wo-muri-Film-avuga-iki-ku-bakemanga-ikibuno-cye-kidasanzwe

  • Iranzi Jean Claude yirukanywe #rwanda #RwOT

    Umukinnyi w’umunyarwanda wakiniraga ikipe ya Pharco FC yo mu Misiri, Iranzi Jean Claude yamaze kurekurwa n’iyi kipe ngo ajye gushakira ahandi.

    Iranzi Jean Claude yasinyiye ikipe ya Pharco FC muri Gashyantare uyu mwaka wa 2021, iyi kipe ikaba yarakinaga mu cyiciro cya 2.

    Uyu mukinnyi nubwo atakinnye imikino myinshi ariko yafashije ikipe ye kuzamuka mu cyiciro cya mbere.

    Tariki ya 1 Nyakanga nibwo icyiciro cya kabiri mu Misiri cyasojwe aho mu itsinda C ikipe ye ya Pharco FC abarizwamo, yasoje ku mwanya wa 1 n’amanota 64 nyuma yo gutsinda Ben Ebeid 3-0.

    Uku gusoza ku mwanya wa mbere bahise bazamuka mu cyiciro cyambere.

    Iyi kipe rero nyuma yo kuzamuka mu cyiciro cya mbere, yasezereye abakinnyi 14 ibifuriza guhirwa mu minsi iri imbere.

    Bagize bati “turabifuriza ibyiza byinshi, mwarakoze kudufasha muri uru rugendo.”

    Iranzi Jean Claude yakiniye amakipe atandukanye, APR FC, Rayon Sports, Aswan nayo yo mu Misiri.

    Yatandukanye n’abakinnyi 14

    Iranzi yari umukinnyi wa Pharco FC

    Source : http://isimbi.rw/siporo/article/iranzi-jean-claude-yirukanywe

  • U Rwanda rwakiriye izindi mpunzi zivuye muri Libya #Rwanda #RwOT via @kigalitoday #rwanda #RwOT

    MINEMA ibinyujije kuri twitter yatangaje ko impunzi zageze mu Rwanda zigomba gupimwa COVID-19, bamara kubona ibisubizo bakazasanga abandi baje mbere bari mu nkambi y’agateganyo ya Gashora iherereye mu Karere ka Bugesera.

    Isobanura ko impunzi zitegereza ibisubizo bya COVID-19 zicumbikiwe muri hoteli zabugenewe mu gihe bategereje ibisubizo bashobore guhuzwa n’abandi mu rwego rwo kwirinda iki cyorezo.

    Impunzi zageze mu Rwanda, zakiriwe n’itsinda ry’abakozi ba Minisiteri ishinzwe Ibikorwa by’Ubutabazi ndetse n’ab’ishami ry’Umuryango w’Abibumbye ryita ku mpunzi (UNHCR) ku kibuga cy’Indege i Kanombe.

    Impunzi z’abimukira zikurwa mu gihugu cya Libya zikazanwa mu Rwanda zicumbikirwa mu nkambi ya Gashora mu Karere ka Bugesera aho bamwe bakomereza mu bihugu byemera kubakira.

    Iki cyiro cya mbere cy’impunzi 66 zivuye muri Libya zageze mu Rwanda mu kwezi kwa Nzeri 2019, barimo abana badafite ababo, abagore n’abandi bababaye kurusha abandi.

    U Rwanda nicyo gihugu cyafashe iya mbere mu kugaragaza ubushake mu kwakira aba bimukira bari babayeho nabi nyuma yo kubura inzira ibajyana i Burayi.

    Ishyirahamwe mpuzamahanga ryita ku mpunzi 2019 ryagaragaje ko abimukira babarirwa mu bihumbi 2 bakeneye gutabarwa aho bafungiye mu mijyi itandukanye y’igihugu cya Libya, harimo Tripoli yari ifite ibigo bifungiwemo abimukira b’abirabura bo muri Afurika.

  • AMAFOTO : U Rwanda rwakiriye izindi mpunzi 133 zivuye muri Libya #rwanda #RwOT

    Izi mpunzi 133 zageze mu Rwanda amahoro nk’uko bitangazwa na Minisiteri Ishinzwe ibikorwa by’ubutabazi, zije zikurikira izaje mu byiciro bitanu.

    Aba banyafurika 133 bariho bashaka ubuhungiro, barabanza gupimwa COVID-19 ubundi babone gusanga bagenzi babo bacumbikiwe mu nkambi ya Gashora.

    Impunzi n’abasaba ubuhunzi bazanwa mu Rwanda bakuwe muri Libya hagamijwe kubagoboka, kubafasha no kubashakira ibisubizo birambye bacumbikiwe mu nkambi y’agateganyo ya Gashora.

    Icyiciro cya gatanu cyaherukaga kuza mu mpera z’Ukuboza 2020 ubwo hari haje impunzi 130 bari biganjemo abagore n’abana ndetse n’abasore n’inkumi.

    Ab’igitsinagabo bari 75% mu gihe 25% bari ab’igitsinagore, bose bakaba bari barimo abana bato 27.

    Muri kiriya cyiciro cyaherukaga cyari kirimo 67 bakomoka muri Eritrea, abo muri Sudani 48, abo muri Somalia 12 , babiri bo muri Nigeria n’umwe wo muri Ethiopia.

    Icyo gihe nabwo bakirwa babanje gupimwa COVID-19 ubundi babona kujyanwa mu nkambi ya Gashora aho basanze bagenzi babo.

    Kugeza ubu u Rwanda rumaze kwakira impunzi zikgera muri 650 batangiye kuza mu mpera za Nzeri 2019.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/AMAFOTO-U-Rwanda-rwakiriye-izindi-mpunzi-133-zivuye-muri-Libya

  • Mbere y’amasaha macye ngo 'GumaMuRugo’ i Kigali itangire, Nyabugogo yongeye irakubita iruzura #rwanda #RwOT

    No mu minsi yashize, mu gitondo cyo ku ya 22 Kamena 2021, Gare ya Nyabugogo yari yakubise iruzura kubera ubwinshi bw’abantu bashakaga kujya mu Ntara mbere y’uko gahunda ya Guma mu Karere/mu Mujyi wa Kigali itangira kubahirizwa ku ya 23 Kamena 2021.

    Inama y’Abaminisitiri iheruka guterana kuri uyu wa Gatatu tariki 14 Nyakanga 2021, yafatiwemo ibyemezo birimo ibirebana n’amabwiriza mashya yo kwirinda ikwirakwira ry’icyorezo cya COVID-19 ariko ayo gushyira Umujyi wa Kigali n’Uturere umunani muri gahunda ya guma mu rugo.

    Iyi gahunda igomba gutangira kubahirizwa kuri uyu wa Gatandatu tariki 17 Nyakanga 2021, itumye benshi mu baturage bongera kujya mu bice bitandukanye.

    Gusa byo biratunguranye kuko nubundi nta modoka zari zemerewe kwerecyeza mu Ntara dore ko hari hasanzwe hariho gahunda ya Guma mu Karere.

    Benshi mu bashaka kwerecyeza mu Ntara, baravuga ko bari basanzwe bikora ku munwa ari uko bagiye gukora imirimo y’umubyizi ku buryo babona mu gihe binjiye muri Guma mu rugo, byababera ihurizo rikomeye.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Mbere-y-amasaha-macye-ngo-GumaMuRugo-i-Kigali-itangire-Nyabugogo-yongeye-irakubita-iruzura

  • Rayon Sports na Mukura VS zatangaje abatoza bashya bazazitoza muri uyu mwaka w’imikino #Rwanda #RwOT via @kigalitoday #rwanda #RwOT

    Kuri uyu wa Kane amakipe ya Rayon Sports ndetse na Mukura VS zatangaje abatoza bashya bazaziztoza mu mwaka w’imikino wa 2021/2022, abatoza bombi bananyuze muri aya makipe

    Masudi Djuma agarutse muri Rayon Sports

    Ikipe ya Rayon Sports yamaze gutangaza ko Masudi Djuma wakiniye igihe kinini iyi kipe ndetse akanayibera kapiteni, akaza kuyibera umutoza aho yayifashije kwegukana igikombe cya shampiyona ndetse n’igikombe cy’Amahoro, ari we uzayitoza mu gohe cy’imyaka ibiri y’imikino.

    Masudi Djuma yasinye imyaka ibiri muri Rayon Sports

    Masudi Djuma yasinye imyaka ibiri muri Rayon Sports

    Mukura nayo yatangaje Ruremesha Emmanuel nk’umutoza mushya

    Ikipe ya Mukura yatangaje ko mu mwaka w’imikino ugiye kuza umutoza mukuru azaba ari Ruremesha Emmanuel, akazungirizwa na Nshimiyimana Canisius, umutoza w’abanyezamu azakomeza kuba Ndaruhutse Theogene, naho umutoza ushinzwe kongerera ingufu abakinnyi azaba ari Hakizimana Jean Baptiste.

    Ruremesha Emmanuel ni we mutoza mukuru

    Ruremesha Emmanuel ni we mutoza mukuru

    Hakizimana Jean Baptiste azaba ashinzwe kongerera ingufu abakinnyi

    Hakizimana Jean Baptiste azaba ashinzwe kongerera ingufu abakinnyi

    Nshimiyimana Canisius azaba ari umutoza wungirije

    Nshimiyimana Canisius azaba ari umutoza wungirije

  • Rubavu : Polisi yarokoye Imanizibose wari ugiye guhanuka mu giti #rwanda #RwOT

    Ibi byabaye kuri uyu wa Kane tariki 15 Nyakanga ubwo Imanizibose Eric Antoine w’imyaka 30 yuriraga igiti agiye gushakamo inkwi ariko akaza guhanuka agahagama mu mashami yacyo nyuma yo kuvunika itako.

    Byabereye mu Karere ka Rubavu, Umurenge wa Nyakiriba, Akagari ka Nyarushyamba, Umudugudu wa Makoro.

    Umuvugizi wa Polisi mu Ntara y’Iburengerazuba, Chief Inspector of Police (CIP) Bonaventure Twizere Karekezi yavuze ko Imanizibose yuriye igiti ashakamo inkwi zo gucana noneho ageze hejuru arahanuka ariko ahagama mu mashami nyuma yo kuvunika itako.

    Yagize ati 'Abaturage nibo babibonye mbere batabaza Polisi kuko byabereye ku muhanda munini nyabagendwa. Abapolisi baje basanga yahagamye mu mashami ariko yavunitse itako atabasha kururuka mu giti, yabonye amaze kuvunika afata amashami arakomeza cyane yigumiramo.'

    CIP Karekezi yakomeje avuga ko abapolisi bo mu ishami rishinzwe ubutabazi no kurwanya inkongi bahise batabara bazana urwego n’ibindi bikoresha babasha kurira bururutsa Imanizibose bamugeza hasi nta kibazo afite. Yashimiye abaturage bihutiye gutanga amakuru ariko anabakangurira kwirinda kujya burira ibiti cyangwa ibindi bintu bishobora gushyira ubuzima bwabo mu kaga.

    Ati 'Turashimira abaturage batabarije ku gihe kuko iyo batinda hari ubwo uriya muturage yari kugera aho akananirwa akaba yahanuka akitaba Imana cyangwa akavunika bikomeye. Abaturage kandi birinde gushyira ubuzima bwabo mu kaga.'

    Imanizibose amaze kururutswa mu giti yahise ajyanwa ku Kigo nderabuzima cya Nyakiriba aho arimo kwitabwaho n’abaganga.

    Source : http://www.ukwezi.rw/mu-rwanda/Amakuru-anyuranye/article/Rubavu-Polisi-yarokoye-Imanizibose-wari-ugiye-guhanuka-mu-giti

  • Kayonza : Gitifu uvugwaho ubwambuzi bwa miliyoni zikabakaba 170 yahagaritswe #rwanda #RwOT

    Uyu muyobozi ahagaritswe nyuma y’uko hari kompanyi ebyiri zimusinje ko yazitekeye umutwe ubundi akazambura akayabo.

    Uzwi iby’iki kibazo utifuje ko imyirondoro ye itangazwa, yagize ati 'Hari kampani yitwa Benefactors Ltd yambuye miliyoni 74 Frw ndetse n’undi mucuruzi wo mu Karere ka Nyagatare yambuye miliyoni 100Frw, abo rero nibo bagiye kumurega ubuyobozi bufata umwanzuro wo kumuhagarika.'

    Umuyobozi w’Akarere ka Kayonza, Murenzi Jean Claude yemeje aya makuru y’ihagararikwa ry’uriya Munyamabanga Nshingwabikorwa.

    Murenzi Jean Claude avuga ko uyu muyobozi yahagaritswe mu nshingano kugira ngo habanze hakorwe iperereza barebe koko niba ko buriya bwambuzi ashinzwa bwarakozwe.

    Yavuze ko uyu muyobozi yifashishije kompanyi afatanyije n’umugabo we izwi nka Arise and Shine, bakaka abantu amafaranga ariko ntibayabishyure.

    Murenzi Jean Claude yagize ati 'Uwo muturage yaratwandikiye avuga ko yagiranye ikibazo n’uwo mukozi wacu tumubwira ko tugiye kubikurikirana. Ubu yabaye ahagaritswe mu gihe cy’ukwezi kugira ngo tubanze dukore iperereza turebe niba hari aho ahuriye nibyo birego aregwa.'

    Avuga kandi ko 'Hari n’indi kampani tugikurikirana ngo twumve niba hari uruhare abifitemo yitwa Benefactors Ltd. Turi gukurikirana ngo turebe niba hari amafaranga bafasheyo batarayishyura zari nka miliyoni 68 Frw, abo bantu babiri ni bo baturegeye duhitamo gukora iperereza ngo turebe niba ibyo bavuga ari byo koko.'

    Mu Ugushyingo umwaka ushize wa 2020 iriya Kompanyi ya Benefactors Ltd yandikiye Perezida wa Repubulika imusaba kubafasha kwishyuza uyu muyobozi wari warabatwaye miliyoni 74 Frw akabishyuramo esheshatu gusa.

    Source : http://www.ukwezi.rw/mu-rwanda/Amakuru-anyuranye/article/Kayonza-Gitifu-uvugwaho-ubwambuzi-bwa-miliyoni-zikabakaba-170-yahagaritswe

  • Ndimbati wahoze mu gisirikare, ati “Intego kwari ukubohora u Rwanda” #Rwanda #RwOT via @kigalitoday #rwanda #RwOT

    Benshi batangajwe no kumva ko yahoze ari umusirikare. Ku itariki 4 Nyakanga 2021, ubwo u Rwanda rwizihizaga kwibohora ku nshuro ya 27, Ndimbati yagaragaje ifoto ye ya kera, yambaye imyenda ya gisirikare ayishyira ku mbuga nkoranyambaga (Instagram) agira ati, “Intego kwari ukubohora u Rwanda”.

    Kuko iyo foto yatumye abantu benshi bibaza ku mateka ya Ndimbati, ubundi uzwi mu mafilimi yo gusetsa. Kigali Today yavuganye na Ndimbati avuga gato ku bijyanye n’uko yagiye ku rugamba rwo kubuhora u Rwanda.

    Ndimbati avuga ko ubundi avuka ahitwa i Nyarusange, mu cyari Komini ya Mushubati mu cyari Perefegitura ya Gitarama, ubu ni mu Karere ka Muhanga. Aho ni ho yavuye ajya gufatanya n’abandi ku rugamba rwo kubohora u Rwanda.

    Yagize ati, “Nk’urubyiruko nk’abandi bose bari bahangayikishijwe n’uko kubohora igihugu byari bigejeje igihe, twaragiye hanyuma tugira amahirwe, Imana iradufasha, tubona turarubohoye. Nari mfite imyaka y’urubyiruko nyine, navuye mu Rwanda mu 1989, icyo gihe ninjiriye mu Burundi, nyuma nza gukomereza mu gihugu cya Uganda ni ho ninjiriye mu gisirikare”.

    Ndimbati avuga ko n’ubwo umuryango we ku ruhande rumwe utari mu bwoko bwatotezwaga wenda ngo bibe ari byo byatumye yiyemeza kujya ku rugamba, ariko ngo kuko yari mukuru ibyabaga byose yarabirebaga, ibyavugwaga byose yarabyumvaga.

    Ndimbati ati “Icyo gihe nari mfite abantu benshi tubana, tuvugana, tuzi ibibazo bihari, kandi tubizi kimwe, kandi muri iyo myaka bamwe baragendaga. Ariko ntibyoroshye nyuma yo kugenda byaje kumenyekana, umuryango wanjye ugira ibibazo, mbese ni inzira ndende”.

    Hari ababonye iyo foto Ndimbati yashyize kuri Instagram bakavuga ko ngo yari mu ngabo zitwaga ‘Inzirabwoba’ cyangwa se ‘EX-FAR’ (izi zikaba ari izahoze ari ingabo z’u Rwanda zatsinzwe) bitewe n’imyenda babona yari yambaye. Ndimbati avuga ko abo ari abavuga ibyo bishakiye, kandi bakavuga ibyo batazi, kuko ngo bitewe n’uko byari bimeze icyo gihe, iby’imyenda ntacyo byabaga bivuze, kuko n’umuntu yashoboraga kuba yambaye imyenda ya gisivili kandi ntibimubuze kuba ari umusirikare.

    Nyuma yo kubohora u Rwanda mu 1994, ngo ntiyahise ava mu gisirikare kuko n’ubundi ngo hakurikiyeho intambara y’abacengezi, hanyuma yasubiye mu buzima busanzwe mu 1999.

    Ndimbati yagiye mu gisirikare ari mukuru ndetse yaranashatse afite umugore, kandi yagize amahirwe uwo mugore yari yarashatse, ngo ni we bakiri kumwe na n’ubu.

    Ubu Ndimbati ari mu buzima busanzwe, yikinira amafilimi abantu benshi bamuzimo asetsa, ariko ngo umunsi akunda kandi yubaha kurusha indi ni umunsi wo ku itariki 4 Nyakanga, kuko utuma asubiza amaso inyuma akibuka ibintu byinshi yanyuzemo, nyamara n’ubu Imana ikaba ikimurinze.

    Ubu atuye mu Mudugudu wa Karama, Akagari ka Nyabugogo, Umurenge wa Kigali mu Karere ka Nyarugenge, mu nzu avuga ko yahawe na Perezida wa Repubulika amwimuye ahitwa ku Kimisagara, kuko ngo hari mu manegeka.

    Ubutumwa aha urubyiruko, ngo nibakunde igihugu cyabo cy’u Rwanda, kuko igihugu ni umurage batahabwa n’undi muntu uwo ari we wese.

    Reba ibiganiro Ndimbati yigeze kugirana na KT Radio asobanura byinshi ku buzima bwe