Author: webrwanda

Amajwi yo kuri internet ashingirwaho mu kwemeza umuhanzi cyangwa Producer, wegukana igihembo mu cyiciro runaka. Ibi bihembo bitangwa na Radio Kiss Fm.

Aya matora aragaragaza ugukura k'umuziki n'uburyo abahanzi bashya bashyigikiwe. Indirimbo 'Igikwe' ya Gabiro Guitar na Confy, niyo iri imbere mu matora yo kuri internet mu cyiciro 'Best Summer Song' , aho ifite amajwi 54%.

Indirimbo 'My vow' ya Meddy, niyo iri ku mwanya wa kabiri n'amajwi 25%.

Iki cyiciro cyinahatanyemo indirimbo 'Away' ya Ariel Wayz na Juno Kizigenza ifite amajwi 11%, 'Katapila' ya Bruce Melodie ifite amajwi 4% naho 'Amata' ya Dj Phil Peter na Social Mula ifite amajwi 3%.

Umuhanzi Bruce Melodie ayoboye abandi mu majwi yo mu cyiciro 'Best Summer Artist' aho afite amajwi 44%, akurikiwe na Meddy ufite amajwi 30%, Juno Kizigenza ufite 19%, na Butera Knowless na Social Mula banganya amajwi 2%.

Umuhanzi utanga icyizere mu muziki, Confy, ayoboye bagenzi be mu cyiciro 'Best New Summer Artist' aho afite amajwi 35%, akurikiwe na Papa Cyangwe ufite amajwi 29%, Vestine na Dorcas bafite amajwi 27%, Niyo Bosco afite amajwi 4% naho itsinda rya Symphony Band rifite amajwi 2%.

Producer Element ni we ufite amajwi menshi mu byiciro byose bihataniwe. Uyu musore ukorera muri Country Records afite amajwi 77%.

Akurikiwe na Producer Ayoo Rash wo muri The Mane ufite amajwi 17%, agakurikirwa na Producer Ishimwe Clement wo muri Kina Music ufite amajwi 5%, Producer Madebeat afite amajwi 3% naho Producer Bob afite amajwi 2%.

Abahanzi n'aba Producer batangiye guhatana mu matora yo kuri internet kuva tariki 13 Nzeri 2021. Ushyigikira umuhanzi uciye ku rubuga rwa interineti www.kissfm.rw

Ni ku nshuro ya kane ibi bihembo bigiye gutangwa. Bitegurwa hagamijwe gushimira abaririmbyi n'aba Producer, ku kazi katoroshye baba barakoze mu rugendo rw'umuziki no kubereka ko Kiss Fm izirikana imirimo yabo. 

Indirimbo 'Igikwe' ya Gabiro Guitar na Confy irayoboye mu matora yo mu cyiciro 'Best Summer Song'

Indirimbo 'Away' ya Ariel Wayz na Juno Kizigenza ihatanye mu bihembo bitegurwa na Kiss Fm 

Itsinda rya Symphony Band rihatanye mu cyiciro cya 'Best New Summer Artist'

Producer Element afite amajwi 77% mu cyiciro cya Producer w'impeshyi

Umuhanzi Platini P ukomeje kwandika amateka nyuma y'urugendo rutamworoheye, ubwo yatandukanaga  na TMC babanaga muri Dream Boys, kugera n'aho mu mwaka wa 2019 yari agiye kureka umuziki, yizihije isabukuru y'amavuko aratwa amashimwe n'abamukurikira ndetse n'ababana nawe bya hafi buri munsi, uhereye ku muryango mugari wa Kina Music bamwifurije guhirwa.

Ishimwe Clement yagize ati: 'Isabukuru nziza Platini P.' Undi nawe mukumusubiza by'amashyengo, amusaba ko ibyo yabimubwira mu butumwa bw'amafaranga agira ati: 'Tuma Momo Papa.' Butera Knowless nawe yamusabiye umugisha ku munsi we w'amavuko agira ati: 'Umunsi mwiza w'amavuko nshuti, Platini P Imana iguhe icyo ushaka.'

Sibo bonyine kuko n'ikompanyi iherutse kugirana amasezerano n'uyu muhanzi y'ubufatanye mu mikoranire, One Percent International bagize bati: 'Umunsi mwiza w'amavuko umwami Platini P turakunezerewe Baba.'

Umukinnyi uzwi nka Danny Usengimana, nawe yamwifurije kugira amafaranga agira ati: 'Platini P, amafaranga menshi, ubuzima bwiza mugabo w'icyubahiro.' Si ibyamamare na kompanyi bamwifurije isabukuru y'amavuko gusa, kuko n'abafana bamugaragarije urukundo. Uwitwa Miggy yagize ati: 'Umunsi mwiza w'amavuko mukuru wanjye, ubundi wubahwe cyane kabisa ndi umufana wawe w'akadasohoka, Platini P ugomba kuzana AFRIMA mu rugo.'

Platini P ufite indirimbo nshya hanze yakoreye muri Nigeria mu buryo bw’amashusho, ni umwe mu bahanzi bakomeje guhirwa mu muziki ndetse uhanzwe amaso cyane nk'umwe mu bashobora gukora igikorwa cyahita kigeza umuziki nyarwanda ku rwego mpuzamahanga

Muri iyi minsi Platini P ari mu bahanzi nyafurika bahataniye ibihembo ngarukamwaka bya AFRIMA, kimwe n'umuhanzi w'umunyarwanda Meddy; ibi bihembo bikaba byaratangiye gutangwa mu mwaka wa 2014, bigamije guhemba abahanzi baba barakoze neza mu bihugu binyuranye bya Africa buri mwaka.

Platini P wizihije isabukuru y'amavuko kuri iki cyumweru tariki ya 26 Nzeri 2021, sicyo cyamamare nyarwanda kizihije isabukuru y'amavuko mu mpera z'iki cyumweru gusa, kuko kuwa 25 Nzeri 2021, umwe mu batunganya umuziki bari  mu ba mbere 'producer' Made Beat nawe yari yizihije isabukuru y'amavuko y'imyaka 26.

Nk'uko yabitangaje abinyujije ku rukuta rwe rwa Instagram, mu ifoto ye imugaragaza akiri muto  agira ati: 'Ndiyifuriza umunsi mwiza w'amavuko, umunsi w'amavuko kuri njye wa 26 .' Yongeraho ati: 'Mfite imyaka 5 ntabwo wakwizera uwo uzabawe.'

Made Beat afite imyaka itanu bivuze mu mwaka wa 2000 kuko yavutse kuwa 25 Nzeri 1995

Benshi mu babonye ubu butumwa barimo ibyamamare binyuranye n'abafana, bamugaragarije ko bifatanije nawe mu isabukuru y'amavuko, bamwifuriza kandi ibyiza imbere ari nako bamurata amashimwe kubw'ibigwi amaze kwandika mu muziki nyarwanda.

Uncle Austin yagize ati: 'Umunsi mwiza w'amavuko muvandimwe, urabizi ndakwemera muntu wanjye.' Deejay Pius nawe yungamo agira ati: 'Isabukuru nziza muvandimwe, umunwa uri kundya ubuse mbivuge.'

Rideman nawe yamwifurije isabukuru y'amavuko agira ati: 'Icyamamare twemera, Nyagasani aguhundagazeho imigisha. Tunga kandi tunganirwa Nyakugira Imana.' Bagenzi Bernard nawe yagize ati: 'Made Beat umunsi mwiza w'amavuko muvandimwe, komeza ukore ibikundwa.'

Nina wahoze mu itsinda yari ahuriyemo na Charly kimwe na Mc Nario n'abandi banyuranye barimo n'abafana b'uyu musore ukiri muto, nyamara umaze guhindura amateka y'umuziki nyarwanda mu gihe kitari kinini amaze mu muziki, bakomeje bamwifuriza isabukuru y'amavuko.

Mu mwaka wa 2016, nibwo Made Beat yamenyekanye ubwo yakoraga muri Monster Record, inzu itunganye umuziki y'umushoramari Zizou Al Pacino, aho yageze avuye muri Uno Record nyamara urugendo rwo gutunganya umuziki nk'uko yabivuze yarutangiye yiga mu mashuri yisumbuye.

Kuva yakwinjira mu gutunganya umuziki, yagiye akora indirimbo zubatse izina nyinshi ariko zirimo iya Bruce Melodie yitwa 'Katerina' iheruka kuzuza inshuro z'abamaze kuyireba kuri Youtube zigera kuri Miliyoni 10; kimwe n'izirimo iyitwa 'Thank You' ya The Ben na Tom Close.

Izina  Made Beat kuri ubu mu ba Producer bakora neza mu cyo waba uvuga cyose, byagorana kuba warenza abakora batanu batunganya umuziki nyarwanda ritagarutsemo ari gukora bitangaje kandi akanahirwa

Yatunganije kandi 'Lose Control' ya The Ben na Meddy niwe kandi wacuze Beat y'indirimbo 'My Vow' ya Meddy ikomeje guca ibintu,  kugera ubu iyoboye urutonde rw'indirimbo zikunzwe kuri Youtube ku butaka bw'u Rwanda. 

Kuri ubu Made Beat ari mu bahataniye ibihembo bya Kiss Summer Awards mu cyiciro cya 'Producer' mwiza w'impeshyi y'uyu mwaka, aritegura gushyira hanze Album ye ya mbere yahurijemo abahanzi batandukanye mu mpera z'uyu mwaka.

Yatangiye akora Beat yifashishije imashini n’ubushakashatsi yakoraga kuri murandasi ubwo yigaga mu mashuri yisumbuye, ayasoje yanze gukomeza Made Beat ahita yiyegurira umwuga wo gutunganya umuziki, yemeza ko aryama amasaha macye ya kumanywa kuko akazi ke agakora mu ijoro

Ifoto umwami wa Kina Music Ishimwe Clement yakoresheje yifuriza isabukuru y’amavuko Platini P wahise amubwira ko yifuza kubona n’intumwa ya Momo akomoza ku mafaranga

One Percent International yifurije isabukuru y’amavuko Platini P

Ubutumwa bwa Clement Ishimwe bwifuriza isabukuru y’amavuko Platini P 

Ubutumwa bwa Made Beat yiyifuriza isabukuru y’amavuko y’imyaka 26

Ku wa 23 Nzeri 2021, Minisiteri y'Ubuzima ifatanyije n'Inama y'Igihugu y'Amashuri Makuru na Kaminuza (HEC), bagiranye inama n'ubuyobozi bwa Kaminuza zitandukanye, yanzura ko 'Umunyeshuri cyangwa umukozi muri Kaminuza utarakingiwe urukingo na rumwe rwa Covid-19, atemerewe kwinjira muri Kaminuza guhera kuri uyu wa Mbere tariki 27 Nzeri 2021.'

Ku wa Gatanu tariki 24 Nzeri 2021, mu butumwa bwakwirakwijwe kuri 'WhatsApp', Kaminuza yigenga ya Kigali (ULK), yamenyesheje abanyeshuri bayigamo n'abakozi bayo ko 'Ntawe uzemererwa kwinjira atarikingije Covid-19.'

Mu mpera z'iki cyumweru, Kaminuza y'u Rwanda (UR) na Mount Kenya University ishami rya Kigali (MKUR), basohoye itangazo risaba abanyeshuri n'abakozi kwingiza Covid-19, kugira ngo bemererwe kwinjira.

Itangazo rya Kaminuza y'u Rwanda rivuga ko 'guhera kuri uyu wa mbere, abanyeshuri n'abakozi bazemererwa kwinjira ari abikingije Covid-19.”

Umunyeshuri, asabwa kugaragaza nibura ko yamaze gufata doze ya mbere y’urukingo rwa Covid-19.

Itangazo rya Kaminuza ya Mount ya Kenya ryo, rinavuga ko nta serivisi n'imwe umunyeshuri n'umukozi utarikingije Covid1-19 yemerewe muri iyi Kaminuza, guhera kuri uyu wa mbere tariki 27 Nzeri 2021.

Gusaba abanyeshuri n'abakozi kwikingiza Covid-19, biri mu murongo wo kugira ngo imibiri yabo yubake ubadahangarwa mu guhangana n'iki cyorezo.

Minisitiri w'Ubutegetsi bw'Igihugu, Jean Marie Vianney Gatabazi, aherutse kubwira RBA ko bitari cyera, abantu bazajya basabwa icyemezo cy'uko bikingije Covid-19 mbere y'uko binjira ahantu hahurira abantu benshi, nko mu masoko n'ahandi.

Inama y'Abaminisitiri yateranye mu cyumweru gishize, yemeje isubukurwa rya bimwe mu bikorwa. Mu byasubukuwe harimo na siporo rusange izwi nka ‘Car free Day’ yabaye kuri iki Cyumweru tariki 26 Nzeri 2021. Ikigo cy'Igihugu Gishinzwe Ubuzima, RBC cyatangaje ko mu bipimo 410 byafashwe mu bitabiriye 'Car Free Day' nta na kimwe cyagaragayemo ubwandu bwa Covid-19.

Ni mu gihe abantu 192 bahawe doze ya mbere y’urukingo, naho 169 bahabwa doze ya kabiri.

Minisiteri y'Ubuzima ivuga ko kuva u Rwanda rwatangira gutanga inkingo za Covid-19, abantu 2, 097, 188 bamaze gukingirwa; harimo abahawe doze ya mbere n'abahawe doze ebyiri.

Inkingo zitangwa harimo urwa Pfizer, AstraZeneca na Johnson&Johnson ihabwa umuntu doze imwe. U Rwanda rufite intego y'uko muri Kamena 2021, ruzaba rumaze gukingira abasaga miliyoni 7.8.

Kaminuza y'u Rwanda yamenyesheje ko guhera kuri uyu wa mbere abanyeshuri n'abakozi bamaze kwikingiza Covid-19 nibura dose imwe ari bo bemerewe kwinjira mu kigo

Mount Kenya yo, irasaba ko waba warakingiwe inkingo zose, dore ko yanahaye abanyeshuri bayo amahirwe ko utarakingiwe, cyangwa se utarahabwa dose zose yagera ku kigo kuwa gatatu w'icyumweru dusoje ngo ahabwe urukingo. Utarabikoze we kuva uyu munsi, ntiyemererwa kwinjira ndetse araba ahagaritswe kwiga.

Urukundo rwa Ykee Benda na Shazz, rwatangiye kuvugwa mu minsi micye ishize aho aba bombi bakomeje kugenda bagaragarizanya urugwiro basangiza aba bakurikira ku mbuga nkoranyambaga amafoto anyuranye, ibintu benshi babonyemo ko bakundana.

Nyuma y’uko ibi bibaye umugabo uherutse gutandukana n'umugore bari bamaranye imyaka icyenda bakundana yewe biteguraga no kurushinga banafitanye umwana w'umuhungu witwa Julie, yemeje ko ari mu rukundo na Akayesu Sharon wamamaye nka Shazz.

Kuri ubu byari bikomeje gukwirakwira hirya no hino kandi bikanemezwa ko amakuru yavuye mu bantu ba hafi ba bombi ko Ykee Benda yaje mu Rwanda mu mpera z'icyumweru gishize aje kureba umukunzi we mushya.

Bivugwa kandi ko kuwa Gatanu Ykee Benda na Shazz basohokeye muri hoteli yitwa Kaizen iri i Nyabugogo mu Mujyi wa Kigali bahagirira ibihe byiza. Ni ku nshuro ya mbere aba bombi bari babonanye amaso ku maso kuva batangira gukundana.

Nyamara Ykee Benda yahakanye aya makuru avuga ko atigeze agera mu Rwanda. Mu kiganiro gito yagiranye na INYARWANDA, yagize ati:”Ntabwo bishoboka ko nagera mu Rwanda ntavuze, ibyo ni ibinyoma nibereye muri Kampala.”

Sharon uvugwa mu rukundo n’uyu muhanzi, ubwamamare bwe bwazamuwe n'ibihe yagiye anyuranamo n'ibyamamare nyarwanda birimo Davis D, Kevin Kade n'umufotozi witwa Thiery batawe muri yombi bashinjwa icyaha cy'ubufanyacyaha mu kuryamana nawe kandi ngo atarageza imyaka, ibintu byaje guteshwa agaciro bakarekurwa.

Bidateye kabiri yaje kuba imbarutso yo kwirukanwa k'umuzamu w'ikipe y'igihugu, Kwizera Olivier wirukanwe mu mwiherero w'ikipe y'igihugu igitaraganya nyuma y'ikiganiro yagiranye n’uyu mukobwa ku karubanda binyuze ku rubuga rwa Instagram. Aherutse kandi no kwifashishwa mu mashusho y'indirimbo yitwa ‘Iyizire’ ya Jules Sentore aherutse gushyira hanze.

Ykee Benda yahakanye ko atigeze agera mu Rwanda bityo ko ibivugwa ari ibinyoma

Shazz umunyarwandakazi uri mu rukundo na Ykee Benda

Ku wa Gatandatu w'icyumweru gishize ni bwo hasohotse ibaruwa yasinyweho na Perezida w'iyi kipe, Ngendahayo Vedaste ihagarika Mushimiyimana Eric wari umutoza mukuru wayo, nyuma y'impungenge ubuyobozi bw'ikipe bwagejejweho n'abakinnyi.

Ubuyobozi bw'iyi kipe bwanatangaje ko uyu mutoza agiye gukorwaho iperereza ku butinganyi bumuvugwaho. Gusa uyu mutoza avuga ko yagambaniwe n'umukinnyi utarakinaga ndetse ko ubu yanigendeye ageze muri Zambia.

Nyuma y'icyemezo cyafashwe n'ubuyobozi bw'iyi kipe yo mu karere ka Ruhango, abantu batandukanye bagiye batanga ibitekerezo bitandukanye, aho Ambasaderi Olivier Nduhungirehe yavuze ko uwahagaritse uyu mutoza ari we wari ukwiriye guhanwa.

Yagize ati 'Ubwo icyaha ashinjwa ni ikihe? Giteganywa n'iyihe ngingo y'amategeko ahana? Uwahagaritse uyu mutoza ahubwo niwe wari ukwiye guhanwa, kuko atubahirije ingingo ya 16 y'Itegeko Nshinga rya Repubulika y'u Rwanda'.

Amb. Dr Diane Gashumba na we yunze mu rya Amb. Nduhungirehe, avuga ko bidasobanutse kuko n'iyi baruwa banditse imuhagarika izo mpungenge z'abakinnyi zitigeze zigaragazwa.

Yagize ati'Uwamuhagaritse yavanguye! Abakinnyi impungenge bagize ntiyanasobanuye izo ari zo!'

Nyuma hasohotse indi baruwa yasinyweho n'abakinnyi 10 b'iyi kipe, bayobowe na kapiteni wayo, Siborugira Janvier, banditse bagaragaza ko uyu mutoza arengana nta byo yigeze akorera abakinnyi.

Mu mikino ibiri yari amaze gutoza harimo uwo yanganyije na Esperance FC ibitego 2-2 ndetse n'uwo yatsinzwemo na UR FC ibitego 2-1. Iyi kipe iri mu Itsinda C rya Shampiyona y'Icyiciro cya Kabiri hamwe na Vision FC, Espérance FC, UR FC na Vision Jeunesse Nouvelle FC.

Mushimiyimana Eric yahagaritswe na United Stars yatozaga imushinja ubutinganyi