Author: webrwanda

Imyaka ine irashize aba bombi bari mu rukundo rwitamuruye. Ubukwe bwabo bwabaye kuri iki Cyumweru tariki 16 Nyakanga 2023 kuri Sunday Park, buhuza inshuti, imiryango, abavandimwe n'abandi bashyigikiye intambwe yatewe n'uyu muryango mushya.

Ni ubukwe bwari bwiganjemo ibyamamare mu ngeri zinyuranye! Yambariwe n'abarimo umuhanzi 2saint, Nario, Mbanda, Phil Peter ndetse na Igor Mabano. Ni mu gihe Jean de Dieu Kabanda washinze Isibo Tv yabaye 'Parrain' we. Umuhanzi Jules Sentore yatashye ubu bukwe, aririmba mu gihe cyo gusaba no gukwa.

Ubukwe kandi bwatashywe n'abarimo Mugisha Benjamin uzwi nka The Ben, Mugisha Emmanuel [Clapton], umukinnyi wa filime Makanika n'abandi.

The Ben yahaye impano Julien n'umukunzi we Florence kandi afata umwanya muto wo kubaririmbira no kuvuga ijambo.

The Ben yashimye Producer Julien kuko yamufashije ubwo yari akigera muri Leta Zunze Ubumwe za Amerika agiye gutangira ubuzima.

Uyu munyamuziki witegura nawe gukorera ubukwe muri Kigali Convention Center, yavuze ko ari inshuti y’igihe kirekire ya Julien, kuko yanamukoreye indirimbo ku giciro gito cyane. Abifata nk’aho byari ubuntu. The Ben yavuze ko urugendo rwe na Julien rufite amateka akomeye.

The Ben avuga ko atewe ishema n’intambwe Julien yateye yo kurushinga. Ati “Kandi na Florence aribizi ko uri inshuti yacu kuva cyera. […] Ndi mu bantu banezerewe muri uyu mugoroba, ngirango nawe urabizi ku mutima.'

Yanavuze ko atari azi neza ko azaba ari mu Rwanda mu bukwe bwa Julien na Florence ariko yarasenze Imana iramusubiza.

Ati 'Ntabwo nari nzi ko nzaba ndi mu Rwanda iki gihe ku bukwe bwawe, ariko narasenze Imana ko yamfasha nkaba mpari. Rero ntewe ishema nawe.'

Yavuze ko atabona impano yo gushimira Julien kubera ukuntu bakoranye; yamuhaye impano afatanyije n’abandi bari kumwe.

The Ben yavuze ko n'ubwo amaze iminsi nta ndirimbo ashyira hanze ariko 'ibikorwa byinshi bijyanye n'amashusho byanjye uyu mugabo abigiramo uruhare'.

Akomeza ati 'Kandi yamfashije nta n'ubushobozi mfite. Igihe twatangiraga, twari dushakashaka kugeza aho Imana iduhaye imbaraga tukaba dukora ibintu bivugitse.'

Aravuga ibi mu gihe Julien ariwe wamukoreye indirimbo 'Why' yakoranye n'umunyamuziki wo muri Tanzania, Diamond.

Mu bandi bavuze ijambo, harimo umubyeyi w’umuhanzikazi Babo washimye Julien kubwo gushyigikira umwana we akamutunganyiriza amashusho y’indirimbo zitandukanye. Julien yakoreye Babo indirimbo yitwa 'I'm in love' n'izindi.

Ku wa 10 Ukwakira 2022, nibwo Sugira Florence yagaragaje ko umukunzi we Julien yamwambitse impeta mu muhango wabereye ku kirwa cya Zanzibar muri Tanzania.

Icyo gihe, Sugira yifashishije konti ye ya Instagram atangaza ko yabwiye 'Yego' umukunzi we Bmjizzo.

Yavuze ko yorohewe no kwemerera umukunzi we gutangira urugendo rushya rw'ubuzima. Avuga ko kuva yatangira gukundana na Julien, yamubereye inshuti n'umukunzi 'mu gihe cy'imyaka ine ishize'.

Uyu mukobwa yavuze ko banyuze mu bihe by'imiraba n'ibyishimo ariko 'wakomeje kumbera inshuti nya nshuti' yakoresheje 'G' (inshuti mu mvugo z'iki gihe).' Ati 'Ku bw'ibyo uyu munsi naguhisemo, ejo ndetse n'ahazaza.'

Yashimye Julien ku bwa buri kimwe yamukoreye mu buzima. Amusaba gufatanya gusengera urugendo bagiye gutangira, kugira ngo Imana izayobore intambwe zabo kandi bazarumbuke.

Sugira Florence asanzwe ari umukinnyi wa filime n'ubwo muri iki gihe atakigaragara cyane. Uyu mukobwa yamenyekanye cyane muri filime yahuriragamo n'umusore wamamaye nka ‘Makanika’.

Ariko yanakinnye muri filime yitwa 'Igihiraho' akinamo yitwa Teta. Iyi filime igaragaza ingaruka zo kwihorera; ihohoterwa rikorerwa abagabo rikozwe n’abagore, ihohoterwa rikorerwa abagore rikozwe n’abagabo, kwihangana no mu bihe by’amage ukaba intwari, urukundo, imibanire yifuzwa ku bashakanye, uburere Mboneragihugu n’ibindi.

Mu Ukwakira 2021, nibwo Julien yatangiye urugendo rwo guhuriza abahanzi mu ndirimbo imwe, mu rwego rwo kuzamura izina rye.

Yahereye ku ndirimbo yise 'Kamwe' ikoze mu njyana y'amapiano irimo abahanzi nka Social Mula, Kenny Sol, Davis D, Bushali, Bull Dogg, B-Threy, Khalfan, Confy, Alyn Sano, Li john na Papa Cyangwe.

Ni indirimbo yihariye impera za 2021 kugeza n'uyu munsi, kuko icyumvikana ahantu hatandukanye icurangwa, ikomeza kwizihira abanyabirori.

Julien ni Producer w'Umunyarwanda ariko ukorera mu Bubiligi, afata amashusho y'indirimbo, filime n'ibindi bigendanye na cinema.

Indirimbo 'Why' yakoreye The Ben na Diamond yatumye umwe mu bareberera inyungu za Alikiba amwandikira, amushimira ku kazi katoroshye yakoze.

Ni we watunganyije amashusho y'indirimbo 'Only You' ya The Ben yakoranye na Ben Kayiranga yakomeje izina rye.

Mu 2014, nibwo uyu musore yashinze studio ye y'umuziki yise 'BproudMusic' iherereye mu Bubiligi, aho amaze gukorana n'abahanzi barimo Marina, Social Mula, Big Fizzo, Bull Dog, Mico The Best n'abandi.

Julien yavukiye kandi akurira mu Rwanda. Nyuma yo kurangiza amashuri abanza, yagiye kwiga kuri ESAPAG kugeza mu 2011 aho yavuye we n'umuryango we bajya gutura mu Bubiligi.

Yakomereje amashuri ye mu Bubiligi ku kigo cyitwa Vilgo asoza amasomo mu Ishami rya 'Computer Science Management and Accouting'.

 

The Ben mu batashye ubukwe bwa Producer Julien na Sugira Florence

 

The Ben yahaye impano umuryango Julien na Florence, avuga ko imyaka irenze 10 ari inshuti ya Julien 

The Ben yavuze uburyo Julien yamufashije, bafatwa n’ikiniga bibutse ibihe banyuranyemo 

The Ben yahaye ikaze mu muryango Sugira Florence, avuga ko atewe ishema n’intambwe inshuti ye yateye 

Jean de Dieu Kabanda washinze Isibo Tv niwe 'Parrain' wa Julien [Uwa mbere uri ibumoso] 

Abarimo David Bayingana [Ubanza ibumos] batashye ubukwe bwa Julien

Umubyeyi w'umuhanzikazi Babo yashimye Julien ku bwo gushyigikira urugendo rw'umuziki w'umwana we

Ubu bukwe bwabereye kuri Sunday Park….Abakobwa bo muri Uno Fashion nibo bifashishijwe mu kwakira abatashye ubu bukwe

Mu Ukwakira 2022, nibwo bombi batangaje ko bitegura kurushinga nk'umugabo n'umugore

 

Julien amaze imyaka irenga ine ari mu rukundo na Sugira Florence

Kuva ku wa 15 Nyakanga 2023 mu gihugu cya Congo-Brazzaville hari kubera ku nshuro ya 11 iserukiramuco 'Fespam'.

Ryubakiye ku nsanganyamatsiko y'uruhare rw'injyana ya Rumba mu guharanira ubumuntu. Mu Ukwakira 2021, nibwo byatangajwe ko Rumba yo muri Congo yashyizwe mu murage w'Isi n’ishami ry’umuryango w’abibumbye ryita ku bumenyi, uburezi n’umuco (UNESCO).

Icyo gihe, Umuyobozi mukuru wa UNESCO, Audrey Azoulay, yavuze ko Umuziki wa rumba n’imibyinire yawo byabaye ikirango cy’urugamba rwo guharanira ubwigenge mu kinyejana cya 20.

Umuhango wo gutangiza ku mugaragaro iri serukiramuco witabiriwe n'abarimo Perezida wa Congo-Brazzaville, Denis Sassou Ngueso, abayobozi mu Ishami ry'Umuryango w'Abibumbye ryita ku burezi (Unesco) n'abandi banyuranye.

Ryitabiriwe kandi n'abahagarariye ibihugu byabo barimo abakomoka muri Repubulika Iharanira Demokarasi ya Congo, Gambia, Morocco, Mali, Mauritania, Côte d’Ivoire, Egypt, Equatorial Guinea, Nigeria, Egypt, u Rwanda n'abandi banyuranye.

Umuhanzi Massamba Intore yavuze ko mu gutangiza ku mugaragaro iri serukiramuco bahaye Minisitiri w'Inganda n'Umuco, Ubukerarugendo n'ubuhanzi mu gihugu cya Braziville, Marie-France Hélène Lydie Pongault umwambaro uranga intore.

Yavuze ati 'Impano y'u Rwanda twayitanze mu gitore! Ngubwo Ubudasa bubereye BeneGihanga.'

Uyu muhanzi wakunzwe mu ndirimbo zinyuranye yagiye muri iki gihugu ahagarariye Minisiteri y'Ubumwe bw'Abanyarwanda n'Inshingano Mboneragihugu (Minubumwe) ifite umuco mu nshingano.

Yabwiye InyaRwanda ko ku wa Gatandatu tariki 16 Nyakanga 2023, ari bwo Minisitiri Marie-France Hélène yakiriye abahagarariye ibihugu byabo birimo n'u Rwanda bitabiriye iri serukiramuco riri kuba ku nshuro ya 11.

Massamba avuga ko 'akarusho ni uko twe twamuhaye inkindi, ibitako, mbese umwambaro w'intore'. Avuga ko yaganiriye na Minsitiri Marie- France amusabanurira icyo bivuze guhabwa umwambaro w'Intore n'impamvu bahisemo kuwumuha.

Uyu muhanzi yavuze ko Minisitiri Marie-France yabakiriye neza, kandi ababwira uko gahunda ziteye. Avuga ko kuri uyu wa Mbere ndetse no ku wa Gatatu, umuhanzi Ruti Joel azataramira abazitabira iri serukiramuco ry'indirimbo.

Ati 'Ni ibintu byiza cyane. Ni iserukiramuco ry'indirimbo niyo mpamvu haje Ruti Joel n'abamucurangira. Niwe muhanzi w'ibanze, kandi yateguye ibintu byiza.'

Amashusho agaragaza ubwo Ruti Joel yashyikiriza umwambaro w'Intore Minisitiri Marie-France

Ruti Joel [Uwa Gatatu uvuye ibumoso] yahagarariye u Rwanda muri Fespam

Producer Ishimwe Karake Clement ari mu itsinda ryaserukiye u Rwanda mu iserukiramuco ‘Fespam’
Clement The Guitarist [Ubanza ibumoso] ni umwe mu bari mu itsinda ricurangira Ruti Joel

Massamba yavuze ko bakiranwe urugwiro mu iserukiramuco ‘Fespam’

Massamba Intore yasobanuriye Minisitiri Marie-France impamvu yo kumuha umwambaro w'intore

Minisitiri Marie-France yakiriye impano iranga umuco wa Senegal

Kuri iki cyumweru tariki 16 Nyakanga, i Bugesera ku kibuga cya Field of Dreams, habereye iriganwa rya Rwanda Youth Racing Cup, ryitabiriwe n’amakipe atandukanye asanzwe ari umunyamuryango w’Ishyirahamwe ry’umukino wo gusiganwa ku magare “FERWACY”.

Iri siganwa, ryari ribaye bwa mbere, aho rifite intego y’imyaka icumi yo gushaka impano mu bakinnyi bakiri bato.Kuri iyi nshuro, hakinnye ibyiciro hafi ya byose by’abakiri bato kuva ku myaka 17 gusubiza hasi mu bahungu n’abakobwa.

 Abakinnyi bigendanye n’icyiciro, bazengurukaga ikibuga cya Field of Dreams bigendanye n’umuvuduko bafite, ubundi bakabarirwa ibihe buri umwe yakoresheje. 

Mu cyiciro cy’ingimbi, ubwo ni abari hagati y’imyaka 17-18, Shyaka Janvier ukinira Les Amis Sportifs y’i Rwamagana yabaye uwa mbere akoresheje iminota 52 na amasegonda 36″ Tuyizere Hashim bakina hamwe, yaje amukurikiye, akoresheje iminota 53 n’amasegonda 23″. Ruhumuriza Aime ukinira Cycling Club for All yaje ku mwanya wa Gatatu akoresheje 53′ n’amasegonda 24.

Shyaka Janvier mu batarengeje imyaka 18 niwe winjiye ku murongo ari uwa mbere

Mu bangavu, bari hagati y’imyaka 15 na 16,  ikipe ya Bugesera Cycling Team, yigaragaje kuko yegukanye imyanya itatu ya mbere, aho Iragena Charlotte yabaye uwa mbere akoresheje iminota 41′ n’amasegonda 29, akurikirwa na Uwera Aline wakoresheje iminota 41 n’amasegonda 35, Byukusenge Mariate aba uwa Gatatu akoresheje iminota  41 n’amasegonda 31.

Iragena Charlotte yinjiye ku murongo ni ibyishimo byinshi

Mu cyiciro cy’abahungu bato bari hagati y’imyaka 15 na 16, Ntirenganya Moise ukinira Les Amis Sportifs yabaye uwa mbere akoresheje iminota 40 n’amasegonda 30, Twagirayezu Didier ukinira Kayonza Young Stars aza ku mwanya wa Kabiri akoresheje iminota 41 n’amasegonda 12, Tuyipfukamire Aphrodis ukinira Nyabihu Cycling Team aza ku mwanya wa Gatatu akoresheje iminota 41 n’amasegonda 12.

Ntirenganya Moise yagaragaje ubuhanga bukomeye mu gukata amakorosi agize iki kibuga

Mu bakobwa bato Masengesho Yvonne wakinnye ari umwe yegukanye umudari wa zahabu akoresheje iminota 26 n’amasegonda 29.

Mu cyiciro cy’abatarengeje imyaka 14 mu bahungu, Shema Emmanuel ukinira Les Amis Sportifs yabaye uwa mbere akoresheje iminota 26’00, Gisubizo Issa nawe bakinana, aba uwa Kabiri akoresheje iminota 27 n’amasegonda 18, Ndacyayisaba Isiaka nawe ukinira Les Amis Sportifs aba uwa Gatatu akoresheje iminota 27 n’amasegonda 55.

Iyi Shampiyona y’abakiri bato igamije gushaka impano mu bana, izajya iba ngarukakwezi, ibere mu bice bitandukanye cy’igihugu, ariko ku nshuro cya kabiri mu kwezi gutaha, nabwo izabera i Bugesera mu buryo bwo kurushaho kumenyereza abakinnyi umuhanda mbere y’uko bajya mu mihanda minini. 

Abakinnyi bitabiriye iri siganwa, barishimye cyane bavuga ko ryabigishije kwihangana, ndetse no gukata amakorosi 

Les Amis Sportifs yigaragaje cyane kuri iyi nshuro ya mbere irushanwa ryari ribaye 

Nyuma y’isiganwa hafashwe ifoto y’urwibutso