Author: webrwanda

Ubu butunwa abavugizi b'inzego zombi babutangiye mu kiganiro Dusangire ijambo cyatambutse kuri Television yu Rwanda.

Hashize iminsi mu bice bitandukanye by'u Rwanda haboneka intwaro za kera, zimwe ziboneka hari ibikorwa nk'ubuhinzi n'ubwubatsi biri gukorwa izindi zigafatanwa abantu bazitunze mu buryo bunyuranyije n'amategeko.

Umuvugizi wa RIB, Dr Murangira B Thierry, yavuze ko ubu mu Rwanda hari amahoro bityo umuntu adakwiye kumva ko atekanye ari uko atunze imbunda.

Ati 'Turi mu gihe kiruta kure cya gihe twabayemo, burya rero iyo abantu bahinduka, duhinduka no mu mitekerereze. Imitekerereze ya kera ntaho ihuriye n'iy'ubu ngira ngo n'uwo babibwira ntabyemere yabyibonera ku maso. Ubu ni n'uburyo bwo kubatera akanyabugabo, kubabwira tuti burya nubwo cya gihe wibagiwe, wikwikururira ingorane uzibona.'

Dr Murangira yagaragaje ko mu gihe umuntu yakomeza kwizirikaho intwaro cyangwa kimwe mu bice bigize imbunda akagifatanwa azaba ashyize ubuzima bwe mu byago byo guhanwa n'amategeko.

Ati 'Urumva nk'ubwo uwatanze imwe yari afite ebyiri avuga ngo ariko se ubu byavugwa bite? Reka ndyumeho igihe ni cyo kizabivuga. Iki gihe rero ni cyo tubwira abantu ngo witegereza ko igihe kizibwiriza niba waranagiye mu kiruhuko cy'izabukuru uyifite rwose yitange ikiruhuko cyawe ukibemo amahoro n'umudendezo.'

'Nawe muntu uyifite mu buryo bundi wayobonyemo ni amahirwe wahawe yo kuyitanga. Yitange wirinde ibibazo bishobora gukururuka nyuma kuko murabizi iyo ibiganiro nk'ibi bitanzwe biba ari ibyo kuburira ariko ntibibura ko ibindi bikorwa bikorwa byo kuba tugumya kuba twabwira abantu, dushishikariza n'abantu kuba niba hari ubizi ko hari mugenzi we uyifite atange amakuru.'

Mu minsi mike ishize mu Karere ka Musanze hasanzwe imbunda bikekwa ko ari umuntu wari wamaze kumenya ko aramutse ayifatanywe yabihanirwa bikomeye ahitamo kuyirambika aho kugira ngo izatorwe n'abandi.

Ati 'Ntabwo ubwo ari uburyo bwiza. Uburyo bwiza ni uko niba wumvise ikiganiro yifate ugende uyihe Sitasiyo ya Polisi ikwegereye barakwakira ubundi ube witandukanyije n'ibyo bibazo byakubaho. Kuvuga ngo reka nzayite hariya izabonwe n'abandi ntabwo ari imibare myiza, unabitekereje bishobora kurangira unafashwe noneho bikaba bibi cyane.'

Inzego zemerewe gutunga imbunda harimo Ingabo z'Igihugu, Polisi y'Igihugu, Urwego rw'Igihigu rw'Ubugenzacyaha, Urushinzwe Igorora, RCS n'izindi ariko zitungwa ku buryo buzwi bwemewe n'amategeko.

Abakozi b'izo nzego zose hari amategeko abagenga, agendanye n'uko babona imbunda n'uko bayisubiza mu gihe bibaye ngombwa unyuranyije n'itegeko akabihanirwa.

Amategeko ateganya ko muntu wese ukora cyangwa utunga intwaro (zimwe zavuzwe haruguru) zitemewe, kwinjiza cyangwa kubika, gucuruza cyangwa gukwirakwiza, gukoresha intwaro zitemewe uwo muntu aba akoze icyaha.

Iyo agihamijwe n'urukiko akatirwa igifungo kiri hagati y'imyaka 20 na 25 n'ihazabu iri hagati ya miliyoni 7 Frw na miliyoni 10 Frw.

Ni mu gihe utunga intwaro mu buryo bunyuranyije n'amategeko, uhindura ibimenyetso biranga intwaro na we aba akoze icyaha, iyo agihamijwe akatirwa igifungo kuva ku mwaka umwe kugera kuri ibiri n'ihazabu itari munsi ya miliyoni 1 Frw ariko itarenze miliyoni 2 Frw.

Na ho uyitunze byemewe ariko wayandaritse ahanishwa igifungo cy'amezi atari munsi y'atatu ariko atarenze atandatu n'ihazabu itari munsi y'ibihumbi 300 Frw itarenze ibihumbi 500 Frw.

Utunze imbunda byewe ariko wayitije, wayikodesheje cyangwa wayigabye ubikoze na we ahanishwa igifungo kitari munsi y'umwaka ariko kitarenze imyaka ibiri n'ihazabu iri hagati ya miliyoni 1 Frw na miliyoni 2 Frw.

ACP Rutikanga yasabye abatunze intwaro bitemewe n’amategeko kuzitanga ku neza batarafatwa ngo bahanwe

Umuvugizi wa RIB, Dr Murangira B Thierry, yavuze ko ubu mu Rwanda hari amahoro bityo umuntu adakwiye kumva ko atekanye ari uko atunze imbunda

Byatangajwe ubwo hasozwaga icyumweru cyahariwe ubuzima bw'umubyeyi n'umwana.

Akarere ka Rutsiro ni kamwe mu turere two mu Rwanda tukigaragaramo abana benshi bagwingiye, gusa bagenda bagabanuka kuko imibare y'ubushakashatsi igaragaza ko mu 2010 abana bari baragwingiye muri aka karere bari 53%, mu 2018 baba 44%, 2022 baba 36%, intego ni uko abana bagwingiye bagabanuka bakagera munsi ya 19% bitarenze 2024.

Mu ngamba aka karere kafashe mu kugabanya imirire mibi n'igwingira harimo no gufatanya n'umufatanyabikorwa Orora Wihaze, mu kwigisha abaturage kumenya gutegura indyo yuzuye irimo ibikomoka ku matungo.

Ni muri urwo rwego hatoranyijwe abakorerabushake barenga 200 bagiye bazenguruka urugo ku rundi bigisha imiryango gutegura indyo yuzuye iriho ibikomoka ku matungo, ariko aho basanze urugo rubanye mu makimbirane bakaruganiriza kuko amakimbirane nayo ari mu bitiza umurindi igwingira n'imirire mibi.

Urugo rwa Mukandayisenga Emerithe wo mu Murenge wa Gihango ni rumwe mu ngo zagezweho n'aba bakorera bushake bwa Orora wihaze.

Avuga ko inama umuryango we wagiriwe n'aba bakorerabushake zatumye urugo rwe ruhindura imyumvire y'uko ibikomoka ku matungo bihenze.

Ati 'Nsigaye nteka ibiryo ngashyiramo indagara, naba ntashyizemo indagara ngateka amagi. Icyo byamfashije ni uko umwana wanjye atongeye guhura n'igwingira cyangwa ngo age mu mirire mibi'.

Kwizera Bosco, Umukozi wa Orora Wihaze, avuga ko icyatumye bashyira imbaraga mu gushishikariza abaturage kurya indyo yuzuye yongewemo ibikomoka ku matungo ari uko basanze ibikomoka ku matungo bigira intungamubiri zihariye zitaboneka mu bindi biribwa.

Ati 'Dukangurira buri muturage wese kurya indyo yuzuye iriho ibikomoka ku matungo cyane cyane ku bana bari munsi y'imyaka itanu n'abagore batwite kugira ngo bagire imibereho myiza'.

Umuyobozi w'Akarere ka Rutsiro, Kayitesi Dative yashimiye aba bakorerabushake, avuga ko uruhare rwabo rwatangiye gutanga umusaruro.

Ati 'Bageze ku ngo zirenga ibihumbi 41 bazifasha kuzamura imyumvire ku guteka indyo yuzuye iriho ibikomoka ku matungo. Ntabwo dusoje ni gahunda tuzakomeza kugeza mu kwezi kwa cyenda, ubwo igwingira twaba turisezereye burundu kuko twabonye ko ntacyo tubuze'.

Igwingira ni kimwe mu bibazo bibangamiye umuryango nyarwanda ari nacyo cyatumye u Rwanda rushyira imbaraga nyinshi mu kurirwanya kuko umwana ugwingiye akarenza imyaka itatu iryo gwingira riba ridashobora gukira.

Iri rushanwa ryateguwe na iDebate Rwanda riterwa inkunga na BK Foundation.

Aba banyeshuri ba Stella Matutina begukanye igihembo cy'ibihumbi 900 Frw, aho uko ari batatu babigabanye buri umwe ahabwa ibihumbi 300Frw.

Bakurikiwe na bagenzi babo bane biga muri College Saint Marie Reine de Kabgayi begukanye igihembo cy'ibihumbi 450Frw.

Aya Marushanwa yitabiriwe n'ibigo by'amashuri yisumbuye icyenda, birimo Stella Matutina, Lycée Notre-Dame de Cîteaux, College Saint Marie Reine de Kabgayi, Riviera High School, Maranyundo Girls School, Agahozo Shaloom, Glory Academy, Kagarama Secondary School ndetse na Hope Haven.

Ni amarushanwa agamije gutegura no gufasha abakiri bato by'umwihariko abanyeshuri bo mu mashuri yisumbuye kugira ubumenyi ku micungire y'ifaranga no guhanga umurimo, bityo bagategurwa hakiri kare banatozwa kuba abayobozi beza b'ejo b'igihugu cyacu.

Umuyobozi Ushinzwe Ibikorwa muri iDebate Rwanda, Keza Ketsia, yagaragaje ko ayo marushanwa yateguwe hibandwa mu kubaka ubumenyi bufasha urubyiruko, by'umwihariko urwo mumashuri yisumbuye gusobanukirwa n'imicungire y'ifaranga ndetse no guhanga umurimo.

Abanyeshuri bo muri Stella Matutina bari bafite umushinga wo gutunganya ibisigazwa by'ibisheke byafatwaga nk'imyanda bakayibyaza umusaruro bakuramo ibikoresho bitandukanye bya purasitike zitangiza ibidukikije (Biodegradable Plastics).

Umwamikazi Aristarline wiga muri Stella Matituna, yagaragaje ko ayo marushanwa abasigiye byinshi ku bumenyi bushingiye ku mari kandi ko n'umushinga bagaragaje biteguye gukomeza kuwushyira mu bikorwa ugatanga umusaruro ku gihugu.

Umuyobozi Mukura wa BK Group Plc, Beata Habyarimana, yagaragaje ko urubyiruko rukeneye kugira ubumenyi ku bijyanye n'imari hakiri kare.

Ati 'Urubyiruko rufite ibitekerezo bitandukanye, rufite kwitegereza ibikenewe ku buryo twaje gusanga ari ngombwa kubashyigikira ngo bagaragaze ubumenyi bwabo. Aya marushanwa atuma bagaragaza ubushobozi bwabo kandi tukamenya aho tugomba guhera tubafasha mu kumenya ibijyanye n'imari.'

Yakomeje avuga ko 'Twaje gusanga ko duciye muri BK Foundation nk'ikigo cya BK Group giharanira imibereho myiza y'abaturage, ndetse dushingiye ku bunararibonye ndetse n'ibyo duhura nabyo buri munsi, ari igikorwa cy'indashikirwa gushyigikira abakiri bato by'umwihariko mu gusobanukirwa imicungire y'ifaranga no guhanga umurimo bikaba akarusho kubikora hakiri kare'

Usibye abanyeshuri begukanye iri rushanwa, ku mwanya wa mbere n'uwa kabiri, buri munyeshuri witabiriye ayo marushanwa yagenewe ishimwe ry'ibihumbi 50Frw, agomba kujya kuri konti ye yo kwizigamira muri Banki ya Kigali nko gutoza abakiri bato umuco wo kuzigama.

Itsinda ry’abo muri Stella Matutina nyuma yo gutsinda

Abanyeshuri bo muri Stella Matutina bishimiye intsinzi babonye

Abanyeshuri bo muri Saint Marie Reine de Kabgayi babaye aba kabiri

Abari bagize akanama nkemurampaka muri aya marushanwa bafashe ifoto hamwe na Beata Habyarimana uyobora BK Group

Abanyeshuri bo muri Lycée Notre-Dame de Cîteaux nyuma yo gusoza amarushanwa bafashe ifoto

Abanyeshuri bo muri Glory Academy ntibahiriwe

Abo muri Riviera High School ntibabashije kwegukana intsinzi

Kagarama Secondary School nayo yari ihagarariwe

Keza Ketsia yagaragaje ko kwigisha abato ibirebana n’amafaranga bituma barushaho kunguka ubumenyi

Umuyobozi Mukuru wa BK Group, Beata Habyarimana yagaragaje ko abato bakwiye kwigishwa ubumenyi mu bijyanye n’imari hakiri kare

Urubyiruko rwasabwe gukoresha ubumenyi rwahawe binyuze muri ayo marushanwa

Umuyobozi wa iDebate Rwanda, Jean Michel Habineza, yashimye ibigo by’amashuri byitabiriye aya marushanwa

Amakuru y'ifatwa ry'uyu mugabo yamenyekanye mu gitondo cyo ku Cyumweru tariki 16 Kamena 2024 ahagana Saa kumi n'ebyiri, ubwo abakirisitu bari bagiye mu misa ya mbere bumvaga uyu mwana w'umukobwa asakuza bakaza kumutabara bagasanga ari gusambanywa.

Bivugwa kandi ko ubwo uwo mwana w'umukobwa wari wagiye gusenga yajyaga kwiherera yahasanze uyu mugabo wari uri kuvugira kuri telefoni igendanwa, we akajya kwiherera uyu mugabo akamusangamo ariho yamufatiye ku ngufu.

Umuvugizi wa Polisi mu Ntara y'Amajyaruguru, SP Jean Bosco Mwiseneza, yemeje aya makuru avuga ko ukekwaho iki cyaha yafashwe agahita ashyikirizwa Urwego rw'Igihugu rw'Ubugenzacaha, RIB.

Yagize ati “Yego uyu musore akekwaho gusambanya umwana w'imyaka 15. Ukekwa afungiwe kuri Sitasiyo ya Polisi ya Muhoza, ari gukurikiranwa n'Urwego rw'Ubugenzacyaha RIB.”

Ingingo ya 136 y'Itegeko riteganya ibyaha n'ibihano muri rusange, ivuga ko iyo umuntu mukuru asambanyije umwana akabihamywa n'urukiko, ahanishwa igifungo kitari munsi y'imyaka 20 ariko kitarenze imyaka 25.

Iyo umuntu mukuru asambanyije umwana ufite cyangwa urengeje imyaka 14 bigatera umwana indwara idakira cyangwa ubumuga, igihano kiba igifungo cya burundu.

Kuva tariki 22 Kamena kugeza k uwa 13 Nyakanga 2024 hazatangira ibikorwa byo kwiyamamaza, aho abakandida bazajya mu bice bagennye gusobanurira Abanyarwanda imigabo n'imigambi yabo.

Ibi bikorwa bihuriramo abantu benshi, Polisi y'u Rwanda ikagira inshingano zo kuharindira umutekano mu buryo bwihariye.

Umuvugizi wa Polisi y'u Rwanda, ACP Boniface Rutikanga yabwiye RBA ko mu matora umutekano uzaba ucunzwe neza cyane ko n'abapolisi bateguwe.

Ati 'Hari Abapolisi barenga 1000 bateguwe barigishwa ku gucunga umutekano by'umwihariko muri iki gihe cy'amatora. Bagize igihe cyo kubyiga, baratozwa, barasoza tugera n'igihe abayobozi bakuru barabaganiriza harimo harimo na Komisiyo y'Amatora.'

Mu bikorwa byo gucunga umutekano mu bihe by'Amatora Polisi igera mbere kandi igacungira umutekano aho abakandida barakorera ibikorwa byabo hose.

Ati 'Dufite inshingano zo kurinda umutekano wa buri wese, ndavuga abakandida uko ari batatu, aho bakorera, aho banyura rimwe nituba tubaherekeje ntibazagire ngo ni ukubagendaho ni uko dufite inshingano zo kubarindira umutekano aho bagiye hose…nihagira n'ikiba tumutabare kuko birashoboka ko nubwo tuvuga ko mu Rwanda bitahaba ariko ashobora guca ahantu mu misozi bakamutera ibuye.'

Yavuze ko bitemewe ko umuntu avuga ko adakeneye gucungirwa umutekano kuko biri mu nshingano za Polisi y'u Rwanda.

Mu bindi bishoboka harimo no kuba umukandida yemerewe guhitamo undi muntu umucungira umutekano mu buryo bwihariye uvuye mu bigo bishinzwe gucunga umutekano ariko na bwo akamenyesha Polisi y'u Rwanda.

Abakandida bemerewe guhatanira umwanya w'Umukuru w'Igihugu mu matora ateganyijwe muri Nyakanga 2024 harimo Paul Kagame watanzwe n'Umuryango FPR-Inkotanyi, Frank Habineza w'Ishyaka Riharanira Demokarasi no kurengera ibidukikije mu Rwanda, DGPR na Mpayimana Philippe wiyamamaje nk'umukandida wigenga.

ACP Rutikanga yavuze ko abazaba bari kwiyamamaza bagomba gukomeza kubahiriza amategeko y'umuhanda kuko amakosa bazakora atazahanagurwa n'uko bari mu bikorwa byo kwiyamamaza.

ACP Boniface Rutikanga yatangaje ko mu gihe cy’amatora hari abapolisi barenga 1000 bazaba bari gucungira umutekano ibikorwa by’amatora

Ibi byagarutsweho ku wa 15 Kamena 2024, mu gikorwa cyo kwibuka ku nshuro ya 30 abari abakozi b'uruganda rw'icyayi rwa Mata.

Mu buhamya bwa Uramukiwe Jean Damascene ukomoka aha i Mata, yakomoje ku wari umuyobozi w'uruganda rw'icyayi rwa Mata witwaga Ndabarinze Juvenal waje kuruyobora avuye i Byumba, akagira uruhare muri Jenoside.

Uyu Ndabarinze yaje kuyobora uruganda ari kumwe n'itsinda ry'insoresore zamurindaga, gusa ngo iryo tsinda byarangiye rihindutse umutwe w'Interahamwe zikomeye zanatoje abandi aha i Mata bica benshi.

Uramukiwe yavuze uko abakozi b'uruganda bishe bagenzi b'Abatutsi bakanatanga inkunga y'ibikoresho mu kujya kwica n'ahandi.

Ati 'Abagereje guhungira i Kibeho na Karama (mu yahoze ari Perefegitura ya Butare) imodoka z'amakamyo na Daihatsu z'uruganda rwa Mata, izaturutse ku rwa Kitabi no ku rundi ruganda rwa Gisovu zaje zipakira Interahamwe zo hirya no hino zidusanga i Karama zirica, byose bitijwe umurindi n'ubuyobozi bw'uruganda rwa Mata.''

Perezida wa Ibuka mu Karere ka Nyaruguru, Habimana Syldio yavuze ko abayoboraga uru ruganda mu gihe cya Jenoside batije umurindi iyicwa ry'Abatutsi muri aka gace.

Ati 'Uru ruganda ni rwo rwatangaga imodoka zo gukwirakwiza abicanyi i Kibeho n'i Karama, ariko ikibabaje abenshi ntibaburanishijwe kuko bavaga kure; bakimara gukora jenoside baritahiye.''

Umuyobozi w'uruganda rw'icyayi rwa Mata, Barayagwiza Joseph, yavuze ko bakomeje kuziba icyuho cy'ubuyobozi bwabanje, binyuze mu kwigisha abakozi b'uruganda umuco w'amahoro cyane ko abagera kuri 60% muri bo ari urubyiruko.

Umuyobozi w'Akarere ka Nyaruguru, Dr Murwanashyaka Emmanuel, yavuze ko u Rwanda rwagize akaga n'idindira rikomeye mu majyambere aho abakabaye bakora ibyubaka bataye igihe mu nzangano no gusenya.

Yavuze uburyo ibikorwa by'uru ruganda byageraga mu mirenge mike gusa, ariko iby'ubwicanyi bikarenga bikagera no muri Huye, ibishimangira imbaraga nyinshi zashyizwe muri Jenoside.

Ati 'Twagize ibyago, aho abakoraga akazi bakaretse bahugira mu kubiba urwango,kwica ndetse bakica bagenzi babo. Ndasaba abayobozi bose gufata iya mbere mu kurwanya ikibi, bimakaza ubumwe, bigisha abo bayobora iby'iterambere gusa.''

Yakomeje asaba urubyiruko kongera imbaraga mu bikorwa by'iterambere no kurinda ibyagezweho.

Kugeza ubu, ku ruganda rw'icyayi rwa Mata hibukwa abari abakozi b'uruganda ndetse n'abahinzi barugemuriraga icyayi 381 bishwe muri Jenoside, hakaba hagishakishwa n'abandi.

Urwibutso rwa Jenoside rw’uruganda rw’icyayi rwa Mata, ruruhukiyemo abari abakozi barwo 381, mu gihe hagishakishwa indi mibiri itaraboneka ngo ishyingurwe mu cyubahiro

Bamwe mu bari baje kwibuka ababo bakoraga mu ruganda rw’icyayi rwa Mata

Perezida wa Ibuka mu Karere ka Nyaruguru, Habimana Syldio yerekanye uburyo uruganda rw'icyayi rwa Mata rwabaye umuterankunga ukomeye wa jenoside yakorewe henshi muri Nyaruguru no mu nkengero zaho

Umuyobozi Mukuru w’uruganda rw’icyayi rwa Mata, yavuze ko bashyize imbere kwigisha urubyiruko umuco w’amahoro cyane cyane ko mu bahakora 60% ari urubyiruko.

Meya wa Nyaruguru, Dr Murwanashyaka Emmanuel, yavuze ko u Rwanda rwagize akaga n'idindira rikomeye mu majyambere aho abakabaye bakora ibyubaka bataye igihe mu nzangano no gusenya, asaba abayobozi kwigisha ibyiza

Kuri ubu, uruganda rw’icyayi rwa Mata rufite abakozi basaga 7000, bakaba bose bagenerwa inyigisho z’amahoro no kubana neza kugira ngo bazibe icyuho cy’abahemutse muri Jenoside

Kuri iyi nshuro naho rworoje abarokotse batatu inka

Iyi nyubako yitwaga ‘cantine’, ngo ni yo yaberagamo inama zateguraga jenoside yahitanye benshi i Mata

Uramukiwe Jean Damascene watanze ubuhamya, yavuze ko ubu yongeye kwiyubaka abikesha guhinga icyayi, akaba akomeje urugendo rw’iterambere ndetse afite n’umugambi wo kugura imodoka

Uruganda rwa Mata rumaze kuremera abarokotse Jenoside inka zisaga 30 mu bihe bitandukanye mu rwego rwo kubafata mu mugongo

Yvonne Makolo yabwiye Financial Times ko ibiganiro by'ubu bugure hagati ya RwandAir na Qatar Airways byari bimaze imyaka itanu, ariko yizeza ko bigiye kugera ku musozo.

Ati 'Bimaze igihe biba, tumaze imyaka igera kuri itanu tubiganiro, ariko ubu tugeze ku musozo.'

Makolo yakomeje avuga ko ishyirwa mu bikorwa ry'aya masezerano y'ubugure rizatangira gushyirwa mu bikorwa mu ntangiriro z'ukwezi kwa Nyakanga mu 2024.

Yavuze ko iyi gahunda izafasha RwandAir kwagura ibikorwa byayo, haba mu mubare w'indege itunze ndetse n'ibyerekezo ijyamo ndetse no kongerera ubumenyi abakozi bayo.

Bizafasha kandi Qatar Airways kongera umubare w'ingendo ikorera ku Mugabane wa Afurika.

Uyu muyobozi yatangaje ko Qatar Airways iri mu myiteguro ya nyuma yo gushora imari muri sosiyete ikorera mu karere ka Afurika y'amajyepfo, izuzuza ibikorwa bya RwandAir, hagamijwe gukomeza kuziba ibyuho muri iyi serivisi.

Umuyobozi Mukuru wa Qatar Airways, Badr Mohammed Al-Meer aherutse kuvuga ko 'RwandAir izadufasha kugeza abantu mu bindi bice bya Afurika, tubageze hirya no hino ku Isi. Turi mu myiteguro ya nyuma yo gushora muri sosiyete yo muri Afurika y'amajyepfo, izuzuza ibikorwa bya RwandAir nka sosiyete ihuza uburengerazuba, uburasirazuba n'amajyaruguru ya Afurika.'

Uyu mushinga wa Qatar Airways wo kugura imigabane muri RwandAir watangiye kuvugwa cyane muri Gashyantare mu 2020, ubwo Umuyobozi Mukuru wa Qatar Airways, Akbar Al Baker, yavugaga ko ibiganiro bigeze kure nubwo amasezerano atarasinywa.

Muri uwo mwaka Umuyobobozi Mukuru wa Qatar Airways yari yatangaje ko hamaze gusinywa amasezerano y'imikoranire igisigaye ari uko ayemeza igurwa ry'imigabane ashyirwaho umukono kandi ko nabyo bizarangira 'mbere y'uko icya kabiri cy'uyu mwaka kirangira'.

Mu 2022 impande zombi zavugaga ko mu minsi mike ubu bugure buzaba bwamaze gushyirwa mu bikorwa, kuko ibiganiro bigeze kure, hasesengurwa ibijyanye n'amategeko ndetse n'ibijyanye n'igishoro, amadeni n'imitungo hagamijwe kubaka ishoramari rirambye.

Uyu mwaka waje kurangira nta kindi gitangajwe kuri uyu mushinga ndetse bamwe batangira kwibaza icyaba cyarawudindije.

Ubwo yari mu Nteko Rusange ya 79 y'Ikigo Mpuzamahanga gishinzwe ingendo zo mu Kirere (IATA) yabereye i Istanbul muri Turikiya, Yvonne Makolo, yavuze ko uyu mushinga wagiye udindizwa n'impamvu zitandukanye zirimo icyorezo cya COVID-19 ndetse n'imyiteguro Qatar yahise ijyamo yo kwakira Igikombe cy'Isi cy'Umupira w'Amaguru.

Yvonne Makolo yatangaje ko ukwezi kwa Nyakanga mu 2024 kuzarangira Qatar Airways yegukanye imigabane 49% muri RwandAir