Author: webrwanda

Umuvugizi wa leta ya DR Congo akaba na minisitiri w'itumanaho,Bwana Patrick Muyaya yabwiye BBC Gahuzamiryango ko Perezida Tshisekedi atigeze yanga guhura na mugenzi we Paul Kagame i Doha nkuko byavuzwe.

Mu ntangiriro z'iki cyumweru havuzwe amakuru ko Perezida Felix Tshisekedi yanze kwitabira inama y'ubuhuza yateguwe na Qatar yari kubera i Doha kuwa mbere, yari kumuhuza na mugenzi we Paul Kagame.

Muyaya yabwiye BBC ati: 'Twebwe ntabwo twanze kujya i Doha, nkuko twari i New York iruhande rwa Perezida Macron [muri Nzeri 2022]…iyo nama [ya Doha] sinibaza ko yaburijwemo ahubwo ntekereza ko yasubitswe kubera abandi bireba nabo bagomba kuyigiramo uruhare aha ndavuga EAC, Angola cyangwa Kenya.'

Radio Mpuzamahanga y'Abafaransa, RFI,yavuze ko ibiganiro byari kubera i Doha muri Qatar,byasubitswe kubera ubushake bwa Félix-Antoine Tshisekedi,wanze guhura na Perezida Kagame nyamara ku ruhande rw'u Rwanda bari biteguye ndetse intumwa zarwo zari zamaze kugera muri Qatar.

RDC ishinja u Rwanda gufasha umutwe wa M23 wayishojeho intambara mu gihe u Rwanda ruyishinja gukorana na FDLR iyihungabanyiriza umutekano.

Amakuru atandukanye yemeza ko abategetsi bo mu karere no mu mahanga yandi barimo kugerageza guhuza impande zombi mu biganiro mu gushaka guhosha amakimbirane.

Impande zombi zikomeza gushinjanya kwanga kubahiriza ibyasabwe n'amasezerano ya Luanda na Nairobi.

Muyaya avuga ko mu gihe DR Congo ubu yatangiye ibikorwa byo kubarura abazitabira amatora no kubaha amakarira y'itora, hari impungenge ko ikibazo cy'umutekano mucye 'gishobora guhungabanya ibyo ibikorwa' bibanziriza amatora ateganyijwe mu Ukuboza(12) uyu mwaka.

Muyaya ahakana ko leta itari kwishora mu makimbirane igamije gusubika aya matora.

BBC

Source : https://umuryango.rw/amakuru/mu-mahanga/politiki/article/rdc-yigaritse-ibyo-kwanga-guhurira-na-perezida-kagame-i-doha

Ikamyo yari itwaye sima izikuye muri Tanzania yakoreye impanuka ikomeye mu karere ka Nyabihu igonga imodoka eshanu zirimo n'itwara abagenzi,Imana ikinga ukuboko ntihagira umuntu uhasiga ubuzima.

Iyi kamyo yaripakiye sima yagonze imodoka 5 zose ubwo yari igeze mu mudugudu wa Gatagara,akagari ka Kijote mu murenge wa Bigogwe ho mu karere ka Nyabihu.

Iyi kamyo imaze kugonga izo modoka 5 nkuko abari aho impanuka yabereye babivuga,yahise igonga amapoto y'amashanyarazi.

Abari aho bavuga ko ari igitangaza cy'lmana kuko nta muntu wapfuye, nta n'uwakomeretse bikabije uretse umuntu umwe wakomeretse byoroheje.

Umunyamabanga Nshingwabikorwa w'umurenge wa Bigogwe Bwana Muhirwa Robert, yabwiye UMURYANGO ko iyo mpanuka yabaye ahagana saa tanu n'igice zo kuri uyu wa 26 Mutarama 2023 ariko nta muntu yahitanye n'ubwo yari iteye ubwoba.

Yagize ati “Iyo mpanuka yabaye mu ma saa tanu n'igice.Urabona muri Shaba ahantu hamanuka,hari ikamyo yari isa nk'iy'ahapfiriye,inyuma hari izindi nyinshi zikurikiranye,zirimo amakamyo n'izindi ntoya.

Hari ikamyo ya actros yari ivanye Sima Tanzania iyerekeza i Gisenyi.Ihageze bitewe n'uburemere bw'ibintu yari atwaye,umushoferi imyuka yamubanye mike,imodoka zose agenda azigonga,icyakora ku bw'amahirwa hangiritse Coaster,Daihatsu,indi kamyo n'iyo yaguye,ku bw'amahirwe nta muntu wapfuye.

Hari umuntu umwe wakomeretse wari uri muri Coaster ariko navuganye n'abaganga bambwira ko nta kibazo gikomeye yagize.

Urebye uko impanuka yari imeze wakumva ko abantu bashize.Imana yahabaye nta muntu wigeze atakaza ubuzima.”

Yasabye abaturage gukoresha neza umuhanda kuko impamvu iyi mpanuka itahitanye abantu ngo ahanini byatewe nuko abaturage.

Ati “Icyo nabwira abaturage,icya mbere n'ukubahumuriza no kumenya gukoresha umuhanda neza,kuko amahirwe yabayeho nuko nta bantu bari bigabije umuhanda.Bari bitaruye umuhanda kuko iyo baba bakoresheje umuhanda nabi byari gutwara ubuzima bw'abantu benshi kandi bakazirikana ko impanuka yaba igihe cyose bakoresheje nabi umuhanda.”

Source : https://umuryango.rw/amakuru/mu-rwanda/ubutabera/article/nyabihu-ikamyo-yabuze-feri-igonga-imodoka-eshanu-imana-ikinga-ukuboko

Papa Francis yabivuze mu kiganiro yagiranye n'Ibiro Ntaramakuru by'Abanyamerika, Associated Press ku wa Kabiri w'iki cyumweru.

Uyu mushumba mukuru wa Kiliziya Gatulika ku Isi, yabivuze ubwo yagarukaga ku itegeko rihana ubutinganyi riri mu mategeko ya bimwe mu Bihugu.

Mu magambo ye, Papa Francis yagize ati 'Kuba umutinganyi [uryamana n'wo bahuje igitsina] si icyaha (crime) [mu rwego rw'amategeko].'

Muri iki kiganiro, umushumba wa Kiliziya Gatulika ku Isi, yagaye Ibihugu bihana abakundana n'abo bahuje ibitsina cyangwa bibabangamira.

Gusa kuri we avuga ko ubutinganyi ari icyaha (sin) imbere y'imana ariko ko bushobora guterwa n'amateka y'umuntu yanyuzemo bityo ko Abasenyeri bakwiye kugira uburyo bumvamo iyi ngingo.

Yagize ati 'Aba basenyeri bakwiye gutangira urugendo rwo guhindura imyumvire, bakabitaho, bakabanezeza nkuko imana ibikorera buri wese muri twe.'

Ibi bitekerezo bya Papa bigamije kuvuganira uburenganzira bw'abatinganyi ni ubwa mbere yari avuze kuri aya mategeko.

Umushumba wa Kiliziya Gatulika ku Isi yavuze ko Kiliziya Gatulika itazigeza ikorera ivanvura abatinganyi kuko isanzwe yakira kimwe abantu bose.

Yagize ati 'Twese tiri abana b'Imana, kandi Imana idukundira uko turi yaba imbaraga nyinshi cyangwa nke zacu.'

Ibihugu 67 byamaze gushyira mu mategeko yabyo ubutinganyi nk'icyaha gihanwa n'amategeko, birimo 11 bigitangaho igihano cy'urupfu.

Source : https://umuryango.rw/imyidagaduro/article/amagambo-ya-papa-francis-ku-butinganyi-yatunguye-benshi

Abantu basaga 17 bakomeretse kuri uyu wa Gatatu tariki ya 25 Mutarama 2023,ubwo igisasu cyaturikiraga mu isoko mu Burasirazuba bwa Kongo nkuko abayobozi babitangaje.

Iki gisasu cyongereye ubwoba muri Beni kuko mu minsi ishize nabwo igisasu cyaturikirijwe mu rusengero gihitana benshi.

Iki gisasu cyaturikiye mu isoko ryitwa Macampagne I Beni,byatumye abantu 17 bakomereka bajyanwa igitaraganya kwa muganga nkuko byatangajwe na Tharcisse Katembo,umwe mu bayobozi b'akarere.

Umunyamakuru wa AFP yavuze ko yabonye abantu 8 bakomeretse barimo abakobwa 3 ndetse bahise bajyanwa kuvurirwa ku ivuriro riri hafi.

Aba ngo bagize ibikomere ku maguru,amaboko ndetse no ku mutwe nkuko abitangaza.

Umucuruzi witwa Dany Siauswa yabwiye AFP yagize iti “Umusore muto yasize igikapu cy'icyatsi ….avuga ko agaruka kugifata.Nyuma y'iminota 3 cyaturitse abantu barakomereka barimo nanjye n'abandi bakiriya bari baje kugura imyumbati.

Joseph Kakule, umuyobozi wa sosiyete sivile yagize ati “Abantu nibura 19 bakomeretse kubera uko guturika.

Beni ni kamwe mu duce duhoramo umutekano muke mu Burasirazuba bwa DRC, ndetse ibi bimaze imyaka isaga 30.

Kuwa 15 Mutarama,umutwe wa Allied Democratic Forces (ADF),ugendera ku matware ya IS,wishe abantu 15 mu rusengero rw'aba Protestant i Kasindi hafi y'umupaka wa Uganda.

Uyu mutwe kandi washinjwe kwica nibura abasivile 23 kuwa Mbere.

Umutwe w'ingabo uhuriweho wa RDC na Uganda watangiye kurwana na ADF mu mwaka ushize ariko ntacyo byatanze kuko ibi byihebe biracyica abantu.

Source : https://umuryango.rw/amakuru/mu-mahanga/umutekano/article/beni-igisasu-cyaturikiye-mu-isoko-gikomeretsa-abantu-benshi

Source : https://umuryango.rw/amakuru/urukundo/article/amakosa-akomeye-abakobwa-batarashaka-abagabo-bahuriyeho

“Turi aba Yesu” ni indirimbo y’iminota 4 n’amasegonda 2, igaruye byeruye Nzaramba Godfrey mu muziki. “Mbere turi aba nde, turi aba Yesu, twari aba satani turamwimura. Uri ku musaraba Yesu i Gorigota, wavuze kimwe uti birarangiye”- Ni amwe mu magambo yumvikana muri iyi ndirimbo.

Mu kiganiro na inyaRwanda, Godfrey Nzaramba yavuze ko nubwo atumvikanaga mu muziki, yakoraga umurimo w’Imana mu bundi buryo. Ati “Yego nari maze igihe ncecetse ntakora gospel music ariko nkora umurimo w’Imana mu bundi buryo,  mbese ntabwo nigeze njya kure yayo”.

Yakomereje kuri iyi ndirimbo ye nshya “Turi aba Yesu”, avuga ko irimo ubutumwa bwinshi bw’iyobokamana , ariko icya mbere “navuga ni uko Imana yatanze umwana wayo w’ikinege utari ufite icyaha na kimwe kugira ngo jye nawe tubone ubugingo buhoraho”. Yavuze ko by’umwihariko ayituye umuryango we “Madamu n’imfura yanjye yitwa Joshua”.

Nzaramba wari umaze imyaka hafi 7 nta ndirimbo nshya atanagaragara mu bitaramo, arashima urwego umuziki wa Gospel ugezeho uyu munsi. Ati “Gospel y’uyu munsi imeze neza yateye imbere ugereranyije na cyera ku buryo bamwe mu bahanzi hano iwacu bakora Gospel music batunzwe n’impano zabo, ibi tugomba kubishimira igihugu cyacu kuko gifite Good Leadership”. 

Uyu mugabo wabayeho umunyamakuru wa Rc Nyagatare aho yibandaga cyane ku biganiro by’Iyobokamana, yabajijwe niba yarabivuyemo burundu. Yabanje araseka, ati “Hhh, nigeze kubaho umunyamakuru igihe kimwe ni byo nza kubihagarika njya mu zindi nshingano, ariko igihe nikinyemerera nzabisubiramo kuko ndabikunda cyane”. 

Indirimbo nshya “Turi aba Yesu” ya Nzaramba yakozwe na Capital Records igezweho muri iyi minsi. Arayishimira cyane ati “Navuga ko ari nko mu rugo kuko nyirayo brother Eric Rukundo dufitanye imishinga myinshi kuva cyera. Twahujwe n’umurimo w’Imana kuva mu 2003, kuva icyo gihe duhinduka abavandimwe kandi nari muziho ubuhanga n’ubunyangamugayo”.

Arashima urwego umuziki wa Gospel ugezeho

“Turi aba Yesu” niyo ndirimbo igaruye Nzaramba mu muziki

UMVA INDIRIMBO NSHYA “TURI ABA YESU” YA GODFREY NZARAMBA

Source : https://inyarwanda.com/inkuru/125361/godfrey-nzaramba-wari-umaze-imyaka-7-atumvikana-mu-muziki-agarukanye-indirimbo-yise-turi-a-125361.html

Source : https://umuryango.rw/amakuru/urukundo/article/dore-impamvu-ishobora-gutuma-ucya-inyuma-uwo-mwashakanye

Ibiro bya perezida wa Congo Brazzaville byatangaje ko Perezida Denis Sassou-N'Guesso kuwa gatatu yakiriye minisitiri w'ububanyi n'amahanga w'u Rwanda Vincent Biruta azanye ubutumwa bwa Perezida Paul Kagame.

Ibikubiye muri ubu butumwa ntibyatangajwe kugeza ubu.

Sassou-N'Guesso, umuturanyi wa hafi wa Tshisekedi, ni umwe mu bategetsi bo mu karere bagiye berekana ubushake mu gukemura amakimbirane mu karere.

Muri iyi minsi umwuka mubi hagati y'u Rwanda na DR Congo ugeze habi, cyane nyuma y'uko u Rwanda rurashe ku ndege y'intambara ya DR Congo iri mu kirere kitavugwaho rumwe.

RDC ishinja u Rwanda gufasha umutwe wa M23, ibyo u Rwanda rwakomeje guhakana.

Imirwano ikomeye hagati ya M23 n'ingabo za leta yakomeje kuwa gatatu mu bice bya centre ya Kitshanga muri Masisi n'izindi ngerero zitandukanye hafi yaho muri teritwari ya Rutshuru.

Kugeza ubu ntibizwi neza ugenzura centre ya Kitchanga, gusa amakuru atandukanye yemeza ko inyeshyamba za M23 zafunze umuhanda wa Kitshanga- Goma ari nawo utuma hashoboka ubucuruzi n'ingendo hagati ya Goma — Masisi – na Walikale.

Imiryango ifasha ikomeza gutabariza abantu ibihumbi barimo guhunga iyi mirwano.

Ku mbuga nkoranyambaga benshi bagaragaza impungenge ko DR Congo n'u Rwanda bishobora kwinjira mu ntambara kubera ibyo Kinshasa ikomeza gushinja Kigali.

Birashoboka cyane ko ubutumwa bwa Perezida Paul Kagame kuri mugenzi we Sassou-N'Guesso burebana n'iki kibazo.

Nyuma yo kuganira n'umuturanyi we Felix Tshisekedi muri Kamena(6) ishize ubwo inyeshyamba za M23 zari zafashe umujyi wa Bunagana, Perezida Nguesso yavuze ko yizeye ko aya makimbirane azarangira.

Ibiro ntaramakuru AFP bimusubiramo agira ati: 'Ntekereza ko vuba vuba tuzakemura izi ngorane tukazana amahoro mu biganiro'.

Ikinyamakuru Africa Intelligence mu cyumweru gishize cyatangaje ko Perezida Tshisekedi yanze kwitabira ibiganiro byari kuba kuwa mbere, bikamuhuza na mugenzi we Paul Kagame i Doha muri Qatar.

BBC

Source : https://umuryango.rw/amakuru/mu-rwanda/politiki/article/perezida-kagame-yoherereje-ubutumwa-sassou-n-guesso-wa-congo

Mu bihe bitandukanye, abaturage n'abagana Umurenge wa Nyamabuye, Akarere ka Muhanga basaba Serivise zitandukanye, bagiye bumvikana basaba ubuyobozi kububakira umurenge ujyanye n'igihe dore ko inyubako ikorerwamo yahoze ari ibiro bya Komini Nyamabuye mu cyahoze ari Perefegitura ya Gitarama. Ni inyubako itari ikijyanye n'igihe, yakomeje kuvugisha benshi mu bayigana bashaka Serivise zitandukanye. Cyera kabaye, igisubizo cyabonetse kuko Miliyoni 570 zigiye gukoreshwa mu kubaka ibiro bishya kandi bijyanye n'igihe.

Mu kiganiro n'umuyobozi w'Akarere ka Muhanga Wungirije Ushinzwe iterambere ry'Ubukungu, Bizimana Eric yabwiye umunyamakuru wa intyoza.com ko nyuma y'ibyifuzo by'abaturage ubuyobozi bwicaye butekereza uko hakubakwa umurenge ugezweho kandi wuzuzanya n'Icyerekezo cy'Igishushanyo cy'Umujyi ku bijyanye n'Imikoreshereze y'ubutaka n'imiturire muri uyu mujyi(Master PLan).

Yagize Ati' Abaturage bamaze igihe basaba ko uyu murenge wasenywa tukubaka undi. Ibyifuzo byabo twarabyumvise kandi turabitegura, bityo rero amafaranga asaga Miliyoni 500 yamaze gutegurwa kugirango twubakwe ibiro by'umurenge ugezweho kandi ujyanye n'icyerekezo cy'umujyi mu rwego rujyanye n'imikoreshereze y'ubutaka n'imiturire nkuko yemejwe na njyanama y'akarere kacu'.

Akomeza avuga ko mbere yo kubaka hari ibyagombaga kubanza kwitabwaho ku bijyanye n'imibereho myiza y'abaturage ariko hakanakomeza gushakwa ubushobozi bwo kubaka umurenge usobanutse. Yongeyeho ko ibisabwa byose bihari kandi n'abatsindiye isoko bahari bagomba gutangira imirimo y'ubwubatsi vuba.

Yagize Ati' Ntabwo twatinze kuko hari ibindi byabanje kwitabwaho bijyanye no gufasha abaturage kuva mu mibereho mibi, ndetse twashatse ubushobozi bwo kubaka umurenge usobanutse kandi n'ibyari bikenewe byose byarateganyijwe kandi abatsindiye isoko bariteguye ndizera ko bari butangire vuba'.

Mu yandi makuru twamenye ni uko uyu murenge utazubakwa habanje gusenywa inyubako zari zisanzwe, ahubwo biteganyijwe ko uzubakwa ahasanzwe Ubusitani, ahari hasanzwe hakazubakwa imbuga ngali izajya iparikwamo ibinyabiziga by'abazajya baza gusaba serivisi(Parking).

Akimana Jean de Dieu

Source : https://www.intyoza.com/2023/01/26/muhanga-iryavuzwe-riratashye-miliyoni-570-zigiye-kubakishwa-umurenge-wa-nyamabuye/

Amakipe yitwaye neza muri shampiyona ya Volleyball yasojwe mu mpera z’icyumweru gishize, agiye guhurira mu irushanwa ry’igikombe cy’Intwari.

Iri rushanwa riteganyijwe mu mpera z’iki cyumweru ku wa Gatandatu tariki ya 28 no ku Cyumweru tariki ya 29 Mutarama 2023.

Amakipe 4 yitwaye neza mu bagabo ayobowe na REG VC yatwaye igikombe, Gisagara VC yabaye iya, APR VC yabaye iya 3 na FOREFRONT VC yabaye iya 4 ni yo azaba ahatanira iki gikombe.

Mu bagore ni APR WVC yegukanye igikombe cya shampiyona, FOREFRONT WVC yabaye iya 2, RRA WVC yabaye iya 3 na Ruhango WVC yabaye iya 4.

Imikino yose izabera Kimisagara aho ku wa Gatandatu hazakinwa 1/2 mu gihe ku Cyumweru hazakinwa imikino ya nyuma n’umwanya wa 3.

Muri 1/2 ikipe ya mbere izahura n’iya 4, iya kabiri ihure n’iya 3. Bivuze ko saa 11:00′ ku wa Gatandatu mu bagore APR WVC izahura na Ruhango WVC mu gihe saa 13:00′ FOREFRONT WVC izahura na RRA WVC.

Mu bagabo saa 15:00′ REG VC izahura na FOREFRONT VC n’aho saa 17:00′ Gisagara VC yesurane na APR VC.

Ibiro birongera kuvuza ubuhuha mu mpera z’iki cyumweru

Source : http://isimbi.rw/siporo/article/ibigugu-muri-volleyball-bigiye-kwesurana