Author: webrwanda

Uyu munyamuziki aravuga ibi mu gihe u Rwanda rudafite 'Centre Culturel' yakwifashisha n'abayobotse injyana gakondo bitoza cyangwa batoza abandi.

Ariko hari ibigo nka 'Centre Culturel' y'Abafaransa n'iy'Abadage bikunze kwifashishwa na benshi.

Ubwo yari mu kiganiro 'Waramutse mu Rwanda' kuri uyu wa Kane tariki 21 Nzeri 2023, Massamba yumvikanishije ko abakora injyana gakondo bageze ahashimishije, ariko baracyazitirwa no kubona uburyo n'ahantu ho kwitoreza.

Massamba ahamya ko u Rwanda rufite injyana gakondo ari nayo akora mu buryo bw’umuziki no mu buryo bw’umurage.

Agaragaza ko buri gace k’u Rwanda gafite umwimerere muri gakondo, biri mu mpamvu zumvikanisha uko iyi njyana ari ngari kandi irimo ubukire n’ubwo Abanyarwanda bamaze kuyibyaza umusaruro ku kigero cya 10%.

Uyu munyamuziki yavuze ko ibi ari ihurizo rikomeye, kuko abo mu Burengerazuba bwa Afurika, bo bamaze kubyaza umusaruro gakondo yabo batangira kuyikora ariko bavangamo n’ibindi bishya uyu munsi bituma umuziki wabo urangamiwe.

Massamba avuga ko umwana watojwe neza, weretswe ibyiza by’u Rwanda haba mu mbyino no mu kumutoza indangagaciro akiri muto bimufasha mu gukura kwe, ugasanga yamenye kubyina Kinyarwanda n’ibindi bishingiye ku muco.

Yashimye ababyeyi bagira uruhare mu gutoza abakiri bato, ariko kandi avuga ko atari ababyeyi bose bashobora kwigisha abana babo kubyina. Aha niho ahera asaba buri wese kugira uruhare mu gutuma umuco wacu ‘waturuka hasi mu muryango’.

Massamba avuga ko kenshi agira amarangamutima iyo abona abana babyina, bazi guteza neza Kinyarwanda, bimuha icyizere cy’uko umuco usigasiwe. 

Uyu munyamuziki ashima umubyeyi we wamutoje inzira ya gakondo. Akavuga ko yigeze gushaka gukora umuziki w’indirimbo zisanzwe ariko umubyeyi we aramugarura. Ati “Nkiri muto ntabwo nabyumvaga. Numvaga ari kunjyana mu bintu by’abasaza n’abakecuru.”

Yavuze ko Se yamutoje, amwigisha guhimba bituma uko yakuraga yariyumvagamo icyizere. Ati “N’ababyeyi bagomba gukurikirana abana.”

Massamba yavuze ko Se yamutoje guhamiriza, kuririmba, kandi amuremamo icyizere cyatumye uyu munsi ari uwo ari we. Yavuze ko ibyo yatojwe agerageza kubiha abato, ari naho yahereye agira inama Victor Rukotana yo gukora gakondo.

Uyu mugabo avuga ko rimwe na rimwe ajya atekereza ko kuba Ingabo z’u Rwanda zitsinda urugamba bishoboka ko barasa muri gakondo y’Abanyarwanda.

Ati “Iyo ubona abasirikare bacu batsinda za Mozambique n’ahandi hose n’intambara, hari igihe ntekereza y’uko bashobora kuba barasa muri gakondo. Barasa Kinyarwanda […] Iyo ubareba n’ubwo ari imbunda ari iki ariko… 

Iyo umureba ibimenyetso byose akora aba azi n’umuheto, aba azi gutera icumu, ibyo byose yarabitojwe noneho yagera ku mbunda z’abazungu bikaba byoroha. Ibintu byacu birimo gakondo no kuyobora Igihugu harimo iyo ndangagaciro…Ni byiza ko tumera twe…”

Massamba yavuze gakondo irimo amafaranga, kandi abahanzi bayikora neza barunguka kurusha n’abandi. Yavuze ko “muri gakondo ntabwo tuzi gutwika” nk’abandi bakora izindi njyana.

Yanagarutse ku gitaramo cya Josh Ishimwe aherutse kwitabira, igitaramo cy’Itorero Inganzo Ngari, avuga ko ashingiye ku bwitabire bw’abantu bigaragaza ko gakondo ikunzwe.

Massamba avuga ko Se yamuhaye ubumenyi bimuhesha amahirwe yo gutoza n’abandi gakondo. Kandi yatoje mu bihugu birimo u Burundi na Uganda. Akumvikanisha ko muri iki gihe hakenewe ahantu hihariye ho gutoreza abantu uko gakondo ikorwa.

Yavuze ko ajya atekereza gushaka ahantu nk’aha yajya atangira ubumenyi. Ati “Nibishoboka nzakora ‘centre culturelle’ y’agakondo aho noneho abantu bose baza bakiga nkabakosora, nkabereka inzira nziza, ahasigaye bakajya kuyakorera kubera ko harahari, kandi Igihugu cyarafunguye imiryango…”

Massamba yavuze ko mu minsi iri imbere azitabira iserukiramuco rizabera muri Canada. Asobanura ko kuba yatumiwe, hagamijwe ko yerekana umwihariko w’u Rwanda mu muziki.

Yavuze ko kugirango Ruti Joel na Buravan bashyire hanze album yabigizemo uruhare rukomeye kuko yabatoje igihe kinini kugeza ubwo bashyize hanze ibihangano by’abo.

Massamba yavuze ko yasanze abantu batarenga Miliyoni 1 aribo babasha kumva no gushyigikira abahanzi bo mu Rwanda, ashingiye ku bitarmao yagiye yitabira, kuko yakunze kubona ko amasura ari amwe.

Yavuze ko ibi bituma hakanerwa ubukangurambaga, kandi abahanzi bagasanga abafana b’abo aho babarizwa. Uyu munyamuziki ashimangira ko gakondo icuruza, kuko abahanzi bakora uyu muziki ibihangano byabo byumvikana cyane ku mbuga zitandukanye zicururizwaho umuziki. Ati “Gakondo igeze ahantu heza ariko ikwiye gushyigikirwa na beneyo.”

Anavuga ko umuziki w’u Rwanda muri iki gihe winjiriwe n’umuziki wa Nigeria ku kigereranyo cya 80% ku buryo buri muhanzi akora atekereza kwisanisha n’abanya-Nigeria.

Yavuze ko abantu bakwiye ‘kuva mu mitekerereze yo kumva ko ibyacu atari byiza’.

Massamba yavuze ko Abanyarwanda bakwiye gushyigikira abahanzi, kandi bakumva ko inyungu buri umwe agira igera no kuri mugenzi we.

Uyu muhanzi wagwije ibigwi mu muziki w’u Rwanda, yanavuze ko abantu bakwiye gutandukanye ikiriyo n’ikirori. Yavuze ko iyo ugiye mu kirori ukwiye kumenya ko ugiye guhimbarwa utagiye gukora isesengura no kureba.

Yagarutse ku bukwe ajya aririmbamo rimwe na rimwe ugasanga abantu batishimiye. Ati “Njya mbivuga no mu bukwe ntaha ugasanga abantu barasa nk’abarakaye, urandakarira kandi nkuririmbira ‘Kanjongera’, urandakarira kandi nkuzaniye umugeni, ntabwo bishoboka. Icyo kintu ubona ko kibuze mu banyarwanda cyane. Turatuje cyane mu birori.'

Uyu mugabo asaba babyeyi kujya bajyana n’abana babo mu bitaramo bitabira, kandi bagaharanira gutoza abakiri bato umuco w’u Rwanda.

Umuhanzi Victor Rukotana wari mu kiganiro kimwe na Massamba Intore, yavuze ko kuba ari umuhanzi ukora gakondo, byaturutse ku kuba yarakuze abitozwa kandi akaba abikunze cyane.

Yavuze ko buri gihe umuntu agana aho abantu byiza, kandi bimubereye. Ati “Nibyo nabonye nkunze, nibyo nabonye nshinshikariye cyane, nibyo nabonye ko nshoboye. Ahubwo bibaye byiza kurushaho biba ko noneho ari ikirango cy’Igihugu muri rusange.”

Uyu munyamuziki avuga ko yorohewe no kwisanga muri iyi njyana, binaturutse ku bantu bari iruhande rwe, urukundo afite Igihugu, uko abona ibintu n’ibindi. Ati “Nabihisemo kubera ko ndabikunze, ndabibashije… Niyo mpamvu njyewe nabihisemo.”

Rukotana yavuze ko hagikenewe imbaraga za buri umwe mu gutuma umuziki gakondo abantu bawiyumvamo, ariko nanone Leta igashyira imbaraga mu gushyigikira abari muri uyu muziki.

Massamba Intore yatangaje ko agiye gutangiza ahantu azajya yigishiriza ibikubiye mu muco (Centre Culturel Rwandais)

Massamba yavuze ko abantu bakwiye kumenya gutandukanya ibihe byishimo n'umubabaro kuko hari abajya mu bitaramo bakarangwa no gusesengura gusa

Massamba yavuze ko injyana gakondo itunze benshi, kandi ko ibyo bakora bidasaba ko 'batwika' nk'uko abandi bahanzi babikora

Victor Rukotana yavuze ko yakuriye mu maboko meza yatumye yiyumvamo injyana gakondo

Kuri uyu wa Gatanu tariki 22 Nzeri 2023, Victor Rukotana azakora igitaramo yise 'Dutarame u Rwanda

KANDA HANO UREBE AMASHUSHO Y'INDIRIMBO ‘AKAYAMA’ YA VICTOR RUKOTANA

Bamwe mu bagize Inama y’Ubutegetsi ya Shampiyona y’u Rwanda 'Rwanda Premier League', ntabwo bumvikana ku masezerano agomba guhabwa Ikigo cy’Igihugu cy’Itangazamakuru (RBA) izaba ifite uburenganzira bwo kwerekana shampiyona.

Ku mugoroba w’ejo hashize ku wa Gatatu tariki ya 20 Nzeri 2023 nibwo ISIMBI yabagejejeho inkuru y’uko hasubitswe umuhango wo gusinya amasezerano hagati ya Rwanda Premier League na RBA aho byimuriwe mu cyumweru gitaha.

Umuyobozi w’Inama y’Ubutegetsi ya Rwanda Premier League, Hadji Mudaheranwa yabwiye ISIMBI ko impamvu byimuwe ari uko hari ibitaranozwa mu masezerano.

Ati 'twarumvikanye igisigaye ni ugusinya, harimo gutegurwa amazezerano, ikiriho ntabwo bizaba muri iki cyumweru ariko ntabwo bizarenza ku wa Kabiri.”

Amakuru avuga ko uku gusubika gusinya aya masezerano ahanini byatewe n’uko haje kubaho kutumvikana mu bagize Inama y’Ubutegetsi bw’Iyi Shampiyona aho batumvikana ku mafaranga RBA irimo gutanga.

Nk’uko umuyobozi wa 'League’ Hadji yabwiye ISIMBI ni uko RBA bemeranyijwe umwaka umwe ikazishyura miliyoni 380 y’amafaranga y’u Rwanda muri uwo mwaka, gusa ibyatindije aya masezerano ni uko hari abo muri iyi nama y’ubutegetsi batabyumva kimwe bose, hari igice kivuga ko aya mafaranga ari make k’umuntu ushaka kwerekana shampiyona mu buryo bw’amashusho n’amajwi.

Iki gice muri iyi Nama y’Ubutegetsi kivuga ko byibuze aya mafaranga abaye make yakagombye kuba miliyoni 500, kuko bazaba bagiye gucuruza amajwi n’amashusho bonyine ntabandi babyemerewe.

Ishyirahamwe ry’Umupira w’Amaguru mu Rwanda, FERWAFA, rivuga ko bataratangira gushaka umutoza mushya w’Ikipe y’Igihugu ariko bizatangira mu kwezi gutaha.

Ni mu gihe muri uyu mwaka u Rwanda rufite gukina imikino yo gushaka itike y’Igikombe cy’Afurika cy’Abakinnyi bakina imbere mu gihugu (CHAN) ndetse ari nabwo hazatangira urugendo rwo gushaka Itike y’Igikombe cy’Isi cya 2026.

Amavubi y’u Rwanda akaba nta mutoza afite kuva nyuma y’uko muri Kanama 2023 uwari umutoza mukuru, Carlos Alos yeguye maze hagashyirwaho umutoza w’agateganyo.

Hahise hashyirwaho Gerard Buschier usanzwe ari DTN wa FERWAFA nk’umutoza mukuru w’agateganyo yungirijwe na Jimmy Mulisa na Seninga Innocent bahabwa gutoza umukino umwe wasozaga itsinda L ryo gushaka itike y’Igikombe cy’Afurika cya 2023 aho banganyirije mu Rwanda 1-1.

Mu gihe igihe cy’Amavubi cyo gukina andi majonjora kirimo kugenda cyegereza ariko na none hakibazwa umutoza uzayitoza cyangwa niba abagateganyo ari bo bazayigumana.

Umuvugizi wungirije wa FERWAFA, Jules Karangwa yabwiye ISIMBI ko hataratangira gushakwa umutoza mushya ariko mu kwezi k’Ukwakira 2023 ari bwo hazatangira gushakwa umutoza mushya.

Ati “Ntabwo gushaka umutoza w’Amavubi biratangira. Ariko mu kwezi k’Ukwakira hagati nibwo azatangira gushakwa. Ntabwo nakubwira ngo azatangira igihe iki n’iki ariko byose muzabimenya vuba.”

Byari biteganyijwe ko muri uku kwezi kwa Nzeri n’Ukwakira 2023 ari bwo hazaba amajonjora ya CHAN, ni mu gihe tariki ya 20 Ugushyingo 2023 azahura na Afurika y’Epfo n’aho tariki ya 13 Ugushyingo akazahura na Zimbabwe mu gushaka itike y’igikombe cy’Isi.

Umugore w’umuhanzi w’indirimbo zo kuramya no guhimbaza Imana Nizeyimana Emile [Papa Emile], Ineza Parfine yitabye Imana azize uburwayi.

Mu gitondo cyo ku wa Gatatu tariki ya 20 Nzeri 2023 nibwo inkuru y’uko Parfine wari uzwi nka Tomato yitabye Imana yamenyekanye.

Uyu mubyeyi akaba yaguye mu gihugu cya Kenya aho yabanaga n’umugabo we ndetse n’abana akaba yazize uburwayi.

Papa Emile winjiye no mu byo gutunganya imiziki (Producer), umugore we amusigiye abana batanu.

Rutahizamu ukomoka muri Argentine ukinira Inter Miami muri USA ahangayikishije iyi kipe kubera imvune.

Uyu mukinnyi wari umaze ibyumweru bibiri adakina kubera imvune, ntabwo byaraye bimworoheye ubwo yasohokaga mu kibuga n’igice cya mbere kitarangiye kubera imvune.

Ni mu mukino ikipe ye yaraye inyagiyemo na Toronto FC kuri DRV PNK Stadium ibitego 4-0.

Messi yaje kuva mu kibuga ku munota wa 37 kubera imvune yagiriye muri uyu mukino.

Umutoza w’iyi kipe, Tata Martino yavuze ko afite imvune ku kuguru kw’iburyo ya kera imuzengeraza kandi ubwo yari mu ikipe y’igihugu bakoze isuzuma baburamo ikintu.

Ati “ni imvune ya kera imuzengera. Yanyuze mu cyuma ubwo yari mu ikipe y’igihugu ariko babura imvune, twamukuyemo kugira ngo bitaba bibi cyane.”

Biteganyijwe ko Messi atazakina umukino wo ku Cyumweru bazakinamo na Orlando City.