Author: webrwanda

Mu gitondo cyo kuri uyu wa kane tariki 21 Nzeri muri Kigali Convention Centre habereye umuhango wo gutangiza ku mugaragaro ibikorwa n’urugendo rwa shampiyona y’Isi mu gusiganwa ku magare, shampiyona izabera i Kigali mu 2025.

Uyu muhango witabiriwe n’abayobizi batandukanye, barimo Minisitiri wa Siporo Aurore Mimosa Munyangaju, Kayirebwa Liliane vise Perezida wa kabiri wa FERWACY ariko uri gukora nka Perezida, ndetse na DG wa UCI Amina Lanaya. Iri rushanwa rizatangira tariki 21 Nzeri rigere tariki 28 Nzeri 2025.

Ubwo yafata ijambo, Niyonkuru Zephanie uhagarariye komite  iri gutegura iri rushanwa ndetse akaba asanzwe ari  umunyamabanga uhoraho muri minisiteri ya Siporo, yatangaje ko iri rushanwa biteguye kuzakira ibihumbi 20 by’abashyitsi. Yagize Ati” Nk’uko mubizi, u Rwanda rugiye kwakira irushanwa ry’amateka mu gusiganwa ku magare aho dukomeje imyiteguro kugera mu 2025. Iyi shampiyona twiteze ko u Rwanda ruzakira abantu bagera ku bihumbi 20 baje muri gahunda zayo. Muri aba bantu hazaba harimo ibihumbi 5 birimo abakinnyi abatoza ndetse n’abaganga.”

Niyonkuru Zephanie ukuriye itsinda riri gutegura iyi shampiyona, yabwiye abari ibitabiriye uyu muhango ko u Rwanda ruzungukira byinshi, harimo no kurushaho kumenyekanisha igihugu. 

Minisitiri wa Siporo Aurore Mimosa Munyangaju yemeje ko u Rwanda rwiteguye kandi intego ari ugukora amateka muri iyi shampiyona. Yagize Ati” Intego yacu ni ugutegura neza iyi shampiyona ndetse no kugira irushanwa ry’amateka, ritazasibangana mu mitwe y’abazaryitabira ndetse n’Isi muri rusange.

Minisitiri wa Siporo Aurore, yemezako, u Rwanda rwiteguye kwakira shampiyona itazibagirana mu mitwe y’abantu n’Isi muri rusange 

Shampiyona y’Isi yatangiye mu 1900 ariko ikinwa bwa mbere mu 1921. Iyi shampiyona ngarukamwaka, ubwo u Rwanda ruzaba ruyakira, ni ubwa mbere izaba ibereye muri Afurika, kuko u Rwanda rwatsinze Maroc mu bihugu byashakaga kuyakira.

U Rwanda rwiteze iki mu kwakira iyi shampiyona?

Shampiyona y’Isi mu gusiganwa ku magare, ni irushanwa riba ngarukamwaka, ariko aho ribereye riba ryitezwe n’imbaga. Ku ruhande rw’u Rwanda, uretse kuba abanyarwanda bazaryitabira, u Rwanda rwiteguye kuzazamura ubukungu binyuze muri iri rushanwa, aho amahoteli azakira abantu bazaba bitabiriye iri siganwa. Iyi shampiyona kandi izaba ibereye muri Afurika bwa mbere, u Rwanda rwiteze kuzarushaho kumenyekanisha ibikorwa by’ubukerugendo binyuze mu mukino w’igare nk’uko bisanzwe bikorwa muri Tour du Rwanda.

Ni bande bazitabira iyi shampiyona?

Nk’uko iyi shampiyona isanzwe ikinwa, hazitabira abakinnyi mu byiciro by’abagabo n’abagore, aho buri cyiciro kizaba gifite abakinnyi bakuru, abatarengeje imyaka 23 ndetse n’icyiciro cy’abato. Ikizaba ari gishya muri iyi shampiyona ni uko kuruhande rw’abagore icyiciro cy’abatarengeje imyaka 23 kizakina ukwabo, bitandukanye n’uko mbere byabaga bimeze kuko bari basanzwe bakina muri rusange.

Umuhanda shampiyona ishobora kuzanyiramo

Abakinnyi bashobora kizajya bahagurukira kuri Kigali Convention Centre, banyure Gisimenti, Kimironko, Kibagabaga, Ku bitaro, Nyarutarama, UTEXRWA, Kinamba, Poids Lourds, Cadillac, IFAK, basoreze kuri Kigali Convention Centre ubundi bahazenguruke bigendanye n’ibirometero abakinnyi bakora. 

Kayirebwa Liliane ubanza ibumoso, ari gukora  nka perezida wa FERWACY, Minisitiri wa siporo mu Rwanda Aurore Mimosa Munyangaju na DG w’ishyirahamwe ry’umukino w’amagare ku Isi,(UCI) Amina Lanaya 

Minisitiri wa siporo Aurore Mimosa Munyangaju, DG wa UCI Amina n’umunyamabanga uhoraho wa minisiteri ya siporo, Niyonkuru Zephanie, ubwo binjiraga ahabereye umuhango wo gutangiza urugendo rutegura shampiyona y’Isi izabere i Kigali mu 2025 

Umushyushyarugamba MC Brian n’umunyamakuru David Bayingana, nibo bari bayoboye uyu muhango 

KANDA HANO UREBE AMAFOTO MENSHI 

AMAFOTO: Serge Ngabo – InyaRwanda

Mu kiganiro n'abanyamakuru kuri uyu wa Kane tariki 21 Nzeri 2023, Umuyobozi w'Umujyi wa Kigali, Pudence Rubingisa yavuze ko  hagamijwe  kureba isuku  no kurwanya urusaku  bityo  ko  hatagamijwe kurandura amahema  cyangwa se  gukuraho  ahakorerwa  ubukwe.

Avuga ko   ikigambiriwe  ari  ukubahiriza  igishushyanyo mbonera  cy'Umujyi wa Kigali  kuko  atari  amahema  gusa   n'izindi nyubako  zirimo Insengero,Ibiro ndetse n'inzu zo guturamo n’zindi  zitandukanye  zirebwa n'iyi gahunda.

Ati'' Ntabwo umujyi wa Kigali  ugamije gusa amatente  ahubwo ni ukureba ko ibisabwa   byubahirizwa   harimo no kubahiriza  iby'urusaku, isuku, aho imodoka ziparika, umubare w’abantu ''

Akomeza avuga ko  ikigmijwe ari ukwegera abafite ibi bikorwa  by'amahema yaba ayakira ubukwe , ibirori ndetse n'inama  bagasabwa kugira icyo  bubahiriza hagamije  kutabangamira ababituriye ndetse   n'ibikorwa byabo ubwabo.

Ati'' Ni uko ubukwe ushobora gukorera  ahantu hose ariko ntubangamire  abaturanyi.

Icyari kigamijwe ni ukugirango  abantu bibutswe kubahiriza igishushyanyo mbonera , iyo ugiye gushyira ihema ahantu runaka  ugomba kubisabira uburenganzira bivuze ko ibyakozwe ku ihema rimwe bigomba no  kubahirizwa  ku yandi yose.

Ni ukureba , ese ufite ibirwanya inkongi , ufite ibishobora kuba byagufasha mu kugabanya urusaku”.

Yemeza ko nta muntu uragaragariza umujyi wa Kigali   ko yaba yarahuye n'igihombo kandi ko niba anahari  bizaganirwaho  harebwe  igikorwa.

 

Ku hari ababa  barishyuye  gukorera muri aya mahema , Meya Rubingisa avuga ko  hazarebwa abasohoye ubutumire hakagira  igikorwa.

Meya  Rubingisa yakomeje avuga ko  ntahantu  Umujyi wa Kigali  ufite wavuga ngo iki ni icyanya cy'ubukwe  nk'uko  hari icyanya  cy'inganda ahubwo ni  ukureba ibipimo byubahirizwa  muri ibi bikorwa  ati ''Uwubaka arubahiriza iki, ushyizemo urusengero  arubahiriza iki , ibyo ni ibikorwa tuba dufite mu buzima busanzwe ndetse no muri gahunda  dufite y'igishushanyo mbonera ni uko wajya  ugera ku kintu cyose utiriwe utega imodoka yewe no gutaha ubwo bukwe''

Umuyobozi w'Umujyi wa Kigali wungirije Ushinzwe Imiturire n'Ibikorwaremezo, Dr. Merard Mpabwanamaguru yavuze ko  umuntu wese ugiye  gukora ibikorwa byakira abantu bose  ni uko agomba kureba niba koko  ibikoresho  akoresha  bitanga ubuzima ku bari hanze y'inyubako  cyangwa hema  ndetse no ku bari imbere  ari nayo mpamvu  hababo bwa bugenzuzi  buhoraho  harebwa ko byubahirizwa.

Abayobozi batangaje ibi nyuma y’uko bamwe mu  bafite ibikorwa amahema yakira  amakwe mu Mujyi wa Kigali bagaragaje impungenge ko  iki cyemezo gishobora kubashyira mu gihombo  dore ko bamwe banavuga ko hari amafaranga y’abakiriya barangije kwakira  bateganya gukoreramo ibirori mu bihe bitandukanye.

Kazungu yitabye urukiko rw'ibanze rwa Kicukiro mu gitondo cyo kuri uyu wa Kane tariki 21 Nzeri 2023. Yaburanye ku minsi 30 y'ifungwa n'ifungurwa ry'agateganyo. Ibidasanzwe byaranze uru rubanza ni byo iyi nkuru yitsaho.

1. Umutekano wari wakajijwe

Abaturage bashakaga gukurikira urubanza rwa Kazungu bari buzuye ku ruzitiro rw’urukiko

Imbere muri salle yabereyemo urubanza umutekano wari wakajijwe, inyuma hari hari umutekano ndetse no hanze y’urukiko

Abapolisi 2 batwaye Kazungu mu modoka n’inyuma hari abandi

Kazungu yari acungiwe umutekano ngo adacika ubutabera

Ubusanzwe imanza usanga ziba nta mutekano uri ku rwego rwo hejuru ku rukiko. Si ko byagenze none kuko Kazungu yari mu modoka irinzwe cyane. Ava mu mudoka yari afashwe n'abapolisi 2 abandi bari imbere yambaye amapingu nk'ibisanzwe. 

Mu nkengero z'urukiko hari umutekano ucunzwe na polisi. Ku marembo yinjira muri salle y'urukiko hari abashinzwe gusaka abafite ibikapu bitandukanye n'izindi manza zisanzwe.

2. Ubwitabire ku bantu benshi

Urubanza rwa Kazungu rwaravuzwe cyane mu itangazamakuru ku buryo buri wese yari yiteze kumva uko biri bugende. Hari abantu buzuye ku rukiko, abari mu nkengero z'urukiko, imbere muri salle yabereyemo urubanza kwicara byari ukwihengeka. Abaje urubanza rwatangiye, kwicara ntibyari byoroshye. Ariko hari n'abarukurikiye bari hanze.

3. Kazungu Denis yasabye umuhezo

Ubwo iburana ryari ritangiye yahawe umwanya ngo avuge niba yiteguye kuburana, avuga ko yifuza umuhezo. Yagize ati: 'Hari ibyaha nakoze bikomeye ntashaka ko byumvikana mu itangazamakuru kandi ntashaka ko bikwirakwizwa kugira ngo bibe byagira uruhare mu kuyobya sosiyete.'

Umucamanza yabajije Ubushinjacyaha icyo butekereza kuri iki cyifuzo cya Kazungu, buvuga ko nta shingiro gifite. Umucamanza yanzuye ko iburanisha ku ifunga n'ifungurwa ry'agateganyo ribera mu ruhame.

4. SIDA yabaye imbarutso y'abantu 14 akurikiranyweho kwica

Ubwo yari abajijwe icyamuteraga kwica abantu urw'agashinyaguro akanabashyingura, Kazungu yabwiye Urukiko ko impamvu yishe abo yishe yabazizaga ko bamwanduje SIDA ku bushake.

Abajijwe icyo avuga ku busabe bw'Ubushinjacyaha bw'uko yafungwa iminsi 30, yabwiye urukiko ati: 'Izamu ni iryanyu ryo gufata umupira cyangwa ukabaca mu ntoki'. 

Kazungu yiburaniye kuko nta mwunganizi mu mategeko yari afite. Ikindi kandi ntiyigeze agora abacamanza n'ubushinjacyaha bitewe nuko ibyaha byose akurikiranyweho uko yabisomewe ntiyigeze agira na kimwe ahakana. 

Ni urubanza rwamaze iminota 40 ku buryo umwanya munini wafashwe n'ubushinjacyaha busobanura buri cyaha uko cyakozwe n'impamvu Kazungu akwiriye guhabwa iminsi 30 y'agateganyo. 

Ubushinjacyaha bwagaragaje ko bukeneye igihe gihagije cyo gukomeza gukusanya ibimenyetso dore ko imyirondoro ya Kazungu ishidikanywaho. Ibyaha yakoze aramutse abihamijwe yabahwa igifungo kiri hejuru y'imyaka 2 bityo akwiriye kuba afunze by'agateganyo. 

Indi mpamvu Ubushinjacyaha bwasobanuye ko Kazungu Denis aramutse arekuwe yakwica imiryango y'abatangabuhamya kandi ko bakwiriye kurindwa.

5. Kazungu Denis akurikiranyweho ibyaha 8

Ibyaha Kazungu akurikiranyweho birimo Ubwicanyi buturutse ku bushake, Iyicarubuzo, gukoresha undi imibonano mpuzabitsina ku gahato, guhisha umurambo w'undi muntu, gukoresha ibikangisho n'itwarwa n'ifungiranwa ry'umuntu.

Akurikiranyweho kandi ubujura bukoresheje kiboko, icyaha cyo konona inyubako utari nyirayo, inyandiko mpimbano ndetse no kugera mu buryo butemewe ku makuru abitswe muri mudasobwa.

Mu Iperereza ry'Ibanze, bigaragazwa ko mu cyobo Kazungu yajugunyagamo imirambo y'abo amaze kwica hakuwemo imibiri y'abantu 12.

Ku rundi ruhande ariko ubwo Kazungu yabazwaga ku cyaha cy'ubwicanyi, yiyemereye ko yishe abantu 14 barimo abigitsinagore 13 n'umuhungu umwe. Muri iri buranisha, umucamanza yasabye Ubushinjacyaha kugira icyo buvuga kuri ibi byaha Kazungu ashinjwa.

Ubucamanza bwavuze ko nubwo aba bantu 12 Kazungu yabiciye aho yari atuye mu Busanza, yabaga yabakuye mu bice bitandukanye birimo Remera, Kimironko, Kabuga, Masaka na Rusororo.

Bwavuze ko iyo yamaraga kubageza aho atuye nyuma yo kubashukashuka, yahitaga abakingirana, akabazirika amaguru n'amaboko, ubundi akazana ibikoresho birimo inyundo, imikasi n'ikaramu, akababwira amagambo ateye ubwoba ndetse bikajyana no kubakorera iyicarubuzo.

Ubushinjacyaha bwagaragaje ko mbere yo kwica aba bantu yabanzaga akabaka amafaranga n'ibyangombwa ndetse akabategeka kumubwira imibare y'ibanga bakoresha kugira ngo yiyoherereze amafaranga ari kuri telefone zabo na konti za banki.

Yabishe akoresheje inyundo, imikasi, akabaniga hari n’abo yatetse mu isafuriya

Mu iperereza ry'ibanze byagaragaye ko hari na bamwe mu bantu Kazungu yagiye yica ariko yabanje kubakoresha inyandiko zivuga ko bamuhaye ibikoresho batunze n'imitungo irimo amasambu. Iyo ibi byarangiraga yarabicaga ubundi akabajugunya mu mwobo yari yaracukuye mu gikoni.

Yemera ko umwe ariwe yafashe ku ngufu

Ubushinjacyaha bwagaragarije urukiko ko mu ibazwa Kazungu yagaragaje ko atibuka amazina yabo yishe bose, uretse bane muri bo barimo uwitwa, Eliane Mbabazi, Clementine, Françoise na Eric Turatsinze, yibuka kuko nyuma yo kumwica yatangiye gukoresha umwirondoro we.

Uyu mugabo kandi yagaragaje ko ku cyaha cyo gukoresha undi imibonano mpuzabitsina ku gahato yemera ko umuntu umwe ariwe yasambanyije, ariko we aza gucika atamwishe.

Uyu mukobwa bivugwa ko yafashwe ku ngufu na Kazungu, mu buhamya yahaye Ubushinjacyaha yavuze koko ko uyu mugabo yamukoreye iki cyaha.

Uyu mukobwa yavuze ko yahamagawe kuri telefone n'umuntu wari wigize mugenzi bari basanzwe baziranye. Nyuma yo kugezwa kwa Kazungu, yatangiye kumutera ubwo ndetse aramukingirana, amubwira ko natemera ibyo asaba ari bumwice.

Yamutegetse kumuha amafaranga ari kuri Mobile Money, amutwara telefone, aramusambanya ariko undi aza kubasha kwiruka aramucika, Kazungu amwirutseho abaturage baramufata.

Mu buhamya bwatanzwe n'abandi bantu bahohotewe na Kazungu barimo undi mukobwa wahawe izina rya 'Code20' n'uwahawe 'Code 33' bagaragaje ko bose Kazungu yagiye abambura amafaranga ndetse akabakorera iyica rubozo ririmo kubajomba ikaramu mu zuru.

Ibi byose nibyo ubushinjacyaha bwahereyeho busaba urukiko gutegeka ko Kazungu afungwa iminsi 30 y'agateganyo, kuko aribwo buryo bwonyine bwo kurinda abakorewe ibyaha n'abatangabuhamya, guhagarika ibyaha yakoze no kwirinda ko byakongera kuba, ndetse hejuru y'ibyo ibyaha byose ashinjwa bikaba bihanishwa igifungo kiri hejuru y'imyaka ibiri.Kazungu Denis yavuze ko nta cyo arenzaho. 

Umwanzuro w’urubanza uzasomwa ku itariki 26 Nzeri 2023 Saa cyenda z'amanywa. Umubyeyi wari waje kumva urubanza afite umwana witwa Turatsinze Eric w’imyaka 23 y’amavuko ari mu bo Kazungu akurikiranyweho kwica.

REBA AMASHUSHO UBWO KAZUNGU YARI IMBERE Y’URUKIKO 

Video: Dox Visual

AMAFOTO: AG Promoter

Akanama k’Ubutegetsi ka Shampiyona y’u Rwanda, kamenyesheje Ikigo cy’Igihugu cy’Itangazamakuru (RBA) ko amafaranga batanze bagura uburenganzira bwo kwerekana shampiyona atemewe ndetse ko baba banahagaze gukomeza kuyerekana.

Uyu munsi nibwo RBA na Rwanda Premier League bagombaga gusinyana amasezerano yo kwerekana shampiyona y’icyiciro cya mbere mu Rwanda umwaka w’imikino 2023-24 ariko bikaba byimuwe.

Umuyobozi w’Inama y’Ubutegetsi ya Rwanda Premier League, Hadji Mudaheranwa yabwiye ISIMBI ko impamvu byimuwe ari uko hari ibitaranozwa mu masezerano.

Ati 'twarumvikanye igisigaye ni ugusinya, harimo gutegurwa amazezerano, ikiriho ntabwo bizaba muri iki cyumweru ariko ntabwo bizarenza ku wa Kabiri.”

ISIMBI yaje kumenya amakuru ko impamvu batasinye ari uko bamwe mu bagize Inama y’Ubutegetsi ya Rwanda Premier League batemeye amafaranga RBA yatanze angana na miliyoni 380 aho bayibwiye ko amafaranga make ari miliyoni 400 z’amafaranga y’u Rwanda.

Ku gicamunsi cyo kuri uyu wa Kane tariki ya 21 Nzeri 2023 nibwo Mudaheranwa Yusufu yandikiye RBA ayimenyesha ko ubusabe bwabo batanze bwo kuba bagura kwerekana shampiyona y’icyiciro cya mbere mu Rwanda bwanzwe kandi ko batabutanga munsi ya miliyoni 400.

Ati “hagendewe ku nama zahuje ababahagarariye n’abagize Inama y’Ubutegetsi ya Rwanda Premier League, twagira ngo tubamenyeshe ko tutiteguye kwakira ubusabe ubwo ari bwo bwose buri munsi ya miliyoni 400 z’amafaranga y’u Rwanda ku mwaka, guhabwa uburenganzira bwo kuyerekana yaba mu mashusho n’amajwi.”

Yakomeje abamenyesha ko babaye bambuwe uburenganzira bwo kwerekana shampiyona uhereye ku munsi wa 5 wa shampiyona.

Ati “twagira ngo tubamenyeshe ko gusakaza (kwerekana) shampiyona mubaye muhagaritswe uhereye k’umunsi wa 5 wa shampiyona uteganyijwe guhera tariki ya 30 Nzeri 2023.”

Umwaka ushize w’imikino RBA yerekanaga shampiyona nta giceri na kimwe yishyuye aho bumvikanye ko bazajya bagabana amafaranga yinjiye mu kwamaza.

Muri uyu mwaka w’imikino wa 2023-23, Shampiyona y’u Rwanda yatangiye kwigenga aho bazajya banayitegurira FERWAFA itabigizemo uruhare, bahisemo no guhita bayigurisha, ntibemera ibyo FERWAFA yumvikanye na RBA.

Ineza Parfine wari uzwi nka Tomoto, yitabye Imana mu gitondo cyo kuwa Gatatu tariki 20 Nzeri 2023, azize uburwayi. Amakuru avuga ko yarwaye igifu aza koroherwa ndetse asezererwa no mu bitaro, ariko nyuma mu buryo butunguranye yongera kuremba, ahita yitaba Imana. 

Yaguye mu gihugu cya Kenya aho yabaga n’umuryango we w’abana n’umugabo we Papa Emile. Urupfu rwe rwashavuje benshi na cyane ko agiye akiri muto kandi akaba asize abana bato. Gahunda iriho ubu ni ugushaka uko umubiri we wagezwa mu Rwanda uvanywe muri Kenya.

Mu kiganiro na InyaRwanda, umwe mu bo mu muryango wa Ineza Parfine, yadutangarije ko kuri uyu wa Kane tariki 21 Nzeri ari bwo hatangira ikiriyo mu kwizihiza ubuzima bwa nyakwigendera no gufata mu mugongo imiryango ye n’inshuti ze. Ikiriyo kirabera i Kigali mu Rwanda.

Emile Nzeyimana uri mu gahinda ko kubura umugore we, azwi mu ndirimbo “Mbayeho” yamwubakiye izina. Emile Nzeyimana na Ineza Parfine basezeranye kubana akaramata mu mwaka wa 2013. Parfine asize abana 5 yabyaranye na Papa Emile.

Papa Emile yakundaga mu buryo bukomeye umugore we Parfine kugeza aho amwita Tomoto (Urunyanya). Mu 2015, Papa Emile yabwiye inyaRwanda ko impamvu yise umugore we “Tomoto” yabitewe n’urukundo amukunda aho yamubereye umuti uvura indwara y’umutima. 

Ineza Parfine yitabye Imana azize uburwayi

Papa Emile yapfushije umugore we Parfine Ineza

IMANA IMUHE IRUHUKO RIDASHIRA

Urukiko rw'ibanze rwa Kicukiro rugiye kuburanisha Kazungu Denis ku ifungwa n'ifungurwa ry'agateganyo.

Kazungu yageze mu rukiko ku isaha ya  Saa Tatu. Yari yambaye kambambili  zifite ibara ritukura. Ipantalo y'ikoto n'umupira w'umukara ku musatsi yamazeho.

Inteko iburanisha yabajije Kazungu niba yiburanira. Yahagurutse yegera ameza aburanirwaho. Kazungu Denis yasabye ko urubanza rwabera mu muhezo.

 Perezida w'inteko iburanisha yabajije Ubushinjacyaha niba bemera ko yaburanira mu muhezo. Ubushinjacyaha burahakana buvuga ko agomba kuburanira mu ruhame. Kazungu Denis yasabaga ko urubanza rwabera mu muhezo kubera ibyaha yakoze hatazagira abamenya uko yabikoze.

Akekwaho: Icyaha cy'ubwicanyi buturutse ku bushake

Iyicarubozo

Gukoresha undi imibonano mpuzabitsina ku gahato

Guhisha umurambo w'umuntu kuwucaho cyangwa se kuwushinyagurira

Gukoresha ibikangisho

Ubujura bukoresheje ikiboko

Gusenya cyangwa se konona inyubako ku bushake utari nyirayo

Gukoresha inyandiko mpimbano

Kugera ku makuru ari muri mudasobwa

Ubushinjacyaha bumaze gusoma ibyaha byose Kazungu akurikiranyweho, Perezida uyoboye inteko iburanisha impamvu bazanye Kazungu mu rubanza.

Ubushinjacyaha bwavuze ko ku itariki 5-9-2023 Ubugenzacyaha bwasanze icyobo iwe kirimo imirambo y'abantu 12. Kazungu yabwiye Ubugenzacyaha ko abantu yabakuraga ahantu hatandukanye. Yabageza iwe akabazirika. Yakoreshaga inyundo, imikasi, akababwira amagambo ateye ubwoba, akabambura amafaranga.

Yabasabaga imibare y'ibanga ya telefoni na banki. Bamwe yabakoreshaga inyandiko zihamya ko bamuhaye ibyo batunze mu ngo zabo abandi bakandika ko baguze ibyo batunze byose.

Ubushinjacyaha buvuga ko yahitaga abica akabajugunya mu cyobo. Hari abamucitse ari nabo batanze amakuru. Kazungu yemera ko yishe abantu 14 ariko imibiri ya 2 yarabuze kubera gusibanganya ibimenyetso. Ubushinjacyaha buvuga ko yatuye ahantu hameze nk'aho ari wenyine kandi agenda ahindura imyirondoro.

Ibyo yamburaga yabigurishaga yiyise Turatsinze Eric. Abatangabuhamya bemera ko yabakoreye icyaha cy'imibonano mpuzabitsina ku gahato ndetse uwo mukobwa w'umutangabuhamya yarabimushinje.

Ubushinjacyaha bukomeza busobanura ko Kazungu Denis yacukuye umwobo iwe akajya ashyiramo imibiri y'abantu 14 yishe.

Ubushinjacyaha bwanasobanuye ko Kazungu yemera ko yishe abantu akaba anemera ko yacukuye icyobo. Yabanje gushyiraho itaka abona icyobo kizuzura vuba.

Icyaha cyo gukoresha imibonano mpuzabitsina ku gahato yemera ko umwe ari we yasambanyije

Mu nyandiko mvugo ya Kazungu yemera ko yasambanyije uwo mukobwa

Icyaha cy’iyica rubozo

Ifatwa ritemewe n’amategeko

Icyaha cyo kugirira umuntu nabi

Kazungu yemera ko yakingiranaga abantu akabakanga akabatera ubwoba harimo no kubababaza umubiri. Hari abo yabanzaga kuniga bakemera ibyo ashaka byose birimo imibare y’ibanga ya telefoni, banki n’ibindi.

Inyandiko mvugo y’uwahohotewe asobanura uburyo yahamagawe nkaho asanze umuntu baziranye. Ageze kwa Kazungu  yamuteye ubwoba, aramukingirana amubwira ko natemera ibyo amubwira ari bumwice. Yamutwaye telefoni, amafaranga ari kuri mobile money undi aramucika Kazungu amwirakaho biranga biba iby’ubusa.

Gukoresha inyandiko mpimbano ni uko Kazungu yakodesheje inzu ku mazina y’umwirondoro wa Dushimimama Joseph. Kazungu yemeye ko yakoresheje umwirondoro wa Dushimimana Joseph ufungiye i Mageragere. Kazungu yari anafite umwirondoro kuri telefoni na simcard ya Dushimimana Joseph. Inyandiko mvugo ya nyirinzu yavuze ko Kazungu yakoresheje ayo mazina ku masezerano

Icyaha cyo kwinjira muri mudasobwa, Kazungu yamburaga abakobwa telefoni akabambura imibare y’ibanga akaninjira muri telefoni akabikuza amafaranga kandi akabasha kugera ku bandi bantu abakuye muri za telefoni. Ubuhamya bwatanzwe bushimangira ko Kazungu yabamburaga imibare y’ibanga. 

Ubushinjacyaha burasaba urukiko gufata icyemezo gifunga Kazungu iminsi 30 y’agateganyo. Impamvu ubushinjacyaha bumusabira iyi minsi ari uburyo bwo kurinda abatangabuhamya n’abakorewe icyaha. Kandi ibyaha akurikiranyweho birengeje ibihano by’imyaka 2. Indi mpamvu ubushinjacyaha buvuga ko imyirondoro ya Kazungu ishidikanywaho ariyo mpamvu bakwiriye gukomeza iperereza. 

Kazungu Denis avuga ko abo yabikoreye babanje kumwanduza Sida ku bushake. 

Iminsi 30 y’agateganyo, Kazungu Denis yavuze ko nta cyo arenzaho. Umwanzuro w’urubanza uzasomwa ku itariki 26 Nzeri 2023 Saa cyenda. 

Kuri uyu wa Kane tariki 21 Nzeri 2023, Trace Africa yasohoye urutonde rwa nyuma rw'abahanzi bazaririmba muri ibi bihembo bigamije guteza imbere abakorera umuziki muri Afurika mu kurushaho gusakaza ibihangano byabo hifashishijwe inyakiramashusho zitandukanye z'iri Televiziyo.

Ni urutonde rugaragaraho amazina y'abahanzi bakomeye bagiye gutaramira i Kigali ku nshuro  ya mbere , nka Yemi Alade (Nigeria, Mr Eazi (Nigeria), Azawi (Uganda), BNXN (Nigeria), Camidoh (Ghana), Danni Gatto (Cape Verde), DJ Illans (Reunion), Donovan BTS (Mauritius), Emma'a (Gabon);

Fireboy DML (Nigeria), GAEI (Madagascar), Gerilson Insrael (Angola), Ghetto Kids (Uganda), Goulam (The Comores), Juls (Ghana), Kader Japonais (Algeria), Kalash (Martinique), Krys M (Cameroon), KO (South Africa);

Hari kandi KS Bloom (Ivory Coast), Levixone (Uganda), Locko (Cameroon), MIKL (Réunion), Moses Bliss (Nigeria), Musa Keys (South Africa) Nadia Mukami (Kenya), Olamide (Nigeria), Pabi Cooper (South Africa), Segael (Réunion) ndetse na Show dem Camp wo muri Nigeria.

Kuri uru rutonde kandi harimo Mr Eazi, umunyamuziki w'inshuti y'u Rwanda wanashoye imari mu bikorwa bitandukanye. Yaherukaga kuririmbira i Kigali mu bitaramo bya Chop Life, kandi azahurira ku rubyiniro n'umuhanzi wo mu Rwanda, Chriss Eazy.

Chriss wamenyekanye cyane mu ndirimbo zirimo 'Inana' ari no ku rutonde rw'abahanzi bo mu Rwanda bahatanye muri ibi bihembo aho ahatanye na Bruce Melodie, Ariel Wayz, Bwiza ndetse na Kenny Sol.

Kwinjira mu muhango wo gutanga ibi bihembo bizasaba kwishyura ibihumbi 20 Frw, kandi ibi bihembo bizabera mu nyubako y'imyidagaduro ya BK Arena, ku wa 20 Ukwakira 2023.

Urutonde rwa mbere rw'abahanzi bari batangajwe ruriho Davido (Nigeria), Asake (Nigeria), Bamby (French Guiana), Benjamin Dube (South Africa), Black Sherif (Ghana), Blxckie (South Africa), Bruce Melodie (Rwanda), Bwiza (Rwanda), Didi B (Ivory Coast), Dystinct (Morocco), Janet Otieno (Kenya), Josey (Ivory Coast), Kizz Daniel (Nigeria);

Lisandro Cuxi (Cape Verde), Locko (Cameroon), Mikl (Reunion), Perola (Angola), Plutonio (Mozambique), Princess Lover (Martinique), Ronisia (France), Rutshelle Guillaume (Haïti), Soraia Ramos (Cape Verde), Tayc (France), Terrell Elymoor (Mayotte), The Compozers (Ghana) ndetse na Viviane Chidid wo muri Senegal.

Ibi bihembo bigiye gutangwa Trace Africa yizihiza imyaka 20 ishize igira uruhare mu guteza imbere abanyamuziki bo muri Afurika binyuze mu kubafasha gusakaza ibihangano by'abo.

Umuyobozi wa Trace Africa, Olivier Laouchez aherutse kuvuga ko  byatekerejweho mu rwego rwo kurenga inzitizi zibangamira iterambere ry'umuziki, biri mu ntego iyi Televiziyo ayoboye ishyize imbere kuva yatangira gukora ku mugaragaro.

Yavuze ati “Turifuza gukuraho inzitizi dutekereza ko iri isoko tugomba guhatanira ku isi yose ndetse tukagaragaza ikinyuranyo. Niyo mpamvu tugomba kuzana udushya twinshi dukora nk’ikipe imwe mu bihugu bitandukanye tugashyira abantu hamwe kuko imikoranire myiza itanga umusaruro urimo ubwenge bityo tugakora ibidasanzwe.”

Trace Global ifite insakazamashusho za Trace [Trace Africa, Trace Urban…] ifite itsinda ry’abahanga mu muziki ryicara rigahitamo indirimbo ikwiye gutambuka n’itabirikwiye.

Ibi bihembo ni mpuzamahanga, kandi bigamije guteza imbere abanyamuziki bafite impano zinyuranye by’umwihariko abubakiye inganzo y’abo ku muziki wa Afrobeat.

U Rwanda nirwo ruzakira umuhango wo gutanga ibi bihembo. Byatumye hongerwamo icyiciro cy’abahanzi bo mu Rwanda cyiswe ‘Best Rwandan Artist’ gihatanyemo Bruce Melodie, Kenny Sol, Ariel Wayz, Bwiza na Chriss Eazy.

Diamond wo muri Tanzania uheruka gutaramira i Kigali, ahatanye mu cyiciro cy’umuhanzi w’umugabo [Best Male], n’icyiciro cy’indirimbo ifite amashusho meza [Best Music Video].

Ni mu gihe Azawi, Levixone na Ghetto Kids aribo bahagarariye Uganda. Ibi bihembo bizatangwa bihujwe n’iserukiramuco rya ‘Trace Awards&Festival’ ku bufatanye na Visit Rwanda, Sosiyete ya RwandAir, Ikigo cy’Igihugu cy’Itangazamakuru (RBA) n'abandi.

Kuva mu Majyepho, u Burasirazuba n’u Burengerazuba, Umugabane wa Afurika urahagarariwe binyuze mu bahanzi bakora injyana nka Afrobeat, Genge, Kizomba, R&B, Rumba, Dancehall n’izindi.

Bahatanye mu byiciro 22. Kandi ni abo mu bihugu birimo birimo Amerika y'Amajyepfo, Caribbean, Uburayi, Algeria, Angola, Brazil, Cameroon, Cape Verde, Comoros, DRC, France, French Guiana, Gabon, Ghana, Guadeloupe, Haiti;

Ivory Coast, Jamaica, Kenya, Madagascar, Martinique, Mayotte, Mauritius, Morocco, Mozambique, Nigeria, Reunion, Rwanda, Senegal, South Africa, Swaziland, Tanzania, Tunisia, U Bwongereza na Uganda.

Buri umwe uzatsinda azahabwa igikombe cyahanzwe n’umunye-Congo, Dora Prevost watanze ishusho y’uburyo kigomba kuba kigaragara.

Nigeria n’iyo ya mbere ifite abahanzi benshi bagera kuri 40 bahatanye muri ibi bihembo. Harimo nka Davido, Wizkid, Tiwa Savage, Ayra Starr, Burna Boy, YemiAlade, Fireboy DML na Rema.

Icyiciro cy’umuhanzikazi w’umugore (Best Female Artist) gihatanyemo Soraira Ramos wo muri Cape Verde, Josey wo muri Côte d’Ivoirem, Viviane Chidid wo muri Senegal, Nadia Mukami wo muri Kenya, Tiwa Savage na Ayra Starr bo muri Nigeria.

Umuraperi K.O ahatanye mu byiciro bitatu birimo Best Male, Song of The year ndetse na Best Collaboration. Musa Keys uherutse gukorana indirimbo ‘Who is Your Guy?’ na Tiwa Savage ahatanye muri Best Live, Best Collaboration ndetse na Best Music Video.

Ni mu gihe umuhanzi Pabi Cooper ahatanye mu cyiciro cy’umuhanzi mushya (Best NewComer). Dj Uncles Waffles wo muri Swaziland ahatanye mu cyiciro cya ‘Best Dj’.

Ibi bihembo byitezweho kuzakurikirwa n’abantu barenga Miliyoni 500 mu bihugu 190 byo ku Isi. Kandi amatora ahesha amahirwe buri muhanzi yatangiye kuva ku wa Mbere tariki 21 Kanama 2023.

Yemi Eberechi Alade [Yemi Alade], umuhanzikazi w’imyaka 34 agiye gutaramira i Kigali ku nshuro ye ya mbere. Umwibuke mu ndirimbo nka ‘Bum Bum’, ‘Africa’ yakoranye na Sauti Sol, ‘Shekere’ yakoranye na Angelique Kidjo n’izindi

Mr Eazi, inshuti y’u Rwanda agiye kongera gutaramira i Kigali. Amaze igihe ashyize imbere kuzamura abahanzi bagenzi be- Azwi mu ndirimbo nka Pour Me Water’, ‘Nobody’ n’izindi

Chriss Eazy uhatanye muri ibi bihembo agiye guhurira ku rubyiniro n’abanyamuziki bakomeye muri Afurika

Fireboy DML, umunyamuziki wakoranye indirimbo n’abarimo Ed Sheeran, Asake ategerejwe i Kigali-Arazwi cyane binyuze mu ndirimbo zirimo ‘What if i say’, ‘Vibration’, ‘Bandana’ n’izindi