Author: webrwanda

Ni Inama yateguwe n'Urugaga rw'Abenjeniyeri mu Rwanda (IER) ku bufatanye n'Ishyirahamwe ry'Abenjeniyeri ku Isi (WFEO), aho izaba kuva ku wa 15-18 Ukwakira muri Kigali Convention Center, ikaba yitezweho kuzavamo ubufatanye n'imikoranire bw'abazayitabira.

GECO ifatwa nk'Ihuriro ry'abenjeniyeri riruta andi yose ku Isi kuko ibaha urubuga rwagutse ruborohereza gusangira ubumenyi, udushya tugezweho ndetse n'ibisubizo by'ibibazo abo muri uru rwego bakunda guhura na byo.

Iyi Nama ifite insanganyamatsiko igira iti 'Guhanga Udushya mu Bwubatsi hagamijwe Iterambere Rirambye ry'Ahazaza (Engineering Innovations for a Sustainable Future)', izahuriza hamwe abagera ku 1000 barimo abahagarariye imiryango itandukanye ikora uwo mwuga, abo muri za kaminuza, inzego zishinzwe gushyiraho politiki zitandukanye, abahanga udushya mu by'ikoranabuhanga n'abandi.

Izibanda ku iterambere rirambye, ubudaheranwa no kudaheza, kimwe no gukora ubushakashatsi, ikoranabuhanga n'imishinga itandukanye muri uru rwego rw'uyu mwuga. Hari kandi guteza imbere uburyo bwo kumenyana n'abanyamwuga babirambyemo, kumenyana n'abayobozi bakora muri uru rwego hagamijwe guteza imbere ubufatanye n'imikoranire n'ibindi.

Minisitiri w'Ibikorwaremezo, Jimmy Gasore, avuga ko iki ari igikorwa cy'ingenzi gihesha abenjeniyeri uburyo bwiza bwo gutegura ahazaza habo ku rwego rw'Isi ku buryo babasha kumenya ikoranabuhanga rigezweho mu bijyanye n'ibyo bakora.

Ati 'Iyi nama izaba nk'umusemburo ukomeye mu byo guhanga udushya, imikoranire, no kungurana ubumenyi. Izaba kandi urubuga rwo gusangizanya ubushakashatsi, gushyira imbaraga mu mikoranire, hatezwa imbere ubunyamwuga, kandi hatezwa imbere uru ruganda binyuze mu buryo bwo gufatanya.'

Ibi byashimangiwe na Mustafa Shehu, Perezida wa WFEO aho yavuze ko iyi nama ari ingenzi cyane ko yitezweho kuzahuriramo impuguke ziturutse hirya no hino ku Isi maze hakabaho kuganira no kubonera ibisubizo ibibazo byugarije uru rwego rw'abenjeniyeri hifashishijwe ibitekerezo byabo.

Ati 'Iyi nama iratanga urubuga rukomeye ku bari muri uyu mwuga bavuye hirya no hino ku Isi aho bazaba basangizanya ubunararibonye, kurebera hamwe ikoranabuhanga rigezweho, no gukuza imikoranire izongerera imbaraga ubufatanye bwacu tugana mu Isi irimo iterambere rirambye izira ubusumbane.'

Iby'ingenzi bizaganirwaho

Abateguye iyi nama bavuze ko abazayitabira bazaganira ku Ntego z'Iterambere Rirambye (SDGs), harimo n'iyubakwa ry'imijyi ifite ikoranabuhanga kandi irengera ibidukikije, igenamigambi ry'imijyi, ibikorwaremezo bijyanye n'ingendo n'ubwikorezi, inyubako zubatse mu buryo butangiza ibidukikije, n'uburyo bwo gukumira no guhangana n'ibiza.

Harimo kandi ibisubizo byatangwa n'abenjeniyeri ku byerekeranye no guhangana n'imihindagurikire y'ibihe, kumenya uburyo umuntu yakwitwara mu gihe ibayeho, uburyo bwo kugabanya imyuka ihumanya ikirere hifashishijwe ikoranabuhanga, ikoranabuhanga mu bijyanye n'ingufu zisubira no gukwirakwiza amashanyarazi n'amazi meza ku bo bitarageraho.

Iyi nama izibanda by'umwihariko ku buryo hatangwa uburezi bwubakiye ku Bumenyi, Ikoranabuhanga, Ubwubatsi, n'Imibare (STEM) hagamijwe cyane cyane guteza imbere ubumenyi n'ubushobozi mu mikorere y'abenjeniyeri ku Mugabane wacu.

Umunyamabanga Nshingwabikorwa wa IER, Steven Sabiti yavuze ko GECO ije mu gihe hashize imyaka haterwa intambwe igaragara mu kuzamura imyumvire hagamijwe gutanga akazi kuri ba enjeniyeri bemewe kandi babifiteye ubushobozi ku isoko ry'u Rwanda.

Ku bwa Sabiti, gushyira imbaraga mu burezi bwubakiye ku Bumenyi, Ikoranabuhanga, Ubwubatsi n'Imibare, bizongera ubunyamwuga kandi bigire uruhare mu kuzamura imibereho myiza n'ubukungu mu gihugu.

Ibikorwa bizaba muri iyo Nama

Sabiti yahamagariye abafatanyabikorwa n'abazitabira iyi Nama, kuyigiramo uruhare batanga inkunga yabo mu byiciro bitandukanye kandi bakaniyandikisha ku bwinshi.

Kugeza ubu ibyiciro byo gutera inkunga bihari, birimo icy'Ibanze (Bronze) aho umuntu ashobora gutanga ibihumbi 20$, Icyisumbuye (Silver) aho umuntu atanga ibihumbi 30$ hakaba n'icyiciro cya gatatu cyiswe 'Gold' aho umuntu atanga ibihumbi 40 by'amadolari ya Amerika, ndetse hakaba n'icy'Ikirenga aho umuterankunga ashobora gutanga ibihumbi 50$.

Muri iyi nama, ibigo bitandukanye by'ubushakashatsi ndetse n'ibindi bigo birimo n'ibigitangira gukora, bizaboneramo amahirwe yo kugaragaza udushya, ikoranabuhanga n'imishinga bigezweho muri iki gihe.

Iyi nama izamara iminsi ine izaha amahirwe abitabiriye yo kumenya iterambere rigezweho muri uru rwego, ibahe amahirwe yo gushyira imbaraga mu bufatanye n'abandi, ndetse n'imikoranire na bo ku mishinga y'ahazaza.

Umunyamabanga Nshingwabikorwa wa IER, Steven Sabiti yavuze ko GECO ije mu gihe hashize imyaka haterwa intambwe igaragara mu kuzamura imyumvire hagamijwe gutanga akazi kuri ba enjeniyeri bemewe kandi babifiteye ubushobozi ku isoko ry'u Rwanda

Kanda hano udukurikire kuri WhatsApp Channel

Ni amasezerano azamara imyaka ine kugeza mu 2028, akaba azagira uruhare mu gushyira mu bikorwa gahunda ya Guverinoma y'u Rwanda yo kwihutisha iterambere, NST2.

Aya masezerano asimbura ayo ibihugu byombi byari byasinye mu 2022 yari afite agaciro ka miliyoni 500$, aho byateganywaga ko azarangira mu 2026.

Minisitiri w'Imari n'Igenamigambi, Murangwa Yusuf, yavuze ko kubera umubano mwiza w'ibihugu byombi hatategerejwe ko amasezerano ya mbere arangira, bituma byemezwa ko ayo masezerano yongererwa ingufu.

Minisitiri Murangwa yavuze ko nko mu bwikorezi aya masezerano azafasha mu kubaka imihanda, mu buzima agafasha mu guteza imbere uru rwego kugira ngo rurusheho gutanga serivisi zinoze hubakwa n'ibikorwaremezo by'ubuvuzi nk'Ibitaro bya Muhororo n'ibindi.

Yavuze ko mu burezi azafasha kubakira ubushobozi Abanyarwanda mu by'ubumenyi n'Ikoranabuhanga, guteza imbere amashuri y'imyuga n'ibindi bizatuma gahunda y'u Rwanda yo kubaka ubukungu bushingiye ku bumenyi yihutishwa.

Ati 'Guverinoma y'u Rwanda irajwe ishinga no kunoza ndetse no guha imbaraga ubufatanye bw'ibihugu byombi. Twizeye ko aya masezerano ashingiye kuri iriya gahunda ya Guverinoma y'u Rwanda yo kwihutisha iterambere azatanga umusaruro ufatika.'

Yongeyeho ko “Ubufatanye bw'u Rwanda na Koreya y'Epfo bujyanye na gahunda y'iterambere ya NST kandi bugira uruhare mu guteza imbere ubushobozi bw'Abanyarwanda binyuze mu guteza imbere urwego rw'ubuhinzi, gukwirakwiza ikoranabuhanga ndetse n'ibindi.”

Yongeyeho ko aya masezerano yasinywe uyu munsi atanga icyizere cy'uko u Rwanda ruzagera ku ntego zarwo zo kubaka ubukungu bushingiye ku bumenyi.

Ambasaderi wa Koreya y'Epfo mu Rwanda, Jeong Woo Jin yatangiye yifuriza u Rwanda umunsi mwiza wo kwibohora ku nshuro 30, anashimira intambwe u Rwanda rumaze gutera nyuma ya Jenoside yakorewe Abautsi, bigizwemo uruhare 'n'abantu batandukanye baba abikorera, ubuyobozi, n'Abanyarwanda muri rusanze.'

Yavuze ko iyi nkunga izatangwa binyuze mu Kigega kigamije Ubutwererane mu Iterambere ry'Ubukungu 'Economic Cooperation Development Fund, ECDF.'

Amb Jin yavuze ko yizera adashidikanya ko 'n'aya masezerano azashyirwa mu bikorwa binyuze muri ECDF ari umusingi mwiza mu gukomeza kwagura imikoranire iri hagati y'ibihugu byacu, ikagera ku rundi rwego.'

Uyu Muyobozi yavuze ko ubwo muri Kamena 2024, iki gihugu cyifuza kwagura umubano n'ibihugu bya Afurika, ari no muri urwo rwego cyagiranye Inama n'abayobozi b'ibihugu bya Afurika izwi nka 'Korea-Africa Summit', Inama yanitabiriwe na Perezida Paul Kagame.

Ati 'Bimpa icyizere ko hari inzego nyinshi ibihugu byombi bigomba gufatanyamo, cyane cyane bishingiye ku gukomeza ubufatanye bwari busanzwe nko mu buhinzi, uburezi, ikoranabuhanga, ubuzima, kubaka ibikorwaremezo n'ibindi.'

Imyaka 61 y'umubano mu bya dipolomasi hagati y'u Rwanda na Koreya y'epfo irashize, kuko watangiye mu 1963.

Mu 2010 ni bwo uwo mubano wongereyemo ikibatsi nyuma y'uko u Rwanda rufunguye Ambasade yarwo i Seoul mu 2009 na Koreya iyishinga i Kigali mu 2011, ibyafashije ko imishinga ibihugu byombi bifitanye yihutishwa.

Guverinoma y’u Rwanda na Koreya y’epfo byasinye amasezerano afite agaciro ka miliyari 1$ azafasha u Rwanda guteza imbere imishinga itandukanye

Minisitiri w'Imari n'Igenamigambi, Murangwa Yusuf yavuze ko iyi nkunga ya miliyari 1$ izatangwa na Koreya y’Epfo izafasha u Rwanda mu guteza imbere gahunda yarwo yo kwihutisha iterambere rishingiye ku bumenyi

Ambasaderi wa Koreya y’Epfo mu Rwanda Jeong Woo Jin yijeje ubufatanye bwisumbuye hagati y’igihugu cye na Guverinoma y’u Rwanda

Umuhango wo gusinyana amasezerano hagati ya Guverinoma y’u Rwanda na Koreya y’epfo witabiriwe n’abayobozi ku mpande zombi

Amafoto: Kwizera Herve

Remnant Christian Network (RCN) ni Minisiteri y’Ivugabutumwa yashinzwe mu 2006, ikaba iyoborwa na Apostle Arome Osayi wo muri Nigeria. Ihuriramo abo mu madini atandukanye bahuriye ku nshingano zo kugarura gahunda y'intumwa n'ubukristu nk'uko byahozeho mu gihe cya mbere cy'intumwa za Yesu Kristo, mu rwego rwo kurushaho kumenyekanisha ukuza k’Umwami Yesu Kristo muri iyi minsi ya nyuma.

Nk'uko byari byitezwe, mu masaha y'umugoroba wo kuri uyu wa Kane tariki 4 Nyakanga 2024, imbaga y'abakristo baturutse n'impande mu gihugu yari iteraniye i Kigali mu ihema rya Serena Hotel, ije kumva ibyo Imana yashyize ku mutima w'Intumwa yayo Apostle Arome Osayi uri mu bakozi b'Imana bakomeye muri Nigeria na Afrika muri rusange.

Iki giterane, cyaranzwe n'imbaraga z'Umwuka Wera kuva gitangiye kugeza kirangiye kuko abitabiriye bose bagize umwanya uhagije wo kuganira n'Imana haba mu masengesho, mu ndirimbo zitandukanye ndetse no mu ijambo ry'Imana bagejejweho na Apotle Arome Osayi.

Ntabwo byari bisanzwe kuko iki giterane cyiswe “Rwanda Apostolic Visit” cyitabiriwe n'ibyamamare bifite amazina aremereye muri Gospel Nyarwanda, harimo abashumba bakomeye bashumbye amatorero anyuranye, abahanzi b'indirimbo zo kuramya no guhimbaza Imana nka Gabby Kamanzi, Rene & Tracy n'abandi.

Guhera saa Kumi n’imwe kugeza hafi saa Moya z’umugoroba hagiyeho umuvugabutumwa, abitabiriye bagize umwanya wo gusenga bayobowe n'abakozi b'Imana bari bateguwe, abaramyi barimo Chryso Ndasingwa bafasha abantu kujya mu Mwuka babinyujije mu bihangano binyuranye biri mu ndimi z'Ikinyarwanda n'Icyongereza, maze bamwe bavuga mu ndimi z'Umwuka Wera.

Ubwo yahageraga, Intumwa y'Imana, Arome Osayi yahise ahabwa umwanya, avuga ko yishimiye kugera mu Rwanda ku nshuro ya mbere, ashimangira ko u Rwanda ari rwiza ndetse ko ubu yaje mu igerageza, umwaka utaha akaba ari bwo hazakorwa igiterane nyirizina.

Yifashishije ijambo ry’Imana riboneka muri Luka mu gice cya 9 n’icya 10, Apostle Arome yasobanuye uko Yesu Kristo yatoranyije intumwa ntazicaze hamwe ahubwo akaziha ubushobozi n’imbaraga by’Umwuka Wera ubundi akazituma kubwiriza amahanga no gukiza abarwayi. 

Ashingiye kuri iri jambo, yavuze ko yishimiye ko u Rwanda ari igihugu cyiza cya Gikristo, ariko atangaza ko ikibabaje ari uko amatorero menshi ashishikajwe no kugira umubare munini w’abakristo bicaye mu rusengero kurusha abo bohereza kubwiriza amahanga atazi ubutumwa bwiza kugira ngo harokoke ubugingo bwa benshi.

Yasengeye abifuza gutumwa ahari imbaraga z’umwijima, kugira ngo buzuzwe imbaraga zizabashoboza guhangana n’iyo myuka mibi. Yasabye abari aho guhangayikishwa no kwakira imbaraga z’umwuka zibashoboza kunesha umubi kuruta guhangayikishwa no kuzuza amafaranga menshi kuri konti zabo.

Nyuma yo kubwiriza iri jambo, yasengeye abantu mu byiciro bitandukanye, ahanurira benshi, yongerera imbaraga abatentebutse, maze akiza abarwayi yifashishije imbaraga z’Umwuka Wera yahawe, ndetse bamwe muri bo batanga ubuhamya bw’uko bakize neza.

Mu kiganiro aherutse kugirana na InyaRwanda, Pastor Yves Ndanyuzwe wa Remnant Christian Network Rwanda, yatangaje ko iki gikorwa bacyise 'Rwanda Apostolic Visit' kubera ko bazakira umushyitsi ukomeye, Apostle Arome Osayi nk'Intumwa ya Kristo, uzaba ugeze mu Rwanda ku nshuro ya mbere.

Akomoza ku musaruro bari biteze muri iki gikorwa, yagize ati: 'Apostle Arome Osayi azwiho kugira inyigisho z'ububyutse, zegereza abantu Imana bituma barushaho kuyishaka. Twiteze ko uru ruzinduko ruzaba imbarutso y'ububyutse mu mitima ya benshi.'

Uruzinduko rwa Apostle Arome mu Rwanda, rwari rwitezweho gushyigikira no gutera inkunga itorero mu rwego rwo kurifasha gusohoza inshingano no kugera ku ntego yaryo neza, kandi ni ko byagenze kuko abashumba n’abandi bakozi b’Imana bahawe impanuro zishingiye ku cyo ijambo ry’Imana rivuga, bongererwa imbaraga. 

Mu buryo bw’Umwuka, iyi Ntumwa yasangije ubwenge n’imbaraga z’Umwuka Wera abayobozi ndetse n’abandi bitabiriye iki giterane, ku buryo byitezwe ko bizabafasha gukura mu kwizera no kurushaho gusobanukirwa iby’Imana.

Apostle Arome Osayi ni Umuyobozi akaba ari nawe washinze ihuriro mpuzamahanga rya Reminant Christian Network rifite icyicaro i Makurdi muri Leta ya Benue, muri Nigeria. Ni intumwa y’Umwami Yesu Kristo, umwanditsi w’ibitabo, umujyanama, rwiyemezamirimo, akaba n’umugiraneza wakiriye agakiza afite imyaka irindwi y’amavuko.

Yanditse ibitabo byinshi bishingiye ku myemerere ya gikristo birimo ‘Kingdom Recalibration,’ ‘Decimating Demonic Devises,’ n’ibindi. Afite umugore witwa Dinah Osayi bamaranye imyaka irenga 15.

Apostle Arome Osayi, yaje mu Rwanda ku butumire bwa African Leadership University [ALU]. Yahageze ku gicamunsi cyo kuwa Kane tariki 04 Nyakanga ndetse ni bwo bwa mbere yari ageze mu Rwanda. Yasanze u Rwanda ari rwiza, avuga ko iyo abimenya aba yaraje kera.

Apostle Arome Osayi ni umwe mu bari gukoreshwa n’Imana ibitangaza bikomeye. Urusengero rwe ruba rwuzuye abayoboke kubera kuryoherwa n’amagambo y’Imana anyura mu kanwa ke.

Pastor Ndanyuzwe Yves uri mu bateguye iki igiterane cyabwirijemo Apostle Arome Osayi, yasobanuye ko batekereje gutumira Chryso Ndasingwa, kuko 'ari ari umuhanzi mwiza w'indirimbo za gikristo.' Chryso yaririmbye indirimbo ze zitandukanye, benshi barizihirwa cyane.

Muri iki giterane, Pastor Ndanyuzwe Yves hamwe n’umufasha we, basutsweho amavuta, batangaza ko Itorero RCN (Remnant Christian Network Rwanda) ritangijwe ku mugaragaro.

REBA UKO BYARI BIMEZE MU MAFOTO:

Apotle Arome Osayi ubwo yageraga i Kigali

Byari ibyishimo ubwo yahuraga na Pastor Yves Ndanyuzwe uri mu bateguye igiterane ‘Rwanda Apostolic Visit’

Abantu bitabiriye ku bwinshi ku buryo ihema ryateganyijwe ryari ryuzuye

Abitabiriye iki giterane baje biteguye guhemburwa

Hatanzwe umwanya uhagije wo kwegerana n’Imana

Umuramyi Chryso Ndasingwa yafashije abari aho kuramya Imana mu mwanya muto yahawe

Hakozwe ibitangaza abari barwaye amaso, ababara mu nda, abarwaye za kanseri n’ibindi batashye bashima

Hari abahawe impano z’Umwuka Wera

Umuramyi Rene Patrick yongerewe imbaraga z’Umwuka Wera

Umuramyi akaba n’umunyamakuru Tracy Agasaro nawe yarambitsweho ibiganza na Apostle Arome Osayi

Aba ni bamwe mu bakozweho na Mwuka Wera

Umuramyi Gabby Kamanzi ari mu bitabiriye iki giterane cy’umunsi umwe

Abashumba batandukanye bitabiriye

Abaramyi Rene & Tracy batahanye izindi mbaraga

Mu ijambo yigishije, Apostle Arome yakebuye amatorero yibwira ko kuba afite umubare w’abantu benshi bicaye mu rusengero ari ko gukura

Yasabye amatorero kohereza abantu mu kurokora ubuzima bw’abandi kuruta kubicaza mu rusengero

Apostle Arome Osayi yahanuye, akora ibitangaza

Pastor Ndanyuzwe Yves n’umufasha we basutsweho amavuta

Pastor Yves Ndanyuzwe yahise aboneraho gutangaza ko itorero RCN ritangijwe ku mugaragaro

Kanda hano urebe amafoto menshi yaranze iki giterane   

AMAFOTO: Serge Ngabo – InyaRwanda

VIDEO: Remnant Christian Network Rwanda

Umutoza w’ikipe y’igihugu Amavubi, Frank Torsten Spittler yagaragaje ko atashimishijwe n’itsinda Amavubi yisanzemo mu gushaka itike y’igikombe cy’Afurika cya 2025 kuko amakipe arimo basanzwe bari kumwe mu gushaka itike y’Igikombe cy’Isi.

Ejo hashize ku wa Kane tariki ya 4 Nyakanga 2024 ni bwo habaye tombola y’amatsinda yo gushaka itike y’Igikombe cy’Afurika cya 2025 kizabera muri Maroc.

Tombola yasize Amavubi ari mu itsinda D kumwe na Libya, Benin ndetse na Nigeria. Nigeria na Benin zisanzwe ziri kumwe n’Amavubi mu gushaka itike y’igikombe cy’Isi cya cya 2026.

Umutoza w’ikipe y’Igihugu Amavubi, Frank Spittler yavuze ko bibabaje kongera kwisanga mu itsinda rimwe na Benin na Nigeria.

Ati “Mu by’ukuri bibabajemo kuba dufite amakipe abiri mu itsinda, Nigeria na Benin tunarimo gukina mu itsinda rimwe mu gushaka itike y’igikombe cy’Isi. Ariko ni uko bimeze nta kundi.”

Nta gihindutse biteganyijwe ko imikino ya mbere yo gushaka itike y’Igikombe cy’Afurika cya 2025 izatangira muri Nzeri uyu mwaka.

Frank Spittler yababajwe n’itsinda Amavubi yisanzemo

APR FC iri mu biganiro bya nyuma n’umukinnyi ukina asatira ukomoka muri Zambia, Abraham Siankombo wakiniraga Zesco United ndetse na Mamadou Sy ukomoka muri Maurtania ukinira Nouakchott King.

Abraham Siankombo w’imyaka 26 ukina mu kibuga hagati ariko asatira (inyuma ya ba rutahizamu).

APR FC ikaba irimo ikora ibishoboka byose ngo ibe yasinyisha uyu mukinnyyi kuko ibona imukeneye abe yaza kubafasha mu buryo bwo kurema ibitego kuko bahafite ikibazo.

Iyi kipe kandi amakuru avuga ko iri mu biganiro bya nyuma na rutahizamu ukomoka muri Maurtania wakiniraga Nouakchott King y’iwabo, Mamadou Sy.

Mamadou Sy w’imyaka 23 akaba mu gihe ibiganiro byagenda neza cyane ko amakuru avuga ko ategerejwe i Kigali, agomba kuza guhanganira umwanya wa Victor Mbaoma watsinze ibitego byinshi muri shampiyona y’u Rwanda umwaka ushize.

Aba bakinnyi bakaba binyongera ku banya-Ghana babiri, Richmond Lamptey na Seidu Dauda, umunya-Senegal Aliou Souane bamaze gusinya ndetse n’umunya-Brazil Juan Batiste waje mu igeragezwa.

Abraham Siankombo arifuzwa cyane na APR FC

Mamadou Sy yitezwe muri APR FC

'Daymakers' ni nayo yamuritse impano z'abarimo umunyarwenya Japhet Mazimpaka ndetse na 5K Etienne uherutse gutangira urugendo rwo gukora filime ye yubakiye ku buzima bwo mu rugo, cyane cyane ku mibereho y'abakozi n'abakoresha babo.

Mu bihe bitandukanye, Sugira Florence yagiye agaragara muri filime nto 'Short Videos' yagiye ahuriramo na Clapton, ariko izatumye izina rye rikomera ni filime yagiye akinamo ahuriyemo n'umusore wamamaye nka 'Makanika'.

Mu kiganiro cyihariye InyaRwanda, Sugira yavuze ko guhuza imbaraga na Makanika byaturutse ku nama bagiriwe na Clapton, kandi ibihangano bagiye bashyira hanze mu bihe bitandukanye, byarakunzwe cyane bituma biyemeza gukomeza kubishyiramo imbaraga.

Ati 'Ni byo ubwo nahuzaga imbaraga na Makanika ibihangano byacu byaramenyekanye cyane, ariko ntabwo ariwe muntu twakoranye bwa mbere nk'uko nabikubwiye Clapton ni we twakoranye mbere gusa twakoze 'Video' nkeya ubundi ahita atugira inama y'uko njye na Makanika twakorana.'

'Twakoze filime nto iba iramenyekanye cyane, abantu barayikunda n'uko turakomeza dukora n'izindi nyinshi gutyo gutyo n'uko abantu bakomeza kutwereka urukundo.'

Sugira yavuze ko kwisanga muri filime si ibintu byamutunguye kuko yatangiye kugaragaza impano akiri muto, ndetse igihe kimwe akiri muto Se yigeze kumujyana muri kompanyi ya 'Silver Film Prodution' nyuma y'uko hari filime yari yanditse.

Ariko kandi avuga ko inzozi ze zari zagutse kuko yashakaga no kuba umunyamategeko. Ati 'Byari ibintu nakuze niyumvamo ariko kurundi ruhande inzozi zanjye zari kuzaba umunyamategeko ariko na filime navuga ko ari impano nakuze mfite kuva mu bwana.'

Uyu mugore yasobanuye ko Cinema yamufunguriye amarembo mu rugendo rwe rw'ubuzima, kandi ahamya neza ko aho ageze byaturutse kuri filime yakoze. Asobanura gukina muri filime nk'ifungurwa ry'imiryango ye no kubasha kugera aho atari kuzagera iyo atagaragara muri Cinema.

Filime nyinshi yakinnyemo yamamaye ku izina rya 'Fofo' ndetse inyinshi zagiye zigaruka ku buzima bwa buri munsi n'ibindi binyuranye. 

Ati 'Navuga ko ari urugendo rwiza kuri njye, kandi nishimira uko ndubayemo, mbese ntewe ishema nabyo.'

Yinjiye muri Cinema havugwamo ruswa y'igitsina- N'ubu ntiwahakana ko yacitse

Sugira yavuze ko ajya gutangira gukina filime yumvaga cyane ko harimo ruswa y'igitsina, ariko ashima Imana ko atigeze ahura nayo,

Yavuze ko nta munsi n'umwe yigeze asabwa n'umuntu kuryamana nawe kugirango ahabwa umwanya wo gukina.

Ati 'Yego! Nk'uko ubivuze ninjiye muri Sinema harimo ruswa y'igitsina narabyumvaga ariko njyewe nagize amahirwe mu by'ukuri ntayo ntigeze mpura nayo.'

'Nta narimwe ntigeze nsabwa na Producer' cyangwa 'Drector' ngo turyamane habe numwe kabisa. Aba-Produces na ba-Director twakorenye yaba abari mu bihugu mpuzamahanga n'abari mu Rwanda, nta numwe wigeze anyubahuka.'

Julien Bmjizzo yateye intambwe idasubira inyuma yambika impeta umukunzi we Sugira Florence- Byabaye ku wa 10 Ukwakira 2022

Bamutegaga iminsi!

Sugira yavuze ko gukina filime ari umurimo usanzwe nk'indi, kandi nawo ugira ibicantege iyo udafite umutima ukomeye byatuma uhagarika urugendo wari watangiye.

Uyu mugore yavuze ko atangira gukina filime, yahuye n'ibicantege by'abantu bamubwira ko ubwo yinjiye muri Cinema ashobora kuzatwara inda mbere y'uko arushinga, ariko siko byagenze.      

Yavuze ati 'Igicentege cya mbere nahuraga nacyo n'uko abantu bose bantegaga iminsi ngo ubwo ugiye muri filime nawe uraje uhite ubyara udashatse (fille Mere) kubera ukuntu abakobwa bose bari muri sinema icyo gihe abenshi bari aba-Filles mere uretse Usanae Bahavu Jannet na Kirenga Saphine n'uko rero abantu bose bantegaga iminsi.'

Sugira yavuze ko hejuru y'ibi bicantege, yagize umutima ukomeye muri we, yirinda amatwi y'abantu, ahubwo ashyira imbere guharanira guhesha ishema umwuga wa Cinema, birimo kwirinda buri kimwe cyose cyari gutuma Satani amukoza isoni.

Akomeza ati 'Bakambwira ngo ngiye kuba ikirara, ngo ngiye kwangirika ngo ndaje mbyare. Ariko nyine njyewe mu byo naharaniye nagiraga ngo isura y'abakinnyi ba film mu Rwanda yubahwe, nirinze gutana, nirinda guhinduka, ubundi nkomeza gukora no gusenga.'

KANDA HANO UREBE IGICE CYA GATANU CYA FILIME ‘FOFO’ YAKINNYEMO

Uyu mugore yavuze ko abakiri bato bashaka kwinjira muri Cinema, bakwiye kubaho buba impano yabo, kandi bakumva ko ntacyo 'bagomba umuntu ugiye kubaha akazi, kandi ni byiza kuvuga Oya igihe ari ngombwa'.

Ati 'Impano yawe ifite agaciro kanini n'iyo watanga ruswa y'igitsina, hari igihe uwo mwanya bashakaga ku gushyiramo utazawujyamo kandi bamaze ku gukoresha ibyo bashakaga.'

Mbere na nyuma yo kurushinga ntiyagaragaye cyane muri Cinema, habaye iki?

Sugira yabwiye InyaRwanda, ko kutagaragara cyane muri Cinema bitaturutse mu kuba yarinjiye muri rukundo na Director Bmjizzo, ahubwo yagize uburwayi bwatumye abagwa inshuro eshatu mu 2020.

Nyuma yo gukira yagarutse mu kazi atangira kugaragara muri filime zirimo 'Uwera' ica kuri Zacu Tv. Nyuma, Se yitabye Imana, ibintu bisubira irudubi.

Ati 'Nuko ibintu bimbana byinshi, birangora kubyakira, rero nari nkeneye igihe cyo kuruhuka. Nyuma y'aho nibwo nahise nkora ubukwe. Navuga ko imyaka micye itambutse ntiyari inyoroheye kuri njye, byari ibihe bigoye kubyakira, nari nkeneye umwanya wo kwitekerezaho.' 

Ubukwe bw’aba bombi, bwabaye ku wa 16 Nyakanga 2023, bwatashywe n’abarimo The Ben

Uko yisanze mu rukundo na Director Bmjizzo

Sugira yavuze ko umugabo we babana muri iki gihe mu gihugu cy'u Bubiligi, ntibigeze bahurira muri Cinema, ahubwo yaramwegereye ashaka ko bakorana-Ni aho inkuru y'urukundo rw'abo yatangiriye.

Yavuze ko ibyari akazi byaje kuvamo ubushuti bwagutse kugeza ubwo barushinze. Ati 'Ntago umugabo wanjye twahuriye muri Cinema, gusa twamenyanye byerekeye akazi, yaranyegereye ashaka ko dukorana. N'uko twamenyanye, nyuma tuza gukundana noneho reba aho tugeze, twashinze urugo.'

Sugira yavuze ko umunsi w'ubukwe bwabo wasize urwibutso rudasaza, kuko imiryango, inshuti, abavandimwe n'abandi barabashyigikiye mu buryo bukomeye.

Yavuze ko yahaye isezerano umugabo we ryo 'kumukunda n'igihe bigoye kumukunda'. Ati 'Nzamusengera kandi nzamuba hafi uko Imana izanshoboza.'

Sugira avuga ko kuba bombi basanzwe ari abantu bazwi mu ruganda rw'imyidagaduro, bibaha kubana batandukanya ubuzima bw'urugo n'ubuzima bwo ku mbuga nkoranyambaga, kandi byose biherekejwe no kuganira mu rwego rwo gusenyera umugozi umwe.

Ati 'Kubana twembi tuzwi ntakibazo biduteye gusa bidusaba kubaho tumenya gutandukanya ibyo dushyira hanze nibyo tugumisha hagati muri twebwe. Ariko ubundi ibanga ni ugusenga, kuganira cyane kuri buri kumwe no kuba inshuti.'      

Amaze iminsi atangiye ibiganiro bifasha sosiyete kwiyubaka

Bitewe n'uko muri iki gihe atakigaragara muri Cinema nk'ibisanzwe, uyu mugore yatangiye ibiganiro anyuza ku muyoboro we wa Youtube mu rwego rwo gusabana n'abantu bari basanzwe baziranyi ndetse n'abandi bashya ashaka kunguka.

Ni ibiganiro byubakiye ku nsanganyamatsiko zitandukanye, aho abasangiza cyane cyane ibyo atekereza byagira uwo bifasha mu buzima bwa buri munsi, yaba mu rukundo, iterambere, imyidagaduro, imitekerereze, ndetse n'ibindi bitandukanye.

Ati 'Bimwe mu byo nzibandaho ni ukuganiriza abantu kandi nkeka ko bizagira umusanzu bitanga muri sosiyete. Mbere na mbere ni ukuganiriza abantu urukundo cyane ko turi mu minsi aho urukundo rwakonje abantu basigaye bahemukirana.'

Ni ibiganiro anavuga ko azajya anyuzamo inyigisho zishingiye ku mibanire ya buri munsi, ibyafasha abantu kwiyungura ubumenyi, amasomo y'ubuzima, kwaguka mu mitekererezo no gusubizwa imbaraga n'icyizere mu buzima bwa buri munsi.

Kandi avuga ko azajya yibanda cyane ku bagore, urubyiruko ndetse n'abakristu muri rusange. Yavuze ko muri iki gihe ari no gutegura filime n'ibindi biganiro abantu bakwiye kumwitegamo.

Julien warushinze na Sugira Florence ni Director w'umunyarwanda ariko ukorera mu Bubiligi, afata amashusho y'indirimbo, filime n'ibindi bigendanye na cinema.

Indirimbo 'Why' yakoreye The Ben na Diamond yatumye umwe mu bareberera inyungu za Alikiba amwandikira, amushimira ku kazi katoroshye yakoze.

Ni we watunganyije amashusho y'indirimbo 'Only You' ya The Ben yakoranye na Ben Kayiranga yakomeje izina rye.

Mu 2014, nibwo uyu musore yashinze studio ye y'umuziki yise 'BproudMusic' iherereye mu Bubiligi, aho amaze gukorana n'abahanzi barimo Marina, Social Mula, Big Fizzo, Bull Dog, Mico The Best n'abandi.

Julien yavukiye kandi akurira mu Rwanda. Nyuma yo kurangiza amashuri abanza, yagiye kwiga kuri ESAPAG kugeza mu 2011 aho yavuye we n'umuryango we bajya gutura mu Bubiligi.

Yakomereje amashuri ye mu Bubiligi ku kigo cyitwa Vilgo asoza amasomo mu Ishami rya 'Computer Science Management and Accouting'.

 

 

Sugira amaze iminsi afatanya n’umugore we Bmjizzo mu biganiro bigamije kwigisha no guhura Sosiyete muri rusange

 

Sugira ‘Fofo’ yavuze ko yatangiye ibi biganiro mu gihe ari no kwitegura kugaruka muri filime

‘Fofo’ yavuze ko yisanze mu rukundo na Bmjizzo nyuma y’uko batangiye gukorana
Bmjizzo niwe wateye intambwe ya mbere asaba Sugira ‘Fofo’ ko bakorana 

Sugira yavuze ko yasezeranyije umugabo kumukunda n’igihe ‘byaba bigoye’

 

Ubwo yambikwaga impeta, Sugira yavuze ko yishimira ko babashije kunesha ibigeragezo

Ubwo aba bombi bahuriraga ku kirwa cya Zanzibar muri Tanzania bagatangiza umushinga w'urugo

Sugira Florence ‘Fofo’ yatagaje ko tariki 4 Kamena 2022, yabaye urwibutso rubi yagize mu buzima bwe ubwo yaherekezaga umubyeyi we bwa nyuma
Sugira ‘Fofo’ yavuze ko Se yitabye Imana mu gihe yari amaze igihe abazwe inshuro eshatu bituma afata igihe cy’akaruhuko mu rugendo rwe rwa Cinema

‘Fofo’ yavuze ko yakomerewe no kwakira ibyo yanyuragamo bituma afata igihe cyo kwiyakira no kwitekereza, biri mu mpamvu zatumye atongera kugaragara muri filime  

SUGIRA N’UMUGABO WE BAHERUTSE GUKORA IKIGANIRO CYAGARUTSE KU RUGENDO RW’URUKUNDO RW’ABO

“>

SUGIRA N’UMUGABO WE BAHERUTSE GUHURIRA MU KIGANIRO KIMWE

“>

SUGIRA FLORENCE AHERUTSE GUKORA IKIGANIRO KU BANGA RY’ABAKOBWA

“>
BMJIZZO NIWE WAKOZE AMASHUSHO Y’INDIRIMBO ‘WHY’ YA THE BEN NA DIAMOND

“>

Ku mugoroba wo kuri wa Gatanu umuriro uraka mu mikino ya 1/4 cya Euro ya 2024 irimo irabera mu Budage. Saa tatu z’ijoro kuri Volksparkstadion, ikipe y’Igihugu ya Portugal yasezereye Slovenia muri 1/8 iraba icakirana n’u Bufaransa bwasezereye u Bubiligi muri 1/8.

Mu gihe ikipe y’igihugu ya Portugal yatsindwa, waba ari umukino wa nyuma kuri Cristiano Ronaldo mu irushanwa rya Euro. 

Ubwo bari bamaze gusezerera Slovenia bigoranye, uyu mukinnyi yatangaje ko arimo arakina iri rushanwa rya nyuma agira ati “Habayeho kubabara cyane, ariko birangiriye mu byishimo. Iyi niyo Euro yanjye ya nyuma, byanze bikunze.  

Ariko ntabwo ngira amarangamutima kuri byo, ngira amarangamutima ku bintu byose bifite aho bihuriye n’umupira w’amaguru bitewe n’ishyaka ngirira umupira w’amaguru, ishyaka ryo kubona abankunda, umuryango wanjye n’urukundo abantu bankunda”.

Uyu mukinnyi ubitse Ballon d’Or 5 mu mateka ye, yatangiye gukina Euro muri 2004 ubwo yari afite imyaka 20 ndetse atangira anakora amateka ayitsindamo igitego. 

Kugeza kuri ubu amaze kuyikoramo amateka atandukanye arimo kuba ari we mukinnyi wayitsinzemo igitego kuri buri nshuro yayikiniye, kuba ari we ufite ibitego byinshi bigera kuri 14 aho arusha 5 umukurikiye ndetse akaba yaregukanye igikombe cyayo muri 2016 ubwo bari batsinze u Bufaransa ku mukino wa nyuma.

Kylian Mbappé ashobora kurangiza ubuzima bwa Cristiano Ronaldo muri Euro kandi yarakuze yaramwihebeye. Ikosa utakora ni ugushidikanya ko Kylian Mbappé yakuze afana Cristiano Ronaldo ndetse anamufatiraho icyitegererezo. 

Aba bombi bahuye bwa mbere muri 2012 ubwo uyu mukinnyi w’Umufaransa yari agite imyaka 14 akaba yari yagiye mu rugendoshuri muri Real Madrid, maze asaba ifoto Cristiano Ronaldo arayimuha.

Mu biganiro bye bitandukanye, Kylian Mbappé akunda kugaruka ku rukundo amukunda. Nk’uko bigaragara mu mafoto ari mu cyumba yakuze abamo, hari harimo amafoto ya Cristiano agikina muri Real Madrid.

Kuwa Kane ubwo yari mu kiganiro n’itangazamakuru, Kapiteni w’ikipe y’igihugu y’u Bufaransa, Mbappe yavuze ko gukina na Cristiano ari icyubahiro ariko abizi ko uyu munsi ari burare atishimye bitewe nuko bari bumusezerere bakerekeza muri 1/2.

Ati: “Ugomba gushima icyo yabaye cyo, n’icyo ari cyo. Gusa nishimiye ubukuru bw’uyu mukinnyi. Ni umukinnyi udasanzwe. Nta wundi uzamera nka we. Yagize ingaruka nziza ku mateka y’umupira w’amaguru, yateye imbaraga abakiri bato benshi. Yagize ingaruka nziza ku bantu benshi. Ndamwubaha, ariko nk’uko nabivuze, nzi ko ejo atazishima kubera ko dushaka kujya muri 1/2. '

Ari muri iki kiganiro n’itangazamakuru, Kylian Mbappé yavuze ko nubwo yamaze kwerekeza muri Real Madrid ariko atazayikoramo nk’ibyo Cristiano Ronaldo yayikozemo bitewe nuko bidasanzwe ndetse anavuga ko bavugana buri munsi kuri telefone amugira inama.

Ubwo Real Madrid yatangazaga ko yu mukinnyi w’imyaka 25 yamaze kuyisinyira, Cristiano Ronaldo yerekanye amarangamutima ye avuga ko azishimira kumubona akinira i Santiago Bernabeu.

Imibare yerekana iki hagati y’u Bufaransa na Portugal?

Imibare yerekana ko aya makipe yombi amaze guhura inshuro 4 mu irushanwa rya Euro. U Bufaransa bwatsinze inshuro 2 zibanza ndetse icyo gihe byarangiye banegukanye ibikombe.

Mu mikino 2 iheruka ikipe y’igihugu ya Portugal yatsinzemo u Bufaransa ubwo bahuriraga ku mukino wa nyuma muri 2016 bahita begukana igikombe, naho banganya 1.

Ikipe y’igihugu itsinze u Bufaransa muri 1/4 mu marushanwa makuru (igikombe cy’Isi na Euro), imibare yerekana ko birangira ari yo yegukanye icyo gikombe.  

Ubutaliyani bwarabikoze mu gikombe cy’Isi cyo mu 1948, Ubugereki burabikora muri Euro ya 2004, Espagne irabikora muri Euro ya 2012 naho u Budage bubikora mu gikombe cy’Isi cya 2014.

Mu marushanwa yose, aya makipe yombi amaze guhura inshuro 28, u Bufaransa bwatsinzemo 19 naho Portugal itsindamo 6.

Kylian Mbappé yakuze afana Cristiano Ronaldo gusa uyu munsi ashobora kumubabaza

Kylian Mbappé asanzwe afata Cristiano Ronaldo nk’ikigirwamana cye

Mbappe afata Cristiano nk’umukinnyi w’ibihe byose ku Isi mu mupira w’amaguru

Ni inkuru yashenguye benshi mu bakunzi b’umupira w’amaguru mu Rwanda by’umwihariko abari bazi uyu mutoza ndetse n’abo yafashije gukabya inzozi zabo. Ni umugabo wiraburaga, wakundaga kureba nk’uwitegereza, wari warahoberanye n’ikitwa siporo ndetse akiga kwagura imipaka bigendanye n’ibyo yifuza kugeraho.

Umupira w’amaguru mu Rwanda wabayeho nibura buri gice cy’igihugu bishoboka ko cyavamo umukinnyi, ariko Kigali na Rubavu biba ikimenyabose kuko havaga abakinnyi benshi kandi bafite impano.

Ubuzima bwe bunini yabumaze mu bana 

Akarere ka Gatsibo kaje kwinjira mu hantu hatanga impano mu mupira w’amaguru mu Rwanda ndetse biza kugera aho umwana wabaga avuye i Kiziguro na Kiramuruzi yabaga adashidikanwaho ku buhanga bwe, ibi bikaba byaragize imbaraga ubwo umutoza Ntirenganya Jean de Dieu yari atangiye akazi k’ubutoza muri aka gace.

Duhere mu myaka ya 2005

Ntirenganya Jean de Dieu yatangiye gushyira itafari ku iterambere ry’umupira w’amaguru muri Gatsibo mu myaka ya 2005 ubwo yatangiraga gutoza abana bo muri aka gace abatoreza ku kibuga cya Gakenke. 

Ababyeyi bo mu Rubiri, Gakenke, Rubona, Gakoni, Kiramuruzi, Ntete, i Nduba, Kawangire, na bamwe bo muri Kiziguro, bakiriye inkuru ko hari umutoza uri gutoza abana bakiri bato ndetse batangira kuzana abana babo ku kibuga cya Gakenke ahantu hahoraga umupira kuva mu gitondo kugera inka zitashye.

Mu bushobozi bwari buhari, Ntirenganya yatangiye guterateranya abana batangira gukina abifatanya no gutoza bakuru babo dore ko mu 2006 yari umutoza wungirije wa Gatsibo yageze ku mukino wa nyuma ku Rwego ry’igihugu mu murenge Kagame Cup, bahura na Muhanga umukino wabereye kuri Sitade Amahoro i Remera. 

Mu 2007 i Kiziguro naho havutse irerero ryari rije guhangana na Gatsibo Academic Sport, Ntirenganya yatozaga. Umuntu yavuga ko umupira mu bato muri aka gace wari umaze gufata irangi ndetse bitijwe umurindi n’uyu nyakwigendera.

Mu bakinnyi batangiye gutozwa n’uyu mutoza barimo Ndayishimiye Celestin wari kumwe n’abo bita Mutangana Sadick wari Kapiteni wabo, Sibomana Iddy waje gukinira ikipe y’igihugu y’abatarengeje imyaka 17 mu 2011 ndetse n’abandi batandukanye mu gihe mu ikipe y’abato harimo abakinnyi nka Manishimwe Djabel.

Uko imyaka yagiye yicuma Ntirenganya Jean de Dieu yakomeje kwaguka mu mirimo ndetse atangira kujya mu turere dutandukanye tw’i Burasirazuba nka Kayonza yatojemo ikigo cy’amashuri cya E.S.R aho yabaga yateruye hafi ikipe yose y’abana yatozaga i Kiramuruzi. Ntirenganya yaje gutoza amakipe arimo Etoile de L’Est na Rwamagana City mu myaka ya vuba aha, akaba yitabye Imana ari mu bajyanama ba Sunrise FC.

Akina kwa Ntirenganya

Kumva ngo umwana akina kwa Ntirenganya cyari ikimenyetso simusiga ko ari umuhanga ashobora kuzagera kure, ndetse ababyeyi be babaga bamufiteho icyizere cy’ejo hazaza. Yari umutoza uzi kurera umwana akamukurikirana kugera ageze ku rwego yifuza, aha twavuga nk’ikibazo cya Rayon Sports yigeze kuvuga ko ariyo yareze Djabel imurereye i Nyanza, ariko Ntirenganya akarwana kugera atanze amakuru y’ukuri.

Bamwe mu bakinnyi yafashe mu biganza

Ndayishimiye Celestin ubu ukinira ikipe ya Etoile de L’Est yamuciye mu biganza mbere yo kwerekeza mu irerero rya FERWAFA ryaje gukina igikombe cy’Isi mu 2011 ahava ajya muri Mukura ajya muri Police FC n’ahandi. Sibomana Iddy umukinnyi wari uzwiho umuvuduko w’umuhanga ariko nyuma yo gukina igikombe cy’Afurika cya u17 yabaye nk’uhagaritse umupira w’amaguru. 

Manishimwe Djabel na Ntirenganya mu bihe bose bibazaga uko bizagenda 

Ruboneka Bosco yaje nk’abandi bana abanza kubura aho akina, Ntirenganya afata umwanzuro wo kumukinisha nka nimero 2 yaje kuvaho nyuma, ariko imboni z’ibirenge bye ubu biri gutanga umusaruro muri APR FC zabonywe na Nyakwigendera. 

Manishimwe Djabel, umwana muto mugufi, ufite impano, kugera aho yeretse ubuhanga Ntirenganya Jean de Dieu atangira kujya amukinisha mu bakinnyi bakuru kandi akiri muto.

Niyomukiza Faustin myugariro wa Bugesera FC n’ikipe y’igihugu ya 23, yavuye ku Gipangu i Rubona hafi y’utubindi yambuka kaburimbo agwa mu biganza bya Ntirenganya kugera ubu yibuka uko yamufashije ndetse akaba umwe mu bakinnyi yitabye Imana yari amurwaje.

Ntabwo ari abo gusa kuko uruhare rwe ikiruta ibindi rwabarwa mu mupira w’amaguru w’u Rwanda by’umwihariko mu ntara y’Iburasirazuba itakaje urukundo rw’umupira, n’urugero rw’umuntu wahisemo inzira. 

Niyomukiza Faustin na Ntirenganya, imwe mu ifoto za vuba z’uyu mutoza 

Hoziana Kennedy ukinira ikipe ya Bugesera FC afata Ntirenganya nk’umubyeyi we 

Ruboneka Jean Bosco yibuka umunsi wa mbere Ntirenganya amwakira mu irerero 

Ndayishimiye Celestin yubuye amaso bya nyabyo mu gihe Ntirenganya yarimo ashaka uko bakatisha imodoka ya Kiramuruzi-Remera 

Ntirenganya agiye kare kuko yari agifite byinshi yaha umupira w’amaguru w’u Rwanda

Umutoza Ntirenganya Jean de Dieu wazamuye abakinnyi nka Manishimwe Djabel, Ruboneka Bosco n’abandi yitabye Imana azize uburwayi.

Ntirenganya yari amaze igihe arwaye aho yarwariye mu bitaro bya Kiziguro, avayo ajyanwa i Rwinkwavu, yitabye Imana ku mugoroba w’ejo hashize ku wa Kane tariki ya 4 Nyakanga 2024.

Ntirenganya Jean de Dieu wazamuye abakinnyi benshi, yari amaze iminsi arwaye Diyabeti ndetse n’Umuvuduko w’amaraso.

Uyu mutoza wari ufite irerero Kiramuruzi ryazamukiyemo abakinnyi benshi nka Ndayishimiye Celstin wakinnye igikombe cy’Isi cy’abatarengeje imyaka 17 muri 2011, yazamuye kandi abakinnyi nka Manishimwe Djabel wakiniye Rayon Sports na APR FC, Ruboneka Bosco ukinira APR FC, Uwizeye Djafar wakiniye amakipe nka Espoir FC na Gorilla FC, Hoziana Kennedy n’abandi.

Ntirenganya Jean de Dieu yitabye Imana

Manishimwe Djabel yazamukiye mu maboko ye

Na Ruboneka Bosco yazamukiye kwa Ntirenganya