Author: webrwanda

Nyuma y'amakuru yavugaga ko Miss Uwase Muyango yibarutse imfura ye yabyaranye na Kimenyi, uyu mukobwa yabiteye utwatsi mu kiganiro yagiranye na INYARWANDA. Yavuze ko aya makuru atariyo ndetse ko ari bwo akibimenya, yongeraho ko bitamutunguye cyane kuko ibimuvugwaho ari byinshi. Miss Muyango yagize ati:

Ariko icyakoza reka nkubwire ubu ndi kumva uri kunsetsa, ubu iri jwi ryanjye uri kumva ndi kuvuga nk'umuntu wabyaye koko. Ntabwo ari byo rwose ubungubu nari niryamiye rwose nanjye nta n’ubwo nari mbizi ariko ntabwo bintunguye kubera ko ibimvugwaho ni byinshi. Ikintungura ni uko nta muntu njya nima amakuru ariko njya gutungurwa nkabona abantu batwanditseho ibintu bitandukanye nyamara atari byo hhhh.

Miss Muyango yabwiye abantu batandukanye bakunda kumwandikaho ibintu bitari byo ko rwose abiyamye agira ati: ''Ndabiyamye abantu bandika amakuru atari yo, nta kindi kintu nababwira abantu byarancanze”.

Kimenyi Yves yatangiye gukundana na Miss Muyango muri Kanama 2019. Tariki 13 Ukwakira 2019 Muyango yateguye ibirori by'isabukuru y'umukunzi we amushimira urwo yamukunze. Kuva icyo gihe kugeza n'uyu munsi, ibyabo ni inkuru idasiba gusomwa bitewe n’umunyenga w’urukundo aba bombi bahoramo.

Uwase Muyango Claudine yabaye Miss Photogenic muri Miss Rwanda 2019, yambitswe impeta y'urukundo n'umukunzi we w'igihe kirekire Kimenyi Yves, umukinnyi w'ikipe y'Igihugu Amavubi ndetse n'ikipe ya Kiyovu Sports tariki 28 Gashyantare 2021.

Miss Muyango yavuze ko atari we wanditse ibingibi

Kimenyi Yves, mu masaha 19 ashyize yashyize hanze ifoto ya Miss Muyango akuriwe ayinyuza ahashyirwa ubutumwa bumara umunsi wose ku rukuta rwe rwa instagram, ashyiraho akamenyetso ndetse gasohoye akarimi gusa nta jambo na rimwe yigeze yandika.

Kimenyi Yves amaze amasaha macye ashyizeho ifoto ya Miss Muyango akuriwe

Miss Muyango na Kimenyi bamaze igihe mu munyenga w’urukundo

Kuri uyu wa Gatatu tariki 28 Nyakanga 2021, Minisiteri Ishinzwe Iterambere ry'Abarundi n'Umutekano w'Abaturage (MininterInfosBi), yanyujije kuri Twitter ubutumwa buvuga ko ibitaramo Israel Mbonyi yari gukorera mu Burundi byahagaritswe.

Iyi Minisiteri yavuze ko Israel Mbonyi 'atarahabwa uburenganzira n'abayobozi bo mu Burundi babifitiye ububasha' bumwemerera kuhakorera ibitaramo.

Israel Mbonyi yari aherutse kugaragaza gahunda ntakuka y'ibi bitaramo bitatu. Ibi bitaramo byateguwe na Valentin Kavakure Umuyobozi washinze sosiyete y'ubucuruzi ya Akeza Creations. Ni nawe uri gutegura igitaramo umuhanzi Kidumu azakorera mu Burundi tariki 6 Kanama 2021.

Israel Mbonyi yagombaga gukora ibitaramo bitatu mu Burundi. Igitaramo cya mbere cyari tariki 13 Kanama 2021, ahitwa Lycée Scheppers. Amatike y’iki gitaramo ni VVIP.

Igitaramo cya Kabiri cyari tariki 14 Kanama 2021, ahitwa Lycée Schepper, amatike y'iki gitaramo ni VIP.  Igitaramo cya gatatu kizaba tariki 15 Kanama 2021, ahitwa BLD De L'independence.

Israel Mbonyi yari aherutse kubwira INYARWANDA, ko mu minsi iri imbere abateguye ibi bitaramo bazatangaza amafaranga yo kwinjira muri buri kimwe.

Umuhanzi w'Umunyarwanda waherukaga gukorera igitaramo mu Burundi ni Yvan Buravan uheruka yo mu 2019, nyuma ye abagerageje byaranze.

Tariki 25-28 Ukuboza 2019, Bruce Melodie yari gukorera ibitaramo mu Burundi mu Mujyi wa Gitega birasubikwa ku mpamvu zitatangajwe.

Muri icyo gihe, kompanyi ya Cristal Events yateguye igitaramo ituma Meddy ariko birangira atagiye gukorera igitaramo ku mpamvu zasobanuwe ko ari iz'umutekano.

Gukoresha Youtube nk’umwuga ni amahirwe n’amahitamo amaze guhira benshi. Ubona igikundiro n’amafaranga-Ingero z'abo uru rubuga rutunze hanze ni benshi!

Ariko si ibya buri wese kuko isoko ry’abayikoresha baraguka umunsi ku munsi. Ibi nibyo bituma benshi mu bakoresha uru rubuga bashakisha imbuga zitandukanye baguriraho ‘views’ mu kugaragaza ko bafite igihiriri cy’abantu bayobotse ishyaka.

Uretse kugura 'views' hari n’abagura 'subscribers' mu kugaragaza ko hari umubare munini ugenda ukura nk’igihumyo wishimira ibyo bakora.

Imbuga [Website] zigurisha izi serivisi zigufasha kubona 'Subscribers', 'Likes', 'comments' kuri videwo n’ibindi bigaragaza urubuga rwawe nk’urwa mbere muri sosiyete.

Kugura izi serivisi bituma hari umubare ukurikirana iyi shene, utekereza ko wacitswe kujya muri ibyo bihumbi nabo bakayoboka. 

Umuhanzi w'Umunyarwanda Ngabo Medard Jorbert [Meddy] ukorera umuziki muri Leta Zunze Ubumwe za Amerika, mu ijoro ryo ku wa 22 Nyakanga 2021 yasohoye amashusho y'indirimbo ye nshya yise 'My Vow' yahimbiye umugore we Mimi barushinze.

Ni indirimbo yakangaranyije uruhando rw'imyidagaduro, kuko mu gihe cy'iminsi ibiri yujuje miliyoni 1 y'abantu bayirebye-Meddy aca agahigo katigeze gakorwa n'undi muhanzi nyarwanda kugeza ubu.

Benshi mu bakoresha imbuga nkoranyambaga banditse bagaragaza ko Meddy yaguze views-Bakagaragaza ko bidashoboka ko umuhanzi wo mu Rwanda yakuzuza miliyoni 1 y'abarebye amashusho y'indirimbo ye mu gihe cy'iminsi ibiri gusa.

Bashinja Meddy kugura Views, bagasubizwa ko nabo babikora

Umuhanzi Teta Diana ubarizwa muri Suede yanditse kuri konti ye ya Twitter avuga ko kugira shene ya Youtube ari ubuntu, kandi koko bisaba kuba ufite Email gusa.

Avuga ko 'views' n’aba 'followers' bagurwa, bityo ko 'showbiz' ya byacitse yica umuziki. Uyu muhanzikazi yavuze ko 'ubuhanzi bwigenga buravuna ariko bukaramba.'

Yungamo ati “Twubake ibyagutse kandi biramba, ubugeni n'ubuhanzi byubahwe, abahanzi muri rusange mwihugure.”

Umunyamideli Shaddy Boo yanditse kuri Twitter abwira abavuga ko Meddy yaguze views bagateye ikirenge mu cye.

Ati 'Reka twemere ko Meddy yaguze views none mwe kuzigura mubuzwa ni iki? Nta mafaranga mufite?. None se we akurahe amafaranga? Mu muziki, iyaba mwari mumwiganye byibuze. Nanjye mu kanya muraje ngo aba followers narabaguze.'

Kuri uyu wa Kabiri tariki 27 Nyakanga 2021, Meddy yari ayoboye urutonde rw'abantu bavugwaga cyane kuri Twitter [Trending].

Micomyiza Jean Baptiste avuga ko kimwe mu byatumye indirimbo ya Meddy ica agahigo harimo kuba yarasohotse afite aba ‘Subscribers’ kuri Youtube barenga ibihumbi 500 [Ubu agejeje ibihumbi 612] no kuri Instagram akurikirwa n'abantu barenga ibihumbi 700.

Ikindi ngo iyi ndirimbo iri mu rurimi rw'Icyongereza, binashoboka ko muri miliyoni 112 zituye Ethiopia aho umugore we Mimi akomoka, bari mu bayirebye.

Umuhanzi Tom Close avuga ko Meddy ari 'isomo ukwaryo mu muziki Nyarwanda', bityo ko abantu bakwiye kureka amashyari bakamwigiraho. Akomeza ati 'Bizafasha benshi mu bakora umuziki hano mu Rwanda.'

Umunyamakuru wa Kigalitoday, Anne Marie Niwemwiza avuga ko nta muntu uhejwe mu isoko ricuruza views niba koko ribaho.

Umunyamakuru w'Ikigo cy'Igihugu cy'Itangazamakuru, Basile Uwimana yavuze ko Meddy ari umuhanzi Mpuzamahanga 'u Rwanda rufite' ariko ko Abanyarwanda 'bamwe barimo n'abahanzi bake ntabwo bashaka kubyemera'. Ati 'Biratangaje.'

Ubundi se views zateje impagarara zigurwa gute, bikorwa na ba nde?

Mu gihe cy'iminsi itanu ishize, 'My Vow' isohotse ifite Likes [Abayikunze] ibihumbi 61, Dislikes [Abatarayikunze] 884. Yatanzweho ibitekerezo birenga ibihumbi umunani, kandi birakiyongera.

'Engagement’ (Likes& Comments) ni kimwe mu bishobora kugaragaza ko indirimbo yaguriwe 'views'. Iyo engagement y'indirimbo iri hejuru biba bigaragaza ko nta views, iyo engagement iri hasi bigaragaza ko indirimbo yaguriwe views.

Hari Application zirenga 20 ziri kuri internet wifashisha ukagura views kuri Youtube, bakakuzamurira aba Subscribers…ukagura aba Followers kuri Instagram, Twitter…Twaguhitiyemo umunani za mbere.

1.Urubuga Follower Packages: Iyo ushaka ko video yawe irebwa n’abantu 10, 000 wishyura amadorali 55. 00.

Uru rubuga ruhabwa amanota na benshi, kuko ngo rutanga serivisi nziza mu bijyanye na views na subscribers. Uretse ibi, uru rubuga runatanga serivisi, aho ushobora no kugura umubare w’aba Followers kuri Instagram, kugira umubare munini w’abumva indirimbo zawe kuri Sound Cloud n’ibindi.

2.Urubuga Getviral: Kugira ngo video yawe irebwe n’abantu 1, 000 wishyura amadorali 47.99. Uru rubuga runagurisha ‘Subscribers’; utanga amadorali 81. 99 ugahabwa aba-subscribers 1000.

Uru rubuga rurahendutse cyane. Rushobora kugurisha views 1000 ku madorali 6; icyiciro cya nyuma kuri uru rubuga ni views 1000, 000 ku madorali 370 – mu mafaranya y’u Rwanda aragera ku bihumbi 370.

3.Urubuga Viralyft: Utanga amadorali 44.99, video yawe ikarebwa n’abantu 10, 000. Runagurisha aba Subscribers, utanga amadorali 81. 00 ukabona aba subscribers 1000 kuri shene yawe ya Youtube.

Uru rubuga runacuruza aba followers kuri instagram na Likes. Ruzwiho ku-busitinga (boost) shene za Youtube cyane.

4.Urubuga Social Packages: Rugurisha views 10, 000 ku madorali 44.00 kuri Youtube. Runagurisha aba subscribers, aho utanga amadorali 71. 00, ukabona aba-subscribers 1000.

5.Urubuga Views Expert: Rutanga views ibihumbi 10 ku madorali 44, rutanga aba-subscibers 1,000 ku madorali 71.99. Uru rubuga rukorera mu bihugu birenga 30 ku Isi. Rugurisha serivisi zarwo guhera ku madorali 4.99 kugera kuri 625.99.

6.Urubuga GetRealBoost: Hejuru yo gucuruza views kuri Youtube, rucuruza aba Followers kuri Instagram, Twitter, Soundcloud no kuri Facebook. Rugufasha kubona umubare munini wa likes, shares, comments na subscriptions.

Uru rubuga runatanga Likes z’ubuntu kuri buri paki ya serivisi yabo uguze. Rucuruza guhera ku madorali 5 kugera ku madorali 2 500.

7.Urubuga Famoid: Rwihariye mu kuzamura imbuga nkoranyambaga no kuzamura ‘business’ z’abantu zikamenyekana mu gihe gito.

Rucuruza serivisi za Youtube, Twitter, Soundcloud, Pinterest, Linkedin na Vimeo. Niba ushaka kumenyekanisha ‘business’ yawe binyuze kuri Youtube, Famoid ni amahitamo yawe.

Bivugwa ko ari rwo rugurisha aba-subscribers ba nyabo kuri Youtube, ndetse ubasha kubona Likes nyinshi kuri video yawe.

Rukorana n’abanyamuziki, abayobozi b’ibigo bikomeye, sosiyete z’ubucuruzi n’abandi bashaka kwiyegereza abaguzi bifashishije imbuga nkoranyambaga.

8.Urubuga StormViews: Ruzwi na benshi mu bantu bagura views kuri Youtube. Rugusezeranya kubona views wasabye mu gihe wamaze kwishyura. Ku madorali 9.99 ubona views 1000, ku madorali 569.99 uhabwa views 100, 000.

Uru rubuga rugusezeranya kubona ibyo wasabye mu kanya nk’aho guhumbya; ruvuga ko rukora amasaha 24/7 kugira ngo ruhaze ibyifuzo by’abakiriya.

Izi mbuga zishyiraho n’uburyo ushobora kwishyura aya mafaranga mu byiciro; nko mu gihe cy’iminsi iri hagati ya 2 na 3, 4 na 7 n’indi. Banashyiraho aho ushyiraho link ya video ushaka ko views ziyongera, bagashyiraho n’uburyo bwo kwishyura burimo Visa Card n’ubundi.

Ntabwo Youtube yemera kugura Views

Iyo ubuyobozi bwa Youtube bumenye ko waguze views urabihanirwa. Uburyo Youtube yemera ni ubuzwi nka Skippable ads non-skippables aho wishyura ari hagati y'amadorali 2000 na 100, ikakwamariza cyane cyane ibicuruzwa.

Inyandiko ya Youtube iri kuri internet ivugamo ko uru rubuga rutemera umuntu wese ugura Views, Likes, Comments n'ibindi bituma yigaragaza nk'aho sosiyete imukunda. Bati 'Ibi ntibyemewe.'

Uru rubuga ruvuga ko rwiteguye gukuraho burundu shene yose igura views n'ibindi. Rushishikariza abarukoresha, kurumenyesha igihe cyose babonye ibintu binyuranyije n'amategeko n'amabwiriza yarwo.

Bati 'Shene ya Youtube itubahiriza amabwiriza n'amategeko twashyizeho ikurwaho by'igihe gito cyangwa se bya burundu.'

Youtube, ni urubuga rukoreshwa n’abashabitsi, abanyamuziki, abakinnyi ba filime, aba Vloggers n’abandi. Ku basha gukora ikintu kikiganza muri miliyoni z’abantu bakoresha uru rubuga ni intambara itoroshye.

Youtube yashinzwe mu 2005. Nibura aba-Youtubers bashyiraho video z’amasaha 300 mu gihe cy’isaha imwe. Ibi bivuga ko niba ushaka ko ibyo washyizeho birebwa ukeneye izi mbaraga.

Urubuga Follower Package ruvuga ko ukuri guhari ari uko aba-Youtubers n’abandi bakoresha buri gihe uru rubuga bagura views “n’ubwo benshi badashobora kubyemerera mu ruhame”, kuko ari ibanga ry’akazi.

Izi mbuga zikoresha network iri ku rwego rwo hejuru ku buryo mu gihe gito ‘video’ yawe iba igeze ku bantu benshi.

Wigeze ubona uburyo hari ibiganiro bimwe na bimwe ureba byagera hagati hagacamo ibikorwa byo kwamamaza, hari igihe ubonamo indirimbo nshya, filime igezweho n’ibindi.

Ibi bikorwa bikwereka ko ushobora kubikandamo ugakomeza kumenya byinshi cyangwa se ugakanda 'next' ugakomeza kureba ikiganiro cyawe. Sinzi niba utarigeze uhura na Porogaramu Ayoba muri video runaka waba wararebye.

Ibi bigo bikorana na Google ku buryo bikuzengereza bikakwamamarizaho waba ubishaka cyangwa utabishaka.

Igihe nateguraga iyi nkuru, zimwe muri izi mbuga zicuruza 'views' zanyerekaga ubutumwa bw'abantu ziri guha aba ‘followers’ bamaze kwishyura. Zananyerekaga amazina y’abantu batandukanye bishyuye basaba aba followers kuri Instagram, Subscribers kuri Youtube n’ibindi.

Izi mbuga zikwizeza kuguha ‘views’ zitazigera zivaho ukundi, n’ubwo hari izo ugura zikavaho. Izi mbuga kandi zivuga uko ‘video’ igira ‘views’ nyinshi ari nako yisanga mu maso ya ‘search engines’ no ku mbuga nkoranyambaga.

Kugura views wifashishije Application zitandukanye birashoboka, ariko iyo Youtube ibimenye iraguhana

Youtube yerekana ko indirimbo 'My vow' ya Meddy iri kurebwa cyane muri Uganda, Kenya na Tanzania

KANDA HANO UREBE AMASHUSHO Y'INDIRIMBO 'MY VOW' YA MEDDY

“>

Mu myidagaduro ya Uganda, Dj Alisha azwi cyane ku ma Radiyo atandukanye aho agenda avanga umuziki, mu nkuru ya Galaxyfm bavuga ko umuntu wo muri Uganda aramutse avuze abakobwa beza kandi b’uburanga ntashyiremo  DJ Alisha biba bifatwa nk’ibintu bibogamye kuko arivugira.

Umunyarwandakazi Dj Alisha wibera mu mujyi wa Kampala, ibikorwa bye bimaze gufata urundi rwego nk’icyamamare. 

Dj Alisha akomoka mu Rwanda ariko ubu abarizwa muri Uganda. Ni imbaraga ziyongera ku myidagaduro ya Uganda. Azwi cyane mu buhanga bwe bwo kuvanga amajwi y’umuziki mu bitaramo n’ibirori abenshi bakanyurwa.

Galaxy ivuga ko umwaka ushize, Dj Alisha yasinye amasezerano na Kompanyi ikomeye ku isi ariko agashami ka Uganda ‘Black Market Records’. Iyi Kompanti ifite izina rikomeye ku isi  ikorera mu bihugu bitandukanye byo muri Afurika nka Kenya, Uganda , Nigeria n’ahandi ariko ikagira icyicaro muri Califonia muri America.

Dj Alisha 

Indirimbo ya Meddy 'My Vow' iri kumvwa cyane mu bihugu bitandukanye yavugishije abatari bake kugeza n'aho nyuma yo gukinwa kuri Televiziyo ikunzwe cyane ya Wasafi Tv abantu benshi batatunguwe, ahubwo batunguwe n'uko banditse ko bayemeje nyamara ari indirimbo yakoze amateka.

Televiziyo ya Wasafi nyuma yo gukina iyi ndirimbo banyarukiye ku rubuga rwa instagram bashyiraho iyi ndirimbo bandika ko bayemeye (Approved)  bagira bati 'yemejwe'.

Ni ubutumwa bwashyizweho buherekejwe n'iyi ndirimbo iriho ikirango cya Wasafi Tv cyerekana ko bayikinnye ndetse banayemeye ko ari indirimbo nziza nyamara imaze iminsi iri gukundwa ndetse inayoboye urutonde rwo mu karere k'Iburasirazuba.

Muri ubwo butumwa bwagiraga buti: '(…)Yemewe ubu kuri Wasafitv. Indirimbo nshya ya @meddyonly -#Myvow Approved= yemejwe.''

Nyuma y'ubwo butumwa benshi berekanye amarangamutima yabo kuri iyi ndirimbo ahubwo bavuga ko batinze kuyikina, abandi bavuga ko uyu muhanzi ari Chris Brown wo muri Afurika, abandi bamwita umwami batangira kuvuga ko nta n'aho ahuriye na Diamond.

Iyi ndirimbo igishyirwaho hari uwitwa EmillytatuKariza wo muri Tanzaniya wakoresheje ururimi rw'igiswayili agira ati: '(Mulikuwa mnasubiri iwe hit ndio mpost)', tugenekereje mu Kinyarwanda yagiraga ati: 'Mwari mutegereje ko iba hit ngo mubone kuyipostinga''.

Ni amashusho afite ibitekerezo bitandukanye basubiza iyi televiziyo ariko hari uwitwa rgistyga wahise akoresha ubutumwa bw'icyongereza agira ati: 'Muri bande bo kwemeza indirimbo ya Meddy? oya ntimube abapfapfa'.

My Vow ni imwe mu ndirimbo ikunzwe mu bihugu bitandukanye ndetse uburyo iyi ndirimbo yarebwe bwerekana intambwe nziza umuziki wo mu Rwanda umaze gutera mu buryo ubwo ari bwo bwose ndetse n'uburyo zikinwamo mu bindi bihugu.

Ubutare (fer/iron) iyo bubaye bucye mu mubiri, bitera ibibazo bitandukanye. Muri rusange abagore ni bo bakunze kugaragaraho ikibazo cyo kugira ubutare bucye mu mubiri cyane kurusha abagabo muri rusange.

Indwara yo kugira amaraso macye (anemia), iterwa nuko ubutare buba ari bucye mu mubiri, akaba ari bwo bwitabazwa mu gukora igice cy’ingenzi cy’amaraso cya hemoglobin.

Hemoglobin ni igice cy’ingenzi mu ikorwa ry’insorozitukura z’amaraso akaba ari na yo yitabazwa mu gutwara umwuka wa oxygen mu bice bitandukanye by’amaraso. Iyo umubiri udafite ubutare buhagije ngo ukore hemoglobin, umubare w’insoro zitukura ufite ziragabanuka, bityo ingingo zitandukanye z’umubiri zigatangira gukora nabi kuko ziba zitakigerwaho n’umwuka uhagije wa oxygen; ibi bitera guhorana umunaniro udashira ndetse no guhumeka gacye.

1.Guhora wumva urushye

Guhorana umunaniro, kabone naho waba wumva nta kintu gikomeye wakoze bishobora kuba ikimenyetso cy’uko ufite ubutare bucye mu maraso. Bishobora guterwa nuko mu mubiri wawe hatari kugeramo umwuka uhagije wa oxygen, bityo ugahora wumva unaniwe.

2.Kuribwa umutwe bihoraho

Iyo mu bwonko hatagera umwuka uhagije wa oxygen bitera imijyana y’amaraso kubyimba, bityo ugahora uribwa umutwe bidashira.

3.Umutima uteragura

Umutima kumva uteragura cyane ni kimwe mu bimenyetso bikomeye bishobora kukwereka ko ufite ubutare budahagije mu mubiri. Mu gihe uzumva umutima wawe utera cyane kabone nubwo nta kintu kidasanzwe gikoresha umutima waba wakoze, ni ngombwa kugana kwa muganga ukareba niba byaba bidaterwa n’amaraso macye.

4.Kumagara iminwa

Iminwa yumagaye kandi isaduka ni ikimenyetso mu bantu bamwe na bamwe cy’uko afite ubutare bucye mu mubiri. Kumagara iminwa no gusaduka bishobora kubangaira ubifite no gutuma atabasha kurya neza.

5.Kuzana utuntu tw’umukara ku ruhu

Utuntu tw’umukara dukunda kuza ku ruhu dushobora guterwa no kubura ubutare mu maraso. Mu gihe ibi bikubayeho ushobora gutangira gufata inyongera z’ubutare mu kuvura iki kibazo.

6. Guhindura ibara ku ruhu ukabona rwerurutse

Iyo mu maraso hatarimo hemoglobin ihagije, bivuze ko n’amaraso agera mu ruhu agabanuka bityo ibara ry’uruhu rigahinduka; niho uzasanga uruhu rwerurutse. Kugira urugero ruri hasi rw’ubutare bitera uruhu guhindura ibara, niyo mpamvu nubona rwahindutse ugomba kugana kwa muganga, ukareba niba byaba biterwa nuko ubutare ari bucye mu maraso.

7.Gushaka kurya ibintu byanduye

Abantu bafite ubutare bucye mu mubiri bahora bifuza kurya ibintu byanduye nk’ibitaka, umucanga, yewe hari n’abumva bashaka amatafari, iki kibazo cyitwa pica. Ibi bibazo bishobora gukurwaho no gufata inyongera z’ubutare. Ibi akenshi bikunze kuba ku bagore batwite, aho usanga bakenera urugero rw’ubutare ruri hejuru.

8.Gutakaza imisatsi

Iyo ubutare bugabanutse mu mubiri, bishobora gutuma utangira gutakaza umusatsi. Mu gihe ubona utangiye gutakaza imisatsi, ukwiye kugana kwa muganga bakaba bareba niba udafite ikibazo cy’ubutare bucye mu maraso.

9.Amaguru adahagarara

Indwara yo guhora uzunguza amaguru ubudatuza (Restless Leg Syndrome), rimwe na rimwe ukumva hari utuntu tukwirukamo ishobora kuba ikimeneytso cy’uko ufite ubutare bucye mu maraso.

10.Inzara zicukuye

Iyo inzara zawe zitangiye gucukuka (bizwi nka koilonychias), ishobora kwerekana ko ufite ikibazo cy’ubutare bucye. Imbere mu nzara zawe hatangira gutebera, bihita bituma inzara zawe zimera nk’ikiyiko. Inzara zitangiye kuvunika byoroshye no gusaduka kimwe no guhindura ibara bishobora kuba ikimenyetso cy’ubutare bucye mu maraso.

Mu gihe ubonye kimwe cg byinshi muri ibi bimenyetso ni ngombwa kwihutira kugana kwa muganga, ukaba wasuzumwa ko ubutare bwawe butari ku rugero rwo hasi.

Source:umutihealth.com

[email protected]

Ese urimo kureba ingano y’ibiguhangayikishije ntubone ingano y’Umukiza wawe? Ndashaka kugushyira mu cyerekezo gishobora kugufasha gushira ubwoba. Ndashaka ko utangira gutumbira Yesu ukamuhanga amaso.

Yesu mu buzima bwe hano ku isi yarasekaga ndetse yarariraga. Ibuka ijoro Yesu yavuye mu murwa akerekeza ku musozi ajyanye n’abigishwa be. Bahageze, yarababwiye ati 'Musenge mutagwa mu moshya'.

Hanyuma Yesu yarapfukamye arasenga ati 'Data niba bishoboka, iki gikombe cy’umubabaro kindenge. Ariko byose bibe uko ushaka ntibibe uko nshaka'.Uwo mwanya malayika yavuye mu ijuru amuha imbaraga. Mugihe yari yuzuye umubabaro, Yesu yasenganye umwete kuburyo yabize ibyuya bivanze n’amaraso (Luka 22:39-44).

Ese urugero rwa Yesu rutwigisha iki? Biroroshye. Jya umwigiraho mu gihe uhuye n’ibikkomeye. Jya urusoma mu gihe ufite ubwoba. Mubyukuri ubwoba umuntu ashobora kuvuga ko ari kimwe mu marangamutima aza ku mwanya wa mbere kandi na Yesu yarabugize asaba Se ko yamurenza igikombe cy’umubabaro (Luka 22:42).

Mbese ni iki cyagutera gusenga isengesho nk’irya Yesu? Guhura n’icyorerezo, gusohorwa mu nzu? Kuba mu bitaro? Inkomoko y’ubwoba bwawe ishobora kugaragara nk’idafatika ku bandi, ariko pfukama usengane umwete nk’uko Yesu yabigenje.

'Data niba bishoboka iki gikombe cy’umubabaro kindenge'. Uwa mbere wo kumva ubwoba bwe ni Se. Yashoboraga kuba yaragiye kwa nyina. Yashoboraga kwiringira abigishwa be.Yashoboraga kujya gusengana n’abandi. Ariko icyo yakoze bwa mbere yagiye kwa Se.

Biratangaje! Iyo duhuye n’ibiteye ubwoba ni hehe tujya? Bwa mbere muri bare, ku mujyananama, gusoma igitabo kigufasha cyangwa ku nshuti yawe.Yesu si ko yabikoze. Uwa mbere wo kumva umubabaro we yari Se wo mu ijuru.

Mu gihe uhuye n’akaga kora nk’uko Yesu yabigenzaga. Ntugire ubwoba bwo gusenga nk’uko Yesu yagiye mu gashyamba Getsemane. Suka amarira yawe imbere y’Imana uyisabe kuguha imabaraga zo guhangana n’ibihe bigoye uri kunyuramo. Fungura umutima wawe ubwize Data ukuri, mubwire ibijyanye n’uburwayi bwawe, mubwire ibijyanye n’akazi. Data afite igihe gihagije cyo kumva kandi afite impuhwe zisaga. Ntatekereza ko ubwoba bwawe ari ubugoryi. Ntazigera akubwira ngo 'ceceka' ari kumwe nawe. Azi uko umeze.

Data wo mu ijuru azi ibyo dukeneye. Ni yo mpamvu ugomba kwatura isengesho ryawe nk’uko Yesu yabikoze. Imana ntiyakuyeho umusaraba, ahubwo yakuyeho ubwoba kuri Yesu. Imana ntibuza umuraba kubaho, ahubwo irawucyaha.

Abafilipi 4:6 hatwibutsa 'Ntimukagire icyo mwiganyira, ahubwo ibyo mushaka byose bimenywe n’Imana mubisabiye, mubyingingiye, mushima'.Ntugapime ingano y’umusozi, bwira ubasha kuwukuraho. Aho kwikorera isi ku mugongo wawe, bwira ufite isi mu biganza bye. Ibyiringiro birahari. Ushobora kuba utewe ubwoba n’ibikomeye wanyuzemo mugihe cyashize, ariko uyu munsi, ubwoba bwawe buzanire Imana. Iki ni cyo gihe cyawe.

Source: www.christiantoday.com

[email protected]