Author: webrwanda

Ni mu rwandiko ishyirahamwe ry’umupira w’amaguru ryandikiye aya makipe agera kuri 13 tariki 6 Ukuboza uyu mwaka. Aya makipe ni Indahangarwa WFC, Gatsibo Nasho, Sporting Academy, Tigers, Ndabuc, APAER, Fatima, Bridge, Kayonza, As Kabuye, Macuba UR CMHS, na IPM.

Aya makipe yagombaga guhabwa na FERWAFA amafaranga yo kwitabira imikino y’abakiri bato, angana na Miliyoni 1 na Maganatanu, gusa FERWAFA iza kwibeshya itanga hafi miliyoni eshatu (2,851,683 Frw). 

Mu rwandiko FERWAFA isaba aya makipe ko agomba gusubiza amafaranga asaguka kuri miliyoni n’igice bari bemerewe, akaba angana na 1,351,683 FRW. FERWAFA ivuga ko ikipe itazasubiza aya mafaranga, izayiyishyura ku mafaranga bahabwa ya shampiyona.

Shampiyona y’icyiciro cya kabiri mu mpera z’iki cyumweru hazatangira imikino yo kwishyura, aho buri kipe izahabwa miliyoni imwe n’igice. Ibi bivuze ko aya makipe aramutse akaswe, hari ikipe yazakina imikino yo kwishyura ikoresheje ibihumbi bitagera kuri 300 by’Amanyarwanda.

Bamwe mu bayobozi b’aya makipe basaba ko FERWAFA yareka kubaka ayo mafaranga ahubwo akazakurwaho umwaka utaha kuko hari n’igihe ingengo y’imari yaba yariyongereye. 

Ku wa Gatatu tariki 6 Ukuboza 2023, Kendrick Lamar, umunyamuziki uri ku rutonde rw'abaraperi 50 b'ibihe byose ku Isi, yakoze 'Performance' yo ku rwego rwo hejuru, mu gitaramo cya mbere yari akoreye mu gihugu cya mbere cyo ku Mugabane wa Afurika yari agezemo bwa mbere.

Uyu mugabo ari kumwe n'umuryango we bahagurutse ku kibuga cy'indege Mpuzamahanga cya Kigali, ku gicamunsi cyo kuri uyu wa Kane tariki 7 Ukuboza 2023 yerekeza mu gihugu cya Afurika y'Epfo aho afite igitaramo gikomeye.

Ni umwe mu baraperi beza Isi ifite muri iki gihe. Igitaramo cye mu Rwanda kitabiriwe n'abarenga ibihumbi icyenda barimo Perezida Paul Kagame na Madamu Jeannette Kagame.

Imibare yerekane ko abarenga ibihumbi umunani ari bo bazaguze amatike mu gitaramo, yaguraga ibihumbi 50 Frw, ibihumbi 20Frw ndetse n'ibihumbi 85 Frw.

Mu gihe cy'iminota 84' yamaze ku rubyiniro, uyu muraperi yisunze indirimbo ze zirimo nka 'She Needs Me', “Behind betrayal”, “Bitch, Don't Kill My Vibe”, 'Loyalty', ava ku rubyiniro abantu bakinyotewe no gutaramana nawe.

Imibare yatangajwe n'Urwego rw’Igihugu rushinzwe kureberera no gutegura inama ‘Rwanda Convention Bureau' (RCB), igaragaza ko abantu barenga 1000 bahawe imirimo inyuranye mu gitaramo cya Kendrick Lamar muri BK Arena.

RBC yavuze ko abanyarwanda 1000 bahawe akazi mu itsinda ryategura imigendekere y’igikorwa kuva gitangiye kugeza ku musozo wacyo.

Abandi bahawe akazi ni ababyinnyi b'abakobwa n'abasore ndetse n'abahanzi bose hamwe bagera kuri 70 bigaragaje muri iki gitaramo kitabiriwe n'urubyiruko rwinshi.

Igitaramo cya Kendrick Lamar kandi cyafashije urubyiruko 30 kubona amahugurwa ashamikiye ku mirimo bakorana inyuranye.

RCB yanavuze ko uburyo urubyiniro rwari rwarimbishijwe n'ahandi hose hari hateguye muri BK Arena byagizwemo uruhare n'abanyabugeni 20 b'abanyarwanda bahawe akazi.

Hejuru y'ibyo kandi abategura n'abatunganya filime 15 bo mu Rwanda bahawe akazi muri iki gitaramo.

Kendrick Lamar yahuriye ku rubyiniro n'abahanzi barimo Bruce Melodie, Ariel Wayz ndetse na Zuchu wo muri Tanzania.

Ariel Wayz yanditse kuri konti ye ya Twitter, agaragaza ko yatewe ishema no kuririmba mbere y'uko Kendrick Lamar agera ku rubyiniro.

Mu ijambo yagejeje ku bitabiriye iki gitaramo, Perezida Kagame yavuze ko iki gitaramo cya Kendrick Lamar cyateguwe na Global Citizen ari 'uburyo bwiza bwo gusoza umwaka…na muzika, n'imbaraga, n'icyizere.'

Chairman wa APR FC, Lt Col Richard Karasira yavuze ko bishimiye umusaruro w’umutoza Thierry Froger kuko ubu bayoboye urutonde rwa shampiyona kandi ikipe ikaba ikina neza.

Ni nyuma y’uko abenshi mu bakunzi ba APR FC binubira umusaruro w’umutoza aho mu mikino 4 iheruka yatsinzemo umwe anganya imikino 3.

Chairman wa APR FC, Lt Col Richard Karasira yavuze ko umutoza bafite bamwishimiye cyane ko ikipe iyoboye urutonde kandi ko na none utapfa guhindura umutoza mu gihe gito.

Ati “Umutoza dufite turamwishimiye, ni uwa mbere muri shampiyona. Mu mezi ane cyangwa atanu amaze hari ikipe murabona iza igakina ikaturusha? Ni uwa mbere arayabonye, afite ubwugarizi bwiza, ubusatirizi ni aba kabiri, na we arabyivugira, nk’abantu mukunda umupira mujye mudufasha, ntabwo umutoza umuhindura mu mezi angahe, n’uwabitekereza yaba atazi ibyo ari byo, ntabwo turi ikipe umuntu abyuka akavuga ngo vaho ugende.'

Lt Col Richard Karasira yakomeje avuga ko uyu mutoza w’umufaransa agomba gukora agasoza amasezerano ye, ibindi bikazarebwaho nyuma.

Ati “Tugomba kumuha umwanya we, afite amasezerano ye y’umwaka azawukora kandi uwusoze, umukorera isuzuma na we afite uburenganzira, nk’umufana kuko aba arakaye ashobora kutamwishimira.'

Ku bimaze iminsi bivugwa ko Froger afitanye ikibazo n’abakinnyi barimo Sharaf Shiboub ndetse na myugariro Salomon Banga Bindjeme akaba ari na yo mpamvu badakina, yavuze ko ibyo nabyo atari byo.

Ati “Ibyo muvuga by’amakimbirane sinzi aho abantu babivana. APR ifite abanyamahanga umunani hagomba gukina batandatu, ni ibyo, hari babiri bazicara hanze ubikunda utabikunda, kwicara hanze ni ukubera uko witwaye mu myitozo, ni ukubera muri uwo mwanya ikibazo ufite.'

“Uvuze amakimbirane ubwo ntibaba bakora n’imyitozo kuko umutoza yakwirukana, kuba witoza ntagukinishe ubwo hari haba hari impamvu, ni amahitamo ye, na we uje ushobora gukinisha kanaka ukareka kanaka.'

Yavuze ko abafana kuba bagaragaza akababaro ka bo yabumva kuko icyo baba bakenye ari intsinzi ariko na none baba bakwiye kumenya uko bakwitwara muri ako gahinda ka bo.

Chaiman wa APR FC, Lt Col yavuze ko nta kibazo kirimo

Shampiyona y’icyiciro cya mbere mu Rwanda (Rwanda Premier League) yamaze kubona umuterankunga uzajya uhemba abakinnyi n’abatoza bitwaye neza ku kwezi ndetse n’umwaka aho bifite agaciro ka miliyoni 150 z’amafaranga y’u Rwanda.

Uyu muterankunga akaba ari Sosiyete y’imikino y’amahirwe imenyerewe mu Rwanda ya Gorilla Games.

Ni amasezerano yashyizweho umukono ejo hashize ku wa Kane tariki ya 7 Ukuboza 2023 na perezida w’akanama k’ubutegetsi ka shampiyona y’u Rwanda, Mudaheranwa Hadji Yusufu n’umuyobozi wa Gorilla Games, Brian Nkuru.

Ni amasezerano azamara imyaka 3 ariko ishobora kongerwa mu gihe imikoranire yagenda neza.

Hazajya hahembwa ibyiciro 4 mu bihembo by’ukwezi; umukinnyi w’ukwezi azajya ahabwa miliyoni 1 y’amafaranga y’u Rwanda, umutoza w’ukwezi ahembwe ibihumbi 300 by’amafaranga y’u Rwanda, umunyezamu wakuyemo umupira ukomeye w’ukwezi “Save of The Month” azajya ahembwa ibihumbi 300 by’amafaranga y’u Rwanda ndetse n’igitego cy’ukwezi kizajya gihembwa ibihumbi 300 Frw.

Ibihembo by’umwaka biri mu byiciro 9 aho uwatsinze ibitego byinshi “Topscorer” azajya ahembwa miliyoni 3 Frw, umukinnyi w’umwaka (MVP) azahembwa miliyoni 3Frw, umutanze imipira myinshi yavuyemo ibitego azajya ahembwa miliyoni 2 Frw, umunyezamu w’umwaka azajya ahembwa miliyoni 2 Frw.

Umutoza w’umwaka azajya ahembwa miliyoni 1.5 Frw, umukinnyi mwiza ukiri muto azajya ahembwa miliyoni 1 Frw, igitego cy’umwaka kizajya gihembwa ibihumbi 750 Frw, ikipe y’umwaka (11 kongeraho n’umutoza) bazajya bahembwa miliyoni 3.3 Frw bayagabane ni mu gihe umusifuzi w’umwaka azajya ahembwa miliyoni 1 Frw.

Uretse aya mafaranga azagenda mu bihembo, umuyobozi wa Board ya Shampiyona y’u Rwanda, yavuze ko iyi sosiyete y’imikino y’amahirwe izajya yishyura miliyoni 50 z’amafaranga y’u Rwanda ku mwaka muri “Rwanda Premier League” adafite aho ahuriye n’ibi bihembo, muri rusane izajya isohora miliyoni 150 ku mwaka.

Gutora bikaba bizajya bikorerwa ku mbuga nkoranyambaga ndetse n’akanama nkemurampaka kazashyirwaho.

Gorilla Games ni yo izajya ihemba abitwaye neza muri shampiyona

Mu mpera z’icyumweru gishiza, B Threy na Davis D bari bategerejwe muri Kaminuza y'u Rwanda ishami rya Huye mu gitaramo cyiswe University Connect Festival cyari kubera mu nzu y’imyidagaduro ya Main Auditorium. 

B Threy yageze muri Kaminuza kare ndetse akorera ikiganiro kuri Radio Agaciro ikorera kuri Kaminuza avuga ko amanukanye imbaraga nyinshi agiye guha ibyishimo abafana be mu mvugo ye wumvaga ko yari azi ko ari benshi baza kwitabira icyo gitaramo. 

Nyuma y’uko barungurutse muri Main Auditorium bagasanga harimo abantu batarenze batatu, B Threy na Davis D bahise banyerera baburirwa irengero nyuma y’uko batari kuririmbira abantu batarenze batanu bari bageze muri Main Auditorium.

Nyuma yo kuba igitaramo ku mbuga nkoranyambaga, B Threy yashyize agira icyo avuga ku gitaramo cyabo cyapfuye bahageze abantu bakanga kwitabira, yegeka amakosa kuri Kaminuza ko yahagaritse igitaramo itababwiye nubwo ayo makuru yabaye mashya ku buyobozi bwa Kaminuza butazi uwahagaritse icyo gitaramo kandi Salle bagombaga gutanga barayitanze.

Mu butumwa B Threy yanyujije ku rukuta rwe rwa X, yagize ati “Hari ikibazo cyabaye ku wa Gatanu muri iyo Weekend ubuyobozi bwa Kaminuza buhagarika icyo gitaramo batatumenyesheje. Bavuga ibyo bashaka ariko uwateguye igitaramo yakoze ikosa ryo kudatangaza impamvu. “

Ku wa Gatanu ubwo bari mu myiteguro y’iki gitaramo cya Davis D na B Threy, muri Kaminuza habonetse umwana w’umukobwa wakuyemo inda umwana akamuta ahashyirwa imyanda akaza kumenyekana nyuma.

Ibyo kuko byabaye habura iminsi mike ngo igitaramo kibe, nibyo B Threy yagendeyeho yegeka amakosa kuri kaminuza ko yahagaritse igitaramo batabamenyesheje kandi iyo iza kugihagarika ntibari gutanga salle bagashyiramo ibyuma kugeza ubwo hinjiye abantu batatu gusa.

Iyo kaminuza iza guhagarika igitaramo, ntabwo bari kwemererwa kwinjira kuko iyo utari umunyeshuri winjira uvuze icyo ugiye gukora muri Kaminuza yewe bakakurangira inzira wacamo ukabasha kubona serivisi ukeneye muri iyi Kaminuza.

Uretse ibyo, ntabwo igitaramo cya Davis D na B Threy cyari giteje ikibazo bitewe n’ibyari byabaye muri Kaminuza nk’igitaramo cya Isango na Muzika Award Tour 2023 cyabereye muri iyi kaminuza ku munsi umwe ibyo bibazo byari byabereyeho.

Kugira ngo tumenye ukuri niba koko Kaminuza yaba yarahagaritse iki gitaramo, InyaRwanda twavugishije umuyobozi uhagarariye abanyeshuri muri Kaminuza y'u Rwanda ishami rya Huye, atubwira ko ibyo atari ukuri igitaramo cyari gikomeje kuko ibyo basabwaga byose babikoze.