Author: webrwanda

Rutahizamu wa APR FC, Umunya-Nigeria Victor Mbaoma Chukwuemeka yabwiye abakunzi b’iyi kipe kugumya kubatera imbaraga, bakababa inyuma ko nabo bazakora ibishoboka byose bakabaha ibyishimo kugeza ku munsi wa nyuma wa shampiyona.

Ni amagambo yatangaje mbere y’amasaha make ngo APR FC icakirane na Rayon Sports mu mukino w’abakeba uzaba tariki ya 29 Ukwakira 2023 ukaba ari uw’umunsi wa 9 wa shampiyona ya 2023-24.

Mbaoma uzaba ugiye gukina uyu mukino ku nshuro ya kabiri kuko uheruka ari na we wa mbere yakinnye, Rayon Sports yabatsinze ibitego 3-0, yavuze ko abizi neza abafana baba bahari ku bwabo ndetse ko bakomeza kubashyigikira nabo bazatanga ibyo bafite byose.

Ati 'Buri gihe baba bahari ku bwacu, ndashaka kubashimira cyane ndashaka no kubabwira ko bitararangira, turacyafite akazi ko gukora kandi turacyabakeneye, turifuza kubana nabo kugeza ku mpera z’umwaka w’imikino kandi Imana nidufasha tuzajya buri munsi tubashimisha kuko turabizi ko icyo baba bashaka ari uko tubashimisha dutsinda tuzagerageza kubikora.'

Nta gihindutse uyu rutahizamu umaze gutsinda ibitego 5 mu mikino 4 ya shampiyona iheruka, ni we uzaba uyoboye ubusatirizi bwa APR FC ayishakira ibitego.

Mbaoma yasabye abafana kuza kubashyigikira

APR FC yamaze kwemeza ko umukino wa Rayon Sports izawukinana umwambaro w’amateka akomeye yaherukaga gukinana mu 1996.

Nk’uko iyi kipe y’Ingabo z’Igihugu yabishyize ku rukuta rwayo rwa Twitter, yavuze ko uyu mwambaro ari wo yakinanye ku mukino wa nyuma w’Igikombe cya Gisirikare (Osma) mu 1996 mu mukino wabereye kuri Stade Amahoro, ikaba izawugarura ku mukino w’umukeba, Rayon Sports.

Ni umwambaro w’umukara n’umweru nk’ibara iyi kipe isabzwe yambara ariko ukozwe mu buryo butandukanye n’imyambaro iyi kipe isanzwe ikinisha.

Uyu mukino uzaba ku Cyumweru tariki ya 29 Ukwakira 2023 ubere kuri Kigali Pele Stadium saa 18h00′, uzaba ari umukino w’umunsi wa 9 wa shampiyona y’icyiciro cya mbere mu Rwanda umwaka w’imikino 2023-24.

Ni umukino APR FC izakira iri ku mwanya wa kabiri ku rutonde rwa shampiyona n’amanota 17 inganya na Musanze FC ya mbere ni mu gihe Rayon Sports ari iya 5 n’amanota 12.

Imikino 3 iheruka guhuza aya makipe yomba ikaba yaratsinzwe yose na Rayon Sports aho umukino uheruka wari uwa Super Cup yawutsinze ibitego 3-0.

Uyu ni wo mwambaro APR FC izakinisha ku Cyumweru

Visi Kapiteni w’Ikipe y’Igihugu mu mukino wa Basketball, Ndizeye Ndayisaba Dieudonne [Gaston] yasezeranye imbere y’amategeko n’umukunzi we, Uwase Liliane [Bebe].

Ni umuhango wabaye ejo hashize ku wa Kane tariki ya 26 Ukwakira 2023 ubera mu Mujyi wa Kigali mu Karere ka Gasabo mu Murenge wa Kimihurura.

Nyuma yo kwemeranya kubana akaramata, biteganyijwe ko indi mihango y’ubukwe izaba tariki ya 4 Ugushyingo 2023.

Basezeranye nyuma y’uko tariki ya 20 Kanama 2023 mu birori byabereye muri Treasures of Ikoro mu Mujyi wa Kigali yasabye Ruzindana Liliane ko yazamubera umugore undi arabyemera maze amuha urutoki rwa mukubita rukoko rw’ukuboko kw’ibumoso bamwambika impeta.

Gaston usanzwe ukinira Patriots BBC, aheruka kubwira ISIMBI ko icyatumye amuhitamo mu bandi bakobwa ngo azamubere mama w’abana be ari uko bahuje ibintu byinshi.

Ati 'impamvu namuhisemo ni imico ye. Ni umukobwa nasanze njye na we hari ibintu byinshi duhuje, niyo mpamvu nahisemo ko yazambera mama w’abana banjye.'

Ndizeye Dieudonne Gaston na Uwase Liliane bagiye gukora ubukwe nyuma y’umwaka urenga bari mu buryohe bw’urukundo.

Gaston yasezeranye na Bebe imbere y’amategeko

Ubwo bari bategereje gusezerana gusezerana imbere y’amategeko

Ikipe ya FC Barcelona izaba yakiriye Real Madrid kuri Estadio Olimpico Lluis companys saa kumi n’iminota 15. Uzaba ari umukino wa 255 aba bombi bahura. Real Madrid niyo iyoboye mu gutsinda kenshi kuko yatsinze inshuro 102 naho FC Barcelona yo itsinda inshuro 100, banganya inshuro 52.

Real Madrid igiye gukina uyu umukino ariyo iyoboye urutonde rwa shampiyona ndetse ni nayo yihariye intsinzi mu mikino iheruka kubahuza na FC Barcelona kuko mu mikino 4 yatsinzemo 3, uheruka yayitsinze ibitego 4-1 mu mikino ya 1/2 y’igikombe cya Copa del Rey. 

Ubwo bivuze ko ikipe ya FC Barcelona mu mpera z’iki cyumweru igomba kuza ishaka uko itsinda kugira ngo igerageze kugabanya iki kinyuranyo cyo gutsindwa cyane.

Ni izihe mpinduka zabayeho ku makipe yombi kuva hakinwa El Clasico y’umwaka ushize?

Duhereye ku ikipe ya Real Madrid izakina idafite rutahizamu wayo Karim Benzema werekeje muri Arabia Saudite none kuri ubu iri kugerageza gushakira ibitego kuri Jude Bellingham baguze muri iyi mpeshyi ndetse no kuri Vinicius Junior. 

Iyi kipe kandi izakina uyu mukino mu izamu ryayo harimo Keppa Arrizabalaga waje nawe mu mpeshyi nyuma yuko Thibaut Courtois avunitse ndetse ntabwo izaba ifite na myugariro wayo Eder Miltao wavunitse igihe kirekire. 

Izindi mpinduka ni uko Real Madrid hari n’abandi bakinnyi bashya yinjijemo barimo Fran Garcia na Joselu ndetse n’umutoza Carlo Ancelotti akaba atakigendera kuri Luka Modric mu kibuga hagati.

Ku ruhande rwa FC Barcelona impinduka zimaze kubaho, iyi kipe yaguze abakinnyi barimo Ilkay Gundogan, Joao Felix, Joao Cancelo, Oriol Romeu ndetse na Iñigo Martíne naho abakinnyi nka Sergio Busquets, Jordi Alba and Ousmane Dembélé baragenda.

Uko amakipe yose ahagaze kugeza ubu

Real Madrid igiye kujya muri El Clasico ariyo iyoboye urutonde rwa shampiyona mu mikino 10 bamaze gukina, yatsinzemo imikino imikino 8, inganya uheruka wa Sevilla igitego 1-1 naho itsindwa uwa Atletico Madrid ibitego 3-1. 

Muri shampiyona niyo kipe imaze kwinjizwa ibitego bicye bigera kuri 7 ariko nayo ubusatirizi bwayo buri hasi ugereranyije n’andi makipe arimo Atletico Madrid, FC Barcelona na Girona. Real Madrid imaze kwinjiza ibitego 21 gusa.

Abakinnyi igenderaho mu gutsinda ibitego kugeza ubu muri shampiyona ni Jude Bellingham ufite ibitego 8, Joselu ufite 5, Vinícius Júnior ufite 2 na Rodrygo Goes ufite 1.

Jude Bellingham niwe mukinnyi umaze kwerekana ubudasa muri Real Madrid ndetse no muri Espagne muri rusange kuko kugeza ubu amaze gutsinda ibitego 8 byavuye mu mashoti 22 yagerageje muri shampiyona.

Ku ruhande rwa FC Barcelona, iyi kipe igiye gukina uyu umukino itaratsindwa kuva uyu mwaka w’imikino watangira ariko nayo hari aho yabonye umusaruro udakwiye kuko imaze kunganya inshuro 3, yanganyije 0-0 ku mukino wa Getafe, 2-2 ku wa Mallorca ndetse na 2-2 kuwa Granada.

Mu mikino 7 ya shampiyona, FC Barcelona yatsinze kuva uyu mwaka w’imikino watangira, 5 muriyo yabaga yabanjwe igitego harimo n’ibiri iheruka.

Ku bijyanye n’imvune

Nu bakinnyi bakomeye bose ikipe ya Real Madrid iri kugenderaho muri iyi minsi biteganyijwe ko bazaba bahari usibye Courtois na Eder Miltao bo bavunitse by’igihe kirekire. Na Jude Bellingham wari wagize akabazo gato ku munsi w’ejo yitangarije ko ameze neza.

Ku ruhande rwa FC Barcelona, imaze iminsi ikina hari abakinnyi bayo ba mwamba idafite barimo Lewandowski, Raphinha, Pedri, Jules Kounde na Frenkie de Jong,  ariko biteganyijwe ko Lewandowski na Frenkie de Jong bo bazaba bagarutse ndetse no ku munsi w’ejo bakoze imyitozo.

Ku bijyanye no ku ikipe izatsinda uyu mukino, ikipe ya Real Madrid niyo iri guhabwa amahirwe menshi yo gutsinda ibitego 2-1 cya FC Barcelona.

Ikipe ya Real Madrid iyoboye urutonde rwa shampiyona izaba icakirana na FC Barcelona yo iri ku mwanya wa 2 ikaba iyirusha inota rimwe

FC Barcelona irasabwa gutsinda uyu mukino kugira ngo Real Madrid ireke kugumya kuyisiga

Umukino wa Real Madrid na Barcelona urakurikirwa cyane ku Isi

Myugariro wa Rayon Sports, Nsabimana Aimable aracyafite hafi ibyumweru 3 hanze y’ikibuga kubera imvune y’ino.

Uyu mukinnyi aheruka mu kibuga tariki 30 Nzeri 2023 ubwo Rayon Sports yasezererwaga na Al Hilal Benghazi muri CAF Confederation Cup.

Nsabimana Aimable yagiriyemo ikibazo cy’imvune y’ino yatumye atongera kugaruka mu kibuga, nta n’umwitozo n’umwe arakora bivuze ko n’umukino wo ku Cyumweru tariki ya 29 Ukwakira 2023 wa APR FC azaba adahari.

Amakuru ISIMBI yamenye ni uko Nsabimana Aimable agifite ibyumweru bitatu hanze y’ikibuga ari bwo abakunzi ba Rayon Sports bazongera kumubona mu kibuga.

Nsabimana Aimable yinjiye muri Rayon Sports muri Nyakanga 2023 aho yayisinyiye amasezerano y’umwaka umwe.

Ni umukinnyi wakiniye amakipe atandukanye hano mu Rwanda arimo APR FC, Police FC ndetse na Kiyovu Sports yavuyemo yerekeza muri Rayon Sports.

Nsabimana Aimable aracyafite ibyumweru 3 hanze y’ikibuga

Amerika ivuga ko yagabye ibitero by'indege ku bubiko bubiri bw'intwaro n'amasasu mu burasirazuba bwa Syria, bukoreshwa n'umutwe wa Revolutionary Guards wo mu ngabo za Iran.

Minisitiri w'ingabo w'Amerika Lloyd Austin yavuze ko ibyo bitero byabayeho mu gusubiza ku bitero biherutse kugabwa ku bigo bya gisirikare by'Amerika muri Iraq na Syria byakozwe n'imitwe yitwaje intwaro ishyigikiwe na Iran.

Mu itangazo, yavuze ko ibyo bitero by'Amerika 'bitandukanye n'intambara ikomeje hagati ya Israel na Hamas'.

Iran nta cyo yahise itangaza.

Icyamamare ni umuntu wageze ku bintu runaka ku buryo abantu benshi bamumenya, mu mpande nyinshi z'ubuzima haba muri Politiki, ubuvumbuzi, umuziki, Sinema, imikino, n'ibindi. 

Akenshi imico, imigenzereze, n'ubuzima bw'ibyamamare bikunze kuba akarorero ku bantu benshi, ndetse muri iki gihe abantu benshi bashinja ibyamamare kuba byarahinduye Isi mu nzira mbi bitewe n'ibikorwa bibi bakora bikihuta kwiganwa n'abantu benshi babakunda.

Ariko kandi uretse ibikorwa bibi, ibyamamare hari ibintu byinshi byiza byakagombye kutwigisha kandi bigatuma buri wese abaho neza aho guhora umuntu yigana imico mibi akuye ku cyamamare runaka akunda. Akenshi abaririmbyi, abakinnyi ba filime n'abakinnyi b'imikino inyuranye nibo bashinjwa n'abantu benshi mu kuyobya abantu.

Dore ibintu 5 byiza by'ingenzi abantu bagakwiye kwigira ku byamamare bakunda:

1.Guhorana icyizere ko ejo hawe ari heza

Iyo umuntu asomye amateka y'ibyamamare byinshi, ukareba aho aturuka akenshi wibaza niba ari umuntu ubona ako kanya waciye mu buzima uba wumva. Ibyamamare byinshi haba mu muziki, muri sinema, mu mikino n'ahandi iyo usomye amateka yabo abenshi baba baravukiye mu miryango ikennye cyane ku buryo benshi baba batarabonye amahirwe yo kugera mu ishuri cyangwa kubaho ubuzima bwiza bakiri bato.

Ayo mateka y'umuntu uba yarabaye ku muhanda nta n'igiceri cy'ifaranga afite mu mufuka ariko ukaba umwumva, waramumenye afite amafaranga menshi n'ubuzima bwiza kubera icyo yakoze kikamugira uwo ariwe wamenye, byagakwiye kukubera urugero ko icyizere kiruta byose mu buzima.

Ntuhangayikishwe n'uko ubayeho mu bukene cyangwa mu buzima bubi uyu munsi, ahubwo ugahanga amaso imbere kuko ni heza cyane. Ibi ariko ntabwo uzabishobozwa no kureba imbere gusa, ahubwo ugomba gukora kugira ngo uhagere.

2. Kubyaza umusaruro impano wiyumvamo

Impamvu tumenya ibyamamare ni uko baba bariyumvisemo impano maze bagaharanira kuyizamura no kuyibyaza umusaruro. Impano ni ikintu gikomeye, gishobora kukugeza kure haba mu buzima ndetse no mu gutanga urugero ku bandi bantu. Iyo upfukiranye impano wiyumvamo, uba wiyimye amahirwe yo kubaho neza ejo hazaza ndetse wimye amahirwe abantu benshi yo kukwigiraho byinshi.

3. Kugira umutima utabara

Ni kenshi twumva ibyamamare byakoze igikorwa cyo gufasha. Si uko baba bayobewe ko ayo mafaranga batanze abavuye mu mufuka baba bashobora kuyakoresha ibindi bintu byabagirira akamaro ku giti cyabo. Nk'iyo abahanzi bifatanyije bagakorera hamwe indirimbo cyangwa igitaramo cyitiriwe ibikorwa runaka byo gufasha, kiba ari igikorwa cy'inyamibwa kandi Imana n'abantu barabashimira.

Ni ikintu cyiza cyo kwigira ku byamamare, nawe waba ufite ubushobozi runaka ukaba wafasha abantu uzi bababaye gusa kuko wabyigiye kuri wa muntu wakunze, ariko kandi ni nako imigisha iba iri kwinjira.

4. Kwigirira icyizere by'umwihariko igitsina-gore

Abantu b'igitsina-gore ni abantu bagiye bahezwa inyuma n'amateka y'ibihugu binyuranye ku Isi bitewe n'imico na kirazira byagiye biranga imico y'ibihugu. Ariko kandi ku bantu b'igitsinagore bagakwiye gufatira urugero ku bagore bagenzi babo bagiye bamenyekana nabo bagahaguruka bakabigiraho gukora bakiteza imbere cyane ko ibyo byamamare biba byarahagurukiye ku mpano byiyumvagamo, rimwe na rimwe ugasanga nta n'ikintu bafite baheraho mu buryo bw'ubukungu.

Nti byaba ari ibintu byiza nko kuba nk'umugore wasoma amateka ya Oprah Winfrey ukayasiga aho. Nyamara yakabaye urugero rwo guhaguruka nawe ukagera ikirenge cyawe mu cye ukiteza imbere ndetse ukanateza igihugu n'isi muri rusange imbere.

5. Kwiga kuvugira mu ruhame

Ibyamamare ni abantu bakunze kugaragara mu ruhame rw'abantu benshi cyane, aho baba bageza ku bantu ibibarimo bahabwa n'impano zabo. Kuba umuririmbyi aririmbira imbaga y'abafana, umukinnyi mu mukino runaka agakirinira muri sitade yuzuye abafana ibihumbi n'ibihumbagiza, umunyapolitiki agahagarara imbere y'imbaga y'abantu agatanga ibitekerezo bye, ni ikintu cyagakwiye kudusigaramo natwe tukakiga.

Kuvugira mu ruhame si abantu bose babishobora bitewe n'isoni umuntu ashobora kugira ariko iyo ufatiye urugero ku muntu w'icyamamare ukunda, wabigeraho kuko ibyo ukora byose uba ugerageza kumugenderaho.

Uyu muhanzi ubarizwa muri Label ya 'One Percent Entertainment' yatangaje ibi nyuma y'uko ashyize hanze iyi ndirimbo mu ijoro ryo kuri uyu wa Kane tariki 26 Ukwakira 2023.

Platini yabwiye InyaRwanda ko mu minsi ishize ubwo yari ku rubuga rwa Youtube areba ibikorwa binyuranye, yabonye amashusho agaragaza Linda Montez ahatanye mu irushanwa The Voice, yumva ni umukobwa ufite impano yo guhanga ijisho.

Yavuze ati 'Linda ni umukobwa numvise muri The Voice, numva ni umuhanga ariko byaje kunshimisha numvise ari umunyarwandakazi ni uko nguko nyine namuhisemo.'

Platini avuga ko uwo munsi ari bwo yiyemeje gukorana indirimbo na Linda Montez, kandi avuga ko yarebye mu ndirimbo yari asanzwe afite aba ariyo bakorana. Akomeza ati 'Namwumvise muri The Voice, numva aririmba neza, numva afite ijwi ryiza.'

Uyu muhanzi avuga ko ubwo yakoraga indirimbo 'Mbega Byiza', yatumiye muri studio Linda Montez kugirango yumve uko imeze, maze amufasha mu majwi bigera n'aho bakorana iyi ndirimbo 'Same as me' basohoye mu ijoro ry'uyu wa Kane.

Platini avuga ko muri iki gihe nk'umunyamuziki afite byinshi ahugiyemo, birimo nko gutekereza uko yakora igitaramo cye bwite ndetse na Album ye muri rusange.

Uyu muhanzi anavuga ko atekereza ku kuba yakora ibitaramo bitandukanye bizenguruka u Rwanda, nyuma y'ibitaramo aherutse gukorera mu bihugu bitandukanye byo ku Isi.

Ati 'Nagize amahirwe yo gukora ibitaramo hanze, ariko sindabikora mu Rwanda, sindakora album, sindakora igitaramo cyanjye bwite, ibyo byose ni imishinga, ariko sinavuga umunsi n'isaha, ni ibintu Imana izamfashamo. Nibigera igihe cyo kubimurikira abantu, nzabibwira abantu.'

Platini yaherukaga gusohora indirimbo 'Icupa', 'Ijana ku ijana', 'Slay Mama' n'izindi ziri kuri Extended Play (EP) ye ya mbere. Ni mu gihe Linda Montez yaherukaga kumvikana mu ndirimbo 'Slown Down' na Uncle Austin, 'Kure', 'Naje' n'izindi.     

Platini yasohoye amashusho y'indirimbo 'Save Me' yakoranye na Linda Montez

Platini yavuze ko The Voice ariyo yabaye imbarutso yo kuba yarakoranye indirimbo na Linda Montez

Linda Montez amaze igihe ahatanye mu irushanwa The Voice rigamije gushyigikira impano zo muri Afurika

Linda ari mu bagize uruhare mu ndirimbo 'Mbega byiza' ya Platini

KANDA HANO UREBEAMASHUSHO Y'INDIRIMBO 'SAME AS ME' YA PLATINI P NA LINDA MONTEZ