Webrwanda Backend

Author: webrwanda

  • Ubuzima bufite iyihe ntego? #rwanda #RwOT

    Ubuzima bufite iyihe ntego? Nshobora nte kumenya intego, gusohoza indoto, no kunyurwa n’ubuzima? Mbese nzagira ubushobozi bwo gukora ikintu kirambye cy’agaciro? Kubera ibyo bibazo bikomeye, abantu benshi ntibasiba kubitekerezaho. Bajya basubiza amaso inyuma mu myaka yashize, maze bakibaza impamvu ubusabane bwabo nta gaciro bugira, n’impamvu bumva bameze nk’ibikoresho birimo ubusa, kabone n’iyo baba barageze ku ntego y’ibyo bifuzaga gukora.

    Umukinnyi umwe ”baseball” wawukiniye mu nzu y’uwitwa ”Fame”, bamubajije icyo yagombye kuba yarabwiwe n’umuntu, agitangira gukina uwo mukino ku nshuro ya mbere, yabashubije atya: “Nifuza ko uwo muntu yagombye kuba yarambwiye ati: nugera mu bushorishori, uzasanga nta kintu kiriyo.” Intego nyinshi rero zerekana ko ntacyo zigeraho, nyuma yo kuzitakazaho igihe mu myaka itabarika.

    Muri iyi si yacu tubamo, usanga abantu bafite imigambi nyinshi cyane, kandi batekereza ko babonamo ibisobanuro. Imwe muri iyi migambi, harimo kwamamara mu bucuruzi, ubutunzi, imibano myiza, imibonano mpuzabitsina, ibinezeza, no gufasha abatishoboye. Abantu bamaze gutanga ubuhamya ko mu gihe bumvaga bageze ku ntego zabo, ubutunzi, kubana n’abandi neza, no kwishimisha, basanze mu mitima yabo hakirimo urwobo runini rurimo ubusa, igitekerezo cyo kumva ko ntacyo bari cyo, kidashobora kugira ikintu na kimwe cyo kugisibanganya.

    Umwanditsi w’igitabo cy’Umubwiriza muri Bibiliya, arashimangira iki gitekerezo iyo avuga ati: ”Ubusa gusa! Nta kamaro! Byose ni ubusa” (Umubwiriza 1:2). Umwami Salomo, Umwanditsi w’igitabo cy’Umubwiriza, yari afite ubutunzi butagira akagero, ubwenge buruta ubw’abantu bo muri icyo gihe cyangwa ubwacu, abagore amagana, ingoro n’ubusitani byari bwarahogoje abami bo mu mahanga, amafunguro na divayi biryoshye cyane, n’imikino y’ubwoko bwose yo kwinezeza.

    Rimwe aravugati: icyo umutima wanjye washakaga, naragihigaga kugeza nkibonye. Nyamara, yabivuze muri make ati: “ubuzima munsi y’izuba”‘ubuzima mbamo nk’aho byose bibereyeho ubuzima, n’ibyo dushobora kubonesha amaso yacu n’ubunararibonye bw’ingingo zacu’ni ubusa gusa! Mbese n’ukubera iki hari urwo rwobo? Kubera ko Imana yaturemye hari impamvu iri hejuru y’ibyo dushobora gukora hano-kandi- muri aka kanya. Salomo yavuze ku Mana ati: “Kandi yashyize ibitekerezo by’igihe cy’iteka mu mitima yabo’.” (Umubwiriza 3:11). Mu mitima yacu, tuzi neza ko “hano-kandi-muri aka kanya” ntabwo ari byo birimo.

    Mu Itangiriro, igitabo cya mbere cya Bibiliya, tubonamo ko Imana yaremye umuntu mw’ishusho yayo (Itangiriro 1:26). Ibi bisobanuye ko dusa n’Imana kurusha uko dusa n’ikindi kintu icyo ari cyo cyose (ibinyabuzima ibyo ari byo byose). Dusanze kandi ko mbere y’uko icyaha n’umuvumo biza ku isi, ibintu bikurikira byari byoi: (1) Imana yagize umuntu ikiremwa gisabana nayo n’ibindi biremwa byose (Itangiriro 2:18-25); (2) Imana yahaye umuntu akazi (Itangiriro 2:15); (3) Imana yari ifitanye ubucuti n’umuntu (Itangiriro 3:8); na (4) Imana yahaye umuntu ubutware bwo gutegeka isi n’ibirimo (Itangiriro 1:26).

    Ibi bintu bishatse kuvuga iki? Imana yateganije ko buri kintu muri ibi kiziyongera ku byo tumaze kugeraho mu buzima, ariko ibi byose (cyane cyane ubusabane bw’umuntu n’Imana) byagizweho ingaruka mbi no kugwa mu cyaha kw’umuntu n’ingaruka zikomoka ku muvumo isi yavumwe (Itangiriro 3).

    Mu Byahishuwe, igitabo cya nyuma cya Bibiliya, Imana ihishura ko izarimbura isi n’ijuru by’iki gihe, nkuko tubizi izafungura kandi inzira y’ubuzima buhoraho, ireme ijuru n’isi bishyashya. Icyo gihe, izongera kugarura ubusabane bwuzuye hagati yayo n’abantu bacunguwe, mu gihe abakiranirwa bo bazaba bacirwa urubanza rw’ibyo bakoze kandi bajugunywe no mu Nyanja y’umuriro (Ibyahishuwe 20:11-15). Umuvumo w’icyaha uzakurwaho; nta cyaha kizongera kubaho, agahinda, uburwayi, urupfu, gutaka, n’ibindi. (Ibyahishuwe 21:4), kandi abakiranutsi bazaragwa ibintu byose. Imana izabana nabo, ndetse bazaba n’abana Bayo (Ibyahishuwe 21:7).

    Nuko rero, tugarutse aho twatangiriye: Imana yaturemeye kugira ngo tugirane Nayo ubusabane, umuntu aracumura, yitesha ubwo busabane, none Imana irimo kugarura ubwo busabane bwose kandi mu buryo buzahoraho. Guca mu buzima bitumenyesha neza ko gupfa dutandukanye n’Imana ubuziraherezo byatubera bibi cyane kurusha kubaho ntacyo tumaze! Nyamara Imana ntiyashyizeho uburyo bwo guhindura umunezero uzahoraho ubuziraherezo (Luka 23:43), ahubwo yatumye n’ubuzima ku isi, buhinduka ubwo kwishimira cyane ndetse bugira n’intego. Ni gute rero twabona uyu munezero uhoraho iteka ryose na “paradizo kuri iyi si”?

    INTEGO Y’UBUZIMA BUTANGWA NA YESU KRISTO

    Ibisobanuro nyakuri by’ubuzima bwa none n’iteka ryose, biboneka iyo tuvuguruye ubusabane bwacu n’Imana bwatakaye igihe Adamu na Eva bagwaga mu cyaha. Muri iki gihe, ubwo busabane n’Imana bushoboka gusa iyo tunyuze mu Mwana Wayo, Yesu Kristo (Ibyakozwe n’Intumwa 4:12; Yohana 14:6; Yohana 1:12). Duhabwa ubugingo buhoraho iyo umuntu wese yihannye ibyaha bye (gushishikazwa no kutongera kubikora ukundi no gusaba Kristo Yesu kuduhindura no kutugira ibyaremwe bishya)no gutangira kwizera Yesu Kristo nk’Umukiza

    Intego nyayo y’ubuzima ntiboneka gusa ari uko twakiriye Yesu nk’Umukiza (n’ubwo ibyo ari byiza cyane). Ahubwo, intego nyayo y’ubuzima ni igihe buri wese atangiye gukurikira Kristo nk’umwigishwa We, kwiga Ibye, kumarana Nawe igihe wiga Ijambo Rye, Bibiliya, gusabana Nawe mu masengesho, no kugendana Nawe no gukurikiza amategeko Ye. Iyo utari umwizera (cyangwa se iyo wakiriye agakiza vuba) hari ubwo wibwira uti: “Ibyo ntibindeba cyangwa nta nyungu mbifitemo!” Ariko, nyamuneka jya usoma cyane kuko Yesu yatangaje ibi bikurikira:

    ‘Mwese abarushye n’abaremerewe, nimuze munsange ndabaruhura. Mwemere kuba abagaragu banjye munyigireho, kuko ndi umugwaneza kandi noroheje mu mutima, namwe muzabona uburuhukiro mu mitima yanyu, kuko kunkorera kutaruhije, n’umutwaro wanjye utaremereye’ (Matayo 11:28-30). ‘Ariko Njyeweho nazanywe no kugira ngo zibone ubugingo, ndetse ngo zibone bwinshi’ (Yohana 10:10b).

    ‘Umuntu nashaka kunkurira yiyange, yikorere umusaraba we ankurikire. Kuko ushaka kurengera ubugingo bwe azabubura, ariko utita ku bungingo bwe ku bwanjye, azabubona’ (Matayo 16:24-25). ‘Kandi wishimire UWITEKA, Nawe azaguha ibyo umutima wawe usaba’ (Zaburi 37:4).

    Ibyo iyi mirongo yose ivuga, ni ukugira ngo dushobore guhitamo. Dushobora gukomeza gushakashaka kugira ngo dushobore kuyobora ubuzima bwacu burangwa no kutagira intego, cyangwa dushobore guhitamo gukurikira Imana n’imigambi Yayo ku buzima bwacu n’umutima wacu wose, ari byo bizatuma tubona ubugingo bwinshi, guhaza ibyifuzo by’imitima yacu, kugira umunezero no kunyurwa. Ibi, ni ukubera ko Umuremyi wacu adukunda kandi akaba atwifuriza ibyiza biruta ibindi (atari ubuzima bworoshye cyane gusa, ahubwo bunashimishije cyane).

    Niba rero uri umufana w’imikino itandukanye, kandi ukaba wifuza kureba umupira w’abakinnyi babigize umwuga, ushobora gutanga amadolari make ukabona intebe bita “kuva imyuna”, mu mirongo ya mbere ya sitade cyangwa se ukikura amadolari amagana kugira ngo wicare bugufi cyane nk’uri muri icyo gikorwa. No mu buzima bw’ abakristo niko bimeze. Kwitegereza ibyo Imana ikora bishya, ntabwo ari iby’abakristo bo ku Cyumweru.

    Ntabwo bishyuye ikiguzi. Kwitegereza ibyo Imana ikora bishya, ni iby’ abigishwa ba Kristo bitanga n’umutima wabo wose, kandi baretse koko kuyoborwa n’irari ryabo, kugira ngo bashobore gukurikira gahunda z’Imana. Abo bishyuye ikiguzi (Kwiyegurira Kristo n’imigambi Ye n’umutima wawe wose); basobanukiwe neza ubugingo bwinshi; kandi bashobora no gutinyuka kurebana mu maso ubwabo ntacyo bishisha, kurebana n’abo bahuje kwizera, ndetse n’Umuremyi wabo!

    None mwishyuye ikiguzi? Murabyiteguye? Niba ari uko bimeze, ntimuzasonza nyuma y’ibi bisobanuro n’intego zigamijwe.

    Source: www.gotquestions.org/Kinyarwanda

    [email protected]

    Source : https://agakiza.org/Ubuzima-bufite-iyihe-ntego-8472.html

  • Muri Egypt umujura yatinyutse kwiba imbere ya camera. – YEGOB #rwanda #RwOT

    Muri Egypt umunyamakuru witwa Mahmoud Ragheb yarimo afata amashusho y'inkuru yarimo akora Nyuma yumutingito wari umaze kwibasira uduce twa Cairo. Mugikorwa cyo gukora iyo nkuru nibwo umujura yaturutse hirya aje kuri moto, niko gushikuza telefone umunyamakuru wakoraga inkuru gusa ntibyamuhiriye kuko isura ye yafashwe na ya telefone yifashishwaga mu gukora inkuru. Nyuma yo gushikuza umunyamakuru telefone yagiye atafunze camera yayo, nawe yaje gufatwa na camera ya telefona abonwa nabari bakurikiye inkuru mu buryo bwa live kuri facebook.

    Iyi nkuru yari ikurikiwe nabantu basaga 20000 mu buryo bwa live, babashije kubona uko byagenze uyu mujura ashikuza telefone umunyamakuru. Umujura yahise agenda gusa yaje gufatwa. Nkuko inzego zishinzwe umutekano muri Cairo zabitangaje, yafashwe Nyuma yamasaha make ubwo bujura bumaze gukorwa. Izi nzego zitangazako hakoreshejwe ikoranabuhanga hakamenyekana aho ataha bakamusangaho ashyikirizwa kuri station ya police muri Qalyub ndetse yemera icyaha.

    Nkukotubikesha ikinyamakuru The Gardian, aya mashusho yarebwe nabantu basaga million 6.2 naho abasaga 45000 batangaho ibitekerezo mugihe kitarenze amasaha 24. Bivugwako kandi uyu mugabo yafashwe yamaze kugurisha telefone.

    1. https://twitter.com/M49828376Yasmin/status/1450439435175305220?t=oLo1bU08AHw3lbenUPaBjA&s=19

    Source : https://yegob.rw/muri-egypt-umujura-yatinyutse-kwiba-imbere-ya-camera/

  • Musanze : Diregiteri w’Ishuri wabwiye umuturage ko “abona ari Umututsi” yahamijwe amacakubiri akatirwa imyaka 7 #rwanda #RwOT

    Uyu wari umuyobozi w’Ishuri Ryisumbuye rya Cyapa, yahamijwe iki cyaha n’Urukiko Rwisumbuye rwa Musanze rwari rumaze iminsi rumuburanisha kuri iki cyaha.

    Ni icyaha yakoreye mu Mudugudu wa Giramahoro, Akagari ka Mpenge Umurenge wa Muhoza mu Karere ka Musanze tariki 22 Ukwakira 2020 saa mbiri z’ijoro (20h00).

    Ubushinjacyaha Bukuru dukesha iyi nkuru, buvuga ko kiriya cyaha cyakozwe n’uriya mugabo kuri uriya munsi, ubwo yari ari kumwe n’abandi bari bugamye imvura muri boutique bari kumva indirimbo z’Inkotanyi n’ijambo rya Perezida wa Repubulika ubwo yarahizaga Abasenateri.

    Ngo icyo gihe yababwiye abo bari kumwe ngo 'ibyo bidafite agaciro bari kumva ni ibiki ?' bamusubiza ko ari ibyo bo bashaka kumva ko na we yakumva ibyo akeneye.

    Nibwo yabwiye umwe muri bo ngo arabona ari Umututsi kuko afite amazuru maremare akaba asa n’inkotanyi ngo 'nagende abwire inkotanyi bene wabo ngo kuva cyera bahize ko bazatsemba Abahutu muri Ruhengeri na Gisenyi bakahahinga itabi none bashyizwe babigezeho.

    Yakomeje avuga ngo 'bagiye kubakura mu mirima yabo Inkotanyi zihahinge urumogi, ngo ariko agende abwire izo Nkotanyi ko nibibeshya bakabikora we na bene wabo bari inyuma y’ibirunga bazatwika urwo rumogi.'

    Ibi bikorwa uyu mugabo yakoze bikaba bigize icyaha cy’Ivangura gihanwa n’ingingo ya 163 y’itegeko No 68/2018 ryo ku wa 30/08/2018 riteganya ibyaha n’ibihano muri rusange.

    Ku italiki 07/10/2021 ni bwo Urukiko rwisumbuye rwa Musanze rwasomye urwo rubanza ruhanisha uwo muyobozi w’ishuli igifungo cy’imyaka irindwi (7) n’ihazabu y’ibihumbi magana atanu (500 000frw).

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Musanze-Diregiteri-w-Ishuri-wabwiye-umuturage-ko-abona-ari-Umututsi-yahamijwe-amacakubiri-akatirwa-imyaka-7

  • Zambia: Knowless yegukanye igihembo cy’umuhanzi w’ukwezi mu cyiciro cy’abagore #Rwanda #RwOT via @kigalitoday #rwanda #RwOT

    Butera Knowless
    Butera Knowless

    Zikomo Africa awards igamije kumenyekanisha ubushobozi buri mu bakiri bato, hitabwa cyane cyane ku bakora ibikorwa by’ubugiraneza, bafasha abatishoboye (philanthropists), abamamaza imideri, Abakora za filimi, Abanyamuziki n’abandi.

    Umunyarwandakazi Butera Knowless ndetse n’Umuhanzi wo muri Tanzania witwa Harmonize, ni bo baserukiye Akarere ka Afurika y’Iburasirazuba, kandi bagaruka batahanye ibihembo bombi. Ni ukuvuga ko Knoweless yabonye igihembo mu cyiciro cy’abagore, Harmonize akakibona mu cyiciro cy’abagabo.

    N’ubwo icyo gihembo kitaba kirimo amafaranga umuntu ahabwa mu ntoki, ariko kizamura kandi kigashishikariza abakiri bato gukora ibyo bashoboye ngo bazamure imibereho myiza y’abatuye aho bakomoka, mu rwego rwo kugira Isi ahantu heza kurushaho.

    Butera Knoweless aherutse gusohora ‘album’ nshya yise ‘Inzora’ iriho indirimbo nka ‘Asante’ ubu ikunzwe cyane mu gihugu.

    Ubuyobozi bwa Zikomo Africa Awards bwashimiye umuhanzi Knowless, kuba agira umuhate wo gushaka kugeza umuziki we ku rundi rwego.

    Butera Knowless afite indirimbo nyinshi zikunzwe muri iyi minsi, harimo iyitwa Ikofi, Uwo uzakunda, Uzagaruke ndetse na Te Amo yakoranye n’Umunya-Zambia witwa Roberto.

    source : https://ift.tt/3Cf7upC

  • Rubavu: Haravugwa amakimbirane mu buyobozi bwa sosiyete y’ubucuruzi y’abakozi ba Bralirwa #Rwanda #RwOT via @kigalitoday #rwanda #RwOT

    Bizimana Edouard, Perezida w’inama y’ubutegetsi ya SOSERGI (Société des services Gisenyi) hamwe n’undi muntu ngo bafatiwe mu cyuho barimo bica inzugi z’ibiro by’umuyobozi wa SOSERGI (Directeur) kubera ko hari ibyo batumvikanye.

    Bizimana yatawe muri yombi mu masaha y’ijoro tariki 20 Ukwakira 2021 ari kumwe n’umuntu wica inzugi hamwe n’umuhesha w’inkiko.

    Umuyobozi wa SOSERGI Kalisa Kirenga yabwiye Kigali Today ko Bizimana yaje gusenya inzu ashaka guhisha ibimenyetso bimushinja ibyaha yagiye akora.

    Kalisa yagize ati: “Hari hashize iminsi iwacu ku kazi hari ikibazo, Perezida w’inama y’ubutegetsi agafata ibyemezo wenyine atumvikanyeho n’abandi bahuriye mu nama y’ubutegetsi, rimwe akatwimura, akatujyana ahandi cyangwa akirukana umukozi abandi batabizi. Ejobundi yanyandikiye anyirukana, abandi bagize inama y’ubutegetsi na bo ejo baranyandikira bansaba kuguma mu kazi kuko uwo unyirukana bamureze kandi mfite ibihamya bimushinja, bambwira ko umwanzuro uzafatwa hamaze kubaho igenzura.”

    Akomeza agira ati: “Icyantangaje saa moya z’ijoro yazanye umuhesha w’inkiko n’umufundi gusenya inzu dukoreramo, abazamu barantabaza bambwira ko ibintu umuyobozi arimo gukora bidasanzwe, nibwo natabaje inzego z’umutekano zisanga yishe inzugi ndetse binjiye mu biro nkoreramo ashaka gutwara inyandiko zimushinja amakosa akora, inzego z’umutekano zikora akazi kazo.”

    Kalisa avuga ko Bizimana ashinjwa icyaha cyo gusenya, cyo gusahura, no gushaka guhisha ibimenyetso bimushinja ibyaha yagiye akora birimo gusinyisha abantu amafaranga, kwigwizaho umutungo, kunyereza umutungo wa sosiyete, gufata ibyemezo bikomeye bishyira sosiyete mu gihombo, kugurisha imigabane uko yishakiye, no gutanga amasoko binyuranije n’amategeko.

    Methode Hinjori Muyombana, umwe mu bakorana na Bizimana mu nama y’ubutegetsi ya SOSERGI, yatangarije Kigali Today ko gutabwa muri yombi kwa Bizimana byatewe n’amakosa yo gushaka kwirukana umuyobozi wa SOSERGI kandi inama y’ubutegetsi uwo mwanzuro batari bawumvikanyeho, ahubwo ngo yabikoze ku giti cye kandi binyuranyije n’amategeko.

    Uwitwa Saiba wari umunyamabanga wa Bizimana ariko akaza kumwirukana binyuranyije n’amategeko, avuga ko ibyabaye bibabaje kuba umuyobozi w’inama y’ubutegetsi ashobora kwitwikira ijoro akajya kwica inzugi z’aho ari umuyobozi.

    Yagize ati; “Njye nari umunyamabanga we, aza gukoresha inama rusange y’abanyamuryango binyuranyije n’amategeko ndetse akoresha impapuro mpimbano ashyiraho komite nyobozi adukuraho.”

    Ifatwa rya Bizimana Edouard ribaye mu gihe abakorana na we mu nama y’ubutegetsi batari bishimiye imikorere ye.

    Gaspard Ndekezi wayoboye iyi SOSERGI ariko akirukanwa na Bizimana muri Mata 2021 avuga ko batigeze bagirana imikorere myiza.

    Agira ati: “Ubusanzwe inama y’ubutegetsi ya Sosiyete y’ubucuruzi iterana rimwe mu gihembwe n’ikindi gihe cyose bibaye ngombwa igafata imyanzuro abayobozi n’abakozi bagomba gushyira mu bikorwa, ariko kuri Bizimana si ko byagendaga kuko yafataga imyanzuro wenyine, akirukana abakozi, akabahindurira imirimo, ubundi ugasanga arivanga mu mirimo ndetse ategeka abakozi ibyo bakora bitandukanye n’inshingano bafite. Njye yanyirukanye ansabye gukora ibinyuranyije n’amategeko mbyanze aranyirukana ashyiraho abandi, kandi si njye njyenyine kuko n’inama y’ubutegetsi bari kumwe yayeguje muri ubwo buryo.”

    Muyombana abajijwe na Kigali Today icyo bagiye gukora nyuma y’ifungwa rya Perezida w’Inama y’Ubutegetsi, yatangaje ko abagize inama bagiye guterana bakareba icyo bakora kuko akazi kadahagarara.

    Ati “SOSERGI ifite ibikorwa byinshi n’abakozi benshi kandi ibikorwa ntibyahagarara, abagize inama y’ubutegetsi baraterana barebe ko ibintu bisubira ku murongo.”

    Umuvugizi w’urwego rw’ubugenzacyaha RIB, Murangira B. Thierry, avuga kuri iki kibazo, yagize ati “Tariki ya 20 Ukwakira ku isaha ya saa kumi n’ebyiri n’igice zishyira saa moya, RIB ikorera mu mujyi wa Gisenyi yafunze abagabo 2 barimo Bizimana Eduard w ‘imyaka 54 wari Perezida w’inama y’ubutegetsi ya SOSERGI (société de services Gisenyi), ifunga na Uwayezu Anselme ukora akazi k’umuhesha w’inkiko w’umwuga. Aba bagabo bakurikiranyweho icyaha cyo kwiba bakoresheje guca icyuho, gukoresha inyandiko mpimbano n’ubufatanyacyaha mu kwiba bakoresheje icyuho. Ubu dosiye yabo irimo gukorwa izashyikirizwe Ubushinjacyaha.”

    Naho ku mategeko ahana ibi byaha bakurikiranweho, ingingo ya 276 ivuga ku guhimba, guhindura inyandiko cyangwa gukoresha inyandiko mpimbano, iteganya ko umuntu wese uhimba cyangwa uhindura mu buryo ubwo ari bwo bwose inyandiko cyangwa ikindi kintu cyanditseho igitekerezo, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, aba akoze icyaha.

    Umuntu wese, ku bw’uburiganya, wandika, wandikisha ibintu bidahuye n’ukuri cyangwa ukora imenyekanisha ritari ryo afatwa nk’uwakoze icyaha cyo gukora ibihimbano.

    Iyo abihamijwe n’urukiko, ahanishwa igifungo kitari munsi y’imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda atari munsi ya miliyoni eshatu (3.000.000 frw) ariko atarenga miliyoni eshanu (5.000.000 frw) cyangwa kimwe gusa muri ibyo bihano.

    Ingingo ya 167: Impamvu nkomezacyaha ku cyaha cyo kwiba

    Ibihano ku cyaha cyo kwiba byikuba kabiri (2) iyo:
    1° uwibye yakoresheje guca icyuho, kurira cyangwa yakoresheje igikoresho icyo ari cyo cyose gifungura aho utemerewe kwinjira;
    2° kwiba byakozwe mu nzu ituwemo cyangwa isanzwe ibamo abantu cyangwa mu nyubako ziyikikije;
    kwiba byakozwe n’umukozi wa Leta yishingikirije imirimo ye cyangwa umuntu ushinzwe imirimo iyo ari yo yose ifitiye abaturage akamaro;
    4° uwakoze icyaha yiyitiriye izina cyangwa yitwaje ibimenyetso biranga umukozi wa Leta cyangwa by’umuntu ushinzwe umurimo rusange ufitiye abaturage akamaro abeshya ko yabitumwe n’urwego rwa Leta;
    5° kwiba byakozwe nijoro;
    6° kwiba byakozwe n’abantu barenze umwe.

    SOSERGI ni sosiyete igizwe n’abakozi b’uruganda rwa Bralirwa. Yatangiye muri 2005, ifite abakozi babarirwa hagati ya 280 na 300, ikaba ifite ibikorwa birimo gukora isuku mu ruganda, gukora akazi k’amaboko karimo gupakira no gupakurura, gutwara abakozi ba Bralirwa, kubatekera, gucuruza imbetezi z’uruganda (dreche) hamwe no gucuruza ibikoresho bikoreshwa muri Bralirwa, ikaba ari yo ifite n’inzu ikorerwamo n’ivuriro rya Croix du Sud rizwi nko kwa Nyirinkwaya i Gisenyi.

    source : https://ift.tt/3E87SXT

  • Amatariki Expo 2021 izaberaho yamenyekanye #Rwanda #RwOT via @kigalitoday #rwanda #RwOT

    Iryo murikagurisha rigiye kuba ku nshuro ya 24, biteganyijwe ko rizakira abamurika barenga 400 bo mu Rwanda netse n’abanyamahanga bo mu bihugu 20, nk’uko bigaragara mu itangazo rya PSF.

    Biteganyijwe ko hazazamo ibintu bitandukanye birimo ibijynye n’itumanaho n’ikoranabuhanga, ubuhinzi, ubwubatsi n’ibigendanye nabwo, imyenda, ibikomoka ku biti, amabanki, ubukorikori, ubucukuzi bw’amabuye y’agaciro, ubukerarugendo n’ibindi byinshi.

    Ibihugu byamaze kwemeza ko bizitabira iryo murikagurisha harimo Singapore, Pakistan, u Buhinde, Syria, Misiri, Benin, Côte d’Ivoire, Kenya, Ghana, Morocco, Tunisia na Turukiya.

    source : https://ift.tt/3pmXXta

  • Video y'umunsi : Umuhanzi The Ben yerekanye uko yatereye umukunzi we Ivi #rwanda #RwOT

    Akimara gushyiraho aya mashusho The Ben yanditse amagambo yuzuyemo amarangamutima menshi ubona ko yanyuzwe no kubona Miss Pamella yavuze 'YEGO' ubwo yamutereraga ivi amusaba kuzamubera umugore. Muri ayo magambo yuzuyemo amarangamutima The Ben, yavuze ko ashobora kuba ari kurota kuko yumva bidasanzwe, yongeraho ko Pamella ariwe muntu agiye kugumana nawe ubuzima bwe bwose.

    Source : https://umuryango.rw/imyidagaduro/article/video-y-umunsi-umuhanzi-the-ben-yerekanye-uko-yatereye-umukunzi-we-ivi

  • Umusirikare w’Inkotanyi wangezeho bwa mbere namusabye kundasa aho kunyica arampumuriza- Mureshyankwano #rwanda #RwOT

    Nk’uko amateka abyemeza, ubutegetsi bwabayeho mbere ya Jenoside Yakorewe Abatutsi, bwinjije mu Banyarwanda urwango rwatumye Abahutu banga Abatutsi ari na byo byaje gutuma habaho Jenoside Yakorewe Abatutsi mu 1994.

    Senateri Mureshyankwano wabaye umwarimu mbere ya Jenoside Yakorewe Abatutsi, avuga ko na bo biga bari barinjijwe mu mutwe ko Inkotanyi [Abanyarwanda bari barahunze ubwo ubutegetsi bwameneshaga Abatutsi] ari abantu babi.

    Ati 'Bajyaga bavuga ngo zifite [Inkotanyi] imirizo, bakavuga ukuntu zica abantu. Abanyamakuru b’icyo gihe abitwa ba Bemereki Valerie kuri RTLM no kuri Radio Rwanda, bose batwigishaga ko Inkotanyi ari mbi.'

    Ubwo abariho bakora Jenoside batsindwaga bahungiye muri Repubulika Iharanira Demokarasi ya Congo [yahoze yitwa Zaire] ariko bajyana n’Abaturage bababwira ko Inkotanyi nizibasanga mu Gihugu zibica.

    Mureshyankano avuga ko na we yahunze gutyo ariko hakiyongeraho no kugira ubwoba yaterwaga no kubona Abatutsi bishwe ku buryo benewabo b’Inkotanyi nibahagera na bo batari bubarebere izuba.

    Yahungiye muri DRC amarayo imyaka itatu we n’umuryango we bazenguruka amashyamba yo muri kiriya Gihugu bari mu buzima bubi ku buryo hari n’abahasize ubuzima bishwe na za macinya n’izindi ndwara z’imibereho mibi.

    Mureshyankwano avuga ko ubwo bari mu mashyamba umugabo arembye, ari bwo Inkotanyi zabagezeho.

    Ati 'Uwahansanze bwa mbere kubera bya bindi twari twarigishijwe naramurebye gutya mbona ni umututsi kandi naramubonaga ari umusirikare afite n’imbunda, arambaza ati 'ko uri aha ?’ nti 'ni mwe twahuze’ arambaza ati 'mwahunze iki ?’ ndamubwira nti 'wimbaza byinshi ahubwo nyica’.'

    Avuga ko yumvaga ko agiye guhita amwica ariko ko yatunguwe n’uburyo yamusubije. Ati 'Ijambo yambwiye bwa mbere ni ryo ryampumurije. Yarambwiye ati 'ariko kuki mwumva ko twazanywe no kwica’. Icyantangaje kikantungura n’uyu munsi ntajya niyumvisha, ni uko bashatse uburyo badufasha.'

    Ngo abo yasabaga kwica bahise baha ubutabazi bwihuse umugabo we wari urembye bakamukorera ingobyi bakajya kumuvura ndetse akanakira.

    Ati 'Icyo ni cyo cya mbere naboneye ubudasa bw’Inkotanyi, ndavuga nti 'burya ba bantu naje mpunga batumye ndindagira muri aya mashyamba nari ngiye no kuyagwamo, bafite umutima wa kimuntu umeze utya ?’.'

    Avuga ko Inkotanyi ari na zo zamufashije gutahuka, ahageze anafashwa gusubira mu kazi ahita bona ko Inkotanyi ari bo bantu bakwiye kuyobokwa ku buryo ari byo byaje gutuma ayoboka Umuryango wa FPR-Inkotanyi.

    Mureshyankwano ubu ni Umusenateri, akaba yarakoze imirimo itandukanye mu buyobozi bw’u Rwanda kuko yabaye Umudepite ndetse akaba yarabaye na Guverineri w’Intara y’Amajyepfo.

    IKIGANIRO CYOSE MU MASHUSHO

    UKWEZI.RW

    Source : http://www.ukwezi.rw/mu-rwanda/3/article/Umusirikare-w-Inkotanyi-wangezeho-bwa-mbere-namusabye-kundasa-aho-kunyica-arampumuriza-Mureshyankwano

  • Dore ibintu 6 umugore akora akisenyera urugo atabizi #rwanda #RwOT

    Ibintu bikunze gukorwa n'abagore bigatuma bisenyera urugo batabizi, nk'uko byatangajwe n'urubuga Lifehack ruvuga ku mibanire:

    1. Gusiganira kwitanaho

    Rimwe na rimwe uzumva umugore avuga ko ubwo umugabo we atamwitaho ko nawe nta mpamvu zo kumwitaho, akirengagiza ko mu rukundo utanga ukabona guhabwa. Ako gasigane ko gutegereza ko umugabo wawe abanza akakwitaho nawe ukabona kumwitaho, gatuma arushaho kujya kure yawe nawe ukaba kure ye. Iyo bikomeje bigera aho wumva asa nk'aho atakiri mu buzima bwawe nawe bikaba uko, mukazisanga urugo rwanyu rwarasenyutse.

    2. Kuvuga umugabo wawe ibibi

    Abagore bamwe bagwa mu mutego wo gushaka kwerekana ko bagowe, bagakoresha intwaro yo kuvuga ibibi by'abagabo babo. Uko ugenda uganyira uwo muhuye wese ububi bw'umugabo wawe, niko urushaho kubigira bibi ndetse abenshi bakumvisha ko wagowe kandi ababo ari babi kurusha uwawe. Iyo uhuye n'abajyanama babi, bashobora kugusenyera bivuye ku kantu gato.

    3. Kugira abandi ushyira imbere y'umugabo wawe

    Umugabo mwasezeranye kubana, nta wundi muntu wari ukwiye kumurutisha. Nyamara abagore kenshi usanga bakunda abana babo ndetse akaba ari nabo bitaho kurusha abagabo babo, abandi bafite ibindi bitayeho nk'ubwiza bwabo, amafilimi n'ibindi, akaba aribyo baha umwanya munini kurusha uwo baha abagabo babo. Ukwiye guha umugabo wawe umwanya wa mbere kuko iyo utangiye kugira abandi umurutisha, uba utangiye kwisenyera urugo.

    4. Kumva ko uhora mu kuri

    Iyo umugore atajya yemera ikosa rye ngo ace bugufi ahubwo agahora yumva ko ari mu kuri atera umugabo we umutima mubi, ndetse akabona ko utamwubaha kuko utajya ugira umutima wo guca bugufi. Ibyo ahanini birasenya, kuko abagabo hafi ya bose bakunda ko abagore babo babagaragariza ko babubashye.

    5. Gukoresha imibonano mpuzabitsina ugasaba icyo wifuza

    Hari abagore bamwe bafatirana abagabo babo bakabasaba ibyo bifuza, mu gihe babasabye ko bakuzuza inshingano z'abashakanye. Iyo ubikora gutyo uba wirengangiza inshingano zawe kandi ukanisuzuguza bigatera umugabo wawe gufata umubiri wawe nk'igikoresho kuko nawe ariko uwufata. Bishobora kandi gutera umugabo kutishimira kongera gutera akabariro, kuko aba azi ko ariho uzamutegera umusaba ibyo wifuza. Iyo bitangiye kugera kuri urwo rwego rero, biba byanatuma urugo rwanyu rusenyuka.

    6. Guhora wibutsa umugabo wawe ibyahise

    Abagore bamwe na bamwe bakunze kuririra ku kantu gato, ugasanga bazuye n'iby'ahashize byose bibi umugabo yaba yarabakoreye. Ibyo akenshi bakabikoresha mu rwego rwo gushyira umugabo hasi ngo bamwumvishe ko ntacyo aricyo. Niba ushaka kubaka urugo rukomeye, wari ukwiye kureka ibyahise bigashirana n'akahise, aho guhora ubigarura mu biganiro byanyu.

    Ibi ni ibintu umugore wese ushaka kubaka urugo rukomeye aba agomba kwirinda, n'ubwo akenshi bifatwa nk'ibintu byoroshye, iyo bimaze kuba akamenyero bishobora kugusenyera urugo.

    Refe:elcrema.com

    Source : https://umuryango.rw/ubuzima-115/udushya/article/dore-ibintu-6-umugore-akora-akisenyera-urugo-atabizi

  • Umukobwa wa Bill Gates yashyingiranwe n'umusore w'umunyafurika witabiriye imikino Olempike ya Tokyo [AMAFOTO] #rwanda #RwOT

    Umukobwa w'imfura wa Bill Gates na Melinda Gates Jennifer yashakanye n'umukunzi we w'igihe kirekire Nayel Nassar, umucuruzi, nka we,barangije muri kaminuza ya Stanford – mu 2017. Jennifer yatangaje ko uyu mukunzi we yamwambitse impeta muri Mutarama 2020, ubwo bombi basohokanye gukina umukino wa Ski.

    Nk'uko amakuru menshi abitangaza,aba bombi bashyingiranywe ku wa gatandatu w'icyumweru gishize,mu birori byabereye mu rwuri rw'uyu mukobwa rw'amafarashi ruherereye mu majyaruguru ya Salem, muri New York (ababyeyi be barumuguriye muri 2018 nyuma yo kurangiza amasomo muri kaminuza ya Stanford).

    Nk'uko ikinyamakuru DailyMail kibitangaza ngo Jennifer, ufite imyaka 25, yari yambaye imyenda gakondo ya Vera Wang. Ibitangazamakuru byatangaje ko umugeni n'umukwe bakoze umuhango wa kyisilamu wihariye umunsi umwe mbere y'ibirori byabo byatumiwemo abashyitsi 300 ku wa gatandatu.

    Jennifer na Nayel w'imyaka 30 biyemeje kubana muri Mutarama 2020. Bombi barangije muri kaminuza ya Stanford – Jennifer ufite impamyabumenyi y'ubumenyabuzima naho Nayel afite impamyabumenyi mu bukungu – kandi bombi bakunda amafarasi bitangaje. Muri Nzeri, Jennifer yashyize kuri Instagram ye ifoto nziza y'amaboko 2 afatanye kandi yegeranye.

    Nayel yanditse kuri iyo foto ati, “sinjye uzabona ndi kumwe nawe ibihe byose ️. “

    Ku yindi foto Jennifer yasangije abantu muri Gicurasi uyu mwaka igaragaza amwambika impeta, uyu mugabo yaranditse ati: “Ntegereje kukugira umugore!. “

    Umukwe wa Bill Gates, Nayel ninde?

    Nayel, ababyeyi be ni Abanyamisiri, amaze imyaka itari mike yitabira amarushanwa yo kugendera ku mafarasi. Nk'uko amakuru abitangaza, yatangiye gusiganwa ku mafarashi afite imyaka 10 kandi yaje kubona itike yo gukina amarushanwa ya nyuma mu gikombe cyisi cyo gusiganwa ku mafarashi FEI mu 2013, 2014 na 2017, ndetse na shampiyona y'isi ya FEI mu 2014. Avuga kandi icyarabu, Igifaransa n'Icyongereza.

    Vuba aha,Nayel yitabiriye imikino Olempike ya Tokiyo, bikaba byari bibaye ku nshuro ya mbere mu myaka 61 ikipe y'abasiganwa ku mafarashi yo mu Misiri yitabiriye imikino Olempike.

    Nyirabukwe Melinda yagiye kuri Instagram, yandika ati: 'Ndacyakunda kureba imikino Olempike. #TokyoOlympics irihariye cyane kuko nshobora gushyigikira umukwe wanjye uzaza, @nayelnassar! Turakwishimiye cyane, Nayel (na Igor)!.

    Hagati aho, Bill yongeyeho ati: 'Ubu nshyigikiye abakinnyi benshi muri Tokyo Olympics, ariko cyane cyane umukwe wanjye w'ahazaza, @nayelnassar.








    Source : https://umuryango.rw/ubuzima-115/imibereho/article/umukobwa-wa-bill-gates-yashyingiranwe-n-umusore-w-umunyafurika-witabiriye