Webrwanda Backend

Author: webrwanda

  • Abari inshuti za Fabien Twagiramungu umaze umwaka yitabye Imana hari byinshi bamwibukiraho #rwanda #RwOT

    Iyo nkuru y’incamugongo yavugishije benshi, haba mu muryango ndetse n’inshuti. Umwaka urashize Dr. Fabien atabarutse, benshi haba mu muryango n’inshuti, hari byinshi bagaragaza bamwibukiraho.

    Twashoboye kwegera bamwe mu nshuti ze, batubwira ko hari byinshi kandi bagifite ibikomere ku mitima benshi batewe n’urupfu rwa Fabien. Uwo bari basangiye ishomoramari mu kabari gakomoye ka 2 Shots kari i Remera, iyo muganira ubona mu maso he asa nk’ushushanya Fabien.

    Twashoboye kugera kuri uyu wari umufatanyibikorwa we, Me Ngarambe Raphael, inshuti ikomeye ya Fabien Twagiramungu banashinganye 2 Shots Club. Twaganiriye byinshi ku bijyanye n’imibanire ye na Fabien ndetse n’icyo yamusigiye atazibagirwa kuri we.

    Mu magambo ye agira ati “Nabuze inshuti magamara. Namuze umuvandimwe, nabuze umujyanama ukomeye. Fabien twamenyanye bikomotse kuri siporo, ubwo yari Perezida wa Club ya Tennis i Remera. Twabaye inshuti zikomeye bigera n’aho duhuza business. Imiryango yacu yari yarabaye umuryango umwe. Fabien yari azi kubana, azi kubana ariko ! Urupfu rwa Fabien rwaradushegeshe, haba umuryango we, inshuti ze ndetse n’abakunzi ba siporo. Niyigendere ariko yadusigiye urukundo, urukundo Fabien yagiraga rwari rufite bake. Umutima we wareraga kandi twaranakurikiranye dusanga atari abyize turi kumwe ahubwo n’abo babanye bose, bashimaga uburyo yagiraga urugwiro kandi akabana neza n’abandi.”

    Sakindi Eugene, na we wari mu nshuti z’akadasohoka za Fabien, mu kiganiro twagiranye ndetse n’andi makuru twashoboye kubona, ari mu nshuti Fabien yari afite zikomeye cyane. We ubwe agira ati 'Fabien twamenyanye mu 2016 duhuriye muri siporo. Ubundi tugahurira muri 2 Shots. Kuva tumenyanye twabanye nk’inshuti bigera aho birenga ubucuti ahubwo tuba abavandimwe. Twarabanye umunsi ku munsi kugeza atuvuyemo. Nta kintu na kimwe kibi nigeze mubonaho. Nta bwoko yagiraga, ntabe umufurankofone, ntabe umwangolofone. Yari imfura.”

    Akomeza agira ati : “Yantabaye kenshi haba mu gihe cyo Kwibuka iwacu n’ahandi. Yamfashije mu bitekerezo no mu bikorwa. Nanjye kandi namutabaye kenshi mu muryango we, haba i Nyamasheke iwabo n’ahandi. Twigeze guhurira iwabo ndi mu kazi aratangara cyane, atungurwa no kumbona mu cyaro ndi mu mashanyarazi. Urupfu rwa Fabien rwaradushegeshe cyane. Umugore we Vivine ni we wambwiye ko Fabien akoze accident, hari mu gitondo nka saa kumi n’ebyiri n’iminota 10. Arantabaza ati 'Sakindi we, ntabara mushuti wawe akoze impanuka. Ubwo twahise dutabara hamwe n’abandi turakurikirana kugeza tumuherekeje.”

    Mu gushimangira igihombo yagize yakomeje agira ati : “Nabuze inshuti twabanaga umunsi ku munsi, nabuze umuvandimwe twabanaga umunsi ku munsi. Urupfu rwa Fabien rwanteye icyuho gikomeye, kuko twapanganaga imishinga itandukanye. Ibibazo byo mu miryango twarabiganiraga, ubukwe bwo mu muryango w’umwe n’undi bwahitaga buba ubwe. Nabuze inshuti ikomeye.'

    Nkuranga Egide yari inshuti ikomeye ya Twagiramungu Fabien. Bamenyaniye muri Kamuniza Nkuru y’u Rwanda i Butare biga mu binyabutabire (Chimie). Nkuranga yasanze Fabien arangije umwaka wa mbere.
    Amakuru twagezeho agaragaza ko Fabien yabanaga n’umusore biganaga wo mu cyahoze ari Gikongoro witwa Gasirabo. Bakaba inshuti magara. Ubwo Nkuraga nawe yahise aba inshuti yabo ikomeye.

    Nkuranga avuga ko Fabien yagiraga urukundo n’urugwiro ntagereranywa ku buryo kuva ubwo muri Kaminuza kugera atabaruka bari inshuti zikomeye. Nkuranga na Ngarambe Raphael babyaye abana ba Fabien muri batisimu. Kubera urukundo Fabien yakundaga inshuti ye biganye muri Kaminuza wishwe muri Jenoside yakorewe Abatutsi, umwana we w’imfura yamwise amazina ye, anabyarwa muri batisimu na Nkuranga Egide babanaga.

    Mu kiganiro twagiranye na Nkuranga, agira ati “Fabien akaba imfura cyane, azira amatiku, yirinda inzangano kandi akagira urugwiro. Twabaye inshuti, tuba abavandimwe, imiryango iramenyana. Namubyariye umwana muri batisimu, umwana yise izina ry’umunyeshuri biganye wari inshuti ye magara.
    Fabien twamenyaniye i Ruhande. Hari abantu benshi namenye kubera Fabien, na we hari abantu benshi yamenye kubera njye. Yari umuvandimwe pe. Ariko kandi yari afite umwihariko akamenya gucagura incuti. Ntiyapfaga kubana n’abo abonye bose.”

    Twashatse kuvugana n’Umwunganizi mu by’amategeko w’umuryango wa Twagiramungu Fabien, Me Buhuru Pierre Celestin, ariko ntibyadukundiye. Kubera ko ubucukumbuzi bwacu ku bijyanye n’imibereho ya Fabien ndetse n’ibyakurikiye urupfu rwe bigikomeza, ibyo tuzageraho tuzabibatangariza. Havuzwe byinshi.

    Source : http://www.ukwezi.rw/Mu-rwanda/Amakuru-anyuranye/article/Abari-inshuti-za-Fabien-Twagiramungu-umaze-umwaka-yitabye-Imana-hari-byinshi-bamwibukiraho

  • Kwibuka bigomba kujyana n'icyerekezo cy'igihugu cy'iterambere – Minisitiri Bizimana #rwanda #RwOT

    Minisiteri y'Ubumwe bw'Abanyarwanda n'Inshingano Mboneragihugu, ivuga ko kwibuka Jenoside yakorewe Abatutsi mu 1994, biba bigomba kujyana n'icyerekezo igihugu gifite cy'iterambere, bityo ko ibikorwa byo kwibuka bitagomba kuzabangamira ibindi by'iterambere, cyeretse umunsi utangiza n'usoza icyumweru cyo kwibuka Jenoside.

    Asaba abategura ibikorwa byo kwibuka gukurikiza amabwiriza uko aba yagenwe na minisiteri.

    Minisitiri w'Ubumwe bw'Abanyarwanda n'Inshingano Mboneragihugu, Dr Bizimana Jean Damascene, avuga ko mu bihe byashize iyo byageraga mu bihe byo kwibuka Jenoside yakorewe Abatutsi mu 1994, hajyaga habaho ibiganiro bihoraho bivuga ku mateka y'igihugu buri nyuma ya saa sita.

    Icyakora ngo baje gusanga bitaratangaga umusaruro, kuko byatumaga abantu batajya mu bindi bikorwa byo kwiteza imbere, bijyana n'icyerekezo cy'igihugu cy'iterambere biba ngombwa ko bikurwaho.

    Ati 'Turifuza ko kwibuka bitaba igikorwa kibera abanyarwanda umutwaro, ahubwo kiba igikorwa gituma amateka igihugu cyanyuzemo azirikanwa ariko n'icyerekezo cy'igihugu cy'uko buri wese yiyubaka n'igihugu kigatera imbere bijyana.'

    Aha ni naho ahera asaba abazategura ibikorwa byo kwibuka ko bagomba kubahiriza amabwiriza aba yagenwe na minisiteri.

    Rimwe muri ayo mabwiriza ni irijyanye n'amasaha abantu bamara mu gikorwa cyo kwibuka, aho usanga hari abarenza amasaha 3 aba yaragenwe.

    Minisitiri Bizimana, avuga ko uko abantu batinda mu bikorwa byo kwibuka ari nako ihungabana ryiyongera kandi atari cyo kiba kigamijwe, bikanatuma abafite ibikorwa by'iterambere bamara umwanya munini bafunze imiryango.

    Ati 'Twaje gusanga iyo amasaha arenze atatu, bitera ikibazo cy'umunaniro bikanongera ihungabana. Kuko uko igikorwa kiba kirekire, niko n'agahinda nako kagenda kiyongera. Noneho abafite intege nkeya, ka gahinda kakabaganza kakaba kenshi, ihungabana rikaba ryinshi kandi atari ngombwa atari nacyo kigamijwe.'

    Umwaka ushize urugendo rwo kwibuka ni kimwe mubyari bitemewe gukorwa.

    Minisiri Bizamana, avuga ko byari byatewe nuko hari bamwe bateguraga urwo rugendo ugasanga bafunze umuhanda wose, bigatuma abajya mu bikorwa bitandukanye batabijyamo.

    Gusa uyu mwaka biremewe ariko hatabayeho kubangamira ingendo z'ibinyabiziga.

    Ati 'Hari uburyo abantu bashobora gukoresha igice kimwe cy'umuhanda, ahenshi hari n'inzira zagenewe abanyamaguru, bashobora rero gukoresha inzira zabigenewe imodoka nazo zigakomeza inzira yazo zijya mu bikorwa bitandukanye.'

    Ashingiye ku ngingo y'icyerekezo cy'iterambere ry'igihugu, Minisitiri Bizimana yavuze ko hari gutekerezwa ukuntu insanganyamatsiko ikoreshwa mu gihe cyo kwibuka yahindurwa ikareka kwitwa 'KWIBUKA TWIYUBAKA' ikaba 'TWIBUKE TWIYUBAKA' kuko abantu bose bagomba kwibona mu kwiyubaka ari nako bubaka igihugu.

    Icyakora nanone ibikorwa byo kwinezeza byo bizakomeza gufunga mu gihe cy'icyumweru cyo kwibuka kizatangira tariki ya 7 kugeza 13 Mata 2023.

    CYUBAHIRO GASABIRA Gad

    The post Kwibuka bigomba kujyana n'icyerekezo cy'igihugu cy'iterambere — Minisitiri Bizimana appeared first on FLASH RADIO&TV.

    Source : https://flash.rw/2023/04/05/kwibuka-bigomba-kujyana-nicyerekezo-cyigihugu-cyiterambere-minisitiri-bizimana/?utm_source=rss&utm_medium=rss&utm_campaign=kwibuka-bigomba-kujyana-nicyerekezo-cyigihugu-cyiterambere-minisitiri-bizimana

  • APR FC yatsinze Marines FC, Kiyovu Sports itsindwa na Rwamagana #rwanda #RwOT

    Imikino ibanza ya 1/4 mu gikombe cy’Amahoro, yasize ikipe ya Kiyovu Sports itunguriwe i Ngoma itsindwa na Rwamagana City, APR FC itsinda Marines FC.

    Uyu munsi ku wa Gatatu ni bwo habaye imikino ibanza ya 1/4 mu gikombe cy’Amahoro uretse Police FC ni yo itakinnye kubera ko itegereje kumenya iyo bizahura hagati ya Intare FC na Rayon Sports.

    APR FC yari yakiriye Marines FC kuri Stade ya Bugesera ndetse inayitsinda 2-1. Ibitego bya APR FC byatsinzwe na Bizimana Yannick ku munota wa 8, Mugisha Gilbert ku munota wa 32 ni mu gihe igitego cya Marines FC cyatsinzwe na Usabimana Olivier ku munota 38.

    Kiyovu Sports yari yasuye Rwamagana City i Ngoma. Rwamagana City yaje gutsinda Kiyovu Sports 3-2. Rwamagana yatsindiwe na Mbanza Caleb ku munota 2, Romeo ku munota wa 32 na Kagabo Nicholas ku munota wa 85. Nordien ni we watsindiye Kiyovu Sports ku munota wa 15 na 76.

    Mukura VS yakiriye ndetse inatsinda Musanze FC 1-0 cya Kayumba Soter ku munota wa 45.

    APR FC yatsinze Marines FC

    Kiyovu Sports yatsinzwe na Rwamagana City

    Source : http://isimbi.rw/siporo/article/apr-fc-yatsinze-marines-fc-kiyovu-sports-itsindwa-na-rwamagana

  • Massamba, Ariel Wayz, Mani Martin na Nel Ngab… – #rwanda #RwOT

    Icyumweru gishize abahanzi nyarwanda banyuranye basaruriye mu nama n'ibirori mpuzamahanga birimo n'Inama Nkuru y’Umuryango RPF-Inkotanyi yahuriranye n'ibirori by'isabukuru y'imyaka 35.

    Ni ibirori byabanjirijwe n'inama y'uyu muryango, nyuma haba ibirori byo kwizihiza iyi sabukuru yanahuje abahanzi batandukanye baririmbye banacurangirwa n'itsinda nka Symphony Band rizwiho ubuhanga.

    Perezida Paul Kagame yatorewe gukomeza kuba Chairman wa FPR-Inkotanyi ku majwi 99,8%, akaba yungirijwe na Uwimana Consolée, naho Gasamagera Wellars yatorewe kuba Umunyamabanga Mukuru.

    Ni amatora yabaye tariki ya 2 Mata 2023. Amatora yakozwe hatangwa abakandida kuri buri mwanya, abatora bakandika amazina y'abo batora. 

    Ibi byakozwe ku myanya yose usibye abakandida 20 batanzwe n'Inama Nkuru y'Urubyiruko aho muri bo hatowemo 10 bagomba guhagararira urubyiruko.

    Ni ibirori kandi byasusurukijwe n'abahanzi batandukanye bayobowe na Massamba Intore, Ariel Wayz, Nel Ngabo, Mani Martin, Jules Sentore n'abandi.

    Alyn Sano ni umwe mu bahanzi baririmbye mu birori byabaye mu cyumweru gishize

    Si ibi birori gusa byabaye kuko no muri Marriott Hotel hateraniye ibirori bya “African Heritage Concert and Awards” byatangiwemo ibihembo ku Banyafurika bo mu nzego zitandukanye bakoze ibikorwa by'indashyikirwa biteza imbere uyu mugabane.

    Mu bashimwe uyu mwaka barimo Dr Goodluck Jonathan wahoze ayobora Nigeria, Nyakwigendera Dr John Pombe Magufuli wayoboye Tanzania, Lt Gen Seretse Khama Ian Khama wahoze ayobora Botswana, Visi Perezida wa Liberia, Dr. Jewel Howard-Taylor n'abandi.

    Ni ibihembo byahawe Abanyafurika barimo n'ababa mu mahanga mu nzego zose zirimo ubucuruzi, politiki, ibikorwa by'ubugiraneza, imyidagaduro, ubuvanganzo, umuco, ikoranabuhanga, siyansi no guhanga udushya.

    Bamwe mu bahanzi baririmbye mu birori byo kwizihiza imyaka 35 Umuryango FPR umaze

    Muri ibi birori, ibijyanye n'umuziki byabajijwe Itorero Ibihame by’Imana ndetse na Alyn Sano waririmbye, abari aho bose bakahava banyuzwe bitewe n'ijwi rye ritangaje. Byari ibihembo nyafurika byashoboraga kwitabirwa no gutumirwamo umuhanzi ukomeye ariko babonye ko ibyo bakora, na Alyn Sano yabikora kurushaho.

    Jules Sentore mbere y’uko aririmba

    Dawidi azwiho gucuranga umwirongi

    Reba agace gato k’uburyo Massamba n’abandi bahanzi bataramiye Abayobozi Bakuru

    Source : https://inyarwanda.com/inkuru/127823/massamba-ariel-wayz-mani-martin-na-nel-ngabo-mu-bahanzi-bakomeje-gusarurira-mu-nama-ziri-k-127823.html

  • Imyaka 3 irashize Dj Miller yitabye Imana mu… – #rwanda #RwOT

    Ku Cyumweru tariki ya 05 Mata 2020 nibwo inkuru y'akababaro yatashye mu mitwe y'abakunzi benshi ba Dj Miller ko yitabye Imana, aho yaguye mu bitaro byitiriwe Umwami Faisal azize uburwayi yari amaze iminsi ahivuriza.

    Tariki 08 Mata 2020 nibwo yasezeweho n'abantu mbarwa bitewe n'amabwiriza atoroshye yariho, hagamijwe kwirinda icyorezo cya COVID-19. Kuri uwo munsi ubutumwa nyina yatanze ntibuzibagirana, avuga ku mutima mwiza umuhungu we yagiraga hamwe n'amashyengo.

    Yavuze ko umuhungu we igihe kimwe baganira yamubwiye ko yifuza kubyara umwana umwe gusa, nyina akamubwira ko yifuza abarenze umwe. Icyo gihe Dj Miller yahise amusubiza ko bamaze kuboneka batatu, Nyina biramutungura cyane amubaza abo aribo, Miller amubwira ko nta bandi uretse Mama we, umugore we n'umwana w'umukobwa we bise Shani.

    DJ Miller yatangiye umwuga wo kuvanga imiziki mu 2012 atojwe na DJ Karim, bahuriye mu itsinda rya Dream Team DJs.

    Yacuranze mu bitaramo bitandukanye bya Rock Events bikunze kuba harasirwamo ibishashi bitangiza umwaka, muri Waka Warrior Race 2015, mu birori byo Kwita Izina mu 2015, n'ibitaramo bya New Years' Vibes.

    Yibukirwa cyane ku gucurangira Sauti Sol ubwo bari mu rugendo rwo kumurika album yabo ya 'Live and Die in Africa' mu 2016, yanacuranze mu birori bya Jameson Connects Rwanda.

    Ni umwe mu bavanga imiziki wari umaze kwandika izina rikomeye, aho yanakoranaga n'abahanzi b'ingeri zose mu ndirimbo zitandukanye.

    Yakoranye na Butera Knowless, Dream Boys na Riderman indirimbo yitwa 'Iri Joro ni Bae'.

    Yakoranye kandi na Social Mulla mu ndirimbo yitwa Stamina, 'Un Million c'est Quoi' na Peace ndetse na Belle yahuriyemo na Peace na Urban Boys.

    Mu mwaka wa 2019 nibwo yari yashyingiranwe na Hope Nigihozo mu Ukuboza 2019 bibaruka imfura y'umukobwa bise 'Shani'.

    Muri Kamena 2019 nibwo DJ Miller yari yiyemeje kubana akaramata na Hope Igihozo, mu bukwe bwitabiwe n’ibyamamare bitandukanyeDJ Miller yasize umwana umwe n’umugore barakomeye kandi bakomeje kujya mbereUretse kuvanga umuziki yagiye agira uruhare mu itunganywa ry’indirimbo zitandukanyeImyaka ibaye itatu DJ Miller atabarutse

    Source : https://inyarwanda.com/inkuru/127835/imyaka-3-irashize-dj-miller-yitabye-imana-mu-rupfu-rwababaje-benshi-127835.html

  • Kuri wagatatu guhe saa kenda kuri sitade ya Karere ka Bugesera hari kubera umukino wa APR FC na Marine FC mu mikino ya 1/4 mu gikombe cy’Amahoro, APR FC yabonye itike isezereye Ivoire Olympic muri 1/8 naho Marine FC yo yari yasezereye Etincelles nayo muri 1/8.

    Abakinnyi 11 babanjemo kuruhande rwa APR FC yakiriye umukino: Pierre,Fitina, Placide, Clement,Christian,Bonheur,I’rshad, Gilbert,Ramadhan, Bosco na Yannick.

    Abakinnyi 11 babanjemo kuruhande rwa Marine FC yasuye: MATABARO,MUGANUZA,ISHIMWE,MANZI,GIKAMBA,NKUNDIMANA. A, NKUNDIMANA F,NGABONZIZA, MBONYUMWAMI, TUYISHIME na NAHIMANA

    80′ Muganuza wa Marine FC yaragerageje gutungurana ngo ananyagirane umupira ariko umusifuzi wo kuruhande avuga ko yarariye

    75′ Marine FC ibonye kufura nziza nyuma yuko umuzamu wa APR FC Pierre afashe umupira yarenze umurongo ariko Muganuza arayiteye ntihagira ikivamo kuko umuzamu ahise akosora amakosa ayifata neza

    71′ Nshuti Innocent abonye uburyo bwambere bwashoboraga kuvamo igitego ku mupira yarahawe na Christian arko awutera hejuru y’izamu kure

    70′ APR FC ikoze impinduka mu kibuga havamo, Yannick na Ramadhan hinjiramo Mugunga na Nshuti Innocent

    69’Abakinnyi ba APR FC barimo Ramadhan na Ombolenga bari guhererekanya neza bashaka kwinjira mu rubuga rw’amahina ariko byanze

    62’MUGANUZA wa Marine FC yarashatse gucomokana umupira anyuze mu kibuga hagati ariko Clement amuhagarika neza

    59′ Ombolenga yarahinduye umupira mwiza imbere y’izamu maze Yannick agiye gutsinda igitego umuzamu wa Marine FC aramubangamira ntiyawufatisha

    55′ APR FC ibonye kufura ku ikosa ryari rikorewe Anicet ariko bayotera bayiherekanya ntihagira ikivamo 

    53′ Abakinnyi ba APR FC baciriye umurongo aba Marine FC bari gukinira mu kibuga cyabo gusa 

    50’Christian wa APR FC yarahinduye umupira mwiza imbere y’izamu ashaka Anicet ariko Kapiteni GIKAMBA awukuraho neza

    47′ Ishimwe Anicet yarahaye umupira mwiza Mugisha Gilbert ariko agenda gacye uramucika

    46’Marine FC itangiye ikora impinduka mu kibuga havamo umuzamu Matabaro na Oliver watsinze igitego hinjiramo Gylain na Heritier 

    45′ Igice cyakabiri kiratangiye biracyari ibitego 2-1

    Igice cyambere kirangiye ari ibitego 2 bya APR FC kuri 1 cya Marine FC

    44′ Taiba yaragerageje gutanga umupira mwiza kwa Olivier ariko Clement ahita atabara

    42’Abakinnyi ba APR FC bakina mu kibuga hagati nibo bari guhererekanya neza

    38′ Usabimana Olivier ayiteye neza ijya mu izamu Marine FC iba ibonye igitego cyo kwishyura

    37’Marine FC ibonye penariti ku ikosa ryari rikozwe na Ombolenga arikorera NAHIMANA ku mupira waruri kuva muri koroneri,

    36′ Bonheur abonye ikarita y’umuhondo ku ikosa yarakoye NAHIMANA 

    34′ Abakinnyi ba APR FC nibo bafite umupira naho aba Marine FC bo bari gucunga ko warenga

    32’Bizimana Yannick atsinze igitego cya 2 ahawe umupira na Ruboneka Bosco 

    29′ Ramadhan yazamukanye umupira agenda agundagurana na ISHIMWE wa Marine FC ahinduye umupira mwiza maze Yannick awupfusha ubusa umuzamu ahita awifatira

    25′ APR FC ibonye kufura nziza ku mupira waruzamuwe na Ramadhan maze  Manzi awukuzaho intoki ariko Christian ayiteye mu maguro y’abakinnyi ba Marine FC bari bari kurukuta

    23′ I’RSHAD wa APR FC ahuye n’ikibazo cy’imvune biba ngombwa ko akurwa mu kibuga ateruwe

    22′ Kapiteni wa Marine FC,GIKAMBA yarekuye ishoti ariko umuzamu wa APR FC awufata bitamugoye

    20′ Bizimana Yannick wa APR FC aryamye hasi kubera ikibazo agize abaganga bari kumwitaho 

    19′ Abakinnyi ba Marine FC bakina mu kibuga hagati bari kugerageza guhererekanya neza nubwo kurenga umurongo ugabanya ikibuga kabiri byanze

    15′ Bwambere Marine FC igerageje kwinjira mu rubuga rw’amahina rwa APR FC ku mupira warufitwe na TUYISHIME ariko awuhereje NAHIMANA uramucika 

    13’Abakinnyi  ba APR FC nka Ramadhan bari kubona uburyo bwinshi bwo kugera imbere y’izamu rya Marine FC cyane 

    9′ Bizimana Yannick atsinze igitego cyambere cya APR FC ku makosa yarakozwe n’abamyugariro ba Marine 

    2′ Bosco yaragerageje kwinjira mu rubuga rw’amahina rwa Marine FC ariko umusifuzi asifura ko yarariye

    1’ikipe ya APR FC niyo yatangije umupira ndetse inatangira isatira inabona koroneri nubwo ntacyavuyemo.

    Abakinnyi ba APR FC babanje mu kibuga

    Abakinnyi ba Marine FC babanje mu kibuga

    Source : https://inyarwanda.com/inkuru/127840/live-apr-fc-1-0-marine-fc-mu-mukino-wa-14-mu-gikombe-cyamahoro-127840.html

  • Umukwe na mwenewabo baturikijwe n'impano yarimo igisasu baherewe mu bukwe #rwanda #RwOT

    Umugabo wari aherutse kurushinga we na mwenewabo bapfuye nyuma y'aho ibikoresho by'umuziki bahawe nk'impano ku munsi w'ubukwe bituritse.

    Polisi ivuga ko iyo mpano yarimo ibisasu byaturitse bikimara gucomekwa ku muriro.

    Uyu mugabo yapfiriye aho, mwenewabo we yapfuye nyuma ubwo yari mu bitaro avurwa ibikomere yagize.

    Igipolisi kivuga ko iki kibombe baba baragitezwe n'uwahoze ari umukunzi w'umugore we, wababajwe nuko yamwanze agashaka undi mugabo.

    Ushinjwa gukora ibi, azwi kw'izina rya Sarju Markam,uvuka mu ntara ya Madhya Pradesh, wafunzwe nijoro. Ntarashobora kugira icyo avuga ku byo ashinjwa kubera ari mu kasho.

    Abandi bane, barimo umuhungu w'imyaka 18, barakomeretse ubwo iki kibombe cyaturikaga ku wa 03 Mata mu rugo rw'uyu mugabo wari warongoye mu karere ka Kabirdham nk'intara ya Chhattisgarh iri hagati mu Buhindi.

    Igipolisi kivuga ko Markam w'imyaka 33 yari asanzwe atereta uyu mugore w'imyaka 29 akaba yaramusabye akomeje ko yamubera umugore wa kabiri.

    Ariko umuryango w'uyu mugore warabyanze maze umutegurira kurongorwa n'undi.

    Igipolisi kivuga ko iki gisasu cyari gikomeye cyane ku buryo inkuta n'igisenge by'inzu byasenyutse kikimara guturika.

    BBC

    Source : https://umuryango.rw/ubuzima-115/udushya/article/umukwe-na-mwenewabo-baturikijwe-n-impano-yarimo-igisasu-baherewe-mu-bukwe

  • Abakinnyi bakomeye bahombeye Chelsea yabatanzeho akayabo #rwanda #RwOT

    Ikipe ya Chelsea yo mu Bwongereza, ni imwe mu makipe azwiho kugura abakinnyi benshi bahenze ndetse abakinnyi batari bake bagira indoto zo kuba bayikinira.

    Kuva yagurwa n'umuherwe, Roman Abramovich muri 2003, Chelsea yatanze amafaranga atari make igura abakinnyi bakomeye, kugira ngo bayifahe kwegukana ibikombe bitandukanye.

    Mu isoko ry'igura n' igurisha ryo muri Mutarama 2019, Chelsea yasinyishije abakinnyi benshi barimo ba Mudryk,Enzo,Madueke,Santos n'abandi ariko kugeza ubu nta musaruro batanze.

    Umuryango wifuje kubagezaho abakinnyi 5 batahiriwe no kwerekeza i London muri Chelsea.

    FERNANDO TORRES


    Uyu rutahizamu ukomoka muri Espagne, yasinye muri tariki 31 Mutarama 2011, avuye muri Liverpool, aca agahigo ko gutangwaho menshi mu mateka ya shampiyona y'u Bwongereza, aho bivugwa ko yatanzweho agera kuri miliyoni 50 z'amapawundi.

    Torres uzwi nka 'El Nino', wari mu bihe byiza, mbere yo gusinya muri iyi kipe, iyo urebye ibyo yaje kugeraho ugereranyije n'akayabo yatanzweho, bigaragara ko yahombeye ikipe ya Chelsea.

    El Nino, ni umwe mu bakinnyi bangirijwe izina mu mupira w'amaguru mu gihe cyose yabaye muri Chelsea. Mu myaka 4 (2010-2014), yamaze muri Chelsea, Torres yabashije gukina imikino 172 atsinda ibitego 45, umusaruro uri hasi cyane ugereranyije n'uko yari yitwaye muri Liverpool ndetse na Atletico Madrid. Ibi byaje gutuma mu mwaka wa 2014-2015, atizwa muri AC Milan yo mu Butaliyani.

    ANDRIY SHEVCHENKO

    Shevchenko ukomoka muri Ukraine, mu myaka 7 yamaze muri Milan AC yatsinze ibitego 175 mu mikino 296,ari no mu batsinze ibitego byinshi mu mateka ya Champions League aho yatsinze ibitego 48 mu mikino 100.

    Uyu rutahizamu watwaye Ballon d'Or mu 2004, ishusho ye nka rutahizamu yatumye Chelsea imutangaho miliyoni 30.8 z'amapawundi, ndetse yesa n'agahigo ko gutangwaho menshi (2006).

    Shevchenko yabaye undi rutahizamu utarahiriwe no kwerekeza I Stamford Bridge.Kimwe n'abandi, yananiwe gufatisha muri shampiyona y'u Bwongereza, aho yatsinze ibitego 23 mu mikino 77 yakinnye mu marushanwa yose.

    Shevchenko byagiye bivugwa ko akundwa na Abramovic, bigatuma yihanganirwa na Mourinho, kuza kwa Luiz Felipe Scolari, byamuciriye inzira zo gusohoka muri Chelsea ku ntizanyo agaruka muri Milan AC (2008-2009), yahozemo gusa ntiyabasha kugaruka mu bihe bye biza.

    MICHAEL BALLACK

    Uyu mukinnyi wari wageze ku mukino wa nyuma w'igikombe cya Champions League ari kumwe na Bayern Leverkusen (2001-2002), agatwara igikombe cya shampiyona na Bayern Munich, yifujwe n'amakipe menshi akomeye ku mugabane w'u Burayi arimo; Manchester United, Inter Milan na Real Madrid.

    Uyu wari kapiteni w'ikipe y'igihugu y'u Budage, yaje guhitamo gukinira Chelsea mu 2006, asanzemo abakinnyi beza bo hagati mu kibuga barimo; Michael Essien, Claude Makélélé, Lampard, Robben na Duff.

    Gusa ntabwo byamworoheye kuko mu myaka igera kuri 4 yahabaye, ntiyatanze umusaruro yari yitezweho. Yari muri Chelsea yatwaye igikombe cya shampiyona y'u Bwongereza, yatozwaga na Carlo Ancelotti, ntabwo yaje guhabwa amasezerano mashya bitewe n'imyaka yari afite.

    HERNAN CRESPO

    Hernan Crespo wari umukinnyi uhenze ku Isi, abikesha intangiriro nziza yagize muri Kariyeri ye mu Butaliyani, atwara igikombe kiruta ibindi mu Butaliyani akinira Parma.

    Ibi byaje kumuhesha kwerekeza muri Lazio aguzwe akayabo. Mu 2003, yaje kwerekeza muri Inter Milan, maze Chelsea itangira guhamagara. Muri uwo mwaka, Crespo yerekeje muri Chelsea, atanzweho miliyoni 16.8 z'amapawundi.

    Mu mwaka we wa mbere Crespo yakinnye imikino 31 atsinda ibitego 12. Ubwo Jose Mourinho yageraga muri Chelsea asimbuye Claudio Ranieri, byagaragaye ko nta mwanya afitiwe mu ikipe y'uyu mutoza, nyuma yo kuza kwa Didier Drogba.

    Yaje gutizwa muri AC Milan asabwe na Carlos Ancelotti, aho yamaze igihe kinini ari intizanyo ndetse mu 2008, ubwo amasezerano yari arangiye, Chelsea yaje kumurekura.

    KEVIN DE BRUYNE

    Uyu mubiligi waje muri Chelsea tariki 31 Mutarama 2012, asinye imyaka 5, yagaragazaga ko yari afite ubushobozi bwo kuzavamo umukinnyi ukomeye muri iyi kipe.

    Ntabwo yaje guhabwa umwanya wo gukina kuko tariki 2 Kanama 2012, Chelsea yatangaje ko imutije muri Werder Bremen yo mu Budage, maze yitwara neza aho yatangiye mu kibuga mu mikino 33 atsinda ibitego 10.

    Yaje kugaruka muri Chelsea tariki 01 Nyakanga 2013, aho yijejwe ko yashoboraga gukinishwa muri uwo mwaka w'imikino. Mu mwaka wakurikiyeho (2013-2014), mu isoko ryo mu kwezi kwa Mbere, De Brune byarangiye agurishijwe mu yindi kipe yo mu Budage, ariyo Wolfsburg, imutanzeho miliyoni 18 z'amapundi.

    De Bruyne yaje kugaruka mu Bwongereza aguzwe na Manchester City tariki 30 Kanama 2015, atanzweho miliyoni 55 z'amapawundi, aba umukinnyi wa kabiri uguzwe menshi muri shampiyona y'u Bwongereza inyuma ya Ángel Di María wari waguzwe na Manchester United mu 2014.

    Mu mwaka umwe yabaye muri Chelsea (2013-2014), Kevin De Brune w'imyaka 27 y'amavuko yabashije kuyikinira imikino 3 gusa, nta gitego yabashije gutsinda.

    MOHAMED SALAH

    Kuwa 23 Mutarama 2014, Chelsea yatangaje ko yumvikanye na Basel ku igurwa rya Salah ku kayabo ka miliyoni 11 z'amapawundi.

    Nyuma y'iminsi itatu uyu mukinnyi yasinyiye Chelsea aba umunya Misiri wa mbere usinye mu ikipe yo mu mujyi wa London.

    Liverpool nayo yashakaga gusinyisha uyu rutahizamu wa Base ariko The Blues iyica mu rihumye iramwegukana.

    Bigitangira,Salah yabanje kuvugwa mu mpaka z'uko ashobora kutemererwa gukinira Chelsea ahubwo agasubira iwabo gukora imirimo ya gisirikare nkuko bisanzwe ari itegeko ku banya Misiri bose.

    Ibi byaganiriweho n'abayobozi b'iwabo birangira akuriweho iyi mirimo akomeza akazi ko gukinira Chelsea.

    Kubera ubwinshi bw'abakinnyi Chelsea yatozwaga na Jose Mourinho yari ifite,uyu mukinnyi yabuze umwanya wo gukina ajya ku ntebe biratinda.

    Uyu yakinnye imikino 3 ya Premier League,ibiri ya Champions League n'itatu mu gikombe cy'igihugu.

    Mohamed Salah byarangiye atijwe muri Fiorentina nyuma y'amezi 6 gusa,nyuma ajya muri AS Roma binarangira yerekeje muri Liverpool aho ari gukorere amateka n'ubu.

    Mu mikino 13 yakiniye Chelsea,Mo Salah yatsinze ibitego bibiri gusa.

    Abandi bakinnyi bapfiriye ubusa Chelsea barimo Romelu Lukaku,André Schürrle,Alvaro Morata,Tiemoue Bakayoko,Gonzalo Huguain,Timo Werner n'abandi.

    Source : https://umuryango.rw/imyidagaduro/imikino/article/abakinnyi-bakomeye-bahombeye-chelsea-yabatanzeho-akayabo

  • Impaka ntizishira!Mu mafoto atandukanye ihere ijisho uburanga bwa Ariel Wayz mu masura atandukanye(Amafoto) #rwanda #RwOT

    Ariel Wayz ni umwe mu bahanzikazi bakunzwe cyane hano mu Rwanda kubera ubuhanga n'ijwi riryoheye amatwi byumvikana mu bihangano bye.

    Wayz yatangiye kumenyekana cyane muri 2020 amenyekana nk'umukobwa w'umunyempano itangaje kandi ukiri muto by'umwihariko amenyekana cyane nk'umuhanzikazi ukunda kwambara imyambaro ya gisore.

    Mu minsi ishize Ariel Wayz yaje gutungurana asohora amafoto yambaye nk'abakobwa ubwo yateguzaga indiribo 'You Should Know' ni ifoto yazamuye amarangamutima ya benshi benshi bashimangira ko agaragara neza mu myambaro y'abakobwa ku rundi ruhande kandi abandi bavuga kuba umukobwa atari ibintu bye akwiye gukomeza kwambara nk'abasore kuko ari ibintu bimubereye cyane.

    Kuva icyo gihe uyu muhanzikazi yatangiye kujya anyuzamo agasangiza abakunzi be amafoto amugaragaza nk'umukobwa ariko ku rundi ruhande wa mwihariko we ukaganza ariko nubu impaka ntizijya zishira buri uko asangije abamukurikira amafoto ye atandukanye mu butumwa abantu bashyiraho usanga baba bayagereranya.

    Dore amwe mu mafoto ya Ariel Wayz amugaragaza mu masura atandukanye atuma benshi bahora bayagereranya.

    Source : https://umuryango.rw/imyidagaduro/article/impaka-ntizishira-mu-mafoto-atandukanye-ihere-ijisho-uburanga-bwa-ariel-wayz-mu

  • Muhanga: Abantu 340 bafatiwe mu bikorwa bihungabanya umutekano #rwanda #RwOT

    Hashize igihe mu bice by'umujyi wa Muhanga havugwa ibibazo bijyanye n'abantu batega abaturage bakabambura ibyo bafite birimo na Terefone, abandi bagafatirwaho imihoro n'Ibyuma, bagakurwamo imyenda bambaye bakayijyana, hakaba n'abakomeretswa. Abantu 340 bakekwa, bafatiwe mu bikorwa by'ubu bugizi bwa nabi bwibasira abaturage, barafashwe bacumbikiwe mu kigo kinyurwamo by'igihe gito.

    Umuyobozi w'Akarere ka Muhanga, Kayitare Jacqueline yabwiye abikorera bo mu mujyi w'aka Karere bari mu nama y'Inteko rusange ko hashize igihe hafashwe abantu 340 bagaragaye mu bikorwa bihungabanya umutekano w'abaturage mu bice bitandukanye.

    Yagize ati' Kugeza ubu dufite abagera kuri 340 bacumbikiwe mu kigo cyakira abafashwe, bacyekwaho bimwe mu bikorwa bihungabanya umudendezo w'abaturage mu bice bitandukanye by'uyu mujyi, ndetse tukabona ko bidakwiye ko abantu bahora bavuga ko babangamiwe n'abo. Iyo tumaze kubafunga ni mwebwe muhindukira mukadusaba ko tubarekura maze bakagaruka bataranahindutse bagasubira muri bya bikorwa byari byaratumye tubafata, bakongera gutuma abaturage n'abikorera bakora bafite igishyika cy'uko bataha bakamburwa'.

    Umuyobozi w'Urwego rw'Ubugenzacyaha-RIB ishami rya Muhanga riherereye mu murenge wa Nyamabuye, Venuste Nyirimigabo yabwiye abikorera ko mu minsi ishize urwego abereye umuyobozi rwagiye rwakira ibibazo bijyanye n'ubushukanyi bugamije kwereka ababwinjijwemo ko bagiye kubona ubukire buhutiyeho, ibyo bigatuma habaho ubwambuzi kuko basabwa kujyana nabo bakabasaba amaterefoni n'amafaranga bakababwira ko bajya kuzana ibindi bintu byo gukoresha bamara kugenda nabo bagatwara ibyo basigiwe, wagaruka ugasanga bigendeye.

    Akomeza avuga ko uko bucyeye, ubu bwambuzi n'ubugizi bwa nabi birushaho kwiyongera cyane, ko kandi ababukora bahungabanya umutekano w'abantu n'ibyabo. Yibutsa ko bikomezanyije umuvuduko biriho hari abakwisanga bakennye burundu.

    Kanyankore Ally Xavier, rwiyemezamirimo avuga ko bibabaje kubona umuntu yamburwa utwo yakoreye bikomotse ku mutekano mucye uterwa na bamwe mu bantu banze gukura amaboko mu mufuka, ahubwo bumva bashaka kurya batakoze.

    Yagize Ati' Twebwe twikorera biratubabaza iyo umuntu yabyutse ajya gushaka amafaranga yo gutunga umuryango we, barangiza bakagutegereza ugeze hafi y'iwawe. Hari insoresore zitagira akazi ndetse ugasanga barashaka gutwara ibyo batavunikiye, usanga ari umuco mubi cyane ukwiye kwamaganwa. Twijejwe ko ibi bibazo bigiye kurangizwa n'abashinzwe umutekano'.

    Perezida w'Urugaga rw'Abikorera mu karere ka Muhanga, Kimonyo Juvenal avuga ko hari abahungabanyije umutekano w'abantu n'ibintu barafatwa. Yemeza ko ibyo bikorwa bimaze kugabanuka. Yongera ho ko inzego z'umutekano zibizeza ko ibi bibazo byose birimo kuvugutirwa umuti urambye.

    Ibikorwa bihungabanya umutekano w'abaturage n'ibyabo, bikorerwamo urugomo rukomeretsa ndetse hakaba n'ababiburiramo ubuzima, bimaze iminsi ari ikibazo gihangayikishije abaturage. Basaba inzego zose bireba guhagurukira iki kibazo, ababifatiwemo bagahanwa by'intangarugero, byaba na ngombwa bakajya bazanwa ku mugaragaro mu ruhame rw'abaturage bakanabamenya kuko kenshi aba bagizi ba nabi bitwikira ijoro cyangwa se ibyo baba bakoze bakaba bihereranye umuntu, bamuteze ari wenyine cyangwa se bagatera mu rugo.

    Akimana Jean de Dieu

    Source : https://www.intyoza.com/2023/04/05/muhanga-abantu-340-bafatiwe-mu-bikorwa-bihungabanya-umutekano/