Umusore w'imyaka 20 wo mu Karere ka Nyanza ari mu maboko y'ubutabera, akurikiranyweho icyaha gikomeye cyo gushimuta no kwica inyoni y'umusambi, imwe mu nyoni zirinzwe mu Rwanda kubera agaciro kazo gakomeye mu bidukikije.
Nk'uko bitangazwa n'Ubushinjacyaha, uyu musore yafashwe ku itariki ya 09 Nyakanga 2025, ahagana saa munani z'amanywa, mu gishanga cya Gitega giherereye mu Murenge wa Busoro, Akarere ka Nyanza. Ni ho bivugwa ko yahize uwo musambi, akawutega umutego akawica, akawupfura amababa mbere yo kuwujyana iwe mu rugo.
Nyamara ibyo yakoze bigize icyaha gihanwa n'amategeko, by'umwihariko ingingo ya 56 y'Itegeko Nº 064/2021 ryo kuwa 14/10/2021 rigenga urusobe rw'ibinyabuzima, ivuga ko 'ushimuta cyangwa wica inyamaswa yo mu gasozi irinzwe n'amategeko, ahanishwa igifungo n'ihazabu y'amafaranga.'
Ubushinjacyaha burasaba ko hatangwa urugero rutazibagirana kugira ngo abantu birinde kwangiza ibidukikije nk'inyamaswa, ibimera n'ibindi bigize urusobe rw'ubuzima, kuko ari umusingi w'iterambere rirambye.
Nyanza: Umusore w'imyaka 20 ari mu maboko atari aye, azira guhohotera umusambiInyoni y'umusambi, ni imwe mu nyoni zirinzwe mu Rwanda kubera agaciro kazo gakomeye mu bidukikije.
Frank Gashumba Yikomye Abashyira Abandi mu Matsinda ya WhatsApp y'Ubukwe: 'Nimureka Ubukwe niba mudashoboye
Umushoramari w'umunyabigwi mu itangazamakuru no mu bikorwa by'iterambere muri Uganda, Frank Gashumba, yasabye abantu bihutira gukora ubukwe badateguye neza, guhagarika umuco wo gushyiraho amatsinda ya WhatsApp agamije kubateranya amafaranga y'ubukwe.
Mu butumwa bwe bwanyuze ku mbuga nkoranyambaga, Gashumba yagaragaje ukuntu bimubabaza kubona abantu benshi bahitamo gukora ubukwe bifashishije imfashanyo z'abaturage aho gutegura ubukwe bushingiye ku bushobozi bwabo bwite. Yavuze ko ibyo bikorwa bibangamira abandi kandi biba bigaragaza ubukene bw'imyitwarire aho umuntu ashyira igitutu ku bandi ngo bagire icyo batanga.
Yagize ati:
'Muhagarike kudushyira mu matsinda ya WhatsApp y'ubukwe bwanyu. Ubwo nashyingiranwaga n'umugore wange, nta tsinda rya WhatsApp nigeze nkora nsaba ubufasha. Niba mudashobora kubyikorera, mwikora ubwo bukwe.'
Gashumba yagaragaje ko gukoresha amatsinda ya WhatsApp nk'uburyo bwo guteranya amafaranga, ari igikorwa gikwiye gusuzumwa neza kuko kitajyana n'umuco wo kwigira no gutegura ibintu mu bushishozi.
Yatanze urugero ku bukwe bwe, aho yavuze ko yateguye buri kintu byose ku giti cye n'umugore we, nta n'umwe basabye amafaranga. Abwira abari bamuteye agahinda bati:
'Mushobora kutwubaha. Ariko kudushyira mu matsinda ngo tugire icyo dutanga ku bukwe mutateguye neza, ni ugutwiyenzaho.'
Ubutumwa bwa Gashumba bwakwirakwiye cyane kuri social media, buvamo impaka zikomeye. Bamwe bashyigikiye ibitekerezo bye bavuga ko koko abantu bakwiye gukora ibishoboka byose bakirinda kwirundarunda mu madeni no gushyira igitutu ku nshuti. Abandi ariko bavuze ko inkunga y'inshuti n'imiryango mu bukwe ari umuco mwiza w'ubufatanye, kandi ko atari buri wese ufite ubushobozi bwo kwikorera byose.
Eddy Kenzo yasubije Bebe Cool wavuze ko yakabirijwe
Mu kiganiro Bebe Cool aherutse kugirana n'umunyamakuru witwa Kasuku, yatangaje ko Eddy Kenzo atari umuhanzi wo ku rwego mpuzamahanga.
Uyu muhanzi usanzwe ari mu ba mbere bazwi cyane mu muziki wa Uganda, yavuze ko utamwemeza ngo Kenzo ari ku rwego rw'Isi usibye indirimbo imwe yitwa 'Sitya Loss', naho izindi ngo ntizigeze zirenga urwego rw'igihugu cyangwa akarere.
Yagize ati: 'Niba hari ushaka kumbwira ko Eddy Kenzo ari ku rwego mpuzamahanga, azane nibura indirimbo ebyiri ze zitari 'Sitya Loss' zageze kuri urwo rwego, ndazitegereje.'
Yakomeje agira ati: 'Si Eddy Kenzo gusa, ahubwo abahanzi bose ba Uganda muri rusange nta n'umwe uragera ku rwego mpuzamahanga. Turacyafite urugendo rurerure.'
Eddy Kenzo ntiyaciriye aho ahubwo yahawe umwanya na Sanyuka TV, maze mu kiganiro yagiranye na bo amusubiza agira ati: 'Bebe Cool ari mu kuri ariko mu bijiji bye. Kandi nta burenganzira afite bwo kunyihutira kumpindura uko abona ibintu, kuko buri wese abifata mu buryo bwe.'
Bebe Cool
Yakomeje avuga ko ibyo Bebe Cool avuga bishingiye ku marangamutima, ati: 'Ni uburenganzira bwe kubona ibintu uko abyumva. Ariko ibyo avuga ntibigira ishingiro iyo urebye uko isi imfata, uko abanyarwanda n'abanyafurika banshyigikiye. Nta n'umwe ukwiye kuba umucamanza w'inzozi z'undi.'
Ibi bije nyuma y'igihe aba bahanzi bombi batari babanye neza, dore ko batari basanzwe bahuriza ku bintu byinshi mu ruganda rw'imyidagaduro ya Uganda.
Ubugenzuzi bwakorewe mu tubari 601 mu turere twose tw'Umujyi wa Kigali, ku wa Gatandatu tariki ya 19 no ku Cyumweru tariki ya 20 Nyakanga 2025, mu rwego rwo gusuzuma iyubahirizwa ry'amabwiriza agenga ubu bucuruzi.
Umuvugizi wa Polisi y'u Rwanda, Assistant Commissioner of Police (ACP) Boniface Rutikanga yavuze ko izi ari ingamba zashyizweho zo kubahiriza amabwiriza agenga ubu bucuruzi mu rwego rwo gushyira mu bikorwa ubukangurambaga bwatangijwe bwo kurwanya ubusinzi bukabije.
Yagize ati 'Mu rwego rwo gukumira no guca ubusinzi bukabije bwakomeje kugaragara cyane cyane mu rubyiruko, hashyizweho ingamba zigomba gushyirwa mu bikorwa hakorwa ubugenzuzi buhoraho bwa Polisi ku bufatanye n'izindi nzego zibishinzwe hagamijwe kureba ko amabwiriza agenga imikorere y'ubucuruzi bujyanye no kwakira abantu n'imyidagaduro yubahirizwa.'
Yasobanuye ko byakozwe 'nyuma y'uko hakomeje kugaragara kunyuranya n'aya mabwiriza nkana ku tubari twinshi n'amahoteli nyuma yo kwihanangirizwa inshuro nyinshi ari na yo mpamvu muri ubu bugenzuzi bwakozwe mu gihe cy'impea z'icyumweru hagiye hatangwa ibihano byo mu rwego rw'ubuyobozi kandi akaba ari ibikorwa bizakomeza.'
Mu hakorewe ubugenzuzi bikagaragara ko hatubahiriza amabwiriza harimo utubyiniro 53, amaduka acuruza likeri 64, amaguriro agezweho (supermarkets) atanu, amaduka asanzwe acururizwamo inzoga agera kuri 17, utubari 64, inyubako zagenewe amacumbi (lodges) ebyiri na resitaurant imwe, bagiye bahabwa ibihano birimo guhagarikwa by'agateganyo no gucibwa ihazabu.
Hafashwe kandi uwari wongeye gufungura akabari n'inzu y'amacumbi (Lodge) byari byarafunzwe bitewe no gukora binyuranyije n'amabwiriza mu murenge wa Remera mu Karere ka Gasabo, hagaragara n'abagera kuri 24 bagaragaweho ubusinzi bukabije mu ruhame mu Karere ka Nyarugenge, bagiriwe inama nyuma bararekurwa.
ACP Rutikanga yongeye kwibutsa abafite utubari, restaurants, utubyiniro n'ahandi hacururizwa inzoga kurushaho kwigenzura ubwabo, bakirinda kunyuranya n'amabwiriza abagenga kuko ari bwo buryo bwonyine buzabarinda kugwa mu bihano n'ibihombo bijyanye na byo bikururiye, kuko ubu bugenzuzi buzakomeza gushyirwamo imbaraga no mu gihugu hose.
Itangazo ry'Urwego rushinzwe Iterambere mu Rwanda (RDB) ryasohotse ku wa 28 Kamena 2025, nyuma y'inama yahuje uru rwego, Polisi y'u Rwanda, Umujyi wa Kigali n'abafatanyabikorwa, hasuzumwa ibibazo birebana n'umutekano, uko amategeko n'amabwiriza byubahirizwa ndetse n'imibereho myiza y'abaturage, rivuga ko abafite Utubari, Restaurants, utubyiniro n'ahacururizwa inzoga bagomba guhagarika itangwa ry'inzoga Saa Saba z'ijoro guhera ku wa Mbere kugeza kuwa Gatanu, na SaaMunani z'ijoro ku wa Gatandatu no ku Cyumweru.
Bategetswe kandi kugenzura ko abakiliya basohotse no gukinga amarembo yose kuri ayo masaha yavuzwe, gukora igenzura ry'amajwi asohoka kugira ngo atarenga ibipimo byemewe bigenwa n'amabwiriza ariho mu gihugu, kugenzura imyaka y'ababagana hirindwa guha inzoga abatagejeje ku myaka 18 no kudaha inzoga umuntu bigaragara ko yasinze.
Mu bihe bya vuba ntibyari bisanzwe kubona imvura igwa muri Kamena na Nyakakanga, ahubwo yari amezi y'izuba ryinshi ariko mu 2025 byarahindutse, abashinzwe iteganyagihe bagaragaza ko hazabaho ubukonje aho kuba ubushyuhe bukabije.
Iteganyagihe ryashyizwe hanze mu mpera za Kamena 2025 ryerekanaga ko hazagwa imvura itari nyinshi mu bice bitandukanye.
Umuyobozi Mukuru wa Meteo Rwanda, Aimable Gahigi yabwiye RBA ko imvura yo mu mpeshyi ikomoka ku miyaga iba izenguruka Isi.
Ati 'Hari impinduka zagaragaye, zigaragarira nanone mu bipimo [â¦]Hari itsinda ry'imiyaga risanzwe rizenguruka Isi ku buryo bishobora kumara nk'iminsi 30 bizenguruka Isi, iyo iryo tsinda ry'imiyaga rigeze hejuru y'inyanja y'u Buhinde ryongera ubuhehere mu kirere, ikaba ari yo ya nkomoko ya ya mvura yari yateganyijwe mu ntangiriro za Nyakanga [2025.] Uko ubuhehere bwiyongera hakaboneka imvura na bwa bushyuhe buragabanyuka.'
Yashimangiye ko no mu bihe bya kera 'Mu mpeshyi hajya habaho imvura, ikibigaragaza cya mbere ni ibipimo. Ibyo bipimo birahari, n'abantu kumwe baba bamenyereye ahantu bo hari ubundi buryo bapima. Hari imvura zo mu mpeshyi zigiye zifite amazina mu Kinyarwanda bigaragara ko izo mvura zishingiye ku bipimo n'uburyo umuntu yapimaga.'
Imvura zamenyerewe kugwa mu bihe by'impeshyi harimo impungiramirara, intsindagirabigega, n'inkangabagisha.
Ati 'Izo mvura zifite icyo zivuze. Tuzihuza n'ibipimo byafashwe tugasanga ko izo mvura zabagaho.'
Imvura yaguye mu mpeshyi yatumye benshi bibaza icyabaye ku Isi
Ambasaderi Mukasine, anahagarariye u Rwanda mu bihugu birimo u Buyapani, Philippines na Malaysia akagira icyicaro i Tokyo mu Buyapani.
Yakiriwe mu Ngoro y'Umwami wa Thaïlande izwi nka 'Amphorn Royal Palace' iherereye mu Murwa Mukuru, Bangkok, mu muhango witabiriwe n'abayobozi bakuru muri iki gihugu.
Muri uyu muhango wabaye ku wa 20 Nyakanga 2025, Amb Mukasine yashyikirije Umwami Rama X intashyo za Perezida Paul Kagame amugaragariza ko yamwifurije ishya n'ihirwe.
Yagaragaje ko u Rwanda rurajwe ishinga no gukomeza umubano warwo na Thaïlande ndetse ko ruzakomeza gufatanya na yo mu mishinga itandukanye
Umwami Rama X na we yakiriye intashyo za Perezida Kagame yizeza ko azakomeza gushyigikira umubano n'ubufatanye bw'ibihugu byombi.
Na we yahaye intashyo Perezida Kagame n'Abanyarwanda ndetse agaruka ku mubano n'ubufatanye bw'ibihugu byombi bishingiye ku bucuti n'ubwubahane.
Yagaragaje ko anezezwa n'uburyo umubano w'igihugu cyabo n'u Rwanda ukomeje gukura bigashimangirwa n'uburyo ibihugu byombi bifatanya mu nzego zitandukanye.
Amb Mukasine yaganiriye n'Umunyamabanga Uhoraho Wungirije muri Minisiteri y'Ubucuruzi ya Thaïlande, Ekachat Seetavorarat, baganira ku bufatanye mu nzego nk'ubucuruzi, ishoramari, ingufu zisazura, umuco no kwakira abantu.
Yeretse abo muri Thaïlande uburyo u Rwanda rushaka gukomeza umubano n'abo mu nzego z'abikorera muri iki gihugu cyane cyane Ishami ry'Ubucuruzi mu Rugaga rw'Abikorera
Ni inkuru abo muri Thaïlande bakiranye ubwuzu na bo bagaragaza ko bashaka kwagura ubufatanye na Afurika u Rwanda rukaba ahantu ha nyaho hazabafasha kwinjira neza ku isoko rya Afurika.
Amb Mukasine kandi yaganiriye na Minisitiri w'Ubutabera, hasuzumwa amasezerano ibihugu byombi biherutse kugirana, anamugezaho ishimwe ry'u Rwanda ku bufatanye ibihugu byombi biherutse kugirana butuma Abanyarwanda 10 babaga muri iki gihugu boherezwa mu Rwanda
Amb Mukasine yanahuye n'Abanyarwanda baba muri Thaïlande, abereka uburyo u Rwanda rukomeje kwita ku Banyarwanda baba muri Diaspora runabafasha gukomeza kugira uruhare mu iterambere ry'Igihugu.
U Rwanda kandi rwatumiwe mu gikorwa cya Guverinoma ya Thaïlande, kiba kigamije kugaragariza abo muri iki gihugu umwihariko w'ibihugu byo muri Afurika.
Ambasaderi Mukasine Marie Claire yatanze impapuro zimwemerera guhagararira u Rwanda muri Thaïlande
Ambasaderi Mukasine yakiriwe mu Ngoro y'Umwami wa Thaïlande izwi nka 'Amphorn Royal Palace' iherereye mu Murwa Mukuru, Bangkok
Ambasaderi Mukasine yaganiriye n’abayobozi bo muri Thaïlande
Biteganyijwe ko aba mbere muri aba Bapolisi bazahaguruka mu Rwanda ku wa 24 Nyakanga 2025 berekeza muri Sudani y'Epfo, aba nyuma bakazagenda ku wa 8 Kanama 2025. Barimo abagore 35 n'abagabo 205.
Umuyobozi Mukuru wungirije wa Polisi y'u Rwanda ushinzwe Ubutegetsi n'Abakozi, DCG Jeanne Chantal Ujeneza, yabasabye guhorana ikinyabupfura n'ubunyamwuga mu butumwa bazakora, no guharanira kurangwa n'indangagaciro nyarwanda kuko u Rwanda ari igihugu cyamenyekanye ku guharanira amahoro.
Iyi gahunda, ni urubuga rugamije kumurika amahirwe y'ishoramari ari mu Rwanda n'ibicuruzwa bihakorerwa [Made in Rwanda], guteza imbere ubukerarugendo n'umuco, no guhuriza hamwe Abanyarwanda baba mu Bushinwa kugira ngo bagire uruhare mu iterambere ry'igihugu.
Yateguwe na Ambasade y'u Rwanda mu Bushinwa ku bufatanye n'Abanyarwanda baba muri iki gihugu.
Muri iyi gahunda biteganyijwe ko hazaba ibiganiro byo ku rwego rwo hejuru ku bucuruzi, bizakorwa ku bufatanye n'Ikigo cy'u Bushinwa gishinzwe Guteza Imbere Ubucuruzi Mpuzamahanga [China Council for the Promotion of International Trade].
Ni ibiganiro bizahuza Abanyarwanda baba mu Bushinwa, abikorera ku giti cyabo, abacuruzi, abashakashatsi, abakora mu rwego rw'ubukerarugendo, ibigo by'umuco, amashyirahamwe y'ubucuruzi, itangazamakuru ndetse n'inshuti z'u Rwanda.
Magingo aya u Bushinwa ni cyo gihugu kiza imbere y'ibindi mu gukora ishoramari mu Rwanda [foreign direct investment, FDI], ndetse hakanoherezwayo ibicuruzwa byinshi biturutse mu Rwanda. Biteganyijwe ko iyi nama izafasha kurushaho gukomeza umubano usanzweho.
'Meet Rwanda in China' izaba urubuga ruhoraho ruzajya ruhuza Abanyarwanda baba mu mahanga kugira ngo bagire uruhare mu iterambere ry'igihugu cyabo.
Biteganyijwe ko kandi hazizihizwa umunsi w'Umuganura, mu busanzwe usobanura gusangira no kwishimira umusaruro uba waragezweho mu gihe cy'ihinga. Abazitabira iyi gahunda kandi, bazagira amahirwe yo kuryoherwa na gahunda zitandukanye zirimo imbyino n'indirimbo gakondo, ibisakuzo, guha abana amata, imikino irimo kubuguza n'ibindi.
Uyu mugore yafashwe ku wa 22 Nyakanga 2025, afatirwa mu Karere ka Nyarugenge, Umurenge wa Mageragere, Akagari ka Mataba, Umudugudu wa Burema.
Urumogi yafatanywe yari arubitse mu nzu atuyemo kugira ngo arugurishe abakiliya be.
Umuvugizi wa Polisi mu Mujyi wa Kigali, CIP Gahonzire Wellars yabwiye IGIHE ko uyu mugore yafashwe biturutse ku makuru yatanzwe n'abaturage, bahamagaye Polisi ikorera mu Murenge wa Mageragere, bagaragaza ko uyu mugore acuruza urumogi.
Ati 'Abapolisi bihutiye kujya iwe mu rugo bahageze yanga gukingura, nyuma aza kwemera arakingura, basatse inzu atuyemo ni bwo bamusanganye urumogi ndetse n'umunzani akoresha apimira abakiliya be.'
Uyu mugore yajyanywe gufungirwa kuri Sitasiyo ya Polisi ya Mageragere ngo akorerwe dosiye ashyikirizwe Urwego rw'Ubugenzacyaha, akurikiranwe n'amategeko.
CIP Gahonzire yashimiye abaturage bamaze kumva neza uruhare rwabo mu guhashya abantu bakwirakwiza ibiyobyabwenge mu baturage.
Yavuze ko RNP ishishikariza abatari babyumva guhindura imyumvire, bakajya batanga amakuru igihe hari aho babonye ibiyobyabwenge.
Yanaburiye kandi abantu bacyumva ko bazakora imishinga yo gucuruza ibiyobyabwenge, abereka ko bitazabahira kuko Polisi ifatanyije n'abaturage n'izindi nzego, bahagurukiye iki kibazo kugira ngo abijandika muri ibi bikorwa bafatwe bahanwe.
CIP Gahonzire ati 'Ababinywa na bo baragirwa inama yo kubireka kuko nta cyiza kirimo uretse kwangiza ubuzima bwabo.'
Iteka rya minisitiri nimero 001/moh/2019 ryo ku wa 04 Werurwe 2019 rigena urutonde rw'ibiyobyabwenge n'ibyiciro byabyo, rishyira urumogi mu biyobyabwenge bihambaye.
Ni mu gihe itegeko nimero 68/2018 ryo ku wa 30 Kanama 2018 riteganya ibyaha n'ibihano muri rusange, ingingo yaryo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw'imiti ikoreshwa nka byo mu buryo bunyuranije n'amategeko, aba akoze icyaha.
Tariki ya 19 Nyakanga 2025, ni itariki itazibagirana mu mateka ya Repubulika Iharanira Demokarasi ya Congo (RDC), kuko ari bwo umutwe wa AFC/M23 n'ubutegetsi bwa Kinshasa byashyize umukono ku masezerano y'amahoro, bigizwemo uruhare na Qatar nk'umuhuza ndetse n'umujyanama wa Perezida Donald Trump ushinzwe Afurika, Massad Boulos.
Aya masezerano yasinyiwe i Doha muri Qatar aje akurikira andi yasinyiwe i Washington, hagati ya Leta ya Congo n'u Rwanda, agamije gushakira umuti w'igihe kirekire ibibazo by'umutekano mu burasirazuba bwa RDC.
Amasezerano ya AFC/M23 na RDC akomeje guteza impagarara
Mu muhango wo gushyira umukono kuri ayo masezerano, Leta ya RDC yari ihagarariwe na Sumba Sita Mambu, intumwa yihariye ya Perezida Félix Tshisekedi, mu gihe AFC/M23 yari ihagarariwe na Benjamin Mbonimpa, Umunyamabanga Nshingwabikorwa uhoraho w'uwo mutwe.
Impande zombi zemeranyije ku gahenge, ko nta gikorwa cy'intambara kizongera gukorwa haba mu kirere, ku butaka cyangwa mu mazi. Ziyemeje kandi kwirinda itangazwa ry'amagambo y'urwango no gutiza umurindi ibikorwa by'urugomo.
Gusa, ibi byahise bitera impaka zishingiye ku bisobanuro bitandukanye buri ruhande ruha ayo masezerano. Leta ya Congo ishimangira ko AFC/M23 yemeye ko ubutegetsi bugomba gusubizwa Kinshasa mu duce iri tsinda ryitwaje intwaro ryigaruriye, ariko AFC/M23 irabihakana.
Muyaya Patrick, Umuvugizi wa Leta ya RDC, yanditse kuri X agira ati:
'Aya masezerano y'i Doha azirikana imirongo ntarengwa Leta ya Congo yakomeje gushimangira irimo kurekura ibice byose byafashwe na AFC/M23 ntayandi mananiza, inzego za Leta zikongera gukorera muri ibyo bice, igisirikare, igipolisi n'ubucamanza.'
Ibi byamaganiwe kure na AFC/M23, binyuze mu muyobozi bw'ishami ryayo rya politiki, Bertrand Bisimwa, wavuze ko bitateganyijwe na hamwe ko bagomba gusubiza Leta ubutaka yafashe, ahubwo ko ari ugushyira mu bikorwa uburyo bwo gufasha Leta gusohoza inshingano zayo.
'Ntibivuze kuvana ingabo mu bice, ahubwo bivuze uburyo bwo guha ubushobozi Leta igashobora kuzuza inshingano zayo,' â” Bertrand Bisimwa.
Impande zombi ziyemeje gutangira gushyira mu bikorwa ayo masezerano bitarenze ku wa 29 Nyakanga 2025, mu rwego rwo kugera ku mahoro arambye, nk'uko byatangajwe n'ababaye abahuza. Hateganyijwe kandi ko Perezida Paul Kagame na Perezida Félix Tshisekedi bazahurira i Washington mu gihe cya vuba kugira ngo bashyire umukono ku masezerano rusange agomba gukurikiraho.
Impande zombi zemeranyije ku gahengeAya masezerano yasinyiwe i Doha muri Qatar aje akurikira andi yasinyiwe i Washington, hagati ya Leta ya Congo n'u Rwanda
