Webrwanda Backend

Author: webrwanda

  • Uwari umupolisi yahamijwe kwica bene wabo, yica umusore bakundanaga kubera amafaranga #rwanda #RwOT

    Nomia Rosemary Ndlovu wahoze ari umupolisi muri Afurika y'epfo yahamwe no kwica benewabo (abo mu muryango we) batanu ndetse n'umusore bakundanaga, ku musozo w'uru rubanza rwatumye igihugu kigwa mu kantu.

    Uko ari batandatu bishwe hagati y'umwaka wa 2012 na 2018, benshi muri bo yabafashijwe n'umwicanyi w'umugabo warishywe, kugira ngo ashobore kubona amafaranga y'ubwishingizi bw'ubuzima.

    Uwo mugore w'imyaka 46 yaje gufatwa nyuma yuko umuntu yari yashatse ngo yice umukobwa bavukana agiye kubibwira polisi. Byitezwe ko azakatirwa igihano mu kwezi gutaha.

    Ndlovu nkuko BBC dukesha iyi nkuru ibitangaza, yanahamwe no kugerageza kwica nyina witwa Maria Mushwana, ndetse ahamwa n'uburiganya ku bwishingizi nyuma yuko yari amaze kurihwa agereranywa ko agera ku ma-rand miliyoni 1,4 (miliyoni 94 mu mafaranga y'u Rwanda).

    Mu gihe cyose cy'uru rubanza rwamaze amezi atatu, ubushinjacyaha bwahishuye ukuntu yagiye ategura ibijyanye n'ubwishingizi bw'ubuzima n'ubwishingizi bwo gushyingura kuri abo benewabo, ubundi akabicisha.

    Uwa mbere wishwe ni mubyara we witwa Witness Madala Homu, wishwe mu kwezi kwa gatatu mu 2012. Hakurikiraho umukobwa bavukana, umusore bakundanaga, mwisengeneza we n'abishywa babiri bose barishwe. Uwo yishe bwa nyuma ni Brilliant Mashego, wapfuye mu kwezi kwa mbere mu 2018.

    Muri bwinshi muri ubwo bwicanyi, yagiye aha akazi abicanyi b'abagabo bo kubukora, ariko mu 2013 we ubwe yaroze ndetse aniga (ahotora) umukobwa bavukana witwa Audrey Somisa Ndlovu.

    Urwo rukurikirane rw'ubwicanyi rwarangiye nyuma yuko yiyambaje umuntu wo kumwicira undi mukobwa (mugore) bavukana hamwe n'abana be batanu mu kwezi kwa gatatu mu 2018.

    Umugabo yari yahaye icyo kiraka yabimenyesheje polisi, na yo itegura igikorwa cyo kumufata aho yamufashe amajwi arimo avuga kuri iyo gahunda, nkuko bitangazwa n'ikinyamakuru the times Live cyo muri Afurika y'epfo.

    Ndlovu yumviswe avuga ukuntu yashakaga ko abo batandatu batwikwa ari bazima batwikiwe mu rugo, avuga ko acyeneye amafaranga, nkuko bitangazwa na Times Live.

    Mu gihe cyose cy'urubanza, Ndlovu yakomeje kuvuga ko ari umwere, ashinja benshi mu batangabuhamya 50 ba leta bamushinja avuga ko babeshya.

    Ariko ubushinjacyaha bwagaragaje gihamya yerekana ukuntu benshi mu bishwe yabaga ari kumwe na bo mbere yuko bicwa, ndetse n'ukuntu yabyungukiyemo nyuma yaho.

    Ibiro ntaramakuru AFP byasubiyemo amagambo ya Riana Williams wunganira mu mategeko uruhande rwa leta, agira ati: 'Ushinjwa yabaga ari umuntu wa nyuma ubabonye bakiri bazima cyangwa akaba umuntu wa mbere ubonye ko baburiwe irengero'.

    'Yigennye nk'uwo guhabwa ibyo bagenewe kugira ngo abone amafaranga y'ubwishingizi ku buzima no ku gushyingura'.

    intyoza.com

    Source : https://www.intyoza.com/uwari-umupolisi-yahamijwe-kwica-bene-wabo-yica-umusore-bakundanaga-kubera-amafaranga/

  • Umuraperi Big Sean yakoze ibitangaje yicara m… – #rwanda #RwOT

    Ubusanzwe, byagaragaraga ku bantu bamwe na bamwe bikavugwa ko bazitererejwe n’abarozi, gusa uyu muraperi uri mu bakomeye ku Isi yatangaje abatari bake yerekana uburyo yabaye umwami w’inzuki zikaza zikamwuzuraho umubiri wose kandi nta na rumwe rumudwinga nk’uko nawe ubwe yabishimangiye.

    Anyarukiye ku mbuga nkoranyambaga ku rukuta rwe rwa instagram, Big Sean yatangaje ko ari inzuki za nyazo aho abenshi bari batangiye gucyekacyeka ko zaba ari inzuki z’ibipupe. Yagize ati “Ni inzuki za nyazo kuri njye, ntabwo ari amafoto yakozwe abeshya, ni inzuki 65,000 ziri kuri njye, nakunze inzuki ziri mu muzinga/icyima (Aho inzuki ziba)”.

    Izi nzuki, Big Sean yifashishije zari izigaragara mu mashusho y’indirimbo ye nshya yashyize hanze yise ‘What a Life’, iyi ndirimbo ifite amashusho atangaje, ubona ko yitondewe no gushyiramo ubuhanga budasanzwe.

    Big Sean ari mu baraperi bakomeye muri Amerika

     

    Source : https://inyarwanda.com/inkuru/110710/umuraperi-big-sean-yakoze-ibitangaje-yicara-mu-nzuki-65000-zimufata-nkumwami-wazo-amafoto-110710.html

  • Instagram: Bruce Melodie yungutse ibihumbi 27… – #rwanda #RwOT

    Kimwe mu bintu bikomeza kugaragaza ko imyidagaduro nyarwanda ikomeza kugenda itera imbere kimwe n'ikoranabuhanga rishingiye ku mbuga nkoranyambaga rigashinga imizi, ni uburyo ziri gukoreshwamo n’abazimenye bakanaziha agaciro zikaba zibatunze mu Rwanbda.

    Kugeza ubu umunyarwandakazi Shaddyboo niwe uyoboye abandi mu gukurikirwa cyane ku rubuga rwa Instagram twifuje kubasangizaho amakuru mu byamamare nk'INYARWANDA aho afite abamukurikira kuri rwo bamaze kuba ibihumbi 938.

    Urebye neza wabona ko impera za 2021 zihabwa amahirwe ku kuba zasiga uyu mubyeyi w’abana babiri afite abamukurikira bagera kuri Miliyoni 1. Kugeza ubu uru rubuga rufite igisobanura gikomeye mu buzima bwa buri munsi bw'uyu munyamideli akaba n'umushabitsi aho arwifashisha yamamariza ibigo binyuranye bikamwishyura n’utundi tuzi agenda abona kubera rwo.

    Kugera ubu ukurikiranye neza wasanga ko byibuze afite  ukwiyongera kw’abamukurikira kuri hagati y'abantu 600 na 1000 ku munsi bivuze ko kuzuza kwe Miliyoni kwaba kuri hagati y'iminsi 60 ni 100, hatagize igihinduka ukwezi k'Ukuboza 2021 cyangwa Mutarama 2022  byabaye kure yazasiga imushyize mu cyiciro cy’abakurikirwa na Miliyoni aho kuba ibihumbi Magana. 

    Abakiri mu bihumbi Magana nabo ubona ko ababakurikira bakomeje kwiyongera cyane kuri uru rukuta harimo Meddy umaze kugira abangana n'ibihumbi 761 nawe imibare y'igereranya ikaba igaragaza ko afite ubwiyongere bw’abari hagati ya 400 na 800 ku munsi bashya bamukurikira.

    Bivuze ko byazasaba iminsi micye ishoboka ingana na magana 300 naho imyinshi ikaba yagera muri 600 ngo yuzuze Miliyoni y’abamukurikira, bikaba byaba biri hagati y'impeshyi itaha ya 2022 n'itumba rya 2023.

    Ku ruhande rwa Bruce Melodie iby'uyu muhanzi byo biratangaje cyane kuko urubuga rwe ruri kuzamuka byihuse umunota ku wundi kuko kuwa 17 Ukwakira 2021 yari afite abamukurikira ibihumbi 564 nyamara kuri uyu munota akaba afite ibihumbi 591 bivuze ko mu gihe cy'iminsi 5 yonyine agize ubwiyongere bungana n'ibihumbi 27 by’abamukurikira kuri Instagram.

    Ni impamvu isa n’iyumvikanamo ukuntu kuko amaze iminsi ashyize hanze indirimbo iri mu zikunzwe yitwa 'Sawa Sawa' yakoranye na Khaligraph Jones ukurikirwa n'abarenga Miliyoni 1.8 kuri Instagram bivuze ko bamwe mu bakurikira Jones batangiye gukurikirana no kumenya byinshi kuri Bruce Melodie. Ikindi ni uko afite byinshi bimuvugwaho muri iki gihe harimo n'ibitaramo ategerejwemo by'umwihariko muri Kigali Arena kuwa 06 Ugushyingo 2021. 

    Muri iki gitaramo azaba yizihiza imyaka 10 amaze akora umuziki kinyamwuga bivuze ko mu gihe byaba bigumye gutya iminsi yaba ibarirwa ku ntoki ku kuba yaca kuri aba bose n’ubwo nawe igihe gito gishoboka cyaba ari mu mpera z'umwaka wa 2021 kuba yaba yujuje Miliyoni 1. Ibi bishobora kwihutishwa no kuba yashyira hanze undi mushinga w’indirimbo ushyushye by’umwihariko yakoranye n’undi muhanzi ukomeye.

    Ikindi cyabidindiza ni ukuba yakwiryamira abamwerecyejeho amaso bakaba bayerecyeza ahandi.


    Bruce Melodie afite umuvuduko wo hejuru kuri instagram aho mu minsi itanu yonyine yungutse abamukurikira bashya ibihumbi 27

    Bigumye uko biri Shaddyboo yasozanya Miliyoni y’abamukurikira kuri Instagram nyamara umwanya wo kuyobora abakurikirwa cyane akaba yawamburwa na Bruce Melodie

    Meddy hatagize ikintu gihinduka yazageza abamukurikira Miliyoni 1 hagati y’impeshyi ya 2022 n’amezi abanza ya 2023

    Ubwo twasuraga urukuta rwa Instagram rwa Bruce Melodie kuwa 17 Ukwakira 2021 n’uku rwari ruhagaze n’ibihumbi 564

    Bruce Melodie arabura amasegonda akuzuza ibihumbi 600 by’abamukurikira mu gihe yaba agumye ku muvuduko ariho wo kunguka abamukurikira bashya (27000 Followers/5days) umwaka utaha yaba ari we munyarwanda ukurikirwa cyane kuri Instagram 

    Source : https://inyarwanda.com/inkuru/110708/instagram-bruce-melodie-yungutse-ibihumbi-27-byabamukurikira-mu-minsi-5-gusa-vuba-cyane-as-110708.html

  • Amayeri n’ubwambuzi bw’abafite amashuri bashaka indonke kurusha uburezi – #rwanda #RwOT

    Aya ni amwe mu magambo ya Françoise Nyirantagorama, ubwo yaganiraga n’Umunyamakuru wa RBA, avuga uko yashinze Ishuri Ryigenga (La Colombière) mu Mujyi wa Kigali.

    Hari mu 1995, inzego zitandukanye zirimo n’uburezi zari zitariyubaka kubera ibihe bya Jenoside igihugu cyari kivuyemo kuko bamwe mu Banyarwanda barukoragamo bari barishwe, abandi barahunze ku buryo ababyeyi bari bafite ikibazo cy’aho abana babo bashobora kwigira.

    Uko imyaka yagiye ishira indi igataha, uru rwego rwagiye rutera intambwe ndetse amashuri yigenga aba menshi mu gihugu yunganira aya leta.

    Abikorera bakomeje gushora imari mu burezi nk’urwego rwitezweho
    Gufasha u Rwanda kugera ku bukungu bushingiye ku bumenyi
    hubakwa ibigo by’amashuri uhereye mu cyiciro cy’ikiburamwaka ukageza ku mashuri makuru na kaminuza.

    Nubwo bimeze bityo, amwe mu mashuri ashinjwa ko yateshutse ku ntego nyamukuru yo gutanga ubumenyi n’uburere mu bana b’igihugu, ba nyirayo cyangwa abayayobora bakinjira mu nkundura yo kwishakira indonke.

    Haba mu mashuri yigenga cyangwa aya leta iyi migirire irahari mu byiciro by’ay’incuke, abanza n’ayisumbuye nk’uko bamwe mu babyeyi badahwema kubivuga.

    Byigaragaza mu bikorwa birimo kongera amafaranga y’ishuri mu buryo butavugwaho rumwe, gusaba umusanzu wiyongera ku mafaranga y’ishuri yagenwe bagaragaza ko hari ubwihutirwe bwo gusana inyubako, gukora ubusitani, kubaka uruzitiro rw’ishuri n’ibindi.

    Impungenge ababyeyi bagaragaje ni uko ibigo bimwe bisaba bene iyi musanzu bikarangira nta kigaragaye ayo mafaranga yakoreshejwe.

    Ahandi ubuyobozi bw’amashuri busaba ibikoresho byagombye guturuka mu mafaranga umunyeshuri yishyuzwa birimo nk’impapuro zo mu biro imikoropesho, amasuka n’ibindi.

    Muri iyi nkuru, ababyeyi baganiriye na IGIHE nta n’umwe wemeye ko hatangazwa imyirorndoro ye.

    Umubyeyi uri mu kigero cy’imyaka 50 utuye mu Murenge wa Kimisagara, ufite umunyeshuri woherejwe kwiga mu ishuri ryisumbuye riherereye mu Ntara y’Iburasirazuba, yavuze ko ubu ari uburyo amashuri yashyizeho bwo kwishakira inyungu ku ruhande.

    Ati “Bisa n’ibyabaye akamenyero. Iyi ‘babyeyi’ [inyandiko isobanura ibikoresho n’amafaranga y’ishuri umunyeshuri asabwa] ureba mfite, igiteranyo cy’ibikenewe byose ni amafaranga ibihumbi 310 Frw, nyamara amafaranga y’ishuri ubwayo ni ibihumbi 210 Frw yonyine. Ni ukuvuga ko gusaba ibikoresho bitabarwa mu mafaranga umunyeshuri yishyura ari uburyo amashuri yishakira inyungu ku ruhande.”

    Amwe mu mashuri atungwa agatoki ku migenzereze irimo gutuma abanyeshuri ibikoresho byagombye kuva mu mafaranga y’ishuri bishyura

    Mugenzi we ufite umwana wiga mu Ishuri Ryisumbuye mu Ntara y’Amajyepfo, yavuze ko bamwe mu bayobozi b’ibigo bakoresha amayeri mu gusaba bene ibi bikoresho.

    Ati “Nko mu mashuri yisumbuye basigaye babikora mu ibanga ibikoresho basaba bimwe ntibabishyire kuri ‘babyeyi’ kugira ngo bidasakuza ahubwo bagaca ku ruhande bagahamagara umubyeyi.”

    Umugabo utuye mu Murenge wa Gisozi mu Mujyi wa Kigali, yavuze ko ikiguzi cy’uburezi [amafaranga umunyeshuri yishyura] cyagombye kuvamo ibyo azakenera byose kugira ngo abashe kwiga.

    Ati “Uretse ibyerekeye ku munyeshuri nk’amakaye, amakaramu n’imyambaro, ibindi byagombye kuva muri ya mafaranga yishyuye. Naho ubundi ni ubucuruzi burimo amahugu kuko bafata ibintu bakabyita amazina atandukanye kugira ngo babone uko banyanganya ababyeyi.”

    Yongeyeho ati “Niba ari ukubaka cyangwa gusana ishuri, kubaka uruzitiro, kugura impapuro, amasuka, imikoropesho no kugura imodoka byagombye kuva muri ya mafaranga umunyeshuri yishyuye cyane ko nk’ibigo byigenga biba byarakoze ishoramari ari na yo mpamvu byishyuza amafaranga menshi naho ku bigo bya leta, Minisiteri y’Uburezi ni yo ibishinzwe keretse yavuze ko yabuze ubushobozi.”

    Padiri Mukuru wa Paruwasi Kacyiru-Kagugu, Martin Uwamungu mu kiganiro yagiranye na IGIHE na we yagaragaje ko hari amashuri yashyize imbere ubucuruzi no gushaka amafaranga.

    Ati “Ikintu cya mbere muri iki gihe ni igitsure. Ikibazo rero ni uko amashuri y’iki gihe ari hanze aha icyo agamije ari ubucuruzi, icyo agamije ni ukwegeranya amafaranga. Icyo tugamije ni ukurera, ni uburere, ni icyo gitsure. Iyo hari igitsure n’imyigire iba myiza.”

    Padiri Mukuru wa Paruwasi Kacyiru-Kagugu, Martin Uwamungu, na we yavuze ko amashuri y’iki gihe icyo ashyize imbere ari ubururuzi no gukusanya amafaranga

    Mineduc yahagurukiye iki kibazo

    Ubwo yari mu kiganiro Urubuga rw’Itangazamakuru, cyatambutse ku itariki 10 Ukwakira, Minisiteri w’Uburezi, Dr Uwamariya Valentine, yavuze ko iki kibazo bakizi kandi ko kiri gushakirwa igisubizo ku buryo mu gihembwe cya kabiri cy’uyu mwaka w’amashuri umwanzuro wacyo uzaba wabonetse.

    Yagize ati “Iki ni ikibazo natwe turabizi, hari ukuntu amashuri ashaka kongeza amafaranga akongeraho utundi tuntu, hari aho bajyaga baka amasuka yo gukora isuku ukabona barabyaka buri gihe. Hari aho twabonye kubera Covid-19 basaba umuti wo gukaraba w’ibihumbi 15, abandi 50 Frw, buri wese akagenda yongeraho akantu.”

    Yakomeje avuga ko nyuma yo kumenya ko aba bayobozi b’ibigo baba bashaka guca amafaranga menshi ababyeyi ndetse hari n’abashaka kongeza ay’ishuri mu buryo bwo kujijisha, ubu hagiye gushyirwaho uburyo bizajya bikorwamo bitabangamiye ababyeyi.

    Yagize ati “Turi gutegura uburyo bigomba gukorwamo ku buryo buri muyobozi w’ikigo atabyuka ngo muzane iki.”

    Minisitiri w’Uburezi yavuze ko uburyo imyanzuro nk’iyi yafatwagamo na byo biteye inkeke kuko komite zihagarariye ababyeyi mu bigo by’amashuri zibifatanya n’abayobozi b’amashuri bityo ko inteko rusange zishobora kuzajya aba ari zo zibigiramo uruhare.

    Minisitiri w’Uburezi, Dr Uwamariya Valentine yavuze ko ikibazo cy’amashuri asaba ibikoresho by’umurengera kigiye guhagurukirwa

    source : https://ift.tt/2Zekqh0

  • Joyce Fashion Designs yashyize hanze imyambaro ifite umwihariko (Amafoto) – #rwanda #RwOT

    Uwamahoro wahanze iyi myambaro yabwiye IGIHE ko yabitekerejeho ashaka gukora imyambaro yafasha abantu bashaka kurimba no kuberwa, mu gihe bagiye mu kazi cyangwa ahandi.

    Ati “Ni imyambaro natekereje nshaka gufasha abantu kwambara neza no kurimba mu gihe bagiye ahantu hiyubashye nko mu kazi cyangwa mu nama n’abandi bantu.”

    Yakomeje avuga ko iyi myambaro ye yiteze ko abantu bazayikunda kubera uburyo ikozwe kandi akaba yarayitondeye cyane ko yayikoze mu gihe cy’amezi abiri. Iyi myambaro irimo amakanzu, amajipo n’amakote y’abagore.

    Muri Nyakanga uyu mukobwa yari yashyize hanze iyiswe ‘Guma mu Rugo Collection’ irimo amakanzu, amakoti, amajipo n’indi ibereye igitsinagore kandi umuntu yaserukana ahantu hatandukanye. Iyi myambaro yayikoze mu gihe Umujyi wa Kigali n’ibindi bice bimwe na bimwe mu Rwanda byari biri mu bihe byo kuguma mu rugo mu rwego rwo kwirinda icyorezo cya COVID-19.

    Muri Werurwe Uwamahoro nabwo yashyize hanze imyambaro yise ‘Nyampinga dedicated Collection’. Igizwe n’amakanzu cyane cyane ndetse n’indi mike irimo amashati n’amakabutura byose by’abakobwa. Iyi yari yayituye abakobwa cyane abari mu marushanwa ya Miss Rwanda ndetse na Miss Supranational uyu mwaka kuko yari yambitse benshi muri bo muri aya marushanwa yombi.

    Uwamahoro ni umwe mu bahanga imideli bahagaze neza muri iki gihe. Uyu mukobwa ubusanzwe ufite inzu ihanga imyambaro ya ‘Joyce Fashion Designs’ avuga ko kugira ngo amenye kudoda byaturutse ku kuba yarakuze iwabo hari imashini zibikora, akagenda abyiga akiri muto kugeza ubwo yabaye mukuru akabikomeza.

    Mu 2017 ni bwo yaje kubitangira bya kinyamwuga ariko biza kugenda biguru ntege kuko atari afite ubushobozi buhagije kandi anabifatanya n’amasomo ya Kaminuza. Nyuma yaje gushinga iyi nzu ihanga imyambaro. Afite intego yo gukomeza gukora neza no guhaza isoko ry’imyambaro mu Rwanda akagera no ku isoko mpuzamahanga.

    Igisonga cya mbere cya Nyampinga w’u Rwanda 2020, Umwiza Phiona ari mu mwambaro wa Joyace Fashion Designs

    Imwe mu myambaro mishya Uwamahoro yakoze mishya

    Ishimwe Sonia wabaye Nyampinga w’Umurage (Miss Heritage) yifashishijwe hafatwa amafoto ajyanye n’iyi myambaro

    Iyi myambaro yagiye hanze muri uku kwezi

    Iyi myambaro ikozwe mu mabara atandukanye

    Iyi myambaro irimo ubwoko butandukanye

    Iyi myambaro niyo mishya ya Joyce Fashion Designs

    Uwamahoro wahanze iyi myambaro yashyize hanze

    Uwamahoro wakoze iyi myambaro ni umwe mu bahanga imideli bahagaze neza muri iki gihe

    Uwamahoro yahanze imyambaro itandukanye

    Uyu ni umwe mu myambaro yakozwe na Uwahoro mishya

    Amafoto: Matty 4tography

    source : https://ift.tt/2XAUED8

  • SA: Uko uwahoze ari umupolisi yishe benewabo batanu hamwe n'uwari umukunzi we #rwanda #RwOT

    Nomia Rosemary Ndlovu wahoze ari umupolisi muri Afurika y'epfo yahamwe no kwica benewabo (abo mu muryango we) batanu ndetse n'umusore bakundanaga, ku musozo w'uru rubanza rwatumye igihugu kigwa mu kantu.

    Uko ari batandatu bishwe hagati y'umwaka wa 2012 na 2018, benshi muri bo abafashijwe n'umwicanyi w'umugabo warishywe, kugira ngo ashobore kubona amafaranga y'ubwishingizi bw'ubuzima.

    BBC dukesha iyi nkuru yatangaje ko uwo mugore w'imyaka 46 yaje gufatwa nyuma yuko umuntu yari yashatse ngo yice umukobwa bavukana agiye kubibwira polisi.

    Byitezwe ko azakatirwa igihano mu kwezi gutaha.

    Ndlovu yanahamwe no kugerageza kwica nyina witwa Maria Mushwana, ndetse ahamwa n'uburiganya ku bwishingizi nyuma yuko yari amaze kurihwa agereranywa ko agera ku ma-rand miliyoni 1,4 (miliyoni 94 mu mafaranga y'u Rwanda).

    Mu gihe cyose cy'uru rubanza rwamaze amezi atatu, ubushinjacyaha bwahishuye ukuntu yagiye ategura ibijyanye n'ubwishingizi bw'ubuzima n'ubwishingizi bwo gushyingura kuri abo benewabo, ubundi akabicisha.

    Nomia Rosemary Ndlovu wahoze ari umupolisi

    Uwa mbere wishwe ni mubyara we witwa Witness Madala Homu, wishwe mu kwezi kwa gatatu mu 2012. Hakurikiraho umukobwa bavukana, umusore bakundanaga, mwisengeneza we n'abishywa babiri bose barishwe.

    Uwo yishe bwa nyuma ni Brilliant Mashego, wapfuye mu kwezi kwa mbere mu 2018.

    Muri bwinshi muri ubwo bwicanyi, yagiye aha akazi abicanyi b'abagabo bo kubukora, ariko mu 2013 we ubwe yaroze ndetse aniga (ahotora) umukobwa bavukana witwa Audrey Somisa Ndlovu.

    Urwo rukurikirane rw'ubwicanyi rwarangiye nyuma yuko yiyambaje umuntu wo kumwicira undi mukobwa (mugore) bavukana hamwe n'abana be batanu mu kwezi kwa gatatu mu 2018.

    Umugabo yari yahaye icyo kiraka yabimenyesheje polisi, na yo itegura igikorwa cyo kumufata aho yamufashe amajwi arimo avuga kuri iyo gahunda, nkuko bitangazwa n'ikinyamakuru the Times Live cyo muri Afurika y'epfo.

    Ndlovu yumviswe avuga ukuntu yashakaga ko abo batandatu batwikwa ari bazima batwikiwe mu rugo, avuga ko acyeneye amafaranga, nkuko bitangazwa na Times Live.

    Mu gihe cyose cy'urubanza, Ndlovu yakomeje kuvuga ko ari umwere, ashinja benshi mu batangabuhamya 50 ba leta bamushinja avuga ko babeshya.

    Ariko ubushinjacyaha bwagaragaje gihamya yerekana ukuntu benshi mu bishwe yabaga ari kumwe na bo mbere yuko bicwa, ndetse n'ukuntu yabyungukiyemo nyuma yaho.

    Ibiro ntaramakuru AFP byasubiyemo amagambo ya Riana Williams wunganira mu mategeko uruhande rwa leta, agira ati: 'Ushinjwa yabaga ari umuntu wa nyuma ubabonye bakiri bazima cyangwa akaba umuntu wa mbere ubonye ko baburiwe irengero'.

    'Yigennye nk'uwo guhabwa ibyo bagenewe kugira ngo abone amafaranga y'ubwishingizi ku buzima no ku gushyingura'.

    The post SA: Uko uwahoze ari umupolisi yishe benewabo batanu hamwe n'uwari umukunzi we appeared first on IRIBA NEWS.

    Source : https://iribanews.rw/2021/10/23/sa-uko-uwahoze-ari-umupolisi-yishe-benewabo-batanu-hamwe-nuwari-umukunzi-we/

  • Bruce Melodie yavuze ku by’imodoka yaguze ihagaze miliyoni 700 #rwanda #RwOT

    Itawahiwacu Bruce [Bruce Melodie] yahakanye amakuru avuga ko yatumijeho imodoka ihenze igura agera kuri miliyoni 700 itunzwe n’ibyamamare birimo na Cristiano Ronaldo.

    Mu mpera z’ukwezi gushize kwa Nzeri, nibwo haje inkuru ivuga ko iki cyamamare muri muzika nyarwanda cyaherukaga gusinyira akayabo ka miliyari ko kwamamaza Kompanyi ya Food Bundle ko yatumijeho imodoka ihenze.

    Amakuru yavuze ko uyu muhanzi Bruce Melodie, yatumijeho imodoka yo mu bwoko bwa Brubus igura amadorali ya Amerika ibihumbi 700, ni ukuvuga miliyoni 700 z’amafaranga y’u Rwanda.

    Mu kiganiro yahaye ikinyamakuru ISIMBI, Bruce Melodie yahakanye aya makuru avuga ko atigeze atumizaho iyi modoka atazi n’aho byavuye.

    Ati 'Njye nta modoka naguze nta n’ibyo navuze, ntawambajije, ntabwo bakoze iperereza, nta nubwo yaje aho ntuye (…) njye nta modoka natumije nta n’ibyo navuze, iby’imodoka reka reka nta n’ibyo nigeze mvuga.'

    Bruce Melodie ni umwe mu bahanzi nyarwanda bakunzwe kandi bakomeye bamaze no kubona agatubutse binyuze mu kwamamaza ndetse n’umuziki akora.

    Bruce Melodie yahakanye iby’imodoka yaguze

    Imodoka byavugwaga ko Bruce Melodie yaguze

    Source : http://isimbi.rw/imyidagaduro/article/bruce-melodie-yavuze-ku-by-imodoka-yaguze-ihagaze-miliyoni-700

  • Menya byimbitse ibitera hangover ku muntu wanyweye inzoga nyinshi #rwanda #RwOT

    Hangover ni ibimenyetso by'uruhurirane bijyana no kunywa inzoga nyinshi cyane ukarenza urugero hahandi umubiri wawe unanirwa kubyihanganira. Nubwo hangover ifite aho ihuriye n'isindwe ariko ntabwo ari buri wese wanyweye inzoga agasinda agira hangover gusa ntiwagira hangover utasinze.

    Ibimenyetso bya hangover akenshi bikunze kugaragara mu gitondo ndetse bikaza bikurikira kunywa inzoga nyinshi, cyane cyane nijoro.

    Ese hangover yaba iterwa n'iki?

    Nkuko tumaze kubivuga hangover iterwa no kunywa inzoga nyinshi bityo bigatera umubiri kutihanganira ibyawubayeho. Nyamara kunywa inzoga bifite ibindi bijyana na byo bigira uruhare mu kongera ibyago byo kugira hangover.

    Gusinzira

    Nubwo ku musinzi gusinzira ari nkako kanya, ariko ibitotsi bye ntibiba bihagije. Usanga akenshi abyuka yumva ananiwe kandi ahondobera.

    Kunyaragura

    Kunywa inzoga bitera uwazinyoye kunyara kenshi bityo umubiri ugatakaza amazi menshi. Niho usanga ugira inyota no kumva umutwe uremereye.

    Kwaguka kw'imiyoboro y'amaraso

     Kunywa bizatuma imiyoboro y'amaraso yaguka bityo bitere umutwe, kuko imitsi iba yareze.

    Kugabanuka kw'isukari yo mu maraso

     Kuri bamwe kunywa inzoga bigabanya igipimo cy'isukari mu maraso bikarangwa no gususumira, umunaniro, guhindura imico, no kuzungera.

    Igifu kwivumbura

    Kunywa alukolo bitera kuzamuka kw'igipimo cya aside yo mu gifu ndetse bigatera ingufu zacyo zo gusya kugabanuka, bikurikirwa n'isesemi, kuruka no kuribwa mu nda.

    Ubwirinzi bw'umubiri

    Kunywa alukolo bishobora gutera ibice bimwe by'umubiri kubyimba, bikagira ingaruka mu kugira appetit, kwita ku bintu no kwibuka

    Izindi alukolo: ubusanzwe alukolo nziza ni ethanol mu nzoga. Ariko mu gukora inzoga cyane cyane za whisky, gin, hashobora no kubonekamo ibindi bitari ethanol. Twavuga esters na aldehydes. Ibi nabyo byongera ibimenyetso bya hangover.

    Uretse ibimenyetso bigaragara, ariko uzasanga akenshi umuntu waraye anyoye agakabya, abyukana umunabi, kwigaya, isoni no kumva yiyanze.

    Ubutaha tuzarebera hamwe ibimenyetso bitandukanye biranga umuntu ufite hangover nyinshi cyane ndetse n'uburyo butandukanye ushobora gukoresha wirinda kuba wagera hangover.

    Src: umutihealth

    Source : https://impanuro.rw/2021/10/23/menya-byimbitse-ibitera-hangover-ku-muntu-wanyweye-inzoga-nyinshi/

  • Komite Nyobozi ya FERWAFA yemeje ko shampiyona y'ikiciro cya Kabiri mu bagabo 2021-2022 izakinwa mu matsinda abiri aho kuba ane #rwanda #RwOT

    Ishyirahamwe ry'umupira w'amaguru mu Rwanda ryamaze gutangaza ko imikino yo mu kiciro cya kabiri mu bagabo izakinwa mu matsinda abiri aho kuba amatsinda ane nk'uko byari byatangajwe mbere, ibi bibaye nyuma yaho bamwe mu banyamuryango bayo bagaragaje ko batishimiye gukina mu matsinda ane.

    Ni nyuma yaho hari habaye tombola y'uko amakipe yo mu kiciro cya kabiri uko ari 25 yari yagabanyijwe mu matsinda ane, ibi byaje kwanga na bamwe mu banyamuryango bavuga ko itaba ari shampiyona bagiye gukina bityo FERWAFA ikaba yahise iterana kuri uyu wa gatanu tariki 22 Ukwakira 2021 yemeza ihinduka ry'amatsinda ane.

    Babinyujije ku rubuga rwa internet rwa FERWAFA, mu gitondo cyo kuri uyu wa gatandatu tariki ya 23 Ukwakira, bemeje ko iki kiciro cy'abagabo kizatangira tariki ya 30 Ukwakira 2021 kizakinwa nk'uko byari bisanzwe mu matsinda abiri.

    Aha bagize bati 'Inama ya Komite Nyobozi ya FERWAFA yateranye kuri uyu wa gatanu tariki ya 22 Ukwakira 2021 mu cyumba cy'inama cya FERWAFA yafashe umwanzuro ko Shampiyona y'Ikiciro cya kabiri 2021 izakinwa mu matsinda abiri nk'uko byari bisanzwe.'

    Uko amatsinda ya Shampiyona y'ikiciro cya kabiri ateye :

    ITSINDA A: Sunrise FC, Miroplast FC, Rwamagana City FC, Impeesa FC, Espérance Sportive de Kigali, Akagera FC, Nyagatare FC, Amagaju FC, Kirehe FC, Rugende FC, Vision FC, Nyanza FC na Alpha FC.

    ITSINDA B: AS Muhanga, Heroes FC, La Jeunesse FC, United Stars, Intare FA, Giticyinyoni FC, Gasabo United, Interforce FC, Unity SC, University of Rwanda FC, The Winners FTA na ASPOR FC.

    The post Komite Nyobozi ya FERWAFA yemeje ko shampiyona y'ikiciro cya Kabiri mu bagabo 2021-2022 izakinwa mu matsinda abiri aho kuba ane appeared first on RUSHYASHYA.

    Source : https://rushyashya.net/komite-nyobozi-ya-ferwafa-yemeje-ko-shampiyona-yikiciro-cya-kabiri-mu-bagabo-2021-2022-izakinwa-mu-matsinda-abiri-aho-kuba-ane/?utm_source=rss&utm_medium=rss&utm_campaign=komite-nyobozi-ya-ferwafa-yemeje-ko-shampiyona-yikiciro-cya-kabiri-mu-bagabo-2021-2022-izakinwa-mu-matsinda-abiri-aho-kuba-ane

  • Minisitiri Mukeshimana yagaragaje uko ubuhinzi bwagobotse ubukungu bw’ibihugu muri Covid-19 – #rwanda #RwOT

    Yabigarutseho kuri uyu wa Gatanu, tariki ya 22 Ukwakira 2021, ubwo yafunguraga ku mugaragaro Inama y’Inteko Rusange y’Ihuriro ry’Abahinziborozi muri Afurika [Pan-African Farmers Organization, PAFO]. Iyi nama y’iminsi ine iteraniye i Kigali hagati ya tariki 18-23 Ukwakira 2021.

    Minisitiri Mukeshimana yavuze ko n’ubwo icyorezo cya Covid-19 cyashegeshe inzego zirimo n’urw’ubuhinzi, bitarubujije gukomeza kuba inkingi ya mwamba mu bukungu bw’igihugu kuko bwagize uruhare bwa 26% by’umusaruro mbumbe w’igihugu.

    Yagize ati “Abahinzi n’aborozi bagira uruhare ntagereranywa mu iterambere ry’ibihugu ndetse n’imibereho myiza y’abaturage ntabwo yagerwaho tudafite abahinzi. Muri Afurika, ubuhinzi bugira uruhare runini ku bukungu bukaninjiriza abaturage barenga 70%.”

    Ibyoherezwa mu mahanga bikomoka ku buhinzi n’ubworozi byageze kuri 31% mu gihe abagera kuri 70% by’Abanyarwanda bagejeje imyaka yo gukora bafite imirimo ikomoka ku buhinzi.

    Ati “Mu Rwanda, guverinoma yashyize imbaraga nyinshi mu guteza imbere ubuhinzi bugezweho n’ubunyamwuga bw’abahinzi mu ruhererekane rwo kuva ku guhinga kugeza umusaruro ubonetse kugira ngo tugabanye ukubura k’umusaruro, kwangiza ibidukikije n’ibipfa ubusa mu gihe cy’ihinga n’isarura muri uru rwego rw’ubuhinzi.”

    Yavuze ko Minisiteri y’Ubuhinzi n’Ubworozi n’abafatanyabikorwa bayo batangije gahunda ya kane yo kuvugurura ubuhinzi n’ubworozi [PSTA 4], ahitezwe kwimakaza ikoranabuhanga, ubushakashatsi no gukoresha imbuto zigezweho kandi zitanga umusaruro wifuzwa.

    Iyo gahunda yakozwe hagendewe ku bikubiye muri gahunda y’igihugu rusange y’icyerekezo 2050 no muri gahunda y’Igihugu y’Iterambere (NST1), ari zo nyandiko zikubiyemo gahunda z’ingenzi z’igihugu z’igihe kirekire n’iz’ikiringaniye.

    Minisitiri Mukeshimana yavuze ko Guverinoma y’u Rwanda ifite ubushake bwo gukorana na PAFO mu gushyigikira abahinziborozi mu rugamba rwo guharanira kubaka Afurika itarangwamo inzara.

    Perezida wa PAFO, Elizabeth Nsimadala, yavuze ko iyi nteko rusange irebera hamwe uko ubuhinzi bwa Afurika bwabyara inyungu igaragara ku babukora ndetse bukanakomeza gutanga umusanzu mu bukungu bw’ibihugu.

    Ati “Iyi nama ni amahirwe yo guhurira hamwe kugira ngo dusangizanye ubunararibonye, turebera hamwe icyateza imbere ubuhinzi kugira ngo bubyarire inyungu nyinshi ababukora ariko n’ibihugu muri rusange.”

    Abahinzi bitabiriye iyi nama bavuga ko biteze kuyigiramo byinshi bikorwa na bagenzi babo baturuka mu bihugu byo hirya no hino ndetse bakabona n’umwanya wo kuganirira hamwe icyateza imbere abahinzi.

    Umuhinzi w’ibigori n’ibirayi akaba n’umworozi w’amatungo magufi mu Karere ka Musanze, Gafaranga Joseph, ati “Abahinzi nitwe benshi, nitwe tugaburira igihugu, ariko wajya kureba ugasanga benshi ntabwo bafite ubuzima bwiza.”

    Yakomeje agira ati “Tubona umusaruro muke ariko iyo ukurikije amabwiriza atangwa n’inzego zishinzwe ubuhinzi n’ubworozi iyo uyashyize mu bikorwa ubona umusaruro uhagije. Nkanjye nayashyize mu bikorwa mbona toni 33 kuri hegitari. Nyamara abadashyira mu bikorwa ayo mabwiriza usanga babona toni umunani cyangwa esheshatu.”

    Guverinoma y’u Rwanda ifite gahunda yo gukora ishoramari rinini mu bijyanye no kuhira imyaka aho binyuze muri gahunda ya PSTA 4, hateganyijwe kuzamura igipimo cy’ubutaka bwuhirwa kuva kuri hegitari 48.508 kugeza kuri hegitari 102.284.

    Nyuma y’ibyo, kurwanya isuri bizakomeza kwibandwaho hacukurwa amaterasi y’indinganire bikazava kuri hegitari 110.906 bikagera kuri hegitari 142.500 ndetse n’amaterasi yikora buhoro buhoro akava kuri hegitari 923.604 akagera kuri hegitari 1.007.624.

    U Rwanda kandi rufite gahunda yo gushyiraho ingamba zo kubungabunga ubutaka hakoreshejwe uburyo bwa kamere kugira ngo habungabungwe izindi hegitari 150.000 kugeza mu 2024.

    Minisitiri w’Ubuhinzi n’Ubworozi, Mukeshimana Gérardine, yashimangiye ko urwego rw’ubuhinzi rwagize uruhare mu bukungu bw’ibihugu mu bihe bya Covid-19

    Ni inama yitabiriwe n’abafite ibigo by’ubuhinzi bikomeye hirya no hino muri Afurika

    Abakora ubuhinzi n’ubworozi muri Afurika bahuriye i Kigali mu nama yiga ku gukemura ibibazo bigaragara muri uru rwego

    Abitabiriye iyi nama bafashe ifoto y’urwibutso nyuma y’ibiganiro bigaruka ku kubaka urwego rw’ubuhinzi rukomeye muri Afurika

    source : https://ift.tt/3B7Z6Hd