Author: webrwanda

Rutahizamu ukomoka muri Portugal ukinira Al Nassr muri Saudi Arabia, Cristiano Ronaldo biravugwa ko yamaze kwibikaho inzu imwe y’agatangaza mu Kirwa cy’Abaherwe i Dubai.

Ikinyamakuru Bloomberg cyatangaje ko uyu rutahizamu yamaze kwibikaho iyi nzu iri mu Kirwa cya Jumeirah Bay cyizwi nk’Ikirwa cy’Abaherwe 'Billionaires Island’ benshi bafata nk’imuhira h’ibyamamare bifite agatubutse.

Ntabwo iki kinyamakuru cyigeze kigaragaza iyo nzu ndetse n’amafaranga yayiguze ariko bivugwa ari hagati ya miliyoni 10 n’100 z’amapawundi (tens of millions of pounds).

Iki kinyamakuru kandi kikaba cyatunze agatoki imwe mu nyubako zigurishwa ziri kuri iki Kirwa iri ku kuri meterokare 30,000 ifite ibyumba 6 byo kuryamamo, Pisine ireba mu Mujyi wa Dubai, inzu zo gukondesha, ububiko bujyamo imodoka 7.

Cristiano Ronaldo winjiza miliyoni 175 z’Amayero ku mwaka mu ikipe ya Al Nassr, tariki ya 19 Mutarama 2024 azahabwa igihembo cya Maradona Awards gihabwa rutahizamu watsinze ibitego byinshi mu mwaka umwe, uyu mwaka yatsinze ibitego 54, ni mu bihembo bya Globe Soccer Awards bizabera Dubai.

Hari ubwo uzumva abantu bavuga ngo gukora umurimo unoze, ibyo bintu bakabisobanura bavuga icyo bisaba ndetse n'uko wabigeraho, ariko iteka ukumva bagaruka ku ijambo ryitwa ‘kutajagarara’.

Ubundi uzumva bagaruka ku kwitwa ukomeye, uw'ingenzi, igitangaza mu kintu runaka ko atari ibintu bigerwaho gutyo ahubwo bisaba guha umwanya ibyo ukora ukabikunda kuko igihe kigera nabyo bigukunda.

Hari naho uzabona batanga ingero z'ukuntu umubibyi atangira kubiba imbuto abantu bamuseka, zamara kwera ugasanga abantu baraza kumugisha inama cyangwa kumusaba ngo nabo barye ku matunda y'ibyo yakoze, nyamara yarabikoze bageretse akaguru ku kandi.

Ibyo byose tugarutseho byari ugusasira urugendo rukomeye rwa Bruce Melodie uri mu bahanzi bamaze imyaka irenga 10 batangiye urugendo rw'umuziki nyamara kuri ubu bikaba bigoranye kugira uwo wamugereranya na we.

InyaRwanda igiye kukugezaho mu bikorwa bifatika uyu muhanzi amaze gukora bituma abantu bamwe bahamya ko kugeza ubu ari we ufite ikamba ry'umuziki nyarwanda.

Indirimbo amaze gukorana n'abahanzi benshi bakomeye

Amaze gukorana n’abahanzi hafi ya bose bihagazeho mu Rwanda no hanze yarwo

Biragoye gusobanura urugendo rwa Bruce Melodie wamaze kurema n'abandi bahanzi nabo bafite izina rifatika mu muziki Kenny Sol na Juno Kizigenza.

Ibi bikaba birenze gusa gutanga amahirwe binyuze mu gukorana n'abandi bahanzi, harimo ahubwo no kuyaremera abadafite uburyo.

Kuva yakwinjia mu muziki byeruye, Bruce Melodie amaze gukorana indirimbo n’abahanzi hafi ya bose bakomeye mu muziki nyarwanda.

Gusa muri iyi ngingo tugiye kugaruka ku ndirimbo amaze gukorana n'abahanzi bo hanze y'igihugu duhereye mu Karere nka Pallaso bafitanye 'Guwe Nze', Double Jay na Kirikou Akili bakoranye ‘Inzoga n’Ibebi’;

Inoss B bakoranye ‘A l’aise’, Eddy Kenzo bakoranye 'Nyoola', Sheeba Karungi bakoranye 'Embeera Zo', B2C baririmbanye 'Curvy Neighbour', Khaligraphy Jones bakoranye 'Sawa Sawa' na Harmonize bamaze gukora izirenze imwe zirimo 'Totally Crazy' na 'Zanzibar'.

'When She Is Around' ni indirimbo Bruce yagiriyeho umugisha imwuriza rutema ikirere ajya gutaramira mu ruhererekane rw'ibitaramo bya iHeart Jingle Ball byabereye muri Leta Zunze Ubumwe z'Amerika.

Iyi ndirimbo yakomotse kuri 'Funga Macho', yayikoranye na Shaggy wanyuzwe n’uko yumvise ikoze amusaba ko bayisubiranamo.

Uretse kandi ibitaramo bikomeye Bruce Melodie yakoreye muri Dallas na Miami muri Leta Zunze Ubumwe za Amerika, yanabashije kugira umwanya wo kuganira n'ibitangazamakuru bikomeye nka Fox News.

Yakoranye indirimbo n'abahanzi batandukanye bo mu bihugu binyuranye, ukaba ari umuvuno ukoreshwa na benshi mu bahanzi b'abahanga banakora umuziki nk'umwuga mu buryo bwo kwagura isoko ry'ibyo bakora.

Ibitaramo bikomeye amaze gutaramamo

Ari mu bahanzi mbarwa bahangaye inzu y’imikino n’imyidagaduro ya BK Arena mu gitaramo we ubwe yiteguriye

Bruce Melodie ni we muhanzi wabashije guhangara inyubako yakira abarenga ibihumbi 10 ya BK Arena mu gitaramo yiteguriye cyo kwizihiza ikinyacumi yari amaze mu muziki.

Muri iki gitaramo yashyigikiwemo n'abahanzi nka Alyn Sano, Papa Cyangwe, Bull Dogg, Mike Kayihura, Itorero Inganzo Ngali, Christopher, Niyo Bosco na Riderman.

Nubwo havuzwe byinshi birimo amajire y'abamotali, aho bivugwa ko kugira ngo abashe kuzuza iyi nyubako yabitabaje, nyamara ntibikuraho ko ari muri bacye babashije gutegura ibitaramo byabo bwite mu Rwanda kandi ahantu hanini.

Nk’uko twabivuze haruguru ni we muhanzi nyarwanda mu bakora umuziki w'iki gisekuru kitararenza ibinyacumi 3 wabashije gutaramira ku rubyiniro rukomeye nko muri Amerant Bank Arena ho muri Dallas kimwe no muri Miami.

Ntabwo bwari ubwa mbere yitabiriye ibikorwa bihuriyemo abahanzi bakomeye kuko no muri 2017 yaciye agahigo ko kuba umuhanzi wa mbere w'umunyarwanda wabashije guhagararira u Rwanda muri Coke Studio Africa.

Uduhigo yaciye, ibihembo n'amarushanwa yegukanye

Ubwo Bruce Melodie yashyikirizwaga igihembo yegukanye muri Trace Awards na Sandrine Isheja hamwe na Cheymuv

Kugeza ubu Bruce Melodie ari mu bahanzi bacye babashije kwegukana irushanwa rya Primus Guma Guma Super Star bagihagaze mu bikorwa by'umuziki babikora nk'akazi.

Uretse iri rushanwa rikomeye yanamaze kwibikaho ibihembo hafi ya byose bitangirwa mu Rwanda birimo Salax Awards, Kiss Summer Awards, The Choice Awards na Isango na Muzika Awards.

Hari kandi n'ibiri ku rwego mpuzamahanga nka HiPipo yegukanye binyuze mu ndirimbo 'Blocka', hakaza kandi na Trace Award aheruka kwegukana binyuze muri Kiss Summer Awards.

Bruce Melodie ari mu bahanzi mbarwa babashije gusoza umwaka wa 2023 basuhuzanije na Perezida Kagame. Uyu muhanzi yahamije ko ari ikintu cyamukoze ku mutima kandi kikamwereka ko ibyo akora bishimwa.

Ibi yabigezeho nyuma y'uko yari yabaye umwe mu bakiriwe n'Umukuru w'Igihugu mu birori bisoza umwaka wa 2022.

Ibikorwa byo kwamamaza n'imbuga nkoranyambaga n'izucururizwaho umuziki

Kompanyi nyinshi zimugirira icyizere zikamwifashisha mu bikorwa byo kwamamaza

Kugeza ubu Bruce Melodie ari mu bahanzi bacye nyarwanda babashije kwizerwa na kompanyi nyinshi, zikamushoramo akayabo kugira ngo azamamarize.

Muri izo twavuga nka Tecno kugeza n'ubu bagikorana, kompanyi ya Brok, MTN, BK Arena n'ubu bagikorana ndetse higeze kuvugwa inkuru y’uko afite imigabane muri ISIBO TV. Anafitanye kandi amasezerano na Bralirwa binyuze mu kinyobwa cya Primus.

Gusa hagiye hazamuka inkuru z'uko harimo n'ibyo gutwika nk'ubwo yashyiraga umukono ku masezerano na Food Bundles byemejwe ko ahagaze Miliyari y’amanyarwanda, irengero ryayo rirayoberana na we ubwe avuga ko atazi uko byarangiye.

Ibi ariko ntabwo bikuraho ko ari mu bahanzi bacye b’abizerwa bafite ibigo bitandukanye bakorana nabyo kandi bikomeye mu gihugu.

Ku birebana n'imbuga nkoranyambaga, Bruce Melodie kugeza ubu afite imbuga zihagaze neza aho kuri YouTube akurikirwa (Subscribers) n’ibihumbi 529 ku mashusho 87 amaze gusangiza abamukurikira, akagira umusaruro rusange (Views) Miliyoni 74.

Ku rubuga rwa Instagram, Bruce Melodie akurikirwa n'ibihumbi 974. Ku zindi mbuga nkoranyambaga ndetse n’izicuririzwaho umuziki naho ntahagaze nabi. 

Ibi byose birerekana ubudahangarwa bwe mu muziki nyarwanda ari naho bamwe bahera bemeza ko ari we ufite ikamba ry’umuziki w’u Rwanda, ibintu biherutse gushimangirwa na Trace Awards yamushimiye nk’umuhanzi mwiza mu Rwanda “Best Artist Rwanda”.

Yafashije abahanzi bamaze nabo kugwiza ibigwi mu muziki nka Kenny Sol na Juno Kizigenza ariko na none ni na we wagiriye inama Chriss Eazy yo kuva muri rap akinjira mu kuririmba amusobanurira ko ari byo bizatuma azamuka byihuseNi we muhanzi rukumbi wabashije kwitabira Coke Studio Africa hari mu mwaka wa 2017Imikoranire ye yihariye na Coach Gael na Element binyuze muri 1:55AM yamufunguriye amarembo Bruce Melodie yamaze kubaka ubucuti n’abahanzi bihagazeho mu Karere barimo na Harmonize banafitanye indirimbo zirenze imweBruce Melodie yagaragaje ko yishimiye cyane guhura na Perezida Kagame hari mu bihe by’iserukiramuco rya Giant Of Africa

Kuri uyu wa Gatanu, tariki ya 5 Mutarama 2024, ikinyamakuru Middle East Eye, cyari cyatangaje ko u Rwanda na Tchad bari mu biganiro na Israel ku buryo bakwakira Abanya-Palestine bari muri Gaza.

Aya makuru kandi yatangajwe n’Ikinyamakuru cyo muri Israel, Zman Yisrael.

Guverinoma y’u Rwanda mu itangazo yashyize hanze, yavuze ko inyomoza aya makuru bityo ko ibyatangajwe n’ibi bitangazamakuru ari ibinyoma byambaye ubusa.

Yagize iti 'Guverinoma y’u Rwanda irabeshyuza amakuru yatangajwe na Zman Yisrael ko u Rwanda ruri mu biganiro na Israel ku kohereza Abanye-Palestine bava muri Gaza. Iki ni ikinyoma cyambaye ubusa. Nta biganiro na bike byigeze bibaho yaba ubu cyangwa mu bihe bishize bityo ko aya makuru akwiye kudahabwa agaciro.'

Gahunda yo kwimura Abanye-Palestine batuye i Gaza itangiye gutekerezwaho nyuma y’uko aka gace kabereyemo ibitero bikomeye byatumye abaturage bava mu byabo.

Ibitangazamakuru byo muri RD Congo byatangaje ko iki gihugu cyaba kigiye kigiye mu biganoro bizatuma bakira Abanya-Palestine bava muri Gaza, nubwo bitaremezwa .

Aha cyane ariko ni mu gihe abakundana bombi babiziranyeho kandi biyemeje ko umubano wabo gabo gore ari bo bonyine bawurimo, bitari nko mu bihugu aho gushaka abagore barenze umwe byemewe.

Icyakora guca inyuma uwo mwashakanye cyangwa se mukundana ntibifite igisobanuro kimwe gusa cyakumvikanwaho na bose. Icyo ababiri bakundana (couple) bafata nko gucana inyuma gishobora kuba ku bandi ahubwo ari nk’ikirungo kuri bo kikaba kandi ari na cyo gikomeza urukundo rwabo.

Urugero, kuba uwo mwashakanye yisanzura cyane ku wundi ariko ntibaryamane byakwitwa kuguca inyuma ? Kuba se umwe mu bashakanye ari mu rukundo n’umuntu ariko badahura mbese bakundanira ku ikoranabuhanga ?

Gucana inyuma haba hagati y’abakundana batarabana n’abashakanye byafashe intera cyane cyane bijyanye n’iterambere ry’ikoranabuhanga n’izindi mpamvu zigendana n’aho isi igeze ndetse ingaruka zibivamo zikunda kuba mbi cyane kuko uretse gutandukana, hari n’ubwo bivamo kwicana n’ibindi bibi byinshi.

Muri iyi nkuru twanditse twifashishije iya Psychology Today na Mayo Clinic, turakugezaho ibimenyetso byakugaragariza ko uwo mukundana aguca inyuma n’inama z’uko wabyitwaramo kugira ngo he kuba ibibi biruta ibindi, cyane ko gucibwa inyuma bigera aho uwo mukundana aryamana n’undi ari nk’ikosa rya nyuma ribi abakundana batabasha kwihanganira.

Niba waratangiye gutekereza ko uwo mukundana aguca inyuma, hari ibyago byinshi ko koko bihari, ni nka bya bindi ngo ahari ihene haba hari n’ikiziriko. Mu gihe nta cyo wakoresha cyizewe 100% cyakwemeza ko umukunzi wawe aguca inyuma, hari ibimenyetso simusiga kandi byinshi byakwereka ko ubuhemu mu rukundo rwanyu buriho.

Ngibi rero bimwe mu bimenyetso bizwi cyane biranga abaca inyuma abo bakundana :

Arinda Cyane Ibikoresho bye by’Ikoranabuhanga

Muri iki gihe abantu benshi barangwaho no guca abakunzi babo babikora bifashishije murandasi, kuri mudasobwa cyangwa telefone. Niba uwo mwashakanye cyangwa mukundana akunda kurinda cyane ibikoresho bye by’ikoranabuhanga, akaba atifuza ko ubikoraho cyangwa ko umenya uko abikoresha, rimwe na rimwe akagira abo abiganirraho na bo yihishe, ibi bishobora kuba bivuga ko adashaka ko umenya abo bavugana. Ni hamwe kandi uzasanga umubare cyangwa ijambo ry’ibanga akoresha afungura telefone ye adashobora kwemera ko ubimenya nubwo atari itegeko ko ubimenya.

Ni kimwe mu bimenyetso ko afite icyo agukinga, kandi kenshi ni uko afite undi bagira batya bagakorana ibyo mwakabaye mukorana nk’abakundana.

Hari igihe runaka umuburira irengero

Niba hari ibihe umukunzi wawe aburirwa irengero ukaba utazi aho ari, cyangwa ukaba utanamubona kuri telefone, na byo bisobanura ko ashobora kuba ari kumwe n’umuntu atifuza ko wamenya.

Ibisobanuro bidahura

Kubeshya buriya biragora kurusha uko abantu benshi babyumva, cyane cyane guhora ubeshya uwo mubana. Mu gihe ababeshyi bagerageza gusubiramo inkuru mu buryo bumwe buri gihe babeshya, hari ubwo igihe bajagaraye bavuga amakuru atandukanye n’ayo bavugaga cyangwa igihe babajijwe ikibazo runaka mu buryo butadukanye n’ubwo basanzwe bakibazwamo.

Umukunzi wawe naramuka aguhaye ibisobanuro bivuguruzanya ku hantu ari, icyo arimo gukora cyangwa uburyo azimo umuntu ukeka ko agucanamo inyuma na we, impamvu ishobora kuba ari uko ubushobozi bwe bwo gukomeza kubeshya ikinyoma mu buryo bumwe byamunaniye.

Gahunda zihindagurika

Niba uzi amasaha runaka umukunzi wawe amara ku kazi ubundi ugatangira kubona aragenda atahira amasaha atandukanye na yo kandi akazi atabitegetswe, birashoboka ko afite aho ajya kugorobereza.

Ikindi kimenyetso ko umukunzi wawe ashobora kuba aguca inyuma ni igihe atangira kukubonamo inenge atabonaga mbere, kandi wari uzifite wenda, agatangira kukugereranya n’abandi, bityo. Aha ikibazo ntikiba ari wowe, biba ari ibiba biri mu mutwe we.

Inshuti ze zihindura uko zikwitwaraho

Nubwo umuntu uca inyuma umukunzi we agerageza uko ashoboye kose kubihisha, hari umugani baca umugani mu Kinyarwanda ngo 'N’uwendeye nyina mu nyenga yaramenywe'. Kenshi inshuti z’uca inyuma umukunzi we zirabimenya mbere y’uko ubimenya.

Niba rero ubona izi nshuti zihindura uko zakwitwaragaho, kandi ukaba nta mpamvu yabyo uzi, birashoboka ko ari uko zizi ibiri kuba.

Akoresha amafaranga mu buryo utazi

Niba uwo mwashakanye atangiye guhindura uburyo akoresha amafaranga n’umutungo wanyu mu buryo mutaziranyeho, ibi bishobora kuba ikimenyetso cy’uko hari ikintu kiri kumubaho kidasanzwe. Aha ni nk’igihe uzabona yabikuje amafaranga menshi kuri konti ye kandi ntabigusobanurire ndetse ntubone icyo wenda yayakoresheje.

Kugushinja akubeshyera ko umuca inyuma

Abantu baca inyuma abakunzi babo kenshi na bo ntibanabizera na gato. Kenshi iyo umuntu yakoze ikintu kibi runaka atangira kurega no gushinja abandi iyo ngeso mbi cyangwa agatekereza ko buri wese wundi yitwara nka we cyangwa bameze kimwe.

Ibi ni byo abahanga mu buzima bwo mu mutwe bita 'projection” kuko nubwo betemeranya ku buryo bikora, ariko bemera ko bibaho. Ibi byitwa 'projection' ni byo bituma uca inyuma mugenzi we kenshi agushinja cyangwa agashinja umukunzi we kumuca inyuma.

Biranashoboka kandi ko umukunzi wawe azagushinja akubeshyera ko umuca inyuma kubera ko yumva agufuhira cyane kandi na we adatekanye, cyane cyane ko aba yumva ko ibyo agukorera nawe waba ubimukorera. Ni kimwe mu bimenyetso bikomeye igihe uzabona umukunzi wawe agukekaho kumuca inyuma kandi akagufuhira bikabije nyamara utabikora.

Hari abantu bagiye bavuga mu biganiro n’itangazamakuru bakavuga ko baciye inyuma abakunzi babo nk’uburyo bwo kwihimura, kuko bakekaga ko abakunzi babo bashoboraga kuba barabaciye inyuma mbere.

Utekereza ko aguca inyuma ariko utazi impamvu

Ni kwa kundi ngo umuntu atayoberwa umwibye ahubwo akayoberwa aho amuhise. Umubare munini w’abantu bavumbura ko abakunzi babo babaca inyuma usanga babikeka ku mpamvu badashobora mu by’ukuri gusobanura.

Hari inyigo zerekana ko abantu bashobora gutahura ibinyoma mu buryo na bo ubwabo batazi nubwo badashobora kubivugaho cyangwa ngo bagaragaze ibyo binyoma. Ni igihe umuntu akubeshya, ukumva ko akubeshye ariko nta kimenyetso wabyerekanisha.

Niba wumva nta mahoro ufite, ukumva ufite amakenga ariko utabasha gusobanura, birashoboka ko nyine umutima wawe uri kukubwira ko umukunzi wawe hari icyo akubeshya.

Uko wabigenza igihe umukunzi wawe aguca inyuma

Kumenya ko umuntu mwasezeranye ko atazaguhemukira yaguciye inyuma bishobora kuzamura muri wowe amarangamutima mabi cyane. Ushobora kumva urakaye, ukababara, ukishinja amakosa, ukumva usa n’uwahemukiwe n’ibindi.

Biragoye ko wacibwa inyuma ngo ugire ibitekerezo biri ku murongo ukibimenya. Icyakora nubikeka cyangwa ukabimenya ko umukunzi wawe aguca cyangwa yaguciye inyuma, dore bimwe mu byo ushobora gukora :

Wifata umwanzuro uhutiyeho

Menya ko iki ari igihe kidasanzwe kandi nta cyo bitwaye kumva uburakari n’akababaro. Icyo wakora cy’ibanze rero ni ugushaka ubufasha ku bashobora kubuguha kinyamwuga igihe icyo ari cyo cyo cyose utekereza ko ushobora kwiyangiza cyangwa ukangiza undi, cyangwa ukangiza umutungo.
Shaka ubufasha

Ntibigukwiriye ko ucibwa inyuma maze ngo ibyo bitekerezo ubyigumaniremo imbere. Ibi bigushengura kurushaho kandi uko ubigumana ni na ko biba bishobora kukugiraho ingaruka zikomeye kurushaho. Gerageza ushake uburyo wagabanya icyo gitutu. Sangiza inshuti wizeye n’abawe bandi ibyiyumvo byawe n’ibyo uri gucamo.

Ushobora kandi gusanga umuganga w’indwara zo mu mutwe n’umujyanama (therapist) waba uri wenyine cyangwa uri kumwe n’umukunzi wawe. Umujyanama wabyigiye ni umuntu wizewe watanga ubufasha nyobora bubageza ku bwiyunge cyangwa ku ntambwe yo gutangira ubuzima bushya butarimo umukunzi waguhemukiye, bitewe n’icyo uhisemo.

Emera amakosa, wikwikanyiza

Niba ari wowe waciye inyuma umukunzi wawe, intambwe ya mbere ibageza ku bwiyunge ni ukwemera amakosa utazana inzitwazo kandi ukirengera ingaruka z’ibikorwa wakoze. Kwemera ikosa nta buryarya ni igice kidashidikanywaho cy’ingenzi mu rugendo rwo gukira.

Ganira mu bwubahane

Kuganiriza umukunzi wawe umwubashye ni ingenzi cyane — kabone n’ubwo wowe n’umukunzi wawe mwaba mutabana, ni ukuvuga igihe mwatandukanye. Ibi biba ingenzi cyane kandi igihe mufitanye abana.

Aha muba mugomba kwemeranya mu bwubahane uko mubigenza ngo mutangiza umubano wanyu n’abana.

Mu gihe mushoboye kwiyunga, hari ubwo umukunzi wawe azagusaba gusiba amayira yose yaguhuzaga n’uwo mwamucanyeho inyuma.

Izere umukunzi wawe nta mbereka kandi utamucyurira

Niba wiyemeje kubabarira no kugumana n’umukunzi wawe cyangwa uwo mwashakanye waguciye inyuma, ni ngombwa ko ushaka ko umugarurira icyizere wamutakarije.

Umukunzi wawe waguciye inyuma yifuza ko umubabarira ubikuye ku mutima, bitari ukumukeka ubusa kuri buri kabaye kose kandi ukirinda guhora umucyurira ko yaguhemukiye.

Nubigenza utyo, uzamufasha kuguma ashikamye mu rukundo rwanyu, kandi bimufashe kwakira imbabazi no kuba atakongera kurota kuguca inyuma.

IRADUKUNDA Fidele Samson

Kuru uyu wa 05 Mutarama 2024 ahagana saa saba n’igice n’ibwo umuhanzi Rusanganwa Norbert wamamaye nka Kenny Sol yarahiriye kuzabana akaramata n’umukunzi we Kunda ukubutse mu gihugu cy’u Bushinwa aho asoreje amasomo.

Ni umuhango wabereye mu karere ka Nyarugenge mu murenge wa Nyakabanda.

Uyu muhango wagaragayemo ibintu bitandukanye yewe bimwe byatunguye benshi! Dore uko byagenze.

 Ntawari wemerewe gukora kuri telefoni.

Kuva Kenny Sol n’umukunzi we binjira mu nyubako y’umurenge, nta muntu wari wemerewe kuzamura telefoni ye kuko hatifuzwaga ufata ishusho, ifoto n’ibindi byerekeye ibyo.

Iyo wabaga urimo kuganira n’abantu kuri telefoni yawe (charting) wasabwaga ko telefoni yawe iba ireba hasi (Camera) yayo, ntibyari byemewe ko uyirebesha imbere nk’ibisanzwe.

Ibyo byakozwe kuri buri umwe witabiriye uyu muhango kugera hinjiye abandi bageni nabo bari bagiye gusezerana, hakaboneka agahenge ariko nabwo ntawari wemerewe guhirahira afotora Kenny Sol cyangwa umukunzi we.

Umuhango wahagaritswe by’igihe gito kubera umukobwa wari uje kwitambika.

Ubwo aba bombi bari bamaze guhabwa inyigisho n’impanuro z’uko bazabana neza, haje umukobwa asaba ko badasezerankwa.

Uyu mukobwa ntiyigaragaje ku bw’umutekano we ahubwo yohereje ibaruwa, bityo umuyobozi wari ugiye kubasezeranya, asaba ko baba bahagaritse iyi mihango kuko itegeko ribiteganya.

Habayeho gukora iperereza ariko umuyobozi w’umurenge wari urimo kubasezeranya, yanzura ko umukobwa waregaga ko abarimo gusezerana harimo uwamuteye inda, ko yibeshye amazina, abarimo gusezerana ataribo yari arimo kurenga.

Ibi byatumye benshi batunga intoki abandi bageni bari bamaze kwinjira. Icyakora umuyobozi w’umurenge, yavuze ko niba atibeshye, yakererewe cyane, bityo ko yazisunga inzego za Leta zikamufasha gukoresha uturemangingo ndangasano (ADN).

Iyo warebaga ku maso ya Kenny Sol ubwo umuhango wari uhagaze, wabonaga nta gihunga afite ku maso ahubwo ubona ko yatunguwe, ibyerekana ko habayeho kwibeshya nk’uko umuyobozi yabivuze.

Ibura ry’ibyamamare.

Kenny Sol ni umuhanzi umaze gukorana imishinga y’indirimbo n’abahanzi bagenzi be basaga 15, amaze gukorana n’abahanga mu gutanganya imiziki barenga icumi, abamaze kumufasha gutunganya amashusho y’indirimbo ze nabo ni benshi utibagiwe n’abandi bo mu ngeri zitandukanye z’imyidagaduro b’inshuti ze.

Abantu batunguwe no kubona nta cyamamare cyamuherekeje agiye gusezerana mu mategeko, nyamara arizo nshuti za hafi agira cyane ko ubuzima bwe ahanini ari imyidagaduro.

Ibi byatumye umunyamakuru wa Inyarwanda agira amatsiko bityo abaza, bamwe mu banyamuryango bari bitabiriye uwo muhango.

Umwe mubo twaganiriye batifuje gutangaza amazina yabo, yavuze ko bashakaga kubigira iby’umuryango,

ibyamamare bindi bikazatumirwa mu bukwe nyrizina.

Kugirwa ibanga.

Uyu muhango wo gusezerana kwa Kenny Sol n’umukunzi we Kunda, byibukije abantu ibyabaye ku munsi w’ejo ku wa 04 Mutarama ubwo Kimenyi Yves na Muyango basezeranaga ariko babigize ubwiru.

Kuri iyi nshuro nabwo byari ubwiru dore ko na bamwe bo mu muryango yombi batari babizi ahubwo batunuwe no kubona amafoto n’amashusho ku Inyarwanda.

Kubigira ibanga ikaba ari nayo mbarutso yo kudatumira abiganjemo ibyamamare kuko bazi ko ubuzima bw’imyidagaduro buhora hanze, bityo bakaba babugize ubwiru kugirango bitamenyekana.

Itangazamakuru ryashyiriweho bariyeri.

Bisanzwe bizwi ko iyo icyamamare runaka gikoze igikorwa gihuriza abantu benshi hamwe nk’ubukwe, igitaramo, ibirori runaka, urupfu n’ibindi, itangazamakuru rifata iya mbere mu gufata no gutangaza amashusho n’amafoto y’ibirimo gukorwa. Kuri iyi nshuro siko byari bimeze.

Itangazamakuru ntiryari ryemerewe gufata amashusho n’amafoto, iyo byabaga, byari ukwiyiba ucunganwa n’abasore b’ibigango barimo “Jean LUC” usanzwe urinda umutekano wa Bruce Melodie.

Bavugaga ko impamvu badashaka ko hari amafoto afatwa ari uko umukobwa atabaye kandi adakunda ubuzima bw’imyidagaduro.

Kenny Sol ubwo yajyaga guserana n’umugore we

Kenny Sol yaje mu modoka ya V8 igendwamo n’abifite 

Kenny Sol akigera mu nyubako y’umurenge wa Nyakabanda.

Kunda, umukunzi wa Kenny Sol

Mubi Cyane usanzwe yari yakajije  umutekano

Kenny Sol n’umugore we

Ikipe y’Ingabo z’Igihugu cy’u Rwanda, APR FC yaguye miswi na Simba SC y’ubusa ku busa izamuka muri 1/4 ari iya 3 mu itsinda.

Wari umukino usoza itsinda B mu irushanwa rya Mapinduzi Cup ririmo kubera Zanzibar.

Simba SC na APR FC zose zagiye kuwukina zaramaze kubona itike ya 1/8, wabonaga impande zombi abatoza bakoze impinduka nyinshi mu bakinnyi babanjemo.

Nko ku ruhande rwa APR FC, Thierry Froger yari yicaje abakinnyi nka Mbaoma, Pitchou, Clement bari bamufashije mu mikino iheruka ni mu gihe nka Simba SC yari yicaje abakinnyi nka Phiri, Onana, Chemalone, Baleke na Miquissone.

Igice cya mbere cy’umukino APR FC yagerageje gusatira ndetse igenda ibona amahirwe nk’umupira Christian yahinduye imbere y’izamu ariko Shiboub yashyiraho umutwe ukanyura hanze gato yaryo.

Ishimwe Christian na we yaje kwinjirana ubwugarizi bwa Simba SC ariko ateye mu izamu, umunyezamu Abel arawufata.

Muri iki gice cya mbere, amahirwe afatika Simba SC yabonye ni ayo mu minota y’inyongera aho Saido yateye koruneri bashyiraho umutwe, umunyezamu Pavelh Ndzila arawufata. Bagiye kuruhuka ari 0-0.

Simba SC yatangiye igice cya kabiri ikora impinduka izanamo Onana, Baleke na Miquissone. Phiri na we yaje kwinjiramo abasangamo.

Ku munota wa 56, abakinnyi ba APR FC bakinanye neza maze Ruboneka Bosco aha umupira mwiza Taiba ariko ateye mu izamu umunyezamu awukuramo.

APR FC yakoze impinduka za mbere ku munota wa 66, Kategeya Elie na Kwitonda Alain Bacca binjiramo havamo Shiboub na Sanda Soulei uri mu igeragezwa. Ni nako kandi Taiba na Gilbert baje kuva mu kibuga hinjiramo Victor Mbaoma na Abdourame Alioum.

APR FC yakinaga ubona ishaka igitego nko ku munota wa 77 aho Kategeya Elie yateye koruneri maze Bindjeme ashyiraho ikirenge ariko unyura hanze gato y’izamu.

Simba SC abakinnyi barimo Jose Luis Miquissone, Baleke bagerageje ariko umunyezamu Pavelh Ndzila ababera ibamba. Umukino warangiye ari ubusa ku busa.

APR FC yazamutse ari iya 3 mu itsinda B, muri 1/4 izahura na Yanga yabaye iya mbere mu itsinda C.

Mu itsinda A muri 1/4 hazamutse Azam FC na Mlandege, itsinda B hazamuka Simba SC, Singida na APR FC ni mu gihe mu itsinda C hazamutse Yanga, KVZ FC na Jamhuri SC.

Ibi byagiye bigaragazwa n'abahanga batandukanye aho mu gihe cyashize byagaragaraga ko abantu baryama batinze bakunda guhura na zimwe mu ndwara zibasira umutima ndetse na za diabete ku cyigero kingana n'10% ugereranije n'abaryama kare nk’uko abashakashatsi bo muri kaminuza ya Surrey yo mu Bwongereza babitangaje.

Ibi kandi byagarutsweho na Malcolm Von Schantz, umwarimu muri iyi kaminuza aho avuga ko iki kibazo kidakwiye kwirengagizwa bitewe n’uko basanze umuntu uryama atinze ari na we ubasha kubyuka kare kuko hari isaha iba yarabagiye mu mutwe ku buryo badashobora kuyirengagiza ngo bikunde bityo icyizere cy'ubuzima kigatakara gutyo.

Medisite itangaza ko ikindi giteye agahinda kuri aba bantu bakunda kuryama batinze ndetse bakabyuka kare, ubushakashatsi bwerekanye ko bagira ibyiyumviro byo kuba banywa itabi n’inzoga, bagakunda kunywa ikawa ngo ibarinde ibitotsi n'ibindi biyobyabwenge bibi ari na byo byiyongera kuri za ndwara z'umutima na diyabete bakagira ikibazo mu myanya y'ubuhumekero bagapfa buhoro buhoro.

Igiteye ubwoba kurusha ibindi kandi, ngo abantu bagira akamenyero kuryama batinze ndetse bakabyuka kare burya ngo si abo kwizerwa kuko n’iyo batanze gahunda ntibabura kuyica bitewe na ‘stress’ baba bifitiye bo ubwabo bigatuma bica amasezerano bagiranye na bagenzi babo, ibyo rero bituma bamwe muri abo batakarizwa icyizere burundu

Nyuma yo kubona izi ngaruka zose zishobora guterwa no kuba umuntu atinda kuryama akaza no kubyuka kare, ni byiza ko ukora akazi kawe neza ariko ukagira n’umwanya uhagije wo kuruhuka kugira ngo ubona uko ukora akazi kawe ku munsi ukurikiyeho bitewe n’uko kwirinda biruta kwivuza.

Rwanda Premier League na Gorilla Games Rwanda bakomeje igikorwa cy’amatora y’ibihembo by’abakinnyi bitwaye neza mu kwezi ku Ukuboza.

Ni ibihembo bigomba gutanga guhera mu mikino yabaye mu Ukuboza umwaka ushize. Ibihembo biri guhatanirwa, harimo igihembo cy’umutoza mwiza w’ukwezi, umukinnyi mwiza w’ukwezi, igitego cyiza cy’ukwezi ndetse na Save (kugarura umupira ugana mu izamu).

Amatora yatangiye batora abanyamakuru b’ibitangazamakuru byatoranyijwe, ndetse n’abakapiteni n’abatoza b’amakipe akina icyiciro cya mbere mu Rwanda.

Ku ruhande rw’abatoza, Mashami Vincent niwe uyoboye abandi n’amajwi 61, Thierry Froger akaza ku mwanya wa kabiri n’amajwi 43, Afahmia Lotfi amajwi 16, naho Habimana Sosthene akaza ku mwanya wa kane n’amajwi 12.

Ku gihembi cy’umukinnyi, Victor Mboama niwe uyoboye abandi n’amajwi 63, akurikirwa na Hakizimana Muhadjri amajwi 38 Luvumbu akaba ku mwanya wa 3 n’amajwi 24, naho Bigirimana Abedi akaba ari ku mwanya wa kane n’amajwi 9.

Save nziza y’ukwezi, Nzeyurwanda Djihad ukinira Kiyovu Sports, umupira yakuyemo bakina na Rayon Sports ufite amajwi 16, Niyonkuru Pascal wa AS Kigali bakina na Rayon Sports ufite amajwi 8 unganya na Sebwato wa Mukura bakina na AS Kigali, Tamale wa Rayon Sports bakina AS Kigali uza ku mwanya wa 4 n’amajwi 3.

Ku bijyanye n’igihembo cy’igitego cyiza, igitego cya mbere Hakizimana Muhadjri yatsinze bakina na Police FC gifite amajwi 40, Kategaya igitego yatsinze Gasogi United kuri ku mwanya wa 2 n’amajwi 18, Samuel Pimpong igitego yatsinze Mukura ikina na Kiyovu Sports gifite amajwi 7, naho igitego Sharif Bayo wa Kiyovu Sports igitego yatsinze Rayon Sports gifite amajwi 6

Icyiciro gikurikiyeho ni ugutora kuri Social media (Online Votes) aho hazakoreshwa imbuga nkoranyambaga za Rwanda Premier League, FERWAFA na Gorilla Games. Nyuma yaho akanama ka Tekinike kazafata umwanzuro ku byavuye aho hose habone gutangazwa abahembwa muri buri cyiciro. 

Umunsi wo Gutangaza abatsinze no gutanga ibihembo, bizaba  ku wa Kabiri tariki ya 16/Mutarama/2024, bikazanyura kuri imwe muri Televiziyo zikorera hano mu Rwanda.

Victor Mboama n’ubusanzwe ahagaze neza muri shampiyona kuko afite ibitego 12 mu mikino ibanza ya shampiyona 

Nzeyurwanda Djihad umupira yakuyemo Kiyovu Sports ikina na Rayon Sports uyoboye iyindi yose 

Hakizimana Muhadjri asanzwe azwiho gutsinda ibitego byiza 

Mashami Vincent yanikiye abandi ku gihembo cy’umutoza mwiza w’ukwezi kwa 12