Author: webrwanda

Ni umukoro uru rubyiruko rwihaye nyuma yo gusoza ibiganiro by'iminsi ibiri byiswe 'Rwanda Reflect Seminars' byateguwe n'Umuryango Rwanda We Want' ufatanyije na International Alert Rwanda mu rwego rwo kwibuka ku nshuro ya 30 Jenoside yakorewe Abatutsi.

Ibi biganiro byitabiriwe n'urubyiruko 60 rubarizwa mu Nama y'Igihugu y'Urubyiruko, urwo mu Muryango Rwanda We Want n'urubarizwa mu mushinga USAID Dufatanye Urumuri, ushyirwa mu bikorwa na International Alert Rwanda hamwe na ARCT Ruhuka

Ibi biganiro byibanze ku gusobanurira urubyiruko ikura ry'ingengabitekerezo yagejeje kuri Jenoside yakorewe Abatutsi mu 1994 ndetse n'isura Igihugu gifite ubu nyuma y'imyaka 30.

Basobanuriwe uburyo imiyoborere mibi n'uburezi bw'ivangura byabaye inkingi zikomeye mu gukwirakwiza urwango rwagejeje kuri Jenoside yakorewe Abatutsi mu 1994.

Kwigira ntibindeba kw'amahanga ndetse n'itangazamakuru rutwitsi na byo byasobanuwe nk'imwe mu mpamvu zagejeje kuri Jenoside yakorewe Abatutsi. Itangazamakuru ndetse n'imiyoboro inyuranye yo gusangira amakuru uru rubyiruko rweretswe ko kuri ubu rufite uruhare runini mu kubyifashisha rukebura abafite ibitekerezo bisenya banyuzaho.

Nyuma y'ibi biganiro, uru rubyiruko rwiyemeje kuba ku isonga mu gusakaza amakuru yubaka ubumwe, amahoro n'ubudaheranwa bifashishije imbuga nkoranyambaga bari basanzwe bakoresha mu kwidagadura akenshi.

Twiringiyimana Ézechiel uri mu bitabiriye ibi biganiro, yavuze ko bagiye kujya bakoresha imbuga nkoranyambaga mu buryo burenze ubwo kwidagadura.

Yagize ati 'Ubusanzwe ku mbuga nkoranyambaga tujyaho tugiye nko gushyiraho amafoto, ibigezweho n'ibindi bidafite icyo biri butwigishe. Ubu tugiye kujya tuzikoresha twiga ariko tunagaragariza abapfobya Jenoside yakorewe Abatutsi ko yabaye ndetse n'uburyo yakozwemo. Abashaka kugoreka amateka n'abayandika uko atari tukajyaho tuvuguruza ibyo batangaje bitari byo'.

Mukanyandwi Leah yavuze ko amateka yabashije gusobanukirwa agiye kuyifashisha abera imboni bagenzi be.

Ati 'Hari amateka twagiye twiga cyangwa tukayasobanurirwa igice ariko uyu munsi nabashije kuyamenya. Hari urubyiruko rwinshi hanze rutazi aya mateka kandi ugasanga abayigisha na bo bagifite ibikomere batangira kuyigisha bagasubira muri bya bihe. Nk'urubyiruko, tugiye kwegera urundi rubyiruko turuganirize ku buryo hagize nuzana amacakubiri rwabasha kuyarwanya kuko rwasobanukiwe ukuri'.

Ikitegetse Nadine yavuze ko na we yize ko gusangiza abandi amakuru ku mbuga nkoranyambaga bigomba gushyirwamo inyurabwenge, umuntu agakwirakwiza amakuru y'ukuri kandi yubaka kuko wajyaga usanga bamwe bagwa mu mutego wo gukwirakwiza ibintu ngo kuko bisekeje gusa kandi ababihimbye bo bafite indi migambi mibi bagamije.

Umuyobozi Nshingwabikorwa w'Umuryango Rwanda We Want, Rulinda Colbert avuga ko urubyiruko ruba rufite inyota yo kumenya amateka ariko rimwe na rimwe ntirubone umwanya uhagije wo kuyasobanukirwa neza.

Asobanura ko ari byo bahereyeho bategura guhugura Urubyiruko kugira ngo rugire ubumenyi bwimbitse ku mateka, rubashe kuyashingiraho rwubaka ubumwe n'ubudaheranwa mu Banyarwanda.

Ku bwa Ariane Inkesha, Umuyobozi Mukuru wa International Alert Rwanda, bene ibi biganiro ni ingirakamaro kuko bifasha urubyiruko kwiga rukamenya gushishoza bityo rukabasha kuvumbura ibimenyetso byasubiza ubumwe bw'Abanyarwanda inyuma.

Urubyiruko 60 rwitabiriye ibiganiro 'Rwanda Reflect Seminars' ni urwo mu turere twose tw'umujyi wa Kigali. Biteganijwe ko ibi biganiro bizakomereza mu ntara zitandukanye.

Umunyamakuru Ayanone Solange ari mu batanze ikiganiro ku rubyiruko

Bagize umwanya wo kubaza ibibazo ku mateka y’u Rwanda

Umunyamabanga Uhoraho muri Minisiteri y’Urubyiruko n’Iterambere ry’ubuhanzi, Busabizwa Parfait, ubwo yatangaga ikiganiro

Umuryango w’Ubumwe bw’Uburayi na wo watanze ubutamwa kuri uru rubyiruko

Uru rubyiruko rwahuguwe ku ngeri zinyuranye

Uru rubyiruko rwhuguwe ni urwo mu Mujyi wa Kigali

Aba basore bikekwa ko bibye aya mafaranga bacukuye iduka rya Nzabonantuma Laurent, se wa Nsanzamahoro Jean Baptiste ucururiza mu Karere ka Gicumbi, Umurenge wa Cyumba, Akagari ka Muhambo mu Mudugudu wa Nyamabare, tariki 21 Mata 2024.

RIB yatangaje ko tariki 26 Mata 2024 yahise ita muri yombi ndetse inafunga Nsanzamahoro Jean Baptiste w'imyaka 23, afatanwa miliyoni 7 Frw yari yaratabye mu mwobo mu ishyamba.

Umuvugizi wa RIB, Dr Murangira B Thierry yatangaje ko ku wa 27 Mata 2024, yahise ishyikiriza amafaranga yafashwe uwari wayibwe mu gihe andi yibwe na Ndizihiwe Jean Claude wahise atoroka.

Ati 'RIB yashyikirije amafaranga angana na 7,431,000 Frw uwari wibwe witwa Nzabonantuma Laurent. Aya mafaranga yasubijwe uwari wibwe akaba ari umuhungu we wayafatanwe kuko yari yaracukuye umwobo mu ishyamba ayahishamo mu gihe andi mafaranga yatwawe n'uwatorotse.'

Yanavuze ko uwafashwe afungiye kuri sitasiyo ya RIB ya Cyumba mu gihe dosiye ye ikiri gutunganywa kugira ngo ishyikirizwe Ubushinjacyaha.

Ati 'RIB iramenyesha abantu kugana gahunda ya za banki ibafasha guherekanya no kubika amafaranga ku buryo butanga umutekano wayo. Abantu barasabwa kujya babika amafaranga mu ngo cyangwa mu maduka aho bakorera kuko ibyo bishobora gutanga icyuho cyo kwibwa'.

Ingingo ya 166 mu itegeko riteganya ibyaha n'ibihano muri rusange iteganya ko umuntu uhamijwe iki cyaha ahanishwa igifungo kuva ku mwaka umwe ariko kitarenze imyaka ibiri n'ihazabu y'amafaranga y'u Rwanda kuva kuri miliyoni 1 Frw ariko atarenze miliyoni 2 Frw, imirimo y'inyungu rusange mu gihe cy'amezi atandatu cyangwa kimwe gusa muri ibyo bihano.

Ingingo ya 167 ivuga ku mpamvu nkomezacyaha ku cyaha cyo kwiba igaragaza ko mu gihe kwiba byakozwe nijoro cyangwa byakozwe n'abantu barenze umwe igihano ku cyaha cyo kwiba cyikuba kabiri.

Abagize uruhare mu ishyirwa mu bikorwa rya Jenoside yakorewe Abatutsi biganjemo urubyiruko, ariko n'ingabo za RPA zayihagaritse nazo zari urubyiruko rwiyemeje kurwanya ikibi, rugatanga ubuzima.

Urubyiruko rwo mu Karere ka Ruhango rwasuye urwibutso rwa Jenoside rwa Kigali ruri ku Gisozi kuri uyu wa 28 Mata 2024, rwatangaje ko ari umwanya mwiza wo kumenya amateka nyakuri yaranze u Rwanda, bakazayashingiraho mu kubaka ahazaza hazira ingengabitekerezo ya Jenoside.

Batamuriza Sylvie ufite imyaka 17 yagize ati 'Tukiri mu rwibutso hari ahantu nabonye handitse ngo n'igisekeramwanzi ntabwo cyagiriwe impuhwe. Ubu nanjye ntabwo navuga ko ndi muto, ni njye ukwiye kwigisha abandi aya mateka, nkibaza ngo nk'abazankomokaho nkwiye kubigisha ayahe mateka? Nubwo tutari turiho ariko iyo tuje aha tugenda tubona ibimenyetso bimwe na bimwe tukabona ukuri kw'ibyabaye.'

Umuyobozi w'umuryango w'urubyiruko witwa Rungano Ndota Initiative, Gatera Vincent Pallotti yatangaje ko bafite urubyiruko rurenga 300 rwo mu mirenge itandukaye y'Akarere ka Ruhango batoza indangagaciro zirimo n'imiyoborere, bakanabafasha kumenya amateka y'igihugu kugira ngo bazavemo abayobozi beza.

Ati 'Imiyoborere ni imwe mu nkingi ikomeye twubakiyeho, ntabwo umuntu ukiri urubyiruko yaba umuyobozi atazi igihugu cye, izo ndangagaciro z'umuyobozi ntabwo wazigira utazi uwo uri we, ntabwo waba umuyobozi utazi amateka y'igihugu cyawe.'

'Tuba twabazanye aha kugira ngo bige muri rusange amateka atari ayo mu Ruhango gusa ahubwo ay'igihugu cyose kugira ngo barebe ngo 'ese nk'abantu bitegura kuba abayobozi ni gute bayobora intambwe zabo n'abo bayobora kugira ngo batazava aho bateshuka bakagwa mu makosa nk'ayo bamaze kubona abandi bakoze yagejeje kuri Jenoside yakorewe Abatutsi.'

Yagaragaje ko bahora bashishikariza urubyiruko kurwanya abagifite ingengabitekerezo ya jenoside haba ku mbuga nkoranyambaga ariko ndetse no mu miryango yabo bagahagarara ku ndangagaciro z'igihugu cyabo.

Umukozi w'Akarere ka Ruhango ushinzwe Urubyiruko n'Umuco, Usengimana Jean Paul, yavuze ko mu byo bashyiramo imbaraga ari ugufasha urubyiruko kumenya amateka no kwifashisha ikoranabuhanga mu kubwiza ukuri abashaka kugoreka amateka y'u Rwanda banyuze ku mbuga nkoranyambaga.

Ati 'Dufite gahunda yo kwigisha urubyiruko kugira ngo basobanukirwe cyane amateka kuko ubu ni rwo rufite inshingano abakuru bari kugena basaza. Urubyiruko rwavutse muri icyo gihe cya Jenoside rugeze mu myaka yo gufata inshingano no kuba bakora ibikorwa bitandukanye byubaka igihugu rero ni ngombwa ko bamenya amateka y'igihugu cyacu kuko utazi iyo ava ntamenya iyo ajya. Rero twebwe nk'urubyiruko ni twe dufite inshingano zo kubaka igihugu kuko n'ubundi cyasenywe n'urubyiruko.'

Yagaragaje ko mu Karere ka Ruhango bafite izindi nzibutso basura bakiga amateka ya Jenoside yakorewe Abatutsi mu 1994 ariko ko bagomba kumenya amateka y'igihugu cyose kugira ngo bashobore gusubiza abashaka kuyipfobya.

Ibyavuye mu ibarura rusange rya 2022 bigaragaza ko 75% by'Abanyarwanda ari urubyiruko rutarengeje imyaka 35.

Urubyiruko rwa Ruhango rwavuze ko rwungukiye ubumenyi bukomeye ku Rwibutso rwa Jenoside rwa Kigali

Bavuze ko nyuma yo gusobanukirwa amateka y’u Rwanda bizabafasha kubaka igihugu kizira ingengabitekerezo ya Jenoside

Aya mafaranga ni atangwa buri mwaka hagendewe ku manota y'imihigo. Ayo basabe ni ayatanzwe mu biruhuko birebire by'umwaka wa 2023.

Iki kibazo kikimara kugaraga abatari bayabonye bahise babimenyesha Akarere nako kabizeza kugikemura, kuva icyo gihe kugeza ubu amaso yaheze mu kirere.

Umwe muri bo waganiriye na IGIHE yagize ati “Uzi guhora witeguye ko urabona amafaranga? Byatumye umuntu yanduranya kubera amadeni kuko twari twizeye kuyabona. Ntabwo nari narangiza kwishyurira abanyeshuri kandi nzinduka njya kurera.'

Undi yagize ati “Duhora twibaza icyo batujijije kuko bagenzi bacu barayabonye ndetse ubu turi kwitegura kubona andi ntakuntu bari baduha. Turasaba inzego bireba ko zadufasha tukabona amafaranga yacu kuko Akarere twagatakiye inshuro nyinshi.”

Umuyobozi w'Akarere ka Gakenke, Vestine Mukandayisenga, yizeza aba barimu batabonye inyongera yabo ko ibyo akarere kasabwaga kamaze kubikora, kababa karamaze kohereza dosiye yabo muri Minisiteri y'Imari n'Igenamigambi, akabasaba kuba bihanganye.

Umwarimu wagize amanota 70-79 mu mihigo bamuha 3% y'umushahara ahabwa bagakuba n'amezi 12 agize umwaka, naho ufite 80-100 bamuha 5% y'umushahara ahabwa bagakuba n'amezi 12 y'umwaka.

Ibiro by’akarere ka Gakenke

Uko umukino wagenze umunota ku munota:

Umukino urangiye Arsenal itsinze Tottenham Hotspur ibitego 3-2 ikomesa kuba ku mwanya wa 1 n’amanota 80.

93′ ikipe ya Tottenham Hotspur iri gushaka igitego cya 3 ku bubi no kubwiza,Richarlison yarazamukanye umupira yihuta gusa William Saliba amutereka hasi umusifuzi atanga kufura itagize icyo itanga 

Umukino wongeweho iminota 6

88′ Arsenal ikoze impinduka mu kibuga havamo Martin Odegaard hajyamo Jakub Kiwior 

84′ Tottenham Hotspur ibonye penariti ku ikosa Declan Rice akoreye Ben Davies ari mu rubuga rw’amahina maze iterwa na Son Heung-min ayitereka mu nshundura igitego cya 2 kiba kirabonetse 

82′ Son Heung-min yarazamukanye umupira yiruka ashaka guhereza umupira ba rutahizamu gusa Thomas Partey amukorera ikosa bituma anahabwa ikarita y’umuhondo 

74′ Gabriel Martinelli ari kubona imipira ari mu rubuga rw’amahina gusa ba myugariro ba Tottenham Hotspur bagahita bayimukaraho

63′ Tottenham Hotspur ibonye igitego cya 1 gitsinzwe na Christian Romero ku mupira yiherewe n’umunyezamu wa Arsenal,David Raya 

62′ Mike Arteta akoze impinduka mu kibuga havamo Leandro Trossard hajyamo Gabriel Martinelli naho Tottenham Hotspur yo ikuramo James Maddison na Pierre Emile- Hojbjerg hajyamo Yves Bissouma  na Richerson

58′ Kai Havertz arase uburyo bwashoboraga kuvamo igitego cya 4 ku mupira waruzamuwe na Martin Odegaard gusa kuwufunga biramunanira

50′ Abasore ba Tottenham Hotspur bari gukina bashaka uko batangira kwishyura,Dejan Kulusevski  ahinduye umupira gusa Christian Romero ashyiraho umutwe umupira unyura hejuru y’izamu 

46′ Igice cya kabiri gitangiye Ange Postecoglou utoza Tottenham Hotspur akora impinduka mu kibuga havamo Rodrigo Bentancur hajyamo Pape Matar Sarr 

Igice cya mbere kirangiye ikipe ya Arsenal iyoboye n’ibitego 3-0

45′ Umusifuzi wa 4 yongeyeho iminota 6 kugira ngo igice cya mbere kirangire

44′ Kapiteni wa Tottenham Hotspur,Heung-Min Son arase uburyo bwashoboraga kuvamo igitego aho yarisigaranye n’umunyezamu gusa arekuye ishoti rinyura hejuru kure cyane 

38′ Arsenal iteretsemo igitego cya 3 gitsinzwe na Kai Havertz akoresheje umutwe ku mupira waruvuye muri koroneri itewe na Declan Rice 

33′ Mu bijyanye no kwiharira ikipe ya Tottenham Hotspur irayoboye na 67 naho Arsenal yo ni 33 ku ijana

27′ Arsenal itsinze igitego cya 2 cya Bukayo Saka ku mupira ahawe na Kai Havertz 

22′ Tottenham Hotspur yaribonye igitego cyo kwishyura gitsinzwe na Van de Ven gusa basifura ko habayemo kurarira 

19′ Christian Romero yongeye kugerageza uburyo nanone akoresheje umutwe ku mupira waruvuye kuri kufura itewe na James Madison gusa ukubita igiti cy’izamu 

18′ Tottenham Hotspur nyuma yuko umukinnyi wayo ukina mu kibuga hagati yitsinze iri kureba uko yashaka igitego cyo kwishyura,James Madison azamuye koroneri umupira usanga Christian Romero ashyiraho umutwe ariko ku bw’amahirwe macye uragenda unyura impande y’izamu gato 

15′ Arsenal ifunguye amazamu ku gitego kuri koroneri itewe na Bukayo Saka maze uwitwa Pierre Emile- Hojbjerg aritsinda

13’  Kai Havertz yarafunguye amazamu ku mupira yarahawe na Martin Odegaard gusa umusifuzi asifura ko habayemo kurarira 

11′ Heung-Min Son acenze ba myugariro ba Arsenal ari mu rubuga rw’amahina arangije ahereza umupira James Madison gusa arekura ishoti rinyura hejuru y’izamu kure 

9′ Arsenal ibonye kufura yariteretse ahantu heza ku ikosa James Madison akoreye Thomas Partey maze iterwa na Martin Odegaard gusa ikubita mu rukuta

8′ Amakipe yombi arimo arakina yigana ubona ko nta kipe nimwe ishaka kwirekura

5’  Arsenal yarigerageje kugera imbere y’izamu ku mupira Bukayo Saka yarahaye Ben White gusa agenda gake uramucika

1′ Abakinnyi ba Tottenham Hotspur nibo bafite umupira barimo baraherekanya gake gake

Abakinnyi 11 ba Tottenham babanje mu kibuga:

Vicario

Davies

 Romero

Porro

van de Ven

Bentancur

Højbjerg

Kulusevski

Maddison

Werner

Son

Abakinnyi 11 ba Arsenal babanje mu kibuga:

Raya

White

Saliba

Gabriel

Tomiyasu

Rice

Partey

Ødegaard

Saka

Trossard

Havertz

Uyu mukino ushobora kugira ingaruka ku gikombe cya shampiyona bitewe nuko Arsenal iramutse iwutsinzwe cyangwa ikawunganya amahirwe yo kucyegukana yaba arimo arayoyoka.

Tottenham Hotspur igiye kuwukina iri ku mwanya wa 5 n’amanota 60 mu gihe Arsenal yo iri ku mwanya wa 1 n’amanota 77 aho irusha Manchester City inota 1 gusa yo ikaba ifite umukino w’ikirarane.

Mu mukino Tottenham Hotspur iheruka gukina muri Premier League yatsinzwe na Newcastle United ibitego 4-0 mu gihe Arsenal yo iheruka kunyagira Chelsea ibitego 5-0.

Imibare yerekana ko mu mikino 50 imaze guhuza aya makipe yombi ikipe ya Arsenal yatsinzemo 21 banganyamo 16 naho Tottenham Hotspur itsindamo 13. Muri 5 iheruka yo ikipe y’abarashi yatsinzemo 3 banganya 1 naho Tottenham Hotspur itsindamo 1.

Mu mukino ubanza wabahuje muri shampiyona y’uyu mwaka kuri Emirates Stadium warangiye amakipe yombi anganya ibitego 2-2.

Bukayo Saka wari watsinze mu mukino ubanza aramutse yongeye gutsinda yaba akoze amateka yo kuba umukinnyi wa mbere utsinze Tottenham Hotspur atsindira Arsenal mu mukino wo mu rugo no hanze kuva byakorwa na Ian Wright mu 1993-94.

Umukino uhuza Arsenal na Tottenham Hotspur aba ari ‘derby’ kubera ko aba bombi basangiye umujyi wa London. 

Uva kuri sitade ya Tottenham Hotspur ujya kuri Emirates Stadium harimo intera y’ibilometero 6.4 gusa.

Abayoboke b'iri torero muri aka gace bavuga ko mu 2014 ari bwo bitanze bakubaka uru rusengero ariko ko ku itariki 19 Mata uyu mwaka batunguwe no kumva ko Pasiteri Mukarunanira Jeanne d'Arc yararugurishije miliyoni 20 Frw.

Abaganiriye na TV1 bavuga ko ibyo byose byakozwe mu bwiru batabigizemo uruhare nk'itorero.

Umwe yagize ati 'Ikibazo dufite ni uko yagiye kugurisha urusengero itorero ritabzi abikora rwihishwa'.

Aba bayoboke kandi bavuga ko ibyo bimaze kuba, Pasiteri wari umuyobozi wabo yahise aburirwa irengero ndetse agakuraho na telefone ye ngendanwa.

Mu gihe bari bakiri mu kangaratete ko kugurishwa k'urusengero bavuga ko uyu mupasiteri yagarutse ari nijoro atwara n'ibikoresho byose byari birimo.

Bavuga ko imvune bagize bubaka uru rusengero zidakwiye gupfa ubusa bityo bagasaba inzego bireba ko zabakurikiranira Mukarunanira warugurishije.

Umwe yagize ati 'Turifuza ubutabera ngo butugarurire ibyacu kuko twe ntitwagurishije, umujura yaraje aratwiba aragenda.'

Aba bayoboke bavuga ko hageze ngo abantu bajijuke mu bijyanye n'imyemerere kuko bimaze kugaragara ko hari abitwikira ijambo ry'Imana nyamara bagamije indonke.

Maniragaba Elie na Karangwa Fabien bari mu bayoboke b'iri torero basinye ku mpapuro zo kugurisha uru rusengero, bo bavuga ko uwo Mukarunanira yababwiraga ko bikozwe ku mpamvu zo kwimurira uru rusengero ahandi ndetse ko ngo n'ikibanza cyari cyamaze kuboneka.

Ikibanza uru rusengero rwari rwubatswemo cyanditse mu mazina y'uwo bari baraguze mbere, bivuze ko hatari hagakozwe ihererekanyabubasha.

Ibyo bivuze ko uwagurishije urusengero bigoye kumukurikirana kuko ubutaka butari bumwanditseho cyangwa se ngo bube mu mazina y'itorero yayoboraga.

Abayoboke b’Itorero Iriba ry’ubugingo barasaba ko urusengeo rwabo rwagaruzwa

Ni ikigo cyitwa Don Bosco Hospitality Center cyubatswe ku nkunga ya Ambasade y'u Budage mu Rwanda ndetse n'abandi bafatanyabikorwa batandukanye.

Iki kigo kigizwe n'inzu mberabyombi ya kwakira abantu 500 baje mu nama, ubukwe n'ibindi birori. Hari amacumbi 35, igikoni kigezweho kizanifashishwa n'abanyeshuri biga guteka, ubusitani bugari, Bar na restaurant ndetse n'ibindi bitandukanye.

Padiri Ufitamahoro Servillien ushinzwe umutungo mu Muryango w'Abaseliziyani mu Karere k'Ibiyaga bigari yavuze ko iki kigo batashye ari amahirwe ku banyeshuri.

Ati 'Iki kigo twafunguye turacyishimiye cyane kuko gifitiye akamaro cyane urubyiruko rurererwa mu kigo cy'urubyiruko cya Gatenga kuko mu myuga twigisha harimo no gutunganya amafunguro. Twagize amahirwe yo gufasha abana kubona ahantu bakwiyungurira ubumenyi bitabasabye gushaka imenyerezamwuga ahandi'.

Ufitamahoro yashishikarije abakeneye serivisi zitandukanye kugana iki kigo.

Ati 'Turasaba abantu ko bahatemberera bakaruhuka bakaniyakira. Umuntu wifuza kwakira abantu yaza hano dufite inyubako nziza, ubusitani burimo ibyo kurya n'ibindi'.

Ambasaderi w'u Budage mu Rwanda, Heike Uta Dettmann yavuze ko ikigo cyatashywe ari itafari rishyizwe mu mwuga wo kwakira abantu.

Ati 'Nishimiye kuba twaje gutaha iki kigo uyu munsi. Kizagirira akamaro cyane ahazaza mu byo kwakira abantu mu Rwanda kandi gifashe n'abiga imyuga atari ukubona aho bakorera imenyerezamwuga gusa ahubwo no kwisanga ku isoko ry'umurimo'.

Ambasaderi Dettmann yavuze kandi ko gutera inkunga Umuryango w'Abaseliziyani bitakozwe kuko ushamikiye ku myemerere ahubwo ari ko basanze bafite umushinga w'ingirakamaro.

Yongeyeho ko abona urwego rwo kwakira abantu mu Rwanda rufite icyerekezo cyiza cy'ejo hazaza.

Ati 'Ibijyanye no kwakira abantu mu Rwanda, ni urwego rw'ubukungu rufite icyerekezo cy'ahazaza. Nishimiye kuba u Rwada n'u Budage bifite ubufatanye mu mishinga inyuranye y'iterambere, haba mu ishoramari ry'abikorera no mu bigo bitandukanye'.

Yakomeje ati 'U Rwanda kandi rwiteze kugira ba mukerarugendo barusura benshi baturutse mu Budage nk'igihugu kiri muri birindwi bikize ku Isi n'isoko ryagutse cyane. Gahunda yo kumenyekanisha Visit Rwanda mu Ikipe ya Bayern Münich imaze kugera ahantu heza kandi ni imwe mu zizamura ubukerarugendo hano mu Rwanda'.

Ishuri rya Don Bosco ryigisha imyuga itandukanye irimo n'ijyanye no gutunganya amafunguro mu cyiciro cya kabiri cy'amashuri yisumbuye. Rihererye mu kigo cy'urubyiruko cya Gatenga cyashinzwe n'Umuryango w'Abapadiri b'Abaseliziyani.

Umuhango wo gutaha iki kigo witabiriwe n’abantu batandukanye

Ubuyobozi bw’Umuryango w’Abaseliziyani mu Karere k’Ibiyaga bigari bwishimiye iki kigo

Abafatanyabikorwa banyuranye bari bitabiriye umuhango wo gufungura iki kigo

Amabasaderi w’u Budage mu Rwanda yavuze iki kigo kizafasha mu kuzamura umwuga wo kwakira abantu

Abakozi bahakora bari babukereye

Abitabiriye uyu muhango batemberejwe ibice bigize iki kigo

Aho abanyeshuri bigira gutegura amafunguro

Hari Bar na Restaurant bigezweho

Ni ikigo gifite inzu mberabyombi yakira abantu 500

Iki kigo gifite umwanya wisanzuye

Harimo ibice bitandukanye by’amacumbi

Harimo ibyumba by’amacumbi bigezweho

Harimo igikoni kijyanye n’igihe

Padiri Ufitamahoro Servillien yavuze ko iki kigo batashye ari amahirwe ku banyeshuri

Giherereye mu kigo cy’urubyiruko cya Gatenga

Amafoto: Nezerwa Salomon

Iki gikorwa cyo kwibuka cyabereye ku Rwibutso rwa Jenoside rwa Kigali ruherereye ku Gisozi.

Umuyobozi w'Ikigo cy'imari, Copedu Plc, Muyango Raïssa, yashimiye FPR Inkotanyi yatabaye igahagarika Jenoside, agaragaza ko niba mu minsi ijana harishwe abarenga miliyoni, iyo iyo minsi irenga ntakirakorwa benshi barenze bari kwicwa.

Ati 'Buri munsi iyo ngeze muri kiriya cyumba cy'abana [ku Rwibutso], bintera gutekereza cyane. Bigoye kumva abana bangana kuriya urupfu bapfuye. Uyu munsi imyaka 30 irashize igihugu cyariyubatse, abahamijwe ibyaha barabihanirwa hari n'abasubiye mu buzima busanzwe babanye n'abandi mu mahoro no mu bumwe.'

Yavuze ko buri wese akwiye kubaka igihugu akabigira ibye, kwigisha abana amateka bikagirwa intero no kwamagana ingengabitekerezo n'abapfobya Jenoside bikimakazwa.

Umuyobozi w'Urwibutso rwa Kigali, Nagiriwubuntu Dieudonné, yagaragaje ko Jenoside yateguranywe ubukana, aho umugambi wo gutsemba no kumaraho Abatutsi wahereye mu rwango rwigishijwe kuva kera.

Yagize ati 'Bayobozi n'abakozi ba Copedu, nimusubize amaso inyuma murebe, imyaka 30 irashize. Uwavutse icyo gihe amaze imyaka 30 ntawuramubuza kwinjira ahantu runaka kuko ari Umuhutu cyangwa Umututsi, cyangwa ngo bamubwire ko iryo joro ku gasozi k'iwabo bari buterwe ni ubwa mbere mu mateka.'

Nagiriwubuntu Dieudonné yakomeje agira ati 'Habayeho intekerezo nshya zo gusobanura icyo igihugu ari cyo ko twese turi Abanyarwanda, reka nongere mpe umukoro buri wese turi aha mureke dusigasire ibyagezweho, twange ikibi kubera ko byaragaragye ko muri twe twifitemo uruhande rwiza n'urubi urwo ugaburiye nirwo rukura.'

Kubwayo Clarisse watanze ubuhamya, Jenoside yabaye afite imyaka 16. Yarokokeye Jenoside yakorewe Abatutsi mu yahoze ari Perefegitura ya Butare.

Yagarutse kuri Jenoside yatijwe ubukana n'ijambo rya Sindikubwabo Théodore wari Perezida wa Leta yiyise iy'Abatabazi, washishikarizaga Abahutu kwica Abatutsi mu mvugo yise 'Gukora'.

Icyo gihe hari ku wa 17 Mata 1994, ari nabwo hatangiye ubwicanyi karundura bwo kurimbura Abatutsi bo mu bice bitandukanye by'iyari Perefegitura ya Butare.

Ni ibihe bikomeye Abatutsi banyuzemo barara amajoro bihisha mu bihuru, mu migezi n'ahandi bahunga abicanyi.

Kubwayo Clarisse yavuze ko mu rugendo rwo guhunga yigeze gutabarwa n'umugore wari ufite abana b'abicanyi , amubwira ko azamushyingira umuhungu we nyuma aza kumutoroka kuko yumvaga atabana n'umuntu wica abandi.

Aba bakozi ba Copedu Plc, bafashe umwanya wo gusura ibice binyuranye by'Urwibutso bibitse amateka ashaririye y'u Rwanda, basobanurirwa byinshi, nyuma bagira n'undi mwanya wo gukora igikorwa cyo gushyira indabo ku mva mu rwego rwo kunamira Abatutsi bishwe.

Copedu Plc, kandi yageneye inkunga Urwibutso rwa Jenoside rwa Kigali yo kwifashisha mu bikorwa binyuranye birimo no kurwitaho.

Copedu Plc ni ikigo cy'imari kimaze imyaka 26 gitanga serivisi zo kubitsa no kuguriza abantu bose ariko kikagira umwihariko ku nguzanyo z'abagore.

Umuyobozi w'Ikigo cy'imari, Copedu Plc, Muyango Raïssa, yandika ubutumwa mu gitabo cy’abashyitsi

Umuyobozi w'Urwibutso rwa Kigali, Nagiriwubuntu Dieudonné, yasabye ko hashyirwa ingufu mu gusigasira ibyagezweho mu myaka 30

Umuyobozi w'Ikigo cy'imari, Copedu Plc, Muyango Raïssa, yavuze ko kwigisha abato amateka y’u Rwanda bigomba kugirwa intero

Ubuyobozi bw’Ikigo Copedu Plc, bwageneye inkunga Urwibutso rwa Jenoside rwa Kigali

Kubwayo Clarisse watanze ubuhamya, yagarutse ku magambo ya Sindikubwabo Théodore wari Perezida, yatije umurindi ubwicanyi

Igikorwa cya Copedu Plc cyo Kwibuka ku nshuro ya 30 Jenoside yakorewe Abatutsi, cyabere ku Rwibutso rwa Jenoside rwa Kigali

Hafashwe n’umwanya wo gushyira indabo ku mva rusange

Hunamiwe imibiri irenga ibihumbi 250 y’Abatutsi bazize Jenoside, ishyinguye ku Gisozi

Abakozi ba Copedu Plc, biyemeje gutanga umusanzu mu kubaka igihugu no guhangana n’abapfobya Jenoside

Hacanwe urumuri rw’icyizere nk’ikimenyetso cy’ubuzima bushya

Abari aho bataramiwe n’umuhanzi Musinga Joe

Abakozi ba Copedu Plc, bashenguwe n’ubugome Jenoside yakoranywe

Abakozi ba Copedu Plc, babanje kwerekwa filime mbaramakuru y’ubuhamya bw’abarokokeye mu Mujyi wa Kigali, bafite ababo bashyinguye mu Rwibutso rwa Jenoside rwa Kigali

Abakorera ikigo cy’imari cya Copedu Plc, biganjemo abakiri bato bahawe umukoro wo kubaka u Rwanda ruzira amacakubiri n’urwango kuko ari byo byagejeje kuri Jenoside yakorewe Abatutsi

Umuryango mugari w'Ikigo cy'imari, Copedu Plc, wibutse ku Nshuro ya 30 Jenoside yakorewe Abatutsi mu Rwanda mu 1994

Amafoto: Shumbusho Djasiri

Yabigarutseho mu gikorwa cyo kwibuka ku nshuro ya 30 Jenoside yakorewe Abatutsi cyahuje Abanyarwanda n'inshuti z'u Rwanda i Cotonou kuri uyu wa 27 Mata 2024.

Ni igikorwa cyabanjirirwe n'urugendo rwo kwibuka, bakangurirwa kurwanya ihakana n'ipfobya rya Jenoside yakorewe Abatutsi ndetse no guharanira ko abagize uruhare muri iyi jenoside bakihishe mu bihugu bitandukanye batabwa muri yombi bakagezwa imbere y'ubutabera.

Amb Rosemary Mbabazi yagaragaje ko kwibuka atari ukugarura uburibwe n'agahinda Abanyarwanda banyuzemo mu myaka 30 ishize, ahubwo bigamije kubaka ahazaza h'u Rwanda n'Isi.

Ati 'Twibuka kugira ngo duhe agaciro ubuzima bw'abacu twakundaga twabuze kandi batazagira ubasimbura. Twibuka kandi kubera urubyiruko rwacu n'abo mu gihe kizaza kuko amateka agaragaza ko kwibagirwa biganisha ku kwisubiramo kw'amateka.'

'Urebye amateka y'ikiremwa muntu, Jenoside yakorewe Abatutsi ntiyakabaye yarabayeho ariko ubwo yabayeho u Rwanda rwiyemeje gutangaza hose ibiyitera n'ingaruka zayo ku buryo twese dufatanyije tuyirwanya ntizongere ukundi aho ariho hose.'

Amb Mbabazi yanavuze ko kwibuka ari bumwe mu buryo bwo guhangana n'abapfobya n'abahakana Jenoside yakorewe Abatutsi kuko abayigizemo uruhare n'ababashyigikiye babyifashisha mu kugoreka amateka.

Ati 'Guhakana no gupfobya Jenoside bishingiye kuri iyo ngengabitekerezo ya jenoside, kandi ibyo byose tugomba kubirwanya.'

Yagaragaje ko kugira ngo abantu bashobore kurwanya ipfobya n'ihakana rya Jenoside yakorewe Abatutsi bisaba ko abantu biga birambuye amateka y'iyi jenoside no kuyigisha urubyiruko, ndetse no gushyira amateka yayo mu nteganyanyigisho zifashishwa mu mashuri.

Umunyamabanga Mukuru wungirije muri Minisiteri y'Ububanyi n'Amahanga muri Benin, Amb Martinien AKO yatangaje ko igihugu cyabo kinejejwe n'uko u Rwanda rwongeye kwiyubaka nyuma y'uko abakoze Jenoside yakorewe Abatutsi bari basenye igihugu bakakigira umuyonga.

Ati 'Birashimishije ukuntu u Rwanda rwiyubatse rukagira umutekano, ubumwe n'ubufatanye. Benin inejejwe n'imbaraga z'Abanyarwanda bateje imbere igihugu bakakigira intangarugero mu iterambere ry'ubukungu n'ikoranabuhanga.'

Tariki ya 7 Mata 2024 ikibumbano cya Amazone mu murwa Mukuru Cotonou cyari cyatatswe amabara y'Iberendera ry'u Rwanda mu ijoro ryo kwibuka ku nshuro ya 30 Jenoside yakorewe Abatutsi.

Iki gikorwa cyabanjirijwe n’urugendo rwo kwibuka

Bafashe umunota wo kwibuka abarenga miliyoni bishwe muri Jenoside yakorewe Abatutsi

Pacifique Kayihura, watanze ubuhamya mu kwibuka30 muri Benin

Salvatore Niyonzima, Umuhuzabikorwa w’imiryango ishamikiye kuri Loni muri Benin

Amb Rosemary Mbabazi yatangaje ko kwigisha urubyiruko amateka ya Jenoside bizatuma nta handi izongera ukundi