Author: webrwanda

Nyuma y’iminsi hafi 20 abazwe, Haruna Niyonzima yasubukuye imyitozo mu ikipe ye ya Al Ta’awon muri Libya.

Tariki ya 7 Ukuboza 2023 ni bwo uyu mukinnyi yabazwe uburwayi bwo mu nda ku mara, ni nyuma yo kumara igihe yumva aribwa.

Kubagwa bygenze neza ari nayo mpamvu yanakize vuba akaba yaratangiye imyitozo na bagenzi be mu ntangiriro z’iki cyumweru.

Haruna Niyonzima yatangiye gukinira iyi kipe muri Mutarama 2023 ubwo yari avuye muri AS Kigali, ni ikipe yagiriyemo ibihe byiza cyane ko kuva yayigeramo ari umukinnyi ntasimburwa ku mwanya we.
Al Ta’awon SC ni ikipe yashinzwe mu 1960.

Ikinira kuri Stade ya Benina Martyrs [yahinduriwe izina iba Hugo Chávez Football Stadium kuva mu 2011] yakira abantu 10.550 mu Burasirazuba bw’Umujyi wa Benghazi.

Iyi Album yujuje umwaka iri ku isoko, kuko yagiye hanze muri Mutarama 2023. Uyu munyamuziki yahuje ibihumbi by'abantu barimo Umunyamabanga mukuru w’Umuryango mpuzamahanga w’ibihugu bikoresha ururimi rw’Igifaransa (OIF), Louise Mushikiwabo.

Iki gitaramo gakondo yagikoze mu ijoro ryo kuri uyu wa Kabiri tariki 26 Ukuboza 2023 mu Intare Conference Arena, aho yari amaze amezi arenga abiri akitegura, ashyigikiwe n'abarimo Sosiyete y'Itumanaho ya MTN Rwanda.

Yagihuriyemo n'abandi bahanzi barimo Mike Kayihura bakoranye indirimbo 'Rasana' ndetse na Gatore Umukondo uzwi cyane mu bihame by'Imana.

Ruti Joël, umuhanzi ngombwa muri gakondo

Ruti Joel yinjiye byihariye muri iki gitaramo, kuko yari kumwe n'ababyinnyi bamufashaga gutanga ibyishimo. Uyu musore yatangiriye mu ndirimbo ye yise 'Rumata' yasohoye mu 2021, akomereza ku ndirimbo ye yamamaye yise 'Oulala'.

Yacurangiwe n'abacuranzi b'abahanga barimo abari kuri gitari, kuri Piano n'abandi bari bitwaje Saxophone. Kandi yari afite abaririmbyi bamufashaga kunoza imiririmbire ye. Ku rubyiniro kandi yari kumwe na Producer Clement umufasha igihe kinini mu bitaramo binyuranye akora.

Uyu musore yagaragaje ko ari umuhanzi wo kwitega mu muziki gakondo, kuko yanabishimangiye ubwo yabyinaga gakondo afatanyije n'ababyinnyi yari yitwaje.

Ibi byatumye abari muri iki gitaramo bahagaruka, buri wese afatanya nawe kubyina Kinyarwanda. Yageze ku ndirimbo enye za mbere, ataravugisha abakunzi be, uretse kuririmba gusa kugeza ageze ku ndirimbo ya gatanu yise 'Nyambo'.

Yagize ati 'Muraho cyane! Kuriya kwari ukubaramutsa kwanjye! Mwakoze kuza kundeba, biranejeje. Ibi bikorwa n'abantu batowe. Iki gitaramo reka tugiture umwami w'abami.'

Nyuma yo kuramutsa abakunzi b'ingano be, yakoremeje ku ndirimbo yise 'Rumuri rw'itabaza' yasohoye ku wa 9 Gicurasi 2020. Iyi ndirimbo ye yayitangiriyeho urugendo rw'umuziki, yatumye abantu benshi batangira kumuhanga ijisho kuva icyo gihe.

Ni indirimbo yacengeye mu buryo bukomeye, kuko ibihumbi by'abantu bari bateraniye mu Intare Conference Arena bifatanyije mu kuyiririmba no kuyibyina.

Yakomereje ku ndirimbo ye yise 'Rasana' yashyize hanze ku wa 14 Gicurasi 2021, ayikoreye mu bice bitandukanye byo mu Rwanda. Iyi ndirimbo bigaragara ko yayanditse afatanyije na Mike Kayihura, mu buryo bw'amajwi ikorwa na X-on the Beat.

Uyu munyamuziki yanyuzagamo akabyina mu buryo bugezweho, ubundi akabivanga na gakondo mu rwego rwo gutanga ibyishimo muri iki gitatamo.

Mike Kayihura yamuhaye Bizu! Yakozwe ku mutima n'uburyo iyi ndirimbo Ruti Joel yayiririmbye maze amusanga ku rubyiniro, bafatanya kuyiririmba.

Mbere yo gutangira kuyiririmba, yamuhobereye cyane aramuterura, ubundi amuha akabizu ko mu kirere.

Ruti yagaragaye bwa mbere yicurangira gitari, avuga ko ari kimwe mu bicurangisho yubaha cyane, kandi yize.

Yabanje kubaza abitabiriye iki gitaramo, niba harimo abazanye n'abakunzi b'abo, abaza niba Uwicyeza Pamella ahari. Yavuze ko asigaje gutangaza umukunzi we. Ati 'Niryo sasu nsigaje ngirango.'

Ruti Joel yagiye guhindura imyambaro agaruka mu myenda yiganjemo ibara ry'umukara. Yinjirira mu ndirimbo 'Nyambo' yakunzwe kuri Album ye.

Yongeye gusubira guhindura imyambaro, agaruka yambaye umwitero w'ibara ry'umweru, yinjirira mu ndirimbo ye yise 'Gaju' yakunzwe cyane kuri Album ye.

Uyu muhanzi yanakomereje ku ndirimbo yitwa 'Cunda' yifashisha ababyinnyi b'intore, abakobwa n'abacuranzi ndetse n'abaririmbyi ubundi agaragaza ko ari umuhanzi wo kwitega.

Izi ndirimbo yaziririmbye mu buryo bwa Live, akagenda yongeramo udukeregeshwa, byatumye abitabiriye iki gitaramo bizihirwa mu buryo bukomeye.

Byageze ku ndirimbo 'Akadege' ndetse na 'Amaliza' ibintu birahinduka, kuko abafana be bamutanze kuziririmba, ubundi agendana n'abo mu murongo.

Muri iki gitaramo kandi yaririmbye indirimbo z'abarimo Sentore Athanase, ndetse n'iyo mu muryango w'Abatangana. Akomereza ku ndirimbo 'Musomandera' yitiriye Album ye, ageze kuri iyi ndirimbo yagiye kureba umubyeyi we aho yari yicaye, ubundi barabyinana.

Ruti Joel yunamiye Buravan:

Yaririmbye indirimbo ye yise 'Twaje' mu rwego rwo kumwunamira no kumuha icyubahiro amugomba nk'umuhanzi bakoranye igihe kinini.

Muri iki gitaramo kandi, Ruti Joel yamuritse indirimbo 'VIP' umuhanzi Yvan Buravan yasize akoranye n'umuraperi Ish Kevin uri mu bagezweho muri iki gihe.

Iyi ndirimbo asoje kuyigaragaza, yasabye abitabiriye iki gitaramo gucana urumuri rwa telefoni mu rwego rwo guha icyubahiro Buravan, ubundi aririmba indirimbo ye yamamaye 'Aye Ayee'.

Ruti Joel yavuze ko agomba icyubahiro Buravan nk'umuhanzi bakoranye igihe kinini, kandi wagize uruhare rukomeye kuri Album ye. Ruti ati 'Murishimye cyane. Murakoze ku bw'urukundo.'

Ubwo yashyiraga hanze Album ye 'Musomandera', Ruti yumvikanishije uburyo yatoye umuco w'intore, ndetse anabigaragaza ku mbuga nkoranyamba ze.

Yifashishije ifoto ye imugaragaza ari mu ngamba nk'intore yavuze ikivugo cye, agira ati 'Ndi ruti mu ngeri baririmba rwamwaga mu ngabo iyogeye ingabo y'Inkotanyi umukogoto wa marere ngira ingoga sintinda ngira imbaraga simbashwa.'

Aherutse kubwira InyaRwanda ko iki gitaramo yacyise 'Musomandera' mu rwego rwo gushimira umubyeyi we byihariye wamutoje inzira y'ubutore.

Ati 'Ndi Rumata wa Musomandera, kandi Rumata aracyari muto, Musomandera arakuze. Ubwo rero azaba ari igitaramo kiririmbira, gihuza urungano rw'abatubyaye n'abo tungana ubu ngubu, niyo mpamvu nacyise 'Rumata wa Musomandera'.'

Ku rubyiniro Ruti Joel yabimburiwe n'abahanzi bagenzi be muri gakondo

Igitaramo cyatangijwe ahagana saa 18:40' gifunguwe ku mugaragaro na Gatore Umukondo winjiriye mu ndirimbo zitsa cyane ku byivugo bya Kinyarwanda.

Yagaragaje ko ari intore byahamye, kuko yivuze mu gihe cy'iminota irenga 20 ashimisha benshi. Yizihiye benshi ubwo umwe mu bana bakiri bato yamusanganiraga ku rubyiniro, maze baranzika bari mu ngamba nk'izindi ntore ziose.

Gatore yanyunyijemo yifuriza abitabiriye iki gitaramo kuzagira umwaka Mushya Muhire wa 2024. Yavuze ati 'Umwaka uzababere uw'umugisha. Mwakoze gushyigikira Ruti wa Musomandera.'

Yikije kandi ku ndirimbo yagarukaga ku kurata Inkotanyi, hari nk'aho yagize ati 'Inkotanyi ni nziza. Inkotanyi ntihusha, babitojwe. Wowe uzi ikibibatera, wabitojwe cyera. Inkotanyi ntihusha mu gihumbi. Mama we….'

Yakurikiwe na Mike Kayihura wamamaye mu ndirimbo zinyuranye. Akigera ku rubiniro, yavuze ko yishimiye gufasha Ruti Joel muri iki gitaramo. Yavuze ati'Ndishimye gutarama nawe Ruti Joel mu gitaramo. Muri beza, byahuye n'ubwiza.'

Yinjiriye mu ndirimbo ye yise 'Any time' yakomeje izina rye, ayisoje ashima abitabiriye iki gitaramo ku bwo gushyigikira Ruti Joel. 

Yavuze ati 'Ndashaka kubashimira mwese mwaje muri iki gitaramo, ni inkunga ikomeye ku buhanzi.' Akomeza ati 'Hari abantu bari kubireba, ni byiza rwose, mwakoze mwese kuza.'

Mike Kayihura yaririmbye kandi indirimbo yise 'Iminsi', ubundi avuga ko Ruti Joel amaze iminsi amugira inama yo kujya aririmba anicurangira Piano. Yavuze ko bitewe n'ubuzima abanamo na Ruti ari inshuti ndetse n'umuvandimwe.

Uyu muhanzi yanaririmbye indirimbo ye yise 'Vuba Vuba', ayisoje ati 'Nshuti zanjye, muratangaje.' Yanaririmbye indirimbo ye yise 'Tuza' yakunzwe cyane, ava ku rubyiniro ashima uko yakiriwe.

Ibyo wamenya kuri Ruti Joel

Ruti ni umusore w'urubavu ruto wakuriye iruhande rwa Massamba Intore na Jules Sentore bamuharuriye urugendo rw'umuziki we. Byasembuwe no kuba umwe mu bagize Gakondo Group n’itoreri Ibihame anywana n'umuco kuva ubwo.

Ijwi ry'uyu musore ryumvikanye mu ndirimbo 'Diarabi' yakoranye na Jules Sentore ndetse na King Bayo witabye Imana.

Ni indirimbo nawe avuga ko yamwaguriye amarembo y'umuziki, abatari bamuzi batangira kubazanya ngo uwo musore ni nde w'ijwi ryiza!

Muri Gashyantare 2019 yashyize hanze amashusho y'indirimbo 'La vie est belle' yasubiyemo y'umuhanzi w'umunyabigwi mu muziki Papa Wemba. Iyi ndirimbo yumvikana mu rurimi rw'Igifaransa n'Igiswahili.

Uyu musore avuga ko gukurira muri Gakondo Group byamufashije kumenya kubyina no guhamiriza mu Ibihame Cultural Troupe yigiramo imibyinire gakondo n'ibindi.

Urugendo rw'umuziki we yarushyigikiwemo na Masamba Intore wamuhaye album z'indirimbo ze azigiraho kuririmba ndetse ngo rimwe na rimwe bakoranaga imyitozo yo kuririmba.

Ruti Joël avuga ko inzira ye y'umuziki yaharuwe n'ababyeyi bakuru muri gakondo, kugeza ubwo nawe ayisanzemo abyirukana n'abandi basore b'Ibihame.

Avuga ko gutegura Album ye 'Musomandera' byamusabye kwisunga aba Producer b'abahanga barimo nka X on the Beat na Bo Pro ndetse n'abahanzi barimo Buravan.

Album ye igizwe n'indirimbo 10 zirimo; Rwagasabo, Musomandera, Ibihame, Nyambo, Gaju, Cunda, Akadege, Amaliza, Murakaza n'Ikinimba.

Ruti asobanura ko yatangiye afite igitekerezo cyo gukora Album yise 'Rumata' ariko birangira ahinduye Album ayita 'Musomandera' kubera uruhare rwa Buravan.

Yavuze ko Album 'Rumata' yari kuba iriho indirimbo za gakondo ndetse n'indirimbo z'umudiho ugezweho. Akomeza ati 'Kubera umuvandimwe wanjye Buravan niwe wangiriye inama ati ndashaka kugirango uyikore mu buryo bwa gakondo gusa, ndamwemerera ndayikora.'

Rumata avuga ko ubwo yateguraga igitaramo yongeye gutekereza ku izina rya Album, asanga afiteho indirimbo 10 zisanzwe (modern) ndetse n'indirimbo 10 z'umudiho ugezweho biba 'Rumata wa Musomandera'.

Uyu munyamuziki yavuze ko ashingiye ku ruhare Buravan yagize kuri Album ye, abifata nk'isezerano bagiranye ryo kumugaragaza buri hantu hose azataramira.

Ruti Joel yitaye ku kuririmba nyinshi mu ndirimbo ze zirimo ‘Cyane’ yamamaye imaze umwaka isohotse

Ruti yagiye anyuzamo akajya mu bitabiriye iki gitaramo agafatanya n’abo kuririmba zimwe mu ndirimbo ze 

Umunyamabanga wa OIF, Louise Mushikiwabo yitabiriye igitaramo cya Ruti Joel


Mike Kayihura yakozwe ku mutima n’uburyo baririmbanye indirimbo bise ‘Rasana’

Mike Kayihura yahuriye ku rubyiniro na Ruti Joel nyuma y’igihe kinini-Muri iki gitaramo bagiye bibutsa byinshi mu biranga umuco w’u Rwanda

Mike Kayihura na Ruti Joel ku rubyiniro ku munsi udasanzwe mu buzima bw’abo

Umutima wishimye kuri Ruti Joel nyuma yo kumurika Album ye ya mbere yatuye umubyeyi we

Ruti Joel yagaragaye ku nshuro ya kabiri yicurangira gitari mu gitaramo

Clement the Guitarist, inshuti y’igihe kirekire ya Ruti Joel yamucurangiye gitari, ubundi bakanafatanya kubyina zimwe mu ndirimbo ze

Ruti Joel yataramiye ibihumbi by’abantu mu gitaramo cyabereye mu Intare Conference Arena i Rusororo

Ruti asobanura ko iyi Album yagizweho uruhare n’umunyamuziki Yvan Buravan witabye Imana

Ruti Joel yabanje kuririmba indirimbo enye, maze asuhuza abitabiriye iki gitaramo mu buryo bwihariye

Mu gice cya mbere cy’iki gitaramo, Ruti Joel yaserutse yambaye imyenda y’ibara ry’umweru

Ruti Joel yamuritse Album ye, atangaza ko ari intambwe ikomeye ateye mu buzima bwe

Ruti Joel yakoresheje imbaraga nyinshi ku rubyiniro, yanyuzagamo agafatanya n’ababyinnyi be kubyina

Ruti Joel ku rubyiniro yari kumwe n’ababyinnyi b’abasore bamufashije kunezeza abitabiriye

Mike Kayihura yavuze ko atewe ishema no guhurira ku rubyiniro na Ruti Joel, umuhanzi akaba n’umuvandimwe

Mike Kayihura yaririmbye muri iki gitaramo anicurangira Piano mu rwego rwo kunezeza abakunzi be

Mike Kayihura yashimye abitabiriye iki gitaramo, avuga ko bigaragaza imbaraga z’ubuhanzi

Mu gitaramo hagati hacurangwaga indirimbo z’abahanzi bakomeye nka Muyango, Massamba Intore n’abandi

Mu masaha y’umugoroba yo kuri uyu wa Kabiri, abantu bari batangiye kugera ku Intare Conference Arena

Uhereye ibumoso: Umujyanama w’umuhanzi Juno Kizigenza (Nando), Promesse ndetse n’umuhanzi Shemi

Abitabiriye iki gitaramo bari bateguriwe ahantu ho gufatira amafoto mu buryo bwihariye

Urubyiniro rwo mu Intare Conference Arena rwari rwategurwe mu buryo bwihariye

Ubwo umunyamideli akaba n’umushabitsi, Kate Bashabe yinjira mu Intare Conference Arena

Umunyamakuru wa Kiss Fm, Sandrine Isheja ari kumwe n’umugabo Peter Kagame [Uri iburyo]

Mbere y’iki gitaramo, abantu babanje gususurutswa n’umujya w’inanga ya Kinyarwanda

Umukondo Gatore yagaragaje ko yatojwe ubutore n’umuryango we, atanga ibyishimo muri iki gitaramo

Gatore yavuze ko bimuteye ishema guhurira ku rubyiniro ku rubyiniro na Ruti Joel, umuhanzi bakorana cyane mu Itorero Ibihame by’Imana

Umwe mu bana bakiri bato bakunze kugaragara cyane mu Itorero Ibihame by’Imana [Iri torero riritegura gukora igitaramo bise ‘Mutarama Turatarama’

Bamwe mu bitabiriye iki gitaramo, bafataga amashusho n’amafoto y’urwibutso

Umunyamideli Kate Bashabe ari mu bitabiriye iki gitaramo cya Ruti Joel

Iki gitaramo cya gakondo cyabereye mu Intare Conference Arena

Abitabiriye iki gitaramo baparikaga imodoka hanze, ubundi bakinjira mu Intare Conference Arena

Umuhanzi wagwije ibigwi mu muziki w’u Rwanda, Massamba Intore yashyigikiye umuhungu we Ruti Joel

Mukuru wa Yvan Buravan [Uri ibumoso] ari mu bitabiriye igitaramo cya Ruti Joel

Umuhanzi Juno Kizigenza yaserutse yambaye kinyarwanda mu gitaramo cya Ruti Joel, ari kumwe Nel Ngabo wo muri Kina Music

Umunyamuziki Yvan Ngenzi abyina Kinyarwanda ari kumwe na Sandrine Isheja wa Kiss Fm

Ruti Joel abyinana n’umwe mu bana babarizwa mu Itorero Ibihame by’Imana bitegura gukora igitaramo cyihariye

Umunyamuziki Nemeye Platini [Uri iburyo] ari mu bitabiriye iki gitaramo cya Ruti Joel

KANDA HANO UREBE AMASHUSHO Y’INDIRIMBO ‘VIP’ YA BURAVAN NA ISH KEVIN YAMURITSWE MU GITARAMO CYA RUTI JOEL

“>

Kanda hano urebe amafoto menshi yaranze igitaramo cya Ruti Joel cyo kumurika Album ye ‘Musomandera’

AMAFOTO: Serge Ngabo-InyaRwanda.com

Symere Bysil Woods umuraperi akaba n’umwanditsi w’indirimbo wamamaye ku izina rya Lil Uzi Vert mu muziki. Ni umwe mu baraperi bagezweho muri Leta Zunze Ubumwe za Amerika kuva mu 2016 yasohora indirimbo ye ya mbere yise ‘Money Longer’ yatumye ahita amenyekana byihuse.

Lil Uzi Vert kuri ubu yatangaje amakuru atashimishije abafana be aho yavuze ko urugendo rwe mu muziki rwenda kugera kumusozo aho agiye kuwuhagarika burundu. Ibi yabitangarije TMZ ubwo yagarukaga ku ndirimbo yasohoye yitwa ‘Red Moon’ izaba iri kuri album ye ya nyuma.

Uzi Vert uzwiho kwambara nk’abagore, yahishuye ko agiye kureka umuziki akagana guhanga imideli yabo

Mu magambo ye Lil Uzi Vert yagize ati: ”Maze iminsi mbwira abafana ko ibitaramo ndigukora ari ibya nyuma kandi na album nitegura kumurika ‘Luv Is Rage 3’ ko ari iya nyuma nkareka umuziki. Nkunda umuziki ariko mu byukuri siwo nifuzaga gukora kuko nahoze nifuza guhanga imideli”.

Uyu muraperi ngo yahoze yifuza ibyo guhanga imideli kuva akiri muto

Lil Uzi Vert wigeze gutungura benshi ubwo yishyiraga zahabu mu gahanga, yakomeje agira ati: ”Nahoze nifuza kwinjira mubyo guhanga imideli kuva nkiri muto. Ubu ni byo ngiye gukora nkareka umuziki. Ngiye gutangira gukora imyenda y’abagore ndetse n’ibiro nzakoreramo byamaze kuzura”.

Lil Uzi Vert agiye guhagarika umuziki yaramazemo imyaka 8

Uyu muraperi w’imyaka 28 yasobanuye ko guhanga imideli y’abagore aribyo bintu yahoze yifuza gukora gusa akaba yarabanje kujya mu muziki ngo abanze azamure izina rye. 

Kureka umuziki akagana mu mideli yigeze kusa kubicaho amarenga mu ndirimbo yise ‘Endless Fashion’ yasohoye mu ntangiriro z’uyu mwaka.

Ubu uwavuga ko u Rwanda rutari mu bihugu biza imbere mu kugira imyidagaduro iryoshye kandi ibereye ijisho, kwaba ari ukwijijisha no kwigiza nkana, uwabivuga yaba afite n’ikindi agamije.

Binyuze mu nyubako z’imyidagaduro ziherereye mu Rwanda cyane izwi nka Bk Arena, Africa yose iri gusingiza u Rwanda mu kugira imyidagaduro iri ku rundi rwego. 

Ibyamamare birimo nka Diamond Platnumz byari byarahigiye kuhataramira kuko babonaga ari ahantu hadasanzwe ho gukorera igitaramo ukumva ko utaramye bikuvuye ku mutima bitari uko wari wishyuwe gusa.

Umwaka wa 2023 wabaye uw’amateka ku bakunzi ba muzika mu Rwanda

Ibihugubitandukanye ku isi bikomeje gushima ubuyobozi bwiza bw’u Rwanda mu gukora uko bushoboye bugateza imbere urubyiruko n’imyidagaduro. Binyuze mu buyobozi bwiza, mu Rwanda hagiye hataramira ibyamamare mpuzamahanga bikomeye ndetse rwose bagataha bavuga ko mu mateka ari ubwa mbere bataramiye ahantu harenze.

Muri iyi nkuru tugiye kugaruka ku byamamare byataramiye mu Rwanda muri uyu mwaka wa 2023:

1. Davido

Davido mu Rwanda 

Icyamamare Davido yataramiye mu Rwanda inshuro zigera kuri ebyiri muri uyu mwaka. Bwa mbere yahataramiye muri Kanama 2023, ubwo yari yaje mu isozwa ry’iserukiramuco ‘Giants of Africa’ ryitabiriwe n’ibihumbi by’urubyiruko rwari ruturutse mu bihugu bitandukanye bya Afrika.

Yongeye kugaruka mu Rwanda kuwa 21 Ukwakira mu birori byo gutanga ibihembo bikomeye bya Trace Awards ndetse nawe akaba ari mu bataramiye abitabiriye ibi birori baturutse impande n’impande. Uyu muhanzi kandi yanatwaye ibihembo bigera kuri bibiri.

2. Diamond Platnumz

Diamond Platnumz mu Rwanda

Diamond Platnumz nawe yataramiye mu Rwanda inshuro zigera kuri ebyiri muri uyu mwaka wa 2023. Ku ikubitiro yahataramiye tariki ya 13 Kanama 2023, mu gitaramo cyaherekeje iserukiramuco rya Giants of Africa ryahurije i Kigali urubyiruko rwo mu bihugu 16 byo muri Afurika mu rugendo rwo guteza imbere umukino wa Basketball.

Ku nshuro ya kabiri yagarutse mu Rwanda mu itangwa ry’ibihembo bya Trace Awards byatanzwe kuwa 21 Ukwakira 2023, akaba yarataramiye abitabiriye ibi birori ndetse akaba yaranabashije kwegukana igihembo.

3. Rema

Umuhanzi ukiri muto cyane ariko mukuru mu bikorwa, Rema, ukorera muzika mu gihugu cya Nigeria, nawe yakandagiye ku butaka bw’u Rwanda ku wa 20 Ukwakira 2023. Uyu musore yari aje mu Rwanda mu itangwa ry’ibihembo bya Trace Awards ndetse akaba yaranabashije kwegukana ibihembo bigera kuri bibiri.

Uyu musore ubwo yabaga aje ku rubyiniriro gufata ibihembo mu ijoro ryo ku wa 21 Ukwakira, yanyuzagamo akaririmbira abakunzi be bari bitabiriye itangwa ry’ibi bihembo.

4. La Fouine

Ubwo byari ku Cyumweru tariki 30 Nyakanga 2023 mu Nyubako y'Imyidagaduro ya BK Arena iherereye i Remera, Umuraperi w'Umufaransa Laouni Mouhid [La Fouine] yataramiye i Kigali binyuze mu mikino y'Igikombe cy'Amahoro cya Basketball mu Bagore, akaba yararirimbyemo mu mukino wahuje Ikipe y'u Rwanda ndetse n'ikipe ya Angola.

Uyu mugabo yaherukaga gutaramira mu Rwanda muri 2022 binyuze mu iserukiramuco 'Africa in Colors'.

5. Patoranking

Patrick Nnaemeka Okorie wamamaye nka Patoranking yataramiye abakunzi be mu mujyi wa Kigali muri uyu mwaka turi gusoza. Uyu muhanzi wo muri Nigeria wageze mu Rwanda mu ijoro ryo ku wa 8 Ugushyingo 2023, yaririmbiye muri The Shooters Lounge ubwo yari yaje muri Kigali yitabiriye inama ya 'Qatar Africa Business Forum' yabaye ku wa 9 Ugushyingo 2023 muri Kigali Convention Centre.

6. Daddy Andre

Daddy Andre ku nshuro ye ya mbere yataramiye mu Rwanda, aho yaririmbye mu gitaramo cya Kigali Jazz Junction cyaherekeje Werurwe ya 2023. 

Byari mu ijoro rya Tariki ya 31 Werurwe 2023, aho ryasize bamwe bakiriye agakiza abandi barabyina karava binyuze mu gitaramo cya Kigali Jazz Junction cyakozwe mu rugendo rwo gufasha abantu kurangiza neza ukwezi kwa Werurwe. Iki gitaramo cyabereye mu ihema rya Virunga muri Kigali Conference and Exhibition Village ahazwi nka Camp Kigali.

7. Tiwa Savage

Umuhanzikazi Tiwa Savage wamamaye cyane nk’umwamikazi w’injyana ya Afrobeat muri Nigeria (cyane ko ari bo bayiyoboye kugeza ubu) ndetse no muri Africa, yataramiye mu Rwanda muri uyu mwaka wa 2023 ku nshuro ye ya mbere.

Uyu muhanzikazi yataramiye i Kigali ku wa Gatandatu, tariki ya 19 Kanama 2023 mu isozwa ry’iserukiramuco rya Giants of Africa ryari ryitabiriwe n’ibihumbi by’urubyiruko mu nyubako ya Bk Arena.

8. Zuchu

Uyu muhanzikazi Zuchu, umwaka wa 2023 wasize agize mu Rwanda  nko mu rugo. Ku ikubitiro yataramiye mu Rwanda mu Ukwakira 2023, mu itangwa ry’ibihembo bya Trace Awards ndetse nawe akaba yari mu bahatanye muri ibi bihembo ariko ntiyabashije kugira icyo yegukana.

Ku nshuro ya kabiri, Zuchu yongeye gutaramira mu Rwanda mu gitaramo cy’amateka cyabereye i Kigali. Iki gitaramo cyiswe 'Move Afrika: A Global Citizen Experience' cyabaye mu ijoro ryo kuri uyu wa Gatatu tariki 6 Ukuboza 2023 mu nyubako y'imyidagaduro ya BK Arena iherereye i Remera mu Mujyi wa Kigali.

9. Kendrick Lamar

Umuraperi uri ku rutonde rw'abaraperi 50 bakomeye ku Isi, Kendrick Lamar Duckworth, muri uyu mwaka wa 2023 nawe yasigiye urwibutso Abanyarwanda ubwo yabataramiraga mu gitaramo cy'amateka cyitabiriwe n'abantu basaga ibihumbi icyenda barimo Perezida Paul Kagame na Madamu Jeannette Kagame.

Iki gitaramo cyiswe 'Move Afrika: A Global Citizen Experience' cyabaye mu ijoro ryo ku wa Gatatu tariki ya 6 Ukuboza 2023 mu nyubako y'imyidagaduro ya BK Arena iherereye i Remera mu Mujyi wa Kigali.

10. Bién Aime Baraza

Bién Aime nawe ntiyatanzwe gutaramira mu rw’imisozi igihumbi muri uyu mwaka wa 2023 kuko nawe amaze kuhataramira inshuro zigera kuri ebyiri. Ku ikubitiro, yahataramiye kuwa 28 Nyakanga 2023, aho yaririmbye gitaramo cyiswe ‘Marnaud Music Therapy’ cyateguwe n’umuvangamiziki uzwi ku izina rya Dj Marnaud. 

Ntibyarangiriye aho kuko ku wa 10 Ugushyingo 2023, ubwo yari yitabiriye ibirori bya African Leadership Network byabereye muri Kigali Conference and Exhibition Village ahazwi nka Cam Kigali, Bien-Aimé Baraza nabwo ari mu batanze ibyishimo aririmbira abari bitabiriye ibi birori.

11. King promise

Gregory Bortey Newman uzwi nka King Promise, nawe umwaka wa 2023 wasize ahaye ibyishimo abanya-Kigali, dore ko yari ku nshuro ye ya mbere ahataramiye.

Byari kuwa 10 Ugushyingo 2023, ni bwo uyu muhanzi yaririmbye mu kabari kitwa 'Shooters lounge' gaherereye Kimihurura. Yaririmbiye mu Rwanda mu gihe yari yitabiriye Inama y'Ihuriro rigamije guteza imbere ubufatanye hagati ya Qatar n'Umugabane wa Afurika 'Qatar Africa Business Forum' yabaye ku wa 9 Ugushyingo 2023.

Muri make, umwaka wa 2023 urahagije mu kwerekana umuvuduko imyidagaduro yo mu Rwanda iriho. Ibi bitanga ishusho y’uko mu myaka ibiri iri imbere, imyidagaduro Nyarwanda izaba iri ku rwego mpuzamahanga kuko niba umuhanzi nka Diamond Platnumz yicara agahigira gutaramira mu Rwanda, ni ibintu biteye ishema cyane bigaragaza ko muri Afurika, ibyo tumaze kugeraho ari bake babifite.

Kendrick Lamar wataramiye mu Rwanda yananiye ibihugu bitagira ingano. Abantu benshi batuye impande n’impande z’isi, bagerageje gutumira uyu muraperi ariko byaranze. Ariko yumvise ko agiye gutaramira mu Rwanda, ntiyigera azuyaza na gato. 

Urukundo, urugwiro n’umutekano abahanzi bagaragarizwa iyo baje mu gutaramira mu Rwanda, bituma bagenda bavuga amahanga yose ko nta handi hantu harenze u Rwanda, bityo bagahora bahigira kuhagaruka. Umunyarwanda yaciye umugani ati: “Gahoro gahoro nirwo rugendo”.

Byinshi mu bitaramo byarakubitaga bikuzura

Nyuma y’amasaha hafi 24 indirimbo ye ‘Ni Forever’ isibwe kuri YouTube, The Ben ari mu byishimo ko ubu yagarutseho.

Ku munsi w’ejo hashize tariki ya 25 Ukuboza 2023 ni bwo indirimbo ‘Ni Forever’ ya The Ben yasohotse tariki ya 16 Ukuboza 2023 ahimbiye umugore we, yasibwe ku muyoboro wa YouTube.

Hari nyuma y’uko Kompanyi ifata amashusho yifashishije indege nto zitagira abapilote ‘Drone’ ya Drone Skyline Ltd itanze ikirego ko hari amashusho yayo bakoresheje batabifitiye uburenganzira.

Mu gitondo cyo kuri uyu wa Kabiri tariki ya 26 Ukuboza 2023, The Ben yasohoye itangazo avuga ko iyi ndirimbo yahuye n’ikirego batari biteze, aho bari bizeye Kompanyi yabahaye amashusho barezwe bizeye ko ari ayabo.

Yakomeje avuga ko ikipe ye ishinzwe tekinike ibirimo ndetse vuba iyi ndirimbo iri bugaruke kuri YouTube.

Kugeza ubu iyi ndirimbo yagarutse kuri YouTube kuri “Channel” ya The Ben yari isanzweho, imaze kurebwa n’abantu barenga miliyoni 1.5.

Muri iyi minsi mikuru isoza umwaka, abantu hirya no hino barimo bajya gusura inshuti n’abavandimwe mu rwego rwo kwifatanya nabo kwizihiza iminsi mikuru bari kumwe n’abo bakundana. Ni muri urwo rwego no mu Rwanda hari urujya n’uruza rwinshi rw’abantu batega imodoka nyinshi.

Ku wa 21 Ukuboza 2021, Umwana w’imyaka itandatu yagiye ku kibuga cy’indege cya Philadelphia agiye gufata indege imwerekeza ku kibuga cy’indege giherereye mu Magepfo ashyira uburengerazuba bwa Florida ku kibuga cy’indege cya Fort Myers yieshya kujya mu dege ajya mu iyerekeza mu mujyi wa Orlando.

Nyuma yo kubona ko bakoze amakosa bakajyana umwana mu cyerekezo atari agiyemo, kompanyi ishinzwe gutwara abantu n’ibintu mu kirere ya Spirit Airline yahise yandika isaba imbabazi kubwo gutwara uyu mwana mu gace atari agiye kwerekezamo.

Nk’uko tubikesha ikinyamakuru CNN, Spirit Airline yandikiye ibaruwa ikinyamakuru CNN batangaza ko nyuma yo gusanga bibeshye aho uyu mwana yari agiye bahise batangira kuvugana n’umuryango w’uyu mwana kugira ngo yitabweho.

Spirit Airline yagize ati “Umwana yitaweho n’abakozi ba Spirit Airlines nyuma y’uko tubonye ko habayeho kwibeshya, twavuganye n’umuryango we kugira ngo tumubasubize agere aho yifuzaga kugera mu mahoro.”

Umwe mu bagize umuryango w’uyu mwana, yatangaje ko bakoze urugendo rurenga 180km bajya gufata uwo mwana aho indege yari yamusize avuye ku kibuga cy’indege cya Fort Myers aho bari bamutegerereje.

Spirit Airlines ntabwo bigeze batangaza uwakoze amakosa hagati yabo, umwana cyangwa ababyeyi b’umwana uretse kuba batangaje ko umwana yashyikirijwe ababyeyi be ndetse akitabwaho.

Uyu mukozi w’Imana uri mu bafite igikundiro muri iki gihe, niwe wagabuye ijambo ry'Imana mu gitaramo cya Israel Mbonyi cyabaye mu ijoro ryo kuri uyu Mbere tariki 25 Ukuboza 2023 mu rwego rwo gufasha Abakristu kwizihiza Noheli mu buryo bwihariye no kwinjira neza mu mwaka Mushya wa 2024.

Pastor Julienne Kabanda Kabirigi yavuze ko Israel Mbonyi ari umukozi w'Imana, icyambu Imana yifashisha mu kwegera ubwoko bwayo. Kuri we, kubwiriza mu gitaramo nk'iki cyuzuye ibihumbi by'abantu, ni byiza kugira ngo baganire ku nkuru y'ivuko rya Yesu.

Yisunze amagambo aboneka muri Yesaya 61 hagira hati 'Umwuka w'Umwami Imana ari kuri jye, kuko Uwiteka yansīze amavuta ngo mbwirize abagwaneza ubutumwa bwiza, yantumye kuvura abafite imvune mu mutima no kumenyesha imbohe ko zibohowe, no gukingurira abari mu nzu y'imbohe.'-Yumvikanishije impamvu Noheli yizihizwa.

Pastor Julienne yavuze ko uyu munsi wihariye mu buzima bw'Abakristu, kuko urangwa no gutegura amazu no gutaka imijyi, ariko kandi yifuza ko umunsi nk'uyu wasiga abenshi bemeye gutangiye urugendo rushya rwo gukurikira Kristo.

Kabanda yavuze ko Kristo yacunguye muntu kugirango abone imbabazi n’ubuzima buzira iherezo. Ati “Hari impamvu Kristo yaje ku isi.”

Yabaze inkuru y’ukuntu yakiriye agakiza, nyuma y’amasaha macye yari ashize avuye kuririmba mu kabyiniro ibizwi nka ‘Karaoke’. 

Yasekeje benshi ubwo yavugaga ko yari umuhanga mu gusubiramo indirimbo z’abahanzi. Ati “N'ubu sindabireka, najyaga nsubiramo indirimbo z'abahanzi, kandi nari umuhanga. Hari umugabo watashye witwa Michael Jackson, nashoboraga kumusubiramo (kumwigana) ukagira ngo nta mbavu mfite.'

Yavuze ko asubiyemo indirimbo za Michael Jackson abantu batungurwa cyane, kuko yiganaga ijwi rye, ukagira ngo niwe neza neza!.

Yavuze ko muri iryo joro yari yafashije mu miririmbire umuhanzi wo muri Afurika y’Epfo wari wataramiye muri ako kabyiniro, kandi ko mu gitondo bari bafite n’ikindi gitaramo bagombaga kuririmbamo.

Ijoro yakiriyemo agakiza, arisobanura nk’iridasanzwe mu buzima bwe, kuko yabonye Kristo wacunguye muntu. Anavuga ko icyo gihe yari yahawe amafaranga, afite umunezero w’ubuzima bw’ejo hazaza, byanatumye ahindura ingendo, kuko yumvaga ahagaze neza ku mufuko. Ati “Ndabyibuka neza natashye nahengamye.”

Julienne yavuze ko yageze mu rugo ahagana saa cyenda z’ijoro, ku buryo yumvaga ari mu bundi buzima ariko bushingiye ku munezero w’iby’isi gusa!. Yavuze ko ubwo yari mu kabyiniro yumvise indirimbo ‘Amazing Grace’ iguma muri we, yumva ukuntu igaruka ku ‘bwiza butangaje bw’Imana’.

Yavuze ko ageze mu rugo mu ijoro yabuze ibitotsi, abona hafi Bibiliya atangira kuyisoma. Muri we, yashakaga kureba inkuru ya Abraham, ariko asanganirwa n’inkuru yo mu Ibyahishuwe 7:9 abona inkuru ivugwamo siyo ashaka, yongera kubumbura Bibiliya asoma ahagira hati “Kuri uwo munsi azatoranya ihene mu ntama.”

Uyu mupasiteri yavuze ko yahise yumva igice aherereyemo, bituma atangira gutekereza ku iherezo ry’ubuzima bwe no gukorera Imana. 

Ati “Narahumirije mbwira Imana nti ko uzi ko n’ubwo wazana nde ntashobora guhinduka (kuko) biragoye ko mva mu buzima ndimo urabubona, ndinjiza, meze neza, mbwira rero umuntu waza ngo ni Pasiteri cyangwa Malaika ngo aje kumpindura, ntibishoboka. Mba umunyakuri imbere y’Imana.”

Julienne Kabanda yavuze ko muri we yatangiye kwiyumvamo guhinduka, kandi haburaga iminota micye akajya kuririmba mu Karere ka Huye. Yongeye kubumbura Bibiliya asoma ahandi hagira hati “Erega Mpora ku rugi nkomanga, niwumva ijwi ryanjye ukingure.”

Yavuze ko ari umuhamya w’uko Kristo ari muzima, kuko mu rucyerera yumvise umunezero wa Kristo muri we. Ati “Numvise ibintu ntashobora gusobanurira umuntu, numva amarira abaye menshi…”

Yavuze ko muri icyo gihe yatuye ‘amagambo mudashobora kumva’ kandi agirana isezerano n’Imana.

Bamutegaga iminsi! Yavuze ko akimara kwakira agakiza, mu gitondo yahuye n’abakobwa baririmbanaga bamubwira kwitegura bakajya i Huye kuririmba, ababwira ko yatangiye urugendo rwo gukorera Imana, baramuseka.

Bamubwiye ko atahindura gahunda yabo ku munota wa nyuma, kuko bamaze gufata amafaranga y’igitaramo bari gukorera i Huye. 

Akomeza ati “Umwe arandeba arambwira ngo Julienne, wowe ukijijwe, Satani yarara akijijwe. Bagira ngo ndimo ndakina, ndababwira nti mbare gatatu mugiye mu gitaramo ntaho njya…”

Yavuze ko umuyobozi wabo mu by’amajwi yamubwiye kureka imiteto, kuko bamaze gufata amafaranga yo kuririmba, bityo adakwiye kubatenguha. Byageze aho bamwinginga kuririmbana nabo bwa nyuma, ariko aranga.

Julienne Kabanda yavuze ko abo baririmbyi bafashe urugendo bajya i Huye bageze mu nzira bakora impanuka ‘inkuru yabo irangira uko’. Yavuze ko ubuntu bw’Imana yabubonye amaso ku maso. Yavuze ko ‘hari impamvu Yesu ahora akomanga’.

Uyu muvugabutumwa yavuze ko yiyemeje gukorera Yesu kugeza ku mwuka we wa nyuma w’ubuzima, kandi kuba akiriho ni uko yafashe icyemezo cyo gukurikira Kristu. Ati “Icyampa uyu munsi ugafata icyemezo.”    

Pastor Julienne Kabanda yavuze ko ari umuhanga mu kuririmba asubiramo indirimbo z’abandi bahanzi, kuko yabikoze igihe kinini mu bizwi nka ‘karaoke’ 

Julienne Kabanda yabwirije mu gitaramo cya Israel Mbonyi yisunze amagambo aboneka muri Yesaya 61

Julienne yavuze ko yari afite umutima ukomeye ahanini bitewe n’ibihe yanyuragamo ku buryo atiyumvishaga ko azakira Kristu    

Ni igitaramo cyaranzwe n’ibihe byo kuramya no guhimbaza Imana  

Ommy Dimpoz, The Ben, Jimmy, Alex Muyoboke na Massamba Intore bari mu bihumbi by’abantu bitabiriye igitaramo cya Israel Mbonyi    

Israel Mbonyi yavuze ko kumenya Kristu byatumye aba ikiremwa gishya!

Kanda hano urebe amafoto yaranze igitaramo ‘Icyambu Live Concert’ cya Israel Mbonyi

AMAFOTO: Serge Ngabo-InyaRwanda.com