Author: webrwanda

Dr. Ndagijimana aratangira inshingano ze kuri uyu wa 14 Kanama 2024, nyuma y'icyemezo cy'Inama y'Ubutegetsi y'icyo kigo yateranye kuri uyu wa 13 Kanama 2024.

Umuyobozi w'Inama y'Ubutegetsi, Jean Philippe Prosper ya BK Group Plc, yavuze ko BK Group Plc izungukira mu bunararibonye bwa Dr. Uzziel Ndagijimana.

Ati “Tunejejwe ko kuba twahisemo Dr. Uzziel Ndagijimana nk'Umuyobozi mushya wa BK Group Plc. Imiyoborere ye n'ubumenyi bwe mu bijyanye n'ubukungu n'urwego rw'imari bizadufasha mu gushyira mu bikorwa ingamba za BK Group ndetse n'intego zayo z'ahazaza.”

Bongeyeho ko azakorana bya hafi n'abayobozi b'ibigo bishamikiye kuri BK Group Plc mu rwego rwo guteza imbere icyo kigo.

Dr. Uzziel Ndagijimana yagizwe Umuyobozi Mukuru wa BK Group Plc

Umuhanzi Massamba Intore agiye kwizihiza imyaka 40 amaze yihebeye umuziki gakondo ndetse n’imyaka 30 ishize u Rwanda rubohowe, binyuze mu Gitaramo yise 3040 y’Ubutore.

Iki gitaramo cy’amateka kizabera muri BK Arena ku mugoroba wo ku wa 31 Kanama 2024.

Abazacyitabira bazasusurutswa binyuze mu bihangano bihesha ikuzo umuziki gakondo n’ibivuga ku rugendo rwo kwiyubaka ku Rwanda nyuma ya Jenoside yakorewe Abatutsi.

Massamba Intore yatekereje gutegura Igitaramo 3040 Ubutore Concert mu gukomeza gukundisha abakiri bato umuco gakondo no kubayobora mu nzira ikwiye yo kuwusigasira.

Yagize ati “Mu muco abakuru batanga inkoni ku bakiri bato. Ni ingenzi ko ababitse n’abazi amateka bagomba kuyasangiza abato kugira ngo bakomeze muri uwo murongo wo kuyasigasira.”

Massamba Intore umaze imyaka 40 atangiye umuziki, yagaragaje ko igitaramo cye cyagenewe Abanyarwanda kuva ku bato kugera ku bakuze.

Ati “Ni igitaramo kigaruka ku rugendo rw’imyaka 30, wagereranya no kuvuka bwa kabiri ku Rwanda ndetse n’intambwe rumaze gutera urebeye aho rwaturutse n’uko rwiyubatse. Nzaba nanizihiza imyaka 40 ishize ntangiye umuziki kugeza uyu munsi nkiri mu nganzo.”

Igitaramo cyiswe 3040 Ubutore Concert, Intore Massamba azagihuriramo n’abahanzi bafite umwihariko wo gukora umuziki gakondo nabandi bagezweho mu muziki wa none.

Aba bahanzi barimo Ariel Wayz, Ruti Joel, DJ Marnaud uzwi mu kuvanga imiziki uri mu bayoboye mu Rwanda na DJ GRVNDLVNG.

3040 Ubutore Concert ni igitaramo kizahuza abakunzi ba muzika, abihebeye umuco Nyarwanda n’abaharanira inyungu zawo ndetse n’abakunzi b’umuziki gakondo bazaturuka mu Rwanda no hanze yarwo.”

Iki gitaramo ntikizaha umwihariko gusa ibirori byo kwizihiza urugendo rwa Massamba Intore ahubwo ni numwanya wo guha agaciro umuziki gakondo mu rugendo rwo kwigira ku Rwanda.

Massamba Intore ni Umunyarwanda wubatse izina mu muziki w’u Rwanda, yatangiye gukora kuva mu myaka 40 ishize. Yatanze umusanzu ukomeye mu guteza imbere Umuziki Gakondo.

Uyu muhanzi akaba n’umwanditsi w’indirimbo yamenyekanye mu ndirimbo zitandukanye z’irimo Nduwawe yatangiriyeho umuziki, Nshengurukanye isheja, Jenga taifa lako, Nyeganyega, Kanjogera, Urugo ruhire', Duhakananye umurego turengere u Rwanda, Hari ibintu bimbabaza, Kibonge cha nini n’izindi.

Massamba Intore agiye kwizihiza imyaka 40 amaze yihebeye umuziki gakondo ndetse n’imyaka 30 ishize u Rwanda rubohowe

Ni umwe mu bahanzi baririmba injyana gakondo bamaze igihe kandi bakunzwe

Igitaramo cye kizaba mu mpera z’uku kwezi

Iyi gahunda izwi nka Equity Leaders Programs yatangijwe mu 2021.

Ifasha abo banyeshuri guhabwa amahugurwa abafasha kuzabamo abayobozi b'ahazaza nk'imwe muri gahunda nyinshi zo guteza imbere imibereho myiza y'abaturage iyi banki ifite.

Buri hantu Equity Bank ifite ishami muri 35 ibarura ubu, hatoranywa umuhungu n'umukobwa batsinze neza.

Bose bahabwa imenyerezamwuga ryishyurwa muri Equity Bank buri kwezi no gufashwa kubona aho bakomereza amasomo muri banki zikomeye zaba izo mu Rwanda no mu mahanga.

Iki kigo cy'imari kirabasura, kikumvisha ababyeyi babo impamvu y'iyo gahunda, kikabajyana mu mwiherero w'ibyumweru bibiri, bagahuzwa n'abikorera babaganiriza ku ngingo zitandukanye z'imibereho.

Giha akazi kandi abandi bantu babafasha mu myumvire babizobereyemo, bakabashakira na za kaminuza zikomeye ku rwego rw'Isi zibaha buruse.

Umuyobozi muri Equity Bank Rwanda ushinzwe ishoramari rishorwa mu bikorwa bijyanye n'imibereho myiza y'abaturage, Alice Ikirezi, yabwiye IGIHE ko arenga miliyari 5,4 Frw amaze gukoreshwa muri buruse zahawe abo banyeshuri.

Ati 'Ayo yiyongeraho andi miliyoni 1,2$ (arenga miliyari 1,5 Frw) yashowe mu bindi bikorwa byo gufasha abo bana nko kubatoranya, kubasura iwabo tukumvisha ababyeyi babo akamaro k'icyo gikorwa, kubashyira mu mwiherero no kubaha ubumenyi bujyanye n'uko bakwitwara muri kaminuza.'

Mu bindi bigishwa ni ugusubiza ibibazo kaminuza iba yabahaye ngo bayinjiremo, kubishyurira impamyabushobozi zigaragaza ko badategwa mu Cyongereza n'ibindi bituma bagera ku rwego rw'izo kaminuza zihambaye baba bagiye kwigamo.

Ni gahunda yatangijwe mu 1998 mu mashami ya Equity Bank Group yose aho abanyeshuri 18.732 bamaze kuyinyuramo barimo 102 bo mu Rwanda.

Abo bo mu Rwanda bose bahawe imenyerezamwuga 'bahembwa n'amafaranga menshi kurusha na bamwe mu bakozi bakomeye ba banki', ndetse bose bubakiwe ubushobozi.

Muri bo 101 bahawe kaminuza zaba izo mu Rwanda n'izo mu mahanga, uwo umwe usigaye akaba ategereje kaminuza yasabye yo mu mahanga kuko ari yo yifuza.

Muri abo 102 abagera muri 44 bangana na 43%, bahawe buruse muri kaminuza 25 zo mu bihugu 11 byo ku migabane itanu igize Isi, zirimo nka Massachusetts Institute of Technology, Kaminuza ya Havard, Yale University n'izindi.

Abanyeshuri 19 bagiye kwiga mu mahanga mu 2024 bahawe amafaranga ari hagati y'ibihumbi 500 Frw na miliyoni 2 Frw, azabafasha kwitegura kujya muri kaminuza, ubu hakaba hamaze gutangwa miliyoni 54 Frw zo muri ubwo buryo.

Mucyo Savy wize ayisumbuye muri Ecole des Sciences de Byimana, ni umwe mu bungukiye muri iyo gahunda.

Yahawe kujya kwiga muri Massachusetts Institute of Technology, MIT, imwe muri kaminuza zikomeye zo muri Leta Zunze Ubumwe za Amarika.

Uyu musore w'imyaka 19 ati 'Mu yisumbuye nize Ubugenge, Ubutabire n'Ibinyabuzima. Muri MIT ngiye kwiga Imibare n'ibijyanye mudasobwa. Ni ibintu binshimishije. Biba bigoye kuhabona kuko bane mu bantu 100 basabye kuhiga, ni bo babihabwa. Icyo nzitura Equity Bank Rwanda ni uko nzitwara neza, nkaza gufasha abandi binyuze mu byo nize.'

Uko kugaruka agafasha igihugu binyuze mu byo yize, ni na yo ntero kuri Mureramanzi Emilienne wo mu Karere ka Huye wahawe kwiga ibijyanye no kurengera ibidukikije muri Turikiya.

Uyu mwana w'umukobwa w'imyaka 18 wujuje mu bizamini bisoza amashuri yisumbuye, yavuze ko mu byo yizeza Abanyarwanda 'ari ko nzagaruka ngakoresha ibyo nize kugira ngo gahunda y'iterambere irambye u Rwanda rwihaye igerweho ibidukikije na byo bibungabunzwe.'

Icyiciro cya mbere cyasojemo abanyeshuri 32, bakurikirwa na 34 basoje mu cya kabiri, icya gatatu ari na cyo giheruka, iyi gahunda yafashije abanyeshuri 36 mu mu bice bitandukanye by'igihugu bitwaye neza kurusha abandi.

Umuyobozi Mukuru wa Equity Bank Rwanda, Hannington Namara yavuze ko abo banyeshuri bakurikiranwa umunsi ku wundi ndetse uko amafaranga azagenda aboneka ari ko gahunda izajya yagurwa, aho nko mu cyiciro cya kane bazafatwa abarenga 70.

Abanyeshuri bari bamaze igihe bahugurwa ndetse bakora n’imenyerezamwuga muri Equity Bank Rwanda boherejwe muri kaminuza zitandukanye ziri mu za mbere zitanga uburezi bufite ireme mu Isi

Icyiciro cya gatatu cy’abanyeshuri bari bamaze igihe bahugurwa na Equity Bank Rwanda basezeweho kuko bagiye gukomeza amasomo muri kaminuza bashakiwe n’icyo kigo

Umuyobozi muri Equity Bank Rwanda ushinzwe ishoramari rishorwa mu bikorwa bijyanye n'imibereho myiza y'abaturage, Alice Ikirezi yagaragaje ko arenga miliyari 8,6 Frw amaze gukoreshwa muri gahunda ya Equity Bank Rwanda ifasha abasoje ayisumbuye

Mureramanzi Emilienne yashimiwe ubwitange yagaragaje ubwo yari mu imenyerezamwuga muri Equity Bank Rwanda

Abanyeshuri bari bamaze igihe bakora imenyerezamwuga muri Equity Bank Rwanda bahawe impamyabushobozi igaragaza ko bakoranye umurava imirimo bari bashinzwe

Abanyeshuri bari bamaze igihe bakora imenyerezamwuga muri Equity Bank Rwanda basezeweho kuko bagiye gukomeza amasomo muri kaminuza kuri buruse bashakiwe n’icyo kigo

Umuyobozi Mukuru wa Equity Bank Rwanda, Hannington Namara ubwo yahanuraga abanyeshuri bagiye gukomeza amashuri ku rwego rwa kaminuza

Mucyo Savy wahawe buruse muri Massachusetts Institute of Technology yo muri Leta Zunze Ubumwe za Amerika yavuze ko ayo mahirwe atazayapfusha ubusa

Mureramanzi Emilienne agaragaza ko ubumenyi agiye gukura muri Turikiya azabwifashisha mu gufasha u Rwanda kugera ku iterambere rirambye

Abakozi ba Equity Bank Rwanda bari baje gusezera ku banyeshuri iki kigo cyari kimaze iminsi giha imenyerezamwuga bagiye gukomeza amashuri muri kaminuza zitandukanye

Amafoto: Nkusi Christian

Ibi bihembo byitiriwe Han Yong-un wari uzwi nka Mahae waharaniye ubwigenge bwa Koreya y'Epfo ubuzima bwe bwose.

Uyu mugabo yari umwe mu bakomeye mu bijyanye n'imyemerere y'aba- Buddhist akaba n'umusizi w'ibigwi mu gihugu cye.

Ibi bihembo bitangwa mu byiciro bitandukanye birimo icy'amahoro, ubugeni, ubuvanganzo n'ibindi.

Ku wa Mbere tariki 12 Kanama, nibwo byatangajwe ko Perezida Kagame yegukanye iki cy'amahoro, mu muhango wabereye mu Ntara ya Gangwon.

Ibi bishyira Perezida Kagame ku rutonde rw'abandi begukanye ibi bihembo mbere barimo Nelson Mandela na Dalai Lama.

Abagera kuri 600 bitabiriye uyu muhango, bashimye ibigwi bya Perezida Paul Kagame nk'umuyobozi w'intangarugero. Yahawe iki gihembo kubera uruhare yagize mu gushyiraho gahunda zo kubabarirana, kwiyunga no kongera kubaka igihugu nyuma ya Jenoside yakorewe Abatutsi mu 1994.

Abitabiriye uyu muhango bagaragaje ko ibikorwa bya Perezida Kagame bitimakaje amahoro mu Rwanda gusa, ahubwo byabaye n'intandaro yo gutera imbere kwihuse mu by'ubukungu kandi hubahirizwa amahame y'uburinganire bw'abagabo n'abagore.

Ibi bihembo byatangiye gutangwa mu 1997 n'Ihuriro ry'Aba-Buddist bakuru (monks) mu kuzirikana umurage wa Han Yong-un Manhae.

Perezida Kagame ni we Munyafurika rukumbi wegukanye igihembo mu by'uyu mwaka. Igihembo cye cyashyikirijwe Ambasade y'u Rwanda muri Koreya y'Epfo.

Paul Kagame yavutse tariki 23 Ukwakira 1957. Amashuri abanza yayigiye muri Rwengoro Primary School muri Uganda, ayisumbuye ayiga muri Ntare School na Old Kampala Senior Secondary School.

Paul Kagame yayoboye urugamba rwo kubohora igihugu nyuma gato y'urupfu rwa Maj Gen Gisa Fred Rwigema, aruyobora kuva mu 1990 kugeza muri Nyakanga 1994 ubwo u Rwanda rwabohorwaga.

Yabaye Visi Perezida na Minisitiri w'Ingabo muri Guverinoma y'Ubumwe, kugeza tariki 22 Mata 2000 ubwo yarahiriraga kuba Perezida w'u Rwanda w'inzibacyuho.

Tariki 25 Kanama 2003, Paul Kagame yatsinze amatora ya mbere u Rwanda rwari rukoze nyuma ya Jenoside yakorewe Abatutsi, ndetse akaba aherutse no kwegukana manda ya kane, imwemerera kuyobora igihugu mu myaka itanu iri imbere.

Perezida Kagame ni we Munyafurika rukumbi wegukanye igihembo mu by'uyu mwaka. Igihembo cye cyashyikirijwe Ambasade y'u Rwanda muri Koreya y'Epfo

Ni amakuru IGIHE yemerewe n'Umuyobozi w'ako karere wungirije ushinzwe imibereho myiza y'abaturage, Gilbert Mugabo, avuga ko byinshi ku rupfu rwe bizatangazwa n'Urwego rw'Igihugu rw'Ubugenzacyaha (RIB) nyuma yo gukora iperereza.

Ati ''Yabonwe mu nzira yitabye Imana, ariko RIB iri kubikurikirana ngo hakorwe iperereza bamenye icyo yazize.'

Mugabo yatangaje ko ibirenze ibyo bizamenyekana iperereza rimaze gukorwa.

Uwizeye Henriette ni umubyeyi w'abana babiri. Ni umwe mu bagore bitabiriye igiterane ngarukamwaka 'All Women Together' gitegurwa na Women Foundation Ministry yashinzwe na Apostle Mignonne Alice Kabera, cyabaye ku wa 9 Kanama 2024.

Uyu mubyeyi yavuze ko mu 2003 ubwo yigaga muri kaminuza yarwaye umutwe ukajya umurya bikabije. Iyo yawuzunguzaga yumvaga utonekara nk'urimo ikibyimba.

Yari afite ubushobozi buke ku buryo atari gushobora kwiyishyurira serivisi zo guca mu cyuma ngo barebe ikibazo afite mu mutwe.

Mu gihe yabunzaga imitima, FPR Inkotanyi yaramugobotse imwishyurira amatike amujyana kwivuriza i Kampala, gusa bamugarura mu Bitaro byitiriwe Umwami Faisal.

Bamubwiye ko arwaye indwara ikomeye ariko ntibamusobanurira iyi ari yo. Umurwayi wagenderaga ku kwemera Yesu Kristo yabwiye abaganga ko uburwayi bwe budakomeye uko babivuga ndetse mu minsi mike azakira agasubira kureba umuryango we.

Hadashize iminsi yakomereje mu bitaro bya Aga Khan i Nairobi agisuzumwa bose barikanga batinya no kuvuga. Bamubwiye ko amahirwe yo kubaho no gupfa ari 50%.

Bati 'Ufite ikibyimba kinini kitari hejuru cyangwa ku ruhande ahubwo kiri mu bwonko imbere.'

Mbere yo kujya ku kibuga cy'indege ajya muri Kenya yavuze isengesho ati 'Yesu uri inshuti yanjye. Ndagusaba ko utazemera ko nsiga utu twana ari duto ngo tuzarerwe na mukase tutazi icyo gukora. Yahise yumva ijwi rimuhumuriza ngo humura ntaho uzajya'.

Uwizeye yibuka ko n'umugabo we yari yarihebye avuga ko azapfa ariko mbere yo kujya gufata kubagwa amuhumuriza avuga ngo 'Niwumva ufite ubwoba wumve ko abana bacu [King and Teta] ntashobora kubasiga.'

Umugabo we yamenye ko Uwizeye arwaye kanseri agira ubwoba ndetse atinya kubimubwira. Aho muganga amubwiriye indwara ye avuga ko nta kanseri yarwara kandi afite Yesu.

Muganga ati 'Maze imyaka 40 mvura ariko sindabona umurwayi umeze nk'uyu mubyeyi. Afite ikintu kimurimo ntasobanukiwe ariko iriya kanseri ye izakira kandi azava no mu kagare'.

Muganga yasezereye Uwizeye adakize neza kuko yari yarabyimbye umutwe, isura yarahindanye utamumenya, hashize imyaka itatu umugabo we aramuta yibwira ko kanseri yo mu bwonko izamuhitana, nyuma bona akazi atangira kwibeshaho.

Ati 'Uwiteka yankuyeho igisuzuguriro ankura ku cyavu anyicaranya n'ibikomangoma. Iryo jambo ryansohoreyeho.'

Uwizeye nyuma yasubiye mu ishuri asoza kaminuza, yiga n'icyiciro cya gatatu cya kaminuza 'Masters' yibeshaho. Ntiyakanzwe n'uko agaragara ahubwo yakomeje kwitinyuka kuko ngo yigeze no kwiyandikisha mu kwiyamamarizaga umwanya w'Abadepite.

Uwizeye Henriette wagiye kwivuza muri Kenya bamubwira ko 50% yabaho cyangwa agapfa ubu ashima Yesu wamukijije

Apostle Mignonne yashimiwe kuba yaramubaye hafi akamwakira mu muryango

Dr Ipyana umuhanzi ukomoka muri Tanzania yasusurukije abitabiriye

Osinachi Kalu Okoro Egbu wamamaye nka Sinach yaririmbye muri iki giterane

Ni igikorwa cyabaye kuri uyu wa Kabiri tariki 13 Kanama, ubwo Perezida Kagame yakiraga Umwami Mswati III, muri Village Urugwiro.

Ni umuhango waranzwe no gusinya amasezerano ane mu ngeri zitandukanye agamije kurushaho gushimangira umubano n'ubutwererane hagati y'u Rwanda na Eswatini.

Amasezerano ya mbere yasinywe ajyanye n'ubufatanye mu bya gisirikare n'ibikorwa bigamije umutekano. Aya kabiri ajyanye n'ubufatanye bwa polisi z'ibihugu byombi, mu gihe aya gatatu ajyanye n'ubufatanye mu kugorora imfungwa n'abagororwa.

Amasezerano ya kane yashyizweho umukono ni ajyanye no gukuraniraho Visa ku bantu bafite Pasiporo z'abadipolomate n'iza serivisi.

Umwami Mswati III yageze mu Rwanda i Kigali tariki 10 Kanama, yitabiriye irahira rya Perezida Paul Kagame, umuhango wabaye ku Cyumweru tariki 11 Kanama 2024.

Perezida Kagame yashimye Umwami Mswati III kuba yaritabiriye umuhango wo kurahira kwe, ashimangira ko uru ruzinduko ari ikimenyetso cy'umubano mwiza uri hagati y'u Rwanda na Eswatini.

Ati 'Twishimiye kubakira hamwe n'itsinda muri kumwe mu Rwanda.Ndagushimira kandi kuba warifatanyije n'Abanyarwanda mu muhango wo kurahira, turabashimira cyane ku bwo kuhaba. Hashingiwe kuri uru ruzinduko, birigaragaza ko u Rwanda na Eswatini ari inshuti nziza kandi turashaka ko biguma gutyo ndetse bikarushaho gutera imbere. Turashaka kandi gushimangira igihango cyacu mu bijyanye n'ubutwererane ari nayo mpamvu y'amasezerano yasinywe uyu munsi.'

Perezida Kagame yakomeje agaragaza ko mu bihe bitandukanye abayobozi mu nzego z'igihugu ku mpande zombi, bagiye bagenderanirana, ashimangira ko 'ari umusingi mwiza wo kubakiraho'.

Ati 'Mu Rwanda duhora twiteguye gusangira n'abafatanyabikorwa bacu n'inshuti nka Eswatini, ubunararibonye bwacu mu rugendo rw'impinduka mu gihugu cyacu.'

Perezida Kagame yijeje Umwami Mswati III ko mu bihe biri imbere na we azasura Eswatini.

Ati 'Ndagushimira nanone ku bwo gusura igihugu cyacu, nizeye ko uri kunyurwa n'uruzinduko rwawe kandi niteguye gukomeza gukorana nawe ndetse ntegereje umunsi nzasura Eswatini mu bihe biri imbere.'

Umwami Mswati III yashimiye Perezida Kagame wamutumiye muri uyu muhango wo kurahira kwe.

Yamushimiye kandi ku ntsinzi aheruka kwegukana mu matora y'Umukuru w'Igihugu, ndetse amwifuriza ibyiza byose mu rugendo rwo gukomeza guteza imbere igihugu.

Yavuze ko u Rwanda na Eswatini ari ibihugu bisangiye umuhate mu bijyanye no guharanira amahoro n'umutekano, iterambere, kwihaza mu biribwa no guhangana n'ingaruka z'imihindagurikire y'ibihe.

Ati 'U Rwanda ni igihugu kimaze gutera imbere mu bijyanye na gahunda z'ikoranabuhanga nk'uko twabyiboneye mu ruzinduko ejo hashize twagiriye mu kigo cy'Ikoranabuhanga Irembo, gifasha Guverinoma mu gutanga serivisi, no kuzana ibisubizo bishingiye ku ikoranabuhanga.'

Umwami Mswati III yakomeje avuga ko kuri uyu wa Kabiri arakomereza uruzinduko rwe mu cyanya cyahariwe inganda i Masoro, aho 'ndasura imishinga irimo na kaminuza izobereye mu bijyanye n'umutekano mu by'ikoranabuhanga. Dufite icyizere ko turi bwigire ku rugendo rwanyu, cyane ko natwe dufite ibigo nk'icyo mu bwami bwacu.'

Yakomeje avuga ko 'Twashyizeho kandi icyanya cyahariwe inganda twizera ko kizagira Uruhare mu iterambere ry'igihugu cyacu.'

Umwami Mswati III yavuze ko mu bihe biri imbere yizeye ko ibihugu byombi bizagenda birushaho gukorana.

Ubwami bwa Eswatini ni igihugu giherereye mu Majyepfo ya Afurika, cyamenyekanye cyane ubwo cyitwaga Swaziland.

Gihana imbibi na Mozambique na Afurika y'Epfo, kikagira Abaturage barenga gato miliyoni imwe. Umusaruro Mbumbe wacyo ubarirwa muri miliyari 4,7$, mu gihe Nibura buri muturage yinjiza 3,986$ ku mwaka.

Iki Gihugu kiyobowe n'Umwami Mswati III mu 1986 wimye ingoma afite imyaka 18.

Uruzinduko rw'uyu Mwami mu Rwanda ruje rukurikira urwo Igikomangoma Sicalo Dlamini hamwe n'Umugaba Mukuru w'Ingabo za Eswatini, General Mashikilisana bahagiriye mu 2023.

Uyu munsi Tariki 13 Kanama, ni umunsi wahariwe kwizihiza abantu bakoresha imoso ku Isi yose. Watangiye kwizihizwa kuva mu 1976. Ku rwego rw'Umugabane wa Afurika  wizihirijwe muri Kaminuza ya Pretoria muri Afurika y'Epfo mu gikorwa cyateguwe n'umuryango 'Africa Left Handers Confederation'.

Mu Rwanda nubwo nta birori byihariye byateganijwe, ntibyabujije umuryango 'Left Hand Initiative Center' uvuganira abana bakoresha imoso, kugira icyo utangaza kuri uyu munsi wabahariwe, ndetse unashyira umucyo ku mbogamizi abakoresha imoso bagihura nazo.

Umuyobozi wa 'Left Hand Initiative Center' ,Tujaribu Claude yagiranye ikiganiro na InyaRwanda, agaruka kuri bimwe mu bibazo by'imbogamizi bafite. Yakomoje ku kuba hari ubushobozi buke cyane cyane mu myigire aho ibikoresho bifasha abana bakoresha imoso bikiri bike ndetse ko hari n'intebe zabugenewe zidakuze kuboneka mu mashuri.

Tujaribu Claude washimye cyane ko Leta y'u Rwanda yegereje uburezi abana bose nta n’umwe iheje, yasabye ko n'abana bakoresha imoso bongererwa ubushobozi.

Agaruka kuri ibi yagize ati: 'Itegeko Nshinga rivuga ko nta n’umwe ukwiye guhezwa ariko wajya muri Minisiteri y'Uburezi ntaho herekanwa ko ukoresha imoso hari uburyo agomba gufashwamo bwihariye'.

Uyu muyobozi yagarutse ku kuba imyumvire ikiri hasi nayo ikiri imbogamizi ku bana bakoresha imoso, aho yanatanze urugero rw'uko hari ababyeyi bagikubita abana babo babaziza ko bakoresha imoso, imyumvire ishingiye ku madini na sosiyete muri rusange yumvikanisha ko abakoresha imosp hari icyo babuze nayo ngo iracyagaragara hamwe na hamwe.

Yakomeje agira ati: ' Hagombaga kuba amabwiriza muri Minisiteri y'Uburezi agenewe abarezi n'ababyeyi mu gufasha abana bakoresha imoso cyane mu burezi. Ikuraho imyumvire y'amadini, imico ibangamira abana bakoresha imoso'.

Ati: ' Mu Isi abarenga 10% bakoresha imoso ,ntibagomba kubaho nta mabwiriza abarengera muri buri gihugu batuyemo'. Ubu bukaba aribwo butumwa n'ibyifuzo by'umuryango 'Left Hand Initiative Center' kuri uyu munso hizihizwaho umunsi wahariwe abakoresha ukuboko kw'imoso.

Uyu muryango  wa Left Hand Initiative ukorera  mu Karere ka Kicukiro, Umurenge wa Nibonye  kuva mu 2013.