Author: webrwanda

Nyuma y'aho Perezida Félix Tshisekedi avugururiye guverinoma, akongeramo amasura mashya, ayandi akayereka umuryango, abasesenguzi batangiye kwibaza niba iri vugurura ritaje gutuma ibitu bihumira ku mirari, cyane cyane ko iyi Kongo yakomeje kugirwa inama yo guca umuco wo kudahana, ikazima amatwi, ahubwo igakomeza gushyira ku ibere abanyabyaha.

Abakurikiranira hafi ibibera muri Kongo kandi batewe impungenge n'uko iyi guverinoma ishobora kuzarangwa n'urwikekwe, dore ko yashyizwemo abantu bigeze kuba abatoni ba Perezida Tshisekedi, ariko akaza kubagambanira bagashyirwa mu buroko. Aba bazakora barebana ku jisho, birinda ko amateka yakwisubiramo.

Urugero rwa mbere rw'umuntu ushobora kuzakora nk'umucancuro, ni Vital Kamerhe wagizwe Ministri w'ubutegetsi bw'Igihugu. Uyu mugabo yigeze kuba Umuyobozi w'Ibiro bya Perezida Tshisekedi, nyamara nyuma y'igihe gito yisanga muri gereza nkuru ya Makala, akurikiranyweho kunyereza miliyoni 46 z'amadolari, zari zigenewe kubakira abasirikari n'abapolisi, nk'uko Perezida Tshisekedi yari yabibasezeranyije mu gihe cyo kwiyamamaza.

Mu matora y'umukuru w'igihugu yo muw'2018, Vital Kamerhe yemeye guharira amajwi ye Tshisekedi, ariko nawe akazamureka akiyamamaza muri manda yo muw'2023. Mu rwego rwo kumusiga icyasha, muw'2020 Perezida Tshisekedi yafungishije Kamerhe kubera ubusahuzi, nyamara bivugwa ko bafatanyije. Yaje gufungurwa mu buryo butavuzweho rumwe, abakurikiranye urubanza rwe bakemeza ko yarekuwe mu rwego rwo gukigira ikibaba Perezida Tshisekedi, kuko iyo agumishwa mu ibohero, uruhare rwa 'Boss' muri ubwo bujura narwo rwari gushyirwa ahabona. Ese Vital Kamerhe yakwizera ate ko amateka atazisubiramo?

Baba Abanyekongo se, baba n'abanyamahanga, ninde wagirira icyizere umuyobozi nk'uyu urya utwe akarya n'utwa rubanda? Undi ni Jean-Pierre Bemba wigeze kuba Visi-Perezida ku butegetsi bwa Joseph Kabila, akaza gufungwa imyaka 10 yose i La Haye muri gereza y'Urukiko Mpuzamahanga Mpanabyaha, akurikiranyweho ubwicanyi abarwanyi b'umutwe we wa MLC wakoze mu gihugu cy'abaturanyi cya Santarafrika.

Jean-Pierre Bemba yagizwe Minisitiri w'Ingabo, ufite inshingano zo kubungabunga ubusugire bw'igihugu kandi ari umwe mu babuhungabanyije mu buryo bukomeye, dore ko ubwicanyi n'ubundi bugome bwatewe n'intambara hagati ya MLC ye , igisirikari cya Leta ndetse n'indi mitwe yitwaje intwaro, n'ubu butarava mu mitwe. Jean-Pierre Bemba rero afitanye inzigo n'abaturage, ku buryo ntawamwizera, ariko nawe icyasha afite nticyatuma yisanzura, kuko azi ko Perezida Tshisekedi ashobora kumuhinduka, akabyutsa idosiye y'ibyaha bya Bwana Bemba.

Uku ni nako bimeze kuri Mbusa Nyamwisi Antipas, wagizwe Ministiri ushinzwe ubutwererana bw'Akarere. Uyu nawe yabaye umukuru w'umutwe w'inyeshyamba wa RCD-ML wayogoje agace ka Beni, cyane cyane muw'2001, ubwo uyu mutwe we warwanaga na MLC ya Jean-Pierre Bemba, maze abaturage b'inzirakarengane bakahasiga ubuzima. Perezida Joseph Kabila yaje kumwiyegereza, amuha imyanya muri guverinoma, kugeza muw'2011 ahinduka mukeba wa shebuja mu matora ya Perezida wa Kongo.

Yaje guhungira mu mahanga, aza kugarurwa na Perezida Tshisekedi wirengagije amahano yakoreye Abanyekongo, amufitemo inyungu gusa zo kumufasha guhangana na Joseph Kabila n'abandi bo mu mashyaka atavuga rumwe n'ubutegetsi buriho ubu. Julien Paluku Kahongya yahawe minisiteri y'inganda. Amateka azahora yibuka ko ari umwe mu batumye umutwe w'abajenosideri wa FDLR ushinga imizi muri Kongo, cyane cyane ubwo yari Guverineri wa Kivu y'Amajyaruguru kugeza muw'2019.

Julien Paluku niwe watumye FDLR ibona abarwanyi bashya, bakora imyitozo nta nkomyi, bahabwa intwaro, maze barica barakiza muri iyo ntara. Abatutsi b'Abanyekongo iyo bumvise izina rya Julien Paluku barahungabana, bikaba bihumiye ku mirari kuko noneho yongerewe imbaraga zo gushyigikira jenoside barimo gukorerwa.

Ikigaragarira buri wese rero, ni uko muri rusange Perezida Tshisekedi atahisemo abagize guverinoma nshya kubera ubushobozi abaziho. Yabatoranyije kuko benshi muri bo aria bantu bafite icyasha, batazatinyuka kubangamira ibyemezo bye, birimo gutobanga amatora ateganyijwe mu mpera z'uyu mwaka.

Aya matora kandi aramutse anabaye, Perezida Tshisekedi wamaze kuvuga ko aziyamamariza indi manda, yizeye ko izi nkomamamashyi zizabangamira abandi bakandida, nka Moise Katumbi, martin Fayulu, cyangwa undi wese washyigikirwa na Joseph Kabila, kuko iyi guverinoma irimo abahoze ku ibere mu butegetsi bwa Kabila, bakaza gushwana kubera impamvu zinyuranye.

Iyi turufu ishobora no gupfuba ariko, kuko iyi guverinoma nshya, yiganjemo abahoze bayobora imitwe ishingiye ku moko, by'umwihariko abakomoka mu bwoko bwa Perezida Tshisekedi bw'Abaluba. Ibi nabyo bikaba bishobora gutuma igice kinini cy'Abanyekongo kitayibonamo, ngo kiyigirire icyizere. Tubitege amaso.

The post Twitege iki kuri guverinoma nshya ya Perezida Tshisekedi yuzuyemo abanyabyaha ruharwa? appeared first on RUSHYASHYA.

Source : https://rushyashya.net/twitege-iki-kuri-guverinoma-nshya-ya-perezida-tshisekedi-yuzuyemo-abanyabyaha-ruharwa/?utm_source=rss&utm_medium=rss&utm_campaign=twitege-iki-kuri-guverinoma-nshya-ya-perezida-tshisekedi-yuzuyemo-abanyabyaha-ruharwa

Impuzamashyirahamwe y’umupira w’amaguru muri Afurika, CAF yamaze kwisubiraho maze yemeza ko umukino wa Benin n’Amavubi ugomba kubera i Kigali mu Rwanda kuri Kiga Pelé Stadium.

Mu ibaruwa ya CAF imaze kwandikira umunyamabanga wa FERWAFA, Muhire Henry yavuze ko nyuma y’icyemezo yari yafashe ku wa 21 Werurwe ikemeza umukino w’umunsi wa 4 ugomba kubera muri Benin kubera ko Stade Huye itari yujuje ibisabwa (nta hoteli ziri ku rwego rwo kwakira amakipe zihari).

Nyuma bakicara bagasesengura neza bafashe umwanzuro ko uyu mukino uzabera kuri Kigali Pelé Stadium ku wa Kabiri tariki ya 28 Werurwe 2023 aho kuba tariki 27 Werurwe nk’uko byari biteganyijwe.

Ikindi bamenyeshejwe ni uko uyu mukino uzaba nta bafana barimo kubera ko Stade itujuje ibisabwa.

Ubundi byari byagenze bite ngo u Rwanda rwamburwe kwakirira mu rugo?

Mu ijoro rya ku wa Gatatu tariki yua 21 Werurwe 2023 ni bwo CAF yandikiye FERWAFA iyimenyesha ko i Huye ahari Stade imwe u Rwada rufite yemewe na CAF nta mahoteli ari ku rwego rw’inyenyeri 4 nk’uko CAF ibiteganya, bityo ko n’umukino wo kwishyura uteganyijwe tariki ya 27 Werurwe 2023 na wo uzabera muri Benin kuri Stade e l’Amitié Mathieu Kérékou. Umukino ubanza amakipe yombi yaraye anganyije 1-1.

Ibi ntabwo u Rwanda rwabyakiriye neza kuko CAF yari yabahaye uburenganzira bwo gukinira kuri iki kibuga umukino umwe ubundi rukazasabwa kuba ruffite byibuze amahoteli 3 ari ku rwego rw’inyenyeri 4 nk’uko amabwiriza ya CAF abisaba.

Amakuru avuga Ishyirahamwe ry’umupira w’amaguru mu Rwanda ryahise ryandikira CAF riyimenyesha ko babatunguye kuko bari baremerewe kwakirira kuri iki kibuga umukino umwe none bakaba babahakaniye hasigaye icyumweru, ikindi ni uko batumva uburyo bategekwa kwakirirwa muri Benin.

FERWAFA yavuze ko kuva CAF yabaha uburenganzira bwo kuhakirira itigeze igaruka kureba ibyo basabwe aho bigeze ahubwo bagendeye ku birego bw’uwo bahanganye wabitanze mu nyungu ze.

Ikindi ni uko mu nyandiko zose bohererejwe na CAF nta hantu na hamwe yigeze babwirwa ko hoteli igomba kuba ari inyenyeri 4 uretse mu itangazo rirabamenyesha ko umukino uzabera muri Benin ariko ntaho biri mu mategeko.

Bavuga ko amakosa atari ayabo kuko CAF yari yarabemereye kugikiniraho bityo ko bakabaye barashatse ikindi kibuga, bakaba batumva impamvu yo gutegekwa kwakirira muri Benin bagasaba ko bidashobotse ko bakinira i Huye u Rwanda ari rwo rwashaka ahandi ruzakirira Benin.

Ikindi rwari rwasabye ko niba ikibazo ari hoteli zitari i Huye bityo ko i Kigali zuzuye harebwa nibwa uyu mukino utakinirwa kuri Kigali Pele Stadium iheruka kuvugururwa (bafashe amashusho n’amafoto babyohereza muri CAF).

Nyuma yo kubona ko ikibazo cy’amahoteli kibaye ingorabahizi i Huye, amakuru ISIMBI yamenye ubu i Huye hari hoteli imwe irimo kuvugururwa amasigamana kugira ngo irebe ko yakuzuza ibisabwa ikagera ku rwego rw’inyenyeri 4.

Ni hoteli ya Centre d’Acceuil Mater Boni Consilii yari isanzwe ifite inyenyeri 3 n’igice, yatangiye kuvugururwa ku munsi w’ejo aho barimo gukora amanywa n’ijoro ngo barebe ko byagera ku wa Gatanu ibyaburaga babishyizemo.

Iyi hoteli ni yo ubusanzwe ikipe y’igihugu iyo iri bukinire i Huye ibamo ariko bakaba baremeye kuyiha Benin bo bagashaka indi.

Umukino w’Amavubi na Benin washyizwe kuri Kigali Pelé Stadium

Source : http://isimbi.rw/siporo/article/caf-yisubiyeho-umukino-uzanwa-i-kigali-unahindurirwa-umunsi

Kuri uyu wa Kane, tariki ya 23 Werurwe, umuriro udasanzwe wibasiye uruganda rw'Uburusiya rukora ibitwaro bya kirimbuzi.

Uyu muriro wibasiye uruganda rwa Yaroslavl Motor Plant- ruzwi kandi nka Avtodizel, ruherereye mu bilometero bisaga 200 mu majyaruguru ashyira uburasirazuba bwa Moscou.

Abakozi bagera kuri 218 bimuwe ubwo umuriro wagurumanaga mu nyubako,ukohereza umwotsi mwinshi wirabura mu kirere.

Ikinyamakuru The Sun kivuga ko abantu nibura barindwi bagombaga gutabarwa kuko bari mu kaga.

Uru ruganda rukora imodoka zitwara ibisasu bya kirimbuzi bya Topol-M hamwe n'ibindi bikoresho bikoreshwa n'ingabo z'Uburusiya – harimo n'amakamyo ya Ural.

Abashinzwe ibikorwa by'ubutabazi bamanutse vuba ahabereye umuriro.

Igipimo cy'ibyangiritse ntikiramenyekana ndetse ntibizwi niba bizatera gutinda gukora ibikoresho by'intambara Putin yashoye kuri Ukraine.

Source : https://umuryango.rw/amakuru/mu-mahanga/umutekano/article/uruganda-rukorerwamo-imodoka-zitwara-misile-z-uburusiya-rwafashwe-n-umuriro

Saidi Baraza yitabye Imana mu gitondo cyo kuri uyu wa 24 Werurwe 2023 aguye mu bitaro bya Ngozi aho yari amaze iminsi ibiri arwariye.
.

Saidi Brazza yaherukaga kuvugwa cyane mu myidagaduro yo mu Rwnada mu 2016 ubwo yari mu rubyiruko rwari rwajyanywe mu igororero rya Iwawa.

Uyu muhanzi yavukiye mu Rwanda mu Karere ka Huye , gusa umuryango werekeza i Burundi mu 1959 ari naho se na nyina bapfiriye .

Yamenyekanye cyane mu ndirimbo zakunzwe cyane nka Yameze amenyo, Twiganirira, Kugazaka n'izindi akaba amaze mu muziki imyaka 25.

Source : https://umuryango.rw/imyidagaduro/article/saidi-brazza-yitabye-imana

Amakuru aravuga ko abashinzwe umupira muri Benin batari kumvikana ku cyemezo cyo kuza mu Rwanda gukina umukino wa kane wo gushaka itike yo kwerekeza mu gikombe cya Afurika 2024.

Bamwe mu bayobozi ba Leta ya Bénin, bashaka ko ikipe y'igihugu y'umupira w'amaguru 'Les Guépards' yerekeza mu Rwanda kuri uyu wa Gatanu, abandi benshi mu bayobora umupira bo ntibabikozwa ndetse ngo barifuza ko iyi kipe ikorera imyitozo i Cotonou muri iki gihugu.

Ibyo biri kuba Impuzamashyirahamwe y'Umupira w'Amaguru ku Mugabane wa Afurika, CAF,igicecetse aho itarahindura umwanzuro yafashe w'uko u Rwanda rugomba gukinira imikino yombi i Cotonou muri Bénin.

Amavubi yo yamaze kugera mu Rwanda mu rukerera rwo kuri uyu wa Gatanu, ndetse biteganyijwe ko akorera imyitozo kuri stade ya Pele Kigali Stadium uyu munsi.

CAF ntacyo iratangaz kuri uyu mukino wo kwishyura na Bénin uzaba tariki 27 Werurwe 2023.

Yaba Amavubi na Benin bose bari mu gihirahiro ndetse ntibizwi neza abazafata indege kugira ngo bajye gukina uyu mukino.

FERWAFA yabwiye CAF ko itakinira umukino wo kwishyura i Cotonou cyane ko biri mu burenganzira bw'igihugu kwishakira stade yakiriraho umukino.

U Rwanda rufite amanota abiri ku icyenda, mu gihe Bénin ifite inota rimwe mu mikino itatu imaze gukinwa muri iri tsinda rya L.

Source : https://umuryango.rw/imyidagaduro/imikino/article/abanya-benin-bari-gusubiranamo-kubera-umukino-n-u-rwanda

Itsinda ry'abasirikare rya Uganda (UPDF) ziragera I Goma muri Kivu ya Ruguru mu mpera z'uku kwezi kwa werurwe 2023.

Ziraba zije Kongera umubare w'abasirikare wagenywe n'abakuru b'ibihugu by'afurika y'iburasirazuba ngo zihangane n'ishyirwa mu bikorwa ry'imyanzuro igamije amahoro hagati ya M23 n'ubutegetsi bwa Congo.

Mu itangazo ryaraye risohowe n'abakuriye iryo tsinda rya Gisirikare muri Uganda ubwo bagiranaga ibiganiro na Guverineri wa Kivu ya ruguru (lieutenant général Constant Ndima.

Ikigenza igisirikare cya Uganda muri Kivu ya Ruguro ngo nukwambura intwaro imitwe izitunze binyuranije n'amategeko no kugira uruhare mu kugarura amahoro muri icyo gice.

Ibice byahawe uruhande rwa Uganda ni zone yose ya Rutshuru nkuko byemejwe n'ukuriye itsinda ry'igisirikare UPDF colonel Michael Walaka,ari kumwe na abakuru ba état-major b'igisirikare cya EAC.

Aba bategetsi bahise bahamagarira abaturage b'intara kubatiza amaboko bagashya abababuza umutekano n'iterambere rirambye binyuze mu gutanga amakuru n'ubundi bufasha bushoboka bwose.

Ingabo za EAC zamaze kugera muri Congo ubu, n'iza Kenya n'Uburundi bahawe Teritoire ya Masisi na Rutshuru.

R.okapi

Source : https://umuryango.rw/amakuru/mu-mahanga/umutekano/article/goma-ingabo-za-uganda-ziriyongera-kuzindi-za-eac-ziri-muri-kongo

Hano twabakusanyirije amwe mu mafoto y'ibyamamarekazi nyarwanda bitandukanye yabiciye bigacika kuri instagram muri iyi minsi y'icyumweru turangije,aho uri busange higanjemo amafoto ya bakobwa bazwi nk'aba Miss.

1.Miss Uwase Muyango

2. Miss Nishimwe Naomie


3.Miss Kayibanda Aurore

4.Miss Mutesi Jolly


5.BIANCA BABY

Source : https://umuryango.rw/imyidagaduro/article/ihere-ijisho-amafoto-y-ibyamamarekazi-nyarwanda-yabiciye-bigacika-kuri-70154

Imyigaragambyo ikomeye mu Bufaransa ikomeje kwangirikiramo byinshi aho abashinzwe umutekano 123 bamaze kuyikomerekeramo hanyuma n'amazu agatwikwa.

Amashusho yagiye hanze yerekanye inzu mberabyombi yumujyi wa Bordeaux itwikwa muri iyi myigaragambyo yadutse iturutse ku cyemezo cya Perezida Macron cyo kuzamura imyaka ya pansiyo mu bufaransa.

Amashusho yerekanye iyi nyubako ikomeye iri gushya ubwo abigaragambyaga babarirwa mu magana barimo baririmba.Imyigaragambyo mu gihugu cyose irakomeje aho igeze ku munsi wa cyenda.

Abigaragambyaga bafunze sitasiyo za gariyamoshi, ikibuga cy'indege cya Charles de Gaulle i Paris, inganda n'ibyambu kuko hateganijwe imyigaragambyo irenga 250 mu gihugu hose.

Polisi kandi yateye ibyuka biryana mu maso kuri bamwe mu bigaragambyaga mu yindi mijyi myinshi, harimo Nantes na Bordeaux mu burengerazuba, kandi ikoresha amazi afite ingufu ku bandi i Rennes mu majyaruguru ashyira uburengerazuba.

Minisitiri w'umutekano mu gihugu Gerald Darmanin yavuze ko,mu Bufaransa, abashinzwe umutekano 123 bakomeretse kandi byibuze abantu 80 batawe muri yombi.

Iyi myigaragambyo yahungabanyije uruzinduko rw'umwami Charles mu Bufaransa mu cyumweru gitaha aho abigaragambyaga banze gutanga itapi itukura ndetse n'imyanda yuzuye mu mihanda ya Paris.

Icyemezo cya Perezida Emmanuel Macron cyo kuzamura imyaka y'abajya mu kiruhuko cy'izabukuru ikava kuri 62 ikagera kuri 64 cyarakaje abafaransa benshi ariyo mpamvu bari kwigaragambya.

Abigaragambya kuri uyu wa Kane bigabije imijyi myinshi irimo na Paris aho barwanye na polisi yabateraga ibyuka biryana mu maso ndetse ikanabakubitisha indembo.

Abafaransa barushijeho kurakara cyane ubwo Perezida Macron yavugaga ko iki cyemezo nubwo kitemejwe n'inteko ishinga amategeko kizatangira gushyirwa mu bikorwa mu mpera z'uyu mwaka.

Source : https://umuryango.rw/amakuru/mu-mahanga/umutekano/article/ubufaransa-abashinzwe-umutekano-barenga-120-bamaze-gukomerekera-mu

Abasifuzi 4 bagomba kuzasifura umukino w’ikipe y’igihugu Amavubi na Benin mu gushaka itike y’igikombe cy’Afurika cya 2023 bamaze gufata indege baza i Kigali.

Ni mu gihe CAF itaratangaza aho uyu mukino w’umunsi wa 4 w’itsinda L mu gushaka itike y’igikombe cy’Afurika uzabera.

Ni nyuma y’uko CAF yari yamenyesheje FERWAFA ko Huye Stadium izakira uyu mukino nta hoteli ziri ku rwego rwiza zacumbikira amakipe.

FERWAFA yahise yandikira CAF iyimenyesha ko bayitunguye kandi bari barahawe uburenganzira bwo kwakirira kuri Stade Huye ndetse n’icyo kibazo cya hoteli bakizi bakaba batumva ukuntu babategeka kwakirira muri Benin, bityo ko batahakirira ndetse bahita bafata umwanzuro wo kugaruka mu Rwanda aho banahageze mu ijoro ryakeye.

Abafuzi bakomoka muri Somalia ni bo bazasifura uyu mukino aho Omar Abdulkadir Artan ari we uzaba ari umusifuzi wo hagati, Suleiman Bashir ni we musifuzi wa mbere w’igitambaro mu gihe uwa 2 ari Nour Abdi Muhamed n’aho umusifuzi wa 4 ni Mohamed Hagi.

Abinyujije ku rukuta rwe rwa Instagram, Abdukadir Artan yavuze ko bahagurutse baza mu Rwanda.

Artan yavuze ko baje mu Rwanda

Abasifuzi 4 bazafura umukino wa Benin n’Amavubi bahagurutse baza mu Rwanda

Source : http://isimbi.rw/siporo/article/abasifuzi-bagomba-gusifura-umukino-w-amavubi-na-benin-bafashe-indege-iza-mu-rwanda

Amakuru aturuka mu gihugu cya Benin ni uko ubuyobozi bw’iki gihugu bwifuza ko ikipe y’igihugu ya Benin iza mu Rwanda gukina n’Amavubi ni mu gihe ubuyobozi bwa Siporo butabikozwa butegereje ijambo rya CAF.

Ubundi byatangiye ubwo Benin yatangaga ikirego muri CAF ivuga ko batazaza mu Rwanda gukina umukino w’umunsi wa 4 w’itsinda L mu gushaka itike y’igikombe cy’Afurika cya 2023 kizabera muri Côte d’Ivoire aho bavugaga ko Stade ya Huye izakira uyu mukino nta hoteli ihari yo ku rwego CAF yashyizeho.

Byatumye mu ijoro ryo ku wa 21 Werurwe 2023 CAF yandikira FERWAFA iyimenyesha ko uyu mukino wakuwe Huye ugashyirwa muri Benin.

FERWAFA yahise yandikira CAF iyimenyesha ko bayitunguye kandi bari barahawe uburenganzira bwo kwakirira kuri Stade Huye ndetse n’icyo kibazo cya hoteli bakizi bakaba batumva ukuntu babategeka kwakirira muri Benin, bityo ko batahakirira ndetse bahita bafata umwanzuro wo kugaruka mu Rwanda aho banahageze mu ijoro ryakeye.

Nyuma yo kubona ko Amavubi afashe umwanzuro wo kugaruka mu Rwanda, amakuru avuga ko inzego z’ubuyobozi muri Benin zahise zinjira muri iki kibazo mu rwego rwo kwanga ko umubano mwiza w’u Rwanda na Benin utokozwa na Siporo.

Bivugwa ko basabye Benin gufata indege uyu munsi ku wa Gatanu bakaza mu Rwanda bakarara muri Park Inn Hotel maze ku munsi w’ejo bakerekeza i Huye aho bagombaga kujya muri Hotel Mater Boni Consilii.

Bivugwa ko abayobozi ba Siporo babyanze bavuga ko kuri uyu wa Gatanu bakorera imyitozo muri Benin kuko batafata indege iza mu Rwanda bataramenya icyemezo cya CAF kuko ibaruwa iheruka ari uko umukino uzabera muri Benin nta kindi cyemezo kiraza kikivuguruza.

Hari andi makuru kandi avuga ko mu gihe CAF yakwanga ko umukino ubera Huye, harimo gutekerezwa ku kuntu umukino wazabera Tanzania cyangwa Afurika y’Epfo.

U Rwanda na Benin bisanzwe bifitanye umubano mwiza ntiwahungabanywa na Siporo

Akimara gutorwa mu 2016, Perezida wa Bénin, Patrice Talon yagiriye uruzinduko mu Rwanda muri Kanama uwo mwaka, rwari rugamije gushimangira umubano na mugenzi we w’u Rwanda.

Muri Nyakanga 2022, Umugaba Mukuru w’Ingabo za Bénin, Brig Gen Fructueux Candide Ahodegnon Gbaguidi, na we yagiriye uruzinduko rw’akazi i Kigali, abonana na mugenzi we w’Ingabo z’u Rwanda Gen. Jean Bosco Kazura.

Nyuma gato y’uru ruzinduko, Bénin yavanyeho ikiguzi cy’uruhushya rwo kwinjira muri icyo gihugu (viza) ku Banyafurika bashaka kuhasura no kuhamara igihe.

Perezida Talon yavuze ko yanyuzwe n’icyemezo cy’u Rwanda cyo gukuraho Viza ku Banyafurika bashaka kuruzamo, na we yiyemeza kugera ikirenge mu cyarwo.

Mu mpera za 2022, Leta ya Benin yatangaje ko yatangiye ibiganiro na Guverinoma y’u Rwanda, bigamije gusaba inkunga y’ibikoresho n’ubunararibonye mu guhangana n’ibyihebe bigendera ku matwara ya Kiyisilamu bimaze gushinga ibirindiro mu majyaruguru y’Igihugu.

Ubu hari abanyarwanda bari mu buyobozi Bukuru bwa Benin aho mu ntangiriro z’uku kwezi, Inama y’Abaminisitiri ya Bénin ifashe icyemezo cyo gushyira Nyamulinda Pascal ku buyobozi bukuru bw’Ikigo gishizwe Indangamuntu (ANIP), asimbuye Cyrille Gougbédji.

Nyamulinda yayoboye Umujyi wa Kigali muri Gashyantare 2017 n’Ikigo cy’Igihugu gishinzwe indangamuntu mu Rwanda (NIDA) kuva mu 2007.

Richard Dada ni undi Munyarwanda washyizwe mu myanya yo hejuru, mu buyobozi bw’ikigo cyo muri Bénin Gishinzwe ubwikorezi bwo ku butaka (ANATT: Agence Nationale des transports terrestres), mu byemezo byafashwe muri Mutarama uyu mwaka.

Richard Dada yahoze ari umukozi mu Kigo cy’Imisoro n’Amahoro mu Rwanda, mu ishami rishinzwe iperereza no kugenzura iyubahirizwa ry’amategeko agenga imisoro.

Umukino w’Amavubi na Benin ntiharamenyekana aho uzabera

Source : http://isimbi.rw/siporo/amavubi-yateje-uruntu-runtu-muri-benin-itegereje-ijambo-rya-nyuma-rya-caf