Author: webrwanda

Kuri uyu wa 23 Werurwe 2022, nibwo uyu musaza yabonetse ku nkombe z'uyu mugezi ku ruhande rw'Akagari ka Kibizi mu Mudugudu wa Kigarama yahagamye hagati y'amabuye.

Abaturage bavuga ko uyu musaza wibanaga yari yiriwe anywa urwagwa mu isoko rya Kibilizi. Babihuza no kuba uwo munsi hari hiriwe imvura nyinshi bagakeka ko yaba yaragerageje kwambuka uwo mugezi yasinze amazi akamutwara.

Umunyamabanga Nshingwabikorwa w'Umurenge wa Kibilizi, Habimana Viateur, yabwiye IGIHE ko bakimenya ko hari umurambo abaturage babonye mu mugezi, bajyanyeyo n'inzego z'inzego z'umutekano na RIB mu gukomeza gushaka amakuru baza gusanga ari uw'umusaza wo mu mudugudu wa Rutaro mu Kagari ka Ruragwe mu Murenge wa Rubengera.

Ati 'Inama tugira abaturage ni ukujya babanza kureba niba umugezi wuzuye mbere yo kuwambuka, basanga wuzuye bakajya kwambukira ahari intindo'.

Umurambo w'uyu musaza wajyanye mu Bitaro Bikuru bya Kibuye gukorerwa isuzuma mbere y'uko ushyingurwa.

Musogoro ni umugezi muto ariko iyo imvura yaguye ari nyinshi uruzura ku buryo nta muntu wabasha kuwambuka atanyuze ku kiraro.

---

Source : http://igihe.com/amakuru/u-rwanda/article/karongi-umusaza-w-imyaka-65-yasanzwe-mu-mugezi-yapfuye

Minisitiri w'Ububanyi n'Amahanga wa Uganda, Gen Jeje Odongo, yavuze ko igihango u Rwanda na Uganda bifitanye gikwiriye gutuma buri gihe ibihugu birenga ibibitanya.

Ibi yabigarutseho ubwo hasozwaga inama yari imaze iminsi itatu ihuje Komisiyo ihuriweho n'u Rwanda na Uganda, igamije kunoza umubano hagati y'ibihugu byombi, kuri uyu wa Gatanu tariki 24 Werurwe 2023

Minisitiri w'Ububanyi n'Amahanga wa Uganda, Gen Jeje Odongo, yavuze ko kuba u Rwanda na Uganda ari ibihugu bituranye ku buryo abaturage babyo bahura umunsi ku munsi no kuba byarafatanyije mu rugamba rwo kwibohora, ari igihango gikomeye nk'uko ikinyamakuru igihe cyabyanditse.

Ati 'Nubwo hari ibibazo byagiye bibaho, imbaraga abayobozi bacu bagiye bashyiramo ngo bikemuke biteye ishema. Nizeye ko ubu bufatanye buzatuma umubano wacu ukomeza kumera neza.'

Minisitiri Odongo yavuze ko ubucuruzi bw'ibihugu byombi bugeze kure, ariko hakiri ibibazo bigomba gukemurwa ngo bugere aho bwahoze mbere.

Ati'Ubwo umubano wacu wasubukurwaho, ubucuruzi bwaratumbagiye cyane ariko ntabwo turagera ku rwego twifuza. Haracyari amahirwe menshi dukwiriye guheraho duteza imbere inyungu twembi duhuriyeho.Ibikorwa remezo bidahagije n'ibindi bibazo biri gutuma ubuhahirane butagerwaho neza, dukwiriye kuziba icyo cyuho.'

Yashimye uburyo u Rwanda rwemeye ko indege za Uganda Airlines zitangiza ingendo zazo i Kigali, agashimangira ko bizateza imbere ubuhahirane.

Ati 'Twaba twibeshya tuvuze ko Uganda cyangwa u Rwanda buri gihugu cyabigeraho cyonyine, bisaba ubufatanye.'

Minisitiri Dr Biruta yavuze ko aho umubano w'ibihugu byombi ugeze hashimishije, kandi ko n'ibibazo birimo bizashakirwa ibisubizo.

Ati 'Nubwo hari ibibazo byagiye biba hagati y'umubano wacu mu myaka ishize, nishimye ko kubera abayobozi b'ibihugu byacu byombi, tugeze kure mu kunaguura uwo mubano. Iyi nama ni ikimenyetso cy'umuhate dusangiye mu gushakira ibisubizo ibibazo byari byaravutse hagati y'ibihugu byacu.'

'Dukwiriye gukomereza kuri iyi ntambwe tugakomeza gukorera hamwe mu gukemura ibindi bibazo bisigaye. Bizasaba umuhate uhoraho wa buri ruhande no kumva impungenge za buri umwe.'

Umwaka ushize umubano watangiye kujya mu buryo nyuma y'uruzinduko rwa Gen Muhoozi Kainerugaba wari ushinzwe Ingabo zirwanira ku butaka muri Uganda akaba n'umujyanama wa Perezida Yoweri Museveni yagiriye mu Rwanda.

Nubwo uruzinduko rwatanze umusaruro n'umupaka wa Gatuna wari umaze igihe ufunze ugafungurwa, haracyari ibibazo bitandukanye birimo ubuhahirane butarajya ku rwego bwahozeho mbere yo kuzamba k'umubano.

Hari bamwe mu Banyarwanda bavuga ko ibicuruzwa bimwe na bimwe byajyaga biva muri Uganda bitaragaragara ku masoko yo mu Rwanda, cyane cyane ibicuruzwa by'abacuruzi baciriritse nk'ibikomoka ku buhinzi n'ubworozi.

Biteganyijwe ko mu nama ya Komisiyo ihuriweho n'ibihugu byombi, haza gusinywa amasezerano atandukanye.

Imibare ya Banki ya Uganda, igaragaza ko ibyo icyo gihugu cyohereje mu Rwanda mu mwaka w'ingengo y'imari 2018/2019 byari bifite agaciro ka miliyoni z'amadolari 149.94, ziba miliyoni z'amadolari 5.48 mu 2019/2020, mu mwaka wa 2020/2021 byageze kuri miliyoni z'amadolari 2.08 naho mu mwaka wa 2021/2022 biba miliyoni z'amadolari 1.17.

The post <strong>Igihango u Rwanda rufitanye na Uganda gikwiye kurenga ibidutanya — Minisitiri Odongo</strong> appeared first on FLASH RADIO&TV.

Source : https://flash.rw/2023/03/24/igihango-u-rwanda-rufitanye-na-uganda-gikwiye-kurenga-ibidutanya-minisitiri-odongo/?utm_source=rss&utm_medium=rss&utm_campaign=igihango-u-rwanda-rufitanye-na-uganda-gikwiye-kurenga-ibidutanya-minisitiri-odongo

Paul Rusesabagina na Nsabimana Callixte uzwi nka Sankara, bahamijwe ibyaha by'iterabwoba barafungurwa kuri uyu wa Gatanu tariki 23 Werurwe 2023.

Ikinyamakuru igihe dusheka iyi nkuru kivuga ko aba bombi bafungurwa ku mbabazi za Perezida wa Repubulika.

The post Rusesabagina na Sankara bagiye gufungurwa appeared first on FLASH RADIO&TV.

Source : https://flash.rw/2023/03/24/rusesabagina-na-sankara-bagiye-gufungurwa/?utm_source=rss&utm_medium=rss&utm_campaign=rusesabagina-na-sankara-bagiye-gufungurwa

Ikipe ya Bayern Munich yirukanye uwari umutoza wayo Julian Nagelsmann ihita iha akazi Thomas Tuchel waherukaga kwirukanwa na Chelsea.

Ibi byabaye mu ijoro ryo kuwa Kane aho ibi bikorwa byombi byahuriranye.

Uyu wahoze anatoza PSG yahawe aka kazi nyuma y'amezi 7 yirukanwe na Chelsea nkuko byatangajwe n'ikinyamakuru Bild.

Uyu ngo aratangira akazi kuwa mbere ndetse umukino we wa mbere azakina na Borussia Dortmund kuwa Gatandatu tariki ya 1 Mata.

Bayern irarushwa inota rimwe na Dortmund muri Bundesliga.

Icyakora iyi kipe iri muri 1/4 cya Champions League nyuma yo gusezerera PSG ku bitego 3-0 muri 1/16.

Manchester City niyo bazahura muri 1/4.

Uyu wahoze ari umutoza wa RB Leipzig, Nagelsmann w'imyaka 35, yahesheje Bayern igikombe cya shampiyona umwaka ushize nyuma yo guhabwa akazi muri Mata 2021.

Icyakora mu masaha ya kare kuri uyu kuwa Kane uyu mutoza yavuze ko hari ibihuha yumvise ko arirukanwa ariko ahakana ko yaganiriye n'abayobozi b'ikipe.

Uyu Tuchel ukomoka mu Budag,agarutse iwabo nyuma y'imyaka itandatu avuye muri Dortmund akerekeza muri Paris St-Germain.

Uyu mugabo w'imyaka 49 yamaze imyaka ibiri muri Paris mbere yo kwirukanwa.Yamaze umwaka muri Chelsea,atwara Champions League,mbere yo kwirukanwa n'umukire Todd Boehly.

Source : https://umuryango.rw/imyidagaduro/imikino/article/bayern-munich-yirukanye-umutoza-wayo-iha-akazi-thomas-tuchel

Inzego z'ubuyobozi n'iz'ubuzima mu Karere ka Kirehe ziravuga zatangiye gukaza ingamba z'ubwirinzi no gukora ubukangurambaga kugira ngo hakumirwe indwara ya Marburg yagaragaye mu Ntara ya Kagera mu gihugu cya Tanzania.

Ku mupaka wa Rusumo urujya n'uruza rw'amakamyo ava cyangwa ajya mu Rwanda no muri Tanzania rurakomeje. Ni na ko abaturage bagenda n'amaguru bambuka uyu mupaka muri gahunda y'ubuhahirane isanzweho.

Abinjiye mu Rwanda barasabwa gukaraba intoki, bagapimwa umuriro bagakomeza urugendo. Gusa, indwara ya Marburg ivugwa mu gihugu cya Tanzania nta makuru menshi bayifiteho, cyakora ngo bagiye gukomera ku isuku:

Inzego z'ubuzima mu Karere ka Kirehe zivuga ko ziteguye, ndetse n'ibyumba byihariye bishobora kwakirirwamo uwagaragaraho iyo ndwara ku ku mupaka wa Rusumo no ku bitaro bya Kirehe byamaze gutegurwa.

Umuyobozi w'ibyo bitaro Dr Munyemana Jean Claude asobanura iby'iyi ndwara n'inkomoko yayo, agaca akarongo ku bukana bwayo ndetse n'ingamba zo mu rwego rw'ubuzima mu gukumira.

Umuyobozi w'Akarere ka Kirehe Rangira Bruno avuga ko ubukangurambaga na bwo bwatangiye kugira ngo inzego z'ibanze hamwe n'abaturage bamenye uruhare rwabo mu kwirinda no gukumira iyo ndwara.

Magingo aya indwara ya Marburg ntabwo iragaragara mu Rwanda. Aho yagaragaye mu ntara ya Kagera ni kuri Km 300 uvuye mu mupaka wa Rusumo.

Source : https://umuryango.rw/amakuru/mu-rwanda/article/kirehe-hashyizweho-ingamba-zidasanzwe-zo-gukumira-icyorezo-gishya-cyagaragaye

Source : https://umuryango.rw/ubuzima-115/article/dore-zimwe-mu-mpamvu-zishobora-gutuma-umuntu-abira-ibyuya-nijoro-aryamye

Source : https://umuryango.rw/imyidagaduro/imikino/article/cristiano-ronaldo-na-harry-kane-bakoze-uduhigo-dushya-mu-ikipe-y-igihugu

Perezida Joe Biden wa Amerika na Minisitiri w'intebe Justin Trudeau wa Canada baratangaza iby'ubu bwumvikane bwabo kuri uyu wa gatanu mu ruzinduko Biden arimo i Ottawa.

Aya masezerano yitezweho kwemerera abategetsi ku mpande zombi z'umupaka gusubiza inyuma abasaba ubuhungiro, igihugu cyose baba berekezamo muri ibi.

Ubusanzwe abenshi ni abava muri Amerika berekeza muri Canada, ariko imibare y'abasaba ubuhungiro muri Amerika bavuye muri Canada nayo imaze kwiyongera.

Ibi ni mu muhate wo kugabanya umurindi w'abimukira ku mupaka witwa Roxham Road, inzira itemewe iri hagati ya leta ya New York n'intara ya Quebec ya Canada.

Muri aya masezerano, Canada izashyiraho gahunda nshya y'abimukira 15,000 bahunga gukurikiranwa n'urugomo muri Amerika y'epfo n'iyo hagati, nk'uko umwe mu bategetsi yabibwiye CBS News, ikorana na BBC muri Amerika.

Perezida Biden ari i Ottawa muri Canada kuganira na Trudeau ku bijyanye n'ubukungu, ubuhahirane n'abimukira. Ubwumvikane bwabo kuri iki cya nyuma buratangazwa mbere y'uko asubira muri Amerika kuri uyu wa gatanu.

Aya masezerano mashya agamije kuziba ibyuho biri mu masezerano yabanje hagati y'ibi bihugu agamije gukumira abimukira.

Ibyuho byari mu masezerano ya mbere y'ibi bihugu byatumye hari benshi bambuka berekeza muri Canada bava muri Amerika.

Mu kwezi gushize New York City yatangaje ko itanga amatike y'ubuntu ya bus ku bimukira barimo kwerekeza mu majyaruguru ku mupaka wa Amerika na Canada.

Hari hashize amezi menshi ibiganiro hagati y'ibi bihugu ku kibazo cy'abimukira byarahagaze.

Amakuru avuga ko Amerika itari ishishikajwe no gukumira abimukira bajya muri Canada mu gihe nayo ubwayo abava muri Amerika y'epfo bayibereye ikibazo.

Ubwumvikane bushya bwa Amerika na Canada ku gukumira abimukira bushobora guhita bushyirwa mu ngiro vuba kuko budakeneye kubanza kwemezwa n'Inteko Ishingamategeko ya Amerika.

Trudeau yavuze ko uburyo bworoshye bwo gukumira abimukira bambuka umupaka wa Roxham Road rwihishwa ari ugushaka amasezerano n'ikindi gihugu gitekanye cya gatatu.

Source : https://umuryango.rw/amakuru/mu-mahanga/article/america-na-canada-bagiye-guhagarika-kwakira-abimukira

Ibi uyu mugabo aherutse kubitangaza ubwo yari mu kiganiro na The Shade Room, Cannon yavuze ko Carey ari urukundo rw'ubuzima bwe, anasobanura uburyo yamugizeho ingaruka mu buryo bwiza.

Cannon yavuze kandi ko Carey ari we muntu mwiza cyane yaba yarabonye. Uyu mukinnyi wa firime yakomeje avuga ko Carey yagize uruhare rukomeye kuri we, haba mu gihe cy'ubukwe bwabo ndetse na nyuma yabwo.

Ati: 'Narahuye byinshi muri iyo myifatire ye ishimishije. Gusa ahora yishimye, ahora akorera abandi. Icyo ari cyo cyose cyaba cyamubayeho. Nanjye byarantangaje kubona umuntu ushobora kuba amaze atyo udaha intebe ikibi mu buzima bwe.”

Cannon na Carey bashakanye mu 2008 babyarana abana babiri, Maroccan na Monroe, mbere yuko batandukana muri 2014, n'ubwo baje gutandukana ku mugaragaro mu 2016.

Cannon nubwo yatandukanye na Mariah akomeza kugaragaza ko yanyuzwe n'urukundo rw'uyu mugore ndetse ko nawe yiteguye gukomeza kumukunda nk'umuntu udasanzwe yabonye mu buzima bwe ati:'Ubwo namenyaga ukuntu yari intangarugero, ni bwo namenye neza ko uriya mugore atari umuntu. Ni impano yavuye mu ijuru.'

Yakomeje agira ati: 'Njyewe nizera urukundo rwose. Mu by'ukuri byari bimeze nk'umugani ndi kumwe na Mariah, ku buryo nahitamo ko bisubira uko byari bimeze.' Ibi yabivugiye mu kiganiro yagiranye na Hottee Talk Show. Ati: 'Niba nagira amahirwe, niba bishoboka ko bisubira uko byari bimeze, ndahari.'

Cannon avuga ko adashobora kugira urukundo nkurwo yakunze Mariah ati:'Sinzigera ngira urukundo nk'urwo nakunze Mariah”.

Amarangamutima Cannon agaragariza Mariah umunsi ku munsi ashimangira ko umubano wabo umeze neza ndetse ko byakoroha ko bakongera gusubirana kandi bakabaho ubuzima bwiza.

Source : https://umuryango.rw/imyidagaduro/article/nick-cannon-yavuze-imyato-mariah-carey-wahoze-ari-umugore-we

Umuririmbyi wo muri Nigeria Divine Ikubor wamenyekanye nka Rema, yakoze amateka n'indirimbo ye 'Calm Down' ku rutonde rwa Billboard Hot 100.

Ku wa 21 Werurwe 2023, nibwo Billboard Hot 100 yatangaje ko indirimbo Calm down ya Rema yasubiyemo ayifatanyije na Selena Gomez ari ku mwanya wa 8 kuri uru rutonde.

Kuri iyo mpamvu kandi, byatumye iyi ndirimbo aba ariyo y'Umunyafurika igeze kuri uyu mwanya w'urutonde rw'indirimbo zikunzwe muri Leta zunze Ubumwe z'Amerika.

Nubwo bimeze gutya ariko, indirimbo Essence' ya Wizkid yafatanyije na Justin Bieber ndetse na Tems ikaba ariyo yari yarigeze kuza ku mwanya wa 09 kuri Billboard Hot 100.

Tugarutse kuri Calm down, ikaba yarasohotse muri Gashyantare 2022, ndetse abarenga miliyoni 230 akaba aribo bamaze kuyireba kuri YouTube.

Ikindi kandi iyi ndirimbo ikaba ariyo imaze kurebwa cyane kuri YouTube muri Nigeria.

Nta kabuza Rema akomeje kwandika amateka no kuzamura ibendera rya Nigeria, muri rusange n'umuziki wo muri Afurika.

Source : https://umuryango.rw/imyidagaduro/article/indirimbo-y-umuhanzi-rema-yatumye-agirwa-icyamare-muri-muzika-ku-isi