Author: webrwanda

Uyu muhango wo gusezerana imbere y’Imana wabereye mu rusengero rwa Evangelical Restoration Church (ERC) i Masoro aho basezeranyijwe n’umugore wa Apôtre Ndagijimana Joshua Masasu , Pasiteri Lydia Masasu.

Mu bahazni baririmbye muri ubu bukwe, barimo Gaby Kamanzi na Simon Kabera mu gihe Patient Bizimana na we yaririmbiye umugeni we.

Umuhano wo gusezerana wabimburiwe n’indi mihango yo gusaba no gukwa yabaye mu gitondo cyo kuri iki Cyumweru yabereye muri Romantic Garden ku Gisozi mu Mujyi wa Kigali.

Photos : Igihe

UKWEZI.RW

Hategekimana Joseph w’imyaka 36 na Uwimana Francois bakurikiranweho gukoresha ubutumwa buhimbano bugaragaza ko bipimishije icyorezo cya COVID-19, afatiwe mu mihango yo gusaba no gukwa mu bukwe bwa Uwimana bwari bwaberereye mu Murenge wa Ntyazo Akagari ka Katarara, Umudugudu wa Gasharu.

Umuvugizi wa Polisi mu Ntara y’Amajyepfo, Superintendent of Police (SP) Theobald Kanamugire yavuze ko bariya bantu bafashwe mu bikorwa bisanzwe bya Polisi byo kugenzura iyubahirizwa ry’amabwiriza yo kurwanya COVID-19.

Yagize ati “Abapolisi bari mu kazi bisanzwe bagenzura iyubahirizwa ry’amabwiriza yo kurwanya COVID-19 baza kugera mu kagari ka Katarara bahasanga abantu benshi bari mu bukwe bwo gusaba no gukwa. Bagenzuye ibyangombwa by’abo bantu bari batashye ubukwe, baje gusanga ibyangombwa by’umusangiza w’amagambo ariwe Hategekimana Joseph afite ubutumwa buhimbano bugaragaza ko nta bwandu bwa COVID-19 yanduye (Negative). Byaje kugaragara ko ubwo butumwa atari umwimerere w’ikigo cy’Igihugu cy’ubuzima (RBC),ako kanya yahise afatwa.”

Hategekimana amaze gufatwa yavuze ko ubwo butumwa yabwohererejwe n’uwarongoye ariwe Uwimana.

SP Kanamugire yibukije abantu ko COVID-19 itarangiye bityo bagomba kubahiriza amabwiriza yose uko yakabaye, yabasabye kwirinda kunyura mu nzira zose zibaganisha mu byaha harimo kuriya guhimba ubutumwa bugaragaza ko uri muzima nyamara utaripimishije.

Abafashwe bahise bashyikirizwa Urwego rushinzwe ubugenzacyaha (RIB) rukorera muri sitasiyo ya Polisi ya Ntyazo kugira ngo bakurikiranwe mu mategeko.

Uwimana Francois

Hategekimana Joseph

Aya mabwiriza yatangajwe akurikira andi yari yatangajwe ku wa Gatanu tariki ya 17 Ukuboza 2021. Aha umwihariko Umujyi wa Kigali nk’ukomeje kugaragaramo ubwandu bwinshi bwa Covid-19.

Itangazo ryaturutse mu Biro bya Minisitiri w’Intebe rivuga ko muri Kigali mu mihango y’ubukwe kwiyakira bibujijwe. Ni mu gihe kandi ishyingirwa rikorewe imbere y’ubuyobozi, mu nsengero no gusaba ritagomba kurenza abantu 40.

Mu gihe kandi dusatira iminsi mikuru isoza umwaka, 'ibirori no kwiyakira' bijyanye nayo nabyo byahagaritswe.

Imodoka zitwara abantu mu buryo bwa rusange zizakomeza gukora kandi zitware abantu 100% bicaye gusa amadirishya agomba kuba afunguye kugira ngo hinjiremo umwuka.

Ku bagenzi bajya n’abava mu Mujyi wa Kigali, abemerewe kugenda mu modoka rusange ni abikingije Covid-19 gusa.

Utubari two tuzakomeza gufungura mu byiciro hubahirizwa amabwiriza yo kwirinda Covid-19 ariko tutakira abarenze 50% by’ubushobozi bw’aho dukorera. Iri tangazo rikomeza rigira riti 'Tugomba gufunga saa mbili z’ijoro kandi abakiliya bagomba kuba barikingije Covid-19 byuzuye'.

Mu nsengero, ho imihango yose ihabera igomba kwitabirwa n’abantu batarenze 30% by’ubushobozi bw’izo nsengero bwo kwakira abantu. Abitabira amateraniro bagomba kuba barikingije Covid-19 mu buryo bwuzuye'.

Umutoza w’agateganyo wa Rayon Sports, Lomami Marcel yinginze abafana b’iyi kipe abasaba kugaruka ku kibuga gufasha ikipe yabo bakayiba hafi kuko kuyitererana atari wo muti, abasezeranya ko n’umukino ukurikira bazawutsinda.

Bigendanye n’umusaruro iyi kipe yarimo itanga muri iyi minsi, abafana ba Rayon Sports bari baracitse intege zo kuza ku kibuga gushyigikira ikipe yabo kugira ngo yegukane intsinzi.

Kuva iyi kipe yatsindwa na Kiyovu Sports muri shampiyona, nibwo abafana batangiye kubura ku kibuga, umukino banganyijemo na Gorilla FC ndetse n’uwo baheruka gutsinda AS Kigali, abafana ubwitabire bwabo bwari ku rwego rwo hasi.

Nyuma yo gutsinda ikipe ya AS Kigali, umutoza Lomami Marcel yasabye abafana b’iyi kipe kugaruka gushyigikira ikipe yabo kuko kubireka atari wo muti w’ikibazo, abizeza ko abakinnyi bameze neza bagiye kujya babaha ibyishimo.

Ati 'Abakinnyi bacu bakunda intsinzi, wabonye ko twamaze gutsinda ibitego 2 bagatangira kudutera ingabo mu bitugu, yego uyu munsi kimwe no mu mukino uheruka ntabwo babonetse, icyo nasaba abafana bacu ni uko bagaruka ku kibuga.'

'Ikipe ni iyacu, ni iyabo kuko kureka kuza ku kibuga si wo mwanzuro icyiza ni uko bagaruka bagatera ingabo mu bitugu abakinnyi bacu, yego twatsinze harimo abafana na bo turabashimira, nibagaruke ku kibuga ibyishimo byatangiye kuza, n’imikino itaha bazajya bataha bishimye.'

Yakomeje avuga ko badakwiye kwiheba kuko igihe umuntu agihumeka ibintu biba bigishoboka, abasezeranya ko n’umukino wa Police FC bazatahana ibyishimo.

Ati 'Buriya umuntu ntazajye yiheba mu buzima, buriya iyo Imana iguha guhumeka, ukaba ureba, ukaba uvuga, icyo nasaba abafana bacu baze ku kibuga, ntibagire ikibazo, abakinnyi bameze neza, abayobozi bari hafi y’ikipe, nibaze ari benshi umukino wa Police FC tuzabashimisha nk’uko twabashimishije.'

Ku wa Gatatu tariki ya 23 Ukuboza, Rayon ikaba izakina na Police FC mu mukino w’umunsi wa 10 wa shampiyona y’icyiciro cya mbere mu Rwanda umwaka w’imikino 2021-22, ni umukino yijeje abakunzi b’iyi kipe ko bazatahukana intsinzi.

Lomami Marcel arasaba abafana kugaruka ku kibuga mu gihe amabawiriza mashya ya Coroavirus yasohowe na Minisiteri ya Siporo, avuga ko guhera uyu munsi ku wa Mbere tariki ya 20 Ukuboza 2021 nta mufana wemewe kuza gufana.

Abafana ba Rayon Sports bari bamaze iminsi baradohotse baza ari bake

Lomami Marcel yabasezeranyije ko n’umukino utaha bazawutsinda

Ubukwe bw’umukinnyi w’umunyarwanda ukinira KMSK Deinze mu Bubiligi, Djihad Bizimana yagombaga gukorera mu Rwanda bwasubitswe kubera icyorezo cya Coronavirus.

Tariki ya 15 Gicurasi nibwo imihango ya mbere y’ubu bukwe yabaye, ikaba yarabereye mu Bubiligi mu mujyi wa Anvers aho bose baba.

Dalda Simbi na Djihad Bizimana basezeranye imbere y’idini ya Islam (Kufunga Ndoa) bizwi nka “Nikkah” mu rurimi rw’Icyarabu.

Indi mihango yose y’ubukwe yari iteganyijwe kuzabera mu Rwanda, aho uyu mukinnyi ukina mu kibuga hagati yagombaga kuza mu Rwanda azanye umugeni akamwereka inshuti n’abavandimwe.

Ubu bukwe bwari buteganyijwe tariki ya 27 na 29 Ukuboza 2021, bamaze gusohora itangazo ribusubika.

Bagize bati “Bitewe n’ibihe bitunguranye, ubukwe bwa Dalda na Djihad bwagombaga kuba tariki ya 27 na 29 Ukuboza bwimiriwe ku yandi matariki. Dusabye imbabazi ku ngorane ibi bishobora guteza, twizeye ko tuzishimana mu bukwe bwacu mu minsi iri imbere.”

Bafashe umwanzuro nyuma y’uko amabwiriza mashya ya Coronavirus avuga ko mu bukwe abantu batagomba kurenga 75, ariko ubu bageze kuri 40, ni mu gihe uyu mukinnyi we yifuzaga abantu benshi.

Mu ntangiriro za Werurwe uyu mwaka nibwo Djihad Bizimana yashinze ivi hasi maze asaba Simbi kuza mubera umugore, undi arabyemera amwambika impeta ya fiançailles.

Mu minsi ishize, Djihad Bizimana yabwiye ISIMBI ko uyu mukobwa bamenyanye mbere gato y’uko ajya gukina mu Bubiligi ubu bamaranye imyaka 3.

Ati”umukunzi wanjye tumaranye imyaka irenga 3, twamenyanye mbere gato y’uko nza mu Bubiligi, kandi abantu baba hafi yanjye basanzwe bamuzi, basanzwe bamuzi.”

Ku kijyanye n’icyo yamukundiye, yavuze ko mu rukundo umuntu agenda areba utuntu twinshi kandi akaba ari umusore udakundanye bwa mbere hari byinshi yanyuzemo, Dalida rero akaba yarasanze bahuje byinshi.

Ubukwe bwa Bizimana Djihad bwasubitswe

Tariki 18 Ukuboza 2021, nibwo ibinyamakuru bitandukanye byatangiye gutangaza amakuru ya Karidinali Peter Turkson, bamwe babonaga ko ari umukandida wazaba Papa wa mbere w'umunyafurika, yatanze icyifuzo cyo kwegura ku ishami rikuru rya Vatikani, nk’uko Reuters ibivuga.

Uyu musaza w'imyaka 73 y'amavuko akomoka muri Ghana. Yabaye umujyanama w'ibanze wa Papa Francis  ku bijyanye n''imihindagurikire y'ikirere n'ubutabera, akaba kandi n'umunyafurika rukumbi  wayoboraga ishami rya Vatikani.

Karidinali Peter Turkson ishami  rya Dicastery for Integral Human Development akoramo, rikubiyemo ibintu bine  birimo amahoro, ubutabera, abimukira, n'abagiraneza nk'uko amakuru aturuka muri Vatikani abivuga. Amakuru akomeza ashimangira ko icyatumye Karidinali Peter asaba kwegura ku mirimo ye ahanini ni ibitari kugenda neza mu miyoborere ya Vatican.

Ubwegure bwa Karidinali Peter ntabwo Papa Francis arabushyiraho umukono. Ibi bije nyuma y'aho mu minsi ishize Musenyeri w'umupadiri mukuru w' i Paris, Michel Aupetit  yeguye kubera atareka kugirana ubushuti n'umugore bakundanye imyaka isaga 10. 

Nyuma y’amabwiriza yo gukumira ubwiyongere bw’icyorezo cya Covid-19 yatangajwe kuwa Gatanu tariki 17 Ukuboza 2021, hashingiwe ku isesengura ry’Inzego z’Ubuzima, Guverinoma yavuguruye ayo mabwiriza hagamijwe kurushaho gukumira ikwirakwira ry’iki cyorezo, cyane cyane muri iki gihe cy’iminsi mikuru yo mu mpera z’umwaka.

Itangazo ryateweho umukono na Minisitiri w’Intebe Dr. Edouard Ngirente, rivuga ko izi ngamba zigomba guhita zishyirwa mu bikorwa uhereye kuwa Mbere tariki 20 Ukuboza 2021, zikazamara ibyumweru bitatu, ariko zikaba zishobora kongera kuvugururwa igihe cyose bibaye ngombwa hashingiwe ku isesengura y’Inzego z’Ubuzima. Ni ingamba ziganjemo izatagajwe kuwa Gatanu ushize, gusa harimo ingingo nke zagiye zivugururwa.

Iri tangazo riributsa abantu bose ko “Ingendo zirabujijwe guhera saa yine z’ijoro (10:00Pm) kugeza saa kumi za mu gitondo (4:00AM). Ibikorwa byemerewe gukomeza gukora bizajya bifunga saa tatu z’ijoro (09:00Pm). Ibi bizakurikizwa mu gihugu hose”.

INGAMBA ZIZUBAHIRIZWA MU MUJYI WA KIGALI:

-Imihango y’ubukwe: Kwiyakira bijyanye n’ubukwe (Wedding related receptions) birabujijwe. Imihango y’ubukwe harimo gusaba, ishyingirwa rikorewe imbere y’ubuyobozi bwa Leta n’irikorewe mu nsengero ntibigomba kwitabirwa n’abantu barenze 40. Imihango y’ubukwe ibereye mu rugo ntigomba kwitabirwa n’abantu barenze 20. Abateguye iyo mihango bagomba kubimenyesha Ubuyobozi bw’inzego z’ibanze iminsi 7 mbere y’uko iba. Abitabiriye ibyo bikorwa bagomba kwerekana ko bikingije mu buryo bwuzuye kandi bipimishije Covid-19 mu masaha 24 mbere y’uko biba. Aho bishoboka, amakoraniro yose agomba kubera hanze cyangwa ahantu hagera umwuka uhagije.

-Ibirori no kwiyakira bijyanye n’Iminsi Mikuru byose birabujijwe.

-Ingendo mu modoka zitwara abantu mu buryo bwa rusange zizakomeza, Bisi zizajya zitwara abantu bicaye gusa bangana na 100% by’umubare w’abantu zagenewe gutwara. Amadirishya agomba kuba afunguye kugira ngo imodoka zinjiremo umwuka uhagije. Ibi bizakurikizwa mu gihugu hose.

-Abatwara imodoka rusange zitwara abagenzi bajya n’abava mu Mujyi wa Kigali barasabwa gutwara gusa abagenzi bikinjije Covid-19.

-Utubari: Tuzakomeza gufungura mu byiciro hubahirizwa amabwiriza yo kwirinda Covid-19, ariko tukakira abatarenze 50% by’ubushobozi bw’aho twakirira abantu. Utubari tugomba gufunga saa mbiri z’ijoro (8:00PM). Abakiriya bagomba kuba barikingije Covid-19 mu buryo bwuzuye.

Insengero: Imihango yose ibera mu nsengero igomba kwitabirwa n’abantu batarenze 30% by’ubushobozi bw’izo nsengero bwo kwakira abantu. Abitabira amateraniro bagomba kuba barikingije Covid-19 mu buryo bwuzuye.

INGAMBA ZIZAKURIKIRWA MU GIHUGU HOSE:

-Abagenzi bose binjira mu gihugu bagomba guhita bashyirwa mu kato k’iminsi 3 muri hoteli zabugenewe kandi bakiyishyurira ikiguzi cya serivisi bahabwa. Abagenzi bose bapimwa Covid-19 (PCR Test) bakigera mu gihugu, bakongera gupimwa ku munsi wa 3 n’uwa 7, biyishyuriye ahanu hagenewe gupimirwa Covid-19. RDB izatanga amabwiriza yihariye ajyanye n’ubukerarugendo.

-Abagenzi bose binjira n’abasohoka mu gihugu bakoresheje Ikibuga Mpuzamahanga cya Kigali bagomba kuba bafite icyemezo cy’uko bipimishije covid-19 (PCR Test) mu gihe cy’amasaha 72 mbere y’uko bahaguruka, kandi bakubahiriza amabwiriza y’inzego z’ubuzima yo kwirinda Covid-19.

-Ibikorwa by’ubukerarugendo bizakomeza hubahirizwa amabwiriza yo kwirinda Covid-19. Muri ibyo bikorwa harimo amahoteli, abashinzwe kuyobora ba mukerarugendo (Tour operators) na serivisi zo gutwara ba mukerarugendo.

-Abakozi b’inzego za Leta bazakorera mu rugo, uretse abakora akazi kabasaba guhura n’abasaba serivisi, ariko ntibarenge 30% by’abakozi bose.

-Ibiro by’inzego z’abikorera bizakomeza, ariko buri rwego rurasabwa gukoresha abakozi batarenze 50% by’abakozi bose, kandi bakubahiriza amabwiriza yo kwirinda Covid-19.

-Abafite ibikorwa by’ubucuruzi mu gihugu hose bagomba gukora ku buryo abakozi babo bose baba barikingije Covid-19 mu buryo bwuzuye. Minisiteri y’Ubuzima ishobora gufunga by’agateganyo inyubako zaba iza Leta cyangwa iz’Abikorera mu gihe bigaragaye ko habonetsemo umubare munini w’abanduye Covid-19.

-Inama zikorwa imbonankubone zizakomeza. Umubare w’abitabira inama ntugomba kurenga 50% by’ubushobozi bwo kwakira abantu bw’aho bateranira. Abitabiriye inama bose bagomba kuba barikingije byuzuye kandi bakagaragaza ko bipimishije Covid-19 mu masaha 24 mbere y’uko inama iterana.

-Uretse mu mujyi wa Kigali, imihango yose ibera mu nsengero igomba kwitabirwa n’abantu batarenze 50% by’ubushobozi bw’izo nsengero bwo kwakira abantu. Mu Mujyi wa Kigali ndetse n’Imijyi yunganira Umujyi wa Kigali, abitabira amateraniro bagomba kuba barikingije Covid-19 mu buryo bwuzuye.

-Uretse mu mujyi wa Kigali, imihango y’ubukwe harimo gusaba, ishyingirwa rikorewe imbere y’ubuyobozi bwa Leta n’irikorewe mu nsengero no kwiyakira bijyanye n’ubukwe ndetse n’andi makoraniro ntibigomba kwitabirwa n’abantu barenze 75. Ibirori bibera mu ngo ntibigomba kwitabirwa n’abantu barenze 20. Abateguye ibyo birori bagomba kubimenyesha Ubuyobozi bw’Inzego z’ibanze iminsi 7 mbere y’uko biba. 

Abitabiriye ibyo birori bagomba kwerekana ko bikingije mu buryo bwuzuye kandi bipimishije Covid-19 mu masaha 24 mbere y’uko biba. Aho bishoboka, amakoraniro yose agomba kubera hanze cyangwa ahantu hagera umwuka uhagije. Abategura ibyo bikorwa bagomba gukurikirana iyubahirizwa ry’aya mabwiriza, abatazabyubahiriza bazafatirwa ibihano. Amabwiriza arambuye kuri iyi ngingo azatangwa na Minisiteri y’Ubutegetsi bw’Igihugu.

-Ibitaramo by’umuziki, kubyina na konseri (Night clubs/live bands/karaoke and concerts) n’ibindi bitaramo by’imyidagaduro bibereye ahandi hose bibaye bihagaritswe.

– Resitora zizakomeza kwakira abakiriya ariko ntizirenze 50% by’ubushobozi bwazo bwo kwakira abantu. Resitora zakira abakiriya bicaye hanze zemerewe kwakira 75% by’ubushobozi bwazo bwo kwakira abantu. Abakiriya bagomba kuba bicaye kandi bagahana intera. Mu Mujyi wa Kigali ndetse n’Imijyi yunganira Umujyi wa Kigali, abakiriya bagomba kuba barikingije Covid-19 mu buryo bwuzuye.

-Utubari tuzakomeza gufungura mu byiciro mu gihugu hose, ariko tukakira abatarenze 50% bw’ubushobozi bw’aho twakirira abantu hubahirizwa amabwiriza yo kwirinda Covid-19. Mu Mujyi wa Kigali ndetse n’Imijyi yunganira Umujyi wa Kigali, abakiriya bagomba kuba barikingije Covid-19 mu buryo bwuzuye.

-Moto n’amagare byemerewe gukomeza gutwara abagenzi. Abatwara moto n’amagare barasabwa kubahiriza amabwiriza yo kwirinda Covid-19.

-Ibikorwa bya siporo y’umuntu ku giti cye n’izikorerwa hanze abantu bategeranye bizakomeza.

-Ibigo bikorerwamo imyitozo ngororamubiri (Gyms and Fitness centers) bizakomeza gufungura mu byiciro. Abitabira siporo ikorewe mu nzu bagomba barikingije Covid-19 mu buryo bwuzuye (uretse abari munsi y’imyaka 18) kandi berekanye ko bipimishije Covid-19 mu gihe cy’amasaha 24 mbere yo kubyitabira.

-Koga muri za pisine (Swimming pools), abakorerwa Sauna na massage bizakomeza gufungura mu byiciro. Abitabira ibyo bikorwa bagomba kuba barikingije Covid-19 mu buryo bwuzuye (Uretse abari munsi y’imyaka 18), kandi berekanye ko bipimishije Covid-19 mu gihe cy’amasaha 24 mbere yo kubyitabira nk’uko bikubiye mu mabwiriza ya RDB.

-Umubare w’abitabira ikiriyo ntugomba kurenza abantu 20 icyarimwe. Imihango yo gushyingura ntigomba kurenza abantu 50. Abitabiriye iyo mihango bagomba kugaragaza ko bipimishije Covid-19 mu gihe cy’amasaha 24.

-Ibikorwa by’imikino y’amahirwe bizakomeza gufungura mu byiciro hashingiwe ku mabwiriza yatanzwe na Minisiteri y’Ubucuruzi n’Inganda,

-Abanyarwanda n’Abaturarwanda bose barashishikarizwa kwikingiza byuzuye, kwipimisha kenshi, kandi barakangurirwa gukorera mu rugo bifashishije ikoranabuhanga igihe cyose bishoboka no kurushaho kubahiriza amabwiriza yo kwirinda Covid-19. Abatazabyubahiriza bazafatirwa ibihano.

Itangazo ryavuye mu Biro bya Minisitiri w’Intebe kuri iki Cyumweru