Author: webrwanda

Ibi biganiro byabaye nyuma y'ibintu bibiri by'ingenzi: guhura kw'inzobere mu by'ubutasi z'u Rwanda, RDC na Angola no guhura kwa Perezida João Lourenço na Paul Kagame ndetse na Félix Tshisekedi.

Guhura kw'inzobere mu butasi kwabaye tariki ya 7 n'iya 8 Kanama 2024 kwashingiraga ku mwanzuro wafashwe n'abaminisitiri tariki ya 30 Nyakanga. Zaganiriye ku buryo bwo gusenya umutwe wa FDLR bwateguwe na guverinoma ya RDC.

Perezida Lourenço ahura n'abakuru b'ibihugu bibiri mu minsi ikurikiranye, baganiriye ku buryo ari ngombwa ko akarere k'ibiyaga bigari kagira umutekano, bagaragaza ko bizagerwaho mu gihe ibiganiro bya Luanda byakomeza, bigatanga umusaruro byitezweho.

Uyu Mukuru w'Igihugu yagaragarije Perezida Kagame na Tshisekedi 'umushinga' w'uburyo amahoro n'umutekano byaboneka. Uyu mushinga hamwe na raporo y'inzobere mu butasi byasesenguwe n'abaminisitiri tariki ya 20 n'iya 21 Kanama.

Gusa ariko bitandukanye na tariki ya 30 Nyakanga, kuri iyi nshuro nta myanzuro y'ibyavuye mu biganiro by'izi ntumwa yasohotse.

Ikinyamakuru Jeune Afrique cyagaragaje ko ibiganiro bya tariki ya 20 n'iya 21 Kanama byaranzwe n'ubwumvikane buke, bushingiye ku kuba ahanini byarabaye mu gihe umutwe witwaje intwaro wa M23 warwanaga n'imitwe ya Wazalendo ishyigikiwe kandi yifatanya na Leta ya RDC, ukomeje kwagura ibirindiro.

Guverinoma ya RDC isanzwe ishinja u Rwanda gufasha M23 mu buryo burimo kuyiha abasirikare n'ibikoresho. Ibi byagarutsweho n'intumwa za RDC muri ibi biganiro bya Luanda, gusa ni ibirego Leta y'u Rwanda isanzwe itera utwatsi, ikagaragaza ko bigamije kuyobya uburari.

Minisitiri w'Ububanyi n'Amahanga wa RDC, Thérèse Kayikwamba Wagner, yagaragaje ko nubwo ibiganiro bya Luanda byanzuye ko guhera tariki ya 4 Kanama imirwano igomba guhagarara, bitigeze byubahirizwa.

Nubwo M23 yasabwe guhagarika imirwano, Umuvugizi wayo ku rwego rwa politiki, Lawrence Kanyuka, tariki ya 1 Kanama yasobanuye ko uyu mwanzuro utabareba by'ako kanya, bitewe n'uko udahagarariwe mu biganiro bya Luanda, yongeraho ariko ko bamaze igihe kinini birwanaho, kuko barwana iyo batewe n'ihuriro ry'ingabo za Leta ya RDC.

Kanyuka yagize ati “AFC/M23 ihamya ko itarebwa by'ako kanya n'imyanzuro yafatiwe mu biganiro ititabiriye. Iributsa ko ihuriro ry'ingabo za Leta ya RDC rimenyereye kwifashisha agahenge n'ihagarikwa ry'imirwano mu kwisuganga, gutsemba ubwoko, kugaba ibitero ku baturage no ku ngabo zacu zibarinda.”

Nk'uko M23 ibisobanura kenshi, ihuriro ry'ingabo za Leta ya RDC ririmo ingabo zisanzwe z'iki gihugu (FARDC), imitwe ya Wazalendo, FDLR, abacancuro, ingabo z'u Burundi n'iz'umuryango wa Afurika y'amajyepfo (SADC).

Angola ibona ko mu gihe imyanzuro ibiri y'ingenzi yafatiwe mu biganiro bya Luanda yakubahirizwa, amahoro n'umutekano byagaruka mu karere. Umwe ni ugusenya FDLR, undi ukaba 'ugukura ingabo' aho zafashe.

Nyuma y'aho ibiganiro biherutse i Luanda bidatanze umusaruro, byamenyekanye ko tariki ya 29 n'iya 30 Kanama, inzobere mu butasi zizongera guhura, abaminisitiri bongere bahure tariki 9 n'iya 10 Nzeri 2024.

U Rwanda rugaragaza ko rukeneye ko RDC ikemura burundu ikibazo cy'umutwe wa FDLR, ikitandukanya nawo kandi ugatsinsurwa burundu. Yo kimwe n'abasesenguzi benshi, babona ko ikibazo cya M23 kizakemuka binyuze mu biganiro aho kuba intambara nk'uko ubutegetsi bwa Tshisekedi bubishaka.

Bitandukanye n’ibisanzwe, ntabwo imyanzuro yavuye mu biganiro biherutse yasohotse

Abaminisitiri b’ububanyi n’amahanga ni bo bayoboye ibi biganiro

Minisitiri w’Ububanyi n’Amahanga n’Ubutwererane w’u Rwanda, Ambasaderi Olivier Nduhungirehe, yahagarariye guverinoma y’u Rwanda

Minisitiri w’Ububanyi n’Amahanga wa RDC, Thérèse Kayikwamba Wagner, yahagarariye guverinoma y’igihugu cyabo

Minisitiri w’Ububanyi n’Amahanga wa Angola, Ambasaderi Téte António, yari umuhuza

Aba baminisitiri bazasubira mu biganiro i Luanda muri Nzeri

Uyu mukobwa wamamaye cyane ku mbuga nkoranyambaga no mu itangazamakuru, yabwiye InyaRwanda ko yabatijwe kuri uyu wa Gatandatu tariki 24 Kanama 2024 mu muhango wabereye i Gahanga kuri Sanitari.

Yavuze ko yahisemo kubatizwa 'kubera ko ari ibintu nari maze igihe nshaka, kuko nashakaga kwiyegurira Yesu nk'umwami n'umukiza'. Uwase avuga ko kubatizwa ari kimwe mu byemezo byiza yafashe mu buzima bwe.

Akomeza avuga ko agira igitekerezo cyo kubatizwa, yabiganiriyeho n'inshuti ye, Dylan R. Ngenzi batangira urugendo rwo kwigira kubatizwa. Ati 'Twabiganiriyeho, dutangira urugendo.'

Miss Uwase yitabiriye irushanwa rya Miss Rwanda mu 2015, yegukanye ikamba ry'Igisonga cya mbere cya Miss Kundwa Doriane wegukanye ikamba uwo mwaka.

Kuva ubwo ntiyasibye mu itangazamakuru cyane cyane mu nkuru z'urukundo. Aherutse kwinjira mu bushabitsi bushamikiye ku birungo by'ubwiza ashinga sosiyete yise 'Her Majesty'.

Mu kwamamaza ibikorwa bye, yifashisha cyane Nishimwe Naomie wabaye Miss Rwanda 2020, Nshuti Divine Muheto wabaye Miss Rwanda 2022, Kayumba Darina wabaye igisonga cya Kabiri cya Miss Rwanda 2022 n'abandi.

Uwase Raïssa Vanessa wabaye Igisonga cya mbere cya Miss Rwanda yabatirijwe muri Zion Temple

Uwase Raïssa Vanessa yavuze ko kubatizwa ari kimwe mu byemeza byiza yafashe mu buzima bwe

Uwase yavuze ko yatangiye urugendo rushya mu mibanire ye n'Imana

Dyland R.Ngenzi waganiriye na Uwase mu rugendo rwo kubatizwa no kwegerana n'Imana

Inama y'Abaminisitiri yateranye bwa mbere nyuma y'Uko hashyizweho Guverinoma nshya, yafashe ibyemezo binyuranye ndetse inashyira mu myanya abayobozi banyuranye.

Iyi nama yateranye kuri uyu wa Gatanu tariki 23 Kanama 2024, iyobowe na Perezida Paul Kagame muri Village Urugwiro, yagize Sandrine Isheja Butera Umuyobozi Mukuru Wungirije w'Ikigo cy'Igihugu cy'Itangazamakuru, RBA.

Sandrine asanzwe ari umushyushyarugamba (MC) mu birori n'ibitaramo bikomeye mu Rwanda. Kandi amaze igihe kinini ari mu mwuga w'itangazamakuru aho akora ibiganiro bishamikiye ku buzima no gufasha abantu kwidagadura mu bihe bitandukanye.

Mu bikorwa byo kwiyamamaza kuri Perezida Kagame, Sandrine yafatanyije na Luckman Nzeyimana kuyobora ibikorwa byo kwiyamamaza byabereye mu Karere ka Nyarugenge, yanafatanyije na Minisitiri Utumatwishima kuyobora ibyabereye i Gahanga ya Kicukiro.

Mu butumwa bwo ku rubuga rwa X yanditse kuri uyu wa Gatandatu tariki 24 kanama 2024, ahagana saa tanu z'amanywa, yagaragaje ishimwe afite ku mutima nyuma y'uko Perezida Kagame amugiriye icyizere.

Ati 'U Rwanda nirugusaba amaboko uzaruhe n'umutima! Ibi nibyo mwadutoje, Nyakubahwa PaulKagame, mbashimiye icyizere mwangiriye.'

Yavuze ko mu mirimo yashinzwe muri RBA 'Niteguye gutanga ubwenge, umutima n'amaboko yanjye mu gukomeza kubaka u Rwanda.'

Uyu mugore yashimye kandi abamwifurije ishya n'ihirwe mu mirimo mishya yahawe. Ati 'Abanyifurije ishya n'ihirwe mwakoze, gahunda ni yayindi #RBAHafiYawe.' 

Isheja Sandrine Butera ni umunyamakurukazi wamenyekanye mu biganiro by'imyidagaduro, n'ubuzima rusange kuri Radiyo zitandukanye zo mu Rwanda.

Kuri ubu anayobora ibirori bitandukanye cyane cyane ibyitabirwa n'abiyubashye ndetse niwe wari unakuriye Akanama Nkempurampaka mu irushanwa rya Miss Rwanda 2018.

Isheja Sandrine Butera yasezeranye n'umukunzi we Kagame Peter mu muhango wabereye ku biro by'Umurenge wa Remera mu Karere ka Gasabo kuwa 15 Nyakanga 2016. Aho taliki ya 16 Nyakanga 2016 aribwo basezeranye imbere y'Imana bahamya isezerano ryabo ko bazabana akaramata. Aho magingo aya ari umunyamakuru ukunzwe ndetse wakoze kuri Radio zitandukanye zirimo Salus FM, Isango Star n'ahandi.

Sandrine Isheja Butera ni bucura bw’iwabo mu bana bavukana uko ari 3. Yize itangazamakuru nitumanaho asoza amashuri ye mumwaka wa 201.

Yatangiye gukora umwuga we w'itangazamakuru mu 2008 ku ishuri yigagaho Kaminuza Sandrine kandi avuga ko akunda ibiryo bya Abashinwa ndetse no koga.

Agakunda kandi umuziki cyane azwiho ko akunda amabara atandukanye muriyo harimo umutuku, Orange, n’ icyatsi akunda kandi abantu bamusetsa cyane akunda igihugu cye cy'u Rwanda ntakunda abanebwe cyangwa abantu bamubeshya.  Ni umwe mu bagore bakora cyane imyitozo ngororamubiri, kandi babishikariza abandi.

U Rwanda nirugusaba amaboko uzaruhe n'umutima! Ibi nibyo mwadutoje, Nyakubahwa @PaulKagame , mbashimiye icyizere mwangiriye kandi niteguye gutanga ubwenge, umutima n'amaboko yanjye mu gukomeza kubaka u 🇷🇼 . Abanyifurije ishya n'ihirwe mwakoze, gahunda ni yayindi #RBAHafiYawe https://t.co/mWLl3bVC1j

— Sandrine ISHEJA (@SandrineISHEJA) August 24, 2024

  

Sandrine Isheja Butera yashimye Perezida Paul Kagame wamugiriye icyizere

Sandrine yari asanzwe ari umunyamakuru w'ibanze wa Radio Kiss Fm 

Ubwo Sandrije Isheja yari kumwe na Minisitiri Utumatwishima mu bikorwa byo kwamamaza Perezida Kagame i Gahanga ya Kicukiro

APR FC irakira Azam FC mu mukino wo kwishyura w’ijonjora rya mbere rya CAF Champions League aho umutoza ashobora gukora impinduka 2 muri 11 babanjemo ku mukino ubanza.

Ni umukino uteganyijwe kuri uyu wa Gatandatu tariki ya 24 Kanama 2024 saa 18h00′ kuri Stade Amahoro.

Umukino ubanza wabereye kuri Azam Complex, APR FC yatsinzwe 1-0, ikaba isabwa gutsinda ku kinyuranyo cy’ibitego 2 kugira ngo yizere gukomeza mu kindi cyiciro.

Umutoza wa APR FC, Darko Novic akaba ashobora gukora impinduka nke muri 11 babanjemo ku mukino ubanza, aho Richmond Lamptey ashobora kuvamo hakinjiramo Taddeo Lwanga na Dushimimana Olivier akavamo hakajyamo Mugisha Gilbert.

11 bashobora kubanzamo

Umunyezamu: Pavelh Ndzila

Ba Myugariro: Byiringiro Gilbert, Niyomugabo Claude, Niyigena Clement na Nshimiyimana Yunusu

Abakina mu Kibuga Hagati: Taddeo Lwanga, Seidu Dauda Yussif na Ruboneka Bosco

Abataha Izamu: Mahamadou Lamine Bah, Mugisha Gilbert na Mamadou Sy

APR FC irakina na Azam FC kuri uyu wa Gatandatu

Uru ruganda rwahiye ku wa 05 Kanama 2024, ahagana Saa Kumi n'Imwe z'Igitondo. Ibikoresho byose byari birimo byifashishwaga mu kazi ka buri munsi nk'imyenda, ipamba n'ibindi, byarahiye.

Umuyobozi Ushinzwe imikoranire n'ibindi bigo muri C&D Products Rwanda, Ntabana Yves, yabwiye IGIHE ko ibyavuye mu igenzura ryakozwe n'Ikigo cy'Igenagaciro, bigaragaza ko gushya k'urwo ruganda byateje igihombo cy'asaga miliyari 1,6 Frw.

Yavuze ko hategerejwe ibizava muri raporo ya nyuma y'Urwego rw'Igihugu rw'Ubugenzacyaha (RIB).

Bivugwa ko igice cy'inyubako cyahiye gifite agaciro ka miliyoni 418 Frw, mu gihe ibyahiriyemo birimo imashini, ameza n'ibindi bikoresho bifite agaciro ka miliyari 1,232 Frw.

Gushya k'uruganda rwa C&D Products Rwanda byateje igihombo cy'asaga miliyari 1,6 Frw

Muri Kamena 2021 ni bwo hasohotse Iteka rya Minisitiri ryerekeye urumogi n'ibirukomokaho.

Rigena ibigo n'ahandi hantu hakorerwa ibikorwa bijyanye no guhinga, gutunganya, gukwirakwiza no gukoresha urumogi n'ibirukomokaho, itangwa ry'uburenganzira bwo kubikora n'amabwiriza y'umutekano agomba kubahirizwa.

Ubu ushaka guhinga urumogi asaba uruhushya rw'agateganyo rwo gukora ibyo bikorwa mu Rwego rw'Igihugu rushinzwe ubugenzuzi bw'Ubuziranenge, ihiganwa mu bucuruzi no kurengera umuguzi, RICA.

Urwo ruhushya ni na rwo rufasha rwiyemezamirimo ushaka gukora ubuhinzi bw'urumogi kubona ibyemezo bisabwa kugira ngo abone uruhushya rwa burundu.

Uruhushya rw'agateganyo ruboneka mu minsi ibiri mu gihe urusaba yujuje ibisabwa, serivisi ikishyurwa miliyoni 1 Frw.

Ufite konti ku Irembo n'utayifite bose bashobora gusaba iyo serivisi. Ikigo cyangwa umuntu ushaka gukora ubwo buhinzi agomba kuba afite nimero iranga usora (TIN).

Asabwa kandi kuba afite fotokopi ya pasiporo n'icyemezo gitangwa n'Urwego rw'Igihugu rw'Iterambere, RDB kigaragaza ko uwo muntu akwiriye urwo ruhushya rwo guhinga urumogi.

Ibindi ni ukuba umuntu afite 'certificat' y'ishoramari itangwa n'inzego zifibifite ububasha nka RDB, kugaragaza mu buryo burambuye uko ubuhinzi buzakorwa, icyemezo cy'uko ushaka gukora ubwo bucuruzi yanditswe muri RDB.

Ibindi bishobora gusabwa ushaka uruhushya rw'agateganyo rwo guhinga urumogi ashobora gusabwa n'impamyabumenyi iriho umukono wa noteri.

Ushaka uruhushya rwa burundu rwo guhinga urumogi mu Rwanda ku mpamvu z'ubuvuzi na we aruhabwa na RICA.

RICA ibanza gusura aho ubwo buhinzi buzakorerwa harebwa niba hujuje ibyangombwa byose uru rwego rusaba.

Ibintu bikorwa mu minsi 14, ushaka uruhushya akaba yarubonye mu gihe yujuje ibisabwa, ndetse iyo serivisi igatangirwa ubuntu.

Nk'uko bisanzwe na none ushaka uruhushya rwa burundu aba agomba kuba afite nimero iranga usora (TIN), agasabwa n'ibindi bintu 11 bituma yemererwa.

Birimo fotokopi ya pasiporo, kugaragaza mu buryo burambuye uko site izakorerwaho ibyo bikorwa imeze, ibiyikikije mbese uko aho hantu hose hateye.

Uwo muntu kandi asabwa ikigaragaza ko yanditswe muri RDB, icyemezo gitangwa na Polisi y'u Rwanda kigaragaza ko ibyo agiye gukora birindiwe umutekano na raporo itangwa na RDB igaragaza ko iyo mirimo yagenzuwe ku bijyanye no kurengera ibidukikije.

Ushaka uruhushya rwa burundu agaragaza inyandiko ivuguruye ijyanye n'uko azakora ubwo buhinzi, raporo igaragaza abazakora muri ubwo buhinzi, abakozi, n'abandi bantu bashobora kubigiramo uruhare n'ubunararibonye abo bantu bafite.

Barimo nk'umuntu ushinzwe ibijyanye n'ubuziranenge bw'ibikorwa, ushinzwe umusaruro n'abahinzi babaza babarizwa muri ibyo bikorwa.

Agomba kugaragaza kandi raporo y'isuzuma ryakorewe muri laboratwari igaragaza ko ubutaka buzakorerwaho ubwo buhinzi bw'urumogi butanduye, burimo nk'ibyuma, imiti yangiza n'ibindi.

Agaragaza ikindi cyemezo cya laboratwari kigaragaza niba amazi azifashishwa mu kuhira ibyo bihingwa atarimo ibyakwangiriza ibihingwa mu buryo bumwe cyangwa ubundi.

Mu bindi ni uko ushaka uruhushya rwa burundu rwo guhinga urumogi agaragaza impagararizi z'ibyo azapfunyikamo uwo musaruro udatunganyije, n'ibimenyetso yagerageje gushyiraho bigaragaza icyo gihingwa, akanatanga kopi y'uruhushya rw'agateganyo.

Ubu Leta y'u Rwanda yamaze gutegura umushinga wo guhinga urumogi kuri hegitari 134, ruzajya rwifashishwa mu rwego rw'ubuvuzi.

Akarere ka Musanze ni kamwe mu twagaragaye ko twakweramo icyo gihingwa ndetse ubu imirimo yo kubaka uruganda ruzajya rutunganya umusaruro w'ubuhinzi bwarwo, ruri kubakwa muri ako karere igeze kure, bigateganywa ko izarangira muri Nzeri 2024.

Ruri kubakwa n'ikigo kizwi nka King Kong Organics, KKOG, aho cyashoyemo miliyoni 10$.

RDB yamaze gutanga hegitari 35 z'ubutaka bwo mu Karere ka Musanze ku bashoramari batanu bagaragaje ubushake bwo kubyaza umusaruro ubuhinzi bw'urumogi.

Ni ibikorwa bikomeje gushorwamo imari cyane kuko muri uyu mwaka a 2024/2025 RDB yateganyije miliyari 2 Frw.

Ahazahingwa urumogi hazashyirwa uburinzi

Umuntu wemererwa guhinga urumogi, ashyira uruzitiro rw'ibice bibiri aho ruhinze kandi hakabaho irondo rihoraho.

Umutekano ucungwa na sosiyete yemewe itanga serivisi z'umutekano zitangwa n'abikorera, icunga umutekano wo hanze amasaha yose agize umunsi kandi mu minsi yose igize icyumweru.

Ikindi kandi hagomba kuba hari Camera zicunga umutekano n'iminara ifasha muri icyo gikorwa. Hagomba kuba hari kandi ibimenyetso bimyasa; itumanaho rigenzurwa n'ibindi bikorwa bituma haba ahantu hacunzwe neza.

Imibare igaragaza ko ku rwego rw'Isi, umusaruro w'urumogi witezweho kuzamuka aho uzajya winjiza nibura miliyari ibihumbi 197,7 z'amadolari mu 2028, avuye kuri miliyari 28,3 mu 2021. Rushobora gufasha mu ikorwa ry'miti yifashishwa kwa muganga, rugakoreshwa mu nganda, amavuta ndetse n'ibiribwa.

Biteganyijwe ko amasoko akomeye ashobora kugemurwaho urumogi rwo mu Rwanda arimo ayo muri Leta zunze Ubumwe za Amerika, Canada no mu bihugu by'i Burayi.

Ushaka uruhushya rwo guhinga urumogi ubu yarubona anyuze ku IremboGov

Biravugwa Ishyirahamwe ry’umupira w’amaguru mu Rwanda, FERWAFA, ryamaze gukaza umutekano ku kibuga ku buryo nta mufana uzongera guha umukinnyi amafaranga mu rwego rwo kubacungira umutekano.

Byari bimaze kumenyerwa ko akenshi iyo umukinnyi yitwaraga neza mu mukino, abafana b’ikipe ye mu rwego rwo kumushimira bamuhaga amafaranga.

Ibi akenshi bikunda kugaragara ku bakunzi b’ikipe ya Rayon Sports ni bo bakunda guha abakinnyi amafaranga ariko akaba ari umuco umaze kwandura no mu bafana bandi makipe.

Amakuru ISIMBI yamenye ni uko Ishyirahamwe ry’Umupira w’Amaguru mu Rwanda (FERWAFA) binyuze muri Komisiyo y’umutekano ya yo yakoranye inama n’abantu bacunga umutekano ku kibuga mu gihe cy’umukino (Stewards) bababwira ko batagomba kwemera ko hari umufana uzongera guha amafaranga umukinnyi.

Ibi bikaba ngo ari mu rwego kubungabunga umutekano w’aba bakinnyi ko hari ikintu kibi gishobora kubabaho muri icyi gihe barimo bakusanya aya mafaranga bahabwa n’abafana cyane ko baba begeranye n’abafana cyane.

Gusa bimeze nk’aho bishobora kuzagorana kuko n’inshuro zose na polisi yagerageje kubabuza nta kintu na kimwe byatanze kuko bakomeje kubaca mu rihumye bakayatanga ibura icyo ibikoraho.

FERWAFA ntiyemera ko abafana bakomeza kujya baha amafaranga abakinnyi

Itsinda rya Hygette na Cynthia, ni abana b’impanga bavutse mu 2007, bisobanuye ko bafite imyaka 17 gusa y’amavuko. Bavuka mu muryango w’abana 10, bakaba bakomoka mu Ntara y’Iburengerazuba mu Karere ka Rubavu. Uyu munsi, bombi baracyari abanyeshuri bitegura kwimukira mu mwaka wa kabiri w’ayisumbuye.

Gakuru muri izi mpanga, yitwa Ishimwe Hygette, mu gihe gatoya ari Ahishakiye Cynthia. Urukundo bakunda umurimo wo kuramya no guhimbaza Imana, ni rwo rwasunikiye aba bana basengera mu Itorero rya ADEPR gufata icyemezo cyo kwiyunga kuri bagenzi babo basanzwe bakora uyu muziki mu buryo bwa kinyamwuga, maze binjirira mu ndirimbo bise “Ni Wowe.”

Mu kiganiro cyihariye, ufasha aba bana ari na we wabandikiye iyi ndirimbo witwa Ishimwe Claude yagiranye na InyaRwanda, yagize ati: “Aba bana bavutse mu 2007 bakaba bakunda kuramya no guhimbaza Imana.”

Yasobanuye ko ubutumwa bukubiye mu ndirimbo nshya bashyize hanze, ari ubwo guhumuriza imitima y’abashavuye, ikaba yibutsa abantu ko bagomba kwizera kandi bakiringira Imana gusa.

Hygette na Cynthia, bafite intumbero yo kugeza ubutumwa bwiza kure hashoboka, bakaba basaba abantu bose kubashyigikira mu buryo bwose bareba indirimbo yabo ya mbere yamaze kugera ku muyoboro wabo wa YouTube.

Iyo uganiriye nabo, wumva ko ari abana bafite intego nziza ndetse bifuza kugera kure, cyane ko bavuga ko bafatira urugero ku muhanzikazi Aline Gahongayire ndetse n’itsinda ry’abana b’abakobwa bamaze gushinga imizi mu muziki wo kuramya no guhimbaza Imana, rya Vestine na Dorcas.

Hygette na Cynthia ni itsinda rishya Gospel Nyarwanda yungutse

Ni abana b’impanga bakunda kuramya no guhimbaza Imana 

Bafite imyaka 17 gusa ariko bafite intumbero yagutse

Bafatira urugero kuri Vestine na Dorcas 

Aline Gahongayire ni icyitegererezo cyabo

Cyabaye igitaramo cya mbere uyu muhanzi yakoreye muri kiriya gihugu, cyabereye mu mbuga ya Lugogo Cricket Oval isanzwe yakira abantu barenga ibihumbi 15.  Yagikoze abanjirijwe n'abandi bahanzi bo muri kiriya ndetse n'abavugabutumwa bakomeye, mu ijoro ryo kuri uyu wa Gatanu tariki 23 Kanama 2024.

Yitaye ku kuririmba cyane indirimbo ze zamamaye mu rurumi rw'Ikinyarwanda, ndetse n'izo yahimbye mu rurimi rw'igiswahili. Israel Mbonyi yaririmbye indirimbo nka 'Ibihe', 'Nina Siri', 'Tugumane', 'Hari ubuzima', 'Nturi wenyine', 'Nk'umusirikare' n'izindi.

Ibinyamakuruu byo muri Uganda, bivuga ko mu gitaramo hagati uyu muhanzi yafashe umwanya wo kuririmba indirimbo 'Yesu Beera Nange' ya Judith Babirye mu rwego rwo kumuha icyubahiro nk'umuhanzi ufite amateka akomeye mu muziki wa 'Gospel' mu karere k'Afurika y'Iburasirazuba.

Judith ari mu bahanzi bakoze ibihangano byatumye Uganda ivugwa cyane ku ruhando mpuzamahanga. Muri iki gihe, ni umuvugabutumwa mu itorero 'New Life Deliverance Church”, itorero riherereye mu Majyepfo ashyira Uburasirazuba bw'Umujyi wa Kampala muri Uganda.

Hagati ya 2016-2021 yabaye Umudepite mu Inteko Ishinga Amategeko ahagarariye Intara ya Buikwe. Uyu mugore afite impamyabumenyi y'icyiciro cya kabiri cya Kaminuza mu bijyanye n'ubuhanzi n'ubukerarugendo yakuye muri Makerere University.

Mu 2006 nibwo yakoze indirimbo yahinduye amateka y'ubuzima bwe yitwa 'Yesu Beera Nange' yacuranzwe igihe kinini ku bitangazamakuru by'imbere mu gihugu, mu bihugu byo mu Karere k'Afurika y'Iburasirazuba n'ahandi.

Ariko kandi yanasohoye indirimbo zirimo nka “Wambatira”, “Omusaayi gwa Yesu”, “Ekitibwa kyo Mukama”, “Maama” n'izindi.  

Afite ku isoko Album enye zirimo 'Beera Nange' yasohoye mu 2006, mu 2007 yasohoye Album 'Yesu Asobola', mu 2008 ashyira hanze Album 'Nzijukira' ni mu gihe mu 2011 yasohoye Album 'Wanjagala'.

Israel Mbonyi yaririmbye afatanyije n'abanya-Uganda n'abandi bitabiriye iki gitaramo. Ashingiye ku gisobanuro cy’izina rye, yumvikanishije ko Imana yamugize icyambu.

Mu butumwa bwo ku rubuga rwa X, Israel Mbonyi yagaragaje ko yakozwe ku mutima n'urukundo yeretswe muri iki gitaramo cy'akataraboneka n'urwibutso kuri we.