Webrwanda Backend

Author: webrwanda

  • Muhanga:Umwarimu wa Kaminuza yishwe ashinyaguriwe #rwanda #RwOT

    Nyakwigendera ni Charles Muhirwe Kororo yigishaga muri Kaminuza y'u Rwanda, ishami rya Nyagatare.

    Umurambo we bawusanze mu Mudugudu wa Musengo mu Kagari ka Kivumu, mu Murenge wa Cyeza mu Karere ka Muhanga

    Uwahaye amakuru Radiotv10 dukesha iyi nkuru yavuze ko umurambo wa nyakwigendera bawusanze mu muhanda mu gitondo cyo kuri uyu wa Mbere tariki 03 Mata 2023.

    Yagize ati 'Ababonye umurambo we bwa mbere, basanze bamukuyemo amaso ndetse n'ururimi baruciye umutwe.'

    Abaturanyi ba nyakwigendera wigishaga muri Kaminuza y'u Rwanda, ishami rya Nyagatare, bavuga ko yari amaze igihe gito yimukiye muri aka Karere ndetse ko aho yari atuye ari naho yasanzwe.

    Source : https://umuryango.rw/ubuzima-115/article/muhanga-umwarimu-wa-kaminuza-yishwe-urwagashinyaguro-bitera-ubwoba-abamubonye

  • UN n'Ubwongereza ntibavuga rumwe ku mwanzuro wo kohereza abimukira mu Rwanda #rwanda #RwOT

    Ibiro bya l'ONU bishinzwe ubureganzira bwa muntu byatangaje ko bafite impungenge ku mwanzuro w'Ubwongereza wo kohereza abimukira binjiye muri icyo gihugu mu buryo butemewe mu Rwanda.

    Ni mugihe Suella Braverman w'Ubwongereza we yashimangiye ko u Rwanda ari igihugu gitekanye kandi kizatanga umutuzo kuri abo bimukira.

    Yabivuze kuri iki cyumweru twaraye dusoje , aho yemeza ko yizeye ingamba u Rwanda rwafashe zo gushakira umuti abimukira bashyira ubuzima bwabo mu kaga bashaka kwinjira mu Bwongereza mu buryo butemewe.

    Gusa ibiro bishinzwe uburenganzira bwa muntu muri l'ONU byo byatangaje ko ubushakashatsi bwakozwe n'urwego rushinzwe impunzi ku isi bugaragaza ko gahunda y'abimukira mu Rwanda igiteye impungenge.

    Umunyamabanga w'ibyo biro Ravina Shamdasan yabwiye BBC ko”haracyariho gushidikanya ku iyubahirizwa ry'uburenganzira n'ubwisanzure bwa muntu mu gutanga ibitekerezo mu Rwanda.'

    Yongeye ho ko bafite ibimenyetso byinshi bishimangira ubushishozi buke bwabaye ho mu gufata umwanzuro wohereza abimukira mu Rwanda.

    BBC

    Source : https://umuryango.rw/amakuru/mu-rwanda/politiki/article/l-onu-n-ubwongereza-nti-bavuga-rumwe-ku-mwanzuro-wo-kohereza-abimukira-mu

  • Itangazo:HABIYAREMYE Isaie yasabye guhindura amazina akitwa HABIYAMBERE Isaie #rwanda #RwOT

    Uwitwa HABIYAREMYE Isaie yasabye guhindura amazina mu buryo bwemewe n'amategeko akitwa HABIYAMBERE Isaie mu bitabo by'irangamimerere.

    Impamvu atanga zituma asaba guhindura amazina akaba ari uko ari amazina yakoreshaga kuva yatangira kwiga.

    Source : https://umuryango.rw/amatangazo/article/itangazo-habiyaremye-isaie-yasabye-guhindura-amazina-akitwa-habiyambere-isaie

  • Aya niyo makosa 6 umugore akora akisenyera urugo atabizi #rwanda #RwOT

    Ibintu bikunze gukorwa n'abagore bigatuma bisenyera urugo batabizi, nk'uko byatangajwe n'urubuga Lifehack ruvuga ku mibanire:

    Gusiganira kwitanaho

    Rimwe na rimwe uzumva umugore avuga ko ubwo umugabo we atamwitaho ko nawe nta mpamvu zo kumwitaho, akirengagiza ko mu rukundo utanga ukabona guhabwa. Ako gasigane ko gutegereza ko umugabo wawe abanza akakwitaho nawe ukabona kumwitaho, gatuma arushaho kujya kure yawe nawe ukaba kure ye. Iyo bikomeje bigera aho wumva asa nk'aho atakiri mu buzima bwawe nawe bikaba uko, mukazisanga urugo rwanyu rwarasenyutse.

    Kuvuga umugabo wawe ibibi

    Abagore bamwe bagwa mu mutego wo gushaka kwerekana ko bagowe, bagakoresha intwaro yo kuvuga ibibi by'abagabo babo. Uko ugenda uganyira uwo muhuye wese ububi bw'umugabo wawe, niko urushaho kubigira bibi ndetse abenshi bakumvisha ko wagowe kandi ababo ari babi kurusha uwawe. Iyo uhuye n'abajyanama babi, bashobora kugusenyera bivuye ku kantu gato.

    Kugira abandi ushyira imbere y'umugabo wawe

    Umugabo mwasezeranye kubana, nta wundi muntu wari ukwiye kumurutisha. Nyamara abagore kenshi usanga bakunda abana babo ndetse akaba ari nabo bitaho kurusha abagabo babo, abandi bafite ibindi bitayeho nk'ubwiza bwabo, amafilimi n'ibindi, akaba aribyo baha umwanya munini kurusha uwo baha abagabo babo. Ukwiye guha umugabo wawe umwanya wa mbere kuko iyo utangiye kugira abandi umurutisha, uba utangiye kwisenyera urugo.

    Kumva ko uhora mu kuri

    Iyo umugore atajya yemera ikosa rye ngo ace bugufi ahubwo agahora yumva ko ari mu kuri atera umugabo we umutima mubi, ndetse akabona ko utamwubaha kuko utajya ugira umutima wo guca bugufi. Ibyo ahanini birasenya, kuko abagabo hafi ya bose bakunda ko abagore babo babagaragariza ko babubashye.

    Gukoresha imibonano mpuzabitsina ugasaba icyo wifuza

    Hari abagore bamwe bafatirana abagabo babo bakabasaba ibyo bifuza, mu gihe babasabye ko bakuzuza inshingano z'abashakanye. Iyo ubikora gutyo uba wirengangiza inshingano zawe kandi ukanisuzuguza bigatera umugabo wawe gufata umubiri wawe nk'igikoresho kuko nawe ariko uwufata. Bishobora kandi gutera umugabo kutishimira kongera gutera akabariro, kuko aba azi ko ariho uzamutegera umusaba ibyo wifuza. Iyo bitangiye kugera kuri urwo rwego rero, biba byanatuma urugo rwanyu rusenyuka.

    Guhora wibutsa umugabo wawe ibyahise

    Abagore bamwe na bamwe bakunze kuririra ku kantu gato, ugasanga bazuye n'iby'ahashize byose bibi umugabo yaba yarabakoreye. Ibyo akenshi bakabikoresha mu rwego rwo gushyira umugabo hasi ngo bamwumvishe ko ntacyo aricyo. Niba ushaka kubaka urugo rukomeye, wari ukwiye kureka ibyahise bigashirana n'akahise, aho guhora ubigarura mu biganiro byanyu.

    Ibi ni ibintu umugore wese ushaka kubaka urugo rukomeye aba agomba kwirinda, n'ubwo akenshi bifatwa nk'ibintu byoroshye, iyo bimaze kuba akamenyero bishobora kugusenyera urugo.

    Refe:elcrema.com

    Source : https://umuryango.rw/ubuzima-115/udushya/article/aya-niyo-makosa-6-umugore-akora-akisenyera-urugo-atabizi-70399

  • Urutonde rw'abanyarwandakazi beza barusha abandi kwambara neza[AMAFOTO] #rwanda #RwOT

    Mu ndimi z' amahanga babivuze neza ati ' When you dress well , you look smart ' uramutse ubishyze mu Kinyarwanda bikaba bivuga ko mu gihe wambaye neza ugaragara neza kuri uyu munsi twabateguriye urutonde rw' abakobwa bo mu Rwanda bambara neza kandi bakaberwa .

    1.Miss Mutesi Jolly
    Miss Mutesi jolly uza kwisonga mu bakobwa Bambara neza bakaberwa yabaye nyampinga w'u Rwanda muri 2016, ni umwe mu bakobwa bakurikirwa cyane kumbuga nkoranyambaga ndetse aza no mubakobwa bavuga rikijyana mu Rwanda.

    Uyu mukobwa uzwiho kurimba, akunze gusagiza abamukurikirana amafoto atandukanye y'ambaye imyenda myiza aberewe cyane , ndetse n'itangazamakuru rikunze kugaruka cyane ku myambarire ye ,bitewe n'udushya dutandukanye akoresha.


    2.Amb.Isimbi Alliance
    Ambasaderi Isimbi Alliance wamamaye ku izina rya Alliah Cool muri sinema Nyarwanda , nawe n'umwe mubakobwa baza ku isonga mu kwambara neza bakaberwa bitewe n'amafoto akunze gusangiza abamukurikirana ku mbuga nkoranyambaga ze zitandukanye.




    3. Miss Uwicyeza Pamella
    Uwicyeza Pamela wahatanye muri Miss Rwanda mu 2019 akaza mu bakobwa 20 bashakishwagamo Nyampinga w'u Rwanda, wanabaye Igisonga cya Mbere cya Miss Zuri Africa Queen yaberereye muri Kenya mu 2019 akaba ari n'umukunzi w'umuhanzi ukomeye mu Rwanda The Ben, nawe aza ku isonga mu bakobwa ba banyarwandakazi Bambara neza bakaberwa ,dore ko nawe asigaye yarabaye umunyamideli wabigize umwuga.


    4.Kate Bashabe
    Catherine Bashabe ni umunyamideri ndetse akaba afite iduka ricuruza ibijyanye n' imideri benshi bamubona bemeza ko uyu mukobwa yambara neza dore ko hari n' abataripfana bemeza ko uyu mukobwa abayeho neza uramutse urebye imitungo yibitseho.



    5.Miss Nishimwe Naomie
    Miss Nishimwe Naomie wekuganye rya Miss Rwanda muri 2020 nawe aza mubakobwa ba banyarwandazi Bambara bakaberwa dore ko kandi ari no mubanyamidelikazi bajyezweho mu Rwanda.




    6.Shaddy boo
    Mbabazi Shadia Shaddy boo ni umwe mu banyarwandakazi basigaye batigisa urubuga rwa instagram bitewe n' amafoto ashyiraho ndetse n' amashusho akunzwe gusakazaho benshi bakaba bemeza ko yambara neza kandi aberwa cyane .


    7.Miss Uwase Muyago
    Miss Muyago wabaye nyampinga uberwa n'amafoto muri muri 2019 nawe aza ku isonga mu banyarwandakazi Bambara neza bakaberwa , bitewe n'amafoto atandukanaye akunze gusangiza abamukurikira ku mbuga nkoranyambaga ze zitandukanye byumwihaririko urubuga rwe rwa Instagram.

    Source : https://umuryango.rw/imyidagaduro/article/urutonde-rw-abanyarwandakazi-beza-barusha-abandi-kwambara-neza-amafoto

  • Abakinnyi ba Chelsea bagaragaje icyabababaje ku iyirukanwa ry'Umutoza Potter #rwanda #RwOT

    Abakinnyi b'ikipe ya Chelsea bavuze ko yamenye ibijyanye no kwirukanwa k'umutoza wabo Graham Potter ubwo itangazo ryatangazwaga ku mbuga nkoranyambaga.

    Potter yaraye yirukanwe nyuma y'amezi atandatu gusa asimbuye Thomas Tuchel wegukanye wari wegukanye igikombe cya UEFA Champions League.

    Uyu nyuma yo kubura umusaruro yasize The Blues ku mwanya wa 11 aho bigoye cyane ko yazabona itike yo kwerekeza muri UEFA Champions League kuko bigoye ko irangiza mu makipe ane ya mbere .

    Nk'uko ikinyamakuru The Telegraph kibitangaza, ngo abakinnyi bavuganye n'ababahagarariye mu ijoro ryo ku cyumweru nyuma yo kumenya ayo makuru.

    Bivugwa ko abakinnyi bamenye ibijyanye no kugenda kwa Potter binyuze mu itangazo ryashyizwe ku rubuga ahagana saa mbili.

    Abari bagize uruhare mu gutsindwa na Aston Villa ku wa gatandatu bakoze imyitozo yoroheje ku cyumweru abandi batakinnye bitoza nk'ibisanzwe.

    Benshi mu bakinnyi ba Chelsea ntibigeze bamenyeshwa ko uyu mutoza yirukanwa babimenya basubiye mu rugo nabwo binyuze ku mbuga nkoranyambaga.

    Umwe mu batanze amakuru iki kinyamakuru: 'Benshi mu bakinnyi nta gitekerezo bari bafite kugeza babonye itangazo.

    “Abantu bibazaga uzitabira imyitozo ku wa mbere ninde n'uzayiyobora ku wa kabiri.

    “Ku cyumweru, bose bitabiriye imyitozo yoroheje,batunguwe no kubimenyera mu rugo.”

    Ubusanzwe iyo ikipe irirukana umutoza abakinnyi babimenyeshwa kare bakamusezeraho ariko Potter yirukanwe bucecetse abakinnyi babimenya kimwe n'isi yose.

    Ibi byabaye nyuma yo gutsindwa na Aston Villa mu rugo ibitego 2-0.
    Biravugwa ko Chelsea itazishyura igiciro cyuzuye cy'amasezerano ya Potter ya miliyoni 50 z'ama pound, nubwo yari asigaranye imyaka ine n'amezi make.

    Source : https://umuryango.rw/imyidagaduro/imikino/article/abakinnyi-ba-chelsea-bagaragaje-icyabababaje-ku-iyirukanwa-ry-umutoza-potter

  • Kenya:Ikigo cy'ishuri cyafunzwe nyuma yo kugaburira abana amafunguro ahumanye #rwanda #RwOT

    Ishuri riherereye mu burengerazuba bw'igihugu cya Kenya rimaze gufungwa nyuma y'uko ritahuwemo abanyeshuri 2 bapfuye, bikekwa ko bishwe n'ibiryo byanduye bagaburiwe n'amazi adafite ubuziranenge.

    Urwego rw'ubuzima muri Kenya rwatangaje ko rwafashe ikemezo cyo gufunga ishuri ry'abakobwa rya Mukumu Girls High School, nyuma y'uko abana 100 bajyanywe mu bitaro mu cyumweru gishize bose bataka mu nda kandi bahitwa

    Ubushakashatsi ku cyateye iyo ndwara bwagaragaje ko abo banyeshuri bashobora kuba bagaburiwe amafunguro yanduye cyangwa afite uburozi .gusa ibizamini byoherejwe mu bitaro bya Kenya Medical Research Institute (Kemri) ngo harebwe nyirizina icyabaye.

    Ababyeyi b'abana buzuye ku ishuri gutahana abana babo gitaraganya nyuma yo guhabwa amakuru y'uko hari babiri bitabye Imana muri iryo shuri bazira amafunguro ahumanye.

    BBC

    Source : https://umuryango.rw/amakuru/mu-mahanga/ubuzima/article/kenya-ikigo-cy-ishuri-cyafunzwe-nyuma-yo-kugaburira-abana-amafunguro-ahumanye

  • Indwara zitandura ku isonga mu zihitana abantu benshi-Minisante #rwanda #RwOT

    Minisiteri y'Ubuzima itanga impuruza ku ndwara zitandura zikomeje kwica abantu benshi, ahanini bitewe no kutamenya uburyo bwo kuzirinda no kwivuza hakiri kare, kuko zimwe muri zo zishobora kuvurwa zigakira igihe zagaragaye hakiri kare.

    Ubushakashatsi bwa RBC bwa 2021 bugaragaza ko indwara zari zisanzwe zizwiho kwica abanyarwanda nka SIDA na Malariya zitagihangayikishije cyane kuko ubu zica nibura 1% ku mwaka, ahubwo izizwi nk'izitandura ziyobowe na kanseri, umutima, Diyabete n'umuvuduko w'amaraso zikaba arizo zikomeje guhitana benshi.

    Minisitiri w'ubuzima, Dr. Sabin Nsanzimana, avuga ko mu gihe cy'imyaka ibiri ishize ikigero cy'indwara zitandura cyazamutse cyane ndetse biteye impungenge, kuko uko imibare yiyongera ari nako abo zihitana nabo biyongera.

    Yagize ati 'Indwara zitandura z'umutima, Diyabete n'umutima nizo ziza ku mwanya wa mbere mu ziri guhitana abanyarwanda benshi, mu gihe malariya n'izindi arizo zahitanaga benshi.'

    Avuga ku gitera izi ndwara cyane ko mu myaka yashize zitari zihangayikishije nk'uko biri ubu, Minisitiri Nsanzimana, avuga ko mu bushakashatsi bakoze basanze abanyarwanda bangana na 40% batajya bakora siporo, abandi bakicara umwanya munini, ariko ikibazo gikomeye kiri mu byo abantu barya.

    Ati 'Twanabajije ku bijyane n'ibyo abantu barya, ese abarya imboga izi duhinga hafi y'urugo ni bangahe? Abanyarwanda batubwiye ko barya imboga rimwe mu cyumweru kandi ziboneka hafi, ahubwo ugasanga bararya ibyangiza umubiri cyane ari byo bizana bya bibazo.'

    Radio na Televiziyo Flash twashatse kumenya niba abaturage bazi uko izi ndwara zandura n'uburyo bwo kuzirinda, abo twaganiriye batubwira ko batazizi ndetse ko bamwe banazimenya basigaje igihe gito cyo kubaho.

    Umwe ati 'Izo ndwara turazumva gusa ariko ntabwo tuzizi, ntituzi uko zandura, uko umuntu yazirinda n'uburyo zivurwa.'

    Undi nawe ati 'Ntabwo nzi uko bazirinda n'ukuntu zandura izo ndwara.'

    Mugenzi we  ati 'Ntabwo tuzikeka ngo tuzirinde kuko ntabwo tuzizi, ahubwo tujya kwa muganga ari uko twarembye pe.'

    Ku ruhande rw'aba baturage bavuga ko bibaye byiza abashinzwe ubuzima mu Rwanda, bakora ubukangurambaga mu baturage hagamijwe kumenya igitera izo ndwara n'ibimenyetso byazo, kugira ngo bajye bazi vuza hakiri kare.

    Imibare ya RBC igaragaza ko mu myaka ibiri ishize umuvuduko w'amaraso wavuye kuri 15% ugera kuri 17%, Diyabete iva kuri 1% igera kuri 3%, mu gihe kuri ubu habarurwa abantu ibihumbi 10 barwara indwara za kanseri buri mwaka.

    Gusa Minisiteri y'Ubuzima ivuga ko kimwe cya kabiri cya kanseri bapima, basanga zigeze ku rwego zitavurwamo.

    CYUBAHIRO GASABIRA Gad

    The post <strong>Indwara zitandura ku isonga mu zihitana abantu benshi-Minisante</strong> appeared first on FLASH RADIO&TV.

    Source : https://flash.rw/2023/04/03/indwara-zitandura-ku-isonga-mu-zihitana-abantu-benshi-minisante/?utm_source=rss&utm_medium=rss&utm_campaign=indwara-zitandura-ku-isonga-mu-zihitana-abantu-benshi-minisante

  • Haraboneka uwigiza nkana? Intare FC na Rayon Sports rwabuze gica #rwanda #RwOT

    Uyu munsi nibwo Komisiyo y’Ubujurire ya FERWAFA yakiriye Intare FC na Rayon Sports ku kibazo bafitanye cy’umukino wo kwishyura wa 1/8 cy’igikombe cy’Amahoro wakagombye kuba warakinwe tariki ya 8 Werurwe.

    Iyi komisiyo iba yarakiriye iki kirego ku wa Gatandatu w’icyumweru gishize ariko basanga hari amakuru badafite basaba Intare FC na Rayon Sports kugaruka ku wa Mbere tariki ya 3 Mata 2023.

    Uyu munsi aya makipe yitabye aherekejwe n’abanyamategeko ba yo ariko birangira kumvikana byanze Komisiyo ibasaba gutaha ibabwira ko iri bubamenyeshe umwanzuro kuri uyu munsi nimugoroba.

    Amakuru ISIMBI yamenye ikesha bamwe mu bari mu cyumba aho baburaniye ni uko hagaragaye kujya impaka nyinshi cyane nyuma yo kutumvikana ku ngingo zimwe na zimwe.

    Intare FC ivuga ko batakabaye bajya muri izi mpaka kuko ukurikije amategeko Rayon Sports yamaze gusezererwa mu irushanwa.

    Intare ishingira ku kuba tariki ya 8 Werurwe 2023 umunsi wagombaga gukinwaho umukino ugasubikwa na FERWAFA, yamenyesheje Rayon Sports ko bitarenze saa 12h igomba kuba yamenyesheje aho izakirira uyu mukino wari washyizwe tariki ya 10 Werurwe, aho kubikora yahise isezera mu irushanwa.

    Intare FC ivuga ko yandikiwe ibaruwa imenyeshwa ko Rayon Sports yemeye kugaruka mu irushanwa ndetse babwirwa n’igihe umukino uzabera, ibyo byose ngo byabaga hagati ya FERWAFA na Rayon Sports mu gihe Intare FC ntacyo yari izi kandi na yo irebwa n’uyu mukino, isanga kuba Rayon itaratanze ikibuga ikwiye guhita isezererwa.

    Ku ruhande rwa Rayon Sports yongeye kugaragaza ko yasezeye kubera ibitari bimeze neza byari bibabangamiye, nyuma y’ibiganiro bimaze gukemuka bagaruka mu irushanwa.

    Ikindi ni uko kandi iyi kipe yavuze ko amategeko y’igikombe cy’Amahoro adasobanutse ngo kuko nubwo basezeye ntabwo ateganya uburyo uwasezeye agaruka mu irushanwa iyo yisubiyeho amasaha 24 atarashira.

    Komisiyo y’Ubujururire ikaba yasabye aya makipe umwanya wo kwiherera igafata umwanzuro bakaza kuwubamenyesha ku mugoroba wo kuri uyu wa Mbere tariki ya 3 Mata 2023.

    Rayon Sports yiteguye gukina uyu mukino ni mu gihe Intare yo itabikozwa ahubwo isaba ko yamenyeshwa igihe izakinira na Police FC muri ¼ cy’igikombe cy’Amahoro. Gusa amakuru avuga ko mu byemezo Komisiyo ifata ibyo gukina uyu mukino ntabirimo ikipe imwe ishobora guterwa mpaga aho bivugwa ari Rayon Sports.

    Imvo n’imvano y’ikibazo cya Rayon Sports n’Intare FC

    Nyuma y’uko umukino ubanza wa 1/8 mu gikombe cy’Amahoro Rayon Sports yatsinze Intare FC 2-1, umukino wo kwishyurwa washyizwe tariki ya 8 Werurwe kuri Stade Muhang, waje kwimurwa habura amasaha 24 (kuko iyo tariki hagombaga kubera ibirori byo kwizihiza umunsi w’abagore) ugashyirwa i Bugesera maze Intare na zo zirabyanga zivuga ko amasaha arimo atari ahagije kugira ngo umukino wimurwe.

    Ku wa Gatatu (tariki ya 8 Werurwe) Rayon Sports yitegura kujya ku kibuga ni bwo yandikiwe na FERWAFA iyimenyesha ko umukino washyizwe ku wa Gatanu tariki ya 10 Werurwe kubera ko hari kubera imikino 2 kandi bishoboka ko bari kugera mu minota y’inyongera hakanaterwa penaliti kandi iki kibuga nta matara gifite. Rayon Sports na yo ihita yandika isezera mu irushanwa.

    Nyuma yo kuganira na FERWAFA, Rayon Sports yatangaje ko ibyari bibabangamiye byakemutse yemeye kugaruka mu irushanwa.

    Ku wa Gatandatu w’icyumweru gishize tariki ya 25 Werurwe 2023, FERWAFA yatangaje ko uyu mukino uzaba ku wa Mbere tariki ya 27 Werurwe 2023 mu Bugesera saa 15h00′.

    Intare zikaba zarateye utwatsi iki cyemezo zafashe nk’agasuzuguro, zandikira FERWAFA ziyimenyesha ko mu gihe cyose zitamenyeshejwe impamvu uyu mukino utabaye itariki yari iteganyijwe, zititeguye kuwukina ahubwo FERWAFA yazaba ari yo ikina na Rayon Sports.

    Iti “Twasanze iby’umukino uteganyijwe mu ibaruwa no137/FERWAFA/2023 twe bitatureba, kuko inama zose zijyanye na wo nta n’imwe twatumiwemo, impande zitabiriye zikaba ari zo zizawukina.”

    FERWAFA yahise ikuraho uyu mukino maze ikibazo igishyira muri Komisiyo y’Ubujurire ari na yo irimo kugikurikirana.

    Inatre FC na Rayon Sports rwabuze gica

    Source : http://isimbi.rw/siporo/article/haraboneka-uwigiza-nkana-intare-fc-na-rayon-sports-rwabuze-gica

  • Muhirwe wigishaga muri Kaminuza y'u Rwanda yishwe n'abataramenyekana #rwanda #RwOT

    Umwarimu wigishaga Uburezi muri Kaminuza y'u Rwanda ishami rya Nyagatare,witwa Muhirwe Karoro Charles, yishwe n'abantu bataramenyekana.

    Ikinyamakuru Umuseke dukesha iyi nkuru cyanditse ko Muhirwe yari atuye mu Mudugudu wa Musengo, Akagari ka Kivumu, Umurenge wa Cyeza mu Karere ka Muhanga, biravugwa ko yishwe n'abagizi na nabi mu rukerera rwo kuri uyu wa Mbere, taliki ya 03 Mata, 2023.

    Umuvugizi wa Polisi mu Ntara y'Amajyepfo, CIP Habiyaremye Emmanuel yahamije iyo nkuru ko Muhirwe yishwe.

    Habiyaremye avuga ko uyu mu buzima busanzwe yari Umwarimu muri Kaminuza y'u Rwanda ishami rya Nyagatare.

    Ati: 'Inzego z'umutekano zirimo RIB na Polisi bose bahageze, kandi batangiye iperereza ku rupfu rw'uyu mugabo.'

    Umuvugizi wa Polisi avuga ko bamaze gufata umuntu umwe mu bakekwaho kwica Muhirwe.

    Umunyamabanga Nshingwabikorwa w'Umurenge wa Cyeza Gakwerere Eraste avuga ko abakekwaho kwica Muhirwe bamukubise ikintu mu mutwe ahita apfa.

    Gakwerere avuga ko aho bamwiciye atari kure y'aho atuye.

    Ati: 'RIB yatangiye gukora iperereza kandi turizera ko ibiza kuvamo bimenyekana.'

    Ababonye umurambo wa Muhirwe bavuga ko yicishijwe amabuye kuko umutwe we bawujanjaguye. Umuryango wa nyakwigera wari umaze amezi abiri wimukiye mu Mudugudu wa Musengo.

    Umurambo wa Muhirwe Karoro Charles uracyari aho yiciwe, umwe mu bakekwaho ubu bugizi bwa nabi akaba ari mu maboko ya RIB na Polisi muri uyu Mudugudu wa Musengo nk'uko Umuvugizi wa Polisi abihamya.

    The post Muhirwe wigishaga muri Kaminuza y'u Rwanda yishwe n'abataramenyekana appeared first on FLASH RADIO&TV.

    Source : https://flash.rw/2023/04/03/muhirwe-wigishaga-muri-kaminuza-yu-rwanda-yishwe-nabataramenyekana/?utm_source=rss&utm_medium=rss&utm_campaign=muhirwe-wigishaga-muri-kaminuza-yu-rwanda-yishwe-nabataramenyekana