Webrwanda Backend

Author: webrwanda

  • Ibihato mu ishyirwaho ry’umushahara fatizo mu Rwanda – #rwanda #RwOT

    Amaso yaheze mu kirere by’umwihariko ku bakora imirimo itanditse cyangwa se iciriritse, bafata umushahara fatizo nk’umucunguzi w’igihe kinini bamaze bahembwa intica ntikize.

    Umushahara fatizo u Rwanda rwagize umaze imyaka isaga 40 ugiyeho, wateganyaga ko umukozi wese ukorera abandi mu gihugu, atagomba guhembwa munsi ya 100 Frw ku munsi. Ibihe byarahindutse ubu n’umugati kuwubona kuri ayo ni hamana.

    Hari urubanza rwaburanishijwe mu Rukiko rw’Ikirenga mu 2016, aho ikigo cy’ubwishingizi kimwe cyaburanaga n’indi sosiyete ku bijyanye n’indishyi, biba ngombwa ko rufata umwanzuro w’uko icyo kibazo gikemurwa, haherewe ku mushahara fatizo wa 3 000 Frw.

    Nibura ibihumbi 100 Frw ku kwezi

    Ni ibisanzwe, mu gihe nta tegeko rihari, umucamanza arabyemerewe mu bushishozi bwe, kugena uko bigenda kandi bikazanifashishwa mu zindi manza nk’urwo mu gihe itegeko ritaraboneka.

    Bivuze ko habayeho gushingira kuri uwo mushahara fatizo urukiko rwanzuye ubwo Guverinoma izaba ishyiraho umushahara fatizo, nta muntu ukorera undi mu Rwanda wahembwa munsi ya 90 000 Frw.

    Ayo na yo ntahagije, nk’uko bivugwa na Gasore Séraphin, Umunyamabanga Mukuru Wungirije w’Impuzamasendika Iharanira uburenganzira bw’abakozi, Cotraf-Rwanda, akaba n’Umuhuzabikorwa wa Synergie-Zamuka.

    Gasore yabwiye IGIHE ko hari ubushakashatsi bakoze mu 2014, bagasanga nibura muri Kigali, kugira ngo umuntu ahabe, amafaranga amake ashoboka akwiriye guhabwa mu kazi ari 126 000 Frw n’ibihumbi 80 Frw hanze ya Kigali. Nyuma y’imyaka irindwi, birumvikana ko byahindutse.

    Yavuze ko haramutse hashyizweho umushahara fatizo, byazamura imibereho y’abakozi bahora bataka kubaho nabi.

    Ati “Imirimo yose ntabwo yagombye kugira umushahara fatizo umwe kuko imvune ntabwo ari zimwe. Umuntu wirirwa acukura amabuye ntabwo wamubwira ngo bitatu ni yo fatizo ariko hari aho usanga n’ubu bahembwa atageze no kuri ayo yagenwe. Nk’umusekirite ntarenza 50 000 Frw ku kwezi kuko abamukoresha batekereza ko yirirwa ahagaze ariko umushahara ugomba no gushingira ku guhenda k’ubuzima.”

    Ishyirwaho ry’umushahara fatizo ni inyungu cyane ku bakora mu nzego z’irimo yanditse n’itanditse

    Mu gihe umushahara fatizo waba udashyizweho, ngo ni ikibazo gikomeye ku bukungu bw’igihugu by’umwihariko ku mibereho y’abakozi n’imiryango yabo.

    Ati “Niba muri Kigali udashobora gukodesha inzu iri munsi y’ibihumbi 25 by’amafaranga y’u Rwanda, udashobora kurya munsi y’ibihumbi bibiri, ugakenera utwangombwa twa buri munsi, usanga mu by’ukuri umushahara udakwiriye kujya munsi y’ibihumbi 100 by’amafaranga y’u Rwanda.”

    Ishoramari ryahababarira

    Impuguke akaba n’umusesenguzi mu bukungu, Teddy Kaberuka yabwiye IGIHE ko gushyiraho umushahara fatizo bisaba kwigengesera, kuko ushobora gusanga ubukungu bwose busubiye inyuma.

    U Rwanda ruri ku mwanya wa kabiri muri Afurika nk’ahantu byoroshye gukorera ubucuruzi, nk’uko Raporo ya Banki y’Isi izwi nka Doing Business Report 2020 ibigaragaza.

    Nyuma y’umutekano, ibiciro by’abakozi na byo ni ingenzi ngo umushoramari runaka yemere kujya gushinga uruganda rwe mu gihugu runaka.

    Kaberuka yavuze ko mu gihe u Rwanda rwaba rushyizeho umushahara fatizo, bivuze ko waba ujyanye n’uko ubuzima buhagaze mu gihugu. Nuramuka ubaye mwinshi, bizatera ubwoba abashoramari bagabanuke.

    Ati “Leta zo muri Afurika kuko ziri gushaka gukurura abashoramari benshi, baravuga bati nidushyiraho igiciro fatizo, umushoramari uzaza bizamusaba guhemba ayo mafaranga, bizatuma igiciro cy’abakozi kizamuka bitume n’ibiciro bihenda ku isoko.”

    Yakomeje agira ati “Ni icyemezo cyo kwitondera. Keretse nk’ubu turi muri EAC cyangwa mu isoko rusange rya Afurika, ibihugu bifashe politiki imwe ijyanye n’umurimo, bikagira ikiguzi cy’ibikorerwa mu nganda (production cost) kijya kungana. Kubikora igihugu muturanye kitabikoze, bizatuma niba uruganda rwashakaga kuza mu gihugu cyawe, rujya ahandi horoheje.”

    Ni byo byateje imbere u Bushinwa mu myaka mike ishize, ubwo inganda nyinshi zajyaga gukorerayo kuko abakozi baho babaga bahendutse ugereranyije n’i Burayi. Byatumye n’ibicuruzwa bivayo ku isoko mpuzamahanga bihenduka.

    Kaberuka yavuze ko mu gihe ibiciro mu nganda byiyongereye kubera imishahara, bivuze ko n’ibiciro byavuye muri izo nganda uretse kuba bizahenda ku isoko ry’imbere no hanze y’igihugu bizahenda cyane, ntibigurwe.

    Ati “Ibijyanye n’imishara y’abakozi biri mu bikurura abashoramari cyangwa bikabaca intege. Ibihugu biri kujyamo inganda muri iki gihe ni ibifite imishahara y’abakozi itaremereye.”

    Mu zindi ngaruka zo kuba hashyirwaho umushahara fatizo ubereye abakozi, ni uko bigabanya ihangwa ry’ubucuruzi buciriritse kuko akenshi ba nyirabwo baba bataragira ubushobozi bwo guhemba amafaranga menshi, nyamara ari bumwe mu buzamura ubukungu bw’igihugu.

    Kaberuka ati “Niba ufite na butiki muri karitsiye, uwo ukoresha agomba guhembwa hakurikijwe wa mushahara fatizo. N’umukozi wo mu rugo biramureba, ntagomba kujya munsi.”

    Impuguke mu bukungu zigaragaza ko gushyiraho umushahara fatizo ari ibyo kwitondera cyane

    Gasore we avuga ko ahubwo kongera imishahara ari bimwe mu bizateza imbere ubukungu, kuko abaturage bazazamura ubushobozi bwabo bwo guhaha.

    Ati “Ufite ubushobozi bwo guhaha ashoboza inganda gukora byinshi kurushaho. Iyo inganda zikeneye gukora byinshi, zishaka n’abakozi benshi bo kubikora.”

    “Iyo umukozi akennye akaba uwo kugura ibyo kurya gusa, ntacyo azamarira inganda n’izindi serivisi, azateza imbere abahinga gusa kuko akeneye ibyo kurya.”

    Ku kijyanye n’uko ubucuruzi buciriritse bushobora kuhazaharira kubera izamurwa ry’imishahara, Gasore we yavuze ko ahubwo iziyongera kuko abantu benshi bazaba bafite ubushobozi, bagasagura ayo gukora ibindi.

    Ati “Iyo wa mukozi utuma igihugu gitangarirwa adashobora kwigurira n’igare ngo agende muri ya mihanda myiza yubaka, ntabwo ari ikintu cyiza. Ntabwo yaba uwo gufasha igihugu n’abanyamafaranga kumera neza, ngo we n’umuryango we babeho nabi.”

    Nubwo Kaberuka na we yemeza ko imibereho myiza y’abakozi ari ingenzi, yavuze ko bidakuraho impungenge Leta ikwiriye kugira ku kuba ibiciro bishobora kuzamuka kubera gushyiraho umushahara fatizo, ubukungu bukaba bubi aho kumera neza.

    Umwaka ushize Urukiko rw’Ikirenga rwatesheje agaciro ikirego cy’Ishyirahamwe ry’amasosiyeti y’Ibigo by’Ubwishingizi mu Rwanda (ASSAR), ryari ryasabye ko Leta y’u Rwanda itegekwa gukuraho imbogamizi zituma hatajyaho umushahara fatizo.

    ASSAR yavugaga ko inzitizi zose zituma umushahara fatizo ujyaho zivaho kuko ari ikibazo kibangamiye inyungu rusange z’abaturarwanda.

    Ubusanzwe umushahara fatizo ujyaho ngo ufashe abaturage kwivana mu bukene no gutera imbere. Ubushakashatsi bwa Gatanu ku mibereho y’ingo (EICV5) bwagaragaje ko nibura Umunyarwanda ubarwa nk’umukene ari utabasha kwinjiza 159,375 Frw ku mwaka.

    Ni mu gihe mu 2018, Igenzura ku murimo ryakozwe n’Ikigo cy’Igihugu cy’Ibarurishamibare (Labour Force Survey), ryagaragaje ko nibura umukozi w’Umunyarwanda uhembwa ku kwezi, yinjiza nibura 56,982 Frw ku mpuzandengo.

    Mu rukiko rw’Ikirenga umwaka ushize, uruhande rwari ruhagarariye Guverinoma rwagaragaje ko bitafatwa nk’igikuba cyacitse kuba umushahara fatizo utarajyaho, kuko bigaragara ko abakorera umushahara mu Rwanda, amafaranga bahembwa ku kwezi atatuma bajya mu bukene.

    Teddy Kaberuka yavuze ko nubwo umushahara fatizo ari ingenzi ku mibereho myiza y’abakozi, ari ngombwa kwita ku iterambere ry’ubukungu bw’igihugu muri rusange

    Gasore Séraphin yavuze ko ubukungu budashobora gusubizwa inyuma no gushyiraho umushahara fatizo

  • Amarembera ya FDLR yateguje kwizihiza umunsi w’umuganura – #rwanda #RwOT

    Ubusanzwe, umunsi w’umuganura ni umunsi w’ibyishimo, kuko ari umunsi abantu batangira kuganura ku musaruro baba bavanye mu murima, bagasangira, bakishima ku buryo mu ihinga ritaha, bazongera guhurira mu murima n’imbaduko bafite akanyamuneza.

    Lt Gen Byiringiro Victor wasinye kuri iri tangazo, ni umwe mu bayobozi bacye cyane bamaze imyaka myinshi mu buyobozi bwa FDLR, gusa yatangiye kuba umukuru w’uyu mutwe mu 2019, asimbuye Mudacumura Sylvestre wiciwe mu bitero simusiga yagabweho n’ingabo za Repubulika Iharanira Demokarasi ya Congo.

    Mudacumura yagiye ku butegetsi bw’uyu mutwe w’iterabwoba mu 2003, asimbuye Gen Paul Rwarakabije wari umaze kuva mu bikorwa by’uwo mutwe akemera gutaha.

    Muri ibyo bihe, FDLR yari igifite amaboko ya bamwe mu basize bakoze Jenoside, bafite intwaro ndetse bakinanyuzamo bakagaba udutero shuma ku Rwanda ariko tugafata ubusa.

    Uyu mutwe w’iterabwoba watangiye witwa ALIR, uza guhindura izina witwa FDLR nyuma yo gushyirwa ku rutonde rw’imitwe y’iterabwoba.

    Muri ibyo bihe, uyu mutwe wari ufite abarwanyi barenga ibihumbi 25, gusa mu 2008 wari usigaranye abarwanyi ibihumbi bitandatu gusa, bitewe na gahunda ya Leta yo gusubiza mu buzima busanzwe abahoze ari abarwanyi muri uwo mutwe. Iyi gahunda yatumye abarwanyi ibihumbi 20 bose bitandukanya na FDLR, bikavugwa ko uyu mutwe kuri ubu usigaranye abarwanyi batarenze igihumbi.

    FDLR yiganye igisiga kimennye inda

    Kuva mu 2016, iyo twari tuzi nka FDLR yarahindutse. Ni nyuma y’uko abagize uyu mutwe wavutse mu macukubiri, bayakomeje no mu mashyamba aho igice kimwe kitumvikanye n’ikindi, bigatuma ucikamo ibice.

    Byatangiy ugaba igitero kikagwamo abarwanyi batanu, maze bagera mu birindiro byabo, amakimbirane agatangira kuvuka.

    Umuyobozi w’Ikirenga wa FDLR, Lt Gen Byiringiro, ni we washoje iyi ntambara, ubwo yashinjaga Col Irategeka Wilson wari icyegera cye, kugira uruhare mu rupfu rw’abasore be. Muri iyi ntambara, Mudacumura yari ku ruhande rwa Byiringiro.

    Ibi byarakaje Irategeka cyane, maze ku bufatanye n’abarimo Paul Rusesabagina, biyemeza kwiyomora kuri FDLR, bajya gushinga itsinda ryabo ryaje kuvamo impuzamashyirahamwe ya MRCD, yanashinze umutwe w’iterabwoba uyishamikiye uzwi nka FLN.

    Amakuru avuga uretse abarwanyi baguye ku rugamba, indi ntandaro yo gucikamo ibice kwa FDLR gufitanye isano n’irondakarere, aho igice cya Irategeka na Rusesabagina cyagiye ku ruhande rwacyo ruvuga ko rukomoka mu Majyepfo y’u Rwanda, mu gihe ikindi gice cyasigayemo abavuga bakomoka mu Majyaruguru y’u Rwanda, ari cyo cyasigaye nka FDLR.

    Igice cyajyanye na Irategeka nicyo cyanagabye ibitero ku Rwanda binyuze mu Ishyamba rya Nyungwe, uretse ko abenshi mu barwanyi b’umutwe wa FLN bahasize agatwe abandi bakaba bari imbere y’ubutabera.

    Umuganura w’ubutindi

    Nubwo FDLR ‘ishishikariza Abanyarwanda kwitegura umuganura’, haribazwa uburyo umutwe w’iterabwoba ugeze mu marembera uri gushishikariza abantu kwitegura umuganura.

    Ibibazo kuri FDLR byakajije umurego ubwo ingabo za Repubulika Iharanira Demokarasi ya Congo, FARDC, zotsaga ikibatsi cy’umuriro kuri iyi mitwe, cyasembuwe n’itorwa rya Perezida Félix Tshisekedi wavuze ko kurandura imitwe y’iterabwoba ari intego ya mbere mu zimuzanye mu nshingano.

    Ibi bitero byasenye mu buryo bugaragara umutwe wa FDLR binyuze mu kuwambura ibice wagenzuraga bikorerwamo ubucuruzi bw’amakara, amabuye y’agaciro n’ibindi, ari nayo mpamvu inyungu y’uyu mutwe yavuye kuri miliyoni zirenga 71$ mu 2014, ubu akaba ageze kuri hafi ya ntayo kuko uyu mutwe wamaze kwambura ibice hafi ya byose wagenzuraga.

    Ibi bitero kandi nibyo byaguyemo Mudacumura Sylvestre wari umuyobozi wa FDLR kuva mu 2003, nyuma kandi y’uko abari abayobozi ba FDLR barimo Umuvugizi wayo Ignace Nkaka uzwi nka LaForge Fils Bazeye na Nsekanabo Jean Pierre Alias Abega wari ushinzwe ubutasi, batawe muri yombi bavuye muri Uganda, gutegura ibikorwa bigamije guhungabanya umutekano w’u Rwanda nk’uko babyiyemerera.

    Amakuru ava muri Congo avuga ko Mudacumura yishwe hamwe n’abo bari kumwe barimo Col Soso Sixbert, Col Serge na Major Gaspard wari ushinzwe kumurinda. Abandi 15 bari kumwe nawe ngo bafashwe.

    Usibye aba kandi, mu 2016 Ladislas Ntaganzwa wari mu bayobozi b’uyu mutwe yoherejwe mu Rwanda kugira ngo akurikiranyweho ibyaha bya Jenoside akekwaho, ubu ari kuburanira i Nyanza aho ibyaha ashinjwa yabikoreye.

    Indunduro iri bugufi

    Mu kiganiro Umujyanama wa Perezida wa Repubulika mu by’umutekano, Gen James Kabarebe, aherutse kugirana n’urubyiruko rw’Abanyarwanda rutuye mu mahanga, yavuze ko FDLR iri mu minsi yayo ya nyuma.

    Ati “Bari mu minsi ya nyuma kubera ko abasirikare babo bari muri Kivu y’Amajyepfo baratsinzwe, abarokotse barabadushyikirije bari hano mu kigo cya Mutobo.”

    “Abacitse bakajya mu Burundi batsinzwe n’Ingabo z’u Rwanda muri Nyungwe basubira mu Burundi, Ingabo z’u Burundi ubwazo na zo zatangiye kubahiga kugeza n’uyu munsi. Bari mu minsi yabo ya nyuma yo kubaho.”

    Ishami ry’Umuryango w’Abibumbye ryita ku mpunzi (UNHCR) ryatangaje ko kugeza muri Mata 2016, abantu basaga miliyoni n’ibihumbi 500 bari bamaze kuvanwa mu byabo n’imirwano ishyamiranya ingabo za Congo na FDLR, kimwe n’indi mitwe yitwaje intwaro ibarizwa mu Burasirazuba bw’iki gihugu.

    Umutwe w’iterabwoba wa FDLR wasekeje abantu ubwo wasabaga abantu kwitegura umuganuro nyamara uri mu marembera

  • Mineduc yatangaje itariki y’isubukurwa ry’amasomo muri Kaminuza no mu mashuri abanza – #rwanda #RwOT

    Bitangajwe nyuma y’aho Umujyi wa Kigali n’uturere umunani byari bimaze iminsi 15 muri Guma mu Rugo, ariko ku wa 30 Nyakanga 2021 Guverinoma y’u Rwanda igatangaza ko ikuweho guhera ku wa 1 Kanama 2021.

    Itangazo Minisiteri y’Ubuzima yashyize ahagaragara rivuga ko “Abanyeshuri biga mu mashuri y’incuke n’icyiciro cya mbere cy’amashuri abanza bazatangira igihembwe cya gatatu cy’umwaka w’amashuri wa 2020-2021, tariki ya 02 Kanama
    2021 nk’uko byari biteganyijwe ku ngengabihe y’amashuri.”

    Iyi Minisiteri yavuze ko ayo matariki areba abanyeshuri biga mu mashuri abarizwa mu Mujyi wa Kigali n’Uturere twari twarashyizwe muri gahunda ya Guma mu rugo.

    Ku mashuri Makuru na Kaminuza, abanyeshuri bazakomeza
    kwiga uko bisanzwe. Icyakora ayo mu Mujyi wa Kigali n’Uturere twa Burera, Gicumbi, Kamonyi, Musanze, Nyagatare, Rubavu, Rwamagana na
    Rutsiro azasubukura amasomo tariki ya 09 Kanama 2021.

    Iyi minisiteri yakanguriye amashuri kubahiriza ingamba zose zigamije ikumirwa ry’ubwandu bwa Covid-19 kandi agashyiraho gahunda yo gufasha abanyeshuri bacikanywe (Catch up program) aho biri ngombwa.

    Tariki ya 09 Kanama 2021 nibwo Kaminuza zo mu Mujyi wa Kigali no mu turere twari twarashyizwe muri Guma mu Rugo zizasubukura ibikorwa

  • IGP Munyuza yasoje uruzinduko rushimangira ubufatanye hagati ya Polisi y’u Rwanda n’iya Malawi – #rwanda #RwOT

    Ibiganiro byabereye mu Murwa Mukuru wa Malawi, Lilongwe, byari mu murongo wo gushyira mu bikorwa amasezerano y’ubufatanye yasinywe hagati y’inzego zombi muri Werurwe 2019.

    Ni amasezerano akubiyemo ibijyanye no guhanahana amahugurwa, guhuza ibikorwa, gukurikirana no guhanahana abanyabyaha, kurwanya iterabwoba, kurwanya ibiyobyabwenge, kurwanya ibyaha by’ikoranabuhanga, guhanahana amakuru ku banyabyaha bahungiye muri ibyo bihugu byombi ndetse n’ubufatanye mu bindi bintu bitandukanye bijyanye n’umutekano.

    Ibi biganiro byabereye i Lilongwe bikurikiranye n’ibindi biherutse kubera i Kigali muri Kamena, ubwo Umuyobozi wa Polisi ya Malawi yari mu ruzinduko mu Rwanda hagati ya tariki ya 30 Gicurasi kugeza tariki ya 4 Kamena.

    Mu biganiro bya tariki ya 26 Nyakanga 2021, IGP Munyuza yagaragaje ko uku guhura gushimangira umuhate n’imibanire mu gukomeza ubufatanye mu mutekano hagati ya Polisi ya Malawi na Polisi y’u Rwanda. Yanashimye umusaruro ugenda uva mu biganiro bihuza aba bayobozi bombi kuko bigenda bitanga umusaruro.

    Ati” Ukurikije ibibazo by’umutekano uko bihagaze ku Isi no mu Karere, duha agaciro ingufu Leta ya Malawi ikoresha hagati yayo n’u Rwanda cyangwa n’ibindi bihugu mu gushaka amahoro arambye ku bibazo by’umutekano mu Karere n’ahandi.”

    IGP Munyuza yakomeje agaragaza ko igihe ari iki cyo guhura kuko kimwe n’ahandi ku Isi, mu gace k’Uburasirazuba bwa Afurika no mu Majyepfo hakomeje kwiyongera imitwe y’iterabwoba iteza umutekano muke mu Karere.

    Ati “Twishimiye ko uyu munsi twongeye gushimangira tukanongera kwiyemeza gukorera hamwe cyane cyane mu mashuri yacu atanga amahugurwa. Ntagushidikanya ibi bihe Isi yabaye nk ’umudugudu ubufatanye ni ingenzi mu kurwanya ibyaha byambukiranya imipaka harimo n’ibi by’iterabwoba n’ibikorerwa ku ikoranabuhanga bikomeje kwibasira umugabane wacu. “

    Muri uru ruzinduko, Polisi y’u Rwanda yemereye Polisi ya Malawi kuzohereza ba ofisiye bakuru kwiga mu Ishuri Rikuru rya Polisi y’u Rwanda riherereye mu Karere ka Musanze.

    IGP Kainja yavuze ko ubwo aheruka gusura Polisi y’u Rwanda hari amasomo yahigiye ndetse ko igihe kigeze kugira ngo ibyo yahigiye bitangire gushyirwa mu bikorwa ariko cyane cyane mu rwego rwo guteza imbere serivisi za Polisi ya Malawi.

    IGP Kainja yashimangiye ko amasezerano y’ubufatanye atanga icyerekezo mu gushyira mu bikorwa ibyo basezeranye.

    Ati “Mu nama iheruka mu Rwanda twiyemeje gushimangira ubufatanye hagati ya Polisi zacu zombi. Uru ruzinduko rwanyu ruri mu rwego rwo gushimangira ubwo bushake, bizanatanga uburyo bwo gushyira mu bikorwa ibyo twiyemeje. Inama no kubaka ubushobozi ubwabyo ntabwo bizatsinda ibibazo by’umutekano biriho muri iki gihe nihatabaho gukomeza guhanahana amakuru. Tugomba gukoresha uburyo dufite kugira ngo turebe ko duhanahanye amakuru ku gihe. Ibi kandi ni ingenzi mu kurwanya imitwe ya Islam y’iterabwoba irimo guhungabanya abaturanyi bacu ba Mozambique.”

    Tariki ya 27 Nyakanga IGP Munyuza yasuye Intara y’Amajyepfo ashyira Iburengerazuba anasura Intara y’Amajyepfo ashyira Iburasirazuba. Muri izi Ntara yirebeye urugendo rukorwa na Polisi ya Malawi mu bijyanye n’uruhare rw’abaturage mu kwicungira umutekano, agaragarizwa ko uruhare rw’abaturage mu kwicungira umutekano bigabanya ibyaha.

    Tariki ya 28 Nyakanga, IGP Munyuza yasuye ishuri rikuru rya Polisi ya Malawi riri mu Karere ka Zomba mu gice cy’Amajyepfo y’iki gihugu.

    Ni ishuri rihugurirwamo abapolisi bitegura kuba ba ofisiye bato (Officer Cadets), iri shuri kandi ritanga amahugurwa y’amezi atatu, amahugurwa ahabwa ba ofisiye batabashije gukurikira amasomo y’abapolisi bitegura kuba ba ofisiye bato (Officer Cadets), muri ayo mezi atatu bahugurwa ibijyanye n’imiyoborere n’imicungire y’abakozi.

    Mu biganiro byahuje IGP Dan Munyuza n’abayobozi b’iri shuri bagaragaje ubushake bafite mu gukorana n’amashuri ya Polisi y’u Rwanda mu bijyanye no guhanahana porogaramu y’amasomo atangirwa mu mashuri ya Polisi y’u Rwanda, guhererekanya abahugura n’abahugurwa.

    Muri uru ruzinduko rw’akazi, IGP Dan Munyuza yanasuye sitasiyo ya Polisi ya Limbe anasura sitasiyo ya Polisi y’ahitwa Mulanje.

    IGP Dan Munyuza na mugenzi we wa Malawi bashyikirizanya impano

  • Minisiteri y'Uburezi yatangaje itariki y'itangira ry'amashuri #rwanda #RwOT

    Mu gihe haraye hatangajwe ko Gahunda ya Guma mu rugo ikuweho mu mujyi wa Kigali no mu turere 8, ndetse hakanatangazwa ko nta Guma mu karere mu Gihugu cyose, uretse imirenge imwe n'imwe ikiri mu kato ka guma mu rugo, Minisiteri y'Uburezi-MINEDUC yatangaje ko igihembwe cya Gatatu cy'umwaka w'amashuri 2020-2021, amashuri y'incuke n'ikiciro cya mbere cy'amashuri abanza atangira tariki ya 02 Kanama 2021. Yanatangaje kandi itangira ry'ayisumbuye n'amakuru.

    Dore uko itangazo ry'iyi Minisiteri risobanura iby'itangira ry'amashuri n'ibisabwa ku kwitwararika kuri Covid-19.

    Photo/unicef

    Munyaneza Theogene / intyoza.com

    Source : https://www.intyoza.com/minisiteri-yuburezi-yatangaje-itariki-yitangira-ryamashuri/

  • Perezida Kagame yahaye imbabazi abagore 10 bari barahamijwe icyaha cyo gukuramo inda #Rwanda #RwOT via @kigalitoday #rwanda #RwOT

    Inama y’Abaminisitiri yateranye ku wa Gatanu tariki ya 30 Nyakanga 2021 muri Village Urugwiro, yemerejwemo iteka rya Perezida ritanga imbabazi.

    Iyi nama y’Abaminisitiri yanemeje irekurwa ry’agateganyo ry’abagororwa 4781 bari barahamijwe ibyaha bitandukanye.

    Minisitiri w’Ubutabera akaba n’Intumwa Nkuru ya Leta, Johnston Busingye, yemeje aya makuru abinyujije mu butumwa yashyize kuri Twitter.

    President Paul Kagame has granted Pardon to all 10 women convicted for illegal abortion.

    Cabinet also approved the release on parole of 4781 convicts.

    — Busingye Johnston (@BusingyeJohns) July 30, 2021

    Kanda HANO usome indi myanzuro yafatiwe mu nama y’Abaminisitiri.

    Mu mwaka ushize wa 2020 nabwo Perezida Kagame yahaye imbabazi umuntu umwe, n’imbabazi rusange abakobwa mirongo itanu (50) bari barakatiwe n’inkiko kubera icyaha cyo gukuramo inda.

    Mbere yaho muri 2019, Umukuru w’Igihugu yari yahaye imbabazi abagororwa 52 bari bakatiwe kubera kwihekura no gukuramo inda.

    Itegeko Nshinga rya Repubulika y’u Rwanda ryo mu 2003, ryavuguruwe mu 2015 mu ngingo yaryo ya 109, rivuga ko Perezida wa Repubulika afite ububasha bwo gutanga imbabazi mu buryo buteganywa n’amategeko amaze kubigishamo inama Urukiko rw’Ikirenga.

  • Guma mu Rugo yakuweho, ibikorwa byinshi birakomorerwa, utubari n’insengero bikomeza gufungwa #rwanda #RwOT

    Iyi nama y’Abaminisitiri yari iyobowe na Perezida wa Repubulika, Paul Kagame kandi yanakomoreye ibikorwa byinshi birimo imihango yo gushyingira yaba mu mategeko ndetse no mu nsengero.

    Yakomeye kandi ingendo zihuza Umujyi wa Kigali n’Uturere ndetse n’izihuza Uturere n’utundi mu gihe hari hamaze iminsi hariho gahunda ya Guma mu Karere mu Gihugu hose gusa Imirenge yashyizwe muri Guma mu rugo mu minsi ishize yo ntiyemerewe kugerwamo.

    Aya mabwiriza kandi yasubukuye ibikorwa by’imodoka zitwara abagenzi mu buryo bwa rusange aho zemerewe kutarenza 50% by’ubushobozi bw’abagenzi zisanzwe zitwara.

    Gusa Insengero zo zizakomeza gufunga kimwe n’utubari twafunze kuva hatangira gushyirwaho amabwiriza yo kwirinda iki cyorezo cya COVID-19 ubwo cyageraga mu Rwanda.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Guma-mu-Rugo-yakuweho-ibikorwa-byinshi-birakomorerwa-utubari-n-insengero-bikomeza-gufungwa

  • Rwanda-Burundi inyeshyamba 19 zafatiwe mu Rwanda zashikirijwe reta yu Burundi. #rwanda #RwOT

    Uburundi bwashikirijwe abavuga ko ari abarwanyi 19 bo mu mumutwe wa  Red Tabara bari bafatiwe mu Rwanda mu kwezi kwezi kwa cyenda  mu 2020, ico gikorwa kikaba cabereye ku mupaka wa Gasenyi/Nemba

    Uruhande rw'Uburundi ruvuga ko rwashikirijwe 'aba babarizwaga mumutwe winyeshamba'

    Abo bantu ahanini bagizwe n'abagabo bakiri bato bashikirijwe umukuru w'igisata c'iperereza mu ngabo z'Uburundi, Colonel Ernest Musaba, na mugenziwe ushinzwe imirimo nk'iyo mu ngabo z'Urwanda Brig. Gen Vincent Nyakarundi, nk'uko byatangajwe n'ibinyamakuru byo mu Rwanda Igihe.com na New Times.

    Bubicishije ku rubuga rwa Twitter, ubuyobozi mu igihugu cy'uburundi buvugako Urwanda rwashikirije Uburundi inkozi zibibi 19 z'abarundi zari zahungiye muri ico gihugu zimaze  gukora amabi'.

    Hari kandi n'abahagarariye urwego ruhuriweho rwo gusuzuma ibibazo by'umutekano ku mipaka mu bihugu by'akarere mu rwego rw'inama mpuzamakungu y'ibihugu by'ibiyaga binini CIRGL/ICGLR (Expanded Joint Verification Mechanism EJVM canke Mechanisme Conjoint de Verification MCVE).

    Abo basirikare  bari bafatiwe muri segiteri ya Ruheru muri district ya Nyaruguru mu Rwanda mu kwezi kwa cyenda  2020.

    Bikimenyekana ko bafashwe, Uburundi bwari bwasabye Urwanda ko rwabubashikiriza hatajyize izindi nzira binyuzemo.

    Red Tabara n'umwe mu mitwe ivuga ko irwanya  reta y'Uburundi ishingiye cane cane mu gihugu kibanyi ca Republika ya Democrasi ya Congo. 

    Reta y'Uburundi ivuga ariko ko bamwe binjiye muri iyo mitwe  bava iyo bari barahungiye mu Rwanda na cane cane inyuma y'igeregezwa ryo gushaka guhirika ubutegetsi mu Burundi mu kwezi kwa gatanu mu 2015.

    Reta y'Urwanda ibyo irabihakana, gusa imigenderanire hagati y'ibyo bihugu yakomeje kugenda irimo agatotsi.

    Reta y'Urwanda nayo yavuze akatari gake ko abarwanyi  bomumutwe wa FLN uyirwanya bagaba ibitero biva  ku butaka bw'Uburundi aho bafite ibirindiro.

    Na reta y'Uburudi ibyo yakomeje kubirwannya ibihakana ko atari byo na gato.

    Ariko kuva mu mwaka ushize hamaze guterwa intambwe nyinshi zo kuzura umubano hagati yabarundu n'abanyarwanda.

    Kimwe mu byagaragaje nk'ikimenyetso gikomeye ko intambwe igeze kure rwabaye urugendo rwa ministre w'intebe w'Urwanda mu Burundi.

    Edouard Ngirente yahagarariye igihugu ciwe mu birori byo kwishimira imyaka 59 Uburundi bumaze bwikukiye itariki ya mbere ukwezi kwa karindwi  uwu mwaka i Bujumbura.

    Source : https://kigalinews24.com/2021/07/31/rwanda-burundi-inyeshamba-19-zafatiwe-mu-rwanda-zashikirihwe-reta-yu-burundi/

  • ‘Habibi’ irayoboye! Byinshi ku muziki wa The… – #rwanda #RwOT

    Amezi abaye menshi hafi umwaka wenda kuzura nta ndirimbo The Ben akora ku giti cye ahubwo agerageza gufasha abanyempano bashya bamwifashishije, urwego baba bariho uko rwaba rungana agerageza kwisanisha nabo akemera gukorana nabo indirimbo, ibintu benshi mu bakunzi ba muzika nyarwanda bamushimira cyane. Kugira ngo uzamuke mu muziki utabonye umuntu ugufasha, biragoye. Niyo mpamvu The Ben, akwiriye gushimirwa na bose ku bw’urukundo agaragariza barumuna be mu muziki. 

    The Ben ari mu bahanzi b’ibyamamare bakoranye indirimbo nyinshi n’abandi bahanzi. 

    Abo bamaze gukorana harimo; Priscillah, Meddy, K8, Tom Close, Fabien, Kamichi, Muchoma, Diplomat, Knowless, Ben Kayiranga, Rema Namakula, Bac T, Nasoon, Bobo, n’abandi. Mu bo bakoranye harimo ibyamamare n’abahanzi wakwita barumuna be mu miziki. N’ubwo hari abashobora kubisobanura ukundi, ariko gukorana ibihangano n’abandi bahanzi, ni imwe mu nzira z’ingenzi umuhanzi yinjizamo zirimo gucuruza ibihangano, gukora ibitaramo, kwamamaza n’amafaranga akura mu baba bifuza gukorana nawe indirimbo.

    The Ben, ni umwe mu bahanzi bakomeye mu gihugu cy’u Rwanda b’ijwi rikundwa n’abatari bacye, ugira amarira hafi, wagiye agaragaza kwicisha bugufi imbere y’abakunzi b’umuziki nyarwanda yubahira ko bafatanije n’Imana kumugeza k’uwo ariwe uyu munsi. Biragoye kumenya niba The Ben muri Collabo zitari nk mu mezi agera kuri 11 amaze adashyira indirimbo ye hanze, yaragiye yishyurwa kuko hari n’ubwo yaba yaragiye abikorera ubuntu ariko uko biri kose urwego ariho n'umuhate yagaragaje mu gukorana n'abandi ni iby'icyubahiro, ni umusanzu mwiza yatanze.

    Kugeza uyu munsi duhereye ku rukuta rwa Instagram rwa The Ben akurikirwa n'ibihumbi  542, amaze gusangiza abamukurikira ubutumwa 1302, akurikirana abantu bagera kuri 234 mu mazina azwi y'abantu akurikira harimo Perezida Paul Kagame, Davido, Junior Giti, Meddy, Tom Close, K8 Kavuyo, Alpha Rwirangira, Lick, Alex Muyoboke, Pamella, Mimi, Scillah, Cedru, Rema Namakulla, Clement Ishimwe, Igor Mabano, Madebeatz, Element, Alliah Cool, Idris The Vain, Ariel Wayz,  Sandrine Isheja, Mike kayihura, King James, Bayingana, Christopher, Otile Brown, Yago, Uncleaustin, Luckmanzenyimana, Ernesto n'abandi batandukanye.

    Imwe mu mafoto yo mu gihe yafataga amashusho y’imwe mu ndirimbo zamuhaye umusaruro yitwa ‘Vazi’

    Urukuta rwa Instagram rwa The Ben rumaze imyaka irenga 8 aho rwafunguwe kuwa 22 Ukwakira 2012 muri Leta zunze ubumwe za Amerika, ubutumwa bwose bwagiye bunyuzwa kuri uru rukuta bukaba bwaragiye bwishimirwa ugendeye ku babukunze n'inyunganizi bagiye batanga.

    Urukuta rwa Facebook rwa The Ben rukaba ruri mu zihagazeho mu byamamare aho rukurikirwa n'ibihumbi birenga 514 rukaba na rumwe mu nkuta akunda gukoresha kurusha izindi zose urebye ibyo asangiza abamukurikiraraho. Rwafunguwe kuwa 23 Kanama 2009. Kuri Youtube, yarafunguyeho urukuta kuwa 26 Nzeri 2015. Mu myaka ikabakaba 6 shene ye ya Youtube imaze ifite umusaruro rusange wa Miliyoni zirenga 23, amashusho ya mbere yashyizweho akaba yaragezeho kuwa 30 Mata 2016.

    The Ben na Tom Close bafitanye amateka maremare mu muziki banakoranye indirimbo yitwa ‘Thank You’ iyoboye ku rukuta rwa Youtube rw’uyu muhanzi

    N’ubwo bwose ibihangano byagiye bisangizwa abakurikirana uyu muhanzi byose byagiye bikundwa ariko indirimbo yakoranye na Tom Close niyo yarebwe kenshi bigaragazwa no kwishimirwa cyane aho imaze kurebwa n'abarenga 4.3 igakorerwa mu ngata n’iyitwa ‘Vazi’ imaze kurebwa inshuro zirenga Miliyoni 4. Kugeza ubu uyu musore amaze gusangiza abamukurikira binyuze ku rukuta rwa Youtube amashusho 22.

    The Ben ukundana na Uwicyeza Pamella kuva mu mwaka wa 2019 babahora baterana imitoma bya hato na hato

    Mu mateka ya The Ben mu muziki, indirimbo yakoze ikarebwa n'abantu benshi kuri Youtube ni iyitwa ‘Habibi’ yishimiwe bitagira ikigero n’ubu usanga abantu bakiyumva  kugeza ubu ikaba imaze kurebwa inshuro zirenga Miliyoni 6.2 mu myaka 4 imaze, ikaba yarashyizwe hanze biciye ku rukuta rw'inzu y'umuziki yabarizwagamo ya PressOne. Indirimbo yumvikanamo ijwi rye yarebwe cyane mu mateka ni iyitwa Loose Control  yakoranye na Meddy imaze kurebwa n'abarenga Miliyoni 8.5 mu myaka itatu ikaba ibarizwa ku rukuta rwa Meddy.

    Umwe mu bari bambaye imyenda n’ingofero bya Tiger B rimwe mu mazina ya Mugisha Benjamin cyangwa The Ben akoresha mu bikorwa by’ubucuruzi bw’imyambaro ikorwa nawe.

    KANDA HANO WUMVE INDIRIMBO IHERUKA YUMVIKANYEMO IJWI RYA THEBEN YITWA IHOZA YAHURIJWEMO NA YVAN BURAVAN NA MIKE KAYIHURA

     

    Source : https://inyarwanda.com/inkuru/108107/akunda-barumuna-be-mu-muziki-byinshi-ku-mbuga-za-the-ben-nindirimbo-ze-zarebwe-cyane-kuri–108107.html

  • Umujyi wa Kigali n’uturere umunani byakuwe muri Guma mu rugo – #rwanda #RwOT

    Inama y’Abaminisitiri yateranye kuri uyu wa 30 Nyakanga 2021, yayobowe na Perezida wa Repubulika Paul Kagame, ni yo yafatiwemo umwanzuro wo gukuraho Guma mu rugo yari yashyizweho kuva ku wa 17 Nyakanga 2021.

    Umujyi wa Kigali washyizwe muri Guma mu Rugo bitewe n’ubwiyongere bukabije bw’imibare y’abandura Coronavirus bwawubonekagamo.

    Inama y’Abaminisitiri yateranye kuri uyu wa Gatanu imaze gusuzuma uko iki cyorezo gihagaze yanzuye ko Kigali n’uturere twa Burera, Gicumbi, Kamonyi, Musanze, Nyagatare, Rubavu, Rwamagana na Rutsiro bivaniweho Guma mu rugo. Ni icyemezo kizamara ibyumweru bibiri aho kizatangira kubahirizwa ku wa 1 Kanama kugeza ku wa 15 Kanama 2021.

    Muri ibyo byemezo by’Inama y’Abaminisitiri, hanzuwe ko ingendo hagati y’Umujyi wa Kigali n’intara ndetse n’uturere tw’igihugu zizasubukurwa uretse izo kujya no kuva mu mirenge 50 iri muri Guma mu rugo.

    Mu mabwiriza mashya, ingendo zirabujijwe guhera saa Kumi n’ebyiri za nimugoroba (6:00PM) kugeza saa Kumi za mu gitondo (4:00AM).

    Ingamba zashyizweho zizashyirwa mu bikorwa mu gihugu hose:

    a. Gahunda ya Guma mu Rugo (lockdown) ivanyweho mu Mujyi wa Kigali no mu Turere twa Burera, Gicumbi, Kamonyi, Musanze, Nyagatare, Rubavu, Rwamagana na Rutsiro.

    b. Ingendo zirabujijwe guhera saa Kumi n’ebyiri za nimugoroba (6:00 PM) kugeza saa Kumi za mu gitondo (4:00 AM). lbikorwa byose byemerewe gukomeza bizajya bifunga saa Kumi n’imwe za nimugoroba (5:00 PM)

    c. Amateraniro rusange yose arabujijwe.

    d. Ingendo hagati y’Umujyi wa Kigali n’Intara ndetse n’Uturere tw’Igihugu zirasubukuwe, uretse izo kujya no kuva mu mirenge iri muri Gahunda ya Guma mu rugo.

    e. Ibiro by’Inzego za Leta n’iz’abikorera (public and private offices) byemerewe kongera gufungura, ariko buri rwego rurasabwa gukoresha abakozi b’ingenzi batarenze 15% by’abakozi bose, abandi bakozi bagakorera mu rugo.

    f. Ibikorwa by’lnzego z’abikorera bizakomeza, ariko buri rwego rurasabwa gukoresha abakozi b’ingenzi batarenze 50% by’abakozi bose, abandi bagakorera mu rugo.

    g. Inama zikorwa imbonankubone (physical meetings) zirasubukuwe. Umubare w’abitabira inama ntugomba kurenga 30% by’ubushobozi bwo kwakira abantu bw’aho bateranira. Abitabiriye inama bose bagomba kugaragaza ko bipimishije COVID-19.

    h. Imodoka zitwara abantu mu buryo bwa rusange zemerewe gutwara abantu batarenze mirongo itanu ku ijana (50%) by’umubare w’abantu zagenewe gutwara. Abatwara bisi barasabwa kugenzura ko abagenzi bahana intera kandi bagatwara gusa abambaye agapfukamunwa. Moto n’amagare byemerewe gukomeza gutwara abagenzi. Abatwara moto n’amagare barasabwa kubahiriza amabwiriza y’isuku buri gihe.

    l. Resitora zemerewe kongera gukora, ariko zizajya zitanga gusa serivisi ku batahana ibyo bakeneye (take-away).

    j. Utubari twose tuzakomeza gufunga.

    k. Insengero zirafunze.

    l. Abagenzi bose binjira mu gihugu bakoresheje Ikibuga Mpuzamahanga cya Kigali bagomba kuba bafite icyemezo cy’uko bipimishije COVID-19 (PCR test) mu gihe cy’amasaha 72 mbere y’uko bahaguruka, kandi bakubahiriza amabwiriza y’Inzego z’Ubuzima yo kwirinda COVID-19 .

    m. Ibikorwa by’ubukerarugendo, bwaba ubw’imbere mu gihugu cyangwa mpuzamahanga (domestic and international tourism) bizakomeza, hubahirizwa amabwiriza yo kwirinda COVID-19. Muri ibyo bikorwa harimo amahoteli, abashinzwe kuyobora ba mukerarugendo (tour operators) na serivisi zo gutwara ba mukerarugendo.

    n. Ibikorwa bya siporo y’umuntu ku giti cye n’izikorerwa hanze abantu bategeranye biremewe.

    o. Pisine (swimming pools) na spas bizakomeza gufunga. Icyakora, abantu bemerewe kubikoresha aho bacumbitse muri hoteri, ariko berekanye ko bipimishije COVID-19.

    p. Ibigo bikorerwamo imyitozo ngororamubiri n’imyidagaduro (gyms and recreational centers) bizakomeza gufunga.

    q. Ishyingirwa rikorewe imbere y’Ubuyobozi bwa Leta no mu nsengero riremewe, ariko rikitabirwa n’abantu batarenze 10 icyarimwe, kandi bakagaragaza ko bipimishije COVID-19 mu masaha 72 mbere y’icyo gikorwa.

    r. Umubare w’abitabira ikiriyo ntugomba kurenza abantu 10 icyarimwe. Imihango yo gushyingura ntigomba kurenza abantu 20.

    s. lbikorwa by’imikino y’amahirwe birabujijwe.

    Abaturage bibukijwe ko ari ngombwa kubahiriza amabwiriza yo kwirinda COVID-19 harimo gusiga intera hagati y’umuntu n’undi, kwambara agapfukamunwa neza no gukaraba intoki. Abatazabyubahiriza bazafatirwa ibihano.