Author: webrwanda

Irushanwa rya UEFA Champions League ni rimwe mu akunzwe na benshi ku Isi ndetse uramutse unarebye neza wasanga ari ryo rya kabiri nyuma y’igikombe cy’Isi mu gukundwa.

Muri iri rushanwa rihuza amakipe aba yarabaye aya mbere iwayo, usanga ari naho abakinnyi bakomeye bigaragariza batsinda ibitego bifasha amakipe yabo ndetse kugira ngo uhabwe igihembo cya Ballon d’Or habanza kurebwa n’uko uba wararyitwayemo.

Muri iyi nkuru tugiye kurebana abakinnyi 10 batsinze ibitego byinshi mu mateka ya UEFA Champions League:

10. Zlatan Ibrahimovic

Zlatan Ibrahimovic wanyuze mu makipe arimo Ajax, Juventus, Inter Milan, FC Barcelona, AC Milan, Inter Milan, Paris Saint-Germain na Manchester United, yatsinze ibitego 48 mu mikino 124 ya UEFA Champions League yakinnye guhera muri 2001.

9.Alfredo Di Stefano

Uyu mukinnyi wamenyekanye akinira ikipe ya Real Madrid, niwe uza ku mwanya wa 9 mu batsinze ibitego byinshi mu mateka ya Champions League. Alfredo Di Stefano ukomoka muri Argentine muri rusange yakinnye imikino 58 atsindamo ibitego 49 byose akaba yarabikoreye muri Real Madrid.

8.Thierry Henry

Uyu munyabigwi ukomoka mu gihugu cy’u Bufaransa yatsinze ibitego 50 mu mikino ya UEFA Champions League muri rusange. 

Theiry Henry yatangiye gukina imikino ya UEFA Champions League ari muri Monaco y’iwabo, ku myaka 20 gusa mu mikino 5 ye ya mbere atsindamo ibitego 7 maze nyuma akomereza mu gihugu cy’u Bwongereza mu ikipe ya Arsenal, ho mu mikino ya UEFA Champions League atsindirayo ibitego 35 naho mu ikipe ya FC Barcelona atsindirayo ibitego 8.

Nubwo uyu mugabo kuri ubu usigaye ari umutoza aza ku mwanya wa 8 mu batsinze ibitego byinshi ariko afite igikombe 1 gusa cya UEFA Champions League yatwaye muri 2009 ari muri FC Barcelona.

7.Thomas Müller

Thomas Muller arimo arakina Champions League ye ya 15 nk’umukinnyi wa FC Bayern Munich. Muri iyi myaka yose uyu mukinnyi yagiye atsindamo, usibye uwa 2018-19. Kuva yatangira gukina imikino ya UEFA Champions League muri 2008-09, yatsinzemo ibitego 53 ndetse anatanga imipira 23 yabivuyemo. 

Iyi mibare ya Thomas Muller ikubye kabiri iy’undi mukinnyi ukomoka mu Budage umukurikira mu gutsinda ibitego byinshi ari we Mario Gomez, we akaba afite ibitego 26 gusa muri Champions League.

Uyu mukinnyi w’imyaka 34 yegukanye ibikombe 2 by’iri rushanwa riruta andi ku mugabane w’Iburayi akaba yarabyegukanye muri 2012-13 ndetse no muri 2019-20.

6.Ruud van Nistelrooy

Uyu munyabigwi ukomoka mu Buhorandi wakinaga nka rutahizamu muri rusange yatsinze ibitego 56 muri UEFA Champions League. Nta mukinnyi wigeze ugeza ku bitego 50 muri Champions League mbere ya Ruud van Nistelrooy, gusa yabigejeje afite imyaka 31 mu mikino 60 yari amaze gukina ndetse aza no kureka ruhago vuba abandi bamunyuraho.

Ibi bitego yabitsinze akinira PSV Eindhoven y’iwabo mu Buhorandi, Manchester United dore ko ari nawe wayitsindiye ibitego byinshi muri UEFA Champions League bigera kuri 36 aho akurikirwa na Wayne Rooney ufite 30 na Ryan Giggs ufite 26 anabitsinda ari muri Real Madrid yakiniye hagati ya 2006 na 2010.

Nubwo Ruud van Nistelrooy yagejeje ibi bitego, agakina Champions League imyaka 11 ndetse akananyura mu makipe yari yaratwaye ibikombe byayo bigera ku 10 byose ubihurije hamwe muri icyo gihe, ariko we nta cyo yigeze atwara.

5.Raúl

Uyu munyabigwi wahoze akinira ikipe y’igihugu ya Espagne yatsinze ibitego 71 muri Champions League, ibintu bimugira umukinnyi wa 5 mu batsinzemo ibitego byinshi mu mateka. Raul wakiniye Real Madrid imyaka 16, niwe wa 3 mu bayitsindiye ibitego byinshi muri Champions League akaba yarayitsindiye ibitego 66 wenyine.

Kugeza muri 2014 niwe wari uyoboye mu bamaze gutsinda ibitego byinshi muri rusange mu mateka ya UEFA Champions League, ariko birangira Lionel Messi na Cristiano Ronaldo bahise bamujya imbere, nyuma na Karim Benzema na Lewandowski bakomerezaho.

Umukinnyi w’umunya-Espagne ukurikira Raul ni Fernando Morientes gusa amukubye kabiri kuko we yatsinze ibitego 33 gusa. Uyu mugabo kuri ubu usigaye utoza ikipe y’abato ya Real Madrid izwi nka ‘Real Madrid Castilla’ yegukanye ibikombe 3 bya UEFA Champions League, byose n’ubundi akaba yarabitwaye ari muri iyi kipe yo muri Espagne yavuyemo muri 2010 ajya gusoreza ruhago muri Schalke 04,Al Sadd na New York Cosmos.

4.Karim Benzema

Uyu rutahizamu kuri ubu ukinira ikipe ya Al Ittihad yo muri Arabia Saudite, muri rusange yatsinze ibitego 90 mu mikino ya UEFA Champions League. Kuva yatangira kuyikina muri 2005-06 ari muri Lyon kugeza avuye muri Real Madrid mu mpeshyi y’umwaka ushize, nta mwaka n’umwe yigeze asiba gutsinda. Bivuze ko mu myaka 18 yose yayikinnye yatsinzemo igitego.

Karim Benzema muri 2021-22 yahawe igihembo cy’umukinnyi watsinze ibitego byinshi muri Champions League muri uwo mwaka ndetse anafasha Real Madrid kwegukana igikombe nyuma yo gutsindira Liverpool ku mukino wa nyuma.

Usibye kuba Karim Benzema ari umukinnyi wa 4 umaze gutsinda ibitego byinshi mu mateka ya UEFA Champions League muri rusange, ahubwo ni nuwa kabiri mu ikipe ya Real Madrid aho yayitsindiye ibitego 78 muri iri rushanwa. Amaze kwegukana ibikombe 5 bya UEFA Champions League byose akaba yarabitwaye ari muri Real Madrid.

3.Robert Lewandowski

Uyu rutahizamu ufite imyaka 35 w’ikipe ya FC Barcelona, kugeza ubu amaze gutsinda ibitego 94. Roberto Lewandowski yatangiye gukina imikino ya UEFA Champions League muri 2010 ubwo yari ari muri Borussia Dortmund nyuma muri 2014 akomereza muri FC Bayern Munich kugeza muri 2022 yerekeje gukina muri iyi kipe yo muri Espagne.

Muri 2019 ni we wabaye umukinnyi watsinze ibitego byinshi muri Champions League akora amateka yo kuba umukinnyi wa mbere ukomoka mu gihugu cya Poland ubikoze binafasha FC Bayern Munich kwegukana igikombe gihita kiba n’icya mbere mu buzima bwe.

2.Lionel Messi

Lionel Messi ni we mukinnyi wa Kabiri umaze gutsinda ibitego byinshi muri Champions League bigera ku 129 ndetse ni na we mukinnyi wa mbere wakoze amateka yo gutsinda byinshi ari mu ikipe imwe dore ko muri FC Barcelona yahatsindiye 120 naho ibindi 9 akaba yarabitsindiye muri PSG. Ibi bitego byose uyu munyabigwi yabitsinze amakipe 40 atandukanye naho ikipe yatsinzemo byinshi akaba ari Arsenal bigera ku 9.

Nyuma yuko Lionel Messi ananiwe gutsinda mu mwaka we wa mbere yakinnye Champions League wa 2005-06 ariko indi myaka 28 yakurikiyeho yose yakurikiyeho yayitsinzemo. Ni we mukinnyi wenyine watsinze ibitego byinshi mu mukino umwe wa Champions League aho bigera kuri 5 muri 2011-12 ubwo FC Barcelona yanyagiraga Bayern Leverkusen ibitego 7-1.

1.Cristiano Ronaldo

Cristiano Ronaldo niwe mukinnyi watsinze ibitego byinshi mu mateka ya UEFA Champions League bigera kuri 140. Kuri ubu uyu mukinnyi ukinira Al Nassr yo muri Arabia Saudite birasa nk’aho nta bindi bitego azongera kuri 21 yatsinze ari muri Manchester United,105 yatsinze ari muri Real Madrid na 14 yatsinze ari muri Juventus.

Usibye kuba ariwe uyoboye, niwe wenyine wabashize gutsinda ibitego byinshi mu mwaka umwe w’imikino wa Champions League muri 2013-14 bigera kuri 17. Cristiano Ronaldo yegukanye ibihembo by’umukinnyi watsinze ibitego byinshi muri Champions League inshuro 7.

Uyu munya-Portugal yagiye atsinda ibitego mu mikino ya Champions 93 itandukanye, akaba yaratsinze amakipe 38 atandukanye mu gihe ikipe yatsinze ibitego byinshi ari Juventus bigera ku 10.

Cristiano Ronaldo ni we uyoboye urutonde rw’abakinnyi batsinze ibitego byinshi mu mateka ya UEFA Champions League 

Ku bijyanye n’ingendo zo mu kirere, kwakirwa neza ku kibuga cy’indege bishobora kugira icyo bihindura mu rugendo rwawe. Muri Afurika, ibibuga by’indege bimwe bigaragara mu bikorwa byihariye,kubakwa neza, serivisi nziza, hamwe n’uburambe bw’abagenzi muri rusange.

Skytrax, umuryango uzwi ku rwego mpuzamahanga usuzuma ibibuga n’indege ku Isi, yashyize ahagaragara raporo yayo ku bibuga by'indege byiza ku Isi, inerekana ibihugu 10 byo muri Afurika byiza mu 2024, ibi bihugu bihuriye ku kuba byubatse neza hamwe no gutanga serivisi nziza:

1.Durban King Shaka Airport (Afurika y’Epfo)

Ikibuga cy’indege mpuzamahanga cya King Shaka gihagaze nk’urumuri rw’indashyikirwa mu bibuga by’indege mpuzamahanga bya Afurika. Hamwe n’umuturirwa w’ubuso bwa  102.000 m2.Iki kibuga cy’indege   cyakira  abagenzi Miliyoni 7.5 ku mwaka.

2.Marrakech Airport (Morocco)

Ikibuga cy’indege mpuzamahanga cya Marrakech, giherereye muri Maroc (Morocco), ni irembo ry’umwe mu mijyi ikomeye kandi ikungahaye ku muco. Ni ibibuga bibiri bikomatanyije hamwe, ku buso bwa 22.000 m2 (236.806sq ft). Iki kibuga kandi cyagenewe gutwara abagenzi 2.500.000 ku mwaka.

3. Kigali Airport(Rwanda)

Ikibuga cy'indege mpuzamahanga cya Kigali, gifite ibikoresho n'ibikorwa remezo bigezweho, harimo na telefone imwe ifite ibikoresho byo gupima ubunini bw'indege zitandukanye.

Gifite kandi akamaro mu karere kuko gikorana n’ibihugu byo mu turere. Cyakira abagenzi Miliyoni 1.5 ku mwaka.

4. Port Elizabeth Airport (Afurika y’Epfo)

Ikibuga cy’indege cya Port Elizabeth cyahoze cyitwa ikibuga cy’indege cya H. F. Verwoerd. Gikoreshwa mu ngendo  ziva i Johannesburg, Bloemfontein, Durban, Cape Town na Londere y’Iburasirazuba. Kuri ubu iki kibuga cy'indege cyakira abagenzi barenga Miliyoni 1,2 ku mwaka, ndetse kigwaho indege zirenga 60 000 z’imizigo ya  toni zirenga 800.

5.Bloemfontein Airport (Afurika y’Epfo )

Cyahoze cyitwa Ikibuga cy’indege cya Bloemfontein, cyiswe ikibuga cy’indege mpuzamahanga cya Bram Fischer mu 2012 na Perezida Jacob Zuma. Ikibuga cy’indege gitanga serivisi z’indege ku rwego rw’Isi.Cyakira abagenzi barenga 300 000 hamwe n'ingendo zo mu kirere 17 000 ku mwaka.

6. East London Airport (Afurika y’Epfo)

Ikibuga cy’indege cya Londere y’Iburasirazuba (ELS) ni ikibuga gito, ariko gihuze cyane gikorera mu mujyi wa East London, mu ntara ya Cape y’Iburasirazuba. Ikibuga cy'indege gikora ingendo ziri hagati ya 20 na 30 buri munsi, cyakira abantu 946.000 buri mwaka.

7. Entebbe Airport (Uganda)

Abategetsi b’Abakoloni b’Abongereza bafunguye ikibuga cy’indege kubera aho giherereye ku kiyaga cya Victoria. Ikibuga cy'indege mpuzamahanga cya Entebbe cyicaye mu buryo butaziguye kuri Ekwateri (Equator) ku burebure bwa 00.020 Amajyaruguru n'uburebure bwa 320 Iburasirazuba.

8.Antananarivo Airport (Madagascar)

Ikibuga cy'indege mpuzamahanga cya Antananarivo Ivato, gifite ibyiciro bibiri by’ingenzi: itumanaho rimwe ry’indege zo mu rugo hamwe na telefone imwe y’indege mpuzamahanga. Ukuboza 2021, hafunguwe itumanaho rishya. Ikibuga cy’indege cya Antananarivo cyakiriye abagenzi barenga Miliyoni muri 2019, ni ubwa mbere mu myaka 20.

9.Rabat Airport (Morocco)

Ikibuga cy’indege cya Rabat, giherereye i Salé, muri Maroc, gikora nk’ikibuga cy’indege cya gisivili na gisirikare, gikoreshwa cyane n’abo mu murwa mukuru wa  Rabat ndetse n’ahandi hose muri rusange

10.Luanda Airport (Angola)

Ikibuga cy’indege mpuzamahanga cya Luanda, (Kode y’Ikibuga cy’indege cya IATA: LAD) ni ikibuga mpuzamahanga gikoreshwa n’abo mu  murwa mukuru wa  Luanda  n’abandi bose muri rusange.

Ku wa 20 Mata 2024 ubwo habaga igikorwa cyo kwibuka Jenoside Yakorewe Abatutsi mu 1994, hibutswe abagore n'abana biciwe i Sovu, hanatangwa ubuhamya bw'ukuntu abahiciwe babanje gushinyagurirwa n'Interahamwe.

Mu buhamya bwatanze n'umwe mu barokokeye i Sovu [tutashatse gutangariza imyirondoro] yavuze ko na mbere y'uko Jenoside itangira nko mu 1990 iwabo babwirwaga amagambo y'incyuro, bagatotezwa mu buryo bukomeye. Yatanze ingero z'uburyo iyo bajyaga kuvoma bakiri abana bababwiraga ko Abatutsi bari buvome nyuma.

Uwatanze ubuhamya yavuze ko muri aka gace ka Sovu Jenoside yakorewe Abatutsi yatangiye tariki ya 13 Mata 1994, ariko ko mu bindi bice bahanaga imbibi nka Nkungu na Munyaga ho yari yaratangiye mbere, bakabona abatutsi baho bahunga abandi batwikirwa inzu.

Yavuze ko tariki ya 13 aribwo bavuye mu rugo iwabo abagabo n'abasore b'abatutsi babasaba kujya gukumira igitero cyari giturutse Nkungu na Munyaga, icyo gihe Papa wabo ngo yababwiye ko agiye kubahisha ku mugabo yari yaragabiye inka ariko ngo ntibyakunze, ahubwo abenshi batangiye guhunga buri wese ku giti cye.

Ati 'Interahamwe z'abana zadufataga ku ngufu, Interahamwe za ba se zigafata ababyeyi bacu zikabasambanya. Twiriwe muri ubwo buzima mpaka, tuza kuvugana ngo dusubire mu matongo iwacu. Icyo gihe induru zari ziri kuvuga ahantu henshi kuko bari bari kubatema.'

Uwatanze ubuhamya yavuze ko nyuma yo guhungira ku matongo y'iwabo Interahamwe zahabasanze zirongera zirabasambanya ndetse uwari uzikuriye atumaho lisansi yo gutwika iwabo babireba, yavuze ko babakingiranyemo barahatwika ku bw'amahirwe bashika urugi bavamo bose ari bazima.

Yavuze ko yagiye kwihisha ahantu mu mugano ahasanga undi mugore wahigwaga afite abana babiri, Interahamwe zaje kubavumbura zirabazamura zibagejeje ahantu ku muhanda zica umwe muri ba bana babiri zimukubise impiri mu mutwe kuburyo ubwonko bwasohotse hanze.

Yavuze ko bigeze tariki ya 18 na 19 Mata abari abayobozi batangiye guhamagarira abagore n'abana guhungira ku mashuri ya Sovu, bavuga ko nta muntu wongera kubica ahubwo bashaka kubakiza.

Ubwo buryo bwatumye abagore, abakobwa n'abana bava aho bari bihishe baraza bakajya babashyira mu mashuri, bamwe batangira kwizera ko bagiye kurokoka.

Ati 'Hari umugabo wazanye ibitoki, ibishyimbo ndetse n'urusenda tugira ngo bagiye kudutekera ariko bahise bacanira umuriro bashyiramo rwa rusenda ubundi bahungiza umuriro bawerekeza aho twari turi kugira ngo imyotsi yarwo itwice.'

'Ubwo niko Interahamwe ziturwanira twe n'ababyeyi bacu bajya kudusambanya, ababyeyi bacu niko bavuzaga induru babasambanya natwe abakiri bato badusambanya. Twabayeho muri ubwo buzima, abana bari babashyize mu ishuri ryabo nabo tukajya twumva barira kubera rwa rusenda.'

Uwatanze ubuhamya yavuze ko igitero cyari cyagiye kwica i Mwulire cyavuyeyo gihitira i Sovu ku mashuri, ngo bahereye ku mukecuru wari ushaje cyane bamukurubana mu kibuga ku buryo imvi zagiye zisigaramo arinda apfa.

Ati ' Uwo munsi bahise binjira mu mashuri batangira gutemagura abantu, abandi babakubita impiri. Njye bagiye kungeraho ndyama nunamye ngo banteme ntari kubabona, hari umwana wari uri iruhande rwanjye baramuteruye bamukubita ku gikuta bamungereka hejuru we n'abandi bantu babiri, bahavuye baziko nanjye napfuye kuko abari bari mu ishuri bose barabatemye.'

Yavuze ko yaje kwikorahora yumva ni muzima uretse amaraso y'abantu bari bamugeretse hejuru, yavuze ko yaje kubyuka ava muri iyo mirambo arasohoka Interahamwe ziramukurikira azicikira mu rutoki.

Ubwo ngo yakomeje kwihisha mu bice bitandukanye kugeza ubwo musaza we bamutemye areba aho yari yihishe, uretse musaza we ngo bagiye banatema abandi batutsi benshi zikabica ari nako zigenda zihunga ngo kuko Inkotanyi zari zageze muri Rwamagana.

Yakomeje kwihisha kugeza ubwo yabonye abasirikare bafite ibitenge mu ijosi bavugaga Igiswahili aza kuva aho yari yihishe, ngo baramufasha bamwoza amaraso menshi yari amuriho ubundi bamujyana mu nkambi kimwe n'abandi baturage.

Yavuze ko ashimira Inkotanyi ku kuba zaratumye yongera kubaho, akanaba mu gihugu cyiza kirimo amahoro bitandukanye na mbere ya Jenoside yakorewe Abatutsi.

Tito RUtaremara yari mu bitabiriye iki gikorwa cyo kwibuka Abatutsi biciwe i Sovu

I Sovu hiciwe abagore n’abana basaga 600 babeshywe kurindwa

Muri iki gikorwa hanashyinguwe mu cyubahiro imibiri 10 yabonetse

Ku itariki 18 Mata 2024, Yago yanyujije ubutumwa kuri X avuga ko 'Sosiyete yitwa Marchal Real Estate yatwemereye ikibanza mu Mujyi wa Kigali ubwo twari mu gitaramo cyo kumurika album (Suwejo) amaso ko yaheze mu kirere ni amahoro cyangwa niko mukora?'

Uyu muhanzi wagaragaje icyizere gike cyo kuzabona uyu mutungo utimukanwa yemerewe n'iyo sosiyete, yasoje ubutumwa bwe agira ati 'Bimaze iki kwemera ikintu imbere y'imbaga ntugisohoze?'

Umunyamakuru akaba n'umuvugizi wa Marchal Real Estate Developpers, Chita Magic yahise asubiza Yago kuri X ati “Bwana Yago, mu gitaramo cyawe hagaragaye amakosa aho umuyobozi wa gahunda [MC] yavuze ko sosiyete itanze ikibanza ari KTN RWANDA”.

Muri uwo mwanya YAGO yagarutse asubiza Julius Chita ati 'Ndabona ari wowe muvugizi wa sosiyete. Ntunguwe cyane no kuba ibyo uvuze byose nta nakimwe narinzi ariko kuko wiyemeje kubeshya..ngaho hangana n'abo ba-Diaspora murimo gutuburira no kubiba utwabo njyewe ntegereje igihe muzatangira icyo kibanza.'

Impaka nyinshi zakurikiye ibyo biganiro, zatumye abenshi bibaza impamvu haje izina rya KTN Rwanda muri ibyo bibazo kandi itarigeze igaragara mu baterankunga b'icyo gitaramo.

Ubuyobozi bwa KTN Rwanda bwatangaje ko nta hantu na hamwe bahuriye n'ibyabaye mu gitaramo cya Yago Pon Dat.

Umuvugizi wa KTN Rwanda, Munyaneza Yvette yavuze ko bitari bikwiye ko babinjiza mu kibazo cya Yago na Marchal Real Estate Developpers nta ruhare na ruto babigizemo, ahubwo ngo abagiranye ibibazo bakwiye kubikemura badakoresheje izina rya KTN Rwanda.

Munyaneza yavuze ko iyo bateye inkunga umuntu bigira inzira bicamo kandi bigakorwa ku buryo ibyo biyemeje babisohoza neza kandi vuba.

KTN Rwanda yatangiye guhuza abagurisha n'abaguzi mu mitungo itimukanwa kuva mu 2012. Yaburiye Abanyarwanda kwitondera amasosiyete cyangwa abantu biyitirira KTN Rwanda mu gushaka gutanga serivisi zisa n'izabo.

Umukozi wese wa KTN Rwanda aba yambaye umwambaro w'akazi wanditseho KTN Rwanda kandi anitwaje ikarita y'akazi.

KTN Rwanda ibarizwa mu nyubako ya MIC ihererye i Nyarugenge cyangwa ukabahamagara kuri +250783001414/ +250789000422 cyangwa ugasura urubuga rwayo rwa www.ktnrwanda.com ugahabwa serivisi yose wakenera.

KTN Rwanda yavuze ko ntaho ihuriye n’ikibanza Yago yemerewe

Uko Isi igenda itera imbera ni nako ubuzima na bwo bugenda bwimukira ku mbuga nkoranyambaga, biragoye ko hari ikintu washaka ngo ukibure wifashishije murandasi.

Ni nayo mpamvu abantu benshi muri iki gihe iyo bashaka ko ibintu bya bo bimenyekana bifashisha imbuga nkoranyambaga.

Muri iyi nkuru tugiye kurebera hamwe ibyamare 7 ku Isi bica agatubutse kugira ngo bibe byakwamamariza umuntu ku rukuta rwa bo rwa Instagaram.

Urubuga rwa Influencer Marketing Hub rwagaragaje ko mu bushakashatsi rwakoze, bwagaragaje ko byibuze muri uru rutonde rw’ibyamamare 7 byishyurwa menshi kuri Instagram, ‘Post’ imwe iri hagati ya miliyoni 2 z’amadorali na miliyoni 3 z’amadorali.

7. Kim Kardashian – Umuhanzikazi

Kim Kardashian ni umuhanzikazi w’Umunyamerika wanditse izina mu miziki, akaba na rwiyemezamirimo, ni we uru ku mwanya wa 7 kuri uru rutonde.

Uyu mugore w’imyaka 43 wahoze ari umugore wa Kanye West batandukanye muri 2022, ‘post’ imwe yamamaza ku rukuta rwe rwa Instagram aca amadorali miliyoni 2.176 (2,808,384,768 Frw)

6. Ariana Grande Butera – Umuhanzikazi

Ariana Grande Butera ni umuhanzikazi w’umunyamerika uzwi mu njyana Pop, uretse ibi ni umukinnyi wa filime akaba n’umwanditsi w’indirimbo. ‘Post’ imwe yamamaza kuri Instagram aca amadorali miliyoni 2.264 (2,921,959,152 Frw).

5. Dwayne Douglas Johnson – Umukinnyi wa filime

Dwayne Douglas John wamamaye muri sinema nka The Rock ni umwe mu byamamare byishyurwa amafaranga menshi kuri Instagram. Uyu mugabo usanzwe ari na rwiyemezamirimo, byibuze yishyurwa amadorali miliyoni 2.326 (3,001,977,468 Frw) kuri ‘post’ imwe.

4. Kylie Jenner – Umunyamakuru

Umunyamakuru akaba na rwiyemezamirimo ukomoka muri America, Kylie Kristen Jenner, post imwe ku rukuta rwe rwa Instagram aca amadorali miliyoni 2.386 (3,079,414,548 Frw).

Selena Gomez – Umuhanzi

Selena Gomez ni umunyamerikazi w’umuhanzi, umwanditsi w’indirimbo ndetse akaba n’umukinnyi wa filime w’imyaka 32. Ushaka ko akwamamariza ku rukuta rwe rwa Instagram, ugomba kuba witwaje amadorali miliyoni 2.558 (3,301,400,844 Frw).

2. Lionel Messi – Umukinnyi w’umupira w’amaguru

Lionel Messi ni umukinnyi w’umupira w’amaguru ukomoka muri Argentine wakiniye amakipe nka FC Barcelona yo muri Espagne, PSG yo mu Bufaransa ubu akinira Inter Miami muri Leta Zunze Ubumwe za Amerika.

Uyu rutahizamu ufatwa nk’umwe mu bakinnyi beza Isi yagize, uretse umushahara ahembwa, aninjiza agatubutse kuri Instagram iyo hari umuhaye ikiraka cyo kwamamaza. Post imwe yamamaza ku rukuta rwe rwa Instagram yishyura amadorali miliyoni 2.597 (3,351,734,946 Frw).

1. Cristiano Ronaldo – Umukinnyi w’umupira w’amaguru

Cristiano Ronaldo ukomoka muri Portugal ukinira ikipe ya Al Nassr muri Saudi Arabia ni muntu wishyurwa amafaranga menshi mu kwamamaza kuri Instagram, aho ‘post’ imwe yamamaza ku rukuta rwe rwa Instagram uba ugomba kwishyura amadorali miliyoni 3.324 (4,173,858,612 Frw).

Uyu mukinnyi wakiniye amakipe nka Manchester United mu Bwongereza, Real Madrid muri Espagne na Juventus mu Butaliyani yagiye ashyiraho uduhigo akuraho utundi, akaba umwe mu bakinnyi beza ba ruhago Isi yagize. Kuba ari we wishyurwa menshi si impanuka kuko ni na we ku Isi ukurikirwa n’abantu benshi kur Instagram aho akurikirwa na miliyoni 268.