Author: webrwanda

Abashinzwe tekiniki ya KT Radio bayikurikiranira hafi kugira ngo igere ku bayumva nta makemwa

Iyo nyigo igaragaza ko Abanyarwanda 99% bari hagati y’imayaka 12-80 bumva radio, kandi radio ikaba igera mu gihugu hose, 63% ni bo bayumva nibura hagati y’iminsi 5-7 mu cyumweru.

Hagendewe ku hantu radio zishobra kumvikana, Radio Rwanda iza ku mwanya wa mbere na 64% igakurikirwa na KT Radio ku kigeranyo cya 33%, ku mwanya wa gatatu haza KISS FM kuri 29%.

Iyo nyigo ikomeza ivuga ko radio ikoreshwa na buri wese mu Rwanda, televiziyo ikoreshwa mu bice byo mu mijyi na ho ibinyamakuru byo kuri murandazi n’ibinyamakuru byo mu mpapuro byo bikoreshwa ahanini n’abize.

Mu byo Abanyarwanda bakunda kumva, amakuru y’imbere mu gihugu aza ku mwanya wa mbere, ku mwanya wa kabiri haza amakinamico n’inkuru zitandukanye na ho ku mwanya wa gatatu haza amakuru y’imikino.

KT radio ni imwe mu bitangazamakuru bya Kigalitoday Ltd birimo ibikorera kuri murandasi nka kigalitoday.com na ktpress.rw ndetse na youtube channel ya kigalitoday n’iya ktradio.

KT Radio ikaba yaratangiye kumvikana mu 2012 ikorera kuri murandasi, nyuma iza kujya kuri FM muri 2014. Ibyuma bya KT Radio biri ku minara itanu mu gihigu hose, ni ukuvuga muri buri ntara n’Umugi wa Kigali.

KT Radio ifite iminara mu Ntara zose z’u Rwanda no mu Mujyi wa Kigali

Ibi ni byo biyiha ubushobozi bwo kumvikana mu bice byose by’igihugu ndetse no mu bihugu bituranye n’u Rwanda.

Abasigajwe inyuma n’amateka bishimira ko batujwe hamwe n’abandi Banyarwanda, gusa ngo inzu bahawe ntizihagije imiryango yabo

Umusaza witwa Pangarasi Shumbusho, abana mu nzu n’abahungu be babiri ndetse n’umwuzukuru we bahashakiye abagore, kandi na bo bamaze kubyara.

Avuga ko inzu yayihariye abo bahungu be hamwe n’abagore babo ndetse n’abandi bana yabyaye, we akajya kuba mu gikoni hamwe n’umugore we.

Muri rusange hamwe n’umuryango we, ni abantu 17, binatuma we mu byiciro by’ubudehe yaranditswe ubugira kabiri kuko ngo kumwandikaho icyarimwe abantu bose afite mudasobwa zitabyakira.

Ku kibazo cyo kumenya impamvu adasaba abana be kujya gutura ukwabo, agira ati “Nta nzu zo kubamo bafite, sinabirukana. Birambangamiye, ariko nta kundi nabigenza.”

Icyakora, abakazana be bo bavuga ko babangamirwa n’uko usanga badenduye hasi mu nzu, abagore n’abagabo ndetse na barumuna b’abagabo babo.

Icyimanimpaye na Uwacu bafite imyaka 19, bakaba barashatse bafite imyaka 16 umwe na 17 undi. Usanga bagira bati “Biratubangamiye, muzadukorere ubuvugizi tubone aho kuba hacu.”

Ishimwe Mulisa ubu ufite imyaka 17, bigaragara ko yashatse ari muri 15, na we ati “iyaba byashobokaga ngo tugire inzu yacu.”

Innocent Mutabazi na we utuye mu Mudugudu wa Nyembaragasa, avuga ko Shumbusho atari we wasigajwe inyuma n’amateka wenyine ubana n’abakazana mu nzu, ahubwo hari n’abandi barimo umusaza ubana n’umukwe we mu nzu, akaba afite n’abahungu urebye na bo bageze mu gihe cyo gushaka, ku buryo na bo byanze bikunze ari ho bazashakira.

Muri iriya miryango 34 ituye mu nzu 20 kandi ngo ntihabariyemo abakobwa bagiye babyarira iwabo inshuro ebyiri cyangwa eshatu.

Ati “Iyo umukobwa amaze kubyara kabiri gatatu, urebye na we aba afite umuryango ku buryo atagombye kuba akibarirwa iwabo, kandi muri uyu Mudugudu barahari.”

Ku bijyanye n’igitera uku gusanga imiryango itatu ine y’abasigajwe inyuma n’amateka ituye mu nzu imwe i Nyembaragasa, umusaza Célestin Nyandwi avuga ko biterwa no kuba abana babo bageze igihe cyo gushaka nta butaka bafite bwo kubakaho.

Agira ati “Tutaraza hano umwana yajyaga kuzana umugore akigondagondera akazu k’ibyatsi, bakagaturamo. Hano ni mu kwa Leta ntibabona aho bubaka. Keretse bikozwe na Leta, ikabatuza. Na ho ubundi natwe bidutera isoni.” Icyakora, ntiyemeranywa na Mutabazi uvuga ko bituruka ku bujiji.

Agira ati “Uretse abana batoya barimo kwiga ubungubu, abasigajwe inyuma n’amateka ba hano ntabwo babashije kwiga muri rusange. Abasore bakagiye mu mujyi n’ahandi hatandukanye bagashaka akazi, bakazajya baza ino batwereka abakazana. Si ko byifashe, kuko ntiwajya gushaka ubuzima utazi gusoma no kwandika.”

Umuyobozi w’Akarere ka Nyaruguru w’agateganyo, Janvier Gashema, avuga ko bateganya kubakira abatishoboye muri uyu mwaka w’ingengo y’imari, kandi ko harimo n’abasigajwe inyuma n’amateka.

Ati “N’iriya miryango ibana mu nzu imwe tuzayituza, kandi bazatuzwa mu midugudu irimo n’abandi Banyarwanda. Ikigamijwe ni uko baturana n’abandi, kugira ngo bajye babareberaho, maze na bo bazatere imbere.”

Na ho Vincent Bavakure, Umuyobozi nshingwabikorwa w’umuryango w’ababumbyi bo mu Rwanda, Coporwa, agaruka ku kuba abana b’abasigajwe inyuma n’amateka b’i Nyembaragasa bamwe bagenda babyarira iwabo kenshi, abandi na bo bagashaka bakiri batoya.

Uretse ubukangurambaga, undi muti kuri iki kibazo ngo ni ugukora ku buryo abana batoya biga, n’abakuze batakigiye ku ishuri bakigishwa imyuga yo kubafasha kubona umurimo bakora, bityo bakabasha kwibeshaho n’ababashuka ntibabone aho babahera.

DASSO bahaye abari abazunguzayi igishoro ndetse baha ibiribwa uwo bubakiye n’inzu

Byabereye mu Karere ka Kicukiro tariki 15 Ukwakira 2021, muri gahunda yo kurwanya ubucuruzi bw’akajagari no gufasha ababukora kubureka, aho buri umwe muri abo bagore yahawe igishoro cy’Amafaranga y’u Rwanda ibihumbi 50.000, ndetse n’aho gucururiza hajyanye n’igihe mu isoko rishya rya Kicukiro.

Ubusanzwe abantu bazi ko urwego rwa DASSO rudacana uwaka n’abakora akazi k’ubuzunguzayi, kubera uburyo baba babakura mu muhanda aho bakunze gucururiza, bigatuma hakunda kubaho intambara hagati y’impande zombi ku buryo baba barebana ay’ingwe.

Umuhuzabikorwa wa DASSO mu Karere ka Kicukiro, Samuel Niragire, avuga ko abagize uru rwego bazakomeza gufatanya no gukorana neza n’abaturage babagezaho ibikorwa by’iterambere bibafasha mu buzima n’imibereho yabo, anasaba ko abaturage babafasha mu bikorwa byo kwicungira umutekano ndetse n’iterambere kugira ngo barusheho kwiyubakira igihugu.

Umukozi w’Akarere ka Kicikiro ushinzwe Imirimo rusange, M. Donatien Murenzi, yasabye abahawe igishoro kugikoresha neza, ayo mafaranga akabafasha kwiteza imbere bagafasha na bagenzi babo kureka ubucuruzi bw’akajagari.

Mu rwego rwo guca ubuzererezi mu bana b’u Rwanda no gufasha imiryango kubaho itekanye, abagize urwo rwego bahaye abana 44 ibikoresho by’ishuri birimo amakaye, ibikapu hamwe n’imyambaro y’ishuri, nyuma yuko bakurwa mu mihanda bagasubizwa mu miryango no kw’ishuri.

Banahaye abana ibikoresho by’ishuri

Kuri iyo tariki kandi, abagize urwego rwa DASSO bo mu Karere ka Kicukiro batashye inzu bubakiye umuturage utishoboye wo mu Murenge wa Kanombe mu Kagari ka Karama, banamuha ibimutunga mu gihe cy’amezi abiri, hamwe n’ibikoresho byo mu nzu birimo intebe, ibitanda, ibiryamirwa n’ibyombo byifashishwa mu rugo.

Byose bikaba byarakozwe muri gahunda yo gufatanya n’izindi nzego za Leta mu iterambere ry’imibereho myiza y’abaturage, bikaba byaratwaye agera kuri miliyoni 4.5 z’Amafaranga y’u Rwanda.

Ababyeyi bagomba gufatanya n’abarimu mu burezi bw’abana

Mu gihe abanyeshuri bamaze gusa igihe cy’icyumweru batangiye igihembwe cya mbere cy’umwaka w’amashuri wa 2022, Minisiteri y’Uburezi irongera kwibutsa abarezi ko kugira ngo uburezi bufite ireme igihugu cyifuza ko bwahabwa abanyeshuri, butagerwaho ababyeyi batabigizemo uruhare, kuko ureste uruhare rwa mwarimu ariko nurw’umubyeyi ruba ari ingenzi.

Ngo n’ubwo kugira ngo uburezi bufite ireme bugerweho atari mwarimu wenyine ubihamagarirwa, ariko ni we wa mbere igihugu gihanze amaso kugira ngo iryo reme rigerweho, ariyo mpamvu agomba kubishishikarizwa agaterwa inkunga ifatika harimo n’iy’ababyeyi.

Minisitiri w’uburezi Dr. Valentine Uwamariya, avuga ko uruhare rw’umubyeyi mu gutezimbere uburere n’uburezi bw’umwana ari ingenzi cyane, kuko umwana aba afite umuryango akomokamo, kandi iyo hatabayeho kuvugana hagati y’umubyeyi n’ishuri, ari umubyeyi nta menya ibibera ku ishuri, ari n’umwarimu iyo abonye ikibazo ku mwana nta menya aho gituruka.

Ati “Iyo umubyeyi na mwarimu rero bakoranye, bamenya na cya kibazo umwana afite, n’impamvu arimo gusigara inyuma, kuko hari n’igihe zishobora kuba impamvu z’uburwayi. Mwarimu atavuganye n’umubyeyi rero ntabwo ashobora kumenya ngo umwana afite ikihe kibazo, ndetse n’unareba mw’itegeko rigena imitunganyirize y’uburezi twateganyije uruhare rukomeye rw’ababyeyi, kugira ngo bakomeze gukorana n’amashuri bya hafi”.

Akomeza agira ati “Iyo umwarimu atavugana n’umubyeyi gufasha umwana biragorana, kuko impamvu zishobora gutuma umwana adatsinda neza ziba zitandukanye, hari izishobora guturuka ku burwayi, ku mibereho, ariko wenda no gufata atinze, ababyeyi n’abarimu rero bakoranye bamenya uburyo nyabwo bwo gufasha umwana kugira ngo azamuke”.

Ababyeyi na bo basanga kugira ngo uburezi bufite ireme bugerweho, uruhare rwabo ari ngombwa, kuko badakwiye kugenda ngo bahugire mu gushakisha imibereho y’abana gusa, ubundi bumve ko ibisigaye mwarimu ari we uzabikora.

Umubyeyi wifuje ko twamwita mama Akariza, avuga ko uruhare rw’ababyeyi ari ngombwa, kuko hari byinshi baba bazi ku bana babo kurusha ibya mwarimu, kandi byafasha mwarimu kurushaho gutanga uburezi bufite ireme mu gihe habayeho gufatanya.

Ati “Hari ibibazo umwana aba afite mu buzima busanzwe mu rugo umwarimu atazi, umwana akaba hari ikibazo afite runaka umwarimu atazi, yaba uburwayi, yaba n’imyumvire, ariko kubera ko umwarimu atabizi, umubyeyi atigeze amubwira icyo ikibazo, cyangwa ibyo mwarimu abonera ku ishuri atabwira umubyeyi. Ugasanga umwana ari hagati y’inzira ebyiri ariko zidasobanutse, icyo numva twakora ni uko twajya dukurikirana abana, wabona umwanya ukanyaruka ukajyayo ukaganira na mwarimu, utabonye uko ujya kuri iryo shuri byibuze agahamagara na mwarimu”.

Ibi ngo bizatanga umusaruro kuko bizafasha abana kumva no gufata neza amasomo yabo, kubera ko mwarimu azaba yamenye neza aho umunyeshuri afite intege, bityo bitume ari ho azajya yibanda.