Author: webrwanda

Amezi atatu yari ashize uyu muhanzi w'i Gatsibo mu Burasirazuba adasohora indirimbo ku mpamvu avuga ko yari ahugiye muri byinshi bijyanye n'umuziki birimo no gutegura iyi ndirimbo yitezeho kongera kubanisha neza abashakanye.

Yayanditse muri uyu mwaka, ayifatira amashusho kuva mu Ukwakira 2022, yanzura kuyishyira hanze kuri uyu wa Kane tariki 10 Ugushyingo 2022.

Ni indirimbo igaragaramo inkumi zitigisa ikibuno, n'abandi barimo n'umukinnyi wa filime Uwihoreye Moustapha wamamaye nka Ndimbati muri filime Papa Sava.

Si ubwa mbere Ndimbati agaragaye mu ndirimbo za Nsengiyumva kuko yabaye umukinnyi w'imena mu ndirimbo z'uyu mugabo zirimo na 'Isubireho'.

Birashoboka ko ariyo ndirimbo ya mbere agaragayemo nyuma yo gutsinda urubanza rwatumye amara amezi atandatu afungiye i Mageragere.

Nsengiyumva cyangwa se Igisupusupu yabwiye InyaRwanda ko yifashishije Ndimbati muri iyi ndirimbo kubera ko ari 'umusitari' kandi 'abantu baramukunda'.

Yavuze ko Ndimbati ari umukinnyi w'umuhanga, ku buryo yumva nawe igihe kimwe azakina filime.

Uyu muririmbyi wanyuze mu bitaramo birimo Iwacu Muzika Festival, agasangira urubyiniro na Diamond, avuga ko yanditse iyi ndirimbo ‘Nyemerera’ kugira ngo akebure abagabo baca inyuma abagore babo.

Ati 'Ubutumwa nashatse gutanga tugomba kubireka. Umugore wawe ukumva ko ari umugore wawe. Ariya maso ntagushuke. Ushobora kubona umugore (w’undi) ukavuga uti uriya mugore ni mwiza, nyuma ukajya (yo) kubera umutima w'abagabo (Kujya gushaka ubushuti kuri uwo mugore wabonye), ubwo icyo gihe uba uhemukiye umugore.'

Avuga ko igihe gikwiye kugera cy'aho umugabo yumva ko n'ubwo yirukanse muri ibyo byose akwiye kuzibukira agakomeza kubaka urugo rwe.

Muri iyi ndirimbo, hagaragaramo umugabo winginga umugore amubwira ko adakwiye kumusiga mu buriri mu gihe gito bari bamaranye bakora iby'abashakanye.

Nsengiyumva avuga ko aha yumvikanishaga ko guca inyuma umugore, bifite ibindi bigendana nabyo birimo nk'amafaranga, aho umugore wagiye kureba ashobora kugufata uko yishakiye.

Uyu muhanzi yaherukaga gusohora indirimbo 'Turi mu munyenga', akavuga ko atatinze gusohora indi ashingiye ku gihe iyi yari imaze.

Kuri we, yagarutse yemye mu muziki. Ati 'Ubwire abafana ko naje nje, noneho tukanyeganyeza umuziki, twishime dore akavura (imvura) kabonetse. Turaje tunyeganyege.' 

Mu buryo bw’amashusho (Video), iyi ndirimbo yakozwe na Fayzo Pro, naho amajwi (Audio) yakozwe na Jay P.

Nsengiyumva ntiyerura imvano y'iyi ndirimbo, ariko avuga ko 'mu buzima bw'umuntu habamo byinshi' 

Nsengiyumva yavuze ko yiteguye kongera kubyinana n'abafana be nyuma y'amezi atatu yari ashize ategura iyi ndirimbo 

Nsengiyumva yavuze ko nta mugabo wari ukwiye guca inyuma umugore we, ahubwo akwiye guharanira kugira urugwiro rwiza  

Nsengiyumva na bamwe mu bakobwa bagaragara muri iyi ndirimbo ye nshya yise 'Nyemerera'- Barabyina ubundi bakamwikiriza

KANDA HANO UREBE AMASHUSHO Y’INDIRIMBO ‘NYEMERERA’ YA NSENGIYUMVA

“>

Umukuru w’Igihugu yabigarutseho mu kiganiro we na Minisitiri w’Intebe wa Barbados, Mia Amor Mottley, watangiye uruzinduko rwe rw’akazi mu Rwanda bagiranye n’itangazamakuru.

Uruzinduko rwa Minisitiri w’Intebe wa Barbados mu Rwanda rubaye rukurikira urwo Perezida Kagame yagiriye muri iki gihugu muri Mata uyu mwaka.

Minisitiri w’Intebe wa Barbados, Mia Amor Mottley, yavuze ko umubano w’igihugu cye n’u Rwanda uri ku muvuduko mwinshi nk’uwa Usain Bolt ariko ko we na mugenzi we w’u Rwanda bifuza ko ukomeza kuzamuka kurushaho.

Mottley yavuze ko ibihugu bito nk’icye n’u Rwanda bifite umwihariko wo kumva abaturage ndetse bikarangwa n’ubumuntu mu bikorwa bya buri munsi.

Ati 'Ni yo mpamvu yaba mu bijyanye n’imihindagurikire y’ibihe, mu mavugurura mu by’ubukungu, mu bijyanye n’imibanire mpuzamahanga, ikiba kigamijwe ari ukugeza abaturage bacu ku rundi rwego rw’iterambere. Gusa ikibabaje ni uko duhura n’ingaruka z’ubukoloni mu buryo bumwe, izijyanye n’imihindagurikire y’ibihe, indwara zandura […] ariko kuko twifitemo ubumuntu, tubasha guhangana nabyo.'

Mottley yavuze kandi ko hari andi mahirwe ari mu kuba ibihugu bimwe ari bito, atuma bisubiza ugushaka kw’abaturage babyo, ibintu bigorana mu bihugu binini.

Yatanze urugero kuri Leta Zunze Ubumwe za Amerika, avuga uburyo mu matora y’Abagize Inteko Ishinga Amategeko ari kuba muri iki gihe, hari impinduka abaturage bifuza ariko ntizigerweho kubera imiterere ya politiki y’ibihugu.

Yagaragaje kandi ko ikoranabuhanga ryakuyeho ubunini cyangwa ubuto kuko iterambere rigera kuri bose, ku buryo ibihugu bito nabyo biri gutera imbere bikarushaho iyo bifitanye imikoranire n’ibindi.

Perezida Kagame yavuze ko ubuto buvugwa, ahanini buba bushingiye ku mubare w’abaturage cyangwa se ubuso bw’ibihugu nka Barbados n’u Rwanda.

Barbados ifite ubuso bungana na kilometero kare 430, ni nto kurusha Umujyi wa Kigali. Ituwe n’abaturage 287.708. Ni mu gihe u Rwanda rufite ubuso bungana na kilometero kare 26.338 n’abaturage bagera kuri miliyoni 13.

Perezida Kagame yavuze ko ubuto atari ikibazo, kuko u Rwanda na Barbados ari ibihugu bito ariko bifite abantu batekereza.

Ati 'Dufite ubwonko, turatekereza, ntabwo dufite ubumuga twatewe n’ubuso, dutekerereza hamwe n’abandi, tugerageza gutanga umusanzu twifashishije ibitekerezo dutanga, tugaragaza ibibazo bikeneye ibisubizo, bikumvwa nk’uko bikwiriye. Kuri iyo ngingo, nta buto burimo.'

Umukuru w’Igihugu yavuze ko iyo mikorere iyo yiyongereyeho ubufatanye hagati y’ibihugu, bituma umusaruro waguka kurushaho.

Perezida Kagame yavuze kandi ko icyorezo cya Covid-19 cyatumye abantu babona ko bangana kuko cyagize ingaruka ku bihugu byose mu buryo bumwe, ahubwo ko igikwiriye ari ugukorera hamwe mu guhangana n’ibibazo birimo imihindagurikire y’ikirere kuko bitagira ingaruka ku gihugu bitewe n’uko kingana cyangwa se umubare w’abaturage bacyo.

Muri uru ruzinduko, ibihugu byombi byasinyanye amasezerano abiri ari mu ngeri zirimo siporo ndetse n’ibijyanye n’ingendo zo mu kirere.

Perezida Kagame yavuze ko u Rwanda na Barbados bigiye gufatanya mu bijyanye no gukora imiti, aho bizahana ubumenyi bigizwemo uruhare n’abafatanyabikorwa muri iyi gahunda.

Saa sita zirengaho iminota micye kuri uyu wa Kane tariki 10 Ugushyingo 2022, Ibiro bya Minisitiri w’Ubutegetsi bw’Igihugu byashyize hanze itangazo rivuga ko Perezida wa Repubulika yashyizeho Jean Claude Musabyimana nka Minisitiri w’Ubutegetsi bw’Igihugu.

Ni umwanya yasimbuyeho Hon. Gatabazi Jean Marie Vianney wari umaze umwaka n’amezi umunani, yagiyeho avuye ku mwanya wa Guverineri w’Intara y’Amajyaruguru.

Nyuma yo gusimbuzwa, Gatabazi Jean Marie Vianney, yanyujije ubutumwa kuri Twitter ati 'Murakoze nyakubahwa Paul Kagame ku cyizere mwangiriye mukampa umwanya wa Minisitiri w’Ubutegetsi bw’Igihugu.'

Yakomeje avuga ko igihe amaze ari muri Guverinoma y’u Rwanda, cyamubereye cyiza mu rugendo rwo gukorera Igihugu cye ndetse 'no kwiga no kwaguka mu bunararibonye.'

Yaboneyeho kwizeza Umuryango wa RPF-Inkotanyi asanzwe anabereye umunyamuryango ko azakomeza kuwubera umwizerwa ndetse ko yiteguye gukomeza kuwutumikira igihe cyose wazamutuma.

Ati 'Ndisegura ku bitaragenze neza mu nshingano nari ndimo kandi nzakomeza kwiga no kwaguka. Mboneyeho gushimira n’abaturage, abayobozi n’abafatanyabikorwa ku nkunga y’imikoranire.'

Jean Claude Musabyimana wagizwe Minisitiri w’Ubutegetsi bw’Igihugu asimbuye Gatabazi, na we yanyujije ubutumwa kuri Twitter ye ashimira Perezida Paul Kagame ku cyizere yamugiriye akamugira Minisitiri w’Ubutegetsi bw’Igihugu.

Mu gihe habura iminsi itatu gusa ngo shampiyona y’icyiciro cya kabiri itangire, ingengabihe y’uko amakipe azahura guhera kuri uyu wa Gatandatu yashyizwe (…)