Author: webrwanda

Leta y'u Rwanda yemeje ivugururwa ry'itegeko ryatangijwe na Perezida wa Repubulika, hagamijwe guhuza ingengabihe y'amatora y'Abagize lnteko Ishinga Amategeko n'itora rya Perezida wa Repubulika akazajya abera rimwe.

Inama y'Abaminisitiri yayobowe na Perezida Paul Kagame yateranye kuri uyu wa Gatanu tariki 24 Werurwe 2023, niyo yabyemeje.

Ubusanzwe mu Rwanda, amatora y'abadepite n'aya Perezida wa Repubulika yabaga mu myaka itandukanye cyane ko na manda zitanganaga.

 Manda ya Perezida yari imyaka irindwi, iy'abadepite ikaba imyaka itanu.

Iyi gahunda nitangira gushyirwa mu bikorwa manda y'abadepite bariho uyu munsi yakwiyongeraho umwaka umwe ikazarangira mu 2024.

Tariki 15 Gashyantare 2023, nibwo Komisiyo y'Igihugu y'Amatora yatanze icyifuzo cy'uko amatora ya Perezida wa Repubulika n'ay'Abadepite yahuzwa, akazajya abera rimwe buri myaka itanu.

Icyo gihe iyi komisiyo yavugaga ko kuba aya matora aba mu bihe bitandukanye bihenda igihugu.

 Komisiyo y'Igihugu y'Amatora igaragaza ko nibura itora rya Perezida wa Repubulika n'iry'abadepite yose hamwe atwara arenga miliyari 14Frw. Bivuze ko iyo izi mpinduka zitabaho, u Rwanda rwari kuzakoresha miliyari 7Frw mu 2023 mu matora y'abadepite, rukazongera gukoresha izindi miliyari 7Frw mu itora rya Perezida wa Repubulika.

Iyi komisiyo igaragaza ko mu gihe aya matora azaba ahurijwe hamwe hazakoreshwa ingengo y'imari ya miliyari 8Frw.

The post <strong>U Rwanda rwemeje ko amatora ya Perezida n'aya'Abadepite azajya abera rimwe</strong> appeared first on FLASH RADIO&TV.

Source : https://flash.rw/2023/03/25/u-rwanda-rwemeje-ko-amatora-ya-perezida-nayaabadepite-azajya-abera-rimwe/?utm_source=rss&utm_medium=rss&utm_campaign=u-rwanda-rwemeje-ko-amatora-ya-perezida-nayaabadepite-azajya-abera-rimwe

Amerika yavuze ko yakiriye neza ifungurwa rya Paul Rusesabagina nyuma yuko mu 2021 yari yakatiwe gufungwa imyaka 25 ahamijwe ibyaha by'iterabwoba.

Mu butumwa bwo kuri Twitter, Minisitiri w'ububanyi n'amahanga w'Amerika Antony Blinken yagize ati: “Nishimiye irekurwa uyu munsi rya Paul Rusesabagina. Nishimiye kumenya ko Paul azongera kubonana n'umuryango we vuba.

“Ndashimira Leta y'u Rwanda kuba yatumye uku kongera guhura gushoboka. Ndanashima ubufasha bwa Leta ya Qatar”.

Mu kiganiro na Radio Rwanda, umuvugizi wungirije wa leta y'u Rwanda Alain Mukuralinda yavuze ko igihugu cya Qatar cyabigizemo uruhare nk'”inshuti” y'u Rwanda.

Ku wa gatanu, minisiteri y'ubutabera mu Rwanda yatangaje ko Paul Rusesabagina na Callixte Nsabimana alias 'Sankara' n'abandi 18 bari bafunganywe bahoze muri MRCD-FLN bahawe imbabazi kugira ngo barekurwe.

Itangazo rya minisiteri y'ubutabera rigaragaza amabaruwa abiri yanditswe mu Kwakira (10) umwaka ushize ya Rusesabagina na 'Sankara' asaba imbabazi Perezida Paul Kagame.

Ku wa gatanu, Mukuralinda yabwiye BBC Gahuzamiryango ko Rusesabagina na 'Sankara' biteganyijwe ko barekurwa mu gitondo cyo kuri uyu wa gatandatu kandi ko Rusesabagina atarekuwe ku bw'igitutu cy'Amerika yari yakomeje gusaba ko arekurwa.

Muri Nzeri (9) 2021 Rusesabagina na Nsabimana Callixte 'Sankara' bakatiwe gufungwa imyaka 25 undi 20 bahamijwe ibyaha byo kuba mu mutwe w'iterabwoba no gukora iterabwoba.

Mukuralinda yavuze ko bahawe imbabazi kuko bazisabye kandi hakabaho ibiganiro n'abifuzaga ko Rusesabagina arekurwa.

Mukuralinda ati: “Igitsure [Igitutu] no kuganira ni ibintu bibiri bitandukanye…Igihe cyose Leta Zunze Ubumwe z'Amerika cyangwa se n'abandi babisabiye baba barahise babibona kandi ntabwo ariko byagenze, bigomba gukorwa mu nzira amategeko yateganyije, ndetse nta n'uwahisha ko habaye ibiganiro igihugu cya Qatar kikabifashamo cyane”.

Itangazo rya minisiteri y'ubutabera rigaragaza amabaruwa abiri yanditswe mu Ukwakira (10) umwaka ushize ya Rusesabagina na 'Sankara' asaba imbabazi Perezida Kagame.

BBC yagerageje kuvugana n'umwunganizi wa Paul Rusesabagina kuri iyi baruwa ye, ntibyashobotse ndetse n'umuryango we nta cyo wasubije ku busabe bwa BBC kuri iyo baruwa.

Mu itangazo, umuryango wa Rusesabagina wabwiye BBC uti: “Twishimiye kumva iyo nkuru yo kurekurwa kwa Paul. Umuryango wizeye kongera guhura nawe vuba”.

Muri Kanama (8) mu 2022, Minisitiri w'ububanyi n'amahanga w'Amerika Antony Blinken yagiriye uruzinduko mu Rwanda, aho yagiranye ibiganiro n'abategetsi barimo na Perezida Kagame.

Zimwe mu ngingo yaganiriyeho na Perezida Kagame ni Rusesabagina “wafunzwe mu buryo butari bwo” n'u Rwanda, nkuko byatangajwe na minisiteri y'ububanyi n'amahanga y'Amerika.

Icyo gihe, leta y'u Rwanda yavuze ko uruzinduko rwa Blinken yari andi mahirwe yo gusobanura ko ifatwa n'ifungwa rya Rusesabagina byari bikurikije amategeko.

BBC

Source : https://umuryango.rw/amakuru/mu-mahanga/politiki/article/nishimiye-irekurwa-rya-paul-rusesabagina-antony-blinken

Abayobozi ba Leta Zunze Ubumwe za Amerika, batangaje ko Paul Rusesabagina yavuye muri Gereza ya Nyarugenge aho yari afungiwe, akajyanwa mu rugo rwa Ambasaderi wa Qatar i Kigali.

Ahagana Saa Yine z'ijoro nibwo Paul Rusesabagina yavanywe muri Gereza hubahirizwa umwanzuro w'imbabazi yahawe n'Umukuru w'Igihugu. Bivugwa ko yahise ajyanwa mu rugo rwa Ambasaderi wa Qatar, aho agomba kumara iminsi mike mbere y'uko yerekeza i Doha aho azahurira n'umuryango we, agakomeza urugendo rujya muri Amerika aho yari asanzwe atuye.

Mu minsi azamara muri Ambasade ya Qatar, amakuru agera kuri IGIHE avuga ko azayifashisha asaba Minisitiri w'Ubutabera uburenganzira bwo kuba yasohoka mu gihugu.

Mu ibaruwa Rusesabagina yandikiye Umukuru w'Igihugu asaba imbabazi, hari aho yavuzemo ko ashaka gusanga umuryango we muri Amerika.

Umwe mu bayobozi ba Amerika, yabwiye itangazamakuru ko nta kintu cyihariye Amerika yemereye u Rwanda kugira ngo rurekure Rusesabagina.

Ati 'Ntekereza ibi nk'intambwe yatewe bigizwemo uruhare na Guverinoma y'u Rwanda, iya Leta Zunze Ubumwe za Amerika na Paul ubwe.'

Ubwo Rusesabagina yasohokaga muri gereza, bivugwa ko mu bamwakiriye harimo n'abayobozi ba Ambasade ya Amerika mu Rwanda, ndetse ko banamuherekeje agenda.

Amerika ivuga ko ikibazo cya Rusesabagina cyari agatotsi gakomeye mu mubano wayo n'u Rwanda. Kugira ngo afungurwe, ngo hari hashize amezi hari ibiganiro bihuza impande zitandukanye zirebwa n'ikibazo cye.

Umuvugizi muri Perezidansi, Stephanie Nyombayire, yanditse kuri Twitter ko guhabwa imbabazi kwa Rusesabagina bidakuraho igihano yahamijwe, ndetse ko gishobora gusubizwaho mu gihe yaba asubiriye ibyaha yakoze.

Ati 'Umubano mwiza hagati y'u Rwanda na Qatar, wabaye ingenzi cyane.'

Yakomeje avuga ko irekurwa rya Rusesabagina ari umusaruro 'w'ubushake buhuriweho bwo kuzahura umubano w'u Rwanda na Leta Zunze Ubumwe za Amerika'.

IVOMO:IGIHE

Source : https://umuryango.rw/amakuru/mu-rwanda/ubuzima/article/hamenyekanye-aho-rusesabagina-yajyanwe-nyuma-yo-gufungurwa

Perezida Kagame yashyize mu myanya abayobozi bashya aho Minisiteri y'Urubyiruko yahawe Dr Abdallah Utumatwishima Minisitiri mu gihe Busabizwa Parfait yagizwe Umunyamabanga Uhoraho muri Minisiteri y'Urubyiruko.

Dr Utumatwishima yasimbuye Rosemary Mbabazi wari Minisitiri w'Urubyiruko guhera mu 2017. Uyu mugabo wamukoreye mu ngata, yari asanzwe ari Umuyobozi w'Ibitaro bya Rwamagana.

Yarangije muri Kaminuza y'u Rwanda mu 2009. Yabonye Masters mu bijyanye n'ubuvuzi rusange mu 2016 ayikuye muri Kaminuza ya Manchester Metropolitan.

Ni umuhanga mu kubaga, aho yakoze igihe kigera ku myaka ibiri mu bitaro bya Ruhengeri abaga abantu bafite ibibyimba bifata mu muhogo ku buryo bishobora kuvamo cancer. Yabaze abarwayi barenga 500.

Busabizwa wagizwe Umunyamabanga Uhoraho muri Minisiteri y'Urubyiruko, yari asanzwe ari Umunyamabanga Nshingwabikorwa w'Intara y'Amajyepfo. Yigeze no kuba Umuyobozi w'Umujyi wa Kigali w'Umusigire nyuma y'uko Rwakazina Marie Chantal wari ufite izo nshingano yari amaze kugirwa Ambasaderi muri Kanama 2019.

Mbere yaho, guhera muri Werurwe, Busabizwa yari Umuyobozi Wungirije w'Umujyi wa Kigali ushinzwe iterambere ry'Ubukungu.

Usibye abahawe inshingano muri Minisiteri y'Urubyiruko, Umukuru w'Igihugu yashyizeho na ba Ambasaderi bashya barimo Gen Maj Charles Karamba wagizwe Ambasaderi w'u Rwanda muri Angola.

Gen Maj Karamba yari asanzwe ari Ambasaderi w'u Rwanda muri Tanzania, mu gihe muri Angola agiye hari Wellars Gasamagera guhera muri Nyakanga 2019.

Vincent Karega yagizwe Ambasaderi w'u Rwanda mu Bubiligi nyuma y'igihe gito yirukanywe na Repubulika Iharanira Demokarasi ya Congo nk'uwari uhagarariye u Rwanda muri icyo gihugu. Mu Bubiligi asimbuye Dr Sebashongore Dieudonné.

Dr Richard Masozera wari usanzwe ari Ambasaderi w'u Rwanda muri Kenya, yahawe inshingano muri Tchèque. Ni ambasade nshya igiye kuvuka kuko ubusanzwe uwari ufite izi nshingano zo kureberera Tchèque, yari Ambasaderi w'u Rwanda mu Budage.

Rosemary Mbabazi wari Minisitiri, yagizwe Ambasaderi w'u Rwanda muri Ghana, asimbuye Aissa Kirabo Kakira wari muri izi nshingano guhera mu 2019.

Kirabo aherutse kugirwa guhabwa inshingano zo kuyobora Ibiro by'uyu muryango (United Nations Support Office in Somalia: UNSOS) bifasha Afurika Yunze Ubumwe mu butumwa bw'amahoro muri Somalia. Ni imirimo yahawe n'Umunyamabanga Mukuru w'Umuryango w'Abibumbye, Antonio Guterres.

Sheikh Abdul Karim Harerimana we yagizwe Ambasaderi w'u Rwanda muri Indonesia, imwe muri Ambasade nshya u Rwanda rwungutse.

Muri Gashyantare, Minisitiri w'Ububanyi n'amahanga w'u Rwanda, Dr Vincent Biruta yagiranye ibiganiro na mugenzi we wa Indonesia, Retno Lestari Priansari Marsudi, bemeranye ku ifungurwa ry'iyi Ambasade.

Source : https://umuryango.rw/amakuru/mu-rwanda/politiki/article/perezida-kagame-yashyizeho-minisitiri-mushya-w-urubyiruko-wari-usanzwe-ari

Ikigo cy'Igihugu gishinzwe ibizamini n'ubugenzuzi bw'amashuri (NESA), cyasohoye itangazo rimenyesha abanyeshuri, ababyeyi, abarimu, abayobozi b'amashuri ndetse n'abafatanyabikorwa, ko hari impinduka zabayeho muri gahunda y'ingendo zo gutaha kw'abanyeshuri.

Iryo tangazo rivuga ko rwego rwo korohereza abanyeshuri bahagurukira i Kigali n'ahandi banyura muri Kigali berekeza mu zindi Ntara, bazafatira imodoka zibajyana mu miryango yabo kuri Stade ya ULK ku Gisozi, aho guhagurukira kuri Kigali Pelé Stadium, ahasanzwe hazwi nko kuri Stade ya Kigali i Nyamirambo, mu Karere ka Nyarugenge.

NESA yaboneyeho umwanya wo gusaba abo bireba kwihanganira izo mpinduka zabayeho.

Source : https://umuryango.rw/amakuru/mu-rwanda/uburezi/article/nesa-yakoze-impinduka-ku-byerekeye-ingendo-z-abanyeshuri

Umunya Chile,Alexis Sanchez yahishuye ko umutoza Jose Mourinho yashoboye kumuhindura ibitekerezo akanga kwerekeza muri Manchester City agahitamo Manchester United nyuma yo kumusezeranya ko azamuha nimero 7 yambawe n'ibyamamare muri iyi kipe.

Sanchez yerekeje kuri Old Trafford avuye muri Arsenal muri Mutarama 2018,agurana na Henrikh Mkhitaryan wahise aza i Emirates.

Kongera guhura kwa Sanchez na Pep Guardiola wamutoje muri FC Barcelona kwarashobokaga bahuriye kuri Eithad gusa uyu munya Chile yahisemo kwerekeza muri mukeba.

Icyakora ngo byagizwemo uruhare runini na Jose Mourinho wamuhaye byinshi kugeza kuri nimero 7 yambawe n'ibyamamare muri United nka Ronaldo,Beckham,Best na Cantona.

Sanchez yagize ati: “Nari hafi kwerekeza muri City.Navuganaga na Guardiola buri munsi, yanyifurije isabukuru nziza.

Yari ameze nka data.Yari data muri Barcelona ndetse yari na data muri City.

Twaravuganaga buri munsi,yanyohererezaga ubutumwa.Ibintu byose byari ku murongo,hari umukinnyi wagombaga kuza muri Arsenal.

Hanyuma [Arsene] Wenger arambwira ngo ntabwo uragenda kubera ko undi mukinnyi ntabwo ashaka kuza kandi nta wundi mukinnyi bari bafite.

Bitunguranye,telefoni yarasonye. Mourinho arambwira ati: 'Alexis,hano hari nimero 7 [nimero yo ku mupira] igutegereje. “

Sanchez yarakaje abafana ba Arsenal ubwo yerekezaga kuri Old Trafford,agahabwa umushahara w'ibihumbi 391,000 by'amapawundi hatarimo uduhimbazamusyi.

Uyu mugabo ukinira Marseille yavuze ko kuva muri Arsenal bitatewe n'amafaranga.

Uyu mukinnyi w'imyaka 34 yagize ati: “Ntabwo bijyanye n'amafaranga buri wese arabizi.

Yarambwiye ati hano hari nimero 7,tugiye gukina Champions League kandi turaguha buri kimwe.

Nashakaga kugenda muri uwo mwanya ariko nari mfite ijambo rya Guardiola.

Aho niho nibwiye nti “umunya Chile gukina muri Manchester United, ni ikintu kitigeze kibaho.

Nimero 7 yambawe na [Eric] Cantona, [David] Beckham, Cristiano Ronaldo ubu ikaba ikaba iy'umunya Chile, ni inzozi.”

Sanchez yananiwe kwitwara neza kuri Old Trafford,atsinda ibitego 5,anatanga imipira 9 yavuyemo ibitego mu mikino 45 yakiniye Man United.

Yavuze ko aticuza kuba yaragiye muri United kuko ngo ikintu cyose kigira impamvu ariko avuga ko yakabaye yarerekeje muri Man City kuko ngo yari kuyifasha gutwara Champions League.

Source : https://umuryango.rw/imyidagaduro/imikino/article/alexis-sanchez-yahishuye-ikintu-gitangaje-jose-mourinho-yamushukishije-kigatuma

Perezida Paul Kagame, yashyizeho abayobozi mu nzego zitandukanye, aho Dr Abdallah Utumatwishima yagizwe Minisitiri w'Urubyiruko mu gihe Busabizwa Parfait yagizwe Umunyamabanga Uhoraho muri iyi Minisiteri.

Dr Utumatwishima yasimbuye Rosemary Mbabazi wari Minisitiri w'Urubyiruko guhera mu 2017.

Rosemary Mbabazi we yagizwe Ambasaderi w'u Rwanda muri Ghana

Uyu mugabo wamukoreye mu ngata, yari asanzwe ari Umuyobozi w'Ibitaro bya Rwamagana.

Busabizwa wagizwe Umunyamabanga Uhoraho muri Minisiteri y'Urubyiruko, yari asanzwe ari Umunyamabanga Nshingwabikorwa w'Intara y'Amajyepfo. 

Abandi bahawe inshingano nshya barimo Gen Maj Charles Karamba wagizwe Ambasaderi w'u Rwanda muri Angola, Vincent Karega yagizwe Ambasaderi w'u Rwanda mu Bubiligi nyuma y'igihe gito yirukanywe na Repubulika Iharanira Demokarasi ya Congo nk'uwari uhagarariye u Rwanda muri icyo gihugu naho Dr Richard Masozera yagizwe Ambasaderi w'u Rwanda muri Tchèque.

Perezida Kagame kandi yagize Sheikh Abdul Karim Harerimana Ambasaderi w'u Rwanda muri Indonesia, Martin Ngoga agirwa Ambasaderi w'u Rwanda muri Kenya.

 Nkubito Manzi Bakuramutsa yagizwe Ambasaderi w'u Rwanda muri Korea.

 Eugene Segore Kayihura yagizwe Ambasaderi w'u Rwanda muri Arabie Saoudite mu gihe Emmanuel Hategeka yagizwe Ambasaderi w'u Rwanda muri Afurika y'Epfo.

Umukuru w'igihugu yanagize Fatou Harerimana Ambasaderi w'u Rwanda muri Tanzania, naho John Mirenge agirwa Ambasaderi w'u Rwanda muri Leta Zunze Ubumwe z'Abarabu.

Mu bandi bayobozi bahawe inshingano, harimo abo mu Biro by'Umukuru w'Igihugu barimo  Valens Uwineza wagizwe Umuyobozi wungirije w'Ibiro bya Perezida wa Repubulika, Mauro De Lorenzo agirwa Umuyobozi ushinzwe ishyirwa mu bikorwa rya gahunda.

Nelly Mukazayire yagizwe Umuyobozi Mukuru wungirije mu Rwego rushinzwe iterambere mu Rwanda (RDB).

Janet Karemera agirwa Umuyobozi Mukuru mu Kigo cy'Igihugu gishinzwe guteza imbere Ubukerarugendo bushingiye ku nama (RCB),  mu gihe Candy Basomingera yagizwe Umuyobozi Mukuru wungirije.

The post <strong>Dr Utumatwishima yagizwe Minisitiri w'Urubyiruko, Ambasade z'u Rwanda zihabwa abayobozi bashya</strong> appeared first on FLASH RADIO&TV.

Source : https://flash.rw/2023/03/25/dr-utumatwishima-yagizwe-minisitiri-wurubyiruko-ambasade-zu-rwanda-zihabwa-abayobozi-bashya/?utm_source=rss&utm_medium=rss&utm_campaign=dr-utumatwishima-yagizwe-minisitiri-wurubyiruko-ambasade-zu-rwanda-zihabwa-abayobozi-bashya

Ibi bihembo byari mu byiciro bitandukanye birimo abagore bakora ibikorwa by'indashyikirwa, ibigo byashyize imbere guteza imbere abagore hakaba n'icyiciro cyo guhemba abagore bakoze ibikorwa birengera uburenganzira bw'abagore by'igihe kirekire.

Nyuma y'uko hatoranyijwe abagore batandukanye muri ibi byiciro bamwe bakagenda batorwa n'abakunzi babo, kuri uyu wa Gatanu tariki 24 Werurwe 2023 bashyikirijwe ibihembo.

Ibi bihembo byegukanywe n'abagore batandukanye barimo n'abasanzwe bazwi barimo Marie Immaculée Ingabire, Sandrine Isheja, Aline Gahongayire, Mudakikwa Pamella, Umutesi Scovia, Niwemwiza Anne Marie n'abandi batandukanye.

Ibigo byahembewe kwimakaza ihame ry'uburinganire no guteza imbere abagore birimo; Banki ya Kigali (BK), Urwego Bank, Ritco, Radiant Insurance n'ibindi.

Bamwe mu bahawe ibi bihembo bashimiye iki kigo n'abafatanyabikorwa bacyo bafashe umwanya wo kubashimira, bemeza ko bigiye kubongerera imbaraga mu mikorere.

Ikigo 'Ubudasa Wall Paints' gikora imirimo yo gusiga amarangi haba mu nyubako zo guturamo, izo gukoreramo n'iz'ubucuruzi, mu buryo busa n'ubwihariye, ni kimwe mu byahawe ibihembo.

Umugwizawase Delphine uri mu bagitangije yavuze ko iki gihembo kigiye kubongerera icyizere mu kazi kabo.

Ati 'Turishimye cyane ko twabashije guhiga abandi, ubusanzwe dukora ibijyanye no gutunganya inzu mu bijyanye n'amasuku mu buryo bugezweho. Iki ni igihembo kigiye kutwongerera imbaraga nk'abagore dusanzwe dukora ibintu batekereza ko ari iby'abagabo.'

Umugwizawase akomeza avuga ko mu bikorwa byabo banafasha abantu gutegura inyubako zabo bareba ibiberanye nazo kugeza ku mitako n'ibindi byose byarushaho kugaragaza inkuta zazo mu buryo bw'akataraboneka.

Si ibyo gusa kuko banatanga inama ku mahitamo y'amarangi wakoresha mu gihe ugeze mu gihe cy'iyo mirimo kandi bakavura ubukonje bwazengereje inyubako za benshi.

Bafite ubushobozi bwo guhanga ibihangano bigaragara mu buryo bw'amashusho agezweho ya 3D, aho bashobora kugukorera ahantu hakagaragara mu ishusho y'urutare, ikirunga cyangwa ikindi gishobora kuza mu ntekerezo zabo babikomoye ku gukomatanya umuco n'iterambere.

Mureshyankwano Jeanne wo mu Karere ka Muhanga uhinga imboga akanabyigisha n'abandi, yavuze ko atigeze akeka ko ibikorwa bye azabishimirwa.

Ati 'Napfakaye nkiri muto ndakenyera ndakomeza kugira ngo niteze imbere, ubu rero ndi umuhinzi w'imboga kandi nabyigishije n'abandi twese tukiteza imbere. Iki gihembo cyanshimishije kuko si nigeze ntekereza ko nagihabwa.'

Ku ruhande rw'Umuyobozi w'Inama y'Igihugu y'Abagore (CNF), Jackline Kamanzi Masabo, yashimiye abateguye iki gikorwa cyo guhemba abagore mu byiciro bitandukanye.

Ati 'Uyu ni umunsi mwiza kuko kwizihiza Umunsi Mpuzamahanga w'Abagore icya mbere ni ukwishimira ibyagezweho ku bagore no kwishimira umusanzu wabo mu miryango, ubukungu n'ahandi ntekereza ko nta bundi buryo bwiza twari kubyishimira burenze ubu turashimira ababiteguye.'

Yakomeje ashimira abagore umuhate bagize kandi abasaba gukomeza gukora ibyiza no kwiteza imbere.

Umuyobozi wa 1000 hills events, Ntaganzwa Nathan, yavuze ko iki gikorwa gitegurwa mu kuzirikana abagore b'indashyikirwa kandi bizakomeza gutegurwa no kwita kuri bamwe batabashije kwegukana ibihembo.

Ibi bihembo bitangwa mu kwezi kwahariwe abagore ni ngarukamwaka bizajya bikorwa mu gukomeza gushyigikira abari n'abategarugori.

Anne Niwemwiza, Jacky Lumbasi na Mutesi Scovia bahawe ibihembo

Umugwizawase na Nishimwe bashinze Ubudasa Wall Paints

Ibihembo byahwe Ubudasa Wall Paints

Abagore bakoze ibikorwa by’indashyikirwa bashimiwe

Isheja Sandrine wa Kiss Fm ari mu bagore bashimiwe

Hahembwe abagore mu ngeri zinyuranye

Umutesi Scovia yashimiwe mu cyiciro cy’abanyamakuru

Umunyamakuru Jacky Lumbasi yahawe igihembo

Kigali Protocal yafashije ibi birori kugenda neza

Ingabire yashimiwe nk’umugore wateje imbere abandi

Umuyobozi w’Inama y’Igihugu y’Abagore (CNF), Jackline Kamanzi Masabo, yashimiye abateguye iki gikorwa cyo guhemba abagore mu byiciro bitandukanye.

Itorero Inyamibwa ryataramiye abitabiriye ibi birori

Umuryango washinzwe na Aline Gahongayire wahawe igihembo

---

Source : http://igihe.com/amakuru/u-rwanda/article/hahembwe-ibigo-n-abagore-b-indashyikirwa-mu-bucuruzi-n-ubuyobozi-mu-rwanda

Ubusanzwe ishyamba rya kimeza rya Ibanda-Makera riherereye mu Murenge wa Mpanga mu Kagari ka Nasho aho rikora ku midugudu itatu, rifite ubuso bungana na hegitari 169.

Ni ishyamba ribarizwamo inyamaswa zirimo inkima, inkende, isatura, ingwe habarizwamo kandi amoko y'inyoni zitandukanye, amoko y'inzoka zitandukanye ndetse n'amoko 124 y'ibiti birimo n'ibivura indwara.

Mu myaka mike ishize REMA ifatanyije n'abafatanyabikorwa batandukanye batangiye umushinga wa miliyoni 400 Frw wo kugarura bimwe mu biti kimeza byari byarahacitse ndetse no kuriteramo ibiti byinshi mu rwego rwo kugarura umwimerere waryo.

Kuri uyu wa Gatanu ubuyobozi bw'Akarere ka Kirehe, abaturage ndetse n'umuryango wita ku bidukikije n'amajyambere y'icyaro, REDO, batangiye gutera imigano mu nkengero y'iri shyamba kugira ngo babungabunge amasoko n'igishanga biryegereye.

Umuyobozi w'ishami ry'ubuhinzi, ubworozi n'umutungo kamere mu Karere ka Kirehe, Nsengimana Janvier, yavuze ishyamba rya Ibanda-Makera kuri ubu bari kugenda bongeramo ubwoko butandukanye bw'ibiti ndetse no kurizitira kugira ngo mu minsi iri imbere bazarisabire uburengazira rikorerwemo ubukerarugendo nka bimwe mu byiza nyaburanga aka Karere gafite.

Nsengimana yasabye abaturage kurifata neza bakirinda ibyaryangiza.

Ati ' Abaturage turabasaba kuribungabunga turabasaba ko izi zisigaye zirigize bazibungabunga birinde kurijyamo kwica udukoko turirimo, birinde kuriragiramo kugira ngo bya biti bya gakondo bikure hahinduke ishyamba ryiza ritangiritse.'

Mu rwego rwo gufasha abaturage barituriye kugira ngo badakomeza kuryangiza Leta yabashakiye abafatanyabikorwa babaha amashyiga arondereza ibicanwa abandi bahabwa akazi mu kuriteramo ibiti, abandi bahurizwa mu makoperative atandukanye baterwa inkunga.

Ishimwe Clementine yavuze ko kera buri wese yarijyagamo gushaka inkwi ariko ngo ubu babonye umushinga ubungabunga ibidukikije wabahaye imbabura n'ibicanwa ku buryo batakinjiramo.

Niyikiza Cedric usanzwe ari umuvumvu we avuga ko mu myaka ishize hari ibiti byinshi byari birimo inzuki zataragaho, ibindi bakabikuramo imbaho ariko ngo aho abantu batangiriye kubyangiza byanatumye umusaruro w'ubuki babonaga ugabanuka.

Ati ' Ubu rero aho Leta n'abafatanyabikorwa batangiriye kongera guteramo ibiti, ubu buri munyamuryango wacu wese afite inshingano zo kurireberera tukareba ababa bashaka gutwikamo ibiti byaho amakara n'abandi baba bashaka kuriragiramo.'

Umuyobozi wita ku bidukikije n'amajyambere y'icyaro, REDO, Gashumba Damascene, yavuze ko bafite gahunda ndende y'imyaka 30 yo kwita kuri iri shyamba rya Ibanda Makera, aho bazariteramo ibiti byinshi gakondo, baribungabunge ku buryo ngo rizahinduka iry'ubukerarugendo rikaba ryaninjiriza amafaranga aka Karere.

Ati ' Imigano twariteyemo igamije kubungabunga iki gishanga kirikikije kuko niyo soko y'amazi yose aryinjiramo, twayiteyemo rero kugira ngo ikomeze ihafate inafate ubutaka bwe kwangirika.'

Gashumba yavuze ko kuri ubu bari kuganira na RDB kugira ngo babemerere habe haza abakerarugendo kuhasura ndetse anavuga ko batangiye ibikorwa byo kureba ahakubakwa ibyafasha abakerarugendo baba bahasuye birimo inzu n'inzira zakwifashishwa.

Umukozi mu kigo cy'Igihugu gishinzwe amashyamba, Mutabazi Jean Claude, yijeje abaturage ko gahunda ya Leta kuri ubu ari ugufasha abaturage baturiye amashyamba ya kimeza kugira ngo bayabyaze umusaruro, abizeza ko koperative nyinshi bagiye babahurizamo bazajya babashakira abaterankunga kugira ngo babafashe kwita kuri aya mashyamba abashe kubagirira umumaro.

Ishyamba rya Ibanda-Makera rishobora gutangira gusurwa mu minsi mike iri imbere

Umuzenguruko w'iri shyamba wateweho imigano

---

Source : http://igihe.com/amakuru/u-rwanda/article/kirehe-ishyamba-rya-ibanda-makera-rishobora-guhinduka-icyanya-cy-ubukerarugendo

Kwemeza aya mavugurura ni umwe mu myanzuro yafatiwe mu Nama y'Abaminisitiri yateranye ku wa Gatanu tariki 24 Werurwe mu 2023, ikayoborwa na Perezida Paul Kagame.

Ibi bivuze ko mu gihe aya mavugurura azaba arangiye amatora ya Perezida wa Repubulika n'ay'Abadepite mu Rwanda yahuzwa nk'uko bisanzwe bigenda henshi ku Isi.

Ubusanzwe mu Rwanda, amatora y'abadepite n'aya Perezida wa Repubulika yabaga mu myaka itandukanye cyane ko na manda zitanganaga. Manda ya Perezida yari imyaka irindwi, iy'abadepite ikaba imyaka itanu.

Muri Gashyantare mu 2023 nibwo Komisiyo y'Igihugu y'Amatora yatanze icyifuzo cy'uko aya matora yombi yahuzwa.

Mu kiganiro Perezida wa Komisiyo y'Igihugu y'Amatora, Oda Gasinzigwa yagiranye n'itangazamakuru yavuze ko imwe mu mpamvu yatumye bagira iki cyifuzo ari ijyanye n'amatora.

Ati 'Turabona ko ari ikintu cyaba cyiza, abantu bamaze kubiganiraho neza ko hahuzwa amatora y'Abadepite na Perezida wa Repubulika. Ibi bizadufasha cyane kuko mu bihugu byose, ingengo y'imari mu gihe cy'amatora iba ari ikibazo gikomeye cyane, atari ku gihugu gusa ahubwo n'amashyaka ya Politiki.”

“Muzi ko amashyaka ya politiki akoresha amafaranga menshi mu gihe cyo gutegura amatora. Ibi bihujwe cyane cyane dushyira no mu gaciro ko imigabo n'imigambi y'aya mashyaka iba iganirwa mu gihe cyo gushaka abadepite, kandi ni nako bigenda mu gihe cy'amatora ya Perezida, iyo migabo n'imigambi ni yo isubizwa mu baturage kugira ngo bayumve. Bihujwe, byatugabanyiriza cyane ibijyanye n'ingengo y'imari hamwe n'umwanya.”

Komisiyo y'Igihugu y'Amatora igaragaza ko nibura itora rya Perezida wa Repubulika n'iry'abadepite yose hamwe atwara arenga miliyari 14Frw. Bivuze ko iyo izi mpinduka zitabaho, u Rwanda rwari kuzakoresha miliyari 7Frw mu 2023 mu matora y'abadepite, rukazongera gukoresha izindi miliyari 7Frw mu itora rya Perezida wa Repubulika.

Iyi komisiyo igaragaza ko mu gihe aya matora azaba ahurijwe hamwe hazakoreshwa ingengo y'imari ya miliyari 8Frw.

Mu gihe iyi gahunda izatangira gushyirwa mu bikorwa bivuze ko ko manda y'abadepite bariho uyu munsi yakwiyongeraho umwaka umwe ikazarangira mu 2024.

Indi nkuru bifitanye isano: https://igihe.com/amakuru/u-rwanda/article/komisiyo-y-amatora-yatanze-icyifuzo-cyo-guhuza-amatora-y-abadepite-n-aya

---

Source : http://igihe.com/amakuru/u-rwanda/article/abagize-guverinoma-bemeje-ihuzwa-ry-amatora-y-abadepite-n-aya-perezida-wa