Webrwanda Backend

Author: webrwanda

  • Ruhango: Abarenga ibihumbi 70 bahawe amazi meza – #rwanda #RwOT

    Ayo mazi yagejejwe ku baturage bo mu barenga ibihumbi 70 bo mu mirenge ya Ntongwe, Mbuye, Mwendo na Kabagari n'ahandi.

    Hitimana Christophe wo mu Murenge wa Ntongwe, hamwe mu ho aya mazi yageze, yabwiye IGIHE ko yishimira ko babonye amazi nyuma y'iyagurwa ry'umuyoboro wa Ntongwe.

    Ati 'Tutarabona amazi byabaga bigoye kuko twavomaga mu gishanga. Ubu aha amazi ari, n'umwana muto yavoma, ariko mbere ntabwo umuntu yari kohereza umwana muto mu gishanga, aca no mu bihuru. Nkanjye uvomesha igare ntabwo ryageragayo, ariko ubu amazi ari ku muhanda, byaroroshye.''

    Ni ishimwe asangiye na Nyirashyirambere Claudine wo mu Kagari ka Gisanga, Umurenge wa Mbuye, uvuga ko bamaze imyaka 30 bavoma amazi y'ibishanga.

    Ati 'Maze imyaka irenga 30 muri uyu mudugudu, ariko ubu ni bwo mbonye amazi meza, kandi ari hafi y'ingo, biranejeje!'

    Umuyobozi w'Akarere ka Ruhango, Habarurema Valens, avuga ko bishimira ibikorwaremezo bitandukanye bagezeho muri uyu mwaka usojwe, birimo imihanda, amavuriro n'ibindi.

    Yatangaje ko nko ku miyoboro y'amazi bubatse ingana n'ibilometero 234 yatashywe mu mpera z'uyu mwaka w'ingengo y'imari wa 2024/2025, ikaba igiye kwegereza amazi abaturage 71886.

    Ati 'Akarere kose turi kukazengurutsa amazi, tumaze iminsi tuyataha mu mirenge itandukanye. Nubwo hakiri hamwe na hamwe ajya agira ibibazo byo kubura, ariko byibura iyo usana biruta kuba ucyubaka, kandi intego ni ukurangiza ibyo bibazo burundu.'

    Meya Habarurema yakomeje avuga ko mu rugendo rwo kwibohora, gahunda yo kwegereza amazi abaturage izakomeza, kandi ko intego ari ukugera ku 100% bitarenze mu 2030.

    Iyi miyoboro yuzuye itwaye asaga miliyari 5 Frw. Yagejeje amazi ku bigo by'amashuri 17, ibigo bya Leta 10, n'amavomo rusange y'abaturage 121. Byafashishe Akarere ka Ruhango kugera kuri 84% by'abaturage bafite amazi meza.

    Umuyobozi w’Akarere ka Ruhango, Habarurema Valens, yavuze ko urugendo rwohora rugikomeje, asaba ubufatanye bwa buri muturage wese

    Ku munsi w’isabukuru ya 31 yo kwibihora, imiryango 13 yo mu Karere ka Ruhango yorojwe inka ngo ibashe kwiteza imbere

    Imiyoboro y’amazi yubatswe mu Karere ka Ruhango isigiye abaturage amavomo rusange 121

    Umunsi wo kwibohora urubyiruko na rwo rwabonye n’umwanya wo kwidagadura. Mu Ruhango bahaye isiganwa ry’amagare no gusiganwa ku maguru, abahize abandi barahembwa

    Source : http://igihe.com/amakuru/u-rwanda/article/ruhango-mu-2024-25-hubatswe-imiyoboro-y-ibirometero-birenga-230-iha-amazi

  • Perezida Kagame yavuze ko FDLR nidasenywa u Rwanda ruzakomeza guhangana n'iki kibazo rukoresheje uburyo rusanzwe rukoresha #rwanda #RwOT

    Perezida Paul Kagame yavuze ko Repubulika Iharanira Demokarasi ya Congo nidasenya FDLR nk'uko bikubiye mu masezerano, bizasaba u Rwanda gukomeza guhangana n'iki kibazo rukoresheje uburyo rusanzwe rubikoramo.

    Gusenya FDLR ni imwe mu ngingo zikubiye mu masezerano u Rwanda na RDC byashyizeho umukono i Washington ku wa 27 Kamena 2025.

    Uyu mwanzuro wafashwe nyuma y'uko u Rwanda rugaragaje ko uyu mutwe wiganjemo abagize uruhare muri Jenoside yakorewe Abatutsi mu 1994, wahawe rugari muri RDC kandi biteje ikibazo ku mutekano warwo.

    Mu kiganiro Perezida Kagame yagiranye n'abanyamakuru kuri uyu wa Gatanu tariki 4 Nyakanga 2025, yabajijwe icyo u Rwanda ruteganya gukora mu gihe RDC yaba idasenye FDLR.

    Mu gusubiza, Perezida Kagame yavuze ko FDLR nidasenywa u Rwanda ruzakomeza guhangana n'iki kibazo rukoresheje uburyo rusanzwe rukoresha.

    Ati 'Ikibazo cya FDLR nikiramuka kidakemuwe kandi twarashyizeho uburyo bwo guhangana na yo mu masezerano, ibyo bizaba bivuze ko FDLR izakomeza kubaho, n'ikibazo kizakomeza kubaho kandi u Rwanda ruzakomeza gukora icyo rukwiriye gukora mu gihe FDLR iri hafi n'imipaka yacu, nta bufindo bushobora gukoreshwa (mu gukemura ikibazo), ahubwo igikenewe ni ugukora icyo ukwiriye gukora mu gukemura ikibazo.'

    Perezida Kagame yavuze ko u Rwanda rwiteguye gukora ibyo rwasabwe.

    Ati 'Twagaragaje ikibazo cyacu kandi dushingiye kuri ibyo hari ibyo twemeye gukora kandi tukabikorana n'abandi, kandi ibyo tuzabikora, ntabwo uzigera ubona u Rwanda rudashyira mu bikorwa ibyo rwemeye gukora, ntabwo uzigera ubibona. Ariko urundi ruhande ni rutabikora, rukadubiza mu bibazo, tuzasabwa guhangana n'ibyo bibazo nk'uko nubundi tumaze igihe duhangana nabyo.'

    Umukuru w'igihugu yagaragaje ko bibaho kenshi ko hari uruhande rushobora kutubahiriza ibyemejwe.

    Ati 'Amasezerano yo arahari, mu masezerano hari ibyo abayashinzwe bemera gukora buri umwe ku giti cye cyangwa gukorana hamwe. Ntabwo rero iteka abantu bose bakoresha ukuri cyangwa bavugisha ukuri no mu byo bemeye ku mugaragaro.'

    'Ariko navuga ko ku ruhande rw'u Rwanda tuzakora ibyo twemeye uko bishoboka, ariko bimwe bihera ku byo abandi bakora twemeranyije, iyo badakoze ibyo twemeranyije ubwo birumvikana ko bifite ingaruka ku byo natwe tugomba gukora, twemeye kubikora kandi tuzabikora ari uko abandi na bo bujuje uruhande rwabo. Ibi nibidakorwa tuzakomeza gushakisha inzira iyo ari yo yose, igihe inzira itaraboneka yo gukemura ibibazo uko bikwiriye kuba bikemuka, u Rwanda na rwo ruzakomeza gukora ibishoboka byose kugira ngo rurinde Abanyarwanda, rurinde igihugu, aho kubura umutekano bitewe n'uko abandi twumvikanye batuzuza ibyabo bya ngombwa. '

    Perezida Kagame atangaje ibi nyuma y'igihe gito Umujyanama wa Perezida wa Leta Zunze Ubumwe za Amerika mu bufatanye na Afurika, Massad Boulos, agaragaje ko idashidikanya ku bushake bwe bwo kubahiriza ibikubiye muri aya masezerano.

    Ati 'Perezida Kagame yagaragaje ko yiteguye gushyira mu bikorwa iby'aya masezerano y'amahoro, yashimangiye ko ashyigikiye kurangiza mu mahoro iyi ntambara.'

    Boulos yagaragaje ko kandi Perezida Kagame ashyigikiye ibiganiro bya Doha.

    biri guhuza M23 na Leta ya RDC

    Perezida Kagame yagaragaje ko abantu bakunze kwibasira aya masezerano yagizwemo uruhare na Amerika, ari abashakaga inyungu z'ubukungu gusa nubwo ikibazo cyaba kitakemutse.

    Ati 'Abantu bakunze kwibanda cyane ku bijyanye n'ubukungu ku bw'impamvu. Ntekereza ko bamwe mu babigiramo uruhare mu karere, cyangwa abarebwa n'ikibazo, batekerezaga kubyaza umusaruro uwo mutungo, kuko batekereza ko uwo mutungo ukurura abantu babaga bameze nk'abawusheta bavuga bati nzaguha iki, nawe ugenzure ibi. Ariko abo baba bameze nk'abasheta ntabwo bashakaga igisubizo kirambye cy'ibibazo bitugiraho ingaruka mu karere, bashakaga kubona inyungu kurenza abo bahanganye nabo ndetse bagatanga utuntu tugamije kuryoshya abantu, bakavuga bati mudufashe gukemura ibi, mudufashe guhangana na AFC/M23 cyangwa u Rwanda, abanzi bacu, ubundi abantu bagakururwa n'ibyo.'

    Umukuru w'igihugu yashimangiye ko ubuhuza bwa Amerika bushingiye ku guhuza ibi bintu bitatu.

    Ati 'Ubuyobozi bwa Trump bwakomeje kureba uruhurirane rw'ibi bintu bitatu mu bibazo bigomba gukemuka, ibya politike, iby'umutekano n'ubukungu, mu gihe mu mitwe y'abandi batekerezaga gusa ibijyanye n'ubukungu.'

    Ni ingingo Perezida Kagame agarutseho nyuma y'igihe gito u Rwanda na Amerika bishyize umukono ku masezerano y'amahoro, mu muhango wabereye i Washington D.C.

     

    Amasezerano yasinywe arimo ingingo zigaruka ku kubaha ubusugire bwa buri gihugu no gukumira amakimbirane. Arimo kandi guhagarika imirwano, kwambura intwaro no gushyira mu buzima busanzwe imitwe itari iya leta yitwaje intwaro.

    Arimo gushyiraho itsinda rihuriweho rigenzura ibijyanye n'umutekano, gufasha mu gucyura impunzi, gushyigikira ubutumwa bw'Ingabo za Loni ziri muri RDC [Monusco] no gushyiraho uburyo bw'imikoranire mu by'ubukungu mu karere.

    The post Perezida Kagame yavuze ko FDLR nidasenywa u Rwanda ruzakomeza guhangana n'iki kibazo rukoresheje uburyo rusanzwe rukoresha appeared first on RUSHYASHYA.

    Source : https://rushyashya.net/perezida-kagame-yavuze-ko-fdlr-nidasenywa-u-rwanda-ruzakomeza-guhangana-niki-kibazo-rukoresheje-uburyo-rusanzwe-rukoresha/?utm_source=rss&utm_medium=rss&utm_campaign=perezida-kagame-yavuze-ko-fdlr-nidasenywa-u-rwanda-ruzakomeza-guhangana-niki-kibazo-rukoresheje-uburyo-rusanzwe-rukoresha

  • MINUBUMWE yanyuzwe n'ubwitabire mu bikorwa byo Kwibuka31 mu minsi 100 – #rwanda #RwOT

    Minisitiri wa MINUBUMWE, Dr. Bizimana Jean Damascène, yabwiye RBA ko icya mbere cyagenze neza mu minsi 100 yo kwibuka 31 ari ukwitabira ku kigero cyiza ibikorwa byo kwibuka mu bice byose by'igihugu.

    Ati 'Habaye ubwitabire bwinshi ku buryo burenze ubusanzwe kandi abaturage bakaza ubona babishaka igikorwa cyo kuzirikana Abatutsi bazize Jenoside bagishyize ku mutima.'

    Dr. Bizimana yakomeje agaragaza ko n'urubyiruko rwiganjemo urwavutse nyuma ya Jenoside na rwo rwitabiriye cyane ibikorwa byo kwibuka31 cyane kandi rufite inyota yo kumenya amateka yayo.

    Ati 'Mu bwitabire bugenda bwiyongera buri mwaka harimo umubare munini w'urubyiruko bigamjemo abavutse nyuma ya Jenoside n'abari bato. Na bo baraje kugira ngo bige amateka kandi bunamire abishwe muri Jenoside kandi ayo mateka bazayagire ayabo banayigireho mu kurinda ibyagezweho, gukunda Igihugu no kucyubaka.'

    Dr. Bizimana yavuze ko ibigo byinshi by'urubyiruko byagaragaye cyane mu bikorwa byo kwibuka ndetse inzego za Leta, ibigo by'abikorera, amashuri, imiryango itegamiye Leta n'ishingiye ku myemerere na yo yitabiriye ibikorwa byo kwibuka ku kigero gishimishije.

    Minisitiri w'Ubumwe bw'Abanyarwanda yakomeje ati ' Ubwitabire ntibwagaragaye mu kwibuka gusa ahubwo no mu gusura inzibutso ndetse no kuremera abacitse ku icumu rya Jenoside yakorewe Abatutsi batishoboye mu rwego rwo kugaragaza ubumwe Abanyarwanda bafitanye kandi icyo ni ikintu cyiza.'

    Dr. Bizimana yagaragaje ko mu gihe cyo Kwibuka 31 hari uturere tutagaragayemo ingengabitekerezo ya Jenoside kandi ko ari intambwe yo kwishimira.

    Nubwo bimeze bityo ariko Dr. Bizimana agaragaza ko mu Karere u Rwanda ruherereyemo ingengabitekerezo ya Jenoside yahagaragaye cyane kandi ko ari ikintu cyo guhagurukira kuko ingaruka zayo zigera no mu Rwanda.

    Ati 'Ni ibikorwa twamagana kandi Leta ntizigera ihwema kubifatira ingamba zihagije haba mu kubikumira no kibica burundu. [..]. Kuba hari ingengabitekerezo ya Jenoside iri mu bihugu bihana imbibi n'u Rwanda birumvikaka ko na twe bitugiraho ingaruka.'

    'Ibyo bishingiye ku kuba na bamwe na bamwe mu bakuru b'ibihugu b'ibyo bihihugu baragiye bavuga amagambo arimo urwango ku Rwanda, kurutera n'ingebitekerezo ya Jenoside. Hanatangajwe amashusho menshi ku mbuga nkoranyambaga arimo urwango.'

    Dr. Bizimana yavuze ko ibyo bikorwa bibi mu Karere u Rwanda ruhangana na byo rugaragaza ukuri mu miryango mpuzamahanga itandukanye ndetse no gushishikariza Abanyarwanda haba abari imbere mu gihugu no hanze gusobanura ukuri bagahangana n'abakugoreka kandi ko byitezweho umusaruro bijjyanye n'icyerecyezo cy'Igihugu.

    Urubyiruko rwaragaragaje ubwatabire bwiza mu bikorwa byo kwibuka ku nshuro ya 31 Jenoside yakorewe Abatutsi

    Source : http://igihe.com/amakuru/u-rwanda/article/minubumwe-yanyuzwe-n-ubwitabire-mu-bikorwa-byo-kwibuka31-mu-minsi-100

  • Dushobora kugenda ibilometero 2000 turwana – Kagame aburira abahigira gutera u Rwanda – #rwanda #RwOT

    Umukuru w'Igihugu yabigarutseho ubwo yagezaga ijambo ku bitabiriye umugoroba wo kwizihiza umunsi wo Kwibohora ku nshuro ya 31 mu birori byabereye muri Kigali Convention Centre.

    Byitabiriwe n'abantu b'ingeri zitandukanye barimo abayobozi mu nzego za leta n'abikorera, abahagarariye ibihugu byabo mu Rwanda n'abandi. Umukuru w'Igihugu yavuze ko urugendo rwo kwibohora rutagira iherezo kandi rugirwamo uruhare n'abato n'abakukuru.

    Perezida Kagame yagarutse ku byagiye biba mu minsi ishize, yitsa ku munsi mu Burasirazuba bwa Congo habaga indiri y'abacanshuro baturukaga mu Burayi hamwe n'abandi banyafurika 'batazi ibyo barimo' binjiraga muri RDC.

    Yavuze ko ibyo byose byabaye ku manywa y'ihangu Isi yose irebera.

    Ati 'Bohereza intwaro, bohereza abasirikare, bohereza buri kimwe, mu gufasha guverinoma yica abaturage bayo, ifasha abakoze jenoside, bishe abantu hano, miliyoni imwe yishwe n'abo bantu mu minsi 100, banafashijwe rimwe na rimwe n'abo bantu batanga ubufasha. Baragenda rero bateranira hafi y'imipaka yacu.'

    'Iyo muza kuba muzi inkuru y'ibyababonetse i Goma, i Bukavu n'ahandi, mwari kuba mubyumva. Mwaba mwumva neza ko ikibazo atari ukurwanya AFC/M23, ahubwo kwari ukurwanya u Rwanda. Mubabaze ibyabaye. Ibyabaye ni bike ku byo twakora.'

    Perezida Kagame yavuze ko abo bantu nyuma y'uko bigaragaraye ko batakibashije kugira icyo bakora ku Rwanda, 'twabahaye inzira kugira ngo basubire mu bihugu byabo'.

    'Twabahaye inzira, twabahaye umutekano, duharanira ko bagera mu bihugu byabo. Ariko bari gupfa bagashira iyo bibeshya bakarwana. Ibyo nta kibazo kibirimo, ndabivuga uyu munsi, nihagira ugerageza ejo, muzabibona. Ntabwo ndi gutera urwenya, ndi kuvuga ukuri kuri buri wese ushaka kumva, niba ufite ibindi bitekerezo, twabiganiraho. Ni yo mpamvu navuze ko byatubayeho rimwe, kandi rimwe ni kenshi, ntibizasubira.'

    Umukuru w'Igihugu yagarutse ku magambo yakunze kuvugwa na Perezida Tshisekedi ko ashobora kurasa mu Mujyi wa Kigali atavuye i Kinshasa, nubwo atigeze avuga mu mazina uwo yavugaga, ariko yavuze ko uwagerageza ibyo, u Rwanda rwamusanga aho aherereye.

    Ati 'Twarababwiye tuti dushobora kuba tudafite ubwo bushobozi, ariko tuzagusanga aho. Dufite ubushobozi, ntabwo ubizi, dushobora kugenda ibilometero 2000 kuva hano turwana mu gihe bibaye ngombwa. Ibindi byose ni inkuru. Abantu bavuga ibyo biboneye ngo bafite drones, ngo bazaza batere u Rwanda, tuzabasanga aho izo drones muzirasira.'

    Perezida Kagame yavuze ko nta muntu n'umwe u Rwanda rubanira nabi, udashaka gukorana narwo, akwiriye kuruha amahoro, udashaka kuruha amafaranga, yavuze ko akwiriye kuyagumana akayahereza abandi.

    Umukuru w'Igihugu yasabye abanyarwanda kurwanira igihugu cyabo, kuko nibitaba ibyo, bizarangira bahindutse ingaruzwamuheto, bagapfa nabi aho kuba bapfa bafite agaciro.

    Umukuru w’Igihugu yavuze ko inshuro imwe u Rwanda rwahuye n’ibyago, ihagije nta yindi izabaho

    Source : http://igihe.com/amakuru/u-rwanda/article/dushobora-kugenda-ibilometero-2000-turwana-kagame-aburira-abahigira-gutera-u

  • Perezida Kagame yaburiye abafasha Interahamwe, anasubiza abashinja u Rwanda kwiba amabuye y'agaciro ya RDC – #rwanda #RwOT

    Umukuru w'Igihugu yabigarutseho ubwo yagezaga ijambo ku bitabiriye umugoroba wo kwizihiza umunsi wo Kwibohora ku nshuro ya 31 mu birori byabereye muri Kigali Convention Centre.

    Byitabiriwe n'abantu b'ingeri zitandukanye barimo abayobozi mu nzego za leta n'abikorera, abahagarariye ibihugu byabo mu Rwanda n'abandi. Umukuru w'Igihugu yavuze ko urugendo rwo kwibohora rutagira iherezo kandi rugirwamo uruhare n'abato n'abakuru.

    Ati 'Abantu, njye nawe n'abandi twe tugira iherezo, ariko ntabwo igihugu kigira iherezo. Igihugu kugira ngo kitagira iherezo rero, ni bya bindi navugaga, n'uvutse uyu munsi aho akuriye ajya muri ya nzira, ni ko bikomeza.'

    Perezida Kagame yavuze ko mu myaka 31 ishize u Rwanda rwibohoye, 'twageze hano tuhasanga ubusa n'abariho batakiriho. Ababishe bari muri ubwo busa bw'igihugu, ntabwo waba uri muzima, ntabwo waba wiha agaciro, ufite agaciro, ngo ubuze abantu nkawe ubuzima.'

    Yavuze ko buri Munyarwanda afite inshingano ko ibyabaye mu mateka bitazasubira 'rimwe byabaye kuri twe ni kenshi, ni kenshi katasubira'.

    Perezida Kagame yavuze ko bidasaba intego kugira ngo abantu bumve ko u Rwanda rutazasubira mu mateka mabi, ko buri wese akwiriye kubyumva, yaba umunyarwanda uri mu gihugu, uri hanze kugeza no ku wundi muntu utari umunyarwanda.

    Yagarutse ku bibazo bya RDC

    Ati 'Muzi iyi myaka ine tumaze mu rusaku, mu nduru, Isi yose igateranira ku Rwanda ukagira ngo u Rwanda…hari ubwo njya nibaza nti ariko u Rwanda nzi ni uru ruteranirwaho n'Isi yose.'

    'Ni ihurizo ritoroshye. Byashoboka bite? Ariko usibye ibyo, ese guteranirwaho n'Isi yose, ubundi u Rwanda ruba rwakoze iki kugira ngo Isi yose ihaguruke yamagane u Rwanda, mwagisubiza icyo kibazo? U Rwanda rwakoze iki? Urwanira kubaho, uburenganzira bwe, baramwamagana? Ariko iyi si tubayemo ni ko bimeze, barakwamagana ku mpamvu zitandukanye.'

    Perezida Kagame yavuze ko intambara yabaye muri Congo, uko buri wese yaba ayumva, bidakuyeho ko u Rwanda rumaze igihe kinini rugaragaza impungenge rutewe na FDLR.

    Ati 'Hari umwaka wigeze ushira tudasubiyemo ikibazo cy'Interahamwe, cya FDLR iri hakurya hariya? Ni ibyo duhimba se, ni ibyo tubeshya se? Icya kabiri, hari na rimwe tutigeze tubwira abantu, tunasubiramo ukuntu muri aka karere, harimo ingengabitekerezo ya Jenoside, ijyanye n'ibyabaye hano mu Rwanda byo kwica abantu ukabicira icyo baricyo, hari aho bitazwi, ko byanditswe Isi yose ikabiha n'umunsi, bigera aho bikarigita bikazima?'

    Yakomeje agira ati 'Hari umunsi n'umwe tutigeze twamagana abayobozi muri aka karere bafata indangururamajwi bakigisha abantu kwicana, kwicira abantu icyo baricyo? Hari na rimwe tutigeze dusobanura amateka ajyanye n'ukuntu abantu bavuga ikinyarwanda bari hakurya y'imipaka y'u Rwanda nka ba nyir'ibihugu nyuma yo guca iyo mipaka? Bihuriye he n'u Rwanda, twebwe u Rwanda? Ibibazo byabaye mbere y'uko mvuka cyangwa na nyuma nkivuka, byaba bite ibibazo nateye njye cyangwa undi ungana nkanjye? Bishoboka bite?'

    Perezida Kagame yavuze ko bitumvikana uburyo ibibazo by'umutekano warwo gihinduka amabuye y'agaciro, bikagera no ku mipaka y'u Rwanda na Congo n'abandi baturanyi bagakinisha gufasha Interahamwe.

    Ati 'Bamwe bigeze gukinisha iby'Interahamwe, na bo kandi babimenye na kiriya gihe barabimenye, tuzahangana na bo, nta kibazo kirimo.'

    Abiba amabuye y'agaciro

    Perezida Kagame yavuze ko 'abaturega ko ikidukoresha ibyo dukora, kwirinda, kurinda abanyarwanda, kurinda igihugu cyacu ko ari amabuye y'agaciro, ni bo biba amabuye y'agaciro muri Congo'.

    Yavuze ko ibihugu byo hanze byirirwa 'bivuga ubusa', byitwaza uburenganzira bwa muntu no gutera ubwoba ko bazafatira ibihano u Rwanda biba bibeshya.

    Ati 'Mwaba mwahuye nabo bagatanga amasomo, ngo ni uko bava muri Burayi, Amerika, cyangwa Canada, bari aho ngo baratanga amasomo, ayahe masomo umuntu yampa ku buzima bwanjye, ku gihugu cyanjye, ku bantu banjye. Ibyo ni ubucucu, ntitwatwarwa muri ubwo buryo.'

    Perezida Kagame yavuze ko u Rwanda rutazahwema gusigasira umutekano warwo kabone n'iyo rwakotswa igitutu n'amahanga

    Source : http://igihe.com/amakuru/u-rwanda/article/perezida-kagame-yaburiye-abafasha-interahamwe-anasubiza-abashinja-u-rwanda

  • Mwari mubikeneye – Perezida Kagame ku biruhuko bidasanzwe byatanzwe mu kwizihiza Ubwigenge no Kwibohora – #rwanda #RwOT

    Ku wa 20 Kamena 2025, nibwo Minisiteri y'Abakozi ba Leta n'Umurimo yatangaje ko kuva ku wa 1 Nyakanga kugeza ku wa 4 Nyakanga azaba ari iminsi y'ikiruhuko rusange mu rwego rwo kwizihiza Umunsi w'Ubwirenge n'uwo Kwibohora. Bivuze ko ku minsi isanzwe izwi y'ikiruhuko rusange, ku itariki ya 1 n'iya 4 Nyakanga, yongereweho ibiri, kiba ikiruhuko rusange cy'iminsi ine.

    Ni ibintu byakiriwe neza n'abantu batandukanye kubera ko wari umwanya mwiza babonye wo kuruhuka gusa kandi na none ku rundi ruhande abatunguwe cyane ko ari bwo bwa mbere byari bibayeho mu Rwanda ko habaho iminsi y'ikiruhuko ingana gutyo.

    Ubwo Perezida Kagame yagiranaga ikiganiro n'abanyamakuru kuri uyu wa Gatanu tariki ya 4 Nyakanga 2025, yabajijwe no kuri ibyo biruhuko, aho umunyamakuru Munyaneza James wamubajije yatangiye amubwira ko hari umwe mu rubyiruko uheruka kumubwira ko mu Rwanda hasigaye hari Minisitiri w'Ibyishimo (Minister of Enjoyment) kubera iminsi y'ibiruhuko yari yatangajwe.

    Perezida Kagame yamusubije ati 'Ndatekereza ko mwari mubikeneye rimwe na rimwe kubera ko nsigaye mbona abantu bananiwe, rero mwari mukeneye ibyo biruhuko…Ushobora gusanga uwo muntu wakubajije icyo kibazo, tuvuge ko wenda yabyinubiye, iyo umwegera ukamubaza uti ese wari ufite gahunda iki, washakaga gukora iki mu by'ukuri muri iyi minsi ibiri utazageraho kuko wahawe iminsi ibiri?”

    “Icya mbere uzasanga uwo muntu n'ubundi yari kumara umunsi wose aryamye, wenda nimugoroba yajya ku biro, akagenda akirirwa kuri internet, ugasanga abikoze iminsi ibiri, rero kubigira umunsi w'ikiruhuko mu buryo bwemewe ni byo byamufasha cyane.”

    Yakomeje asobanura ko n'ubundi iyo umunsi w'Ubwigenge cyangwa wo Kwibohora bihuriranye na weekend, umunsi wo ku wa Mbere ukurikiyeho uba ikiruhuko rusange, avuga ko no muri iyi minsi barebye bakabona aho kugira ngo abantu baruhuke ku wa Kabiri ku itariki ya 1 Nyakanga, basubire mu kazi ku wa Gatatu no ku wa Kane, bongere baruhuke ku wa Gatanu ku ya 4 Nyakanga, ibyiza ari uko n'iyo ibiri yo hagati iba ikiruhuko.

    Ati “Ubwo abantu bari kuruhuka ku wa Kabiri, bakagaruka mu kazi ku wa Gatatu no ku wa Kane, ku wa Gatanu bagasubira mu kiruhuko. Ese mwashakaga kubyina iyo muzunga? twabonye icyiza ari uko twari kuyihuriza hamwe, tukavuga ngo mukore ibyo mushaka, hanyuma mugaruke ku wa Mbere mumeze neza.”

    Perezida Kagame yavuze ko ibiruhuko byatanzwe usanga n’ubundi abantu bari babikeneye

    Ikiganiro n’abanyamakuru cyabaye kuri uyu wa Gatanu kigaruka ku ngingo zitandukanye

    Ubwo umunyamakuru Jackie Lumbasi yabazaga ikibazo

    Source : http://igihe.com/amakuru/u-rwanda/article/mwari-mubikeneye-perezida-kagame-ku-biruhuko-bidasanzwe-byatanzwe-mu-kwizihiza

  • Rwamagana: Bizihije umunsi wo Kwibohora31 bataha isoko rishya ryatwaye miliyari 2,8 Frw – #rwanda #RwOT

    Iri soko ryatashywe kumugaragaro kuri uyu wa Gatanu tariki ya 4 Nyakanga 2025 mu muhango witabiriwe na Guverineri w'Intara y'Iburasirazuba ndetse n'abandi bayobozi batandukanye bo muri aka Karere.

    Isoko rya kijyambere ryatashywe rifite imyanya 1.126 yo gukoreramo harimo amaduka 62. Ku ikubitiro abari basanzwe bakorera ahimuriwe iri soko ni bo bahawemo imyanya andi maduka akaba azahabwa abari gukorera mu nkengero z'iri soko.

    Umuyobozi w'Akarere ka Rwamagana, Mbonyumuvunyi Radjab, yavuze ko isoko ryari risanzwe ryakiraga abacuruzi batarenga 250 ariko ngo ubu bubatse isoko rinini rishobora kwakira abacuruzi nibura 1.200, yavuze ko isoko ryatashywe ari icyiciro cya mbere mu gihe mu minsi iri imbere hazanubakwa icyiciro cya Kabiri.

    Ati 'Rije gusubiza ikibazo cyari gihari kuko nk'uko mubibona Umujyi wa Rwamagana uri gutera imbere cyane rero hari hasanzwe agasoko gato gashaje kakiraga abantu batarenga 250, ariko ubu twubatse isoko rinini kandi rya kijyambere, tugomba rero kujyana n'igihe.''

    Umwe mu batangiye gukorera muri iri soko ku ikubitiro, Habinshuti Uzziel, yavuze ko mbere iri soko ritari ryubakwa, hari hato babyigana cyane ariko ubu barishimira ko bubakiwe isoko rinini ritanga ubwisanzure ku bantu bose.

    Ati 'Mbere tukihakorera hari hato, tubyigana, mu isoko rishaje, noneho ryaranavaga ku buryo ibintu byacu byangirikaga cyane. Ubu rero turi gucururiza ahantu heza kandi hisanzuye.''

    Irakoze Kevine ucuruza ibtunguru we yagize ati 'Aho isoko ryari ryarimukiye hari hato cyane kandi hafunganye, ubu rero hano tuhiteze abakiriya benshi kuko ni isoko ryubatswe mu Mujyi rwagati, dufite icyizere ko abakiriya twajyaga tubona bazikuba kenshi.''

    Guverineri w'Intara y'Iburasirazuba, Pudence Rubingisa, yavuze ko bamaze iminsi myinshi bataha ibikorwa bitandukanye by'iterambere byagiye byubakwa mu rwego rwo kwizihiza umunsi wo Kwibohora, yasabye abakiri bato gusigasira ibyagezweho cyane cyane abaturage ba Rwamagana bubakiwe isoko rya kijyambere.

    Biteganyijwe ko mu cyiciro mba Kabiri cy'iri soko aribwo hazubakwamo inzu igeretse inshuro eshanu, izakoreramo izindi serivisi zirimo amabanki,resitora n'ibindi byinshi bitandukanye.

    Iri soko ryuzuye ritwaye miliyari 2,8 Frw

    Guverineri Rubingisa, Meya Mbonyumuvunyi n’abandi bayobozi ubwo iri soko ryatahwaga kuri uyu wa Gatanu

    Guverineri Rubingisa yasabye abaturage kubungabunga ibikorwa bubakirwa

    Source : http://igihe.com/amakuru/u-rwanda/article/rwamagana-bizihije-umunsi-wo-kwibohora31-bataha-isoko-rishya-ryatwaye-miliyari

  • Ingabo z'u Burundi zahunze mu mirwano zarwanyemo na Twirwaneho muri Mikenke #rwanda #RwOT

    Ingabo z'u Burundi zarwanye n'umutwe wa Twirwaneho mu gitondo cyo kuri uyu wa Gatanu, tariki ya 4 Nyakanga 2025, ahitwa Mikenke, muri Teritwari ya Mwenga, Intara ya Kivu y'Amajyepfo. Iyo mirwano Twirwaneho yatinze doreko intambara yamaze akanya gato, ariko yahise isiga ingabo z'u Burundi zihunze bihuse.

    Nk'uko umwe mu baturage bahatuye yabitangaje, ingabo z'u Burundi zari mu nzira ubwo zahuriraga na Twirwaneho, biba ngombwa ko impande zombi zitangira kurasana.

    Ati: 'Twirwaneho zari mu bikorwa byazo, bahuye n'ingabo z'u Burundi bararwana. Izo ngabo z'u Burundi zahise zihunga bihuse zijya mu bihuru.'

    Nubwo humvikanye amasasu n'iturika ry'intwaro, abaturage bavuga ko bitari bikanganye cyane. Abatuye mu nkengero za Mikenke, cyane cyane ku isoko n'ahari amacumbi, bamwe barazamutse bajya ku dusozi tw'ahitwa tango kugira ngo bamenye aho ayo masasu yavugiraga.

    Iyi mirwano ibaye nyuma y'igihe agahenge kari karagarutse muri kariya gace, guhera hagati mu kwezi kwa gatandatu.

    Ibyo bice birimo Mikenke, Minembwe, Rugezi, Kamombo n'ahandi bigenzurwa n'imitwe ya Twirwaneho na M23, bimaze igihe gito bitarimo imirwano.

    Ingabo z'u Burundi zimaze imyaka irenga ibiri muri RDC, kuva mu kwezi kwa Kamena 2022, aho zagiye zishingiye ku masezerano y'ubufatanye mu kurwanya imitwe yitwaje intwaro, yashyizweho umukono hagati ya RDC n'igihugu cy'u Burundi mu kwezi kwa Gicurasi 2022.

    Ingabo z'u Burundi zahunze mu mirwano zarwanyemo na Twirwaneho muri Mikenke

    Source : https://kasukumedia.com/ingabo-zu-burundi-zahunze-mu-mirwano-zarwanyemo-na-twirwaneho-muri-mikenke/

  • 'Amarozi na ruswa si wo muti wa siporo yacu' Perezida wa Repubulika y'u Rwanda Paul Kagame #rwanda #RwOT

    Perezida wa Repubulika y'u Rwanda, Paul Kagame, yongeye kuvuga akari ku mutima ku bijyanye n'iterambere rya siporo mu Rwanda, aho yagaragaje ko ibirimo amarozi, kuraguza no gutanga ruswa ku basifuzi ntacyo byafasha igihugu mu kubaka siporo nyayo ishingiye ku ndangagaciro.

    Ibi Perezida Kagame yabivugiye mu kiganiro n'itangazamakuru cyabaye kuri uyu wa Gatanu, tariki ya 4 Nyakanga 2025. Ni ikiganiro cyagarutse ku ngingo nyinshi zirebana n'iterambere ry'igihugu, imibereho y'abaturage ndetse n'urwego rw'imyidagaduro n'imikino.

    Mu bibazo byabajijwe harimo icyo Umunyamakuru wa RBA, Jado Castar, yamubajije kijyanye n'impamvu indangagaciro zashoboye kubaka igihugu, zirimo ikinyabupfura, ubwitange n'icyerekezo, ariko zikaba zitaragera ku rwego rwa siporo mu buryo bugaragara.

    Mu gusubiza, Perezida Kagame yavuze ko siporo nyayo yubakwa ku bintu bitatu by'ingenzi: agaciro kayihabwa, imyiteguro myiza, n'impano karemano y'abakinnyi.

    Yagize ati: 'Siporo warebamo ibintu nka bibiri cyangwa bitatu. Icya mbere ni agaciro uyiha siporo ifite agaciro iyo uyitayeho kandi ukayifata nk'urwego rwubaka igihugu. Icya kabiri ni imyiteguro: ntushobora kubona umusaruro mu kintu utateguye. Icya gatatu ni impano: abantu ntushobora kubabaza ko badafite impano, ahubwo ni ugufasha abafite impano kuzibyaza umusaruro. Icyo udafite ntabwo wagikuraho ibirego.'

    Yakomeje anenga imyumvire yo gukoresha amarozi no gutanga ruswa ku basifuzi nk'uburyo bwo gutsinda imikino, avuga ko ibyo atari wo murongo uhamye wateza imbere siporo.

    Ati: 'Iyo dushaka gutsinda binyuze mu nzira z'amarozi cyangwa ruswa, tuba twiyambura icyubahiro. Ibyo ntabwo byubaka impano cyangwa se ngo byongere ubushobozi, ahubwo bisenya icyizere n'ubupfura siporo igomba gushingiraho.'

    Perezida Kagame yashimangiye ko siporo y'u Rwanda ishobora gutera imbere igihe abayobozi, abakinnyi, n'abafana bose bahuriza ku ntego yo kubaka urwego rufite ireme, rutagendera ku mayeri cyangwa amanyanga, ahubwo rushyigikira indangagaciro z'ubunyangamugayo, ubwitange n'icyerekezo.

    Yasoje agira inama urubyiruko n'abayobozi b'amakipe kwirinda amagambo n'ibikorwa bitesha agaciro siporo, ahubwo bagaharanira kwerekana ubushobozi bwabo mu buryo bufatika.

    Ati: 'Nimucike ku nzira zigufi, mubikore neza, aho gutegereza ubufasha buvuye mu mayobera. Uwo ni wo murongo utanga icyizere ya siporo yacu.'

    'Amarozi na ruswa si wo muti wa siporo yacu' Perezida wa Repubulika y'u Rwanda Paul Kagame
    Perezida wa Repubulika y'u Rwanda, Paul Kagame, yongeye kuvuga akari ku mutima ku bijyanye n'iterambere rya siporo mu Rwanda
    Bamwe mu banyamakuru beza barimo babaza ibibazo Perezida wa Repubulika y'u Rwanda Paul Kagame

    Source : https://kasukumedia.com/amarozi-na-ruswa-si-wo-muti-wa-siporo-yacu-perezida-wa-repubulika-yu-rwanda-paul-kagame/

  • Yinjiza miliyoni 3 Frw ku kwezi abikesha gukora amasabune (Video) – #rwanda #RwOT

    Kwikorera burya ni umwanzuro ufata igihe. Bisaba gushaka ubumenyi, igishoro, umwanya uhagije no kwerekeza umutima ku gikorwa ugakora utitaye ku gihombo wahura na cyo, ukiyemeza gutsinda.

    Iyo nzira Olivia Africa na we yayinyuzemo. Igitekerezo cyatutumbye muri Covid-19 ubwo yari umushomeri nk'abandi bose, yirebera filime ziba kuri murandasi akazihetura, gusa umutima ukamukomanga umuhatira kwiga ikintu gishya cyazamura iterambere rye.

    Reba iyi video, umenye amateka ya Olivia

    Source : http://igihe.com/amakuru/u-rwanda/article/yinjiza-miliyoni-3-frw-ku-kwezi-abikesha-gukora-amasabune-video