Author: webrwanda

Ni mu kiganiro yatanze ku wa 28 Mata 2023, ubwo abayobozi n'abakozi ba Banki Nyarwanda y'Ubucuruzi, Cogebanque Plc, bari mu muhango wo kwibuka ku nshuro ya 29 Jenoside yakorewe Abatutsi mu 1994.

Bari babanje gusura Urwibutso rwa Jenoside rwa Nyanza ya Kicukiro, rushyinguyemo imibiri y'abasaga ibihumbi 105, barimo abiciwe i Nyanza bavanywe muri Eto Kicukiro nyuma yo gutereranwa n'Ingabo z'Ababiligi zaje mu Rwanda mu butumwa bw'amahoro bwa Loni (MINUAR).

Mu kiganiro yatanze, Amb Dr Ngarambe, yavuze ko Jenoside itegurwa kandi ikigishwa ndetse bikaba ari ibintu bisaba igihe kirekire kugira ngo bicengezwe mu bantu.

Ati 'Kumva Jenoside yakorewe Abatutsi […] hari abana batubaza bati bishoboka gute ko abantu bahaguruka umunsi ku munsi bakavuga ngo bagiye ku kazi, ntanasubize amaso inyuma ngo avuge ati ariko twasaze? Ahubwo akavuga ngo yarushye reka aruhuke, azakomeza ejo.'

'Byarabaye, ariko tubyumvise neza hari byinshi twakora kugira ngo bitazongera […] Jenoside iba ishingiye ku ngengabitekerezo, nta kundi kuntu wasobanura ko umuntu abyuka umunsi ku munsi ajya gutsemba abantu, ni uko aba abyemera ku buryo butavuvukaho na gato.'

Yakomeje agira ati 'Aba abyemera cyane bimurimo nk'uko hari bamwe bemera Imana […] na bariya bantu bakoze Jenoside ni abantu babaga bashikamye mu myemerere yabo, bumva nta gishobora kubisimbura.'

Amb Dr Ngarambe yavuze ko Jenoside zose aho ziva zikagera zikorwa na Leta kandi bikaba ariko byagenze kuri Jenoside yakorewe Abatutsi kuko yateguwe na Leta kandi ikayishyira mu bikorwa.

Ati 'Bisaba ingufu nyinshi cyane, bisaba kutagira rutangira, kugira ngo utsembe abantu. Jenoside yakorewe Abatutsi, yatekerejwe na Leta, yakozwe na Leta kuko atari ibyo, Leta yayihagarika.'

'Umujura Leta iramuhagarika, umunyarugomo Leta iramuhagarika, umunywarumogi ikamufunga […] nta muntu n'umwe wakora Jenoside Leta itabyemera, itabishyigikiye kandi atari yo yabiteguye.'

Yakomeje agira ati 'Ikindi kidashoboka ni uko Leta yakora Jenoside muri iyi Si turimo, amahanga atabyemera. Jenoside zabaye zose ni uko amahanga arebera, yarangiza agatera umugongo.'

Abatutsi basaga 3000 biciwe i Nyanza ya Kicukiro bari bamaze guterwa umugongo n'abasirikare bagera mu bihumbi bibiri, ba MINUAR.

Amb Dr Ngarambe ati 'Abasirikare bari bafite ibikoresho byose bya gisirikare ariko bagafata inzira bakagenda ngo mwirwarize. Ntabwo Jenoside yashoboka, nta Leta yayishoboza atari uko amahanga yemeye kurebera cyangwa kuvuga ngo ntacyo biturebaho.'

Uyu munyepolitiki yagereranyije ingengabitekerezo ya Jenoside nk'inyubako ifite umusingi n'amagorofa abiri.

Ati 'Jenoside yakorewe Abatutsi ni ingengabitekerezo imeze nk'inyubako ifite 'etage' eshatu zigerekeranye. Umusingi n'amagorofa abiri.'

Yagaragaje ko umusingi wabaye gucamo Abanyarwanda ibice, bacibwamo amoko, bamwe bitwa ko ari abo mu bwoko bw'Abatutsi, abandi bagirwa Abahutu mu gihe hari n'abagizwe Abatwa.

Ati 'Ese mwari muziko ayo moko atabagaho mu Rwanda, yaje mu kinyejana cya 19? Ubyumvise agira ngo ni kamere y'Abanyarwanda, ariko ntabwo bari bazi iby'Abahutu n'Abatutsi mbere y'ikinyejana cya 19.'

Amb Ngarambe avuga ko Abakoloni ari bo bazanye ubwoko mu Rwanda, bashaka impamvu zigaragaza ko 'Abatutsi' bafite ahandi baturutse ari abanyamahanga.

Avuga ko kwibuka inzirakarengane zazize Jenoside yakorewe Abatutsi ari umwanya mwiza wo kongera gusubiza amaso inyuma abantu bakareba ayo mateka mabi yaranze u Rwanda kugira ngo bayigireho.

Umuyobozi Mukuru wa Cogebanque, Habarugira Ngamije Guillaume, yavuze ko hari impamvu nyinshi zituma Abanyarwanda bibuka Jenoside yakorewe Abatutsi zirimo no kugira ngo bigire kuri ayo mateka mabi yaranze igihugu babonereho guharanira ko atazongera.

Ati ''Kwibuka bidufasha kudatuma abo bishwe bazima ariko nanone bikadufasha kwiyibutsa impamvu turiho nka Cogebanque. Twibuka kubera ko ni inshingano dufite, kubera ko ingufu zacu ni ho tuzivana […] ku gikorwa cyo kwibuka aho waba uri hose, ni inshingano.''

Karangwa Jean Claude Sewase wari uhagarariye Minisiteri y'Ubumwe bw'Abanyarwanda n'Inshingano Mboneragihugu [MINUBUMWE], yavuze ko ibibazo Abanyarwanda n'Abanyafurika muri rusange banyuzemo byatangiranye n'igihe abakoloni bakoraga inama yiga ku gucamo ibice Abanyafurika.

Avuga ko ubwo abakoloni bageraga mu Rwanda, baciyemo ibice Abanyarwanda, babigisha amacakubiri biza kugera ubwo bamwe batangiye kubonamo bagenzi babo nk'abanzi.

Ati 'Abakoloni rero nta kindi badukoreye, baraje tunanirwa kuba bo, tunanirwa no kuba Abanyarwanda, amacakubiri atwinjiramo ku buryo bworoshye.'

Ibarura riheruka gukorwa ku Gipimo cy'Ubumwe n'Ubwiyunge ryagaragaje ko Abanyarwanda bangana na 9,8% bagaragaje ko mu muryango ari wo mwanya w'ibanze w'amateka y'inzangano yigishwa muri iki gihe.

Karangwa yasabye umuryango mugari wa Cogebanque by'umwihariko ababyeyi gushyira imbaraga mu kwigisha amateka ya nyayo yaranze u Rwanda by'umwihariko aya Jenoside yakorewe Abatutsi mu 1994.

Ambasaderi Dr Ngarambe François Xavier yagaragaje ko Leta ari yo itegura Jenoside ariko itashoboka mu gihe amahanga yahaguruka akamagana ikibi

Umushakashatsi muri MINUBUMWE, Karangwa Jean Claude Sewase, yasabye abakozi ba Cogebanque kurangwa n’indangagaciro baziririza icyatuma Jenoside igaruka ukundi

Umuyobozi Mukuru wa Cogebanque, Habarugira Ngamije Guillaume, yavuze ko kwibuka Jenoside yakorewe Abatutsi ari inshingano z’Abanyarwanda bose

Karasira Venuste warokokeye i Nyanza ya Kicukiro yatanze ubuhamya bw’urugendo rutoroshye bagenze bava muri Eto bagera i Nyanza

Amafoto: Irakiza Yuhi Augustin

Ibi bishingirwa ahanini ku kuba hari umubare uri hejuru w'abafatwa basinze bakajyanwa mu bigo by'inzererezi, ibintu bihabanye n'umuco, nubwo nta mugabo cyangwa umugore ukwiriye kurangwa n'ubusinzi.

Bamwe mu bagore baganiriye na IGIHE, bahamya ko atari imikorere ikwiye, kuko itandukanye n'indangagaciro za ba mutima w'urugo.

Batangaje ko biteye isoni kuba hari abagore basigaye bamara amasaha aruta ay'abagabo mu kabari, yewe no gukora inshingano za kibyeyi bikaba ikibazo.

Ntibatekereza Speciose wo mu kagari ka Birira mu Murenge wa Kimonyi, yagize ati “Umugore aragenda akinywera, hari uwo nasanze umugabo we ari kumubwira ngo batahe; umugore aramusubiza ati ndeka ninywere wa ngegera we! N'abana nabo baraza bati mama dutahe, nabo arabamagana!”

Yakomeje agira ati “Umugore arajya muri kabari agahera mu gitondo ari mu kabari, umugabo yagiye gupagasa, yamusangamo ati 'akira amafaranga ugire utwo ujya kurimanganya mu rugo; umugore ati nawe jya kubirimanganya! Umugabo agataha umugore agasigara mu kabari da!”

Kimwe na bagenzi be, uyu mubyeyi avuga ko ibikorwa na bamwe mu bagore biteye agahinda. Ubu businzi ngo bunaba intandaro y'amakimbirane anashingiye ku gucana inyuma.

Nzamugezahe Tamar yagize ati “Uragera mu rugo rw'uwo mugore ugasanga ni ikigunda kubera guhora mu kabari! Ubu gucana inyuma bireze! Niba umugabo asanga umugore we ari kumwe n'undi mugabo mu kabari yamubwira ngo dutahe undi akanga…!”

Ikibazo cy'ubusinzi mu bagore giheruka kuganirwaho mu Nteko rusange y'urugaga rw'abagore rushamikiye ku muryango FPR-Inkotanyi yabaye mu Ntara y'Amajyaruguru muri uku kwezi, bareba uko umwaka wa 2022 warangiye, n'ibizakorwa mu mwaka wa 2023.

Abagize urugaga rw'abagore batahanye umuhigo wo kurwanya ubusinzi.

Uyu muhigo watanzweho igitekerezo unishimirwa na benshi mu bitabiriye iyi nteko, bashingiye ku kuba ubusinzi bwarafashe indi ntera.

Umunyamabanga nshingwabikorwa w'Umurenge wa Kimonyi, Mukasano Gaudence, avuga ko umugore ari mutima w'urugo, bityo adakwiye kunywera ku karubanda kugeza ubwo ahasindira.

Ati “Ndabwira ababyeyi bagenzi banjye, ibijyanye n'umuco wacu, ubundi ababyeyi banyweraga mu mbere ntawazaga ngo anywere ku karubanda. Nkabwira ba mutima w'urugo rero ngo dukomeze tubungabunge umuryango wacu; inzoga nta mugore ubujijwe kuyinywa ariko muyinywane ubupfura.”

Akomeza avuga ko bagiye kwegera imyiryango yabaswe n'ubusinzi kugira ngo babaganirize. Asaba abafite utubari kubaha amasaha yagenwe, kandi uwanyoye akarenza urugero akaba yakurwa ma kabari.

Nyirarugero Dancille uhagarariye umuryango RPF-Inkotanyi mu Ntara y'Amajyaruguru akaba n'umuyobozi w'iyi ntara, yavuze ko imiryango igaragara mu businzi igomba kwigishwa.

Ati “Ntabwo ari ukuvuga ko ari abagore bose bo mu ntara bari mu businzi, bake bari kugaragara, ni ugufatanya mu bukangurambaga umugore akigishwa, akibutswa indangagaciro kuko ihame ry'uburinganire ntabwo rivuga ngo yishore mu businzi.”

Ubu businzi buvugwa bukunze kugaragara ahanini mu bice by'ibyaro, ahakoreshwa cyane cyane inzoga z'urwagwa n'ibigage, ndetse n'izindi ziboneka ku mafaranga make.

Abagore bamwe bo mu Karere ka Musanze bavugwaho ubusinzi

Ni ibihano bikubiye mu mabwiriza rusange yo ku wa 25 Mata 2023 agena ibihano byo mu rwego rw'ubutegetsi bihabwa ikigo kigenzurwa kitubahiriza ibisabwa mu gukumira iyezandonke, gutera inkunga iterabwoba no gutera inkunga ikwirakwiza ry'intwaro za kirimbuzi. Yasimbuye ayo muri Kamena 2020.

Ni amabwiriza areba ibigo bigenzurwa na Banki Nkuru y'u Rwanda, birimo amabanki, ibigo by'imari iciriritse byakira amafaranga abitswa, abatanga serivisi z'imari batakira amafaranga abitswa, ibigo bikora imirimo y'ikodesha-gurisha, ibigo by'ubwishingizi bw'igihe kirekire n'ibigo by'ubwiteganyirize bwa pansiyo.

Harimo kandi abatanga serivisi ku bigega by'ubwizerane n'amasosiyete y'ubucuruzi, abatanga serivisi zo kwishyurana n'ibindi bigo bitanga serivisi z'imari bigenzurwa na Banki Nkuru.

Ni ibihano bizajya bifatwa mu gihe ubugenzuzi bwa BNR bugaragaje ko hari amakosa yakozwe; cyangwa ko hatubahirijwe inama itangwa n'inzego zibifitiye ububasha, zirimo nk'Urwego Rushinzwe Ubutasi ku mari.

Ibyo kandi bizajya bikorwa hitawe ku kigero cy'ingorane z'iyezandonke, cyo gutera inkunga iterabwoba n'icyo gutera inkunga ikwirakwiza ry'intwaro za kirimbuzi.

Ibihano biteganywa ku bigo by'imari birimo kwihanangirizwa mu nyandiko cyangwa guhagarika inkunga yose yatangwaga na Banki Nkuru.

Hari kandi kubuza ikigo kwishyura inyungu buri munyamigabane agenerwa; kukibuza gushyiraho amashami mashya cyangwa gushora imari mu bindi bikorwa cyangwa kwagura ibikorwa biriho.

Mu bihano bikarishye harimo “guhagarikirwa uruhushya mu gihe kitarenze amezi atandatu”; cyangwa “kwamburwa uruhushya rwa gukora.”

Binateganywa ko iyo Banki Nkuru isanze umwe mu bagize Inama y'ubuyobozi cyangwa umuyobozi mukuru w'ikigo kigenzurwa yararenze ku biteganywa n'Itegeko, ishobora kumufatira ibihano butewe n'uburemere bw'ikosa.

Ibyo bihano birimo “Kumwihanangiriza mu nyandiko; Kumuhagarika by'agateganyo; Gukuraho icyemezo kimwemerera gukora mu kigo kigenzurwa” cyangwa “Kumwirukana.”

Biteganywa ko iyo uyu muyobozi amenye ko biriya byaha byabayeho, agomba guhita abimenyesha Banki Nkuru.

Ibihano mu mafaranga

Aya mabwiriza anagaragaza ko Banki Nkuru ishobora gukoresha ibihano by'amafaranga bijyanye n'amakosa, akishyurwa mu gihe cy'iminsi icumi ikigo kimaze kwakira ibaruwa ibamenyesha ibihano by'amafaranga.

Iyo ikigo kigenzurwa kitishyuye ku bushake, amafaranga yaciwe akurwa kuri konti y'icyo kigo iri muri Banki Nkuru cyangwa hagakoreshwa ifatiratambama ribanzirizwa n'inyandiko imenyesha inyujijwe ku muhesha w'inkiko.

Ni ibihano biri hagati ya 10,000,000 Frw na 100,000 Frw bitewe n'ikosa, ndetse n'icyiciro ikigo kirimo.

Icyiciro cya mbere kirimo banki z'ubucuruzi ari nazo zishobora gucibwa amafaranga menshi, ibyiciro bikaba ari birindwi.

Mu makosa atangirwa iki gihano gikuru harimo kutagira uburyo bw'imbere mu kigo bwo gutahura no kumenyekanisha ibikorwa bidasanzwe kandi bikemangwa, cyangwa kudashyikiriza Urwego rushinzwe ubutasi ku mari “raporo z'ibikorwa bikemangwa na raporo yo kubika cyangwa kubikuza amafaranga,” cyangwa “Kudashyiraho uburyo bwo kugenzura abantu bagaragara mu rwego rwa politiki.”

Mu yandi makosa ahanishwa igihano gishobora kugera kuri 5.000.000 Frw bitewe n'icyiciro cy'ikigo, harimo “kutagira politiki yo kubuza konti zigizwe n'imibare gusa cyangwa konti zitagira amazina, konti zifite amazina ya baringa no kubuza imibanire n'amasosiyete ya baringa.”

Ni kimwe no “kutagira uburyo bwo kugenzura urutonde rw'abantu bagaragara mu rwego rwa politiki, urutonde rw'abantu cyangwa ibigo byafatiwe ibihano n'Umuryango w'Abibumbye n'urutonde rukorwa n'ikigo ubwacyo rw'abakiriya bashobora guteza ingorane zikomeye.”

Harimo kandi kudashyira mu bikorwa ingamba zijyanye no kugira ubushishozi ku bakiriya, hagenzurwa imyirondoro yabo baba ari abakiriya bahoraho, abadahoraho, abantu ku giti cyabo cyangwa ibigo bifite ubuzima gatozi, cyangwa byashyizweho hashingiwe ku masezerano, n'ibindi.

Ni kimwe no kutagira amakuru akwiye kandi ahuje n'igihe kuri ba nyiri amakonti, nubwo umukiriya yaba ari umuhuza cyangwa umuntu uhagarariye undi mu buryo bwemewe.

Ikigo kigenzurwa gishobora kujuririra Banki Nkuru ibihano by'amafaranga cyangwa igihano cyo mu rwego rw'ubutegetsi cyatanzwe mu gihe kitarenze iminsi irindwi y'akazi, ibarwa uhereye ku munsi ibaruwa ikimenyesha igihano yakiriweho.

Banki zashyiriweho ibihano mu gukumira gutera inkunga iterabwoba

Uyu ni umukino iyi kipe y’Ingabo z’Igihugu yari yakiriyemo AS Kigali kuri sitade y’akarere ka Bugesera, uba ku munsi w'ejo saa cyenda. Ikipe y’abanyamujyi ikunze kugora APR FC cyane, kuko no mu mwaka ushize w’imikino yari iyitesheje igikombe cya shampiyona habura gato. 

Ejo abakinnyi ba APR FC bagiye mu kibuga babizi ko bagomba gutsinda bitewe n'uko bafite ikipe bari guhangana nayo yabakuye ku mwanya wa mbere ya Kiyovu Sport, nyuma y'uko batsinzwe na Police FC. AS Kigali niyo yafunguye amazamu mbere ku munota wa 32, ni igitego cyari gitsinzwe na Tchabalala kuri penariti.

Ku munota wa 42 nibwo Ombolenga yatsinze igitego cyo kwishyura kuri penariti, mu gice cya kabiri ku mpande zombi bagerageje kunyeganyeza inshundura ariko birananirana, bituma amakipe yombi agabana amanota. APR FC yahombeye muri uyu mukino kuko iyo itsinda yari gusigara irushwa na Kiyovu Sport inota 1 gusa, kuko nayo ejo yatsikiye inganya na Mukura VS 1-1.

Uku kunganya kandi byahaye amahirwe Rayon Sports kuko niramuka itsinze umukino ifitanye na Espoir, niyo irahita ifata umwanya wa mbere. Kugeza ubu APR FC iri ku mwanya wa 2 n’amanota 54, aho irusha Rayon Sports iyikurikiye inota 1 ikarushwa na Kiyovu Sport amanota 3.

Ombolenga agiye gutera penariti yavuyemo igitego 

Abakinnyi ba APR FC bishimira igitego

Perezida wungirije wa FERWAFA

Ynussu bamukuye mu kibuga bamuteruye kubera kuvunika 

Umutoza w’ikipe y’igihugu Amavubi, Carlos Alós Ferrer yari yaje kureba uyu mukino

Umukino urangiye abatoza basuhuza abakinnyi

Uwafotoye:Serge

Sultan Suleiman ukuriye ishyirahamwe SS Entreprise ritegura Miss Burundi, yabwiye InyaRwanda ko iri rushanwa rimaze kugera ku rwego rwiza kandi abakobwa bakomeje gutinyuka kuryitabira, nk'urubuga ruzabafasha kurotora inzozi zabo.

Avuga ati 'Ni ubwa mbere mu mateka y'Igihugu, umukobwa w'umutwakazi yitabiriye irushanwa rya Miss Burundi.”

Uwera Ricky Tricia wo mu Kirundo yabonetse mu bakobwa 26 bageze mu cyiciro cya cyuma (Semi-Finals), ari nabo bazavamo Nyampinga w'u Burundi 2023.

Ni nyuma y'ijonjora rikomeye ryabaye kuri uyu wa Gatandatu tariki 29 Mata 2023, ryitabiriwe n'abakobwa 143 batoranyijwe mu gihugu hose.

Aba bakobwa banyuze imbere y'Akanama Nkemurampaka, habanza kurebwa niba buri umwe yujuje ibisabwa, ibiro, uburebure, ibimuranga n'ibindi binyuranye.

Hitawe cyane ku kureba umushinga umukobwa ashaka kuzashyira mu bikorwa, uburyo awusobanura, uko abasha kumvikanisha ibitekerezo bye, uburyo avugira imbere y'imbaga n'ibindi bishingirwaho mu kwemeza umukobwa uhiga abandi.

Abakobwa 26 bazavamo Miss Burundi 2023 batangajwe ni: Akimana Linda, Barungura Lyne Chella, Bazahica Tania, Bwitonzi Grace Aurore, Igiraneza Ange Charlene, Igiraneza Beraca, Ingabire Rolyca Ornella, Iraganje Roxanna Rania, Irakoze Cynthia, Irakoze Erica Aimée Carolle;

Ishimwe Ange Bertille, Ishimwe Netty Louange, Iteriteka Ainee Noria, Kaneza Ackissa Yvanna, Kanziza Olga Charruella, Kenguruka Clara, Keza Blandine, Kezimana Melissa, Mizero Anick, Mugisha Elsie Amandine, Ndayizeye Lellie Carelle, Ngabirano Belle Ange Edissa, Ngabire Carly, Rukundo Ange Brunelle, Uwera Ricky Tricia ndetse na Uwimana Ange Belyssa.

Umuyobozi muri Minisiteri y'Ubucuruzi, Inganda, gutwara abantu n'Ubukerarugendo, Bwana Jacques Bigirimana aherutse kuvuga ko iri rushanwa rya Nyampinga w'u Burundi, ari ahantu heza ho kugaragariza ubwiza n'ubuhanga 'bw'abakobwa b'abarundi'.

Uyu muyobozi yavuze kandi ko iri rushanwa ari amahirwe akomeye ku bakobwa bashaka kugaragaza icyo bashoboye, kubashyigikira no kubatera imbaraga zituma bagera ku nzozi zabo.

Ni ku nshuro ya gatatu hagiye gutorwa Nyampinga w'u Burundi. Umukobwa uzambikwa ikamba azasimbura Kelly Ngaruko wabaye Miss Burundi 2022.

Uyu mukobwa wambitswe ikamba rya Miss Burundi 2022, aherutse kwandika kuri konti ye ya Instagram agaragaza uburyo aterwa ishema no kuba yaregukanye iri kamba.

Ibihembo kuri Miss Burundi 2023:

-Azahabwa imodoka yo mu bwoko bwa 'Ractis'.

-480 Litre za Essance mu gihe cy'umwaka umwe.

-Ubwishingizi bw'ikinyabiziga mu gihe cy'umwaka.

-Kumukorera imodoka igihe igize ikibazo.

-Bazamwishyurira ishuri.

-Buri kwezi azajya ahabwa umushahara w’amafaranga 500.000fbu [Ku mwaka ararenga Miliyoni 2.6 Frw- Ni mu gihe Nyampinga w’u Rwanda ahabwa Miliyoni 9, 600,000Frw ku mwaka].

Ibihembo ku bisonga bye n'umukobwa uzakundwa mu irushanwa 'Miss Popularity':

Igisonga cya mbere azahembwa 2.500.000fbu, ahabwe n'amafaranga yo kwiga.

Igisonga cya kabiri, azahembwa 2.000.000fbu, ahabwe n'amafaranga yo kwiga.

Nyampinga ukunzwe 'Miss Popularity' azahembwa 1.500.000fbu, ahabwe n'amafaranga yo kwiga.

Sultan Suleiman [Uri hagati] ukuriye ishyirahamwe SS Entreprise ritegura Miss Burundi, ubwo bari mu gikorwa cyo guhitamo abakobwa 26 bajya mu cyiciro kibanziriza icya nyuma

 

Uwera Ricky Tricia yabaye umukobwa wa mbere wo mu bwoko bw'abatwa wahatanye muri Miss Burundi 

Hatangajwe abakobwa 26 bazavamo Miss Burundi 2023 

Muri Miss Burundi bifashisha 'Metero' mu kumenya uburebure bw'umukobwa [uburebure bugomba kuba butari hasi ya 1.65cm] 

Abakobwa batambuka mu ntambuko iranga ba Nyampinga imbere y'abagize Akanama Nkemurampaka

 Muri iki Cyumweru nibwo ibyo bihugu bitatu byataganje ko byatangiye hamwe ubusabe, bwo kuzakira imikino ya nyuma y'igikombe cy'Afurika cy'ibihugu (CAN) kizaba mu mwaka wa  2027. Ibihugu byahuje imbaraga bigasaba kwakira iryo rushanwa ryabera ku bibuga byo muri ibyo bihugu, ni Tanzania, Uganda na Kenya.

Ibyo bihugu byemerewe kwakira CAN, iryo irushanwa rihuza amakipe y’ibihugu byo muri Afurika ryakongera kubera mu karere ka Afurika y’Iburasirazuba nyuma y’imyaka 50 ritahabera.

Impuzamashyirahamwe y'umupira w'amaguru muri Afurika (CAF), yatangaje ko yamaze kwakira ubusabe bw'ibyo bihugu uko ari bitatu.

Ubusabe bwo kwakira iryo rushanwa bwiyongereye kubwatanzwe n’ibindi bihugu, nka  Botswana, Algeria na Misiri.

Mu kwezi kwa 12 umwaka ushize, nibwo Inama y'Abaministiri muri Kenya yemeye ko icyo gihugu gifatanya na Uganda na Tanzaniya, gusabira hamwe kwakira imikino ya CAN 2027. Icyo Gihugu kikaba gisanga kwakira CAN izaba 2027 bizabafasha kugera ku ntumbero bafite, yo kwitabira Igikombe cy’Isi kizaba  muri 2030. Ministiri wa Siporo muri Kenya, Ababu Namwamba yavuze ko bizeye ko ubusabe bwabo buzakirwa, kandi ko bikenewe ko aka karere kakira iyo mikino.

Ministiri wa Siporo muri Kenya avuga ku kibazo cy'ibikorwa remezo no kutagira ibibuga biri ku rwego mpuzamahanga rwemewe, biri mu bituma ibihugu byo mu karere bidashobora kwakira amarushanwa. Yemeje ko Kenya ifite intego yo kubaka za sitade nshya, ikanavugurura izisanzweho.

Ibihugu bya Kenya, Uganda na Tanzania bisanzwe bibarizwa mu karere k’ Afurika y’Iburasirazuba n’iyo hagati.

Inkomoko: VOA