Author: webrwanda

Aya makipe ahora ahanganye yatangiye guhura mu mwaka wa 1995, APR aho amaze guhura inshuro 92 mu mikino ya shampiyona, igikombe cy'Amahoro n'andi marushanwa, akaba yakinaga umukino wa 93 mu mateka.

APR FC kugeza ubu imaze gutsinda imikino myinshi kuko yatsinze 41, naho Rayon Sports itsinda imikino 29 mu gihe banganyije imikino 23, APR FC ikaba yaratsinzemo ibitego 251 naho Rayon Sports yinjiza ibitego 121.

Rayon Sports ifite agahigo ko gutsinda uyu mukino ibitego byinshi aho imaze kuyitsinda inshuro 2 ibitego 5-2.

Umugande Devis Kasirye wakiniye Rayon Sports niwe ufite agahigo ko gutsinda ibitego bitatu mu mukino umwe.

APR FC XI: Ishimwe Pierre, Ombolenga Fitina, Buregeya Prince, Niyomugabo Claude, Karera Hassan, Ruboneka Bosco, Rwabuhihi Placide, Mugisha Gilbert, Manishimwe Djabel, Kwitonda Alain, Bizimana Yannick

Rayon Sports XI: Hategekimana Bonheur, Niyigena Clement, Ndizeye Samuel, Nizigiyimana Karim Mackenzie, Muvandimwe JMV, Nsengiyumva Isaac, Nishimwe Blaise, Muhire Kevin, Rharb Youssef, Essomba Onana, Steven Elumanga

Abafana ni benshi muri Stade ya Kigali, hafiyo gukubita ngo buzure, ku miryango yinjira haracyari benshi cyane bakeneye gukurikira umukino

KURIKIRA UKO UMUKINO WOSE WAGENZE

1′ Umukino uratangiye, utangijwe na Rayon Sports aho Muhire Kevin ahereje umupira Muvandimwe uhise uwusubiza Clement

2′ Mugisha Gilbert agerageje uburyo imbere y’izamu rya Rayon Sports ariko umupira umubana muremure urarenga

3′ Mugisha Gilbert aryamye mu kibuga, akaba akorewe ikosa na Nishimwe Blaise

5′ APR FC itangiranye imbaraga isatira izamu rya Rayon Sports, Ombolenga azamukanye umupira yihuta cyane akaraga umupira imbere y’izamu, Niyigena awukuramo usanga Niyomugabo Claude ahagaze wenyine atera ishoti rikomeye umupira uca hejuru y’izamu

8′ Ombolenga Fitina azamukanye umupira yihuta, awuhinduye imbere y’izamu Niyigena Clement awukuramo

10′ Koruneri ya mbere ya APR FC ihererekanyijwe hagati ya Djabel na Kwitonda Alain ariko ntacyo ivuyemo kuko umupira ugiye hanze

12′ Koruneri ya kabiri ya APR FC zose ziri kuboneka ku ruhande rwa Muvandimwe, Ombolenga ari kunyuraho

13′ Kugeza magingo aya APR FC iri kurusha Rayon Sports gukina neza mu kibuga hagati ndetse no kurema uburyo bw’igitego

16′ Rayon Sports iri kugerageza kwinjira mu mukino ishaka igitego gifungura amazamu

18′ Goooooooallll! Rayon Sports ifunguye amazamu ku gitego gitsinzwe na Essomba Willy Onana uhawe umupira na Rharb Youssef, Onana arawufunga neza acenga umunyezamu Pierre ahita atera mu izamu afungura amazamu

20′ APR FC igiye ku gitutu cyo kwishyura igitego itsinzwe hakiri kare

22′ Essomba Onana ahushije uburyo bw’igitego cya kabiri ku ishoti ateye mu izamu nyuma yo gucenga ubwugarizi bwa APR FC ariko atera agashoti gato

26′ Rharb Youssef wa Rayon Sports aryamye hasi, ari kwitabwaho n’abaganga

28′ Koruneri ya gatatu ya APR FC nyuma y’ishoti ritewe na Djabel bakawukuraho ukajya hanze, gusa ntacyo itanze

29′ Rharb Youssef aryamye hasi ku ikosa rikozwe na Ombolenga Fitina

31′ APR FC yarushije Rayon Sports guhererekanya umupira mu kibuga, iri gushaka aho yamenera kugira ngo yishyure igitego yatsinzwe

32′ Nishimwe Blaise ateye ishoti ashaka gutungura umunyezamu Pierre ariko umupira ujya hanze

33′ Coup Franc nziza ya APR FC ku ikosa rikorewe Kwitonda Alain muri metero 40, ariko Claude ayitera mu rukuta umupira ujya muri koruneri ya kane y’ingabo z’igihugu muri uyu mukino

35′ Claude wa APR FC azamukanye neza umupira yihuta awuhereza Djabel awuteye Clement awukuramo

38′ Goooooal! APR FC yishyuye igitego gitsinzwe na Manishimwe Djabel ku ikosa rikozwe na Nsengiyumva Isaac uhereje umupira abakinnyi ba APR FC mu rubuga rw’amahina

41′ Gooooooal! APR FC ibonye igitego cya kabiri gitsinzwe na Ruboneka Bosco ku mupira wari uturutse kwa Ombolenga Fitina, Bosco ahita atera ishoti rikomeye mu izamu, Bonheur ntiyamenya aho umupira umyuze

45′ Coup Franc ya Rayon Sports itewe na Muhire Kevin, abakinnyi ba APR FC bawushyira muri Koruneri

45’+1′ Umusifuzi Ruzindana yongeyeho umunota umwe

Koruneri ya Rayon Sports itewe na Muvandimwe, umunyezamu Pierre awukuramo, umusifuzi ahuha mu ifirimbi ko igice cya mbere kirangiye

Igice cya kabiri kiratangiye, gitangijwe na APR FC

46′ Igice cya kabiri gitangiranye impinduka ku ruhande rwa Rayon Sports, Muvandimwe JMV asohotse mu kibuga hinjiye Iranzi Jean Claude

48′ Manishimwe Djabe agerageje uburyo bwo gutsinda igitego cya gatatu ku ishoti rikomeye ateye ariko umupira ujya hanze

50′ Muhire Kevin na Onana bakinanye neza bashaka kwinjira mu rubuga rw’amahina rwa APR FC ariko Claude ababera ibamba

51′ Nsengiyumva Isaac ateye ishoti ashaka gutungura umunyezamu Pierre ariko abakinnyi ba APR baritambika bawushyira muri koruneri itagize icyo itanga

55′ Coup Franc ya APR FC ku ikosa Ndizeye Samuel akoreye Ruboneka

57′ Muhire Kevin agerageje ishoti rirerire mu izamu rya APR FC ariko umupira ujya hejuru y’izamu

58′ Umutoza Adil wa APR FC akoze impinduka ebyiri, Mugisha Gilbert ahaye umwanya Byiringiro Lague, Kwitonda Alain asimburwa na Nsanzimfura Keddy
60′ Coup Franc ya Rayon Sports itewe na Blaise ariko umunyezamu Pierre arawufata arawukomeza

61′ Impinduka zindi ku ruhande rwa Rayon Sports, Suleiman Sanogo yinjiye mu kibuga asimbuye Nishimwe Blaise

64′ Steve Elumanga ahushije igitego cyari cyabazwe ku mupira ahawe na Essombe Onana wari umaze gucenga abakinnyi ba APR FC ariko Elumanga awuteye ujya hanze

64′ Impinduka ku ruhande rwa APR FC, Bizimana Yannick asimbuwe na Mugunga Yves

68′ Coup Franc ya Rayon Sports ahagana muri koruneri y’iburyo, hakaba ibumoso ku ruhande rwa APR FC

69′ Iranzi Jean Claude ateye umupira mwiza abakinnyi ba APR FC  barasimbuka bawukuramo usanga Muhire Kevin aho ahagaze ateye ishoti rikomeye umupira ujya hanze

71′ Onana Leandre ahawe ikarita y’umuhondo nyuma yo gukorera ikosa  Djabel ariko ntabyemeranyeho n’umusifuzi

73′ Coup Franc ya APR FC itewe na Keddy ariko umupira ujya hejuru y’izamu

74′ Abafana ba Rayon Sports ntibemeranyije n’icyemezo cy’umusifuzi Nsoro ku ikosa rikorewe Youssef ariko umusifuzi avuga ko nta kosa ryabaye

76′ Rharb Youssef acenze abakinnyi batatu ba APR FC atera ishoti mu izamu ariko umunyezamu Pierre arawufata

78′ Rayon Sports yacuritse ikibuga muri iyi minota irashaka kwishyura

79′ Impinduka ku ruhande rwa APR FC, Manishimwe Djabe ahaye umwanya Anicet

80′ Iranzi Jean Claude ateye ishoti rikomeye mu izamu rya APR FC ku mupira ahawe na Youssef ariko, Iranzi ateye umuzinga umupira uca hejuru y’izamu gato

84′ Coup Franc ya Rayon Sports itewe na Muhire Kevin ariko umupira awutera kure y’izamu

APR FC iri gukora amakosa menshi mu kibuga muri iyi minota ya nyuma

86′ Coup Franc ya Rayon Sports ku ikosa Claude Niyomugabo akoreye Mackenzie

88′ Ndizeye Samuel akoreye ikosa Mugunga Yves mu rubuga rw’amahina ariko umusifuzi Nsoro avuga ko nta kosa ryabaye

90′ Ikarita y’umuhondo ihawe Iranzi Jean Claude ku ikosa akoreye Anicet washakaga igitego cya gatatu, ni coup Franc ya APR FC

90’+3′ Umusifuzi yongeyeho iminota itatu kugira ngo umukino urangire

Rayon Sports yacanye umuriro imbere y’izamu rya APR FC, itera amashoti ane mu izamu rya Pierre, amwe akurwamo n’amaguru y’abakinnyi birangira umupira ugiye hanze

Umukino waberaga kuri Stade ya Kigali, urangiye APR FC yegukanye amanota atatu nyuma yo gutsinda Rayon Sports ibitego 2-1, mu mukino w’abakeba bakomeye bo mu Rwanda.

APR FC ikomeje gushimangira imyaka itatu idatsindwa muri shampiyona y’u Rwanda ari nako yuzuza imikino itatu yikurikiranya itsinda Rayon Sports

Ubu bushakashatsi ku gipimo cy’imiterere y’itangazamakuru mu Rwanda, Rwanda Media Barometer, bukorwa buri myaka ibiri, ubwamuritswe hari ku nshuro ya kane.

Ubwisanzure bw’Itangazamakuru (Media Freedom) buri ku ijanisha rya 93,7% naho kuvuga icyo ushaka mu Rwanda biri ku kigereranyo cya 86,4%.

Indi mibare igaragaza ko ibijyanye n’amategeko agenga itangazamakuru na politiki yaryo biri ku gipimo cya 91%, kubona amakuru biri kuri 94,7%, uburenganzira bwo guhitamo umurongo w’igitangazamakuru no kuwubahiriza biri ku kigereranyo cya 87% naho kurinda uwatanze amakuru biri ku kigereranyo cya 93,3%.

Nyamara Urwego rw’Igihugu rw’Imiyoborere (RGB) runakora ubu bushakashatsi rugaragaza ko abaturage batekereza ko kuvuga icyo ushaka biri ku kigereranyo cya 70.1%, naho kwigenga kw’itangazamakuru bakabiha inota rya 68,7% barebye ko mu myaka 2 ishije itangazamakuru hari amakuru ritatinye gutangaza.

Ubushakashatsi bugaragaza ko Abanyarwanda benshi ku kigereranyo cya 85% bemeza ko Itangazamakuru ari inzira ikomeza Imiyoborere myiza ndetse na Demokarasi, gusa itangazamakuru ryo mu Rwanda ubushakashatsi bwa RGB bugaragaza ko ryagwingiye mu bijyanye n’iterambere no kubaka ubushobozi bw’abarikoramo kuko ni yo nkingi ifite amanota yo hasi 62,4%.

Mu myaka hafi itatu ishize, imibare ya 2021 ya Rwanda Media Barometer (RMB) igaragaza ko Itangazamakuru ryazamutse cyane n’ubwo habayeho icyorezo cya COVID-19 cyatangiye muri 2020, kuko muri 2018 Ubwisanzure bwo kuvuga icyo ushaka (Freedom of expression) bwari ku inota rya 90.8%, naho ubwisanzure bw’Itangazamakuru bwari kuri 77.1%.

Nubwo RGB igaragaza ko itangazamakuru ryateye imbere imiryango mpuzamahanga ikunze gushyira u Rwanda mu bihugu bitarimo ubwisanzure bw’Itangazamakuru, ndetse n’ubwo kuvuga icyo umuntu ashaka.

Ubushakashatsi bw’Umuryango w’Abanyamakuru batagira imipaka (Reporters Without Borders) bwakozwe muri 2021 mu bihugu 180, u Rwanda ruri ku mwanya wa 156 mu gihe ibihugu bya mbere bitatu mu kugira Itangazamakuru ryigenga ari Norvege, Finlinad na Sweden.

Ni ubutumwa yatanze kuri uyu wa Kabiri, tariki ya 23 Ugushyingo 2021, mu Nama ya 21 y’Abakuru b’Ibihugu bigize Umuryango w’Isoko Rusange ry’Ibihugu bya Afurika y’Iburasirazuba n’Amajyepfo (COMESA).

Iyi nama iri kubera mu Mujyi wa Cairo mu Misiri yitabiriwe n’abakuru b’ibihugu bamwe, abandi bayikurikirana hifashishijwe ikoranabuhanga. Yabaye nyuma y’imyaka itatu idaterana kuko iheruka yabereye mu Mujyi wa Lusaka muri Zambia muri Nyakanga 2018.

Yibanze ku ikoreshwa ry’ikoranabuhanga mu kwihuza kw’akarere no kureba imiterere y’icyorezo cya COVID-19.

Perezida Kagame yavuze ko COMESA itigeze iteshuka ku ntego yayo mu gihe cya COVID-19 ndetse yakomeje gushyira mu bikorwa gahunda y’imishinga y’ubucuruzi itandukanye.

Mu mwaka ushize ni bwo abaminisitiri bo mu Ihuriro rigize COMESA bemeje ishyirwaho ry’ikoranabuhanga ryifashishwa mu bucuruzi.

Yagize ati 'Mu gihe iyi ari intambwe ya mbere mu gukora ubucuruzi buhuriweho hifashishijwe ikoranabuhanga, imbaraga zacu ntizikwiye kurangirira hano. Dukeneye guharanira ko abaturage bacu babona ibi bikoresho.”

Perezida Kagame yavuze ko hakenewe imikoranire hagati y’ibihugu kugira ngo abaturage babiboneremo umusaruro.

Ati 'Icya mbere, tugomba gushyira imbaraga mu kuzamura umubare w’abakoresha ikoranabuhanga. Mu Rwanda twashyize imbere kubaka ubukungu bushingiye ku ikoranabuhanga ndetse dushaka ko abaturage bangana na 60% bazaba barikoresha mu 2024.”

Umukuru w’Igihugu yavuze ko imbaraga zihuriweho n’ibihugu byo muri COMESA zishobora kugira uruhare mu guhuza no kunoza imikorere y’ikoranabuhanga muri Afurika.

Ati 'Icya kabiri, dukeneye gushyira mu bikorwa politiki igenga COMESA ituma habaho kwishyurana byoroshye, binyuze mu mucyo kandi bitekanye mu bucuruzi bwambukiranya imipaka burimo ubw’ibigo bito n’ibiciriritse.”

'Ibigo biyobowe n’urubyiruko bifite uruhare runini mu ishoramari ry’umugabane wacu ndetse ntidushobora kubasiga ku ruhande.”

Yakomeje ati 'Icya nyuma, ukwihuza kwa Afurika kuzagerwaho binyuze mu guharanira gukorera mu mucyo mu nzira y’iterambere.”

Mu gushyigikira urubyiruko guhanga imirimo, Banki Nyafurika Itsura Amajyambere yatangije gahunda yayo izafasha guhanga imirimo miliyoni 25 no kongerera ubushobozi urubyiruko rurenga miliyoni 50 mu myaka icumi iri imbere.

Iyi nama yaherukaga kubera mu Misiri mu 2001. Iy’uyu mwaka yahawe insanganyamatsiko igaruka ku 'Gukoresha ikoranabuhanga mu kubaka ubukungu budaheza.”

Yanabereyemo ihererekanyabubasha aho Perezida wa Misiri, Abdel Fattah El-Sisi yahawe inshingano zari zifitwe na Andry Rajoelina wa Madagascar.

Isoko rwa COMESA ryashinzwe ku wa 8 Ukuboza 1994 rigizwe n’abanyamuryango 19, u Rwanda rukaba rwarinjiyemo mu 2004. Ni rimwe mu masoko magari afatiye runini ubukungu bw’umugabane wa Afurika. Uyu muryango ufite abaturage miliyoni 583, umusaruro mbumbe wawo ubarirwa muri miliyari 805$ mu gihe agaciro k’ubucuruzi hagati y’ibihugu biwugize kangana na miliyari 324$.

COMESA igizwe n’ibihugu 21 birimo u Burundi, Comoros, Repubulika Iharanira Demokarasi ya Congo, Djibouti, Misiri, Eritrea, Eswatini, Ethiopia, Kenya, Libya, Madagascar, Malawi, Mauritius, u Rwanda, Seychelles, Somalia, Sudani, Tunisia, Uganda, Zambia na Zimbabwe.