Webrwanda Backend

Author: webrwanda

  • Dr Jean Baptiste Muvunyi, arashishikariza abantu gutandukana burundu n'inyubako zisakaje Asbestos #rwanda #RwOT

    Umuyobozi mukuru w'ibitaro bya Kabgayi, Dr Jean Baptiste Muvunyi avugako uburwayi bukomoka ku isakaro rya Asbestos ari bubi cyane, ko bwica gahorogahoro. Ayoboye ibitaro byamaze igihe kinini bifite inyubako zisakajwe Asbestos ariko ubu nta n'imwe ikirangwaho iryo sakaro kubera kumenya ububi bwaryo burimo; indwara zifata imyanya y'ubuhumekero kugera ku gutera Kanseri igeza ku rupfu.

    Dr Muvunyi, avuga ku burwayi buterwa n'isakaro rya Asbestos yagize ati' Bumwe mu burwayi, ahanini ni uburwayi bugendanye n'ubuhumekero, ku buryo umuntu ahumeka ibikoze iryo sakaro bikagenda bijya mu bihaha noneho bigatezamo uburwayi ku buryo bitangira ari uburwayi bworoheje umuntu ashobora gufata nk'uburwayi bw'ubuhumekero gusa ariko bwa burwayi bushobora kugenda bukura'.

    Akomeza ati' Uko bugenda bukura bukavamo Kanseri. Bukaba Kanseri yangiza Ibihaha nazo zishobora kuba Kanseri mu buryo bu biri. Hari Kanseri ifata ibihaha nyirizina dufata nka Kanseri y'Ibihaha ariko na none hari izo bita Mezoteriyoma nayo ni ubundi bwoko bwa Kanseri kuko bugaragara n'ubundi kenshi mu bihaha'.

    Imwe mu nyubako nshya y'ibitaro bya Kabgayi, nta Asbestos.

    Dr Muvunyi, avuga ko kugeza ubu nta nyubako n'imwe y'ibitaro bya Kabgayi ikirangwaho isakaro rya Asbestos kuko ahataravuguruwe ngo hashyirweho isakaro ridateza ibibazo, yarasenywe ku bwo kurengera ubuzima bw'Abagana ibitaro n'abakozi babyo.

    Ahamya ko kugeza ubu, baba abagana ibitaro, baba kandi abakozi babyo bose bishimiye cyane kuba bari mu nyubako zidasakajwe Asbestos kuko bari aho bakorera heza, bahumeka umwuka mwiza, bumva nta ngaruka baterwa n'indwara zikomoka ku isakaro rya Asbestos kuko ritakiharangwa.

    Kubagifite imyumvire yo kumva ko Ababyeyi babo bazibayemo, inshuti n'amavandimwe bakazibamo mu buryo no mu bihe bitandukanye kandi igihe kirekire, hari inama Dr Muvunyi abagira yo kurekurana n'iyo myumvire itari myiza.

    Ati' Ntabwo ari uburwayi buhita bugaragara uwo mwanya. Ibyo ni ibishobora kuguteza uburwayi umuntu ahura nabyo bya buri munsi. Ibyo rero bigenda bifata gake gake ku buryo ushobora kuzagaragaza ibimenyetso ukuze, ugeze muri ya myaka yo gusaza rwose'.

    Agira kandi ati' Hari ushobora kugaragaza ibimenyetso akaba yarwara vuba akiri muto ariko hakaba n'abandi babigaragaza bakuze. Kuba rero hari abantu baba bakiri muri izo nyubako cyangwa se bagifite bimwe mu bikoresho bikoze muri Asbestos, nabashishikariza gutandukana nabyo kubera y'uko uyu munsi ushobora kumva unezerewe, umeze neza, ntabwo uvirwa, inzu wumva ntacyo igutwaye ariko mu by'ukuri hari ibyo irimo kugenda yangiza muri wowe  bishobora kuzagaragara mu myaka iri imbere kandi noneho bikagaragara nta garuriro bigifite kubera y'uko iyo byamaze kwangiza Ibihaha, Igihaha cyamaze kwangizwa na Asbestos ntabwo cyongera ngo gikire, ahangiritse nti hakira. Bivuze ngo byanze bikunze cya Gihaha uragitakaza cyangwa se byakwanga burundu ugatakaza ubuzima wowe wese'.

    Inyubako za cyera kuri ibi bitaro, nta hakirangwa isakaro rya Asbestos.

    Dr Muvunyi Jean Baptiste, asaba buri wese gutandukana na Asbestos kuko ingaruka zayo ku buzima ari mbi cyane kugera ku rupfu. Avuga kandi ko izo ngaruka zishobora no kudahita ziboneka ako kanya, ko umuntu ashobora kubana nazo igihe bikarangira abuze ubuzima nyamara byashobokaga kwirinda agasigasira Amagara.

    Mu bushakashatsi bwashyizwe ahabona n'Ishami ry'Umuryango w'Abibumbye ryita ku buzima-OMS mu mwaka wa 2005, bagaragaje ko abantu bagera kuri Miliyoni 125 bagerwaho n'ingaruka za Asbestos, mu gihe abagera ku bihumbi 107 bapfa buri mwaka bazize indwara zikomoka kuri iri sakaro rya Asbestos.

    Uretse inama n'impanuro bya Dr Muvunyi Jean Baptiste usaba buri wese gutandukana n'isakaro rya Asbestos ku bw'ingaruka mbi zaryo zirimo no kugeza umuntu ku rupfu, ikigo cy'Igihugu gishinzwe guteza imbere imiturire-RHA( Rwanda Housing Authority), cyatangije ubukangurambaga buzenguruka Igihugo cyose, aho bashishikariza abagifite iri Sakaro rya Asbestos kuryikiza bakarengera Ubuzima. Ubuyobozi bw'iki kigo cya R.H.A, buvuga ko bugeze ku kigero cya 85,3% mu guca iri sakaro mu Gihugu hose kandi ko ubukangurambaga bukomeje, nta kudohoka kugera bageze ku ijana ku ijana-100%.

    Inyubako z'i Kabgayi zitavuguruwe ngo zishyirweho isakaro ridateza ibibazo ku buzima bw'Umuntu, zarasenywe.

    Ibitaro bya Kabgayi, byubatswe mu 1937 bikaba ubu bibarizwa mu karere ka Muhanga mu Ntara y'Amajyepfo. Byubakwa, byatangiye bifasha abaturage babyegereye ariko uko imyaka ishira bigenda byaguka ku buryo ubu bitanga Serivise ku baturage b'Akarere ka Muhanga, uturere tugakikije ndetse n'abandi bava hirya no hino mu Gihugu ndetse no hanze yacyo. Igihe byubakiwe, inyubako zabyo zari zisakajwe cyane Asbestos ariko uyu munsi nta nyubako n'imwe igifite iri sakaro.

    Munyaneza Théogène

    Source : https://www.intyoza.com/2024/08/09/dr-jean-baptiste-muvunyi-arashishikariza-abantu-gutandukana-burundu-ninyubako-zisakaje-asbestos/

  • Ibyo byishimo murata byadusigiye amadeni ya miliyoni 400 – Perezida wa Kiyovu Sports wanarangishije abakunzi ba yo #rwanda #RwOT

    Umuyobozi wa Kiyovu Sports, Nkurunziza David yavuze ko ubwo yajyaga ku buyobozi bwa Kiyovu Sports yasanze ifite umwenda wa miliyoni 400 z’amafaranga y’u Rwanda.

    Ni mu ijambo rifungura umuhango wo kwerekana abakinnyi iyi kipe izakoresha mu mwaka w’imikino wa 2024-25.

    David uvuga ko yatangiye kuba hafi y’ikipe guhera muri Kanama 2023 gusa yaje gutorerwa kuyobora Kiyovu Sports muri Gicurasi 2024, yatangiye abaza abakunzi b’iyi kipe aho baba kuko babuze hafi y’ikipe bihebeye.

    Ati “Ikintu navuga nkibaza Abayovu muri he? Abayovu muba he? Ubundi kera iki cyumba cyabaga cyuzuye. “

    Yakomeje avuga ko yageze ku buyobozi asanga ikipe yugarijwe n’amadeni menshi agera kuri miliyoni 400 Frw.

    Ni umwenda avuga ko wasizwe n’uwo bashima ko yabahaye ibyishimo mu myaka 3 ishize ari nabyo baheruka (nubwo atamuvuze mu izina ni Mvukiyehe Juvenal), ngo ni we wayishyize mu bibazo irimo.

    Muri iyo myenda harimo ibirego 8 muri FIFA bya miliyoni 136.

    Ati “Twasanze dufite ibirego 8 muri FIFA, miliyoni 136 z’ibirego gusa, kongeraho amadeni y’abakinnyi, bya byishimo muvuga ni icyo byadusigiye, nanze kuvuga andi madeni atari aya bakinnyi, biteye ubwoba.”

    Yavuze ko uyu munsi hari uwo bafitiye umwenda bahuye akabasaba kumwishyura byibuze 1/2 cyangwa agafungisha ibikorwa bya bo byose.

    Ati “Hari umuntu dufitiye ideni twari turi kumwe wafashe umwanzuro ngo adufungire byose kugeza tumwishyuye miliyoni 32 Frw, miliyoni 32 muri mirongo itandatu na tumufitite, turasabwa kuyishyura uyu munsi.”

    Yeruye abwira abanyamuryango ko iyi kipe iri mu gihombo ariko bagomba gushyira hamwe ntibacike intege.

    Ati “Kiyovu Sports dufite ubu iri mu gihombo sindi bubabeshye ariko nizere ko mumeze nkanjye kitadukanga, tugomba gufatanya.”

    Yavuze ko hari benshi bamubanjirije baje kuyifotorezaho ariko we icyo ashyize imbere ari ugushyira hamwe.

    Ati “igihe cyose nkiri kuri iyi ntebe nta buriganya buzaba muri Kiyovu, nta bujura buzaba muri Kiyovu.”

    Nkurunziza David yemeje ko babashije guhangana n’ibyo birego 8 byose ubu akaba arimo kubaka ikipe ihangana.

    Yasubije n’abibazaga niba Kiyovu Sports ihari, avuga ko ihari kandi yiteguye gukina shampiyona ikayitwara.

    Ati “Tugiye muri shampiyona y’u Rwanda kuyitwara, kamarampaka ni mu kibuga ntabwo ari muri banki.”

    Yasabye abanyamuryango kumushyigikira kugira ngo Kiyovu Sports izitware neza. Izatangira umwaka w’imikino wa 2024-25 ku wa Gatanu tariki ya 16 Kanama 2024 ikina na AS Kigali.

    Perezida wa Kiyovu Sports yavuze ibibazo yasanze muri iyi kipe

    Source : http://isimbi.rw/siporo/article/ibyo-byishimo-murata-byadusigiye-amadeni-ya-miliyoni-400-perezida-wa-kiyovu-sports-wanarangishije-abakunzi-ba-yo

  • Umujyi wa Kigali wasobanuye gahunda yo gutuza heza abatuye mu manegeka, irimbanyije – #rwanda #RwOT

    Ibyo yabigarutseho mu kiganiro cyihariye yagiranye na IGIHE agaruka ku kibazo cy'ibice bitandukanye by'Umujyi wa Kigali byubatswe mu buryo bw'akajagari ndetse n'abatuye ahantu hashobora gushyira ubuzima bwabo mu kaga.

    Meya Dusengiyumva yagaragaje ko umwaka ushize hari ibice byagaragaraga ko bishobora gushyira ubuzima bw'abaturage mu kaga bakahakurwa birimo Gatsata na Gisozi mu Karere ka Gasabo n'ibindi bitandukanye.

    Yagaragaje ko n'ubwo abaturage binubiye ko Umujyi wa Kigali uri kubimura aho bari batuye ntibahabwe aho kwimurirwa ariko ko icyari gishyizwe imbere kwari ugutabara ubuzima bwabo.

    Ati 'Ntabwo wabona ahantu habaye impanuka igahitana umuryango w'abantu bane ngo abandi baturanye nawo ubareke. Ni ukuhabavana kugira ngo ubuzima bukomeze.'

    Yahishuye ko muri uyu mwaka bateganya gutuza abarenga 500 barimo abagiye bimurwa mu bice binyuranye ntibahabwe inzu zo kubamo n'abandi b'amikoro make.

    Ati 'Icyo navuga ni uko buri mwaka dukurikije ingengo y'imari ihari tugenda twubaka amacumbi, hari abo twahaye amazu ubushize, uyu mwaka turateganya guha abagera kuri 500 harimo abo bimurwa n'abandi bafite ubuzima butameze neza.'

    Yagaragaje ko kuri ubu ikiri gushyirwamo imbaraga ari ugukumira no kutihanganira abashaka kubaka mu Mujyi wa Kigali mu buryo butubahirije amategeko kandi butajyanye n'ibiteganywa n'igishushanyo mbonera cyawo.

    Raporo yakozwe na NISR ku mibereho y'Ingo, EICV5 igaragaza ko 30% by'abatuye mu mijyi mu Rwanda binjiza munsi ya 100 000 Frw, 27% binjiza hagati ya 100,001 Frw na 200,000 Frw ku kwezi mu gihe ingo zinjiza guhera kuri miliyoni 1 Frw zingana na 3%.

    Ubusanzwe, amahame mpuzamahanga agaragaza ko urugo rutagakwiye kurenza 30% by'amafaranga rwinjiza, ngo agende ku nzu. Ni mu gihe nk'iyo habayeho kwishyura inguzanyo, banki zitemerewe gutwara arenze 50% by'amafaranga yinjizwa n'urwo rugo.

    Urugero, urugo rwinjiza 300 000 Frw ku kwezi, inguzanyo rwabasha kwishyura ni itarengeje miliyoni 8.7 Frw ku nyungu ya 11% mu gihe cy'imyaka 20. Nyamara ugendeye ku nyungu ya 18% iriho mu mabanki menshi kuri ubu, urugo rwinjiza ayo mafaranga inzu rushobora kubasha kwishyura ni iya miliyoni 5.8 Frw.

    Nk'inzu ifite agaciro ka miliyoni 10 Frw, uyihawe mu nguzanyo aho ku kwezi uzajya wishyura inyungu ya 11% mu gihe cy'imyaka 20, bivuze ko buri kwezi uzajya wishyura 92,900 Frw, bivuze ko nibura wakabaye winjiza 309,700 Frw ku kwezi.

    Meya Dusengiyumva kandi yagaragaje ko hari gahunda yo kwagura uburyo bwo kubona amacumbi menshi kandi aciriritse ku buryo buri muturage wese ashobora gutura mu buryo bwiza.

    Yagaragaje ko iyo gahunda yo kubaka amacumbi aciriritse yatangiye kandi igikomeje bityo ko igikenewe ari ubufatanye bwa leta n'abikorera mu gushora imari mu myubakire.

    Ati 'Hari amacumbi Leta yakubaka ariko hari n'abikorera, icyo turi gushyira imbere ni ukwerekana ibishoboka kuko kuri Mpazi hari kubakwa amacumbi 1000 agaragaza uburyo byakorwa n'ingano n'inyungu yaba irimo kandi hari n'abashoramari turi kugenda tubona.'

    Yagaragaje ko Mpazi yabaye urugero rw'ibishoboka kandi ko batangiye kubona abafatanyabikorwa batandukanye bashobora gukora imishinga nk'iyo y'ubwubatsi bw'amacumbi aciriritse ku buryo buri muntu wese winjiza nibura hagati y'ibihumbi 100 Frw na 300 Frw yabona inzu kandi nziza.

    Yagaragaje ko abashoramari bashaka kwinjira muri iyo gahunda bahabwa ubutaka bwo kubakaho ariko bagasabwa kubaka mu buryo bworohera ab'amikoro make.

    Hari ibice bitandukanye by’Umujyi wa Kigali biri mu manegeka

    Umudugudu wa Mpazi ni umwe muzahindura imiturere yo mu Gitega

    Source : http://igihe.com/amakuru/u-rwanda/article/umujyi-wa-kigali-wasobanuye-gahunda-yo-gutuza-heza-abatuye-mu-manegeka

  • Ibyingenzi byagufasha kongera ibiro – #rwanda #RwOT

    Ariko nubwo bimeze bityo kandi ntitwakirengagiza ko hari n'abandi baba bifuza kongera ibiro dore ko uba usanga ibiro byabo ari hafi ya ntabyo.

    Ese ni ryari umuntu aba ananutse?

    Tutitaye ku byo abantu bavuga cyangwa bareba, umuntu unanutse ni wawundi ufite igipimo cya BMI kiri munsi ya 18.5. Iki gipimo ushobora kukibona unyuze ku idirishya ribigaragaza ku rubuga rwacu, waba ukoresha mudasobwa cyangwa terefoni.

    Nkuko abanyarwanda bajya babivuga nyamara ngo 'utamiye ntatamure aba yaratamitswe'. Niyo mpamvu niba ushaka kongera ibiro usabwa mbere na mbere kwita ku byo kurya, inshuro urya ndetse n'uburyo uryamo.

    Dore ibintu wakora bikagufasha kongera ibiro:

    1. Injiza calories zirenze izo usohora

    Iki ni cyo kintu cya mbere cyo kuzirikana niba wifuza kongera ibiro. Iyo havuzwe calorie ushatse wahita wumva ingufu z'umubiri. Izi ngufu zitakara bitewe n'ibyo dukora buri munsi kandi ntabwo dutakaza ingufu zingana bitewe nuko tudakora imirimo imwe. 

    Ingufu umuhinzi atakaza ari mu murima ntizingana n'izo umukozi uri mu biro atakaza, ni nayo mpamvu imirire yabo iba ikwiye gutandukana. Kugirango umenye ibijyanye na calories umubiri wawe ukeneye buri munsi wakoresha iyi calorie calculator.

    Niba ushaka kongera ibiro buhoro buhoro wakinjiza calories ziri hagati ya 300 na 500 zirenga kuzo wasohoye. Ariko niba ushaka kongera ibiro ku buryo bwihuse wakinjiza calories ziri hagati ya 700 na 1000 buri munsi zirenga kuzo wasohoye.

    2. Injiza poroteyine nyinshi

    Healthline ivuga ko iki nacyo ni ingenzi kandi gikwiye kwitabwaho cyane. Imikaya ikozwe na za poroteyine kandi zitabonetse byatuma za calories winjije zihinduka ibinure. Nyamara iyo ufungura ibirimo poroteyine bituma za calories zikoreshwa zigahindukamo ibigize imikaya.

    Gusa wibuke ko poroteyine zitera guhaga cyane niyo mpamvu usabwa kurya ibirimo poroteyine nyuma y'ayandi mafunguro kugirango bitaza kukubuza kurya. Igipimo cyiza ni hagati ya 1.5 na 2.2g za poroteyine ugakuba n'ibiro ufite.

    Ibyokurya bikungahaye kuri poroteyine harimo inyama, amafi, amagi, amata n'ibiyakomokaho, imboga, ubunyobwa n'utundi tubuto duhekenywa.

    3. Fungura byibuze 3 ku munsi kandi wihatire ibinyamavuta n'amasukari

    Aha ariko witondere amavuta urya n'amasukari ukoresha kuko ibikomoka mu nganda nubwo byagutera kubyibuha ariko byanazana ingaruka nyinshi mbi. Ahubwo fungura ibirimo amavuta y'umwimerere, ubunyobwa, ibihwagari, avoka n'amasukari y'umwimerere nk'imbuto, ubuki, ibisheke, beterave n'ibindi.

    Wibuke kurya 3 kandi kuri buri funguro urye uhage pee. Kurya agapande kamwe k'umugati na mukaru, nta bwo byazatuma wongera ibiro.

    4. Ihatire amasupu kandi arimo ibirungo binyuranye

    Aha naho turavuga ibirungo bitari bya bindi bitunganywa bakongeramo ibindi bintu. Ushobora gukoresha poivron, seleri, ibitunguru, mudarasini, icyinzari,  n'ibindi birungo by'umwimerere, mbese hahandi ibiryo nawe biguhumurira amazi akuzura akanwa.

    Uko ibiryo biryoshye kandi byoroshye nibyo bizagufasha kurya byinshi kandi kenshi. Amafunguro yuzuyemo ibitera ingufu twaguha urugero rwayo hano tugendeye mu cyicyiro abonekamo.

    Utubuto: Amande, ubunyobwa mu moko yose

    Utubuto twumye: imizabibu

    Ibiva ku mata birimo ibinure: amata ubwayo, yawurute, fromage, ikimuri

    Amavuta n'ibinure: Amavuta ya elayo n'amavuta ya avoka (cyangwa avoka ubwayo)

    Impeke: ingano n'ibizikomokaho, umuceri (ariko bidakuweho agashishwa k'inyuma), ibikoma by'amafu anyuranye

    Inyama: inkoko, inka, ingurube (gusa yo ukamenya niba koko yari itarwaye kuko zikunze kurwara kurenza andi matungo), kandi ukibanda ku zifite ibinure

    Ibinyabijumba: Ibijumba, ibirayi, ibikoro

    Chocolat yirabura, avoka, amavuta y'ubunyobwa, amata ya cocoa, granola, …

    Gusa amenshi muri aya mafunguro atera igihagisha niyo mpamvu no mu gihe wumva uhaze ugomba kugerageza ugakomeza ukarya kandi aya mafunguro ahagisha ukayarya nyuma y'ayandi.

    Niba ushaka kongera ibiro, ca ukubiri na salade cyangwa uyigabanye, imboga urye nkeya, imbuto urye izidakenera guhekenywa cyane, nk'imineke. Ikindi kandi wihatire siporo ikomeza umubiri, gusa nyuma ya siporo ufate amafunguro ahagije cyane cyane imbuto n'imitobe.

    Source : https://inyarwanda.com/inkuru/145764/ibyingenzi-byagufasha-kongera-ibiro-145764.html

  • Uko Tom Close yasanze abarimo P Fla na DJ Ada… – #rwanda #RwOT

    DJ Adams ari mu banyamakuru bahirimbaniye iterambere ry'umuziki n'imyidagaduro imbere aho azwiho kuvuga ibintu uko biri atanyura ku ruhande ndetse umunyafu w'ijambo ryo gushishura yazanye aho yamenyeshaga abanyarwanda abahanzi biganye ibihangano by'abandi byarushijeho gutuma benshi bihatira gukora ibintu byabo.

    Mu kiganiro yagiranye na InyaRwanda, yagarutse ku ngingo zitandukanye zirimo ibivugwa ko adacana uwaka na Tom Close ibintu bimaze imyaka myinshi.

    DJ Adams avuga ko abantu babifashe uko bitari ko ari akabazo gato bagiranye kandi ko atari we byaturutseho kugira ngo bigende gutyo.

    Abara iyi nkuru DJ Adams ati'Nari nicaranye ubanza na Kamichi, P Fla na Inspector Lewis, Guma Guma nibwo yari ikirangira umuvandimwe P Fla aba aravuze ngo iyo aza kuba ari njyewe Tom Close nari gusiba indirimbo zose nkatangira bundi bushya nkareka kwiyita umuhanzi kubera ko nta kintu ndicyo.'

    Agaruka ku kuba P Fla ari we wavuze ko Tom Close nta muhanzi umurimo, ati'Ari we abivuga gutyo avuga ko Tom Close atari umuhanzi, ntabwo ari njye wabivuze ni P Fla wabivuze amahirwe nagize ni uko hari abantu bari kumwe na Tom Close barabyumva.'

    Nyuma Tom Close n’abo bari kumwe nabo bavuze ko bagiye kuza mu kiganiro bakerekana impamvu ibyo P Fla avuze nta shingiro, DJ Adams ati'Ndababwira nti   ni byiza mugize neza cyane kuba umuntu ari kuvuga ko utari umuhanzi kandi mukora ibintu bimwe ngwino ubisobanure hano.'

    Icyo gihe DJ Adams wari uyoboye ikiganiro yahise amanuka ajya kubwira abashinzwe umutekano ngo baze kureka Tom Close atambuke n’abo bazana anahageze uyu mugabo ajya kumufungurira.

    Bitewe n’ibyo Tom Close yavuze abantu bafashe ibintu uko bitari, DJ Adams ati'Ariko abantu babivuze ko ngo yanyinjiranye mu kiganiro gusa ubwo yahageraga yibagiwe gukora icyamuzanye kuko abantu bari kumwe bamubwiraga  ngo urarenze, urakaze gusa kuri njyewe ntabwo yarakaze icyo gihe nibwo yari yatwaye Guma Guma.'

    Ashimangira ingingo yo kudakara kwa Tom Close, DJ Adams ati'Narimbizi ko utuntu twinshi yari afite atari utwe ari utujurano gusa nyuma yaje no kumbwira ko ikintu cyamubabaje ari uko yari afite kumurika Album.'

    Ibyo Tom Close yatangaje byatunguye DJ Adams wari wamwakiriye azi ko aje kuvuga impamvu zishimangira ko ari umuhanzi ukase.

    DJ Adams ati'Noneho yumva kuri radiyo barimo kumuvuga ibintu adashaka kumva kandi yari abizi neza ko utwo afite ari udushishwa, we araza aravuga ngo banyarwanda banyarwandakazi ibiri kuvugirwa hano abantu bari kunywa ibiyobyabwenge.'

    Nubwo haciyeho imyaka DJ Adams avuga ko nta ndirimbo Tom Close n'ubu arakora ngo abe yayikina kuri Radio, ati'Ntabwo tuvugana ibintu byinshi kuko ntabwo arakora ibintu njyewe nshobora gukina kuri radiyo nanjye sindakenera serivisi ye ijyanya n'amaraso.'

    KANDA HANO UREBE IKIGANIRO TWAGIRANYE NA DJ ADAMS N’UMUKOBWA WE

    “>


     

    Source : https://inyarwanda.com/inkuru/145757/uko-tom-close-yasanze-abarimo-p-fla-na-dj-adams-mu-kiganiro-akabashinja-kunywa-ibiyobyabwe-145757.html

  • Josh Ishimwe yizihiye abagore ibihumbi bitabi… – #rwanda #RwOT

    Ni giterane cyatangiye kuri uyu wa Kabiri tariki 6 Kanama kikaba kirarangira kuri uyu wa Gatanu tariki 9 Kanama 2024, aho gifite insanganyamatsiko igaruka ku bantu bari indushyi ariko kuri ubu babaye abatsinzi, “Kuva mu gutsikamirwa tujya mu butsinzi”.

    Umunsi wa gatatu w’iki giterane, waranzwe n’ubwitabire buri hejuru ndetse n’umunezero uri hejuru nk’uko byari bimeze no ku ntangiriro zacyo.

    Mu byawuranze, harimo umwanya munini wo kuramya no guhimbaza Imana mu ndimi zinyuranye hamwe n’amatsinda n’abaramyi bazwi cyane mu muziki wa Gospel Nyarwanda barimo Josh Ishimwe, Uwineza Rachel, Tracy Agasaro n’abandi.

    Indirimbo za Josh Ishimwe zakoze ku mutima abitabiriye iki giterane kuri uyu wa Kane tariki 8 Kanama 2024 barimo n’Umushumba Mukuru wa Women Foundation Ministries, Apostle Mignonne Kabera wanahanuriye uyu musore mbere y’uko atangira umuziki.

    Mu ndirimbo Josh Ishimwe yaririmbye harimo ‘Sinogenda Ntashimye,’ ‘Imana iraduteturuye’, ‘Ari mu mutima’, ‘Ntacyo Nkushinja’, n’izindi.

    Ubwo yageraga ku ruhimbi, Apostle Mignonne yakiriye abakozi b’Imana batabashije kubana mu minsi ibiri ishize y’iki giterane, yongera gushimira Imana ku bw’umubare munini w’abitabiriye baturutse mu mahanga.

    Yakomoje ku buhanuzi Imana yamuhaye, ubwo yamubwiraga ko abitwaje abafite imbaraga bagiye kuzongererwa, abahanganye n’ibigeragezo by’uburwayi n’ibindi bibazo byose bagiye kubinesha mu izina rya Yesu, ahamya ko Imana yakoze ibitangaza muri iki giterane.

    Ati: “Muzi rero ibintu Imana yambwiye? Ngo ese ibivomesho byanyu bingana gute ko amazi ahari? Ngo ese mufite ibivomesho bihagije? Ngo hari abantu baje bafite utuvomesho duto, ariko muri iri joro ndabahinduriye mbahaye ibivomesho binini. Numvise nguwe neza.”

    Yahanuriye abari aho ko Imana igiye gukiza indwara zidashobora kuvurwa kwa muganga, ababwira ko Imana ibakijije indwara zose zari zitegereje kubambura ubuzima. Yabahanuriye kandi ko Imana ibakuyeho ubukene bwo mu buryo bwose.

    Uwigishije ijambo ry’Imana, ni Pastor Jessica Kayanja wo muri Uganda wakunze umuhamagaro uri muri Apostle Mignonne Kabera abandi bantu batarawubona, ubwo yari akiri ‘umukozi w’Imana uhishe ariko ukora ibyo kwizerwa.’

    Pastor Jessica Kayanja washinze Girl Power Ministries ikorera i Kampala muri Uganda akaba afite n’ibikorwa byinshi bifatiye runini rubanda nyamwinshi afatanyije n’umugabo we, Pastor Robert Kayanja, yigishije ijambo ry’Imana riboneka muri Daniyeri:3:19 ryari riherekejwe n’imbaraga z’ubuhanuzi.

    All Women Together Conference yatangijwe mu mwaka wa 2011 igaragazwa nk'igiterane kimaze kuzana impinduka mu buzima bwa benshi by’umwihariko ubw’abari n’abategarugori.

    Biteganyijwe ko uretse kuramya Imana nk'igikorwa nyamukuru, iki giterane kizatangirwamo ubuhamya, ubufasha n'ibindi.

    Ibyo bikorwa bifasha kubaka sosiyete abagore babarizwamo birimo nko kubaka amashuri, kwitinyuka no kubaka imiryango ihamye.

    Biteganijwe ko iki giterane kiri kubera muri BK Arena, kizitabirwa n’abari n’abategarugori mu minsi itatu ya mbere gusa, ku munsi wa kane akaba aribwo ab’igitsina gabo nabo bazaba bemerewe kwitabira.

    Women Foundation Ministries ni Umuryango wa Gikirisitu washinzwe na Apôtre Kabera Alice Mignonne mu 2006 wubaka abari n'abategarugori mu nzira z'agakiza, mu mitima no mu buryo bw'ibikorwa bifatika.


    Josh Ishimwe yakoze ku mutima abitabiriye igiterane ‘All Women Together 2024’ 
    Apostle Mignonne Kabera yishimiye ubwitabire buri hejuru bw’aba-Diaspora muri iki giterane ngarukamwaka


    Apostle Mignonne yatanze ubuhanuzi bukomeye Imana yamutumye

    Pastor Jessica Kayanja wo muri Uganda ni we wigishije ijambo ry’Imana


    Abari n’abategarugori batanze ubuhamya bw’aho Imana yabakuye


    Bahamije ko ubu babaye abatsinzi


    Imitima y’abitabiriye iki giterane yahahembukiye




    Tracy Agasaro n’itsinda ry’abaramyi bari bafaranyije baramije Imana karahava

    Abayoboye umunsi wa gatatu w’igiterane All Women Together 2024

    Source : https://inyarwanda.com/inkuru/145756/josh-ishimwe-yizihiye-abagore-ibihumbi-bitabiriye-all-women-together-2024-muri-bk-arena-am-145756.html

  • Inkuru: 'INGARUKA Z'UBUHEMU' Episode:01 #rwanda #RwOT

    Inkuru yacu itangirira ahantu mu mujyi, muri imwe mu nzu aho tubona umugabo n'umugore basa n'abakiri bato (sinavuga ko ari abana, ahubwo ndavuga ko ari mu bihe byo gutangira kubana nk'umugore n'umugabo, bakaba bari bamaze iminsi mike babana). Ubukwe bwabo ntibwabayeho kubera uko uwo musore yari akennye, byabaye ngombwa ko bakora ibyo bashoboye mu buryo bworoheje. Ntabwo bakoreye ubukwe mu gihe cy'umunsi cyangwa ijoro, sinzi n'isaha, kuko nta byanditse nigeze mbona, ariko narabyumvaga bambwira. Muri icyo gihe, bari babanye badakoze ubukwe imbere y'amategeko, bivuze ko batari barigeze bandikwa muri komine cyangwa gukora ibikenewe byose.

    Ku munsi umwe mu gitondo cya kare, aho abo bantu babiri barimo baryamye ku matela yaryamiye hasi mu cyumba, bivuze ko nta gitanda bari bafite, kandi ntibyibagirana ko iyo nzu itari iyabo ahubwo yari inzu bakodeshaga (bari barakodesheje undi muntu, bivuze ko bari mu nzu y'undi muntu). Uwo musore yitwaga Frank, naho umukobwa yitwaga Salomé, bari abantu bari bakundanye by'ukuri, ndetse nubwo bari bakennye, ariko bakundaga cyane.

    👨 Frank yahagurutse akubita amaso isaha asanga ni saa kumi n'imwe n'igice za mu gitondo (05h:30min). Frank yahise ahamagara Salomé aramubyutsa, avuga ati: 'Baby, baby, baby…' 🧒 Salomé yahise ava mu bitotsi ahita asubiza ati: 'Abe my love❣' 👨 Frank: 'Waraye ute chr wanjye?' 🧒 Salomé: 'Naraye neza chr wanjye, nawe ni gute?' 👨 Frank: 'Naraye neza, none dore bucya kandi nta n'icumi ndarana mu mufuka, rero ngomba kujya guhangayika ndebe ko hari icyo noronka.' 🧒 Salomé: 'Baby none ushaka ugihe guhangayika ujya he?' 👨 Frank: 'Ngiye kurondera akazi aho ariho hose, kandi ako kazi kariyo yose ndakora ntegerezwa kuyikora uko byagenda kose. Ariko baby ukomeze kwihangana, kuko ububuzima turiho uyu munsi mfite icyizere ko Imana izabuhindura, kandi ntabwo bizatinda bizagenda neza. Baby, birambabaza kuba dufite ubuzima nk'ubu nkakomeza kubona utishimye kubera ubu buzima bubi, ariko nawe urabizi ko nkunda cyane, niyo mpamvu ntegerezwa gukora ibishoboka byose kugira ngo ubuzima buhinduke.'

    🧒 Salomé yahise areba mu maso ya Frank, amufata mu mutwe atangira kumukorakora mu musatsi, maze aramubwira ati: 'Chr wanjye ndabizi ko unkunda, kandi nanjye urabizi ko ndagukunda. Baby, ikintu cya mbere reka nkwifurize kuzabona icyo urondera kandi Imana igukurikire. Ikindi kandi, baby, ndagomba kukubwira ko wowe usobanura buri kintu cyose kuri jyewe. N'ubwo dukennye, nzakomeza kwihangana, nidufata icyo kurya tuzarya, ariko nidukibura tuzaryama, icy'ingenzi ni uko umutima wanjye uri kumwe n'umuntu nkunda kandi nkamenya ko nawe unkunda.'

    Niba ushaka ko iyi nkuru ikomeza duhamagare kur +250788808002 cyangwa +250788352332

    The post Inkuru: 'INGARUKA Z'UBUHEMU' Episode:01 appeared first on KASUKUMEDIA.COM.

    Source : https://kasukumedia.com/inkuru-ingaruka-zubuhemu-episode01/

  • Ibintu 10 Wakora Kugirango Abantu Batakumenyera #rwanda #RwOT

    1. Uzirinde kwereka umuntu ko umukeneye cyane.
      • Igihe cyose wereka umuntu ko umukeneye cyane, ushobora kugaragara nk'uwahindutse ikintu cyoroshye kugenzura. Gira ibanga ku byifuzo byawe, ukomeze kuba umuntu wigenga.
    2. Uzirinde kwereka umuntu ko uzi byose, ahubwo umwereke ko hari ibyo utazi.
      • Iyo ugerageza kwerekana ko uzi ibintu byose, ushobora gutuma abantu bagutinya cyangwa bakagutekereza nabi. Jya uganira mu buryo buboneye, wemeze ko hari ibyo utazi, ugire umwanya wo kwiga no kumva ibitekerezo by'abandi.
    3. Uzirinde guseka umuntu uwo ari we wese, kuko hari abantu badaha agaciro inseko z'abandi.
      • Guseka birashimisha, ariko ntukagire imico yo guseka abantu bose igihe cyose, kuko hari abashobora kubifata nabi bakagutekereza ko utubaha cyangwa utitonda. Jya utegereza uko abandi bameze mbere yo kugaragaza inseko.
    4. Ntuzemerere umuntu ko akugira igikoresho cye, n'ubwo yaba agutunze mu bintu byinshi.
      • Ntukemere kugira uruhare mu bikorwa bitakubereye cyangwa kuba igikoresho mu mishinga y'abandi, n'ubwo baba baguha ibyo ukenera. Gira umwanya wo kwiyubaha no gukora ibintu mu buryo bugufasha kugera ku ntego zawe.
    5. Uzagire ukwihangana kandi umenye uko wabana n'umuntu bitewe n'uko ameze.
      • Buri muntu afite imico itandukanye, kandi kugira ngo ubane neza n'abandi, ugomba kwihanganira ibidakureba, ugashaka uburyo bwo kugendana n'abo ubana uko bari. Ihangane kandi ugenzure amagambo ukoresha.
    6. Uzire kuvuga ibyo ubonye byose n'ubwo waba ubizi.
      • Ntuzakoreshe umunwa wawe kugira ngo uhore uvuga ibitagira umumaro cyangwa ngo uvuge buri kintu cyose ubonye. Hari igihe cyo kuvuga n'igihe cyo guceceka; ujye utegereza igihe gikwiye.
    7. Ntukagire icyo uvuga ku bintu bitakureba kandi ujyugira make.
      • Bimwe mu bintu ntibigomba kuguhangayikisha kuko bitakureba. Ntugakoreshe imbaraga zawe mu kwivanga mu by'abandi. Aho kuba umubibyi w'ibihuha cyangwa ibibazo, jya witonda, uganire make.
    8. Ntukerekane ko uri umunyabwenge cyangwa uzi byose, ahubwo usubize ibyo gusa akubajije.
      • Uko waba uzi byinshi kose, si ngombwa kubyerekana mu ruhame. Shaka kugumana ubumenyi bwawe ariko uzirikane ko urwego urimo rwagushoboza gusubiza ibikenewe gusa, byerekana ubupfura n'ubwenge bw'ukuri.
    9. Uzihanganire byose kandi ubanze utekereze neza, ntukihutire gufata ibyemezo.
      • Ibyemezo bihubukiwe bishobora kugutera ibibazo byinshi. Jya ubanza witekerezeho bihagije mbere yo gufata icyemezo, kandi ujye wihanganira ibintu byose utuje, n'ubwo byaba bikomeye.
    10. Uzibaze uwo uri we kandi usenge cyane Imana ifite byose mu biganza.
      • Gira umwanya wo kwisuzuma no gutekereza ku rugendo rwawe mu buzima. Gusenga bizakomeza umwuka wawe kandi bizaguha ingufu zo kuguma mu murongo w'icyizere n'intego.

    ✔✔Sangira n'abandi iyi nkuru, shyira Comments ahabugenewe niba nawe ubibona utyo.

    ⚫ Ushaka gukomeza kubona amakuru y'ubwenge, dusure buri gihe kandi unabike inomero yacu +250788352332

    The post Ibintu 10 Wakora Kugirango Abantu Batakumenyera appeared first on KASUKUMEDIA.COM.

    Source : https://kasukumedia.com/ibintu-10-wakora-kugirango-abantu-batakumenyera/

  • Loni ni nka Bihehe bavugiriza induru, iti 'ngizi impundu mporana'. Uko yamaganwa, niko irushaho gushyigikira abajenosideri. #rwanda #RwOT

    Ubwo Jenoside yakorerwaga Abatutsi mu Rwanda, Loni yari ihafite abasirikari benshi ngo bari mu butumwa bwo kubungabunga amahoro, nyamara aho gutabara abicwaga, babarekeye mu mikaka y'interahamwe, bafumyamo baritahira. Amateka azakomeza kuryoza izo ngabo za Loni zari mu Rwanda, MINUAR, ubugwari n'ubugome bwo gutererana abari mu kaga.

    Ingabo zari iza FPR-Inkotanyi zimaze gukubita iz'akabwana Leta y'abicanyi, zikanahagarika Jenoside yakorewe Abatutsi, igice kinini cy'izo nkoramaraso cyahungiye muri Zayire (Repubulika Iharanira Demokarasi ya Kongo y'iki gihe), ndetse umuryango mpuzamahanga, n'iyo Loni irimo, barekera abo bajenosideri intwaro zabo, yewe banabatuza iruhande neza rw'umupaka w'u Rwanda, birengagije amategeko mpuzamahanga, uwo muryango wishyiriyeho ubwawo, arebana n'imyitwarire y'impunzi.

    Uko gusigasira abajenosideri byari ukubaha ubutumwa bwumvikana, bugira buti:' Nimwongere mwisuganye, muhumure tuzabafasha gusoza umugambi mucikirije'.

    Ibyo kugaruka mu Rwanda guhirika ubutegetsi no gusoza umugambi wa Jenoside babigerageje kenshi, babifashijwemo n'ubutegetsi uko bwagiye busimburana muri Kongo, ariko Ingabo z'u Rwanda zikomeza kubereka ko jenoside itazongera ukundi mu Rwanda.

    Ibitero ALIR/PALIR/ FDLR/ RUD-Urunana, n'abandi bicanyi bagabye mu Rwanda byavaga muri Kongo, kandi Loni ihafite ingabo zabanje kwitwa MONUC, mbere y'uko witwa MONUSCO mu mwaka wa 2010, ariko ubugambanyi no kwitwara nk'abacanshuro byo bikomeza kuba bya bindi.

    Twibutse ko MONUSCO ariwo mutwe ugizwe n'ingabo n'abakozi benshi( hafi 20.000), kurusha ahandi hose ku isi Loni ifite ibirindiro. Birumvikana ko ari nawo utwara imari itabarika, kuko imibare yerekana ko MONUSCO ikoresha hejuru ya miliyari y'amadolari y'Amerika buri mwaka, arasaga kure tiriyari ugerageje kuvunja mu manyarwanda!

    Ikibazo nyamukuru ariko si ubwinshi bw'umutungo ugenda kuri MONUSCO, ahubwo igiteye impungenge ni umusaruro w'ubutumwa yoherejwemo.

    Uretse kurebera ibikorwa by'abajenosideri bigamije guhungabanya umutekano w'u Rwanda, nta n'icyo MONUSCO yakoze ngo itabare Abakongomani, cyane cyane abo mu bwoko bw'Abatutsi, babuzwa amahwemo n'abajenosideri bo mu mutwe wa FDLR. Nguko uko ababarirwa mu bihumbi ijana(100.000) bamaze imyaka isaga 25 mu nkambi z'impunzi mu Rwanda, abandi benshi kurushaho bakaba banyanyagiye hirya no hino mu bihugu byo muri aka karere.

    Aho guhashya imitwe yitwaje intwaro nk'uko byari mu nshingano za MONUSCO kandi, ahubwo yarushijeho kuvuka, ubu isaga 250 ikaba yica igakiza mu burasirazuba bwa Kongo. Imyinshi muri iyo yashinzwe inashyigikiwe n'ubutegetsi bwa Kinshasa.

    Loni imaze kubona ko imikorere ya MONUSCO ikabije gutera ikimwaro, yatoye umwanzuro ko ubutumwa bwayo bushyirwaho akadomo.
    Nyamara gutahura abasirikari bayo birakorwa biguruntege, bigaragara ko bananiwe kuvirira akaryoshye bakomora muri Kongo.

    Mu mayeri rero yo kuguma muri Kongo ariko bitwikiriye undi mutaka, ubu Akanama ka Loni gashinzwe Amahoro ku Isi(UNSC)kamaze gutora umwanzuro wemeza ko ibyagenerwaga MONUSCO birazwe abasirikari ba SADC bari muri Kongo. Mu by'ukuri ni uguhindura icupa, ariko uburozi burimo bukiri bwa bundi.

    Kuva SADC yagera muri Kongo mu mpera z'umwaka ushize, yashinjwe gukorana n'abajenosideri ba FDLR kimwe n'indi mitwe y'iterabwoba ikorana n'igisirikari cya Kongo, FARDC. Nubwo bitabujije FARDC, SADC, FDLR, Wazalendo, ingabo z'Abarundi, abacanshuro ba Wagner, n'indi mitwe itabarika irwana ku ruhande rwa Leta ya Kongo, kwamburwa ibirindiro, bikigarurirwa na M23, Abatutsi bo mu duce tukigenzurwa n'urwo ruhande rushyigikiye Leta bakomeje kwicwa no gusahurwa, abagore bakomeza gusambanywa ku ngufu.

    Ibyegeranyo by'imiryango mpuzamahanga, abanyamakuru n' ubuhamya bw'abaturage bo muri utwo duce, bigaragaza ko FDLR iri ku isonga mu guhohotera abo Banyekongo, bafatwa nk'Abanyarwanda n'ibyitso bya M23.

    Icyegeranyo cy'Umunyamabanga Mukuru wa Loni, Madamu Alice Wairimu Nderitu ushinzwe ibikorwa byo kurwanya Jenoside, nawe yatangaje kenshi ko ihohoterwa rikorerwa Abatutsi b'Abakongomani rishobora kuvamo Jenoside nk'iyakorewe Abatutsi mu Rwanda, ndetse anatunga agatoki FARDC na FDLR, bafatanya mu kwibasira izo nzirakarengane.

    Niba se FARDC iregwa gukorana n'abajenosideri ba FDLR, ubwo SADC ishyigikiye FARDC yo nta bufatanyacyaha ikwiye kuryozwa ? Loni se yo yegurira SADC ibikoresho n'abakozi byari ibya MONUSCO, ubwo yo amategeko ntazayigaragaza nk' umufatanyabikorwa mu mahano SADC n'abandi bari ku ruhande rwa Leta ya Kongo bakorera abaturage?

    Mu nama yatoye umwanzuro wa Loni wo gushyigikira SADC muri Kongo, intumwa ya Leta Zunze Ubumwe z'Amerika yagaragaje impungenge ko gukomeza gushyira imbere ibikorwa bya gisirikari bishobora gutuma ibintu birushaho kudogera mu burasirazuba bwa Kongo. Byaba ari ukwiyerurutsa cyangwa kuvuga ikimuri ku mutima, abari mu nama ntibabihaye agaciro. Ntibazanatinda kubona ko bibeshye.

    Wasobanura ute ko ushyigikiye inzira y'ibiganiro, nk'uko bikubiye mu myanzuro za Luanda na Nairobi igamije kurangiza intambara mu burasirazuba bwa Kongo, kandi ukomeza kurunda ibitwaro kuri rumwe mu mpande zishyamiranye?

    Loni izabeshye abandi, ntishyigikiye ko amahoro agaruka muri Kongo, ahubwo irifuza ko ibintu birushaho kudogera ngo ikomeze isarurire mu nduru.

    Ngo Loni ishyigikiye imyanzuro ya Nairobi na Luanda ye! Gute se itarigeze yamagana Tshisekedi wirukanye ingabo z'Umuryango w'Afrika y'Uburasirazuba zari zagiye gushyira mu bikorwa iyo myanzuro, ahubwo iyo Loni igashyigikira SADC yo ishyize imbere intambara?

    Loni iragayirwa imyitwarire mibi haba mu Rwanda, haba no muri Kongo, aho gukosora amakosa, ikamera nka Bihehe bavugiriza induru, ikitakuma iti:' Ngizi impundu mporana'!

    The post Loni ni nka Bihehe bavugiriza induru, iti 'ngizi impundu mporana'. Uko yamaganwa, niko irushaho gushyigikira abajenosideri. appeared first on RUSHYASHYA.

    Source : https://rushyashya.net/loni-ni-nka-bihehe-bavugiriza-induru-iti-ngizi-impundu-mporana-uko-yamaganwa-niko-irushaho-gushyigikira-abajenosideri/?utm_source=rss&utm_medium=rss&utm_campaign=loni-ni-nka-bihehe-bavugiriza-induru-iti-ngizi-impundu-mporana-uko-yamaganwa-niko-irushaho-gushyigikira-abajenosideri

  • Issa Hayatou Yitabye Imana ku myaka 77 – YEGOB #rwanda #RwOT

    Issa Hayatou, wahoze ari Perezida w'Impuzamashyirahamwe y'Umupira w'Amaguru muri Afurika (CAF) kuva mu 1988 kugeza mu 2017, yitabye Imana kuri uyu wa Kane azize uburwayi. Hayatou, w'imyaka 77, yari umwe mu bayobozi b'imena mu mupira w'amaguru ku isi, akaba yaragize uruhare rukomeye mu iterambere ry'uyu mukino muri Afurika.

    Yabaye Visi Perezida wa FIFA ndetse anayobora iyi mpuzamashyirahamwe y'agateganyo mu 2015 ubwo Sepp Blatter yahagarikwaga by'agateganyo. Hayatou azasigara yibukwa nk'umuyobozi witangiye guteza imbere umupira w'amaguru muri Afurika no ku rwego rw'isi.

     

    Source : https://yegob.rw/issa-hayatou-yitabye-imana-ku-myaka-77/