Author: webrwanda

Iyi nama mpuzamahanga ibaye ku nshuro ya kabiri, biteganyijwe ko izaterana kuva tariki 13-15 Gicurasi 2024 muri Kigali Serena Hotel.

Izakirwa na Kaminuza y'u Rwanda, Koleji y'u Burezi ku bufatanye na Mastercard Foundation binyuze muri gahunda ya 'Leaders in Teaching (LIT) program'.

Iyi nama yabaye bwa mbere mu 2023 izahuriza hamwe abashakashatsi mu by'uburezi, abarimu n'abayobozi mu nzego zifata ibyemezo baturutse mu bice bitandukanye by'Isi, basangire ubunararibonye kandi bigira hamwe uburyo bwo kuvugurura uburezi bubereye ikinyejana cya 21.

Izaba ifite insanganyamatsiko igira iti 'Re-examining Quality Education and Professionalism in the 21st Century' ugenekereje mu Kinyarwanda bikavuga 'gusuzuma ireme ry'uburezi n'ubunyamwuga mu kinyejana cya 21.'

Mu gingo zizaganirwaho muri iyi nama harimo guteza imbere ireme ry'uburezi (Enhancing quality in education: Education policy, leadership, and management), kubaka umwarimu w'umwuga n'imikoranire y'urwego rw'uburezi n'abikorera (Teacher Professional Development & Industry-Academia Collaboration), Ikoranabuhanga mu burezi n'udushya mu myigishirize (Educational technology and Pedagogical Innovations), uburezi budaheza, uburezi bugenewe abantu bakuru, n'uburezi bw'ibanze (Inclusive education, adult literacies), and early childhood education), kwigishwa indimi n'ubumenyi rusange (Languages and Social Sciences education) no kwigisha amasomo ya siyansi, Ikoranabuhanga n'Imibare (STEM education).

Ibi biganiro bizibanda cyane ku gukemura ibibazo byugarije Isi, iterambere mu ikoranabuhanga n'impinduka zikomeje kwigaragaza ku isoko ry'umurimo.

Abashakashatsi n'abahanga bazitabira iyi nama barimo Dr. Jenni Hayman wo muri Kaminuza ya Toronto, Sai S H Väyrynenwo muri Kaminuza ya Helsinki na Peter Mitka wo muri Kaminuza ya Aberdeen.

Byitezwe ko bazasangiza abitabiriye inama ubunararibonye ku byerekeye uburezi bushingiye ku bushobozi, imyigishirize igamije impinduka hamwe n'uburezi bw'abakuru muri Afurika yo munsi y'Ubutayu bwa Sahara.

Iyi nama kandi ni urubuga abarezi n'abari mu nzego zifata ibyemezo baganiriramo, bagafatanya kandi bagatekereza impinduka zigamije iterambere ry'uburezi.

Ni inama izitabwirwa bamwe bahari imbonankubone abandi bakoresha ikoranabuhanga ibigaragaza ko ntawe uhejwe.

Uretse ibiganiro, ibindi bikorwa birimo kumurika bimwe mu byavuye mu bushakashatsi, kubaka imikoranire ifitiye akamaro haba inzego za Leta, ibigo n'abantu ku giti cyabo.

Kaminuza y'u Rwanda igaragaza ko iyi nama izayifasha kunguka abafatanyabikorwa mpuzamahanga, kuzamura ubushobozi bw'abakozi ndete UR-CE ikarushaho kumenyekana ku ruhando mpuzamahanga.

Ni mu gihe abarimu n'abandi bakora mu nzego z'uburezi bazagira amahirwe yo guhura n'abo bakora mu ngeri imwe, bakungurana ubumenyi kandi bakaboneraho urubuga rwo kumurika ibyo bakora.

Kminuza y’u Rwanda igiye kwakira inama izahuza abashakashatsi mu burezi bugamije iterambere rirambye

Ibura ry'ibikomoka kuri peteroli ni imwe mu nkuru zivugisha benshi, kuko abenshi bagera aho bahahira bakoze ingendo zifashisha ibinyabiziga.

Ihuriro ry'Abacuruza lisansi na mazutu mu Rwanda rigaragaza ko buri kwezi mu gihugu hinjira nibura litiro ziri hagati ya miliyoni 40 na 50 z'ibikomoka kuri peteroli.

Minisiteri y'Ubucuruzi n'Inganda [Minicom] yo yagaragaje ko umwaka wa 2023/2024 wagombaga gusozwa igihugu gifite ibigega by'ubwizigame bwa lisansi bugeze kuri litiro miliyoni 334 ariko bitabashije kugerwaho.

Ubwo Umunyamabanga Uhoraho muri Minicom, Richard Niwenshuti yasobanuriraga Abadepite bagize Komisiyo yo gukurikirana Imikoreshereze y'Imari n'Umutungo w'Igihugu, PAC, amakosa yagaragaye muri raporo y'umugenzuzi Mukuru w'Imari ya Leta, kuri uyu wa 9 Gicurasi 2024, yagaragaje ko ububiko bw'ibikomoka kuri peteroli u Rwanda rufite bugera kuri litiro miliyoni 117.2.

Yagize ati 'Mu igenamigambi ry'umwaka dusoza wa 2023/2024 twagombaga kuba dufite ibigega bya peteroli bifite ubushobozi bwa litiro miliyoni 334, uyu munsi dufite ubushobozi bwa litiro miliyoni 117 bishobora kubika z'ubwizigame.'

Yagaragaje ko ibigega bya lisansi byo mu Rwabuye byasanwe byongera gukoreshwa, bituma ububiko bw'ibikomoka kuri peteroli byiyongeraho litiro miliyoni enye.

Ati 'Rwabuye uyu munsi irimo gukoreshwa kandi yongereyeho miliyoni enye ku bubiko bivuze ngo twarazamutse tuva kuri litiro miliyoni 113 tugera kuri miliyoni 117 mu bubiko bwa peteroli.'

Niwenshuti yasobanuye ko hari inyigo yakozwe bateganya ko n'abikorera bahabwa urubuga bagatangira kubaka ibigega byo kuzigamamo ibikomoka kuri peteroli.

Iyi nyigo yagaragaje ko gutegura aho byakubakwa bizatwara miliyari 22 Frw yo kwishyura imitungo y'abahatuye.

Ati 'Ubushize twari twababwiye ko hafashwe n'icyemezo ko hafatwa ubundi butaka dushobora kuba twakoreramo, abikorera bashobora kuba bakubaka ububiko. Hari hateganyijwe ubutaka bashobora kubakaho ububiko dukora n'inyigo itugaragariza igisabwa kugira ngo abaturage cyangwa imitungo irimo muri icyo gice [za Rugende] habashe kuba hategurwa inyigo, iduha hafi miliyari 22Frw.'

'Turimo kureba uburyo twakorana n'abikorera kugira ngo babashe kujyamo niba babasha kwimura abaturage babahaye ingurane ariko ubundi buryi ni uko na Leta mu buryo bwo gushaka ubushobozi tuzareba ubundi buryo abaturage bakwimurwa kugira ngo abikorera bahajye.'

Depite Ntezimana Jean Claude yagaragaje ko hari n'ibigega byo mu Bigogwe bikwiriye kwitabwaho bikunganira ibishya biri kubakwa.

Ati 'Hari gahunda utubwiye yo kuba hashakwa uburyo hubakwa ibindi bishya ariko njye numva habanza gusanwa ibihari kuko ni amafaranga na yo aba yarabigiyeho, noneho hagatekerezwa uburyo bwo kwagura.'

Niwenshuti yagaragaje ko ibigega bya Bigogwe na byo birimo gutunganywa ariko hari urwego rwa Leta ruzajya rubikoresha, ndetse ngo magingo aya nta bigega bihari bipfa ubusa.

Ati 'Nta bigega dufite bipfa ubusa biriya byaratangiye birimo gusanwa, bizakoreshwa n'urwego rundi ibyo turimo kureba ubu ni hariya Rwabuye yari isigaye ko na yo yongerwa ariko ibindi byaratanzwe kandi birimo kuvugururwa.'

Imibare igaragaza ko mu Rwanda hakoreshwa lisansi ingana na litiro miliyoni 11 ku kwezi mu gihe mazutu yo iba ingana na litiro miliyoni 26 ku kwezi. Ingano nini yinjira mu gihugu muri iki gihe, ituruka muri Tanzania, mu gihe inke cyane ari yo ituruka muri Kenya.

Muri 2021 mu Rwanda hari hari ibigega bya Leta n'iby'abikorera bishobora kubika ibikomoka kuri peteroli litiro 72.000.000. Muri byo harimo nk'ibiri i Jabana bya Sosiyete yitwa OilCom, ibya SP biri i Rusororo, ibya Leta biri mu Gatsata, Rwabuye na Bigogwe hamwe n'ibya ERP biri Kabuye. Ibibika amavuta y'indege biri i Kanombe ku Kibuga cy'indege n'i Rusororo.

Mu ngengo y'imari ya 2023/2024 hagaragaramo ko Leta yari ifite umushinga wo kubaka ibigega bya litiro miliyoni 60 by'ibikomoka kuri peteroli na byo bikubakwa i Rusororo.

U Rwanda rufite ibigega by’ubwizigame bw’ibikomoka kuri peteroli bifite ubushobozi bwo kubika litiro miliyoni 117.2

Yabigarutseho mu kiganiro yagiranye na InyaRwanda, kuri uyu wa Kane tariki 9 Mata 2024, nyuma y'uko ashyize hanze indirimbo ye yise 'Imuhira', yaherukaga gusohora indirimbo zirimo 'Ndi uwo ndiwe', 'Urabaruta', 'Niko zubakwa' yakoranye na Kidumu wamamaye mu gihugu cy'u Burundi n'abandi.

Eric Mucyo yavuze ko mu 2012 ari bwo yagize igitekerezo cyo gutangira gukora ibihangano birimo ibicurangisho byo mu muco w'u Rwanda mu rwego rwo kuwumenyekanisha, kugirango iyi njyana izabe ikirango kizajya gikoreshwa n'abandi bahanzi.

Ati 'Aho niho nashingiye ntekereza umuziki twakora ku buryo natwe aha nk'Abanyarwanda bajya bisanga mu njyana ishingiye ku mbyino zitandukanye z'umuco wacu.'

Avuga ko aha ariho yahereye akora indirimbo 'I Bwiza Iwacu' ishingiye ku muco w'imbyino yitwa Ikinyemera imenyerewe cyane mu Majyaruguru y'u Rwanda.

Yavuze ko bageze ubwo bemeza izina ry'iyi njyana bayita 'Gakondo Fusion', ndetse yaje gukundwa n'abantu benshi kugeza ubwo mu 2015 itwaye igikombe mu bihembo bya Salax Awards.

Eric Mucyo avuga ko ategura imiterere y'iyi njyana yifashishije cyane Jimmy Pro, kandi yagiye akoramo indirimbo zirimo nka 'Smilling', 'Ubwuzu bw'imbaraga' n'izindi.

Gakondo Fusion yabaye imvano ya 'Afro Gako'?

Mucyo yavuze ko ashingiye ku miterere y'injyana ya Afro Gako yakomanyije imitwe ya Producer Element ndetse na Country Records, asanga yaratekerejwe abantu bashingiye kuri 'Gakondo Fusion' yahimbye, ariko kandi yishimira ko bagenzi be babashije kurenza aho yari ageze igitekerezo cye.

Uyu mugabo yavuze ko byaba ari iby'agaciro kanini nk'abahanzi babashije gukora umuziki ushingiye ku 'jyana z'umuco wacu'.

Ati 'Ntekereza ko abatekereje gukora 'Afro Gako' bashingiye ku miterere y'injyana ya 'Gakondo Fusion'. Iyacu ishingiye ku mbyino n'ingoma zacu aho tureba mu bihanze iyi njyana akaba ari byo dukoresha, kandi niwumva neza uko 'Afro Gako' irimo ibicurangisho bihuye n'ibyacu.'

Element aherutse gushyira hanze amashusho akubiyemo umuteguro udasanzwe, agaragaza ko afite ishimwe ku mutima kuko yabashije kugera ku nzozi ze akaba agiye kumurikira Isi imikorere y'injyana idasanzwe ya 'Afro Gako' yahanze.

Uyu musore w'i Karongi, yavuze ko imyaka ine ishize atangiye gukora kuri iyi njyana, kandi ko igihe kigeze kugirango buri wese amenye ubushobozi yifitemo.

Yavuze ati 'Imyaka ine irashize, natekereje guhuza umuziki n'umuco w'u Rwanda (Gakondo) na Afrobeats nkawuzamura mu buryo rusange. Nguko uko nazanye izina “Afro Gako”. Nubwo hari ibihuha bitandukanye wumvise, igihe kirageze, umuraba uri hafi.'

Mu itangazo Country Records, yashyize hanze ku mugoroba wo ku wa Kabiri tariki 7 Gicurasi 2024, yavuze ko iyi njyana 'Afro Gako' ari igitekerezo cyagizwe na Nduwimana Jean Paul wamamaye nka Noopja washinze iyi studio.

Yavuze ko 'Injyana ya Afro Gako yaturutse ku iyerekwa ry'uwatangije studio (Noopja), ntabwo uwahoze ari mu ikipe y'abadufasha, umwana twavumbuye, tukamufasha tukanamukuza tukamwita Element yagize uruhare mu ivumburwa ryayo.''   

Country Records yashishikarije abatunganya indirimbo bose gukoresha iyi njyana ya 'Afro Gako', bavuga ko batazihanganira abatesha agaciro igitekerezo 'ndetse n'uwashyizeho ikirango cy'injyana'. Bati 'Ukuri n'igihe birahari kuri twese.''

Mu icukumbura ryakozwe na InyaRwanda, bigaragara ko Nduwimana Jean Paul wamamaye nka Noopja yagize iyerekwa ry'iyi njyana mu myaka irindwi ishize. Icyo gihe yatangiye kwiyambaza abantu barimo Habimana Emmanuel, usanzwe ari umucuranzi ukomeye w'inanga, batangiye kugerageza gukora iyi njyana.

Mu kiganiro cyihariye yagiranye na InyaRwanda, Habimana Emmanuel yavuze ko bwa mbere yumva izina 'Afro Gako' yaryumvanye Noopja ubwo yamusabaga ko yamufasha kuyikora ku buryo izaba ikirango cy'umuziki w'u Rwanda.

Ati 'Hashize igihe kinini rwose Noopja abimbwiye ndetse rwose imyaka itari munsi y'irindwi cyangwa umunani kuko twabonanye mbere, ubwo yamurikaga igitabo cye cya mbere angezaho igitekerezo nanjye mubwira ko byakunda.'

'Bitewe nuko ncuranga inanga ya Kinyarwanda, twiyemeje kuzatangira iyo njyana gusa icyo gihe byari mu bitekerezo. Nyuma rero yaje kongera arampamagara ngo tubitangire.'

Uyu mugabo yavuze ko Noopja akimara kumubwira ko ashaka guhanga injyana nshya yahise abyumva vuba, kuko 'nanjye ndi umuntu ukunda kuba nahanga udushya kandi mba mu muziki wa gakondo'.

Yavuze ko ari igitekerezo yishimiye, yumva yashyiraho itafari rye ngo umuziki nyarwanda nibura nawo ugire umwimerere n'injyana nshya yakwitirirwa atari iz'ahandi gusa cyane cyane ko 'twashakaga kurema uruvangitirane rwa Afro Beat na Gakondo hacurangishijwemo ibicurangisho gakondo by'u Rwanda'.

Habimana yavuze ko muri we yumva impamvu yo guhanga ibintu bishya bitamenyerewe ariko byazagira 'Brand y'Igihugu' nk'uko umuntu acuranga rumba ugahita wumva ko ari iyo muri Congo.

Icyo gihe, uyu mugabo yabwiye Noopja ko basabwa gukora ibintu byiza bitamenyerewe ndetse bikanamenyekanishwa kuko 'nabonagamo ko abahanzi bacu baba abagezweho abenshi babaga batitaye kuri gakondo kandi ahubwo ariyo yatuma bagira umuziki ufite inkomoko w'igihugu cy'abo'.

Akomeza ati 'Rero namusabye (Noopja) ko twabikora twitonze kugirango bigere ku ntego gusa ntibyari byoroshye kubivuga no mu magambo gusa byaje kwemera no gutangira kubishyira mu bikorwa biremera.'

Yasobanuye ko injyana ya Afro Gako igizwe n'injyana ya Afro Beat hanyuma igacurangwamo inanga, umuduri, iningiri n'ikembe, ingoma, ikondera n'ibindi.

Habimana yavuze ko bakomeje urugendo rwo gukora iyi njyana ku buryo izumvikanisha mu buryo bwihariye umuziki w'u Rwanda.

Element yisanze gute muri Afro Gako?

Habimana yarahiye arirenga, avuga ko Noopja ariwe muntu wa mbere yumvanye ivuka rya Afro Gako, kandi ko icyo gihe Element yari atarinjira muri Country Records.

Ati 'Mukuri rwose igitekerezo kivuka twakiganiriye na Noopja kandi rwose Element ntiyari yakanagera muri Country Record nk'uko nabikubwiye ni ibintu twaganiriye na Noopja kera iyo nshuti yacu Element itaranaza inaha pe!'

Akomeza ati 'Gusa mpamya ko nawe avugishije ukuri yabibibwira y'uko icyo gitekerezo yagisanze muri Country Record.'

Habimana yavuze ko bwa mbere batangira kugerageza gukora iyi njyana, Noopja yamuhuje na Element 'kugirango dukore Sample'. Avuga ariko ko Element atigeze amubonera umwanya.

Ati 'Ariko mu kuri sibyo yashyizemo imbaraga (Element). Yagize imishinga myinshi y'indirimbo, zamubanye nyinshi amburira umwanya tutarangije 'Sample' twashakaga gukora mu gutangira 'Afro Gako'.

Yavuze ko abonye ko Element yamubiriye umwanya, yabwiye Noopja amushakira undi muntu bazajya bakorana kuri uyu mushinga w'iyi njyana. Icyo gihe, Noopja yashatse kumuhuza na Producer Real Beat ariko 'nawe abona afite imishinga myinshi'.

Byatumye Noopja ahitamo ko Habimana atangira gukorana na Producer Pakkage. Ati 'Njye na Pakkage yaduhaye inshingano zo kugira icyo dukora kandi tukakimwereka.'

Yavuze ko umushinga wa mbere bakoze, wavuyemo indirimbo 'Abahungu' ya Juno Kizigenza, uyu muhanzi yashyize hanze, ku wa 29 Mutarama 2024.

Ubwo yashyiraga hanze iyi ndirimbo, Juno Kizigenza yavuze ko ari mu rwego rwo kwakira imizi ye binyuze muri 'Gakondo' yo guhanga kubera gukora umuco ukarenga imipaka y'umuziki.

Yavuze ko iyi njyana ya Afro Gako itanga inkuru idasanzwe y'ubutwari hamwe n'ubushake bw'urubyiruko bwo kuvugurura umuco.

Aha niho Habimana ahera avuga ko abantu bakwiye kumenya ko 'Noopja' ariwe wazanye igitekerezo cya 'Afro Gako'. Ati 'Ndibaza abantu bakwiye kugira ukuri 'Afro Gako' ni igitekerezo cya Country Records cyazanwe na Noopja.'

Yavuze ko Element yageze ubwo yerekeza muri 1:55 AM nta mushinga n'umwe w'indirimbo akoze wubakiye kuri Afro Gako. Akomeza ati 'Tujya kugitangira ni Element wari wahawe izo nshingano gusa ntabwo yigeze rwose abyitaho arinda ahava nta 'Draft' n'imwe irangiye dukoze ngo tuyereke Noopja.'

Akomeza ati 'Afro Gako ni igitekerezo bwite cya Noopja waharaniye ko kijya mu bikorwa n'ubu akiri kubikora. Element yahawe inshingano yo kuba twayitangira ariko mu by'ukuri abiburira umwanya.'

Uyu mugabo yavuze ko atiyumvisha ukuntu Element yiyitirira 'Afro Gako' mu gihe azi neza ko nta ruhare yigeze agira mu kuyitunganya. Ati 'Sinumva rero uko yabyiyitirira nta kintu na kimwe yigeze abasha no kugerageza gukora ngo kirangire kuri iyo njyana nawe rwose ndibwira yibwije ukuri mu mutima yabikubwira neza.' 

Eric Mucyo yatangaje ko injyana ya 'Gakondo Fusion' yahimbye yabaye imvano y'injyana 'Afro Gako'

Eric Mucyo yavuze ko abahanzi bakwiye gusenyera umugozi umwe mu kurema injyana izaranga umuco w'u Rwanda 

Country Records ihagarariwe na Noopja, ivuga ko aba Producer bemerewe gukoresha ‘Afro Gako’ ariko ko batazihanganira uwiyitirira iyi njyana 

Element avuga ko mu myaka ine ishize ari bwo yagize igitekerezo cyo gukora iyi njyana
 

KANDA HANO WUMVE INDIRIMBO 'IMUHIRA' YA ERIC MUCYO

“>

KANDA HANO WUMVE INDIRIMBO ‘I BWIZA’ ERIC MUCYO YAKORANYE NA JAY POLLY

“>

Ni igikorwa cyabaye ku itariki 8 Gicurasi 2024 mu rwego rwo kwibuka ku nshuro ya 30 Jenoside yakorewe Abatutsi. Cyabimburiwe n'urugendo rwo kwibuka rwerekeje mu Rwunge rw'Amashuri rwa Rutabo A mu Murenge wa Kinazi ahari icyobo ndangamateka cyataburuwemo imibiri 60,000 y'Abatutsi bishwe muri Jenoside.

Abakora muri KCP Ltd basobanuriwe amateka y'iki cyobo ndetse bashyiraho indabo mu rwego rwo guha icyubahiro iyo mbaga yahaburiye ubuzima.

Bageze ku Rwibutso rwa Kinazi basobanuriwe amateka mabi ya Jenoside yahakorewe igahitana imbaga y'Abatutsi barenga 63,255 barushyinguyemo. Abo batutsi ni abaturukaga mu zahoze ari komine za Ntongwe, Muyira, Mugina n'ahandi. Ku isonga ry'abagize uruhare muri ubwo bwicanyi, hari Kagabo Charles wari Burugumesitiri wa Komine Ntongwe kuri ubu yaje kuvamo imirenge ya Kinazi na Ntongwe.

Kagabo yashutse Abatutsi bari batuye muri iyo kamine n'izindi zari ziyegereye na cyane ko igice cy'Amayaga zarimo cyari gituwe n'Abatutsi cyane abasaba kujya ku biro by'iyo komine ngo abashakire uburinzi batazicwa.

Bamaze kugwira ku itariki ya 20 Mata mu 1994 yabahamagarije Interahamwe ziraza zibiraramo zirabica ariko bagerageza kwirwanaho zigaruka bucyeye bwaho na bwo biba uko.

Tariki 21 Mata mu 1994 Kagabo yari yateguye umugambi wo gutsemba Abatutsi bari barokotse igitero cy'ijoro rya tariki 20. Ababwira ko abona atagifite imbaraga zo kubarinda icyiza ari uko bajya kuri Sous-préfecture arabanza afunga imihanda yose asigaza inzira ica Nyamukumba aho yari yashyize abajandarume n'imbunda ndetse n'interahamwe n'imihoro.

Undi wagize uruhare rukomeye mu iyicwa ry'Abatutsi muri iyo komine ni Nsabimana Jacques wari Perezida w'Ishyaka rya CDR ari we wacukurishije icyobo cyajugunywagamo Abatutsi, ndetse n'impunzi z'Abarundi zari mu Nkambi ya Nyagahama na zo zagiye zigaba ibitero ku batutsi ndetse zinafatanya n'Interahamwe mu kwica abari bahungiye kuri Komine Ntongwe. Abo bagabo babiri bafatawa nka ba nyambere muri Jenoside yakorewe Abatutsi b'i Ntongwe, IBUKA muri Kinazi ivuga ko na n'ubu batarabasha gufatwa ngo baryozwe ibyo bakoze.

Mu gikorwa cyo kuremera ibyiganjemo ibiribwa abarokotse Jenoside batujwe mu Mudugugu wa Murambi muri Kinazi utuyemo imiryango 32, abawutuye bishimiye cyane iyo nkunga.

Mugirente Japhet uyobora uyu mudugudu w'abarokotse akaba n'inshike ya Jenoside yagize ati 'Iyi nkunga tuyakiranye umutima mwiza kuko by'umwihariko abantu barokotse Jenoside tugenda duhura n'ibibazo byinshi harimo iby'ihungabana n'ubukene.'

'Hari bamwe muri twe bafite ubutaka ariko buri kure cyane kandi ni abakecuru gukurayo imyaka birabagora kandi n'umutekeno wayo kuko ari kure ni ikibazo. Kuba hari abantu batuzirikana bituma hatabaho kwigunga no kwiheba turabashimiye cyane Kinazi Cassava Plant'.

Ubuyobozi bw'Uruganda rwa KCP Ltd bwavuze ko nk'uruganda ruba rusanzwe rukorana n'abaturage ari ngombwa no kubunganira mu zindi gahunda zijyanye n'imibereho.

Bizimana Jérôme uri gusoza inshingano ku mwanya w'Umuyobozi Mukuru w'agategenyo wa KCP yagize ati 'Tuba tugomba kwifatanya n'abaturage mu bikorwa byose biba byateguwe na Leta cyangwa se na bo ubwabo tukabereka ko turi kumwe.'

'Ni inshingano za buri Munyarwanda na buri kigo kwifatanya n'Abanyarwanda mu kwibuka Jenoside yakorewe Abatutsi ariko binadufasha mu mibanire n'imikoranire myiza n'abaturage. Bibereka ko tutari abantu b'abacuruzi bagambiriye amafaranga gusa ahubwo ko no mu iterambere ry'ubukungu n'imibereho myiza yabo dufatanya'.

Bizimana kandi yongeyeho ko Igihugu cya mbere y'imyaka 30 cyaranzwe n'urwango n'ivangura bikadindiza iterambere ry'abenegihugu ariko ko ubu nyuma ya Jenoside hari icyerekerezo cyiza mu ngeri nyinshi kandi gitanga icyizere cy'ahazaza.

Hashyizwe indabo ku cyobo cyiciwemo Abatutsi bagera kuri 60 000

Uhereye ibumoso, Umuyobozi Mukuru mushya wa KCP hamwe n'Umuyobozi w’agategenyo ucyuye igihe

Bunamiye inzirakarengane zihashyinguye banashyira indabo ku mva

Basobanuriwe amateka y’iyicwa ry’Abatutsi bashyinguye muri uru rwibutso

Ahari ibiro by’Umurenge wa Kinazi ubu ni ho hiciwe imbaga y’Abatutsi mu 1994

Abarokotse Jenoside baremewe ibyiganjemo ibyo kurya

KCP yateye inkunga ibikorwa byo kwita ku barokotse Jenoside

Ubuyobozi bwa KCP bwatanze n’inkunga yo kwita ku Rwibutso rwa Kinazi

Kiyovu Sports yahuje umukino usoza shampiyona bazakiramo Rayon Sports no kwizihiza imyaka 60 iyi kipe imaze ishinzwe.

Ni umukino w’umunsi wa 30 wa shampiyona y’icyiciro cya mbere mu Rwanda ari na wo munsi wa nyuma w’umwaka w’imikino wa 2023-24 aho uzabera kuri Kigali Pele Stadium ku wa Gatandatu tariki ya 11 Gicurasi 2024.

Kiyovu Sports izaba yakiriye uyu mukino ikaba yawuhuje no kwizihiza imyaka 60 imaze ishinzwe, yashinzwe mu 1964 ishingirwa i Byumba.

Uyu mukino kwinjira ni ibihumbi 3, ibihumbi 5, ibihumbi 10 ndetse n’ibihumbi 20 muri VVIP.

Bimwe mu bikorwa biteganyijwe gukorwa kuri uyu munsi mu rwego rwo kwizihiza imyaka 60, hari imipira yakoreshejwe izaba yambawe n’abakunzi b’iyi kipe. Ni imipira yanditseho imyaka 60 iyi kipe imaze.

Hakoreshijwe umutsima ‘Cake’ uzakatwa ndetse na champagne izaturitswa mu rwego rwo kwizihiza imyaka iyi kipe yambara icyatsi n’umweru imaze ishinzwe.

Byitezwe ko kandi hazaba hari benshi mu bakinnyi bakanyujijeho (legends) mu ikipe ya Kiyovu Sports nka; Nuru Munyemana, Hassan Munyandekwe, Ashraf Munyaneza, Alam Makasi, Shyaka, Brazza Musa Karato, Ikomba Bilaga, Hassan Hirana, Amza Tuyisenge na Jean Bosco Nizeyimana

Kuva yashingwa Kiyovu Sports mu bikombe bikinirwa mu Rwanda bitanga itike yo gukina imikino Nyafurika, yegukanye ibikombe bibiri by’Amahoro icyo mu 1975 ndetse n’icyo mu 1985.

Kiyovu Sports kandi ifite ibikombe 5 bya shampiyona yegukanye 1969, 1971, 1983, 1992 ndetse no mu 1993.

Kiyovu Sports igiye kwizihiza imyaka 60 imaze ishinzwe

Hari ku wa 04 Nzeri 2022 ubwo umuhanzi Mugisha Benjamin uzwi nka The Ben yamurikwaga nka Brand Ambassador wa Orion Basketball Club. Ni amasezerano yari yasinywe ko agiye kwamamaza ibikorwa by’iyi kipe mu gihe kingana n’imyaka itanu. Aya masezerano yasinyiwe mu nzu mberabyombi ya Kigali Convention Center.

Aya masezerano yari akubiyemo ingingo zitandukanye ariko zose zibanda cyane ku kuba The Ben azakomeza kumenyakanisha iyi kipe no kuyihagararira ndetse ibi bikaba byarashimangiwe na The Ben ubwe nk'aho yavuze ko afite abakunzi benshi ahantu hatandukanye bityo ko nabo agomba gutuma bamenya iyi kipe ikiri nshya muri Basketball y'u Rwanda. The Ben yari yavuze ko na mbere y’uko asinyira gukorana n’iyi kipe, yari asanzwe ari umukunzi w’imikino.

The Ben yari yagize ati “Mbere na mbere ndi umukunzi w'imikino byumwihariko Basketball, rero Orion baraje baranyegera bambwira ko bashaka ko dukorana, bambwira intego bafite numva koko ari ibintu byiza ndetse ari na gahunda nziza bafite niko guhita nemera gukorana na bo.'

Kuri uyu wa Gatatu ubwo Then yasinyaga amasezerano y’ubufatanye n’ikigo gicuruza Telefone cya Tecno, uyu muhanzi yaje kubazwa iki kibazo cy’amasezerano, avuga ko ayo masezerano yabayeho ariko ubu ari gutunganywa neza akazagaruka ameze neza.

Yagize Ati” Orion Basketball Club ni ikipe ihari, hari ibyo tugishaka gushyira ku murongo kugira ngo izaze ku kwego rwiza, ndetse ihangana n’amakipe akomeye bitari kera rwose tuzifuza ko mubana natwe kugira ngo tubahe amakuru ya Orion BBC.”

Mu gushaka kumenya neza icyo impande zombi zibivugaho, InyaRwanda yavuganye na Rugamba James uyobora ikipe ya Orion BBC, yemeza ko hari ibiri kivugururwa muri aya masezerano.

Yagize Ati” Nyuma y’ariya masezerano, The Ben twagiranye ibiganiro turebera hamwe uburyo imikoranire yacu yavugururwa igashyirwamo udushya ndetse tuza no kubyemeranwa. Ubu amasezerano yacu asigaje imyaka isaga ibiri, bitari keera turatangira gukorana ndetse muzanabona impinduka.”

Gusa amakuru InyaRwanda ifite yo kuruhande avuga imbogamizi yabaye muri aya masezerano, The Ben yaba hari ibyo atubahirije nyuma yo kuyasinya, byatumye ubuyobizi bwa Orion BBC nabwo bwifata ku bijyanye n’ibyo bagombaga The Ben.

Amasezerano The Ben afitanye na Orion BBC asigaje imyaka 3 kugirango arangire

Umunyamakuru wo muri Uganda, Eddie Sendi yatangaje abahanzi 20 bo muri Uganda batakabaye bagereranywa n’umunyabigwi mu muziki w’iki gihugu, Jose Chameleone ndetse ko no kumusuhuza bakabaye babanza gupfukama.

Byose byatangiye ubwo hakwirakwiraga agace gato k’amashusho y’umunyamakuru wa Chamuka TV, Rema Namakula aho yavugaga ko byibuze abahanzi badafite indirimbo 5 zakunzwe bagakwiye gupfukama mbere yo gusuhuza Jose Chameleone.

Mu kiganiro ‘Talk and Talk’, Eddie Sendi yabajijwe niba yemeranya na Rema Namakula, avuga ko bemeranywa cyane, ibi byakuruye ikiganiro mpaka kugeza aho uwari ukiyoboye yahisemo kugenda amubwira umuhanzi undi na we akavuga icyiciro abarizwamo.

Muri abo bahanzi yavuze ko bagakwiye gusuhuza Jose Chameleone bapfukamye harimo n’umuvandimwe we, Weasel Manizo ndetse na Eddie Kenzo.

Abahanzi 23 bagasuhuje Jose Chameleone bapfukamye

Big Eye, Kalifah Aganaga, Rema Namakula, Sheebah Karungi, Weasel Manizo, Godfrey Lutaaya, Haruna Mubiru, Levixone, Eddy Kenzo, Nina Roz, Spice Diana, Navio, David Lutalo, Winnie Nwagi, Azawi, Vinka, Zafaran, Elijah Kitaka, Mathias Walukagga, Fred Sebbaale, Pastor Wilson Bugembe, Carol Nantongo na Gravity Omutujju

Abo abona bakamusuhuje ntacyo bishisha, ni; Bobi Wine, Bebe Cool, Mesach Semakula, Ronald Mayanja, Fred Sebatta, Maddox Ssematimba, Juliana Kanyomozi, Iryn Namubiru, Mariam Ndagire na Kabuye Semboga

Eddy Kenzo ngo yakabanje gupfukama mbere yo gusuhuza Jose Chameleone

Murumuna we Weasel na we yakabanje gupfukama mbere yo kumusuhuza

Jose Chameleone ni umwe mu bahanzi b’abanyabigwi muri Uganda

Shampiyona y’icyiciro cya mbere mu mupira w’amaguru umwaka w’imikino wa 2023-24, guhera uyu munsi harakinwa umunsi wa nyuma, igikombe cyabonye nyiracyo ni mu gihe amakipe agomba kumanuka ataramenyekana.

Umukino ubimburira indi y’umunsi wa 30 ni uwo AS Kigali igomba kwakiramo Muhazi United kuri uyu wa Kane tariki ya 9 Gicurasi 2024 kuri Kigali Pele Stadium.

Indi mikino izakomeza ejo ku wa Gatanu, ku wa Gatandatu ndetse no ku Cyumweru ahari umukino wa APR FC izakiramo Amagaju akaba ari bwo iyi kipe y’Ingabo z’Igihugu izashyikirizwa igikombe cya Shampiyona yegukanye.

Umunsi uriho imikino yitezwe na benshi ni umunsi wo ku wa Gatandatu tariki ya 11 Gicurasi 2024 kuko ni bwo hazaba imikino igomba gusiga hamenyekanye amakipe abiri agomba kumanuka mu cyiciro cya kabiri.

Kugeza ubu amakipe 3, Sunrise FC, Etoile del’Est na Bugesera FC hejuru ya 98% ni yo agomba kuvamo amakipe 2 amanuka mu cyiciro cya kabiri, ibindi byaba byaba ari ibitangaza.

I Ngoma, Etoile del’Est izakira Bugesera FC. Uyu mukino ikipe yose izatsinda izaguma mu cyiciro cya mbere indi imanuke mu cyiciro cya kabiri.

Sunrise FC izaba yakiriye Marines, gutsinda kwa yo ntacyo bizaba bivuze mu gihe hagati ya Bugesera na Etoile imwe yatsinze. Kugira ngo igume mu cyiciro cya mbere birasaba ko Etoile na Bugesera zinganya noneho yo igatsinda Marines ku kinyuranyo cy’ibitego 2.

Kugeza ubu APR FC yegukanye igikombe ifite amanota 67, Etoile de’Est ya 14 ifite 31, Bugesera FC ya 15 ifite 29 inganya na Sunrise FC ya nyuma.

Gahunda y’umunsi wa nyuma wa Shampiyona

Ku wa Kane tariki ya 9 Gicurasi 2024

AS Kigali vs Muhazi United

Ku wa Gatanu tariki ya 10 Gicurasi 2024

Gasogi United vs Etincelles

Ku wa Gatandatu tariki ya 11 Gicurasi 2024

Sunrise FC vs Marines FC
Etoile del’Est vs Bugesera FC
Kiyovu Sports vs Rayon Sports
Gorilla FC vs Mukura VS

Ku Cyumweru tariki ya Gicurasi 2024

APR FC vs Amagaju
Musanze FC vs Police FC

APR FC izashyikirizwa igikombe ku Cyumweru

Raporo y'Umugenzuzi Mukuru w'Imari ya Leta igaragaza ko Ikigega gitera inkunga imishinga y'iterambere (BDF) cyasubije amafaranga arenga miliyoni 800 Frw abaterankunga nyuma yo kunanirwa kuyaha abaturage.

Tariki ya 9 Gicurasi 2024 Ubuyobozi bwa BDF bwitabye PAC ngo busobanure ibibazo byagaragaye muri iyi raporo, bugaragaza ko hari imishinga ibiri byabayemo ko amafaranga asubizwa umuterankunga.

Umuyobozi Mukuru wa BDF, Vincent Munyeshyaka, yagaragaje ko umushinga wa mbere ari uwa AGRA yari yatanze miliyoni 500 Frw kugira ngo afashe mu bikorwa by'ubuhinzi cyane cyane mu kuhira no gukoresha ikoranabuhanga mu buhinzi.

Ati 'Iyi mikoranire navuga ko iyo dusesengura neza navuga ko twakabaye tutarayigiyemo ni gahunda bari bakoze bonyine bayiganira n'amabanki. Banki zari gutanga inguzanyo hanyuma banki ikazishingira. Bari bumvikanye na banki nka eshatu hanyuma baratwegera baravuga bati namwe muje mugatanga ingwate, tugashyiramo ibihumbi 500$ muri BDF tukareba ko iyi gahunda yakora.'

'Iyi gahunda ikibazo yagize, ya mabanki yagombaga gutanga inguzanyo ntayo yatanze kandi BDF kugira ngo itange ingwate ni uko inguzanyo iba yatanzwe, ndetse AGRA na yo yikoreye raporo yo gusuzuma uyu mushinga iza gusangamo inenge eshatu.'

Izo nenge zirimo ko amabanki atigeze yishimira gukoresha iyo gahunda kubera ko itari iteguye neza, ndetse n'igihe cyo kuwushyira mu bikorwa cyari gito, kuko cyari amezi 11 gusa.

Ati 'Bo bari bafite igitutu cy'uko bagomba gukora muri ayo mezi 11, gahunda irangira gutyo badusaba gusubiza amafaranga, turayasubiza, urebye ni umushinga utari uteguye neza ahubwo iyo tuba twarabisuzumye mbere n'ubu bufatanye ntabwo tuba twarabugiyemo.'

Depite Mukabalisa Germaine yagaragaje ko biteye isoni kuba amafaranga y'inguzanyo cyangwa inkunga ziba zatswe abantu bayababaye ariko akaba yarasubijwe umuterankunga.

Ati 'yari agamije kugabanya ubukene, gukemura ibibazo biterwa n'imihindagurikire y'ibihe mu gihe cy'isarura imyaka yabo ntiyangirike cyangwa n'iyo imvura yagwa cyangwa n'ibindi biza. Icyo si ikibazo mu Rwanda dufite? Ntitwari tubonye miliyoni 800 Frw? Ntizatunaniye se? ubwo igisubizo cyatunyura twagikura he? Keretse niba utubwira ko mu Rwanda nta kibazo cy'imihindagurikire y'ibihe dufite. Tukabona miliyoni 800 Frw zigasubirayo?'

Depite Mutesi Anitha we yibajije ati 'Niba aya mafaranga bigaragara ko yaje akajya muri Banki, mwigeze mukurikirana ngo mumenye ni iyihe mpamvu abaturage batitabiriye aya mafaranga byatumye batabona na ya ngwate?'

Munyeshyaka yatangaje ko AGRA yari yateguye amabanki azakorana na BDF, ayo mabanki ari yo agomba gukorana n'umuturage kugira ngo ahabwe inguzanyo.

Ati 'Sinzi ukuntu nabisobanura. Kwishingira inguzanyo bibaho iyo hari icyabaye mbere. Icyabaye mbere ni imikoranire ya banki n'umuturage noneho twebwe tukajya kwishingira inguzanyo tubwira banki ngo uyu muturage muhe inguzanyo nta kibazo ingwate irahari.'

Ibi byatumye Perezida wa PAC, Muhakwa Valens yibaza umuntu ufite inyungu hagati ya banki na BDF mu 'gukangurira umuturage gufata inguzanyo mwebwe mwishingire inguzanyo. Muratekereza ko ari banki yari ifite inyungu kurusha BDF ku buryo mwebwe mwari mutegereje ngo nibatubwira ngo hari umuturage waje gusaba inguzanyo ariko udafite ingwate muraduha ingwate?'

Depite Mukabalisa Germaine ati 'Hagati ya banki na koperative ihinga ibigori ntibone aho ibyumisha, cyangwa ikibaya ibihingamo kikarengerwa kubera imvura yaguye uwari ubabaye hagati aho ni nde? Ni banki? Kuko byarihutirwaga ntabwo ari umushinga w'imyaka 10.'

'Muri uwo mwaka kandi wasanga banki zitarahombye ariko umuturage we yarahombye kuko hari miliyoni 800 Frw zitagiye mu baturage kandi Leta yarazisabye ikazihabwa zarangiza zigasubirayo.'

Munyeshyaka yagaragaje ko hari amafaranga yatanzwe mu mushinga wa PASP (Post Harvest and Agribusiness Support Project) wakoreraga muri Minisiteri y'Ubuhinzi n'Ubworozi arenga miliyari 6 Frw mu gihugu hose.

Ati 'Umuturage aba afite umushinga akabona inkunga nyunganizi ya 50% ariko kugira ngo abone iyo nkunga ya 50% bisaba ko aba yakoze ibyo agomba gukora bingana na 50%. Iyo umuturage atabashije gushyira mu bikorwa ibyo yasabwaga inkunga ntayihabwa, iyo umuturage ananiwe gukoresha ayo mafaranga BDF isabwa kuyasubiza muri RAB.'

BDF igaragaza ko amafaranga atangwa akwiye kujya yitonderwa, amasezerano asinywe agatanga umwanya n'uburyo amafaranga atahawe abagenerwabikorwa yakoreshwa mu bindi bifitanye isano n'iyo mishinga aho kuyasubiza.

BDF yananiwe guha abaturage miliyoni 800 Frw zagombaga gufasha abakora ubuhinzi nyuma zisubizwa umuterankunga

Abayobozi ba BDF basobanuye ko binjiye muri ubu bufatanye batabanje kubisuzuma neza

Mu myaka irindwi ishize nibwo iri soko ryubatswe rije gukemura ikibazo cy'abacuruzi bacururizaga ku gasozi, izuba n'imvura rikangiza ibicuruzwa byabo. Ni isoko kandi ryari ryitezweho korosha ubuhahirane hagati y'u Rwanda na Repubulika ya Demukarasi ya

Isi soko ryo mu Mudugudu wa Birogo, Akagari ka Gahinga Umurenge wa Mururu, ricyuzura ryahise ribona abarikoreramo riruzura, ndetse bamwe barasaguka bacururiza hanze. Aho icyorezo cya covid-19 kiziye iri soko ryatangiye kubura abarikoreramo

Nyiramana Elise, umaze imyaka 10 acuruza imboga n'imbuto yabwiye IGIHE ko mbere y'uko iri soko ryubakwa yazizereranaga.

Ati 'Nyuma baje kutwubakira iri soko Abanye-Congo barirema ari benshi tukabaranguza. Aho covid-19 iziye Congo ikuraho kwambukira kuri jeto tukajya tubashyira ibicuruzwa nabwo bakatwambura'.

Ibi nibwo byatumye abacururizaga muri iri soko nyambukiranyampaka rya Rusizi I barivamo bamwe bajya gucururiza mu Isoko rya Kamembe, abandi bimuririra ubucuruzi bwabo muri Congo.

Umwe muri bake basigaye muri iri soko yavuze ko n'abarisigayemo nta bakiliya bakibona.

Ati 'Mbere nacuruzaga ibitoki umunani bigashira ariko ubu na kimwe gishobora kudashira. Nk'uyu mwana w'umukobwa yazanye ibitoki ejo bundi n'ubu byari bitarashira kandi nabona ari ibitoki bitageze ku munani'.

Abaturiye umupaka wa Rusizi n'abakorera ibikorwa byabo ku mupaka wa Rusizi I bafite impungenge ko iri soko rizahita risaza kubera kudakorerwamo, bagasaba ko habaho ibiganiro hagati y'impande zombi hagasubiraho uburyo bwo kwambukira kuri jeto ku baturiye imipaka.

Minisitiri w'Ubucuruzi n'inganda, Dr Gabitsinze Jean Chrysostome avuga ko ikibazo cy'iri soko babiganiriyeho n'akarere n'abacuruzi barimo n'abatanze ikibanza ngo iri soko ryubakwe.

Ati 'Twumvikanye n'akarere ko bagiye gushaka uburyo hagira icyihutishwa, niba n'abacuruzi ubwabo bahafata nk'abacuruzi, nka Leta ntabwo twifuza kugira inyubako yakomeza kubaho idakoreshwa, kandi abacuruzi batwemereye ko bahakoresha ariko ikibazo cyo kirahari mu by'ukuri'.

Mu 2019 u Rwanda rwohereje muri Repubullika ya Demurasi ya Congo ibicuruzwa bifite agaciro ka miliyoni 372$, aho icyorezo cya covid-19 kiziye byaragabanutse bigera ku miliyoni 88$ mu 2021.

Imibare y'ibiro bishinzwe abinjira n'abasohoka igaragaza ko mbere ya COVID-19 imipaka ihuza u Rwanda na RDC yanyuragaho abagenzi ibihumbi 12 barimo abakoreshaga bisi n'abanyamaguru. Aho iki cyorezo kiziye abanyura kuri iyi mipaka baragabanutse bagera kuri 6000 mu 2021.

Isoko nyambukiranyamipaka rya Rusizi I ryabuze abarikoreramo

Ibitanda by’ubucuruzi hafi ya byose byambaye ubusa

Muri isi soko igice kigenewe gucururizwamo inyama gikoreramo umucuruzi umwe