Author: webrwanda

Nyuma y’uko Ishyirahamwe ry’Umupira w’Amaguru mu Burundi risubije FERWAFA ko Ndikumana Danny yamaze gukinira iki gihugu ataboneka, uyu mukinnyi yabiteye utwatsi avuga ko we yifuza gukinira Amavubi.

Ni nyuma y’uko FERWAFA yari yandikiye Ishyirahamwe ry’Umupira w’Amaguru mu Burundi isaba ko uyu mukinnyi uri ku mpera z’amasezerano ye muri Rukinzo FC yaza gukinira Amavubi.

Iri shyirahamwe ku munsi w’ejo ryasubije FERWAFA ko uyu mukinnyi ataboneka kuko ari umurundi ari ho yavukiye akanahakurira, yigiye umupira mu Burundi ndetse akaba yarakiniye ikipe y’abatarengeje imyaka 23 yabo, akaba ari mu no mu ikipe CHAN.

Amakuru ISIMBI yamenye ni uko umukinnyi we adakozwa gukinira ikipe y’igihugu y’u Burundi yifuza Amavubi ndetse akaba yaranamaze gufata icyemezo.

Nyuma y’uko u Burundi bubonye ko n’umukinnyi atifuza kubakinira, amakuru avuga ko bwemeye kumurekura cyane ko batamushakaga cyane byari ukugorana.

Nta gihindutse ku wa Kabiri w’icyumweru gitaha, Ndikumana Danny byitezwe ko ari bwo azagera mu Rwanda aje gufatanya n’abandi kwitegura umukino wa Mozambique uzaba tariki ya 18 Kamena 2023.

Ndikumana Danny we yifuza gukinira Amavubi

Source : http://isimbi.rw/siporo/article/ndikumana-danny-ntavuga-rumwe-na-federasiyo-y-u-burundi-ashaka-amavubi

Umunyarwenya ukomeye cyane hano mu Rwanda Dogiteri Nsabi yongeye gutembagaza imbaga y'abantu yifashishije impano ye idasanzwe yo gusetsa.

Mu mashusho yashyizwe ku rubuga rwa Instagram ya Killa Man yagaragaje umukinnyi uri kuzamuka neza muri uyu mwuga Dr Nsabi ari kubwiriza maze akazajya atukana hanyuma akarenzaho Hareruya mu buryo busekeje cyane.

Na we irebere amashusho y'uburyo yabikoragamo:

 

Bimwe mu byo abantu bagiye bavuga nyuma yo kubona aya mashusho:

Source : https://yegob.rw/ariko-iki-si-gicucu-areruya-dogiteri-nsabi-yatembagaje-abantu-ubwo-yatukanaga-mu-rusengero-kandi-ari-pasiteri-video/

Umukinnyi wa filime ukomeye cyane hano mu Rwanda Killa Man yatangaje ubuzima bushaririye yanyuzemo mu gihe yateraga inda umugore we ndetse n'uburyo yashatse ko inda bayikuramo kandi afite inote ya maganatanu yo nyine mu mufuka.

Mashusho yashyizwe ku rubuga rwa Instagram yitwa Isimbi Tv n'umunyamakuru Murungi Sabin mu kiganiro yagiranye n'umukinnyi wa filime nyarwanda Killa Man hamwe n'umugore we bamutangarije byinshi mu buzima bwabo bagiye banyuramo mbere y'uko babana.

Amashusho:

Source : https://yegob.rw/genda-killa-man-ntiworoshye-umunyarwenya-killa-man-yatangaje-itariki-yamburiyeho-umugore-we-ubusugi-nibiryo-bariye-ku-munsi-wa-mbere-babana-video/

Umukuru w'akarere Serhiy Lysak yavuze ko abahungu babiri, umwe w'imyaka itatu n'undi w'imyaka itandatu, na bo bari mu bakomeretse muri icyo gitero cyo ku wa gatanu.

Perezida wa Ukraine Volodymyr Zelensky yavuze ko icyo gitero ari “ubugome bukabije”.

Ibitero by'Uburusiya kuri Ukraine byakajije umurego mu byumweru bya vuba aha bishize, mbere y'igitero cyitezwe cya Ukraine cyo gusubiza inyuma abasirikare b'Uburusiya.

Zelensky yatangaje videwo y'ivuriro ryangiritse igaragaza abazimya umuriro bahari, n'umwotsi uzamuka hejuru y'iyo nyubako.

Yagize ati: “Abakora iterabwoba b'Abarusiya nanone bemeje ko ari abarwanyi bibasira ikintu icyo ari cyo cyose cy'umutima wa kimuntu kandi kivugisha ukuri”.

Mbere yaho, Lysak yavuze ko ku wa kane nijoro ako karere kagabweho “igitero kinini…kirimo ibisasu bya misile n'indege nto zitarimo umupilote [drone]”.

Yagize ati: “Ni ijoro rigoye cyane. Hari hari urusaku rwinshi.

“Dnipro yababaye”.

Aho ku ivuriro hagabwe icyo gitero, abazimya umuriro bakase ibiti bakoresheje inkero (urukero) kugira ngo bashobore kugeza uruhombo rw'amazi ku ndimi z'umuriro wari wibasiwe iyo nyubako nini y'amagorofa atatu.

Hagati aho, mu byasenyutse, amatsinda y'abakora ubutabazi yari arimo gushakisha abantu babiri baburiwe irengero.

Abategetsi bo muri Ukraine bavuze ko barashe bagahanura misile 17 na drone 31 zoherejwe n'Uburusiya.

Drone nyinshi na za misile zarashe ku hantu ho mu mujyi wa Dnipro no mu mujyi wa Kharkiv wo mu burasirazuba, harimo no ku bubiko bw'ibitoro.

Umurwa mukuru Kyiv wa Ukraine na wo warashweho, ndetse abategetsi bavuze ko ibisigazwa bya za drone zahanuwe byaguye ku gisenge cy'iduka, mu gihe inzu n'imodoka nyinshi byangiritse.

Mu Burusiya, ku wa gatanu mu gitondo igisasu cyangije inyubako yo kubamo inarimo n'ibiro byo gukoreramo mu mujyi wa Krasnodar wo mu mujyepfo.

Guverineri w'ako karere Veniamin Kondratyev, yavuze ko icyo gisasu cyatejwe na drone ebyiri za Ukraine, ati:

“Habayeho kwangirika kw'inyubako zimwe, ariko ibikorwa-remezo by'ingenzi cyane ntibyangiritse. Kandi icy'ingenzi cyane ni uko nta bapfuye cyangwa ngo bakomereke”.

Source : https://umuryango.rw/amakuru/mu-mahanga/umutekano/article/ukrane-zelensky-yise-igitero-uburusiya-bwagabye-ku-bitaro-icy-ubugome-bukabije

Jenerali w'inyenyeri enye Charles “CQ” Brown Jr., bakunze kwita “CQ” Brown gusa, afite imyaka 61 y'amavuko. Muri iki gihe, ni umugaba w'ingabo z'Amerika zirwanira mu kirere kuva mu 2020, ku butegetsi bwa Perezida Donald Trump. Icyo gihe, Sena yamwemeje n'amajwi 98%.

Jenerali “CQ” Brown ni we Mwirabura wa mbere muri uwo mwanya, n'uwa mbere uyoboye ishami rimwe ry'igisirikare cy'Amerika. Sena niramuka imwemeje, azasimbura Jenerali wo mu ngabo zirwanira ku butaka Mark Milley, uzarangiza manda ye y'imyaka ine mu kwezi kwa cumi gutaha.

Azaba abaye Umwirabura wa kabiri uzaba uyoboye igisirikare cyose cya Leta zunze ubumwe z'Amerika. Uwa mbere yabaye Jenerali wo mu ngabo zirwanira ku butaka Colin Powell kuva mu 1989 kugera mu 1993. Ni bwo bwa mbere kandi mu mateka y'Amerika, Abirabura babiri bazaba bari ku myanya ya mbere yo hejuru mu ngabo z'igihugu, kuko na minisitiri w'ingabo, Lloyd Austin, umujenerali wavuye ku rugerero, nawe ari Umwirabura.

Mu muhango wo gutangaza ko yahisemo Jenerali “CQ” Brown wabereye mu busitani bwa Maison Blanche, Perezida Biden yashimagije ubutwari, ubuhanga n'ubunararibonye afite, nk'umupilote w'indege z'intambara, wanarwanye, kandi nk'umuyobozi, abandi basirikare n'amahanga y'inshuti z'Amerika bazi, bemera kandi bizera. Usibye Jenerali Charles “CQ” Brown Jr. ubwe, umuhango warimo kandi na Visi-Perezida Kamala Harris na minisitiri w'ingabo z'igihugu.

Reuters

Source : https://umuryango.rw/amakuru/mu-mahanga/politiki/article/jenerali-charles-brown-jr-umwirabura-wambere-wagizwe-umugaba-w-ingabo-zose-z

Uyu mukino wabaye kuri uyu wa Gatanu, tariki 26 Gicurasi 2023 muri BK Arena.

Petro de Luanda yaje muri iri rushanwa yatunguranye isezererwa na AS Douanes mu mikino ya ½, mu gihe Stade Malien yo ari umwaka wa mbere yari yitabiriye iyi mikino.

Muri rusange uyu mukino watangiye ugenda gake cyane Petro de Luanda yaje ihabwa amahirwe yo kwegukana igikombe wabonaga nta ntege ifite bityo igatsindwa amanota menshi.

Agace ka Mbere Stade Malien yagatsinze ku manota 20 kuri 13 ya Petro de Luanda.

Iyi kipe yo muri Angola yagarukanye imbaraga mu gace ka kabiri, abakinnyi nka Gerson Domingos na Glofate Buiamba batsindaga amanota menshi.

Nubwo yarushijwe muri aka gace, Stade Malien yari yatsinze amanota menshi mu gace ka mbere yasoje igice cya mbere iyoboye umukino n'amanota 36 kuri 34 ya Petro de Luanda.

Petro yavuye kuruhuka igaragaza ak'inda ya bukuru, itsinda amanota menshi cyane ibifashijwemo na Carlos Morais na Buiamba.

Mu mpera z'agace ka gatatu, Stade Malien yongeye kubura umutwe igabanya ikinyuranyo ariko karangira Petro de Luanda iyirusha amanota ane kuko yari 54-50.

Agace ka nyuma karanzwe no kugendana mu manota ku makipe yombi, kuko ikinyuranyo kinini cyabaye amanota ari atandatu gusa.

Aliou Diarra na Souleymane Berthe batsindaga amanota menshi ku ruhande rwa Stade Malien.

Iyi kipe yakomeje gukina neza icungana n'ikinyuranyo yari yashyizwemo, isoza umukino itsinze Petro de Luanda amanota 73-65.

Stade Malien yahise yegukana umwanya wa gatatu ku nshuro ya mbere yitabiriye imikino ya BAL.

Petro de Luanda yahabwaga amahirwe yo kwegukana igikombe cy'uyu mwaka yatunguranye isezererwa itarenze ½ benshi bagahuriza ku misimburize mibi y'umutoza wayo José Neto ndetse n'icyizere kirengeje urugero (Over Confidence) yazanye cyane ko inshuro iheruka yari yatsindiye ku mukino wa nyuma, mu gihe umwaka wa mbere yari yasoje ari iya gatatu.

Umukino wa nyuma uzahuza AS Douanes yo muri Sénégal na Al Ahly yo mu Misiri uteganyijwe kuri uyu wa Gatandatu saa kumi n'ebyiri muri BK Arena.

Source : https://umuryango.rw/imyidagaduro/imikino/article/bal2023-umwanya-wa-gatatu-wegukanywe-na-stade-malien-yakuyemo-petro-de-luanda

Uburere bw'abana buri mu nshingano z'ababyeyi, baba babana na bo cyangwa batabana.

Gusa imibare ya RIB, igaragaza ko kuva muri 2019 kugera muri Mata 2023 hari ababyeyi 186 bateshutse ku nshingano zo kurera abana babo, zirimo kubishyurira amashuri nyamara batabuze ubushobozi.

RIB yatangaje ko yafunze umugabo ukurikiranyweho kwanga kwishyurira abana be amashuri kandi abishoboye bikabaviramo kwirukanwa mu ishuri.

Abikurikiranyweho hamwe n'uwahoze ari umugore we, ubu batandukanye byemewe n'amategeko kuko bombi bafite inshingano zingana ku bana babo.

RIB ivuga ko umugabo afungiye kuri Sitasiyo ya RIB ya Kacyiru, na ho umugore akurikiranywe adafunze kugira ngo yite ku bana, mu gihe dosiye yabo igitunganywa ngo ishyikirizwe Ubushinjacyaha.

Urwego rw'Igihugu rushinzwe Ubugenzacyaha, Dr Murangira B. Thierry yabwiye IGIHE ati 'Ubutumwa ni uko n'abandi babyeyi bameze batyo, batuzuza inshingano, RIB izakomeza iperereza, bafatwe bahanwe.”

Dr Murangira asaba ababyeyi kwibuka ko amakimbirane hagati yabo adakwiye kuba impamvu yo guta inshingano zo kwita ku bana bashinzwe kurera kuko bihanwa n'amategeko.

Ibikorwa byo kutita ku nshingano za kibyeyi iyo bigize ingaruka ku mwana, bikamuviramo ubuzererezi, kimwe n'uta umwana ahagaragara cyangwa akamutererana, bihanwa n'ingingo ya 32 n'iya 36, ziteganya ibihano birmo n'igifungo cy'imyaka itanu n'ihazabu y'ibihumbi 50 Frw ariko itarenze ibihumbi 100Frw.

Iyo gutererana umwana byamuteye uburwayi budakira uwahamijwe icyaha ahanishwa igifungo kitari munsi y'imyaka irindwi ariko kitarenze imyaka 10 n'ihazabu y'amafaranga y'u Rwanda atari munsi y'ibihumbi ijana (100.000 FRW) ariko atarenze ibihumbi magana abiri (200.000 FRW).

Iyo gutererana umwana cyangwa kumuta byamuviriyemo urupfu cyangwa kuzimira burundu, igihano kiba igifungo cya burundu.

Source : https://umuryango.rw/amakuru/mu-rwanda/ubutabera/article/rib-yataye-muri-yombi-ababyeyi-b-abana-birukanywe-ku-ishuri

Perezida William Ruto, yabwiye abanya-Kenya ko ntacyo bimutwaye kuba baramuhimbye izina rya Zakayo uvugwa muri bibiliya, kubera gusoresha cyane.

Uyu mutegetsi ubwo yari kubiro by'ikigo cy'igihugu gishinzwe imisoro n'amahoro, abaturage bamwe bamusabye ko yashyiraho umunsi wizihizwaho gukusanya imisoro kuko muri iki gihe bikabije.

Abanyakenya bakoresha urubuga rwa Twitter, baherutse gutangaza ko perezida William Ruto ari nka Zakayo wuriye igiti cy'umuvu ubwo Yesu yatambukaga, ngo akeneye kumanuka, ibyo bagereranya no koroshya umusoro kuko bamushinja kuwukaza aka Zakayo.

Bwana Ruto yavuze ko nk'uko bamuhimbye Zakayo kandi akaba abyemera, ngo hakwiye gushyirwaho umunsi w'ikusanyamisoro.

Hari abanyapolitiki batavuga rumwe n'ubutegetsi bavuga ko iyi gahunda yo kuzamura umusoro yaba igamije kumvisha Raila Odinga n'umuryango wa Uhuru Kenyatta wahoze ari perezida, ariko ngo bakwiye kumenya ko bashaka kumvisha abantu 2 nyamara bizagira ingaruka ku gihugu cyose.

Raila Odinga asaba perezida William Ruto kugabanya kuzamura cyane umusoro akamwibutsa ko na Zakayo umwe nababwiye hejuru atasoreshaga nk'uko Ruto akanda abanya Kenya.

Perezida Ruto avuga ko imisoro ikenewe mu gihugu ngo gitere imbere kandi yarahiye ko azakora ibishoboka byose umusoro w'abaturage ugakoreshwa uko bikwiye nta uzanyereza n'iripfumuye.

Hagati aho ariko abaturage ba Kenya basabwe gukenyera bagakomeza umukandara kuko imbere hari igihu cy'urwijiji kuko ishilingi ryabo riri gutakaza agaciro cyane imbere y'idorali rya Amerika, bivuze ko guhaha.

The post Kenya: Perezida Ruto yemeye izina bamuhimbye bitewe no gusoresha cyane appeared first on FLASH RADIO&TV.

Source : https://flash.rw/2023/05/27/kenya-perezida-ruto-yemeye-izina-bamuhimbye-bitewe-no-gusoresha-cyane/?utm_source=rss&utm_medium=rss&utm_campaign=kenya-perezida-ruto-yemeye-izina-bamuhimbye-bitewe-no-gusoresha-cyane

Mu ijoro ryo kuri uyu wa Gatanu taliki 26 Gicurasi 2023 nibwo uyu mugabo yageze ku kibuga cy’indege i Kanombe.

Ibimuzanye harimo gukora ubukerarugendo ahantu nyaburanga hatandukanye ndetse no kugira ibyo amenya ku muco nyarwanda  binyuze mu masezerano igihugu cy’u Rwanda gifitanye na Paris Saint-Germain yo kwamamaza ubukerarugendo abakinnyi bambara ‘Visit Rwanda’ ku myambaro yabo.

Pedro Pauleta w’imyaka 53 kandi azakurikirana umukino wa Basketball Africa League uba kuri uyu wa Gatandatu muri BK Arena aho ikipe ya Al Ahly yo mu Misiri  icakirana na AS Dounaes yo muri Senegal. 

Uyu mugabo wahoze aconga ruhago yageze muri Paris Saint-Germain muri 2003 ahava muri 2008, aha ni naho benshi bamumenyeye bitewe n’akazi gakomeye yakoraga muri iyi kipe. 

Yayikiniye imikino 168 atsindamo ibitego 76 ndetse yanatwaranye nayo ibikombe 2 bya Coupe de France ndetse n’ikindi 1 cya Coupe de la Ligue. Ikipe y’igihugu ya Portugal yo yayikiniye kuva mu 1997 kugeza muri 2006, yahakinnye imikino 88 atsinda ibitego 47.

Pedro Pauleta yamaze gusesekara mu Rwanda

Mu bimuzanye harimo no kureba umukino wa nyuma wa BAL

Source : https://inyarwanda.com/inkuru/129834/umunyabigwi-wa-paris-saint-germain-pedro-pauleta-ari-mu-rwanda-129834.html

Uyu mukino wabaye ku mugoroba wo kuri uyu wa Gatanu tariki 26 Gicurasi 2023, mu nyubako y'imyidagaduro ya BK Arena. Aya makipe yombi yakiniraga uyu mwanya wa 3 nyuma yo gutsindirwa muri 1/2.

Ikipe ya Stade Malien yo muri Mali yari yatsinzwe na Al Ahly yo naho Petro De Luanda yo muri Angola yari yatsinzwe na AS Dounaes.

Stade Malien niyo yinjiye mu mikino mbere itsinda amanota menshi binyuze ku mukinnyi wabo Aliou Diara. 

Petro De Luanda yakomeje kurushwa ariko bigeze mu minota ya nyuma y’agace ka mbere yinyara mu isunzu itsinda amanota 5 yikurikiranya bituma igabanya intera dore ko yari iri kurushwa amanota agera ku 10.

Umukinnyi Aliou Diara yakomeje kwigaragaza akora amanota menshi mu minota ya nyuma bifasha Stade Malien kurangiza umukino iyoboye n’amanota 73-65 ihita inegukana umwanya wa 3.

Ni ubwa mbere Forest Whitaker ageze mu Rwanda, cyo kimwe n'umuraperi Navio bitabiriye kureba imikino ya BAL. Ariko si ubwa mbere, Sherrie Silver arebye iyi mikino.

Ibyo wamenya kuri Forest Whitaker:

Ni umukinnyi wa filime wabigize umwuga, atunganya filime, kandi akora ibikorwa by'urukundo. Isura ye igaragara muri filime zirimo nka The Last King of Scotland, The Butler, Godfather of Harlem, Criminal Minds n'izindi nyinshi.

Uyu mugabo w'imyaka 61 y'amavuko yegukanye ibihembo bikomeye birimo nka Academy Award, Golden Globe Award,  British Academy Film Award, Screen Actors Guild Awards n'ibindi.

Yabonye izuba ku wa 15 Nyakanga 1961, mu gace ka Longview mu Mujyi wa Texas muri Leta Zunze Ubumwe za Amerika. Mu 1996 yarushinze na Keisha Whitaker batandukana mu 2021.

Kuri konti ye akurikirwaho n'abantu barenga ibihumbi 200, yanditseho avuga ko yamaze kugera i Kigali, aho yitabiriye imikino ya BAL. Uyu mugabo yari amaze iminsi ari mu gihugu cya Uganda.

Yivuga nk'umuhanzi, n'intumwa y'Ishami ry’Umuryango w’Abibumbye rishinzwe uburezi, ubumenyi n’umuco (UNESCO)mu guharanira amahoro n'ubwiyunge.

Uyu mugabo yagaragaye mu ruhumbirajana rwa filime, ariko yamamaye cyane muri filime 'Black Panther' yo mu 2018 yabiciye bigacika, ariko yanakinnye muri filime 'Stars wars Story' yo mu 2016. 

Ibyo wamenya kuri Sherrie Silver

Uyu mukobwa ni umubyinnyi kabuhariwe aherutse kugirwa Ambasaderi w'ikigega IFAD [The International Fund for Agricultural Development], yanagiranye ibiganiro na Papa Francis.

Ni umunyarwandakazi akaba n'umubyinnyi wabigize umwuga. Yarushijeho guhangwa ijisho n'isi yose biturutse ku kuba ari we watunganyije akanayobora imbyino zo mu ndirimbo ya Childish Gambino yitwa 'This Is America', yatwaye ibihembo 4 bya Grammy Awards.

Sherrie Silver asanzwe afite urugo yise Children Of Destiny rurerwamo abana babaga ku muhanda, abasubiza mu ishuri abahindurira ubuzima. Batangiye bakodesha inzu ariko aherutse kubagurira inzu babamo mu mujyi wa Kigali ndetse umwe yatangiye kumwigisha kubyina

Sherrie Silver ni umubyinnyi wabigize umwuga umaze kubaka izina ku Isi. Mu 2018, yegukanye igihembo cya MTV Music Video Awards abikesha imbyino yashyize mu mashusho y'indirimbo 'This is America' ya Childish Gambino. 

Ibyo wamenya kuri Navio

Navio yatangiye umuziki ari umwe mu bagize itsinda ry'abanyamuziki rya Klear Kut ryegukanye ibihembo bitandukanye, ryamufashije kwigaragaza mu ruhando rw'abakora injyana ya Hip Hop.

Uyu muhanzi azwi mu ndirimbo zirimo 'Ngalo', 'Bugumu', 'One&Only', 'On and On' n'izindi.

Kuva mu 2010, Navio ni umwe mu bagize itsinda rikomeye ry'abanyamuziki bo muri Afurika yitwa 'One 8' rigizwe n'abanyamuryango nka 2 Face (Nigeria), Fally Ipupa wo muri Repubulika Iharanira Demokarasi ya Congo, 4×4 (Ghana), Movaizhaleine (Gabon), JK (Zambia), Amani (Kenya) na Ali Kiba (Tanzania).

Indirimbo yabo ya mbere bayise 'Hands Across the World' yanditswe kandi itunganwa na R. Kelly.

Muri Gicurasi 2021, yegukanye ibihembo bibiri bikomeye mu byatanzwe muri MTN Uganda Hip Hop Awards 2021.

Yegukanye igihembo cya Album y'umwaka 'Album of the year' abicyesha Album ye yise 'Strength in Numbers', anegukana igihembo cy'indirimbo y'umwaka 'The Collaboration of the year' yakoranye na Flex D'Paper na John Makini bise 'Abaana Beeka'.

Navio avuka kuri Se wari enjenyeri Daniel Serwano Kigozi n'umuhanga mu bugenge Dr Maggie Kigozi. Ni umuhererezi mu muryango w'abana batatu.

Afite impamyabumenyi y'icyiciro cya kabiri cya Kaminuza mu bijyanye n'Imibanire y'Ibihugu n'itangazamakuru, yakuye muri Kaminuza ya Monash University.

Source : https://inyarwanda.com/inkuru/129832/forest-whitaker-navio-na-sherrie-silver-mu-barebye-umukino-wahuje-stade-malien-na-petro-de-129832.html