Author: webrwanda

Muri aka gace, niho hantu ku isi hari ingabo nyinshi za ONU zoherejwe kugarura amahoro, zirenga 15,000. Zifite inshingano yo kurengera abaturage.

Imwe muri iyi mitwe hari imaze muri aka gace ka Congo y'Uburasirazuba imyaka irenga 20, yica abaturage, isahura, ifata abagore ku ngufu, isoresha imisoro, ishimuta abantu n'ibindi.
Kuki iyi mitwe yagize Kivu zombi indiri yazo?
Aka ni agace gakungahaye ku mabuye y'agaciro menshi.

Ni agace karimo amashyamba na pariki y'ibirunga (Kivu ya ruguru), pariki ya Kahuzi – biega n'imisozi miremire ya Minembwe (Kivu y'Epfo) n'ibindi bice birimo amashyamba menshi mu ntara zombi.

Ibi bibera ubwihisho bwiza izi nyeshyamba mu gihe zitewe n'ingabo za leta.

Nixon Kambale, umunyamategeko akaba n'umusesenguzi wa politiki muri DR Congo yigeze kubwira itangazamakuru mpuzamahanga ko igice kiruta 40% cy'uburasirazuba bwa Congo gisa n'igitegekwa n'inyeshyamba.

Ati “Ibi biterwa n'intege nke za leta za nyuma ya Mobutu mu kurandura iyi mitwe irimo n'iyari ishyigikiwe n'ibihugu bituranyi” .

Uwitwa Omar Kavota, umuyobozi wungirije w'ikigo cyiga ku guteza imbere amahoro demokarasi n'uburenganzira bwa muntu CEPADHO, aba mu karere ka Beni , muri 2020 yabwiye BBC impamvu nyamukuru itera icyo kibazo.

Kavota yavuze ko iyi mitwe irambye muri aka gace kubera ubucukuzi n'ubucuruzi bw'amabuye y'agaciro, gusoresha abaturage, gushimuta abantu igasaba amafaranga, gusahura no gusarura ibyabo.

Ati: “Hari n'abantu n'imiryango itera inkunga y'amafaranga iyo mitwe, indi nka ADF yo ikura inyungu no mu bucuruzi bwa mafia bwambukiranya imipaka.

“Kuri ibyo hiyongeraho gucuruza zahabu, imbahu, cacao, gasegereti mbese ikintu cyose cy'umutungo kamere”.

Bwana Kavota avuga ko iyi mitwe yagiye ikomera kurushaho ikanashaka abayifasha hirya no hino.

Ati: “nka ADF yabashije kuzana abarwanyi baye muri Tanzania, muri Kenya, i Burundi, mu Rwanda, muri Tchad, Mozambique ndetse n'abanyecongo”.

Izo nyeshyamba ni izihe?

Umubare munini ni imitwe y'inyeshyamba z'abanyecongo ubwabo izwi ku izina rya Mai-Mai.

Mai-Mai zishingiye ahanini ku moko y'abanyecongo bo muri aka gace, imwe ikitwa ko irengera ubwoko runaka ko buticwa n'ubundi cyangwa inyeshyamba runaka.

Indi mitwe ni iy'abanyamahanga imaze imyaka myinshi hano ivuga ko irwanya leta z'u Burundi, u Rwanda na Uganda.

Muri Kivu ya ruguru imitwe izwi cyane ihakorera ni Allied Democratic Forces (ADF) ivuga ko irwanya leta ya Uganda, ikorera cyane mu karere ka Beni.

Hari kandi umutwe wa FDLR urwanya leta y'u Rwanda ukorera mu bice bya Rutshuru na Masisi.

Indi ni nka; Nduma défense du Congo-Rénové (NDC-R) y'abanyecongo ubwabo.

Collectif des mouvements pour le changement (CMC) y'abanyecongo, ivuga ko irwanya NDC-R.

Hamwe n'imitwe myinshi ya Mai-Mai nka; Mai Mai Mazembe, Mai Mai Nyatura, Mai Mai Kirikicho, Mai Mai Kifuafua, Mai Mai Charles, Raia Mutomboki, APCLS…
Muri Kivu y'Epfo hariyo umutwe wa RED-Tabara urwanya leta y'u Burundi, ubutegetsi mu Burundi buvuga ko ufashwa na leta y'u Rwanda.

Hari kandi umutwe wa Mai-Mai Yakutumba uvuga ko urwanira amoko y'Ababembe, Abafulero n'Abanyindu, ugahangana ukarwana n'uwitwa Ngomino/Ngumino uvuga ko irwanya iyicwa ry'Abanyamulenge, n'indi ya Mai – Mai irimo na Raia Mutomboki.

Usibye iyi mitwe yitwaje intwaro tumaze kugarukaho haruguru, ubu noneho uburasirazuba bwa kongo cyane muri Kivu ya Ruguru haravugwa M23 kugeza ubu ubutegetsi bwa RDC bufata nk'ikibazo gikomeye ku mutekano wayo.

Byatumye leta ya Kinshasa yirengagiza ububi bw'indi mitwe yose twagarutse, ikibazo kiba M23 ndetse yifashishije igisirikare cyayo FARDC , yagabye ibitero kuri uwo mutwe kandi kugera n'ubu rwabuze gica.

Iyi M23 yo irwanira iki?

Binyuze mu muvugizi w'igisirikare muri wo mutwe, Willy Ngoma yatangaje ko Congo ifite ibibazo byinshi bikomeye ko ari nayo mpamvu bafashe intwaro, bakiyemeza gushaka uburyo babikemura.

Ati 'Abanyapolitiki bafashe bugwate igihugu. Bafata igihugu nk'ikibuga cyabo. Abaturage bafite ibibazo, gereza ni ahantu ho gupfira, nta mihanda ihari, mu burezi nta kigenda, mu bitaro nta miti.'

Willy Ngoma yavuze ko amasezerano yasinywe hagati ya Guverinoma ya Congo n'umutwe wa M23 atigeze yubahirizwa. Yavuze ko kuva mu 2013 yasinywa, bategereje bihanganye aho bari mu buhungiro, bigeze mu 2017 nta kirakorwa bafata umwanzuro wo gusubira mu mashyamba.

Ati 'Mu myaka itanu twamazeyo, ntabwo twigeze duhungabanya uwo ariwe wese. Twabwiye Guverinoma ko twataye imiryango yacu mu gihe cy'imyaka icumi, ko mu buhungiro, uburyo tubayeho tudashobora kubwihanganira, ko yadufasha tukagaruka mu gihugu cyacu. Barabyanze.'

Abarwanyi ba M23 mu 2013 bamwe bahungiye muri Uganda abandi mu Rwanda. Abari muri Uganda nibo basubiye ku rugamba mu mashyamba ya Virunga mu gihe abari mu Rwanda bacumbikiwe i Ngoma mu Ntara y'Iburasirazuba mu kigo kirindwa n'Igisirikare cy'u Rwanda.

Ngoma yavuze ko ubwo RDC yari yanze ko batahuka, bo bafashe umwanzuro bakava muri Uganda bagasubira mu mashyamba. Uko gutahuka ntabwo kwigeze kugwa neza RDC ahubwo yahise ifata intwaro itangira kurwanya M23.

Ati 'Natwe twirwanyeho. Bashakaga kudutsemba. Bavuga ko tutari Abanye-Congo, ko turi Abanyarwanda.'

M23 yavuze ko ibyo irwanira birenze inkomoko ariko ko no kubwirwa ko atari Abanye-Congo nabyo biri mu bibangamiye.

Ngoma yavuze ko amasezerano basinyanye na Guverinoma ya Tshisekedi agena ko abanyapolitiki b'umutwe wa M23 bahabwa imyanya, abasirikare bagashyirwa mu gisirikare. Ngo ayo masezerano agena ko hazakorwa batayo enye zihuriweho n'Ingabo za FARDC bakarwanya by'umwihariko umutwe wa ADF na FDRL.

None amaherezo ni ayahe?

Perezida Felix Tshisekedi amaze kugera ku butegetsi yasezeranyije ko azakora ibishoboka byose akarwanya iyu mitwe ibuza amahoro uburasirazuba bwa Congo n'akarere.

Ibitero byo kurwanya umutwe wa ADF byatangiye mu kwezi kwa 10 gusa ingabo za leta ntizirabasha kurandura uyu mutwe mu karere ka Beni, ahubwo abarwanyi bawo baca inyuma bakica abaturage.
Icyakora kuri ubu Leta ya Congo yatangiye gufatanya n'ibihugu iyi mitwe ikomokamo nka Uganda mu kuyihashya,kandi amakuru ahari n'uko hari umusaruro byatanze n'ubwo ADF itarashira burundu.

RDC ihanze amaso ingabo z'ibihugu by'akarere ka Afurika y'Iburasirazuba zimaze kugera muri icyo gihugu ku bwinshi, n'iza Angola nazo zahageze ngo barebe ko bafatanya gushaka umuti urambye ku mutekano muke umaze imyaka mu burasirazuba bwa Congo.

Source : https://umuryango.rw/amakuru/mu-mahanga/umutekano/article/dr-congo-intara-za-kivu-indiri-y-imitwe-y-inyeshyamba-kubera-iki-m23-yo-bite

Ibi yabivuze ubwo yari mu kiganiro na Isimbi Tv aho yagarutse ku buzima bwe bwo hambere nubwo arimo uyu munsi.

Judith ukunda kugaragaza ko anyuzwe n'ubuzima arimo uyu munsi avuga ko kubigeraho byari urugendo rukomeye cyane ndetse no kwigomwa kuko yagiye acibwa intege kenshi n'abantu bamubwiraga ko ntacyo azigezaho.

Mu magambo ye yumvikana avuga ko ibyo yageragezaga gukora byose hataburaga abamuca intege rimwe na rimwe bikamukomeretsa gusa agakomeza gukora cyane kuko yari azi icyo ashaka.

Atanga urugero Judith yavuze ko ubwo yarimo agerageza gushaka uruhushya rumwemerera gutwara imodoka abamuca intege babaye benshi bamubwira ko imodoka ntaho azayikura bitewe n'uburyo icyo gihe yagaragraga gusa ashimangira ko ibyo abantu babonaga ko atazageraho yabigezeho ndetse yanabirenze ubu icyo asigaje ari ukugura indege.

Ati “Narayikoreraga bakandeba igihagararo n'ibyo nakoze bakampagarika ntabirangije, bakansuzugura bakavuga ngo se ubundi imodoka uzayikura he? None ubu icyo nsigaje kugura ni indege.”

“Reka mbwire abantu banciye intege ko icyo nsigaje kugura ari indege, kuko igare nararitunze, moto narayitunze ntunga n'imodoka, none se ubwo ikindi gikurikiyeho ni iki? Cyane rwose mfite inzozi zo kugura indege.”

Judith Niyonizera yamenyekanye ubwo yari mu rukundo n'umuhanzi Safi Madiba banakoze ubukwe icyakora kuri ubu bombi ntibakibana nkuko aherutse kubitangaza.

Source : https://umuryango.rw/imyidagaduro/article/nzagura-indege-judith-wa-safi-madiba-yabwiye-abamuciye-intege-kwitega-ibiri

Kuva muri 'Kajugujugu' ya Covid 19 ,uknyura ku maradiyo na Televiziyo binyuranye ugaragaza ibikorwa bya Kicukiro.

Kugera imbere ya Perezida,unaniwe gusobanura icyo wakoze ku nyubako y'umurangara ituzuye iri ku muhanda 'Abakuru' bakoresha!

Yananijwe n'iki gukora ibyo yasabwaga?

Solange ntiyaba yarabaye igitambo kubandi bose barangaye mu nshingano zabo?
Tubane mu kiganiro

Source : https://umuryango.rw/amakuru/mu-rwanda/politiki/article/mbona-solange-yarabaye-igitambo-cya-rubingisa-n-abandi-bose-barangaye-mu

Inkuru irikuvugwa cyane mubitangazamakuru byo muri East Africa, ni urutonde rw'abahanzi bakize cyane kurusha abandi muri uyu mwaka wa 2023.

Uru rutonde rwakoze n'ikinyamakuru Forbes kizobereye mu gucukumbura no gukora intonde z'abanyamafranga, rwashyize hanze urutonde rw'abahanzi 10 bafite agatubutse cyane kurusha abandi muri East Africa.

Kuri uru rutonde rw'abahanzi bagera kuri 50 batunze akayabo k'amafaranga muri East Africa, Diamond niwe uza kumwanya wa kabiri aho bavugako atunze agera kuri miliyoni 8.6 z'amadorali, ku mwanya wa mbere haza, umuhanzi akaba n'umunya politiki, Bobi Wine wo mugihugu cya Uganda, aho bivugwako atunze akayabo ka miliyoni 9.6 z'amadorali.

Nkuko bigaragara kuri uru rutonde nta muhanzi w'umunyarwanda ugaragaramo muri 50 bakize, ibi byerekana ko bagifite urugendo rurerure rwo gukorera amafaranga mu miziki yabo.

Abandi bari kuri uru rutonde harimo :

3. Jose Chameleon wo muri Uganda, abarirwa muri miliyoni 8.1 z'amadorali

4. Akothe wo muri Kenya abarirwa muri miliyoni 7.5 z'amadorali

5. Umuraperi akaba n'umudepite Professor Jay wo muri Tanzania abarirwa muri miliyoni 7.3 z'amadorali

6. Alikiba abarirwa muri miliyoni 7.2 z'amadorali

7. Jaguar umuhanzi akaba n'umunyapolitiki muri Kenya abarirwa muri miliyoni 7 z'amadorali

8. Harmonize abarirwa muri miliyoni 5.5 z'amadorali

9. Abagize itsinda rya Sauti Sol bo muri Kenya babarirwa muri miliyoni 5 z'amadorali

10. Bebe Cool wo mugihugu cya Uganda abarirwa muri miliyoni

Source : https://umuryango.rw/imyidagaduro/article/nta-munyarwanda-urimo-dore-abahanzi-10-batunze-agatubutse-muri-east-africa

Andrea Emilova Ivanova, ufite imyaka 25,umugore ufite iminwa minini kurusha abandi ku isi,akomeje kuvugwa cyane ku mbuga nkoranyambaga,kubera kuvuga ko yabuze umugabo.

Uyu mugore ufite iminwa minini ku isi yagaragaje ko adashobora kubona umugabo.

Andrea Emilova Ivanova yakoresheje hafi ibihumbi 20.000 by'ama pound kugira ngo yibagishe iminwa inshuro 43 zose.

Vuba aha yatewe izindi nshinge enye za hyaluronic acide kugira ngo yiyongerere iminwa.

Uyu mugore w'imyaka 25 akunda kwibagisha kenshi kugira ngo akomeze aka gahigo ko kuba umugore ufite iminwa minini ku isi.

Icyakora ngo na nubu ntabwo aranyurwa nuko ingana kandi arashaka kuyongera biruseho.

Kugira ngo abone umukunzi,uyu mugore ngo arashaka kwitabira ikiganiro cyo kuri TV cyitwa “The Bachelor”.

Nubwo ngo ashaka gukomeza gukurura abantu ku mbuga nkoranyambaga,uyu ngo arashaka cyane umukunzi.

Uyu yagize ati: “Ndi umukobwa ugaragara bitandukanye kandi bidasanzwe kandi ibi ntibikundwa n'abagabo benshi.

Nibyo koko hariho abagabo benshi bankunda cyane, ariko hariho n'abatankunda.

Batekereza ko ntangaje kandi nasaze.

Abagabo bamwe banyandikira ubutumwa bwihariye ku mbuga nkoranyambaga kandi bansaba ko dusohokana, bampa amafaranga,bansaba gusura ibihugu byabo, ni byiza.

Biranshimisha kuba hari abantu bankunda kandi bifuza ko bamba hafi.

Icyakora, nzanezezwa cyane no guhura n'urukundo rw'ubuzima bwanjye ariko sinzi igihe bizabera.”

Nubwo Andrea yiteguye kwishyira mu kaga ajya mu biganiro byo gushaka “umugabo w'inzozi ze”, ntabwo yizeye ko azamubona.

Yongeyeho ati: “Sinzi niba azakunda abakobwa nkanjye bafite ubwiza bw'ubukorano.

Uyu yavuze ko yiteguye kumwerera imbuto nziza naramuka amuhisemo atarebye uko agaragara.

Source : https://umuryango.rw/ubuzima-115/udushya/article/umukobwa-ufite-iminwa-minini-kurusha-abandi-ku-isi-yafashe-hasi-hejuru-ashaka

Kuri wa kabiri, tariki ya 4 Mata, umugabo yemeye ko yishe umugore we mu rubanza i Mombasa.

Ukekwaho icyaha, Evans Katuti, yabwiye urukiko ko imirwano hagati ye n'umugore we yabaye ku ya 26 Gashyantare 2023, mu rugo rwabo i Migadini, Changamwe nyuma yo kumusangana n'undi mugabo mu buriri bwabo.

Uyu mugabo yavuze ko yatashye mu rugo ahagana saa tanu z'ijoro avuyekureba umukino wa nyuma w'igikombe cya Carabao hagati ya Manchester United na Newcastle United, agasanga undi mugabo asambana n'umugore we.

Mu gihe barimo kurwana,ngo umugore we yamufashe udusabo tw'intanga aradukanda uyu mu kwitabara amutera icyuma aramwica.

Katuti yabwiye umucamanza mukuru w'urukiko rwa Mombasa, Martha Mutuku, ati 'Nageze mu rugo ahagana saa tanu z'ijoro nyuma yo kureba umukino wa nyuma w'igikombe cya Carabao hagati ya Manchester United na Newcastle United.

Narebeye umukino mu kabari ko hafi y'inzu yanjye. Ngeze mu rugo, natangajwe no kubona umugore wanjye Anna Kambua, ari kumwe n'undi mugabo mu buriri bwacu bw'abashakanye.

Umugore wanjye yafashe udusabo tw'intanga aradukanda ndababara cyane. Mu kwirwanaho, nabonye icyuma cyo mu gikoni nkimutera kabiri mu nda '.

Yahunze amaze kwica umugore we.

Katuti yaje kumenyesha bene wabo ibyo yakoze.

Abavandimwe be bamugiriye inama yo kwitanga kuri sitasiyo ya polisi imwegereye.

Yumviye inama y'umuryango we, Katuti ajya kuri sitasiyo ya Polisi ya Mtito Andei mu Ntara ya Makueni.

Nyuma ukekwaho icyaha yimuriwe i Changamwe, aho bivugwa ko yiciye umugore we.

Ku wa kabiri, tariki ya 4 Mata, Katuti washinjwaga icyaha cyo kwica umuntu,yemeye icyaha mu rukiko.

Uyu mugabo ntabwo arahabwa igihano n'urukiko.

Source : https://umuryango.rw/ubuzima-115/udushya/article/umugabo-yishe-umugore-we-amuhoye-kumukanda-ubugabo-bari-kurwana

Leta Zunze Ubumwe za Amerika zirimo kwinjira mu muriro utazima . byavuzwe na Donald Trump mu ijambo yavuze amaze guhakana ko nta mpapuro zijyanye n'umutungu we yahinduye agamije gusibanganya ibimenyetso.

Ashinjwa ko izo mpapuro yazihinduye, kandi ngo iyo atabikora byari bumugireho ingaruka zikomeye mbere yo kwiyamamaza mu matora yo muri 2016.

Trump wahoze ari umukuru w'igihugu cya America , yashinjwe ibyaha 34 mu rukiko rwa Manhattan i New York ku wa kabiri w'iki cyumweru .

Ibyo bijyanye n'amafaranga adafifiwe ibimenyetso yahawe umukinyi wa porno Stormy Daniels, wavugaga ko bagiranye imibonano mpuzabitsina.

Trump niwe mukuru wa Amerika ubaye uwa mbere mu gihe gishize cyose mu gihugu , n'urubanza rw'ibyaha ashinjwa.

Yagize ati''Icyaha cyonyine nakoze ni ukuba niyemeje kuvana nta bwoba igihugu cyacu mu nzara z'abashaka kugisenya'' nk'uko uwo mugabo w'imyaka 76 yabwiye abamushyigikiye bari bakoraniye ku rugo rwiwe i Mar-a- Lago muri Floride avuye kwitaba mu rukiko.

Yavuze ko urwo 'rubanza rw'ikinyoma' nta kindi ruhatse kitari kimwe mu mugambi w'ububisha w'aba Democrat wo kumwanduriza isura nk'umukandida mu matora y'umwaka utaha.

Imbere y'aho yari atuje adakoma kandi acecetse mu gihe cy'iminota hafi 30 imbere y'umucamanza Juan Merchan, yumvikana avuga gusa asubiza ibibazo byiwe n'igihe yavugaga ko azaburana ahakana icyaha. Trump ntaco yabwiye itangazamakuru ubwo yasohokaga mu rukiko.

Urwo rubanza rw'uwahoze ari umukuru w'igihugu rushingiye ku mafaranga adasobanuye neza angana na $130.000 yishyuwe mbere y'amatora y'umukuru w'igihugu yo mu 2016.

Mu gihe kuriha ayo mafaranga binyuranije n'amategeko, gusohora amafaranga ajyanye no kwiyamamaza ntiwerekane uburyo yakoreshejwe bihanwa n'amategeko y'igihugu ajyanye n'amafaranga yo kwiyamamaza.

Uwahoze ari umunyamabanga we, Michael Cohen — yihakanye sebuja ,avuga ko we yategetswe na Trump nk'umukoresha icyo gihe kuyishyura nawe akabyubahiriza.

BBC

Source : https://umuryango.rw/amakuru/mu-mahanga/politiki/article/america-trump-wigeze-kuba-perezida-yahanuye-ko-igihugu-kiri-kwinjira-mu-muriro

Irembo yatangaje ko baganiriye ku mikorere y'uru rubuga ndetse n'uburyo rwahinduye imitangire ya serivisi kandi rukagira n'ingaruka nziza mu miyoborere muri rusange.

Haganiriwe kandi ku cyerekezo cyo gukoresha ikoranabuhanga mu guhindura imibereho y'abaturage.

Urubuga 'IremboGov' rwatangijwe muri Nyakanga 2015, mu ntego zarwo harimo ko serivisi zose zitangwa na leta zatangwa mu buryo bw'ikoranabuhanga rikoreshwa n'umuturage umunsi ku wundi.

Muri Gashyantare 2020 nibwo byatangajwe ko Ikigo cya Leta gitanga serivisi hifashishijwe ikoranabuhanga 'Irembo' cyatangiye kwimurira zimwe muri serivisi gitanga ku rubuga rushya rwifashisha uburyo bwiswe 'IremboGov 2.0', bwitezweho kurushaho korohereza abaturage basiragiraga bajya mu nzego zitandukanye kwaka ibyo basabye banyuze ku 'IremboGov'.

Uburyo bwo gusaba ibyemezo nabwo bwagabanyirijwe urugendo byanyuragamo, bishyirwa mu ntambwe eshatu, aho umuturage azajya asaba icyemezo, kigasuzumwa, ubundi akishyura. Ibi ngo bizajya bikorwa kuri serivise zimwe na zimwe aho bishoboka.

Uburyo bwo gusaba umuturage kugira ibyangombwa yohereza ku rubuga nabwo bwakuweho, kuko ngo amakuru yose arebana n'usaba ibyangombwa azajya akurwa mu zindi nzego za leta ziyafite mu buryo bw'ikoranabuhanga.

Kugeza ubu binyuze kuri uru rubuga umuturage ashobora kubona serivisi zirenga 100.

Perezida Ruto asuhuzanya n’Umuyobozi Mukuru wa Irembo, Israel Bimpe

Perezida Ruto, Minisitiri Ingabire na Israel Bimpe uyobora Irembo

Perezida Ruto yasobanuriwe imikorere y’urubuga Irembo

Perezida Ruto yasuye Irembo ari kumwe n’abayobozi barimo Minisitiri w’Ikoranabuhanga na Inovasiyo, Ingabire Paula na Minisitiri w’Ububanyi n’Amahanga Dr Vincent Biruta

---

Source : http://igihe.com/amakuru/u-rwanda/article/perezida-ruto-yasobanuriwe-imikorere-y-urubuga-irembo

Ruto ari kumwe na Kagame, kuri uyu wa Gatatu basuye Ishuri Rikuru ry'Ubuhinzi n'Ubworozi butangiza ibidukikije (Rwanda Institute for Conservation Agriculture, RICA) riri mu murenge wa Gashora, Akagali ka Mwendo, umudugudu wa Gaharwa mu Karere ka Bugesera.

Nyuma yo kwishimira ikoranabuhanga n'amasomo atangirwa muri iri shuri rirera abahanga mu buhinzi n'ubworozi, Perezida Ruto, yageze mu gasanteri ka Nyamata asuhuza abaturage nabo bamwereka ubwuzu baramwishimira karahava.

Amafoto yashyize kuri Twitter ye, Ruto agaragara asuhuza abaturage bari ku nkombe z'umuhanda, ari kumwe na Minisitiri w'Ububanyi n'Amahanga w'u Rwanda, Dr Vincent Biruta.

Mu gusobanura ayo mafoto, yanditse ati 'Naganiriye kandi nsangira icyayi n'abakora cyane bashakisha imibereho [Hustlers] muri Calibou Restaurant, iri i Nyamata mu karere ka Bugesera, mu Burasirazuba bw'u Rwanda'.

Ruto yari yicaranye na Minisitiri Dr Biruta na Minisitiri w'Ububanyi n'Amahanga wa Kenya, Dr Alfred Nganga Mutua muri restaurant bari kumwe n'abandi bayobozi.

Perezida Ruto yageze i Kigali kuwa Kabiri ari nabwo u Rwanda na Kenya byasinye amasezerano 10 arimo ajyanye n'uburezi, ikoranabuhanga, ubuhinzi n'ayandi, aho ibihugu byombi biyitezemo ko azarushaho guteza imbere abaturage babyo.

Ku mugoroba wo kuri uyu wa Kabiri yasuye Carnegie Mellon University ishami ry'u Rwanda, iyi kaminuza ikaba igiye kugirana imikoranire na Kaminuza ya Nairobi, ari nayo yizemo.

Mu gitondo cyo kuri uyu wa Gatatu yasuye ikigo Irembo, urubuga rwa interineti Abanyarwanda n'abanyamahanga bakoresha basaba serivisi rusange. Kugeza ubu binyuze kuri uru rubuga umuturage ashobora kubona serivisi zirenga 100.

Amateka yerekana ko Ruto atavuka mu muryango ukomeye muri politiki, ku buryo yakunze kuvuga ko ari umuntu wirwanyeho, agakoresha imvugo ko ari 'hustler'.

Yavukiye muri cyaro cya Kamagut mu Ntara ya Uasin Gishu, ku wa 21 Ukuboza 1966, akaba umwe mu bakirisitu bahamye.

Perezida Ruto avuye gusura Kaminuza ya RICA yasuhuje abaturage i Nyamata

Abaturage bari benshi ku muhanda bagaragariza urugwiro Perezida Ruto

Perezida Ruto yanywereye icyayi muri Calibou Restaurant, iri i Nyamata

---

Source : http://igihe.com/amakuru/u-rwanda/article/perezida-ruto-yishimanye-n-abaturage-b-i-nyamata-anahanywera-icyayi-amafoto

Ibi byagarutsweho na Minisitiri w'Ubumwe bw'Abanyarwanda n'Inshingano Mboneragihugu, Dr Bizimana Jean Damascène, mu kiganiro n'abanyamakuru cyagarukaga ku myiteguro y'igikorwa cyo kwibuka ku nshuro ya 29 Jenoside yakorewe Abatutsi mu 1994.

Biteganyijwe ko icyumweru cy'icyunamo kizatangira ku wa Gatanu tariki ya 7 Mata kigazasozwa tariki ya 12 Mata 2023 nubwo igihe cyo Kwibuka cyo kizaba kigikomeje.

Muri iki cyo Kwibuka haba hari ibikorwa byateganyijwe bitandukanye bijyanye no kwibuka ndetse Minubumwe yashyize ahagararagara amabwiriza agomba gukurikizwa muri ibyo bihe.

Muri ayo mabwiriza harimo ko gahunda y'ibikorwa byo kwibuka itagomba kurenza amasaha atatu kandi bigakorwa neza nta kirengagijwe nk'uko MINUBUMWE yabitanzeho umurongo.

Minisitiri Bizimana yasobanuye ko ibikorwa byo Kwibuka bitagomba kurenza amasaha atatu kuko hari aho wasangaga bishobora gukurura ihungabana.

Ati 'Aha ndahatsindagira kubera ko hari aho usanga mu turere abantu bategura igikorwa cyo Kwibuka ariko ntibite ku mabwiriza y'uko ibikorwa bigomba gukurikirana, bakabikora uko babyumva kandi ibyo bitera ingaruka nyinshi.'

Yakomeje agira ati 'Twaje gusanga iyo amasaha arenze atatu bitera ikibazo cy'umunaniro bikanongera ihungabana kuko uko igikorwa kiba kirekire niko umwanya w'agahinda nawo ugenda wiyongera. Abafite intege nke ka gahinda kakabaganza kakaba kenshi ihungabana rikaba ryinshi kandi atari cyo kigamijwe.'

Yagaragaje ko ubusanzwe Kwibuka bitaba bigamije gukomeretsa abantu ahubwo ari ukuzirikana amateka no gukomeza kugaragaza inzira yo kwiyubaka u Rwanda rugezeho nyuma ya Jenoside yakorewe Abatutsi.

Ati 'Twasanze amasaha atatu rwose ari igihe gihagije, hagatangwamo ikiganiro, ubuhamya, ubutumwa, indirimbo cyangwa umuvugo n'ibindi biri mu mabwiriza n'uko bigomba gukurikirana. Iyo bigenze bityo igikorwa kikagenda neza, abantu bagataha rya hungabana nta ryabaye cyangwa ryabaye rike cyane.'

Yagaragaje ko mbere hari ubwo abantu bateguraga ikiriyo cyo Kwibuka ugasanga bakesheje ijoro ariko ugasanga abarikesheje ari bake cyangwa hagategurwa ibikorwa byo Kwibuka bikamara umwanya muremure bikaba byazica na gahunda z'umunsi ukurikiyeho.

Minubumwe kandi yagaragaje ko abakora urugendo rwo Kwibuka nabo bakwiye kurukora mu buryo butabangamira urujya n'uruza mu mihanda.

Ibikorwa bibujijwe mu Cyumweru cy'icyunamo

Minisitiri Bizimana yongeye gushimangira ko mu cyumweru cy'icyunamo hari ibikorwa bibujijwe ari byo; ibirori by'ibyishimo bihuza imbaga y'abantu; Ubukwe n'imihango ijyanye na bwo, amarushanwa uretse siporo zikorwa n'abantu ku giti cyabo.

Habujijwe kandi umuziki utajyanye no Kwibuka haba mu tubari, aho bafatira amafunguro, aho batunganyiriza imisatsi (salon de coiffure), aho batunganyiriza umuziki (studio) n'ahandi hantu hahurira abantu benshi nk'aho abantu bategera imodoka, n'ahandi, Imikino y'amahirwe.

Ibindi bibujijwe ni ibikorwa byo kwerekana imipira, ibitaramo mu tubyiniro, utubari, iby'urwenya, iby'indirimbo, iby'imbyino, sinema, n'ikinamico ritajyanye no Kwibuka.

Ibikorwa byo kwibuka birakomeza mu minsi ijana kugeza tariki ya 3 Nyakanga 2023, birimo gushyingura imibiri yabonetse cyangwa iyimurwa muri gahunda yo guhuza inzibutso yumvikanyweho n'Uturere.

Mu gikorwa cyo Kwibuka Jenoside yakorewe Abatutsi, nta busumbane bugomba kuba mu madini. Misa n'amateraniro ntibishyirwa muri icyo gikorwa kuko abitabira Kwibuka Jenoside yakorewe Abatutsi atari abayoboke b'idini rimwe.

Minubumwe yatangaje ko mu gihe igikorwa cyo kwibuka Jenoside yakorewe Abatutsi cyateguwe n'idini, itorero cyangwa ibigo by'abihaye Imana byemewe n'amategeko, hagamijwe Kwibuka abayoboke babo, cyangwa abanyamuryango babo bishwe muri Jenoside yakorewe Abatutsi, icyo gihe abateguye icyo gikorwa babikora bakurikije uko imyemerere yabo iteye, hakubahirizwa ibiteganywa n'amategeko n'amabwiriza.

Umugoroba w'ikiriyo ubanziriza umunsi wo Kwibuka cyangwa gushyingura imibiri y'abazize Jenoside yakorewe Abatutsi uremewe, ariko usozwa bitarenze saa yine z'ijoro, mu rwego rwo kubungabunga ubuzima n'umutekano w'abantu.

Inzego zose zateguye Kwibuka Jenoside yakorewe Abatutsi zigomba gufata amashusho n'amajwi by'icyo gikorwa bigashyikirizwa Minisiteri y'Ubumwe bw'Abanyarwanda n'Inshingano Mboneragihugu mbere y'isozwa ry'iminsi 100 yo kwibuka.

Hanagaragajwe ko kandi abategura nk'ibikorwa byo gufasha abatishoboye barokotse Jenoside yakorewe Abatutsi muri ibi bihe ko bagomba kubanza kubisaba kugira ngo harebwe ku bababaye cyane kurusha abandi kuko iyo mibare iba ifitwe na Minisiteri.

Minisitiri Bizimana yasobanuye ko ibikorwa byo kwibuka byagenewe amasaha atatu gusa

---

Source : http://igihe.com/amakuru/u-rwanda/article/minubumwe-yasobanuye-imvano-yo-kugenera-amasaha-atatu-gahunda-y-ibikorwa-byo